UzbekAI

Ўзбекистон Республикаси Олий суди Раёсатининг

Қарори

ТАРТИБИ

Республика фуқаролик ишлари бўйича судларига мурожаатларни «E-XSUD» ахборот тизими орқали тақдим қилиш Тартибини тасдиқлаш тўғрисида

Фуқаролик ишлари бўйича судларга ахборот тизими орқали тақдим этилаётган ҳужжатларнинг шакл ва мазмун жиҳатдан процессуал қонун талабларига мувофиқлигини таъминлаш ҳисобига иш самарадорлигини ошириш, амалдаги ахборот тизимларини мақбуллаштириш, ушбу жараёнларда ташқи фойдаланувчиларнинг ахборот тизимлари билан ишлаш кўникмаларини шакллантириш ва янада такомиллаштириш мақсадида, Республика фуқаролик ишлари бўйича судларига мурожаатларни «E-XSUD» ахборот тизими орқали тақдим қилиш Тартибини муҳокама этиб, «Судлар тўғрисида»ги Ўзбекистон Республикаси Қонунининг 24-моддасига асосан Олий суд Раёсати қарор қилади:

1. Республика фуқаролик ишлари бўйича судларига мурожаатларни «E-XSUD» ахборот тизими орқали тақдим қилиш Тартиби иловага мувофиқ тасдиқлансин.

2. Олий суднинг фуқаролик ишлари бўйича судлов ҳайъати (Г. Парпиева), Девонхона бўлими (Б. Алимжанов), Мурожаатлар билан ишлаш бошқармаси (Т. Обидов), Қорақалпоғистон Республикаси фуқаролик ишлари бўйича суди, фуқаролик ишлари бўйича вилоятлар, Тошкент шаҳар, туманлараро ва туман (шаҳар) судларининг раислари:

судья ва суд ходимлари иштирокида мазкур Тартиб мазмун ҳамда моҳиятини чуқур ўрганиб, уларнинг ахборот тизими орқали электрон ҳужжатлар айланиши соҳасидаги билимлари ва касб-малакаларини мунтазам ошириб боришларини таъминлаш юзасидан зарурий чораларни кўрсин;

Тартибни кенг жамоатчиликка, шунингдек давлат идоралари ва ташкилотлари вакиллари, тадбиркорлик субъектлари, фуқаролар иштирокида ўтказиладиган учрашувларда кенг тарғиб қилсин;

Тартибга тўлиқ риоя этилишини таъминлаш борасида шахсан масъул эканликлари ҳақида огоҳлантирилсин;

жорий йилнинг 1 мартига қадар амалга оширилган ишлар натижалари юзасидан Олий суд раҳбариятига батафсил ахборот тақдим этсин.

3. Олий суднинг Ахборот-коммуникация технологияларини жорий қилиш ва ахборот хавфсизлигини таъминлаш бошқармаси (Б. Очилов):

ахборот тизими орқали фуқаролик ишлари бўйича судларга мурожаатларни ва уларга илова қилинадиган ҳужжатларни электрон шаклда тақдим қилиш, шунингдек суд муҳокамаси иштирокчилари томонидан суд ҳужжатларини, жавоб хатларини қабул қилиб олиш имконини берувчи электрон дастурий таъминотнинг узлуксиз ишлашини таъминлаш чораларини кўрсин;

судларга электрон шаклда мурожаат қилувчиларга янада қулайлик яратиш мақсадида ахборот тизимидан фойдаланиш бўйича махсус қўлланма тайёрлаб, уни ушбу Тартиб билан бирга тегишли Олий суднинг веб-сайтига ҳамда ахборот тизимига жойлаштирсин;

жорий йилнинг 14 февралига қадар Олий суднинг Матбуот хизмати (А. Абидов) билан биргаликда Тартибнинг мазмун-моҳияти, уни амалиётга жорий этишнинг зарурияти ва мақсадлари ёритилган ахборотни Олий суднинг веб-сайтида эълон қилсин;

жорий йилнинг 17 февралига қадар видеоконференцалоқа режимида судья ва суд ходимлари иштирокида ўқув-семинар машғулотини ўтказсин.

4. Олий суд ҳузуридаги Судлар фаолиятини таъминлаш департаменти (Б. Тешабаев) судларнинг оптик толали алоқа ва Интернет тармоғи фаолиятини узлуксиз ишлашини ҳамда ахборот тизимидан фойдаланишда зарур бўлган компьютер техникалари билан доимий таъминлаб бориш вазифаси юклатилсин.

5. Тартиб Олий суднинг фуқаролик ишлари бўйича судлов ҳайъати, Девонхона бўлими, Мурожаатлар билан ишлаш бошқармаси, Қорақалпоғистон Республикаси фуқаролик ишлари бўйича суди, фуқаролик ишлари бўйича вилоятлар, Тошкент шаҳар, туманлараро ва туман (шаҳар) судларига хизматда фойдаланиш учун юборилсин.

6. Мазкур қарорнинг ижросини назорат қилиш Ўзбекистон Республикаси Олий суди раисининг ўринбосари — фуқаролик ишлари бўйича судлов ҳайъати раиси Х. Ёдгоров зиммасига юклансин.

Олий суд Раёсатининг 2020 йил 30 январдаги РС-02-20-сонли қарорига ИЛОВА

Республика фуқаролик ишлари бўйича судларига мурожаатларни «E-XSUD» ахборот тизими орқали тақдим қилиш

Республика фуқаролик ишлари бўйича судларига мурожаатларни «E-XSUD» ахборот тизими орқали тақдим қилиш Тартиби (бундан буён матнда Тартиб деб юритилади) республика фуқаролик ишлари бўйича судларига мурожаатларни «E-XSUD» ахборот тизими орқали тақдим этиш, мазкур мурожаатлар юзасидан олиб борилган процессуал ҳаракатлар ва уларнинг натижалари юзасидан мурожаат муаллифларини хабардор қилиш муносабатларини тартибга солади.

Ушбу Тартиб қоидалари бошқа ахборот тизимлари орқали фуқаролик ишлари бўйича судларга тақдим этилган мурожаатлар масалаларига татбиқ этилмайди.

1. Асосий тушунчалар

Мазкур Тартибда қуйидаги асосий тушунчалар қўлланилган:

мурожаат — даъво аризаси (ариза), шикоят, протест, илтимоснома ва қонун ҳужжатларида назарда тутилган бошқа мурожаатлар;

ишда иштирок этувчи шахслар — тарафлар, учинчи шахслар, уларнинг вакиллари, ариза берувчилар ва алоҳида тартибдаги ишлар бўйича бошқа манфаатдор шахслар, прокурор, ишда бошқа шахсларнинг ҳуқуқлари ва қонун билан қўриқланадиган манфаатларини ҳимоя қилишда иштирок этадиган давлат бошқаруви органлари, ташкилотлар ва айрим фуқаролар;

ташқи фойдаланувчи — белгиланган тартибда ахборот тизимида рўйхатдан ўтиш орқали «шахсий кабинет» ташкил қилган шахс;

суд ҳужжатлари — ҳал қилув қарори, ажрим, қарор, суд буйруғи (ижро варақаси);

жавоб хатлари — суд ҳужжати ҳисобланмаган, ташкилот ва фуқароларнинг мурожаатларига жавоб тариқасида қайтарилган хатлар;

ЖШШИР — жисмоний шахснинг шахсий идентификация рақами;

СТИР — солиқ тўловчининг идентификация рақами;

PDF — Adobe System компанияси томонидан ишлаб чиқилган электрон ҳужжатларнинг алоҳида формати;

браузер — интернет тармоғидаги веб-иловаларни бошқариш, қайта ишлаш имконини берувчи ва уларнинг таркибидаги маълумотларни акс эттирувчи дастурий таъминот.

2. «E-XSUD» ахборот тизимида рўйхатдан ўтиш тартиби

Ҳар қандай манфаатдор шахс бузилган ёки низолашилаётган ҳуқуқи ёхуд қонун билан қўриқланадиган манфаатини ҳимоя қилиш учун фуқаролик суд ишларини юритиш тўғрисидаги қонун ҳужжатларида белгиланган тартибда фуқаролик ишлари бўйича судга (судга) мурожаат қилишга ҳақли (Ўзбекистон Республикаси Фуқаролик процессуал кодексининг (бундан буён матнда ФПК деб юритилади) 3-моддаси).

Мурожаат ва унга илова қилинадиган ҳужжатлар судга электрон ҳужжат тарзида юборилиши мумкин (ФПКнинг 4-моддаси). Бунинг учун манфаатдор шахс www.exsud.sud.uz манзилида жойлашган Ўзбекистон Республикаси Олий судининг электрон қабулхонасида белгиланган тартибда рўйхатдан ўтиши талаб этилади.

«E-XSUD» ахборот тизимида рўйхатдан ўтиш тартиби Ўзбекистон Республикаси Олий судининг электрон қабулхонасининг бош саҳифасида жойлашган қўлланма асосида амалга оширилади.

Тизимда рўйхатдан ўтган ташқи фойдаланувчиларга кейинчалик ўзининг «шахсий кабинети»га кириши учун қайтадан рўйхатдан ўтиш талаб этилмайди.

«E-XSUD» ахборот тизими имкониятларидан тўлиқ фойдаланиш учун интернет браузерларининг қуйидаги версияларидан фойдаланиш тавсия этилади:

Google Chrome — 79 версиясидан юқори;

Mozilla Firefox — 69 версиясидан юқори;

Safari — 13 версиясидан юқори;

Opera — 65 версиясидан юқори.

3. «E-XSUD» ахборот тизими орқали фуқаролик ишлари бўйича судларга тақдим этиладиган мурожаатларга қўйиладиган умумий талаблар

3.1. Фуқаролик ишлари бўйича судларга «E-XSUD» ахборот тизими орқали тақдим этиладиган мурожаатлар сканерлаш ускуналари ёрдамида электрон файл кўринишига келтирилиши керак.

Сканер қилинган ҳар бир ҳужжат мазмунига кўра алоҳида электрон файл кўринишида сақланиши лозим (масалан, даъво аризаси уни неча саҳифадан иборатлигидан қатъи назар алоҳида битта файлга, давлат божи тўланганлигини тасдиқловчи квитанция алоҳида битта файлга, даъво аризасига илова қилинадиган бошқа ҳужжатлар, хусусан шартнома, ҳисоб-фактура, талабнома, ҳисобларни ўзаро солиштирма далолатномаси ва бошқа ҳужжатлар, саҳифалари сонидан қатъи назар, алоҳида-алоҳида сақланади ва ҳ.к.). Мазмуни жиҳатдан ҳар хил бўлган ҳужжатларни, масалан, даъво аризаси ва шартномани ёки талабнома ва давлат божи тўланганлиги тўғрисидаги банк квитанциясини битта файлга сақлаш мурожаатни ахборот тизими орқали тақдим этиш тартибига риоя этилмаган деб ҳисобланади ва мурожаатни уни тақдим этган шахсга электрон шаклда қайтарилишига асос бўлади.

Илова қилинган файллар сони судга тақдим этилаётган ҳужжатлар сонига тенг бўлиши, файлларни номи уларни қандай ҳужжат эканлигини ва неча варақдан иборатлигини аниқлаш имконини бериши лозим (масалан, 209-сонли шартнома 3 варақда).

Сканер қилинган ҳужжатларнинг сифати уларни ҳақиқийлигини тасдиқловчи белгиларни, хусусан, имзо, печать, штамп, ҳужжат рақами ва санасини аниқлаш имконини берадиган даражада бўлиши керак.

Ҳужжатлар судга фақат PDF форматида юборилади.

Ҳар бир илова қилинган файлнинг ҳажми 10 мегабайтдан ошмаслиги керак.

Ахборот тизими орқали судга келиб тушган мурожаатлар ва уларга илова қилинадиган ҳужжатларнинг асл нусхалари суд мажлисига тақдим этилиши лозим (буйруқ тартибида юритиладиган ишлар бўйича келиб тушган аризалар бундан мустасно).

3.2. Қуйидаги ҳолатларда мурожаатлар электрон қабулхона орқали қабул қилинмайди ва ташқи фойдаланувчига қайтарилади, агар:

ҳужжатлар сифатсиз сканер қилинганлиги сабабли уларни ўқиш имконияти бўлмаса;

ҳужжатлар тартибсиз ёки тескари сақланганлиги сабабли уларни ўқиш имконияти бўлмаса;

ҳужжат варақлари тўлиқ бўлмаса;

аризага илова деб кўрсатилган ҳужжатлар тўлиқ бириктирилмаган бўлса;

бириктирилган файлда матн мавжуд бўлмаса;

ҳужжатлар мазкур Тартибда назарда тутилган PDF форматида юборилмаган бўлса;

суд томонидан ҳали кўриб чиқилмаган айни бир тарафлар ўртасидаги, айни бир предмет тўғрисидаги ва айни бир асослар бўйича мурожаат такроран юборилган бўлса;

ҳужжатлар имзоланмаган бўлса;

ҳужжатлар тегишли фуқаролик ишлари бўйича судга йўлланмаган бўлса;

сканер қилинган бошқа-бошқа мазмундаги ҳужжатлар битта файлга сақланган бўлса (ҳужжатлар номланишига кўра алоҳида файлларга ажратилмаган бўлса);

файлларнинг номлари сақланган ҳужжатларга мувофиқ бўлмаса;

юбориш мазкур Тартибда назарда тутилмаган мурожаат келиб тушган бўлса.

Юқорида кўрсатилган асослар бўйича қайтарилган мурожаатлар фуқаролик ишлари бўйича судга «E-XSUD» ахборот тизими орқали кирим қилинмаган ҳисобланади. Мурожаатни қайтариш учун асос бўлган ҳолатлар бартараф этилганидан кейин ташқи фойдаланувчи ушбу мурожаатни «E-XSUD» ахборот тизими орқали такроран тақдим этиши мумкин.

4. Мурожаатни биринчи инстанция судларига юбориш

Ташқи фойдаланувчи фуқаролик ишлари бўйича судларга мурожаатни шахсий кабинети орқали электрон ҳужжат тарзида тақдим этади.

4.1. Даъво аризасини (аризани) тақдим этиш тартиби

Ташқи фойдаланувчи даъво аризасини (аризани) фуқаролик ишлари бўйича судга «E-XSUD» ахборот тизими орқали тақдим этиш учун ўз «шахсий кабинети»да қуйидаги олти босқичдан иборат ҳаракатларни амалга оширади:

Биринчи босқичда даъво аризаси (ариза) рақами, санаси, иш юритиш тартиби, даъво суммаси (асосий қарз, неустойка) ва ихтиёрий тўланган давлат божи, почта харажатлари, видеоконференцалоқа харажатлари суммаси киритилади. Ушбу суммаларни киритиш учун уларни тўланганлигини тасдиқловчи квитанция маълумотларини киритиш қаторини тўлдириш талаб этилади. Шунингдек, асосий иш туркуми, агар қўшимча талаблар мавжуд бўлса, қўшимча иш туркуми, иккиламчи иш туркумлари танланади.

Иккинчи босқичда даъвогарга тааллуқли маълумотлар киритилади. Хусусан, даъвогар жисмоний шахс бўлса, шахс тури қаторидан жисмоний шахс тури танланиб, паспорт серияси, ЖШШИР, фамилияси, исми, отасининг исми, туғилган санаси, ёши, фуқаролиги, жинси, туғилган жойи, яшаш жойи ҳақидаги маълумотлар киритилади.

Даъвогар юридик шахс бўлса СТИР рақами, банкдаги ҳисоб рақами, хизмат кўрсатувчи банк номи, жавобгар жойлашган ҳудуд (айнан туман ёки туманга тенглаштирилган шаҳар танланиши шарт), юридик манзили, даъвогарнинг (аризачининг) номи, почта индекси, телефон рақами, раҳбарнинг фамилияси, исми, отасининг исми каби маълумотлар киритилади.

Агар даъвогарнинг манфаатида бошқа ташкилот судга мурожаат қилаётган бўлса, ушбу ташкилот кўрсатилади.

Учинчи босқичда жавобгарга тааллуқли маълумотлар киритилади. Хусусан, жавобгар жисмоний шахс бўлса, шахс тури қаторидан жисмоний шахс тури танланиб, паспорт серияси, рақами, ЖШШИР рақами, фамилияси, исми, отасининг исми, туғилган санаси, ёши, фуқаролиги, жинси, туғилган жойи, яшаш жойи ҳақидаги маълумотлар киритилади.

Агар жавобгар юридик шахс бўлса СТИР рақами, банкдаги ҳисоб рақами, хизмат кўрсатувчи банк номи, жавобгар жойлашган ҳудуд (айнан туман ёки туманга тенглаштирилган шаҳар танланиши шарт), юридик манзили, жавобгарнинг (қарздорнинг) номи, почта индекси, телефон рақами, раҳбарнинг фамилияси, исми, отасининг исми каби маълумотлар киритилади.

Тўртинчи босқичда даъво аризаси (ариза) тақдим этилаётган фуқаролик ишлари бўйича суд танланади. Фуқаролик ишлари бўйича судни танлашда ФПКнинг 28 — 30-моддаларида белгиланган судловга тегишлилик қоидаларига амал қилиниши шарт.

Бешинчи босқичда аввалги босқичларда киритилган маълумотлар текшириб олинади. Бунда даъвогар ва жавобгар жойлашган ҳудуд айнан у жойлашган туман ёки туманга тенглаштирилган шаҳар танланганлигига, ҳамда уларнинг СТИР рақамлари ёки паспорт маълумотлари тўғри киритилганлигига, шунингдек, тегишли фуқаролик ишлари бўйича суди белгиланганлигига алоҳида эътибор қаратиш лозим. Ушбу маълумотларни хато киритилиши кейинчалик суд томонидан қабул қилинадиган суд ҳужжатлари ижросини таъминлашда қийинчиликлар туғдириши мумкин.

Агар киритилган маълумотларда хато ёки камчиликлар аниқланса, уларни «Орқага» тугмасини босиш ёрдамида аввалги босқичларга қайтиш орқали бартараф этиш мумкин.

Олтинчи босқичда даъво аризаси (ариза) ва унга илова қилинадиган ҳужжатлар мазкур Тартибнинг 3.1-бандида белгиланган тартибда ахборот тизимига электрон шаклда бириктирилади.

Хато ёки янглишиш оқибатида бириктирилган файлларни судга юборишдан аввал ўчириш имконияти мавжуд. Файлларни ўчириш ахборот тизимига юкланган файл номи ва ҳажми ҳақидаги маълумотлар кўрсатилган қаторнинг ўнг тарафида жойлашган «Саватча» («Корзинка») тасвирланган тугмани босиш орқали амалга оширилади.

Мурожаатга тааллуқли бўлган барча зарур маълумотлар киритилганидан ва ҳужжатлар бириктирилганидан сўнг «Сақлаш» тугмасини босиш орқали даъво аризаси (ариза) ва унга илова қилинган ҳужжатлар танланган фуқаролик ишлари бўйича судга юборилади.

4.2. Қарши даъво тақдим этиш тартиби

Фойдаланувчи қарши даъвони фуқаролик ишлари бўйича судга «E-XSUD» ахборот тизими орқали тақдим этиш учун ўз «шахсий кабинети»да қуйидаги олти босқичдан иборат ҳаракатларни амалга оширади:

Биринчи босқичда қарши даъво аризаси рақами, санаси, иш юритиш тартиби, даъвогарнинг даъвоси бўйича қўзғатилган фуқаролик иши рақами, даъво суммаси (асосий қарз, неустойка) ва ихтиёрий тўланган давлат божи, почта харажатлари, видеоконференцалоқа харажатлари суммаси киритилади. Ушбу суммаларни киритиш учун уларни тўланганлигини тасдиқловчи квитанция маълумотларини киритиш қаторини тўлдириш талаб этилади. Шунингдек, асосий иш туркуми, агар қўшимча талаблар мавжуд бўлса, қўшимча иш туркуми, иккиламчи иш туркумлари танланади.

Иккинчи босқичда даъвогарга тааллуқли маълумотлар киритилади. Хусусан, даъвогар жисмоний шахс бўлса, шахс тури қаторидан жисмоний шахс тури танланиб унга тегишли паспорт серияси, рақами, ЖШШИР рақами, фамилияси, исми, отасининг исми, туғилган санаси, ёши, фуқаролиги, жинси, туғилган жойи, яшаш жойи ҳақидаги маълумотлар киритилади.

Даъвогар юридик шахс бўлса СТИР рақами банкдаги ҳисоб рақами, хизмат кўрсатувчи банк номи, жавобгар жойлашган ҳудуд (айнан туман ёки туманга тенглаштирилган шаҳар танланиши шарт), юридик манзили, даъвогарнинг (аризачининг) номи, почта индекси, телефон рақами, раҳбарнинг фамилияси, исми, отасининг исми каби маълумотлар киритилади.

Агар даъвогарнинг манфаатида бошқа ташкилот судга мурожаат қилаётган бўлса, ушбу ташкилот кўрсатилади.

Учинчи босқичда жавобгарга тааллуқли маълумотлар киритилади. Хусусан, жавобгар жисмоний шахс бўлса, шахс тури қаторидан жисмоний шахс тури танланиб, паспорт серияси, рақами, ЖШШИР рақами, фамилияси, исми, отасининг исми, туғилган санаси, ёши, фуқаролиги, жинси, туғилган жойи, яшаш жойи ҳақидаги маълумотлар киритилади.

Агар жавобгар юридик шахс бўлса СТИР рақами банкдаги ҳисоб рақами, хизмат кўрсатувчи банк номи, жавобгар жойлашган ҳудуд (айнан туман ёки туманга тенглаштирилган шаҳар танланиши шарт), юридик манзили, жавобгарнинг (қарздорнинг) номи, почта индекси, телефон рақами, раҳбарнинг фамилияси, исми, отасининг исми каби маълумотлар киритилади.

Тўртинчи босқичда қарши даъво юборилаётган фуқаролик ишлари бўйича суд танланади. Фуқаролик ишлари бўйича судни танлашда ФПКнинг 37-моддасида белгилаб қўйилган судловга тегишлилик қоидасига амал қилиниши шарт.

Бешинчи босқичда аввалги босқичларда киритилган маълумотлар текшириб олинади. Бунда даъвогар ва жавобгар жойлашган ҳудуд айнан у жойлашган туман ёки туманга тенглаштирилган шаҳар танланганлигига, ҳамда уларнинг СТИР рақамлари ёки паспорт маълумотлари тўғри киритилганлигига, шунингдек, тегишли фуқаролик ишлари бўйича суди белгиланганлигига алоҳида эътибор қаратиш лозим. Ушбу маълумотларни хато киритилиши кейинчалик суд томонидан қабул қилинадиган суд ҳужжатлари ижросини таъминлашда қийинчиликлар туғдириши мумкин.

Агар киритилган маълумотларда хато ёки камчиликлар аниқланса, уларни «Орқага» тугмасини босиш ёрдамида аввалги босқичларга қайтиш орқали бартараф этиш мумкин.

Олтинчи босқичда қарши даъво ва унга илова қилинадиган ҳужжатлар мазкур Тартибнинг 3.1-бандида белгиланган тартибда ахборот тизимига электрон шаклда бириктирилади.

Хато ёки янглишиш оқибатида бириктирилган файлларни судга юборишдан аввал ўчириш имконияти мавжуд. Файлларни ўчириш ахборот тизимига юкланган файл номи ва ҳажми ҳақидаги маълумотлар кўрсатилган қаторнинг ўнг томонида жойлашган «Саватча» («Корзинка») тасвирланган тугмани босиш орқали амалга оширилади.

Мурожаатга тааллуқли бўлган барча зарур маълумотлар киритилганидан ва ҳужжатлар бириктирилганидан сўнг «Сақлаш» тугмасини босиш орқали қарши даъво ва унга илова қилинган ҳужжатлар танланган фуқаролик ишлари бўйича судга юборилади.

4.3. Ариза ёки илтимосномани юбориш тартиби

Фойдаланувчи ариза ёки илтимосномани фуқаролик ишлари бўйича судга «E-XSUD» ахборот тизими орқали юбориш учун ўз «шахсий кабинети»да қуйидаги тўртта босқичдан иборат ҳаракатларни амалга оширади:

Биринчи босқичда ариза ёки илтимосноманинг мазмуни, рақами, санаси, аризачи ташкилот номи ёки фуқаронинг фамилияси, исми, отасининг исми, аризани ёки илтимосномани имзолаган шахс, фуқаролик ишлари бўйича судда кўрилаётган ёки кўрилган иш рақами, аризага ёки илтимосномага илова қилинган ҳужжатлар варақлари сони ҳамда ариза ёки илтимосноманинг қисқача мазмуни ҳақидаги маълумотлар киритилади.

Иккинчи босқичда ариза ёки илтимоснома юборилаётган тегишли фуқаролик ишлари бўйича суд танланади.

Учинчи босқичда аввалги босқичларда киритилган маълумотлар текшириб олинади. Агар киритилган маълумотларда хато ёки камчиликлар аниқланса, уларни «Орқага» тугмасини босиш ёрдамида аввалги босқичларга қайтиш орқали бартараф этиш мумкин.

Тўртинчи босқичда ариза ёки илтимоснома ва унга илова қилинадиган ҳужжатлар мазкур Тартибнинг 3.1-бандида белгиланган тартибда ахборот тизимига электрон шаклда бириктирилади.

Хато ёки янглишиш оқибатида бириктирилган файлларни судга юборишдан аввал ўчириш имконияти мавжуд. Файлларни ўчириш ахборот тизимига юкланган файл номи ва ҳажми ҳақидаги маълумотлар кўрсатилган қаторнинг ўнг томонида жойлашган «Саватча» («Корзинка») тасвирланган тугмани босиш орқали амалга оширилади.

Мурожаатга тааллуқли бўлган барча зарур маълумотлар киритилганидан ва ҳужжатлар бириктирилганидан сўнг «Сақлаш» тугмасини босиш орқали ариза ёки илтимоснома ва унга илова қилинган ҳужжатлар тегишли фуқаролик ишлари бўйича судга юборилади.

5. Фуқаролик ишлари бўйича судларнинг суд ҳужжатларини қайта кўриш бўйича шикоят (протест) юбориш

Ишда иштирок этувчи шахслар, шунингдек, ишда иштирок этишга жалб қилинмаган, аммо ҳуқуқлари ва мажбуриятлари тўғрисида суд ҳал қилув қарори қабул қилган шахслар биринчи инстанция судининг қонуний кучга кирмаган ҳал қилув қарори устидан апелляция шикояти, қонуний кучга кирган, апелляция тартибида кўрилмаган ҳал қилув қарори устидан кассация шикояти, прокурор эса апелляция ёки кассация протести беришга ҳақлидир (ФПКнинг 383, 403-моддалари).

Шунингдек, апелляция ёки кассация тартибида кўрилган ишлар бўйича суд ҳужжатлари устидан назорат тартибида шикоят қилиниши мумкин (ФПКнинг 422-моддаси).

5.1. Апелляция шикоятини (протестини) бериш тартиби

Фойдаланувчи апелляция шикоятини (протестини) фуқаролик ишлари бўйича судга «E-XSUD» ахборот тизими орқали бериш учун ўз «шахсий кабинети»да қуйидаги бешта босқичдан иборат ҳаракатларни амалга оширади:

Биринчи босқичда апелляция шикояти (протести) рақами, санаси, шикоят қилинаётган суд ҳужжатининг иш рақами, шикоят тури (яъни айнан қайси суд ҳужжати шикоят қилинаётганлиги), ихтиёрий тўланган давлат божи ва почта харажатлари суммаси ва уларнинг тўланганлигини тасдиқловчи квитанция маълумотлари киритилади.

Иккинчи босқичда апелляция шикояти (протести) бераётган тараф танланади. Шундан сўнг очилган ишда иштирок этувчи шахслар рўйхатидан тегишли тараф номи кўрсатилади.

Учинчи босқичда шикоят қилинаётган (протест келтирилаётган) ҳал қилув қарорини, ажримни, қарорни чиқарган суд танланади.

Тўртинчи босқичда аввалги босқичларда киритилган маълумотлар текшириб олинади. Агар киритилган маълумотларда хато ёки камчиликлар аниқланса, уларни «Орқага» тугмасини босиш ёрдамида аввалги босқичларга қайтиш орқали бартараф этиш мумкин.

Бешинчи босқичда апелляция шикояти (протести) ва унга илова қилинадиган ҳужжатлар мазкур Тартибнинг 3.1-бандида белгиланган тартибда ахборот тизимига электрон шаклда бириктирилади.

Хато ёки янглишиш оқибатида бириктирилган файлларни судга юборишдан аввал ўчириш имконияти мавжуд. Файлларни ўчириш ахборот тизимига юкланган файл номи ва ҳажми ҳақидаги маълумотлар кўрсатилган қаторнинг ўнг томонида жойлашган «Саватча» («Корзинка») тасвирланган тугмани босиш орқали амалга оширилади.

Мурожаатга тааллуқли бўлган барча зарур маълумотлар киритилган ва ҳужжатлар бириктирилганидан сўнг «Сақлаш» тугмасини босиш орқали апелляция шикояти (протести) ва унга илова қилинган ҳужжатлар тегишли фуқаролик ишлари бўйича судга юборилади.

5.2. Кассация шикоятини (протестини) бериш тартиби

Фойдаланувчи кассация шикоятини (протестини) фуқаролик ишлари бўйича судга «E-XSUD» ахборот тизими орқали бериш учун ўз «шахсий кабинети»да қуйидаги бешта босқичдан иборат ҳаракатларни амалга оширади:

Биринчи босқичда кассация шикояти (протести) рақами, санаси, шикоят қилинаётган суд ҳужжатининг иш рақами, шикоят тури (яъни айнан қайси суд ҳужжати шикоят қилинаётганлиги), ихтиёрий тўланган давлат божи ва почта харажати суммаси ва уларни тўланганлигини тасдиқловчи квитанция маълумотлари киритилади.

Иккинчи босқичда кассация шикояти (протести) бераётган тараф танланади. Шундан сўнг очилган ишда иштирок этувчи шахслар рўйхатидан тегишли тараф номи кўрсатилади.

Учинчи босқичда шикоят қилинаётган (протест келтирилаётган) ҳал қилув қарорини, ажримни, қарорни чиқарган суд танланади.

Тўртинчи босқичда аввалги босқичларда киритилган маълумотлар текшириб олинади. Агар киритилган маълумотларда хато ёки камчиликлар аниқланса, уларни «Орқага» тугмасини босиш ёрдамида аввалги босқичларга қайтиш орқали бартараф этиш мумкин.

Бешинчи босқичда кассация шикояти (протести) ва унга илова қилинадиган ҳужжатлар мазкур Тартибнинг 3.1-бандида белгиланган тартибда ахборот тизимига электрон шаклда бириктирилади.

Хато ёки янглишиш оқибатида бириктирилган файлларни судга юборишдан аввал ўчириш имконияти мавжуд. Файлларни ўчириш ахборот тизимига юкланган файл номи ва ҳажми ҳақидаги маълумотлар кўрсатилган қаторнинг ўнг томонида жойлашган «Саватча» («Корзинка») тасвирланган тугмани босиш орқали амалга оширилади.

Мурожаатга тааллуқли бўлган барча зарур маълумотлар киритилган ва ҳужжатлар бириктирилганидан сўнг «Сақлаш» тугмасини босиш орқали кассация шикояти (протести) ва унга илова қилинган ҳужжатлар тегишли фуқаролик ишлари бўйича судга юборилади.

5.3. Назорат тартибидаги шикоятни (протестни) бериш тартиби

Фойдаланувчи назорат шикоятини (протестини) Ўзбекистон Республикаси Олий судига «E-XSUD» ахборот тизими орқали бериш учун ўз «шахсий кабинети»да қуйидаги тўртта босқичдан иборат ҳаракатларни амалга оширади:

Биринчи босқичда ариза тури (яъни, айнан қайси суд ҳужжати назорат тартибида шикоят қилинаётганлиги), шикоят рақами, санаси, шикоят берган ташкилот номи, шикоят берган ташкилот раҳбарининг фамилияси, исми, отасининг исми ҳақидаги маълумотлар, шикоят қилинаётган суд ҳужжатининг иш рақами, шикоятга илова қилинган ҳужжатлар варақлари сони ҳамда шикоятнинг қисқача мазмуни, киритилади. Шунингдек, ихтиёрий тўланган давлат божи ва почта харажатлари суммаси киритилади. Ушбу суммаларни киритиш учун уларни тўланганлигини тасдиқловчи квитанция маълумотларини киритиш қаторини тўлдириш талаб этилади.

Иккинчи босқичда Ўзбекистон Республикаси Олий суди танланади.

Учинчи босқичда аввалги босқичларда киритилган маълумотлар текшириб олинади. Агар киритилган маълумотларда хато ёки камчиликлар аниқланса, уларни «Орқага» тугмасини босиш ёрдамида аввалги босқичларга қайтиш орқали бартараф этиш мумкин.

Тўртинчи босқичда назорат шикояти ва унга илова қилинадиган ҳужжатлар мазкур Тартибнинг 3.1-бандида белгиланган тартибда ахборот тизимига электрон шаклда бириктирилади.

Хато ёки янглишиш оқибатида бириктирилган файлларни судга юборишдан аввал ўчириш имконияти мавжуд. Файлларни ўчириш ахборот тизимига юкланган файл номи ва ҳажми ҳақидаги маълумотлар кўрсатилган қаторнинг ўнг томонида жойлашган «Саватча» («Корзинка») тасвирланган тугмани босиш орқали амалга оширилади.

Мурожаатга тааллуқли бўлган барча зарур маълумотлар киритилганидан ва ҳужжатлар бириктирилганидан сўнг «Сақлаш» тугмасини босиш орқали назорат шикояти (протести) ва унга илова қилинган ҳужжатлар тегишли фуқаролик ишлари бўйича судига юборилади.

6. «E-XSUD» ахборот тизими орқали фуқаролик ишлари бўйича судларга тақдим этиладиган мурожаатлар ҳолатини кузатиб бориш

Фойдаланувчи «шахсий кабинети» орқали фуқаролик ишлари бўйича судга тақдим этган мурожаатларининг ҳолатини реал вақт режимида кузатиб бориши мумкин.

Бунинг учун фойдаланувчи «шахсий кабинети»да фуқаролик ишлари бўйича суд турини белгилаб, судга юборган тегишли мурожаатни танлаш ва ўнг томонида жойлашган «Кўриш» тугмасини босиш керак. Мурожаат танланганида «шахсий кабинет» асосий саҳифасининг ўнг томонида юборилган мурожаатнинг «Қисқача мазмуни» ва «Ишни суд томонидан кўриб чиқилиши» номли рукнлар пайдо бўлади.

Мурожаатнинг «Қисқача мазмуни» рукнида танланган мурожаатнинг қисқача мазмуни келтирилган маълумотлар ҳамда фойдаланувчи томонидан судга электрон шаклда юборган файллар акс эттирилади.

«Ишни суд томонидан кўриб чиқилиши» рукнида фойдаланувчи томонидан юборилган ҳужжатнинг судда рўйхатга олинган санаси, рўйхат рақами, иш рақами, масъул судьянинг фамилияси, исми, отасининг исми, судья томонидан мазкур ҳужжатни иш юритувга қабул қилинган санаси, ишни кўришга тайинланган санаси ва вақти, агар ишни кўриш бошқа кунга қолдирилган бўлса ишни қолдириш сабаби, ишни кўриш натижасига кўра қабул қилинган ҳал қилув қарорининг ёки чиқарилган ажримнинг мазмуни, қаноатлантирилган даъво суммаси (неустойка), ундирилган давлат божи суммаси, давлат божи ундирилган тараф номи ҳақидаги маълумотлар, шунингдек, мазкур мурожаат бўйича чиқарилган суднинг барча ҳужжатлари электрон кўринишда акс эттирилади.

Мурожаат мазкур Тартибда белгиланган қоидаларга риоя қилинмай юборилмаганлиги сабабли қайтарилган тақдирда, мурожаат қайтарилган сана ва қайтариш учун асос бўлган ҳолатлар ҳақидаги маълумотлар ҳам мазкур рукнда акс эттирилади.

Шунингдек, мазкур рукнда фойдаланувчи томонидан юборилган мурожаатларнинг ҳолати ҳақидаги маълумотларни ҳам кузатиб бориш имконияти мавжуд.

Ахборот тизимида мурожаат ҳолатининг қуйидаги турлари мавжуд:

1. Рад этилган — ушбу ҳолатдаги мурожаат мазкур Тартибда белгиланган талабларга риоя қилинмай юборилганлиги сабабли мавжуд камчиликларни бартараф этиш учун фойдаланувчига қайтарилганлигини билдиради;

2. Рўйхатга олиш — ушбу ҳолатдаги мурожаат биринчи инстанция судига келиб тушган ва девонхонада рўйхатдан ўтказиш жараёнида эканлигини билдиради;

3. Кўриб чиқиш — ушбу ҳолатдаги мурожаат биринчи инстанция суди томонидан апелляция ёки кассация шикоятини (протестини) вилоят ёки унга тенглаштирилган судга юбориш жараёнида эканлигини билдиради;

4. Рўйхатга олиш (вилоят) — ушбу ҳолатдаги мурожаат биринчи инстанция суди томонидан вилоят ёки унга тенглаштирилган судга юборилган апелляция ёки кассация шикояти (протести) девонхонада рўйхатдан ўтказиш жараёнида эканлигини билдиради;

5. Тақсимлаш ёки Қайта тақсимлашда — ушбу ҳолатдаги мурожаат масъул судьяга тақсимлаш жараёнида эканлигини билдиради;

6. Иш қўзғатиш — ушбу ҳолатдаги мурожаат иш юритишга қабул қилиш ва иш қўзғатиш жараёнида эканлигини билдиради;

7. Тайёрлаш — ушбу ҳолатдаги мурожаат судья томонидан ишни суд муҳокамасига тайинлаш жараёнида эканлигини билдиради;

8. Натижасиз — ушбу ҳолатдаги мурожаат судьянинг иш юритувига қабул қилинган, лекин ҳали иш бўйича якуний суд ҳужжати қабул қилинмаганлигини билдиради;

9. Тўхтатилган — ушбу ҳолат фуқаролик иши бўйича иш юритиш ФПКнинг 116, 117-моддаларига асосан тўхтатилганлигини билдиради;

10. Натижани қабул қилиш — ушбу ҳолат ишни кўриш якунига кўра натижа киритилганлигини ҳамда айни вақтда суд девонхонаси томонидан таққослаш жараёнида эканлигини билдиради (мазкур босқичда масъул ходим судья киритган натижани суд ҳужжатининг хулоса қисми билан мослигини таққослайди);

11. Натижа қабул қилинган — ушбу ҳолат ишни кўриш якунига кўра натижаси қабул қилинганлигини билдиради;

12. Архивга юборилган ва Архивга топширилган — ушбу ҳолат иш архив бўлимига юборилганлигини ва архив бўлими томонидан қабул қилиб олинганлигини билдиради.

7. Фойдаланувчилар томонидан суд ҳужжатларини ва жавоб хатларини қабул қилиб олиш тартиби

Фойдаланувчи «E-XSUD ахборот тизими орқали тақдим этган мурожаатлари юзасидан амалга оширилган фуқаролик ишлари бўйича суднинг процессуал ҳаракатларига доир маълумотларни, мурожаатни кўриб чиқиш натижалари бўйича қабул қилинган суд ҳужжатларини, шунингдек, жавоб хатларини шахсий кабинети орқали олиш имкониятига эга.

Мурожаат юзасидан қабул қилинган суд ҳужжатларини, шунингдек, жавоб хатларини шахсий кабинет орқали олган фойдаланувчи ушбу ҳужжатларни қоғоз кўринишида олиш ҳуқуқидан маҳрум этилмайди.

Мазкур Тартибга амал қилган ҳолда тақдим этилган мурожаатлар бўйича фуқаролик ишлари бўйича суднинг суд ҳужжатлари, шунингдек, жавоб хатлари фойдаланувчининг «шахсий кабинети»га процессуал муддатларга тўлиқ риоя этган ҳолда юборилади.

Юборилган суд ҳужжатлари, шунингдек, жавоб хатлари фойдаланувчининг «шахсий кабинети»даги «Ишни суд томонидан кўриб чиқилиши» рукнига келиб тушади. Фойдаланувчи суд ҳужжатларини, шунингдек, жавоб хатларини юклаб олган ҳолда улар билан танишиб чиқиш имкониятига эга.

Ўзбекистон Республикаси Олий суди раиси К. Камилов

Тошкент ш.,

2020 йил 30 январь,

РС-02-20-сон

lex.uz

Oʻzbekiston Respublikasi Oliy sudi Rayosatining

Qarori

TARTIBI

Respublika fuqarolik ishlari boʻyicha sudlariga murojaatlarni “E-XSUD” axborot tizimi orqali taqdim qilish Tartibini tasdiqlash toʻgʻrisida

Fuqarolik ishlari boʻyicha sudlarga axborot tizimi orqali taqdim etilayotgan hujjatlarning shakl va mazmun jihatdan protsessual qonun talablariga muvofiqligini taʼminlash hisobiga ish samaradorligini oshirish, amaldagi axborot tizimlarini maqbullashtirish, ushbu jarayonlarda tashqi foydalanuvchilarning axborot tizimlari bilan ishlash koʻnikmalarini shakllantirish va yanada takomillashtirish maqsadida, Respublika fuqarolik ishlari boʻyicha sudlariga murojaatlarni “E-XSUD” axborot tizimi orqali taqdim qilish Tartibini muhokama etib, “Sudlar toʻgʻrisida”gi Oʻzbekiston Respublikasi Qonunining 24-moddasiga asosan Oliy sud Rayosati qaror qiladi:

1. Respublika fuqarolik ishlari boʻyicha sudlariga murojaatlarni “E-XSUD” axborot tizimi orqali taqdim qilish Tartibi ilovaga muvofiq tasdiqlansin.

2. Oliy sudning fuqarolik ishlari boʻyicha sudlov hayʼati (G. Parpiyeva), Devonxona boʻlimi (B. Alimjanov), Murojaatlar bilan ishlash boshqarmasi (T. Obidov), Qoraqalpogʻiston Respublikasi fuqarolik ishlari boʻyicha sudi, fuqarolik ishlari boʻyicha viloyatlar, Toshkent shahar, tumanlararo va tuman (shahar) sudlarining raislari:

sudya va sud xodimlari ishtirokida mazkur Tartib mazmun hamda mohiyatini chuqur oʻrganib, ularning axborot tizimi orqali elektron hujjatlar aylanishi sohasidagi bilimlari va kasb-malakalarini muntazam oshirib borishlarini taʼminlash yuzasidan zaruriy choralarni koʻrsin;

Tartibni keng jamoatchilikka, shuningdek davlat idoralari va tashkilotlari vakillari, tadbirkorlik subyektlari, fuqarolar ishtirokida oʻtkaziladigan uchrashuvlarda keng targʻib qilsin;

Tartibga toʻliq rioya etilishini taʼminlash borasida shaxsan masʼul ekanliklari haqida ogohlantirilsin;

joriy yilning 1-martiga qadar amalga oshirilgan ishlar natijalari yuzasidan Oliy sud rahbariyatiga batafsil axborot taqdim etsin.

3. Oliy sudning Axborot-kommunikatsiya texnologiyalarini joriy qilish va axborot xavfsizligini taʼminlash boshqarmasi (B. Ochilov):

axborot tizimi orqali fuqarolik ishlari boʻyicha sudlarga murojaatlarni va ularga ilova qilinadigan hujjatlarni elektron shaklda taqdim qilish, shuningdek sud muhokamasi ishtirokchilari tomonidan sud hujjatlarini, javob xatlarini qabul qilib olish imkonini beruvchi elektron dasturiy taʼminotning uzluksiz ishlashini taʼminlash choralarini koʻrsin;

sudlarga elektron shaklda murojaat qiluvchilarga yanada qulaylik yaratish maqsadida axborot tizimidan foydalanish boʻyicha maxsus qoʻllanma tayyorlab, uni ushbu Tartib bilan birga tegishli Oliy sudning veb-saytiga hamda axborot tizimiga joylashtirsin;

joriy yilning 14-fevraliga qadar Oliy sudning Matbuot xizmati (A. Abidov) bilan birgalikda Tartibning mazmun-mohiyati, uni amaliyotga joriy etishning zaruriyati va maqsadlari yoritilgan axborotni Oliy sudning veb-saytida eʼlon qilsin;

joriy yilning 17-fevraliga qadar videokonferensaloqa rejimida sudya va sud xodimlari ishtirokida oʻquv-seminar mashgʻulotini oʻtkazsin.

4. Oliy sud huzuridagi Sudlar faoliyatini taʼminlash departamenti (B. Teshabayev) sudlarning optik tolali aloqa va Internet tarmogʻi faoliyatini uzluksiz ishlashini hamda axborot tizimidan foydalanishda zarur boʻlgan kompyuter texnikalari bilan doimiy taʼminlab borish vazifasi yuklatilsin.

5. Tartib Oliy sudning fuqarolik ishlari boʻyicha sudlov hayʼati, Devonxona boʻlimi, Murojaatlar bilan ishlash boshqarmasi, Qoraqalpogʻiston Respublikasi fuqarolik ishlari boʻyicha sudi, fuqarolik ishlari boʻyicha viloyatlar, Toshkent shahar, tumanlararo va tuman (shahar) sudlariga xizmatda foydalanish uchun yuborilsin.

6. Mazkur qarorning ijrosini nazorat qilish Oʻzbekiston Respublikasi Oliy sudi raisining oʻrinbosari — fuqarolik ishlari boʻyicha sudlov hayʼati raisi X. Yodgorov zimmasiga yuklansin.

Oliy sud Rayosatining 2020-yil 30-yanvardagi RS-02-20-sonli qaroriga ILOVA

Respublika fuqarolik ishlari boʻyicha sudlariga murojaatlarni “E-XSUD” axborot tizimi orqali taqdim qilish

Respublika fuqarolik ishlari boʻyicha sudlariga murojaatlarni “E-XSUD” axborot tizimi orqali taqdim qilish Tartibi (bundan buyon matnda Tartib deb yuritiladi) respublika fuqarolik ishlari boʻyicha sudlariga murojaatlarni “E-XSUD” axborot tizimi orqali taqdim etish, mazkur murojaatlar yuzasidan olib borilgan protsessual harakatlar va ularning natijalari yuzasidan murojaat mualliflarini xabardor qilish munosabatlarini tartibga soladi.

Ushbu Tartib qoidalari boshqa axborot tizimlari orqali fuqarolik ishlari boʻyicha sudlarga taqdim etilgan murojaatlar masalalariga tatbiq etilmaydi.

1. Asosiy tushunchalar

Mazkur Tartibda quyidagi asosiy tushunchalar qoʻllanilgan:

murojaat — daʼvo arizasi (ariza), shikoyat, protest, iltimosnoma va qonun hujjatlarida nazarda tutilgan boshqa murojaatlar;

ishda ishtirok etuvchi shaxslar — taraflar, uchinchi shaxslar, ularning vakillari, ariza beruvchilar va alohida tartibdagi ishlar boʻyicha boshqa manfaatdor shaxslar, prokuror, ishda boshqa shaxslarning huquqlari va qonun bilan qoʻriqlanadigan manfaatlarini himoya qilishda ishtirok etadigan davlat boshqaruvi organlari, tashkilotlar va ayrim fuqarolar;

tashqi foydalanuvchi — belgilangan tartibda axborot tizimida roʻyxatdan oʻtish orqali “shaxsiy kabinet” tashkil qilgan shaxs;

sud hujjatlari — hal qiluv qarori, ajrim, qaror, sud buyrugʻi (ijro varaqasi);

javob xatlari — sud hujjati hisoblanmagan, tashkilot va fuqarolarning murojaatlariga javob tariqasida qaytarilgan xatlar;

JSHSHIR — jismoniy shaxsning shaxsiy identifikatsiya raqami;

STIR — soliq toʻlovchining identifikatsiya raqami;

PDF — Adobe System kompaniyasi tomonidan ishlab chiqilgan elektron hujjatlarning alohida formati;

brauzer — internet tarmogʻidagi veb-ilovalarni boshqarish, qayta ishlash imkonini beruvchi va ularning tarkibidagi maʼlumotlarni aks ettiruvchi dasturiy taʼminot.

2. “E-XSUD” axborot tizimida roʻyxatdan oʻtish tartibi

Har qanday manfaatdor shaxs buzilgan yoki nizolashilayotgan huquqi yoxud qonun bilan qoʻriqlanadigan manfaatini himoya qilish uchun fuqarolik sud ishlarini yuritish toʻgʻrisidagi qonun hujjatlarida belgilangan tartibda fuqarolik ishlari boʻyicha sudga (sudga) murojaat qilishga haqli (Oʻzbekiston Respublikasi Fuqarolik protsessual kodeksining (bundan buyon matnda FPK deb yuritiladi) 3-moddasi).

Murojaat va unga ilova qilinadigan hujjatlar sudga elektron hujjat tarzida yuborilishi mumkin (FPKning 4-moddasi). Buning uchun manfaatdor shaxs www.exsud.sud.uz manzilida joylashgan Oʻzbekiston Respublikasi Oliy sudining elektron qabulxonasida belgilangan tartibda roʻyxatdan oʻtishi talab etiladi.

“E-XSUD” axborot tizimida roʻyxatdan oʻtish tartibi Oʻzbekiston Respublikasi Oliy sudining elektron qabulxonasining bosh sahifasida joylashgan qoʻllanma asosida amalga oshiriladi.

Tizimda roʻyxatdan oʻtgan tashqi foydalanuvchilarga keyinchalik oʻzining “shaxsiy kabineti”ga kirishi uchun qaytadan roʻyxatdan oʻtish talab etilmaydi.

“E-XSUD” axborot tizimi imkoniyatlaridan toʻliq foydalanish uchun internet brauzerlarining quyidagi versiyalaridan foydalanish tavsiya etiladi:

Google Chrome — 79 versiyasidan yuqori;

Mozilla Firefox — 69 versiyasidan yuqori;

Safari — 13 versiyasidan yuqori;

Opera — 65 versiyasidan yuqori.

3. “E-XSUD” axborot tizimi orqali fuqarolik ishlari boʻyicha sudlarga taqdim etiladigan murojaatlarga qoʻyiladigan umumiy talablar

3.1. Fuqarolik ishlari boʻyicha sudlarga “E-XSUD” axborot tizimi orqali taqdim etiladigan murojaatlar skanerlash uskunalari yordamida elektron fayl koʻrinishiga keltirilishi kerak.

Skaner qilingan har bir hujjat mazmuniga koʻra alohida elektron fayl koʻrinishida saqlanishi lozim (masalan, daʼvo arizasi uni necha sahifadan iboratligidan qatʼi nazar alohida bitta faylga, davlat boji toʻlanganligini tasdiqlovchi kvitansiya alohida bitta faylga, daʼvo arizasiga ilova qilinadigan boshqa hujjatlar, xususan shartnoma, hisob-faktura, talabnoma, hisoblarni oʻzaro solishtirma dalolatnomasi va boshqa hujjatlar, sahifalari sonidan qatʼi nazar, alohida-alohida saqlanadi va h.k.). Mazmuni jihatdan har xil boʻlgan hujjatlarni, masalan, daʼvo arizasi va shartnomani yoki talabnoma va davlat boji toʻlanganligi toʻgʻrisidagi bank kvitansiyasini bitta faylga saqlash murojaatni axborot tizimi orqali taqdim etish tartibiga rioya etilmagan deb hisoblanadi va murojaatni uni taqdim etgan shaxsga elektron shaklda qaytarilishiga asos boʻladi.

Ilova qilingan fayllar soni sudga taqdim etilayotgan hujjatlar soniga teng boʻlishi, fayllarni nomi ularni qanday hujjat ekanligini va necha varaqdan iboratligini aniqlash imkonini berishi lozim (masalan, 209-sonli shartnoma 3 varaqda).

Skaner qilingan hujjatlarning sifati ularni haqiqiyligini tasdiqlovchi belgilarni, xususan, imzo, pechat, shtamp, hujjat raqami va sanasini aniqlash imkonini beradigan darajada boʻlishi kerak.

Hujjatlar sudga faqat PDF formatida yuboriladi.

Har bir ilova qilingan faylning hajmi 10 megabaytdan oshmasligi kerak.

Axborot tizimi orqali sudga kelib tushgan murojaatlar va ularga ilova qilinadigan hujjatlarning asl nusxalari sud majlisiga taqdim etilishi lozim (buyruq tartibida yuritiladigan ishlar boʻyicha kelib tushgan arizalar bundan mustasno).

3.2. Quyidagi holatlarda murojaatlar elektron qabulxona orqali qabul qilinmaydi va tashqi foydalanuvchiga qaytariladi, agar:

hujjatlar sifatsiz skaner qilinganligi sababli ularni oʻqish imkoniyati boʻlmasa;

hujjatlar tartibsiz yoki teskari saqlanganligi sababli ularni oʻqish imkoniyati boʻlmasa;

hujjat varaqlari toʻliq boʻlmasa;

arizaga ilova deb koʻrsatilgan hujjatlar toʻliq biriktirilmagan boʻlsa;

biriktirilgan faylda matn mavjud boʻlmasa;

hujjatlar mazkur Tartibda nazarda tutilgan PDF formatida yuborilmagan boʻlsa;

sud tomonidan hali koʻrib chiqilmagan ayni bir taraflar oʻrtasidagi, ayni bir predmet toʻgʻrisidagi va ayni bir asoslar boʻyicha murojaat takroran yuborilgan boʻlsa;

hujjatlar imzolanmagan boʻlsa;

hujjatlar tegishli fuqarolik ishlari boʻyicha sudga yoʻllanmagan boʻlsa;

skaner qilingan boshqa-boshqa mazmundagi hujjatlar bitta faylga saqlangan boʻlsa (hujjatlar nomlanishiga koʻra alohida fayllarga ajratilmagan boʻlsa);

fayllarning nomlari saqlangan hujjatlarga muvofiq boʻlmasa;

yuborish mazkur Tartibda nazarda tutilmagan murojaat kelib tushgan boʻlsa.

Yuqorida koʻrsatilgan asoslar boʻyicha qaytarilgan murojaatlar fuqarolik ishlari boʻyicha sudga “E-XSUD” axborot tizimi orqali kirim qilinmagan hisoblanadi. Murojaatni qaytarish uchun asos boʻlgan holatlar bartaraf etilganidan keyin tashqi foydalanuvchi ushbu murojaatni “E-XSUD” axborot tizimi orqali takroran taqdim etishi mumkin.

4. Murojaatni birinchi instansiya sudlariga yuborish

Tashqi foydalanuvchi fuqarolik ishlari boʻyicha sudlarga murojaatni shaxsiy kabineti orqali elektron hujjat tarzida taqdim etadi.

4.1. Daʼvo arizasini (arizani) taqdim etish tartibi

Tashqi foydalanuvchi daʼvo arizasini (arizani) fuqarolik ishlari boʻyicha sudga “E-XSUD” axborot tizimi orqali taqdim etish uchun oʻz “shaxsiy kabineti”da quyidagi olti bosqichdan iborat harakatlarni amalga oshiradi:

Birinchi bosqichda daʼvo arizasi (ariza) raqami, sanasi, ish yuritish tartibi, daʼvo summasi (asosiy qarz, neustoyka) va ixtiyoriy toʻlangan davlat boji, pochta xarajatlari, videokonferensaloqa xarajatlari summasi kiritiladi. Ushbu summalarni kiritish uchun ularni toʻlanganligini tasdiqlovchi kvitansiya maʼlumotlarini kiritish qatorini toʻldirish talab etiladi. Shuningdek, asosiy ish turkumi, agar qoʻshimcha talablar mavjud boʻlsa, qoʻshimcha ish turkumi, ikkilamchi ish turkumlari tanlanadi.

Ikkinchi bosqichda daʼvogarga taalluqli maʼlumotlar kiritiladi. Xususan, daʼvogar jismoniy shaxs boʻlsa, shaxs turi qatoridan jismoniy shaxs turi tanlanib, pasport seriyasi, JSHSHIR, familiyasi, ismi, otasining ismi, tugʻilgan sanasi, yoshi, fuqaroligi, jinsi, tugʻilgan joyi, yashash joyi haqidagi maʼlumotlar kiritiladi.

Daʼvogar yuridik shaxs boʻlsa STIR raqami, bankdagi hisob raqami, xizmat koʻrsatuvchi bank nomi, javobgar joylashgan hudud (aynan tuman yoki tumanga tenglashtirilgan shahar tanlanishi shart), yuridik manzili, daʼvogarning (arizachining) nomi, pochta indeksi, telefon raqami, rahbarning familiyasi, ismi, otasining ismi kabi maʼlumotlar kiritiladi.

Agar daʼvogarning manfaatida boshqa tashkilot sudga murojaat qilayotgan boʻlsa, ushbu tashkilot koʻrsatiladi.

Uchinchi bosqichda javobgarga taalluqli maʼlumotlar kiritiladi. Xususan, javobgar jismoniy shaxs boʻlsa, shaxs turi qatoridan jismoniy shaxs turi tanlanib, pasport seriyasi, raqami, JSHSHIR raqami, familiyasi, ismi, otasining ismi, tugʻilgan sanasi, yoshi, fuqaroligi, jinsi, tugʻilgan joyi, yashash joyi haqidagi maʼlumotlar kiritiladi.

Agar javobgar yuridik shaxs boʻlsa STIR raqami, bankdagi hisob raqami, xizmat koʻrsatuvchi bank nomi, javobgar joylashgan hudud (aynan tuman yoki tumanga tenglashtirilgan shahar tanlanishi shart), yuridik manzili, javobgarning (qarzdorning) nomi, pochta indeksi, telefon raqami, rahbarning familiyasi, ismi, otasining ismi kabi maʼlumotlar kiritiladi.

Toʻrtinchi bosqichda daʼvo arizasi (ariza) taqdim etilayotgan fuqarolik ishlari boʻyicha sud tanlanadi. Fuqarolik ishlari boʻyicha sudni tanlashda FPKning 28 — 30-moddalarida belgilangan sudlovga tegishlilik qoidalariga amal qilinishi shart.

Beshinchi bosqichda avvalgi bosqichlarda kiritilgan maʼlumotlar tekshirib olinadi. Bunda daʼvogar va javobgar joylashgan hudud aynan u joylashgan tuman yoki tumanga tenglashtirilgan shahar tanlanganligiga, hamda ularning STIR raqamlari yoki pasport maʼlumotlari toʻgʻri kiritilganligiga, shuningdek, tegishli fuqarolik ishlari boʻyicha sudi belgilanganligiga alohida eʼtibor qaratish lozim. Ushbu maʼlumotlarni xato kiritilishi keyinchalik sud tomonidan qabul qilinadigan sud hujjatlari ijrosini taʼminlashda qiyinchiliklar tugʻdirishi mumkin.

Agar kiritilgan maʼlumotlarda xato yoki kamchiliklar aniqlansa, ularni “Orqaga” tugmasini bosish yordamida avvalgi bosqichlarga qaytish orqali bartaraf etish mumkin.

Oltinchi bosqichda daʼvo arizasi (ariza) va unga ilova qilinadigan hujjatlar mazkur Tartibning 3.1-bandida belgilangan tartibda axborot tizimiga elektron shaklda biriktiriladi.

Xato yoki yanglishish oqibatida biriktirilgan fayllarni sudga yuborishdan avval oʻchirish imkoniyati mavjud. Fayllarni oʻchirish axborot tizimiga yuklangan fayl nomi va hajmi haqidagi maʼlumotlar koʻrsatilgan qatorning oʻng tarafida joylashgan “Savatcha” (“Korzinka”) tasvirlangan tugmani bosish orqali amalga oshiriladi.

Murojaatga taalluqli boʻlgan barcha zarur maʼlumotlar kiritilganidan va hujjatlar biriktirilganidan soʻng “Saqlash” tugmasini bosish orqali daʼvo arizasi (ariza) va unga ilova qilingan hujjatlar tanlangan fuqarolik ishlari boʻyicha sudga yuboriladi.

4.2. Qarshi daʼvo taqdim etish tartibi

Foydalanuvchi qarshi daʼvoni fuqarolik ishlari boʻyicha sudga “E-XSUD” axborot tizimi orqali taqdim etish uchun oʻz “shaxsiy kabineti”da quyidagi olti bosqichdan iborat harakatlarni amalga oshiradi:

Birinchi bosqichda qarshi daʼvo arizasi raqami, sanasi, ish yuritish tartibi, daʼvogarning daʼvosi boʻyicha qoʻzgʻatilgan fuqarolik ishi raqami, daʼvo summasi (asosiy qarz, neustoyka) va ixtiyoriy toʻlangan davlat boji, pochta xarajatlari, videokonferensaloqa xarajatlari summasi kiritiladi. Ushbu summalarni kiritish uchun ularni toʻlanganligini tasdiqlovchi kvitansiya maʼlumotlarini kiritish qatorini toʻldirish talab etiladi. Shuningdek, asosiy ish turkumi, agar qoʻshimcha talablar mavjud boʻlsa, qoʻshimcha ish turkumi, ikkilamchi ish turkumlari tanlanadi.

Ikkinchi bosqichda daʼvogarga taalluqli maʼlumotlar kiritiladi. Xususan, daʼvogar jismoniy shaxs boʻlsa, shaxs turi qatoridan jismoniy shaxs turi tanlanib unga tegishli pasport seriyasi, raqami, JSHSHIR raqami, familiyasi, ismi, otasining ismi, tugʻilgan sanasi, yoshi, fuqaroligi, jinsi, tugʻilgan joyi, yashash joyi haqidagi maʼlumotlar kiritiladi.

Daʼvogar yuridik shaxs boʻlsa STIR raqami bankdagi hisob raqami, xizmat koʻrsatuvchi bank nomi, javobgar joylashgan hudud (aynan tuman yoki tumanga tenglashtirilgan shahar tanlanishi shart), yuridik manzili, daʼvogarning (arizachining) nomi, pochta indeksi, telefon raqami, rahbarning familiyasi, ismi, otasining ismi kabi maʼlumotlar kiritiladi.

Agar daʼvogarning manfaatida boshqa tashkilot sudga murojaat qilayotgan boʻlsa, ushbu tashkilot koʻrsatiladi.

Uchinchi bosqichda javobgarga taalluqli maʼlumotlar kiritiladi. Xususan, javobgar jismoniy shaxs boʻlsa, shaxs turi qatoridan jismoniy shaxs turi tanlanib, pasport seriyasi, raqami, JSHSHIR raqami, familiyasi, ismi, otasining ismi, tugʻilgan sanasi, yoshi, fuqaroligi, jinsi, tugʻilgan joyi, yashash joyi haqidagi maʼlumotlar kiritiladi.

Agar javobgar yuridik shaxs boʻlsa STIR raqami bankdagi hisob raqami, xizmat koʻrsatuvchi bank nomi, javobgar joylashgan hudud (aynan tuman yoki tumanga tenglashtirilgan shahar tanlanishi shart), yuridik manzili, javobgarning (qarzdorning) nomi, pochta indeksi, telefon raqami, rahbarning familiyasi, ismi, otasining ismi kabi maʼlumotlar kiritiladi.

Toʻrtinchi bosqichda qarshi daʼvo yuborilayotgan fuqarolik ishlari boʻyicha sud tanlanadi. Fuqarolik ishlari boʻyicha sudni tanlashda FPKning 37-moddasida belgilab qoʻyilgan sudlovga tegishlilik qoidasiga amal qilinishi shart.

Beshinchi bosqichda avvalgi bosqichlarda kiritilgan maʼlumotlar tekshirib olinadi. Bunda daʼvogar va javobgar joylashgan hudud aynan u joylashgan tuman yoki tumanga tenglashtirilgan shahar tanlanganligiga, hamda ularning STIR raqamlari yoki pasport maʼlumotlari toʻgʻri kiritilganligiga, shuningdek, tegishli fuqarolik ishlari boʻyicha sudi belgilanganligiga alohida eʼtibor qaratish lozim. Ushbu maʼlumotlarni xato kiritilishi keyinchalik sud tomonidan qabul qilinadigan sud hujjatlari ijrosini taʼminlashda qiyinchiliklar tugʻdirishi mumkin.

Agar kiritilgan maʼlumotlarda xato yoki kamchiliklar aniqlansa, ularni “Orqaga” tugmasini bosish yordamida avvalgi bosqichlarga qaytish orqali bartaraf etish mumkin.

Oltinchi bosqichda qarshi daʼvo va unga ilova qilinadigan hujjatlar mazkur Tartibning 3.1-bandida belgilangan tartibda axborot tizimiga elektron shaklda biriktiriladi.

Xato yoki yanglishish oqibatida biriktirilgan fayllarni sudga yuborishdan avval oʻchirish imkoniyati mavjud. Fayllarni oʻchirish axborot tizimiga yuklangan fayl nomi va hajmi haqidagi maʼlumotlar koʻrsatilgan qatorning oʻng tomonida joylashgan “Savatcha” (“Korzinka”) tasvirlangan tugmani bosish orqali amalga oshiriladi.

Murojaatga taalluqli boʻlgan barcha zarur maʼlumotlar kiritilganidan va hujjatlar biriktirilganidan soʻng “Saqlash” tugmasini bosish orqali qarshi daʼvo va unga ilova qilingan hujjatlar tanlangan fuqarolik ishlari boʻyicha sudga yuboriladi.

4.3. Ariza yoki iltimosnomani yuborish tartibi

Foydalanuvchi ariza yoki iltimosnomani fuqarolik ishlari boʻyicha sudga “E-XSUD” axborot tizimi orqali yuborish uchun oʻz “shaxsiy kabineti”da quyidagi toʻrtta bosqichdan iborat harakatlarni amalga oshiradi:

Birinchi bosqichda ariza yoki iltimosnomaning mazmuni, raqami, sanasi, arizachi tashkilot nomi yoki fuqaroning familiyasi, ismi, otasining ismi, arizani yoki iltimosnomani imzolagan shaxs, fuqarolik ishlari boʻyicha sudda koʻrilayotgan yoki koʻrilgan ish raqami, arizaga yoki iltimosnomaga ilova qilingan hujjatlar varaqlari soni hamda ariza yoki iltimosnomaning qisqacha mazmuni haqidagi maʼlumotlar kiritiladi.

Ikkinchi bosqichda ariza yoki iltimosnoma yuborilayotgan tegishli fuqarolik ishlari boʻyicha sud tanlanadi.

Uchinchi bosqichda avvalgi bosqichlarda kiritilgan maʼlumotlar tekshirib olinadi. Agar kiritilgan maʼlumotlarda xato yoki kamchiliklar aniqlansa, ularni “Orqaga” tugmasini bosish yordamida avvalgi bosqichlarga qaytish orqali bartaraf etish mumkin.

Toʻrtinchi bosqichda ariza yoki iltimosnoma va unga ilova qilinadigan hujjatlar mazkur Tartibning 3.1-bandida belgilangan tartibda axborot tizimiga elektron shaklda biriktiriladi.

Xato yoki yanglishish oqibatida biriktirilgan fayllarni sudga yuborishdan avval oʻchirish imkoniyati mavjud. Fayllarni oʻchirish axborot tizimiga yuklangan fayl nomi va hajmi haqidagi maʼlumotlar koʻrsatilgan qatorning oʻng tomonida joylashgan “Savatcha” (“Korzinka”) tasvirlangan tugmani bosish orqali amalga oshiriladi.

Murojaatga taalluqli boʻlgan barcha zarur maʼlumotlar kiritilganidan va hujjatlar biriktirilganidan soʻng “Saqlash” tugmasini bosish orqali ariza yoki iltimosnoma va unga ilova qilingan hujjatlar tegishli fuqarolik ishlari boʻyicha sudga yuboriladi.

5. Fuqarolik ishlari boʻyicha sudlarning sud hujjatlarini qayta koʻrish boʻyicha shikoyat (protest) yuborish

Ishda ishtirok etuvchi shaxslar, shuningdek, ishda ishtirok etishga jalb qilinmagan, ammo huquqlari va majburiyatlari toʻgʻrisida sud hal qiluv qarori qabul qilgan shaxslar birinchi instansiya sudining qonuniy kuchga kirmagan hal qiluv qarori ustidan apellyatsiya shikoyati, qonuniy kuchga kirgan, apellyatsiya tartibida koʻrilmagan hal qiluv qarori ustidan kassatsiya shikoyati, prokuror esa apellyatsiya yoki kassatsiya protesti berishga haqlidir (FPKning 383, 403-moddalari).

Shuningdek, apellyatsiya yoki kassatsiya tartibida koʻrilgan ishlar boʻyicha sud hujjatlari ustidan nazorat tartibida shikoyat qilinishi mumkin (FPKning 422-moddasi).

5.1. Apellyatsiya shikoyatini (protestini) berish tartibi

Foydalanuvchi apellyatsiya shikoyatini (protestini) fuqarolik ishlari boʻyicha sudga “E-XSUD” axborot tizimi orqali berish uchun oʻz “shaxsiy kabineti”da quyidagi beshta bosqichdan iborat harakatlarni amalga oshiradi:

Birinchi bosqichda apellyatsiya shikoyati (protesti) raqami, sanasi, shikoyat qilinayotgan sud hujjatining ish raqami, shikoyat turi (yaʼni aynan qaysi sud hujjati shikoyat qilinayotganligi), ixtiyoriy toʻlangan davlat boji va pochta xarajatlari summasi va ularning toʻlanganligini tasdiqlovchi kvitansiya maʼlumotlari kiritiladi.

Ikkinchi bosqichda apellyatsiya shikoyati (protesti) berayotgan taraf tanlanadi. Shundan soʻng ochilgan ishda ishtirok etuvchi shaxslar roʻyxatidan tegishli taraf nomi koʻrsatiladi.

Uchinchi bosqichda shikoyat qilinayotgan (protest keltirilayotgan) hal qiluv qarorini, ajrimni, qarorni chiqargan sud tanlanadi.

Toʻrtinchi bosqichda avvalgi bosqichlarda kiritilgan maʼlumotlar tekshirib olinadi. Agar kiritilgan maʼlumotlarda xato yoki kamchiliklar aniqlansa, ularni “Orqaga” tugmasini bosish yordamida avvalgi bosqichlarga qaytish orqali bartaraf etish mumkin.

Beshinchi bosqichda apellyatsiya shikoyati (protesti) va unga ilova qilinadigan hujjatlar mazkur Tartibning 3.1-bandida belgilangan tartibda axborot tizimiga elektron shaklda biriktiriladi.

Xato yoki yanglishish oqibatida biriktirilgan fayllarni sudga yuborishdan avval oʻchirish imkoniyati mavjud. Fayllarni oʻchirish axborot tizimiga yuklangan fayl nomi va hajmi haqidagi maʼlumotlar koʻrsatilgan qatorning oʻng tomonida joylashgan “Savatcha” (“Korzinka”) tasvirlangan tugmani bosish orqali amalga oshiriladi.

Murojaatga taalluqli boʻlgan barcha zarur maʼlumotlar kiritilgan va hujjatlar biriktirilganidan soʻng “Saqlash” tugmasini bosish orqali apellyatsiya shikoyati (protesti) va unga ilova qilingan hujjatlar tegishli fuqarolik ishlari boʻyicha sudga yuboriladi.

5.2. Kassatsiya shikoyatini (protestini) berish tartibi

Foydalanuvchi kassatsiya shikoyatini (protestini) fuqarolik ishlari boʻyicha sudga “E-XSUD” axborot tizimi orqali berish uchun oʻz “shaxsiy kabineti”da quyidagi beshta bosqichdan iborat harakatlarni amalga oshiradi:

Birinchi bosqichda kassatsiya shikoyati (protesti) raqami, sanasi, shikoyat qilinayotgan sud hujjatining ish raqami, shikoyat turi (yaʼni aynan qaysi sud hujjati shikoyat qilinayotganligi), ixtiyoriy toʻlangan davlat boji va pochta xarajati summasi va ularni toʻlanganligini tasdiqlovchi kvitansiya maʼlumotlari kiritiladi.

Ikkinchi bosqichda kassatsiya shikoyati (protesti) berayotgan taraf tanlanadi. Shundan soʻng ochilgan ishda ishtirok etuvchi shaxslar roʻyxatidan tegishli taraf nomi koʻrsatiladi.

Uchinchi bosqichda shikoyat qilinayotgan (protest keltirilayotgan) hal qiluv qarorini, ajrimni, qarorni chiqargan sud tanlanadi.

Toʻrtinchi bosqichda avvalgi bosqichlarda kiritilgan maʼlumotlar tekshirib olinadi. Agar kiritilgan maʼlumotlarda xato yoki kamchiliklar aniqlansa, ularni “Orqaga” tugmasini bosish yordamida avvalgi bosqichlarga qaytish orqali bartaraf etish mumkin.

Beshinchi bosqichda kassatsiya shikoyati (protesti) va unga ilova qilinadigan hujjatlar mazkur Tartibning 3.1-bandida belgilangan tartibda axborot tizimiga elektron shaklda biriktiriladi.

Xato yoki yanglishish oqibatida biriktirilgan fayllarni sudga yuborishdan avval oʻchirish imkoniyati mavjud. Fayllarni oʻchirish axborot tizimiga yuklangan fayl nomi va hajmi haqidagi maʼlumotlar koʻrsatilgan qatorning oʻng tomonida joylashgan “Savatcha” (“Korzinka”) tasvirlangan tugmani bosish orqali amalga oshiriladi.

Murojaatga taalluqli boʻlgan barcha zarur maʼlumotlar kiritilgan va hujjatlar biriktirilganidan soʻng “Saqlash” tugmasini bosish orqali kassatsiya shikoyati (protesti) va unga ilova qilingan hujjatlar tegishli fuqarolik ishlari boʻyicha sudga yuboriladi.

5.3. Nazorat tartibidagi shikoyatni (protestni) berish tartibi

Foydalanuvchi nazorat shikoyatini (protestini) Oʻzbekiston Respublikasi Oliy sudiga “E-XSUD” axborot tizimi orqali berish uchun oʻz “shaxsiy kabineti”da quyidagi toʻrtta bosqichdan iborat harakatlarni amalga oshiradi:

Birinchi bosqichda ariza turi (yaʼni, aynan qaysi sud hujjati nazorat tartibida shikoyat qilinayotganligi), shikoyat raqami, sanasi, shikoyat bergan tashkilot nomi, shikoyat bergan tashkilot rahbarining familiyasi, ismi, otasining ismi haqidagi maʼlumotlar, shikoyat qilinayotgan sud hujjatining ish raqami, shikoyatga ilova qilingan hujjatlar varaqlari soni hamda shikoyatning qisqacha mazmuni, kiritiladi. Shuningdek, ixtiyoriy toʻlangan davlat boji va pochta xarajatlari summasi kiritiladi. Ushbu summalarni kiritish uchun ularni toʻlanganligini tasdiqlovchi kvitansiya maʼlumotlarini kiritish qatorini toʻldirish talab etiladi.

Ikkinchi bosqichda Oʻzbekiston Respublikasi Oliy sudi tanlanadi.

Uchinchi bosqichda avvalgi bosqichlarda kiritilgan maʼlumotlar tekshirib olinadi. Agar kiritilgan maʼlumotlarda xato yoki kamchiliklar aniqlansa, ularni “Orqaga” tugmasini bosish yordamida avvalgi bosqichlarga qaytish orqali bartaraf etish mumkin.

Toʻrtinchi bosqichda nazorat shikoyati va unga ilova qilinadigan hujjatlar mazkur Tartibning 3.1-bandida belgilangan tartibda axborot tizimiga elektron shaklda biriktiriladi.

Xato yoki yanglishish oqibatida biriktirilgan fayllarni sudga yuborishdan avval oʻchirish imkoniyati mavjud. Fayllarni oʻchirish axborot tizimiga yuklangan fayl nomi va hajmi haqidagi maʼlumotlar koʻrsatilgan qatorning oʻng tomonida joylashgan “Savatcha” (“Korzinka”) tasvirlangan tugmani bosish orqali amalga oshiriladi.

Murojaatga taalluqli boʻlgan barcha zarur maʼlumotlar kiritilganidan va hujjatlar biriktirilganidan soʻng “Saqlash” tugmasini bosish orqali nazorat shikoyati (protesti) va unga ilova qilingan hujjatlar tegishli fuqarolik ishlari boʻyicha sudiga yuboriladi.

6. “E-XSUD” axborot tizimi orqali fuqarolik ishlari boʻyicha sudlarga taqdim etiladigan murojaatlar holatini kuzatib borish

Foydalanuvchi “shaxsiy kabineti” orqali fuqarolik ishlari boʻyicha sudga taqdim etgan murojaatlarining holatini real vaqt rejimida kuzatib borishi mumkin.

Buning uchun foydalanuvchi “shaxsiy kabineti”da fuqarolik ishlari boʻyicha sud turini belgilab, sudga yuborgan tegishli murojaatni tanlash va oʻng tomonida joylashgan “Koʻrish” tugmasini bosish kerak. Murojaat tanlanganida “shaxsiy kabinet” asosiy sahifasining oʻng tomonida yuborilgan murojaatning “Qisqacha mazmuni” va “Ishni sud tomonidan koʻrib chiqilishi” nomli ruknlar paydo boʻladi.

Murojaatning “Qisqacha mazmuni” ruknida tanlangan murojaatning qisqacha mazmuni keltirilgan maʼlumotlar hamda foydalanuvchi tomonidan sudga elektron shaklda yuborgan fayllar aks ettiriladi.

“Ishni sud tomonidan koʻrib chiqilishi” ruknida foydalanuvchi tomonidan yuborilgan hujjatning sudda roʻyxatga olingan sanasi, roʻyxat raqami, ish raqami, masʼul sudyaning familiyasi, ismi, otasining ismi, sudya tomonidan mazkur hujjatni ish yurituvga qabul qilingan sanasi, ishni koʻrishga tayinlangan sanasi va vaqti, agar ishni koʻrish boshqa kunga qoldirilgan boʻlsa ishni qoldirish sababi, ishni koʻrish natijasiga koʻra qabul qilingan hal qiluv qarorining yoki chiqarilgan ajrimning mazmuni, qanoatlantirilgan daʼvo summasi (neustoyka), undirilgan davlat boji summasi, davlat boji undirilgan taraf nomi haqidagi maʼlumotlar, shuningdek, mazkur murojaat boʻyicha chiqarilgan sudning barcha hujjatlari elektron koʻrinishda aks ettiriladi.

Murojaat mazkur Tartibda belgilangan qoidalarga rioya qilinmay yuborilmaganligi sababli qaytarilgan taqdirda, murojaat qaytarilgan sana va qaytarish uchun asos boʻlgan holatlar haqidagi maʼlumotlar ham mazkur ruknda aks ettiriladi.

Shuningdek, mazkur ruknda foydalanuvchi tomonidan yuborilgan murojaatlarning holati haqidagi maʼlumotlarni ham kuzatib borish imkoniyati mavjud.

Axborot tizimida murojaat holatining quyidagi turlari mavjud:

1. Rad etilgan — ushbu holatdagi murojaat mazkur Tartibda belgilangan talablarga rioya qilinmay yuborilganligi sababli mavjud kamchiliklarni bartaraf etish uchun foydalanuvchiga qaytarilganligini bildiradi;

2. Roʻyxatga olish — ushbu holatdagi murojaat birinchi instansiya sudiga kelib tushgan va devonxonada roʻyxatdan oʻtkazish jarayonida ekanligini bildiradi;

3. Koʻrib chiqish — ushbu holatdagi murojaat birinchi instansiya sudi tomonidan apellyatsiya yoki kassatsiya shikoyatini (protestini) viloyat yoki unga tenglashtirilgan sudga yuborish jarayonida ekanligini bildiradi;

4. Roʻyxatga olish (viloyat) — ushbu holatdagi murojaat birinchi instansiya sudi tomonidan viloyat yoki unga tenglashtirilgan sudga yuborilgan apellyatsiya yoki kassatsiya shikoyati (protesti) devonxonada roʻyxatdan oʻtkazish jarayonida ekanligini bildiradi;

5. Taqsimlash yoki Qayta taqsimlashda — ushbu holatdagi murojaat masʼul sudyaga taqsimlash jarayonida ekanligini bildiradi;

6. Ish qoʻzgʻatish — ushbu holatdagi murojaat ish yuritishga qabul qilish va ish qoʻzgʻatish jarayonida ekanligini bildiradi;

7. Tayyorlash — ushbu holatdagi murojaat sudya tomonidan ishni sud muhokamasiga tayinlash jarayonida ekanligini bildiradi;

8. Natijasiz — ushbu holatdagi murojaat sudyaning ish yurituviga qabul qilingan, lekin hali ish boʻyicha yakuniy sud hujjati qabul qilinmaganligini bildiradi;

9. Toʻxtatilgan — ushbu holat fuqarolik ishi boʻyicha ish yuritish FPKning 116, 117-moddalariga asosan toʻxtatilganligini bildiradi;

10. Natijani qabul qilish — ushbu holat ishni koʻrish yakuniga koʻra natija kiritilganligini hamda ayni vaqtda sud devonxonasi tomonidan taqqoslash jarayonida ekanligini bildiradi (mazkur bosqichda masʼul xodim sudya kiritgan natijani sud hujjatining xulosa qismi bilan mosligini taqqoslaydi);

11. Natija qabul qilingan — ushbu holat ishni koʻrish yakuniga koʻra natijasi qabul qilinganligini bildiradi;

12. Arxivga yuborilgan va Arxivga topshirilgan — ushbu holat ish arxiv boʻlimiga yuborilganligini va arxiv boʻlimi tomonidan qabul qilib olinganligini bildiradi.

7. Foydalanuvchilar tomonidan sud hujjatlarini va javob xatlarini qabul qilib olish tartibi

Foydalanuvchi “E-XSUD axborot tizimi orqali taqdim etgan murojaatlari yuzasidan amalga oshirilgan fuqarolik ishlari boʻyicha sudning protsessual harakatlariga doir maʼlumotlarni, murojaatni koʻrib chiqish natijalari boʻyicha qabul qilingan sud hujjatlarini, shuningdek, javob xatlarini shaxsiy kabineti orqali olish imkoniyatiga ega.

Murojaat yuzasidan qabul qilingan sud hujjatlarini, shuningdek, javob xatlarini shaxsiy kabinet orqali olgan foydalanuvchi ushbu hujjatlarni qogʻoz koʻrinishida olish huquqidan mahrum etilmaydi.

Mazkur Tartibga amal qilgan holda taqdim etilgan murojaatlar boʻyicha fuqarolik ishlari boʻyicha sudning sud hujjatlari, shuningdek, javob xatlari foydalanuvchining “shaxsiy kabineti”ga protsessual muddatlarga toʻliq rioya etgan holda yuboriladi.

Yuborilgan sud hujjatlari, shuningdek, javob xatlari foydalanuvchining “shaxsiy kabineti”dagi “Ishni sud tomonidan koʻrib chiqilishi” rukniga kelib tushadi. Foydalanuvchi sud hujjatlarini, shuningdek, javob xatlarini yuklab olgan holda ular bilan tanishib chiqish imkoniyatiga ega.

Oʻzbekiston Respublikasi Oliy sudi raisi K. Kamilov

Toshkent sh.,

2020-yil 30-yanvar,

RS-02-20-son

lex.uz