📅 2020-yil 24-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 24 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 24 августа 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 24 August 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
ТАРКИБИ
НИЗОМ
«Илҳом» мукофотини таъсис этиш тўғрисида
Олий таълим муассасаларида шоир ва ёзувчилар ҳаёти ҳамда ижодини чуқур ўрганишни самарали ташкил этиш, ёшларнинг адабиётга қизиқишини янада ошириш, уларни китоб ўқишга даъват этиш ва шу асосда уларнинг қалбида ватанпарварлик туйғуларини янада юксалтириш мақсадида Вазирлар Маҳкамаси қарор қилади:
1. Ўзбекистон Республикаси Олий ва ўрта махсус таълим вазирлиги, Маданият вазирлиги, Республика Маънавият ва маърифат маркази ҳамда Ўзбекистон Ёзувчилар уюшмасининг «Илҳом» мукофотини (кейинги ўринларда — мукофот) таъсис этиш тўғрисидаги таклифи маъқуллансин.
2. «Илҳом» мукофоти танловига тайёргарлик кўриш ва уни ўтказиш бўйича ташкилий қўмита 1-иловага мувофиқ таркибда ташкил этилсин.
3. «Илҳом» мукофоти учун танлов ўтказиш қоидалари ва шартлари, ташкил этиш ҳамда ўтказиш, мукофотни топшириш ва молиялаштириш тартибини назарда тутувчи «Илҳом» мукофоти билан тақдирлаш тартиби тўғрисидаги низом 2-иловага мувофиқ тасдиқлансин.
4. Белгилаб қўйилсинки:
а) мукофот шоир ва ёзувчилар ҳаёти ҳамда ижодини ўрганиш, уларнинг асарларини таржима қилиш, шу асосда тадқиқотлар ўтказиш, кино ва саҳна асарлари яратиш каби маънавий-маърифий, илмий-ижодий жараёнларда энг юқори натижаларга эришган олий таълим муассасаларида таҳсил олаётган ҳамда фаолият юритаётган ёшларга берилади;
б) мукофот учун танловни юқори савияда ўтказишга Ўзбекистон Республикаси Олий ва ўрта махсус таълим вазирлиги масъул, Ички ишлар вазирлиги, Миллий гвардия, Маданият вазирлиги, Ёшлар ишлари агентлиги, «Ўзбеккино» Миллий агентлиги, Маънавият ва маърифат маркази, Ёзувчилар уюшмаси ҳамда Ўзбекистон Бадиий академияси ҳамкор вазирлик ва идоралар этиб белгиланади;
в) мукофот билан тақдирлаш ҳар йили Адиблар хиёбони очилган кун — 20 майда «Катта адабиёт байрами» ҳафталиги доирасида амалга оширилади;
г) танлов ғолиблари қуйидагича тақдирланади:
1-ўрин учун — базавий ҳисоблаш миқдорининг 100 (юз) баравари миқдоридаги пул мукофоти, махсус диплом ва статуэтка;
2-ўрин учун — базавий ҳисоблаш миқдорининг 80 (саксон) баравари миқдоридаги пул мукофоти, махсус диплом ва статуэтка;
3-ўрин учун — базавий ҳисоблаш миқдорининг 40 (қирқ) баравари миқдоридаги пул мукофоти, махсус диплом ва статуэтка.
5. Ўзбекистон Республикаси Олий ва ўрта махсус таълим вазирлиги Маданият вазирлиги, Ички ишлар вазирлиги, Миллий гвардия, Республика Маънавият ва маърифат маркази, Ўзбекистон Ёзувчилар уюшмаси ва «Ўзбеккино» миллий агентлиги билан биргаликда «Катта адабиёт байрами» ҳафталиги доирасида «Илҳом» мукофоти билан тақдирлаш бўйича дастурни икки ой муддатда ишлаб чиқиб тасдиқласин ҳамда тадбирларнинг юқори савияда ташкил этилишини таъминласин.
6. Ўзбекистон Бадиий академияси Ўзбекистон Республикаси Олий ва ўрта махсус таълим вазирлиги буюртмасига биноан шартнома асосида мукофот статуэткаси эскизи лойиҳасини уч ой муддатда ишлаб чиқсин ҳамда тасдиқлаш учун «Илҳом» мукофоти танловига тайёргарлик кўриш ва уни ўтказиш бўйича ташкилий қўмитага киритсин.
7. Мукофотларни тайёрлаш ҳамда ғолибларни тақдирлаш маросимини ўтказиш билан боғлиқ харажатлар Ўзбекистон Республикаси Олий ва ўрта махсус таълим вазирлигининг Олий таълим муассасаларини ривожлантириш жамғармаси маблағлари ҳисобидан амалга оширилади.
8. Ўзбекистон Миллий телерадиокомпанияси, Ўзбекистон Миллий ахборот агентлиги ва бошқа оммавий ахборот воситаларига мазкур танловларни кенг ёритиб бориш тавсия этилсин.
9. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари Б.А. Мусаев зиммасига юклансин.
Вазирлар Маҳкамасининг 2020 йил 24 августдаги 503-сон қарорига 1-ИЛОВА
«Илҳом» мукофоти танловига тайёргарлик кўриш ва уни ўтказиш бўйича ташкилий қўмита
Ю. Абсоатов — Ўзбекистон Республикаси олий ва ўрта махсус таълим вазирининг ўринбосари, Ташкилий қўмита раиси О. Базаров — Ўзбекистон Республикаси Олий ва ўрта махсус таълим вазирлиги Маънавий-ахлоқий тарбия бошқармаси бошлиғи, Ташкилий қўмита раиси ўринбосари М. Рустамбаев — Ўзбекистон Республикаси Жамоат хавфсизлиги университети бошлиғи Б. Матлюбов — Ўзбекистон Республикаси Ички ишлар вазирлиги Академияси бошлиғи М. Қуронов — Республика Маънавият ва маърифат маркази раҳбарининг ўринбосари Ш. Ризаев — « Ўзбеккино » Миллий агентлиги бош директорининг биринчи ўринбосари М. Абдусаматов — Ўзбекистон Ёзувчилар уюшмаси масъул котиби Ж. Ниязбеков — Ўзбекистон Республикаси Маданият вазирлигининг Ижодкор ёшлар билан ишлаш ва оммавий маданий тадбирларни ташкил этиш бошқармаси бошлиғи М. Машарипов — Ўзбекистон Республикаси Ёшлар ишлари агентлигининг Бешта ташаббус лойиҳаларини мувофиқлаштириш бошқармаси бошлиғи Ф. Абиджанова — Ўзбекистон Бадиий академия си масъул котиби О. Худойназаров — Ўзбекистон Республикаси Олий ва ўрта махсус таълим вазирлиги ҳузуридаги Маънавият ва маърифат маркази раҳбари, Ташкилий қўмита котиби
Вазирлар Маҳкамасининг 2020 йил 24 августдаги 503-сон қарорига 2-ИЛОВА
«Илҳом» мукофоти билан тақдирлаш тўғрисида
1-боб. Умумий қоидалар
1. «Илҳом» мукофоти (кейинги ўринларда — мукофот) шоир ва ёзувчилар ҳаёти ва ижодини ўрганиш, уларнинг асарларини таржима қилиш, шу асосда тадқиқотлар ўтказиш, кино ва саҳна асарлари яратиш каби маънавий-маърифий, илмий-ижодий жараёнларда энг юқори натижаларга эришган олий таълим муассасаларида таҳсил олаётган ва фаолият юритаётган ёшларга берилади.
2. Танлов қуйидаги мақсадларда ўтказилади:
олий таълим муассасаларида шоир ва ёзувчиларнинг ҳаёти ва ижодини чуқур ўрганишни самарали ташкил этиш;
ёшларнинг адабиётга қизиқишини ошириш, китоб ўқишга даъват этиш ва шу асосда уларнинг қалбида ватанпарварлик туйғуларини янада юксалтириш;
маънавий-маърифий, илмий-ижодий жараёнларда юқори натижаларга эришган олий таълим муассасаларида таҳсил олаётган ва фаолият юритаётган ёшларнинг истеъдоди ва ижодий қобилиятини рағбатлантириш;
шоир ва ёзувчилар асарларини таржима қилиш, шу асосда тадқиқотлар ўтказиш, кино ва саҳна асарлари яратиш ҳамда уларни ёшлар орасида оммалаштириш.
3. Мукофот олий таълим муассасаларида таҳсил олаётган ёки фаолият юритаётган уч нафар ғолибга (ёки ижодий жамоага) 1, 2 ва 3-ўрин кетма-кетлигида берилади.
4. Ғолиблар мукофот билан ушбу Низомга иловага мувофиқ схема асосида тақдирланади.
2-боб. Танловнинг дастлабки саралаш босқичини ташкил этиш ва ўтказиш тартиби
5. Танловда ташкилий-ҳуқуқий шаклидан қатъи назар, республикамиздаги барча олий таълим муассасалари иштирок этиши мумкин.
Танлов икки — дастлабки саралаш ва асосий танлов босқичларида ўтказилади.
Дастлабки саралаш босқичи номзодлар таҳсил олаётган ёки фаолият юритаётган олий таълим муассасаларида ташкил этиладиган ишчи гуруҳлар томонидан амалга оширилади.
6. Дастлабки саралаш босқичида номзодлар олий таълим муассасаси миқёсида тест саволлари орқали сараланади.
Тест саволлари «Илҳом» мукофоти танловига тайёргарлик кўриш ва уни ўтказиш бўйича ташкилий қўмита (кейинги ўринларда — ташкилий қўмита) томонидан ҳар йили 10 мартга қадар шакллантирилади.
Тест саволлари миллий адабиётимизнинг дурдона асарлари, адиб ва мутафаккирларнинг бой маънавий мероси, шоир ва ёзувчиларнинг ҳаёти ва ижодини қамраб олувчи 50 та саволдан иборат бўлади.
7. Тест саволлари олий таълим муассасаларига ҳар йили 15 мартга қадар тақдим этилади. Саволларнинг ошкор этилмаслиги, синовларнинг очиқ ва ҳаққоний ўтиши учун масъулият олий таълим муассасаси ректори зиммасига юкланади.
Дастлабки саралаш босқичи тест саволлари олингандан сўнг бир кун ичида ўтказилиши лозим.
8. Тест натижаларига кўра, энг юқори балл тўплаган уч нафар номзод олий таълим муассасаси ректорининг тақдимномаси асосида кейинги босқичда иштирок этиши мумкин.
Шоир ва ёзувчилар ҳаёти ҳамда ижоди асосида кино ва саҳна асарлари яратган, адиблар ҳаёти ва ижоди ҳақида илмий-оммабоп тадқиқотлар ўтказган, уларнинг асарларини хорижий тилларга таржима қилган ёшларга олий таълим муассасаси ректорининг тақдимномаси, истисно тариқасида, тест синовларисиз берилиши мумкин.
9. Дастлабки саралаш босқичи натижаларидан норози бўлган иштирокчи қабул қилинган қарорга нисбатан ғолиблар эълон қилинган санадан бошлаб ўн кун муддат ичида ташкилий қўмитага апелляция тартибида шикоят киритиш ҳуқуқига эга.
Ташкилий қўмита шикоятни апелляция тартибида кўриб чиқишда, унинг аъзоларининг камида 2/3 қисми иштирок этганда ҳақиқий ҳисобланади.
Ташкилий қўмита ўн кун муддат ичида шикоятни кўриб чиқиб, қуйидаги қарорлардан бирини қабул қилади ва қарор нусхасини мурожаат қилган шахсга юборади:
шикоятни қаноатлантиришни рад этиб, саралаш босқичи бўйича олий таълим муассасаси қарорини ўзгаришсиз қолдириш;
шикоятни қаноатлантириб, саралаш босқичи бўйича олий таълим муассасаси қарорини қисман ёки бутунлай бекор қилиб, янги қарор қабул қилиш.
Ташкилий қўмитанинг шикоятни апелляция тартибида кўриб чиқиши баённома билан расмийлаштирилади.
Ташкилий қўмитанинг апелляция мажлисига мурожаат этган шахс таклиф этилади. Унинг иштирок этмаслиги мажлиснинг ўтказилмаслигига ёки бошқа кунга қолдирилишига асос бўлмайди.
10. Олий таълим муассасаларида сараланган номзодларнинг ҳужжатлари расмийлаштирилиб, ташкилий қўмитага тақдим этилади.
11. Ҳар йили 15 апрелга қадар олий таълим муассасаси томонидан «Илҳом» мукофоти танловининг асосий босқичида иштирок этиш учун номзоднинг қуйидаги ҳужжатлари тақдим этилади:
олий таълим муассасасининг тақдимномаси;
паспорти (ID-картаси) нусхаси;
маълумотнома-объективка;
танловда иштирок этиш учун тақдим этадиган ишлари (фото-видео лавҳалар, тадқиқотлар, бадиий асарлар, оммавий ахборот воситаларидаги чиқишлар).
12. Номзоднинг ҳужжатлари юқорида кўрсатилган тартибда қабул қилинади.
3-боб. Танловнинг асосий босқичи ғолибларини аниқлаш ва баҳолаш тартиби
13. «Илҳом» мукофоти танловига тайёргарлик кўриш, номзодларнинг ҳужжатларини қабул қилиш, расмийлаштириш, уларни кўриб чиқиш, саралаш ва баҳолаш ташкилий қўмита томонидан амалга оширилади.
14. Мукофот учун танлов ғолибларини аниқлашда, қуйидаги жиҳатларга алоҳида эътибор қаратилади:
Адиблар хиёбонида ўтказилган маданий-маърифий тадбирлар бўйича маълумотнома (фото ва видео лавҳалар);
адиблар ҳаёти ва ижоди ҳақидаги тадқиқотлар;
адиблар ижодини оммалаштириш, шу жумладан уларнинг асарларини хорижий тилларга таржима қилиш бўйича амалга оширилган ишлар;
адиблар ҳаёти ҳақида ҳикоя қилувчи ёки уларнинг асарлари асосида саҳналаштирилган спектакллар, суратга олинган бадиий ва ҳужжатли фильмлар, бадиий асарлар, фотокўргазмалар, экспозициялар;
адиблар ҳаёти ва ижодини ўрганишга оид экспедициялар ва уларнинг натижалари;
адиблар ҳаёти ва ижодини тарғиб қилиш бўйича оммавий ахборот воситаларидаги чиқишлар.
15. Ташкилий қўмита томонидан бир ой давомида тақдим этилган ишларнинг ижтимоий аҳамияти, мавзунинг ёритилиши, талқиннинг ўзига хослиги, асарнинг бадиийлиги мезонлари бўйича ҳар бир талаб 5 баллик тизимга биноан холислик ва шаффофлик асосида баҳоланади.
16. Ёзувчи ва шоирлар асарларининг хорижий тилларга таржимаси тақдим этилган тақдирда, таржиманинг бадиий сифатини аниқлаш бўйича мутахассислардан хулосалар олинади.
17. Ташкилий қўмитанинг ҳар бир аъзоси томонидан қўйилган баҳолар йиғиндиси умумлаштирилади ва ўртача балл аниқланади.
Энг юқори балл тўплаган номзодлар даражаси бўйича ғолиб деб топилади.
Ташкилий қўмитанинг қарори баённома билан расмийлаштирилади ҳамда унинг барча аъзолари томонидан имзоланади.
18. Тавсия этилаётган ишларни кўришда номзоднинг истеъдоди, ижтимоий фаоллиги мутахассислар томонидан юқори баҳоланганлиги, кенг жамоатчилик томонидан эътироф этилганлиги инобатга олинади.
19. Ташкилий қўмитанинг баённомаси Ўзбекистон Республикаси Олий ва ўрта махсус таълим вазирлигига тақдим этилади.
20. Танлов ғолибларини «Илҳом» мукофоти билан тақдирлаш ташкилий қўмитанинг баённомаси асосида Ўзбекистон Республикаси Олий ва ўрта махсус таълим вазирлиги буйруғи асосида амалга оширилади.
4-боб. Мукофотни топшириш, танловни ташкил этиш ва ўтказишни молиялаштириш тартиби
21. Ғолиблар мукофот билан ҳар йили Адиблар хиёбони очилган кун — 20 майда «Катта адабиёт байрами» ҳафталиги доирасида тақдирланади.
22. Мукофот билан тақдирланганлар кейинги йилларда ўтказиладиган танловларда иштирок этмайди.
23. Танловларни ташкил этиш ва ўтказиш билан боғлиқ харажатлар қуйидаги манбалар ҳисобидан амалга оширилади:
Ўзбекистон Республикаси Олий ва ўрта махсус таълим вазирлигининг Олий таълим муассасаларини ривожлантириш жамғармаси маблағлари;
юридик ва жисмоний шахсларнинг ҳомийлик хайриялари;
қонунчилик ҳужжатларида тақиқланмаган бошқа манбалар.
Бунда танловлар совриндорларига тўланадиган пул мукофотлари Ўзбекистон Республикаси Олий ва ўрта махсус таълим вазирлигининг Олий таълим муассасаларини ривожлантириш жамғармаси маблағлари ҳисобидан қопланади.
5-боб. Якунловчи қоидалар
24. Танловни ўтказиш жараёнлари бўйича келиб чиқадиган низолар қонунчилик ҳужжатларида белгиланган тартибда ҳал этилади.
25. Мукофот ғолиблари расман эълон қилингандан сўнг бошқа номзодларнинг ариза ва шикоятлари кўриб чиқилмайди.
Ўзбекистон Республикасининг Бош вазири А. АРИПОВ
Тошкент ш.,
2020 йил 24 август,
503-сон
Oʻzbekiston Respublikasi Vazirlar Mahkamasining
qarori
TARKIBI
NIZOM
“Ilhom” mukofotini taʼsis etish toʻgʻrisida
Oliy taʼlim muassasalarida shoir va yozuvchilar hayoti hamda ijodini chuqur oʻrganishni samarali tashkil etish, yoshlarning adabiyotga qiziqishini yanada oshirish, ularni kitob oʻqishga daʼvat etish va shu asosda ularning qalbida vatanparvarlik tuygʻularini yanada yuksaltirish maqsadida Vazirlar Mahkamasi qaror qiladi:
1. Oʻzbekiston Respublikasi Oliy va oʻrta maxsus taʼlim vazirligi, Madaniyat vazirligi, Respublika Maʼnaviyat va maʼrifat markazi hamda Oʻzbekiston Yozuvchilar uyushmasining “Ilhom” mukofotini (keyingi oʻrinlarda — mukofot) taʼsis etish toʻgʻrisidagi taklifi maʼqullansin.
2. “Ilhom” mukofoti tanloviga tayyorgarlik koʻrish va uni oʻtkazish boʻyicha tashkiliy qoʻmita 1-ilovaga muvofiq tarkibda tashkil etilsin.
3. “Ilhom” mukofoti uchun tanlov oʻtkazish qoidalari va shartlari, tashkil etish hamda oʻtkazish, mukofotni topshirish va moliyalashtirish tartibini nazarda tutuvchi “Ilhom” mukofoti bilan taqdirlash tartibi toʻgʻrisidagi nizom 2-ilovaga muvofiq tasdiqlansin.
4. Belgilab qoʻyilsinki:
a) mukofot shoir va yozuvchilar hayoti hamda ijodini oʻrganish, ularning asarlarini tarjima qilish, shu asosda tadqiqotlar oʻtkazish, kino va sahna asarlari yaratish kabi maʼnaviy-maʼrifiy, ilmiy-ijodiy jarayonlarda eng yuqori natijalarga erishgan oliy taʼlim muassasalarida tahsil olayotgan hamda faoliyat yuritayotgan yoshlarga beriladi;
b) mukofot uchun tanlovni yuqori saviyada oʻtkazishga Oʻzbekiston Respublikasi Oliy va oʻrta maxsus taʼlim vazirligi masʼul, Ichki ishlar vazirligi, Milliy gvardiya, Madaniyat vazirligi, Yoshlar ishlari agentligi, “Oʻzbekkino” Milliy agentligi, Maʼnaviyat va maʼrifat markazi, Yozuvchilar uyushmasi hamda Oʻzbekiston Badiiy akademiyasi hamkor vazirlik va idoralar etib belgilanadi;
v) mukofot bilan taqdirlash har yili Adiblar xiyoboni ochilgan kun — 20-mayda “Katta adabiyot bayrami” haftaligi doirasida amalga oshiriladi;
g) tanlov gʻoliblari quyidagicha taqdirlanadi:
1-oʻrin uchun — bazaviy hisoblash miqdorining 100 (yuz) baravari miqdoridagi pul mukofoti, maxsus diplom va statuetka;
2-oʻrin uchun — bazaviy hisoblash miqdorining 80 (sakson) baravari miqdoridagi pul mukofoti, maxsus diplom va statuetka;
3-oʻrin uchun — bazaviy hisoblash miqdorining 40 (qirq) baravari miqdoridagi pul mukofoti, maxsus diplom va statuetka.
5. Oʻzbekiston Respublikasi Oliy va oʻrta maxsus taʼlim vazirligi Madaniyat vazirligi, Ichki ishlar vazirligi, Milliy gvardiya, Respublika Maʼnaviyat va maʼrifat markazi, Oʻzbekiston Yozuvchilar uyushmasi va “Oʻzbekkino” milliy agentligi bilan birgalikda “Katta adabiyot bayrami” haftaligi doirasida “Ilhom” mukofoti bilan taqdirlash boʻyicha dasturni ikki oy muddatda ishlab chiqib tasdiqlasin hamda tadbirlarning yuqori saviyada tashkil etilishini taʼminlasin.
6. Oʻzbekiston Badiiy akademiyasi Oʻzbekiston Respublikasi Oliy va oʻrta maxsus taʼlim vazirligi buyurtmasiga binoan shartnoma asosida mukofot statuetkasi eskizi loyihasini uch oy muddatda ishlab chiqsin hamda tasdiqlash uchun “Ilhom” mukofoti tanloviga tayyorgarlik koʻrish va uni oʻtkazish boʻyicha tashkiliy qoʻmitaga kiritsin.
7. Mukofotlarni tayyorlash hamda gʻoliblarni taqdirlash marosimini oʻtkazish bilan bogʻliq xarajatlar Oʻzbekiston Respublikasi Oliy va oʻrta maxsus taʼlim vazirligining Oliy taʼlim muassasalarini rivojlantirish jamgʻarmasi mablagʻlari hisobidan amalga oshiriladi.
8. Oʻzbekiston Milliy teleradiokompaniyasi, Oʻzbekiston Milliy axborot agentligi va boshqa ommaviy axborot vositalariga mazkur tanlovlarni keng yoritib borish tavsiya etilsin.
9. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A. Musayev zimmasiga yuklansin.
Vazirlar Mahkamasining 2020-yil 24-avgustdagi 503-son qaroriga 1-ILOVA
“Ilhom” mukofoti tanloviga tayyorgarlik koʻrish va uni oʻtkazish boʻyicha tashkiliy qoʻmita
Y. Absoatov — Oʻzbekiston Respublikasi oliy va oʻrta maxsus taʼlim vazirining oʻrinbosari, Tashkiliy qoʻmita raisi O. Bazarov — Oʻzbekiston Respublikasi Oliy va oʻrta maxsus taʼlim vazirligi Maʼnaviy-axloqiy tarbiya boshqarmasi boshligʻi, Tashkiliy qoʻmita raisi oʻrinbosari M. Rustambayev — Oʻzbekiston Respublikasi Jamoat xavfsizligi universiteti boshligʻi B. Matlyubov — Oʻzbekiston Respublikasi Ichki ishlar vazirligi Akademiyasi boshligʻi M. Quronov — Respublika Maʼnaviyat va maʼrifat markazi rahbarining oʻrinbosari Sh. Rizayev — “ Oʻzbekkino ” Milliy agentligi bosh direktorining birinchi oʻrinbosari M. Abdusamatov — Oʻzbekiston Yozuvchilar uyushmasi masʼul kotibi J. Niyazbekov — Oʻzbekiston Respublikasi Madaniyat vazirligining Ijodkor yoshlar bilan ishlash va ommaviy madaniy tadbirlarni tashkil etish boshqarmasi boshligʻi M. Masharipov — Oʻzbekiston Respublikasi Yoshlar ishlari agentligining Beshta tashabbus loyihalarini muvofiqlashtirish boshqarmasi boshligʻi F. Abidjanova — Oʻzbekiston Badiiy akademiya si masʼul kotibi O. Xudoynazarov — Oʻzbekiston Respublikasi Oliy va oʻrta maxsus taʼlim vazirligi huzuridagi Maʼnaviyat va maʼrifat markazi rahbari, Tashkiliy qoʻmita kotibi
Vazirlar Mahkamasining 2020-yil 24-avgustdagi 503-son qaroriga 2-ILOVA
“Ilhom” mukofoti bilan taqdirlash toʻgʻrisida
1-bob. Umumiy qoidalar
1. “Ilhom” mukofoti (keyingi oʻrinlarda — mukofot) shoir va yozuvchilar hayoti va ijodini oʻrganish, ularning asarlarini tarjima qilish, shu asosda tadqiqotlar oʻtkazish, kino va sahna asarlari yaratish kabi maʼnaviy-maʼrifiy, ilmiy-ijodiy jarayonlarda eng yuqori natijalarga erishgan oliy taʼlim muassasalarida tahsil olayotgan va faoliyat yuritayotgan yoshlarga beriladi.
2. Tanlov quyidagi maqsadlarda oʻtkaziladi:
oliy taʼlim muassasalarida shoir va yozuvchilarning hayoti va ijodini chuqur oʻrganishni samarali tashkil etish;
yoshlarning adabiyotga qiziqishini oshirish, kitob oʻqishga daʼvat etish va shu asosda ularning qalbida vatanparvarlik tuygʻularini yanada yuksaltirish;
maʼnaviy-maʼrifiy, ilmiy-ijodiy jarayonlarda yuqori natijalarga erishgan oliy taʼlim muassasalarida tahsil olayotgan va faoliyat yuritayotgan yoshlarning isteʼdodi va ijodiy qobiliyatini ragʻbatlantirish;
shoir va yozuvchilar asarlarini tarjima qilish, shu asosda tadqiqotlar oʻtkazish, kino va sahna asarlari yaratish hamda ularni yoshlar orasida ommalashtirish.
3. Mukofot oliy taʼlim muassasalarida tahsil olayotgan yoki faoliyat yuritayotgan uch nafar gʻolibga (yoki ijodiy jamoaga) 1, 2 va 3-oʻrin ketma-ketligida beriladi.
4. Gʻoliblar mukofot bilan ushbu Nizomga ilovaga muvofiq sxema asosida taqdirlanadi.
2-bob. Tanlovning dastlabki saralash bosqichini tashkil etish va oʻtkazish tartibi
5. Tanlovda tashkiliy-huquqiy shaklidan qatʼi nazar, respublikamizdagi barcha oliy taʼlim muassasalari ishtirok etishi mumkin.
Tanlov ikki — dastlabki saralash va asosiy tanlov bosqichlarida oʻtkaziladi.
Dastlabki saralash bosqichi nomzodlar tahsil olayotgan yoki faoliyat yuritayotgan oliy taʼlim muassasalarida tashkil etiladigan ishchi guruhlar tomonidan amalga oshiriladi.
6. Dastlabki saralash bosqichida nomzodlar oliy taʼlim muassasasi miqyosida test savollari orqali saralanadi.
Test savollari “Ilhom” mukofoti tanloviga tayyorgarlik koʻrish va uni oʻtkazish boʻyicha tashkiliy qoʻmita (keyingi oʻrinlarda — tashkiliy qoʻmita) tomonidan har yili 10-martga qadar shakllantiriladi.
Test savollari milliy adabiyotimizning durdona asarlari, adib va mutafakkirlarning boy maʼnaviy merosi, shoir va yozuvchilarning hayoti va ijodini qamrab oluvchi 50 ta savoldan iborat boʻladi.
7. Test savollari oliy taʼlim muassasalariga har yili 15-martga qadar taqdim etiladi. Savollarning oshkor etilmasligi, sinovlarning ochiq va haqqoniy oʻtishi uchun masʼuliyat oliy taʼlim muassasasi rektori zimmasiga yuklanadi.
Dastlabki saralash bosqichi test savollari olingandan soʻng bir kun ichida oʻtkazilishi lozim.
8. Test natijalariga koʻra, eng yuqori ball toʻplagan uch nafar nomzod oliy taʼlim muassasasi rektorining taqdimnomasi asosida keyingi bosqichda ishtirok etishi mumkin.
Shoir va yozuvchilar hayoti hamda ijodi asosida kino va sahna asarlari yaratgan, adiblar hayoti va ijodi haqida ilmiy-ommabop tadqiqotlar oʻtkazgan, ularning asarlarini xorijiy tillarga tarjima qilgan yoshlarga oliy taʼlim muassasasi rektorining taqdimnomasi, istisno tariqasida, test sinovlarisiz berilishi mumkin.
9. Dastlabki saralash bosqichi natijalaridan norozi boʻlgan ishtirokchi qabul qilingan qarorga nisbatan gʻoliblar eʼlon qilingan sanadan boshlab oʻn kun muddat ichida tashkiliy qoʻmitaga apellyatsiya tartibida shikoyat kiritish huquqiga ega.
Tashkiliy qoʻmita shikoyatni apellyatsiya tartibida koʻrib chiqishda, uning aʼzolarining kamida 2/3 qismi ishtirok etganda haqiqiy hisoblanadi.
Tashkiliy qoʻmita oʻn kun muddat ichida shikoyatni koʻrib chiqib, quyidagi qarorlardan birini qabul qiladi va qaror nusxasini murojaat qilgan shaxsga yuboradi:
shikoyatni qanoatlantirishni rad etib, saralash bosqichi boʻyicha oliy taʼlim muassasasi qarorini oʻzgarishsiz qoldirish;
shikoyatni qanoatlantirib, saralash bosqichi boʻyicha oliy taʼlim muassasasi qarorini qisman yoki butunlay bekor qilib, yangi qaror qabul qilish.
Tashkiliy qoʻmitaning shikoyatni apellyatsiya tartibida koʻrib chiqishi bayonnoma bilan rasmiylashtiriladi.
Tashkiliy qoʻmitaning apellyatsiya majlisiga murojaat etgan shaxs taklif etiladi. Uning ishtirok etmasligi majlisning oʻtkazilmasligiga yoki boshqa kunga qoldirilishiga asos boʻlmaydi.
10. Oliy taʼlim muassasalarida saralangan nomzodlarning hujjatlari rasmiylashtirilib, tashkiliy qoʻmitaga taqdim etiladi.
11. Har yili 15-aprelga qadar oliy taʼlim muassasasi tomonidan “Ilhom” mukofoti tanlovining asosiy bosqichida ishtirok etish uchun nomzodning quyidagi hujjatlari taqdim etiladi:
oliy taʼlim muassasasining taqdimnomasi;
pasporti (ID-kartasi) nusxasi;
maʼlumotnoma-obyektivka;
tanlovda ishtirok etish uchun taqdim etadigan ishlari (foto-video lavhalar, tadqiqotlar, badiiy asarlar, ommaviy axborot vositalaridagi chiqishlar).
12. Nomzodning hujjatlari yuqorida koʻrsatilgan tartibda qabul qilinadi.
3-bob. Tanlovning asosiy bosqichi gʻoliblarini aniqlash va baholash tartibi
13. “Ilhom” mukofoti tanloviga tayyorgarlik koʻrish, nomzodlarning hujjatlarini qabul qilish, rasmiylashtirish, ularni koʻrib chiqish, saralash va baholash tashkiliy qoʻmita tomonidan amalga oshiriladi.
14. Mukofot uchun tanlov gʻoliblarini aniqlashda, quyidagi jihatlarga alohida eʼtibor qaratiladi:
Adiblar xiyobonida oʻtkazilgan madaniy-maʼrifiy tadbirlar boʻyicha maʼlumotnoma (foto va video lavhalar);
adiblar hayoti va ijodi haqidagi tadqiqotlar;
adiblar ijodini ommalashtirish, shu jumladan ularning asarlarini xorijiy tillarga tarjima qilish boʻyicha amalga oshirilgan ishlar;
adiblar hayoti haqida hikoya qiluvchi yoki ularning asarlari asosida sahnalashtirilgan spektakllar, suratga olingan badiiy va hujjatli filmlar, badiiy asarlar, fotokoʻrgazmalar, ekspozitsiyalar;
adiblar hayoti va ijodini oʻrganishga oid ekspeditsiyalar va ularning natijalari;
adiblar hayoti va ijodini targʻib qilish boʻyicha ommaviy axborot vositalaridagi chiqishlar.
15. Tashkiliy qoʻmita tomonidan bir oy davomida taqdim etilgan ishlarning ijtimoiy ahamiyati, mavzuning yoritilishi, talqinning oʻziga xosligi, asarning badiiyligi mezonlari boʻyicha har bir talab 5 ballik tizimga binoan xolislik va shaffoflik asosida baholanadi.
16. Yozuvchi va shoirlar asarlarining xorijiy tillarga tarjimasi taqdim etilgan taqdirda, tarjimaning badiiy sifatini aniqlash boʻyicha mutaxassislardan xulosalar olinadi.
17. Tashkiliy qoʻmitaning har bir aʼzosi tomonidan qoʻyilgan baholar yigʻindisi umumlashtiriladi va oʻrtacha ball aniqlanadi.
Eng yuqori ball toʻplagan nomzodlar darajasi boʻyicha gʻolib deb topiladi.
Tashkiliy qoʻmitaning qarori bayonnoma bilan rasmiylashtiriladi hamda uning barcha aʼzolari tomonidan imzolanadi.
18. Tavsiya etilayotgan ishlarni koʻrishda nomzodning isteʼdodi, ijtimoiy faolligi mutaxassislar tomonidan yuqori baholanganligi, keng jamoatchilik tomonidan eʼtirof etilganligi inobatga olinadi.
19. Tashkiliy qoʻmitaning bayonnomasi Oʻzbekiston Respublikasi Oliy va oʻrta maxsus taʼlim vazirligiga taqdim etiladi.
20. Tanlov gʻoliblarini “Ilhom” mukofoti bilan taqdirlash tashkiliy qoʻmitaning bayonnomasi asosida Oʻzbekiston Respublikasi Oliy va oʻrta maxsus taʼlim vazirligi buyrugʻi asosida amalga oshiriladi.
4-bob. Mukofotni topshirish, tanlovni tashkil etish va oʻtkazishni moliyalashtirish tartibi
21. Gʻoliblar mukofot bilan har yili Adiblar xiyoboni ochilgan kun — 20-mayda “Katta adabiyot bayrami” haftaligi doirasida taqdirlanadi.
22. Mukofot bilan taqdirlanganlar keyingi yillarda oʻtkaziladigan tanlovlarda ishtirok etmaydi.
23. Tanlovlarni tashkil etish va oʻtkazish bilan bogʻliq xarajatlar quyidagi manbalar hisobidan amalga oshiriladi:
Oʻzbekiston Respublikasi Oliy va oʻrta maxsus taʼlim vazirligining Oliy taʼlim muassasalarini rivojlantirish jamgʻarmasi mablagʻlari;
yuridik va jismoniy shaxslarning homiylik xayriyalari;
qonunchilik hujjatlarida taqiqlanmagan boshqa manbalar.
Bunda tanlovlar sovrindorlariga toʻlanadigan pul mukofotlari Oʻzbekiston Respublikasi Oliy va oʻrta maxsus taʼlim vazirligining Oliy taʼlim muassasalarini rivojlantirish jamgʻarmasi mablagʻlari hisobidan qoplanadi.
5-bob. Yakunlovchi qoidalar
24. Tanlovni oʻtkazish jarayonlari boʻyicha kelib chiqadigan nizolar qonunchilik hujjatlarida belgilangan tartibda hal etiladi.
25. Mukofot gʻoliblari rasman eʼlon qilingandan soʻng boshqa nomzodlarning ariza va shikoyatlari koʻrib chiqilmaydi.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 24-avgust,
503-son