📅 2020-yil 27-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 27 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 27 августа 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 27 August 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
РЎЙХАТИ
Мамлакат ижтимоий ҳаётида фаол иштирок этаётган ёш оилаларни уй-жой билан таъминлашни янада такомиллаштириш чора-тадбирлари тўғрисида
Ўзбекистон Республикаси Президентининг «Ипотека кредити механизмларини такомиллаштиришга оид қўшимча чора-тадбирлар тўғрисида» 2019 йил 28 ноябрдаги ПФ-5886-сон Фармони ижросини таъминлаш, шунингдек, мамлакат ижтимоий ҳаётида фаол иштирок этиб, алоҳида намуна кўрсатаётган ёш оилаларни ижтимоий қўллаб-қувватлаш мақсадида Вазирлар Маҳкамаси қарор қилади:
1. Қуйидагилар:
Ўзбекистон Республикаси Президентининг «Ёшларга оид давлат сиёсати самарадорлигини ошириш ва Ўзбекистон ёшлар иттифоқи фаолиятини қўллаб-қувватлаш тўғрисида» 2017 йил 5 июлдаги ПФ-5106-сон Фармонига мувофиқ ёш оилалар, хусусан, имконияти чекланган ва ижтимоий ҳимояга муҳтож ёшларни маънавий ва моддий жиҳатдан қўллаб-қувватлаш, улар учун муносиб уй-жой ва ижтимоий-маиший шароитларини яратишга қаратилган мақсадли ишларни ташкил этиш белгиланганлиги;
Вазирлар Маҳкамасининг тегишли қарорлари ва топшириқлари билан 2018 — 2020 йиллар давомида мамлакат ижтимоий ҳаётида фаол иштирок этаётган ёш оилаларни уй-жой билан таъминлаш мақсадида 2 116 та уй-жойлардан:
350 таси фойдаланишга топширилганлиги;
296 таси ёшлар томонидан рад этилганлиги ва 556 тасининг қурилиши бошланмаганлиги;
2019 йилда 558 та ва 2020 йилда 356 та уй-жойлар қурилиб, фойдаланишга топширилиши режалаштирилганлиги маълумот учун қабул қилинсин.
2. Ўзбекистон ёшлар иттифоқи Марказий Кенгаши томонидан уй-жой шароитларини яхшилашга муҳтож бўлган ёш оила сифатида ҳисобга қўйилган ва тавсиянома берилган ёш оилалар учун 2019-2020 йилларда қурилган ёшлар уйлари рўйхати 1-иловага мувофиқ тасдиқлансин.
3. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари ушбу қарорга 1-иловага мувофиқ уй-жойни ипотека кредити асосида сотиб олиш учун Ўзбекистон ёшлар иттифоқи Марказий Кенгашининг тавсияномаси (кейинги ўринларда — тавсиянома) асосида 2020 йил учун ҳисобга қўйилган 356 нафар ёш оилага уй-жой ажратишда уларнинг талабидан келиб чиқиб, Ўзбекистон Республикаси Президентининг 2019 йил 28 ноябрдаги ПФ-5886-сон Фармони билан тасдиқланган 2020 йилда «Ўзшаҳар қурилиш инвест ИК» МЧЖ ва «Қишлоқ қурилиш инвест ИК» МЧЖ иштирокида шаҳарларда ва қишлоқ жойларида кўп квартирали арзон уй-жойлар қуришнинг асосий параметрларига тегишли ўзгартиришлар киритиш бўйича Вазирлар Маҳкамасига таклиф киритсин.
4. «Қишлоқ қурилиш инвест ИК» МЧЖ «Қишлоқ қурилиш банк» АТБ билан биргаликда Ислом тараққиёт банкининг кредит линиялари бўйича «Қишлоқ қурилиш инвест ИК» МЧЖ ҳисобрақамларида уй қурувчиларнинг дастлабки бадаллари ҳисобидан жамланган маблағларни уч кун муддатда Ўзбекистон Республикаси республика бюджетига йўналтирсин.
5. Ўзбекистон Республикаси Молия вазирлиги Ўзбекистон ёшлар иттифоқининг асосланган ҳисоб-китобига мувофиқ Ислом тараққиёт банкининг кредит линиялари бўйича «Қишлоқ қурилиш инвест ИК» МЧЖ ҳисобрақамларида уй қурувчиларнинг дастлабки бадаллари ҳисобидан жамланган маблағларнинг Ўзбекистон Республикаси республика бюджетига қайтарилган қисми ҳисобидан:
2019 йилда ёшлар учун қурилган 558 та уйнинг дастлабки бадали учун 30,0 млрд сўм;
2020 йилда қуриладиган уй-жойлар учун 356 нафар ёш оилага уй-жой қиймати дастлабки бадалининг 65 фоизигача бўлган қисмини молиялаштириш учун 11,6 млрд сўм маблағларни қўшилган қиймат солиғини қўшган ҳолда ажратсин.
6. Шундай тартиб ўрнатилсинки, унга кўра:
Ўзбекистон ёшлар иттифоқи томонидан ёш оилаларга уй-жой қийматининг дастлабки бадали сифатида тўланган ссудани ва унга ҳисобланган фоизларни (кейинги ўринларда — ссуда ва фоизлар) ундириш бўйича Ўзбекистон Республикаси Ёшлар ишлари агентлиги марказий аппаратида Ёш оилаларга ажратилган уй-жойлар билан ишлаш бўйича назорат гуруҳи (кейинги ўринларда — назорат гуруҳи) ташкил этилади;
Ўзбекистон ёшлар иттифоқининг барча ҳудудий кенгашлари (кейинги ўринларда — ҳудудий кенгашлар)нинг ссуда ва фоизларнинг белгиланган муддатларда қайтарилиши бўйича фаолияти назорат гуруҳи томонидан мувофиқлаштирилади;
ҳудудий кенгашлар ссуда ва фоизларни шартномада белгиланган муддатда қайтармаган ёш оилаларга бир иш куни ичида Маҳалла ва нуронийларни қўллаб-қувватлаш вазирлигининг ҳудудий бошқармалари билан биргаликда шартнома асосида тўловларни амалга ошириш юзасидан муддат белгилаган ҳолда, нотариус орқали ёзма билдиришнома (кейинги ўринларда — ёзма билдиришнома) юборади;
ёш оилалар томонидан ёзма билдиришнома талаблари бажарилмаган тақдирда, ҳудудий кенгашлар икки иш куни ичида муддати ўтган қарздорлик бўйича ижро хати ёзиб беришни сўраб нотариусга мурожаат қилади;
нотариус томонидан бир иш куни ичида ижро хати ёзиб берилади ва Мажбурий ижро бюросининг ҳудудий бўлинмасига тақдим этилади;
Мажбурий ижро бюросининг ҳудудий бўлинмаси белгиланган тартибда муддати ўтган қарздорликни ундириш чораларини кўради.
7. Ўзбекистон Республикаси Ёшлар ишлари агентлиги:
бир ой муддатда назорат гуруҳининг иш тартибини ишлаб чиқсин ва тасдиқласин;
ёш оилаларнинг ссуда ва фоизлар бўйича муддати ўтган қарздорлигини ундириш чораларини кўришда, Ўзбекистон ёшлар иттифоқига доимий равишда амалий кўмаклашсин.
8. Ўзбекистон Республикаси Ҳукуматининг 2-иловага мувофиқ айрим қарорларига ўзгартиришлар ва қўшимча киритилсин.
9. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари А.Ж. Раматов ва Ўзбекистон Республикаси Бош вазирининг ижтимоий ривожлантириш масалалари бўйича ўринбосари Б.А. Мусаев зиммасига юклансин.
Вазирлар Маҳкамасининг 2020 йил 27 августдаги 521-сон қарорига 1-ИЛОВА
Ўзбекистон ёшлар иттифоқи Марказий Кенгаши томонидан уй-жой шароитларини яхшилашга муҳтож бўлган ёш оила сифатида ҳисобга қўйилган ва тавсиянома берилган ёш оилалар учун 2019-2020 йилларда қурилган ёшлар уйлари
Т/р Ҳудуд номи Ёш оилалар учун 2019 йилда қурилган уй-жойлар сони (қолдиқ қисми) Ёш оилаларга уй-жой берилиши лозим бўлган ва 2020 йилда давлат дастури доирасида бериладиган уйлар сони Уй-жойлар (квартиралар) сони Ўзбекистон ёшлар иттифоқи томонидан ажратиладиган бошланғич бадалнинг жами суммаси (млн сўм) 1. Қорақалпоғистон Республикаси 8 80,6 33 2. Андижон вилояти 25 1216,3 – 3. Бухоро вилояти – – 31 4. Жиззах вилояти 52 2491,3 – 5. Қашқадарё вилояти – – 51 6. Навоий вилояти – – 42 7. Наманган вилояти – – 12 8. Сирдарё вилояти 22 277,6 86 9. Тошкент вилояти – – 60 10. Фарғона вилояти 98 5225,8 12 11. Хоразм вилояти 84 3664,5 29 12. Тошкент шаҳри 269 17029,3 – Жами 558 29985,4 356
Вазирлар Маҳкамасининг 2020 йил 27 августдаги 521-сон қарорига 2-ИЛОВА
Ўзбекистон Республикаси Ҳукуматининг айрим қарорларига киритилаётган ўзгартиришлар ва қўшимча
3. Вазирлар Маҳкамасининг «Мамлакат ижтимоий ҳаётида фаол иштирок этаётган ёш оилаларни уй-жой билан таъминлашни такомиллаштириш чора-тадбирлари тўғрисида» 2019 йил 11 сентябрдаги 760-сон қарорида :
2-бандининг биринчи хатбошидаги «2116» рақами «1264» рақами билан алмаштирилсин;
3-банди ўз кучини йўқотган деб ҳисоблансин.
Ўзбекистон Республикасининг Бош вазири А. АРИПОВ
Тошкент ш.,
2020 йил 27 август,
521-сон
Oʻzbekiston Respublikasi Vazirlar Mahkamasining
qarori
ROʻYXATI
Mamlakat ijtimoiy hayotida faol ishtirok etayotgan yosh oilalarni uy-joy bilan taʼminlashni yanada takomillashtirish chora-tadbirlari toʻgʻrisida
Oʻzbekiston Respublikasi Prezidentining “Ipoteka krediti mexanizmlarini takomillashtirishga oid qoʻshimcha chora-tadbirlar toʻgʻrisida” 2019-yil 28-noyabrdagi PF-5886-son Farmoni ijrosini taʼminlash, shuningdek, mamlakat ijtimoiy hayotida faol ishtirok etib, alohida namuna koʻrsatayotgan yosh oilalarni ijtimoiy qoʻllab-quvvatlash maqsadida Vazirlar Mahkamasi qaror qiladi:
1. Quyidagilar:
Oʻzbekiston Respublikasi Prezidentining “Yoshlarga oid davlat siyosati samaradorligini oshirish va Oʻzbekiston yoshlar ittifoqi faoliyatini qoʻllab-quvvatlash toʻgʻrisida” 2017-yil 5-iyuldagi PF-5106-son Farmoniga muvofiq yosh oilalar, xususan, imkoniyati cheklangan va ijtimoiy himoyaga muhtoj yoshlarni maʼnaviy va moddiy jihatdan qoʻllab-quvvatlash, ular uchun munosib uy-joy va ijtimoiy-maishiy sharoitlarini yaratishga qaratilgan maqsadli ishlarni tashkil etish belgilanganligi;
Vazirlar Mahkamasining tegishli qarorlari va topshiriqlari bilan 2018 — 2020-yillar davomida mamlakat ijtimoiy hayotida faol ishtirok etayotgan yosh oilalarni uy-joy bilan taʼminlash maqsadida 2 116 ta uy-joylardan:
350 tasi foydalanishga topshirilganligi;
296 tasi yoshlar tomonidan rad etilganligi va 556 tasining qurilishi boshlanmaganligi;
2019-yilda 558 ta va 2020-yilda 356 ta uy-joylar qurilib, foydalanishga topshirilishi rejalashtirilganligi maʼlumot uchun qabul qilinsin.
2. Oʻzbekiston yoshlar ittifoqi Markaziy Kengashi tomonidan uy-joy sharoitlarini yaxshilashga muhtoj boʻlgan yosh oila sifatida hisobga qoʻyilgan va tavsiyanoma berilgan yosh oilalar uchun 2019-2020-yillarda qurilgan yoshlar uylari roʻyxati 1-ilovaga muvofiq tasdiqlansin.
3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari ushbu qarorga 1-ilovaga muvofiq uy-joyni ipoteka krediti asosida sotib olish uchun Oʻzbekiston yoshlar ittifoqi Markaziy Kengashining tavsiyanomasi (keyingi oʻrinlarda — tavsiyanoma) asosida 2020-yil uchun hisobga qoʻyilgan 356 nafar yosh oilaga uy-joy ajratishda ularning talabidan kelib chiqib, Oʻzbekiston Respublikasi Prezidentining 2019-yil 28-noyabrdagi PF-5886-son Farmoni bilan tasdiqlangan 2020-yilda “Oʻzshahar qurilish invest IK” MChJ va “Qishloq qurilish invest IK” MChJ ishtirokida shaharlarda va qishloq joylarida koʻp kvartirali arzon uy-joylar qurishning asosiy parametrlariga tegishli oʻzgartirishlar kiritish boʻyicha Vazirlar Mahkamasiga taklif kiritsin.
4. “Qishloq qurilish invest IK” MChJ “Qishloq qurilish bank” ATB bilan birgalikda Islom taraqqiyot bankining kredit liniyalari boʻyicha “Qishloq qurilish invest IK” MChJ hisobraqamlarida uy quruvchilarning dastlabki badallari hisobidan jamlangan mablagʻlarni uch kun muddatda Oʻzbekiston Respublikasi respublika budjetiga yoʻnaltirsin.
5. Oʻzbekiston Respublikasi Moliya vazirligi Oʻzbekiston yoshlar ittifoqining asoslangan hisob-kitobiga muvofiq Islom taraqqiyot bankining kredit liniyalari boʻyicha “Qishloq qurilish invest IK” MChJ hisobraqamlarida uy quruvchilarning dastlabki badallari hisobidan jamlangan mablagʻlarning Oʻzbekiston Respublikasi respublika budjetiga qaytarilgan qismi hisobidan:
2019-yilda yoshlar uchun qurilgan 558 ta uyning dastlabki badali uchun 30,0 mlrd soʻm;
2020-yilda quriladigan uy-joylar uchun 356 nafar yosh oilaga uy-joy qiymati dastlabki badalining 65 foizigacha boʻlgan qismini moliyalashtirish uchun 11,6 mlrd soʻm mablagʻlarni qoʻshilgan qiymat soligʻini qoʻshgan holda ajratsin.
6. Shunday tartib oʻrnatilsinki, unga koʻra:
Oʻzbekiston yoshlar ittifoqi tomonidan yosh oilalarga uy-joy qiymatining dastlabki badali sifatida toʻlangan ssudani va unga hisoblangan foizlarni (keyingi oʻrinlarda — ssuda va foizlar) undirish boʻyicha Oʻzbekiston Respublikasi Yoshlar ishlari agentligi markaziy apparatida Yosh oilalarga ajratilgan uy-joylar bilan ishlash boʻyicha nazorat guruhi (keyingi oʻrinlarda — nazorat guruhi) tashkil etiladi;
Oʻzbekiston yoshlar ittifoqining barcha hududiy kengashlari (keyingi oʻrinlarda — hududiy kengashlar)ning ssuda va foizlarning belgilangan muddatlarda qaytarilishi boʻyicha faoliyati nazorat guruhi tomonidan muvofiqlashtiriladi;
hududiy kengashlar ssuda va foizlarni shartnomada belgilangan muddatda qaytarmagan yosh oilalarga bir ish kuni ichida Mahalla va nuroniylarni qoʻllab-quvvatlash vazirligining hududiy boshqarmalari bilan birgalikda shartnoma asosida toʻlovlarni amalga oshirish yuzasidan muddat belgilagan holda, notarius orqali yozma bildirishnoma (keyingi oʻrinlarda — yozma bildirishnoma) yuboradi;
yosh oilalar tomonidan yozma bildirishnoma talablari bajarilmagan taqdirda, hududiy kengashlar ikki ish kuni ichida muddati oʻtgan qarzdorlik boʻyicha ijro xati yozib berishni soʻrab notariusga murojaat qiladi;
notarius tomonidan bir ish kuni ichida ijro xati yozib beriladi va Majburiy ijro byurosining hududiy boʻlinmasiga taqdim etiladi;
Majburiy ijro byurosining hududiy boʻlinmasi belgilangan tartibda muddati oʻtgan qarzdorlikni undirish choralarini koʻradi.
7. Oʻzbekiston Respublikasi Yoshlar ishlari agentligi:
bir oy muddatda nazorat guruhining ish tartibini ishlab chiqsin va tasdiqlasin;
yosh oilalarning ssuda va foizlar boʻyicha muddati oʻtgan qarzdorligini undirish choralarini koʻrishda, Oʻzbekiston yoshlar ittifoqiga doimiy ravishda amaliy koʻmaklashsin.
8. Oʻzbekiston Respublikasi Hukumatining 2-ilovaga muvofiq ayrim qarorlariga oʻzgartirishlar va qoʻshimcha kiritilsin.
9. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari A.J. Ramatov va Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A. Musayev zimmasiga yuklansin.
Vazirlar Mahkamasining 2020-yil 27-avgustdagi 521-son qaroriga 1-ILOVA
Oʻzbekiston yoshlar ittifoqi Markaziy Kengashi tomonidan uy-joy sharoitlarini yaxshilashga muhtoj boʻlgan yosh oila sifatida hisobga qoʻyilgan va tavsiyanoma berilgan yosh oilalar uchun 2019-2020-yillarda qurilgan yoshlar uylari
T/r Hudud nomi Yosh oilalar uchun 2019-yilda qurilgan uy-joylar soni (qoldiq qismi) Yosh oilalarga uy-joy berilishi lozim boʻlgan va 2020-yilda davlat dasturi doirasida beriladigan uylar soni Uy-joylar (kvartiralar) soni Oʻzbekiston yoshlar ittifoqi tomonidan ajratiladigan boshlangʻich badalning jami summasi (mln soʻm) 1. Qoraqalpogʻiston Respublikasi 8 80,6 33 2. Andijon viloyati 25 1216,3 – 3. Buxoro viloyati – – 31 4. Jizzax viloyati 52 2491,3 – 5. Qashqadaryo viloyati – – 51 6. Navoiy viloyati – – 42 7. Namangan viloyati – – 12 8. Sirdaryo viloyati 22 277,6 86 9. Toshkent viloyati – – 60 10. Fargʻona viloyati 98 5225,8 12 11. Xorazm viloyati 84 3664,5 29 12. Toshkent shahri 269 17029,3 – Jami 558 29985,4 356
Vazirlar Mahkamasining 2020-yil 27-avgustdagi 521-son qaroriga 2-ILOVA
Oʻzbekiston Respublikasi Hukumatining ayrim qarorlariga kiritilayotgan oʻzgartirishlar va qoʻshimcha
3. Vazirlar Mahkamasining “Mamlakat ijtimoiy hayotida faol ishtirok etayotgan yosh oilalarni uy-joy bilan taʼminlashni takomillashtirish chora-tadbirlari toʻgʻrisida” 2019-yil 11-sentabrdagi 760-son qarorida :
2-bandining birinchi xatboshidagi “2116” raqami “1264” raqami bilan almashtirilsin;
3-bandi oʻz kuchini yoʻqotgan deb hisoblansin.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 27-avgust,
521-son