📅 2020-yil 9-sentabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 9 сентябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 9 сентября 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 9 September 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
«Навоий иссиқлик электр станциясида 650 МВт қувватли учинчи буғ-газ қурилмасини қуриш» инвестиция лойиҳасини амалга ошириш бўйича биринчи навбатдаги чора-тадбирлар тўғрисида
Ўзбекистон Республикаси Президентининг « Ўзбекистон Республикаси ва Япония ўртасида икки томонлама ҳамкорликни янада кенгайтириш ва мустаҳкамлаш чора-тадбирлари тўғрисида » 2019 йил 28 декабрдаги ПҚ-4553-сон ва « Ўзбекистон Республикасининг 2020 — 2022 йилларга мўлжалланган Инвестиция дастурини амалга ошириш чора-тадбирлари тўғрисида » 2020 йил 9 январдаги ПҚ-4563-сон қарорларига мувофиқ, шунингдек замонавий энергия самарадор технологияларни жорий этиш йўли билан электр энергиясини ишлаб чиқариш қувватларини янада ривожлантириш, республиканинг ягона энергетика тизимининг шимоли-ғарбий қисмида электр тармоқларини ривожлантириш эвазига 2020 — 2026 йилларда янги ташкил этиладиган саноат объектларини ҳамда республика аҳолисини барқарор электр энергияси билан таъминлаш мақсадида Вазирлар Маҳкамаси қарор қилади:
1. Қуйидагилар:
а) Ўзбекистон Республикаси Президентининг 2019 йил 17 — 20 декабрь кунлари Японияга расмий ташрифи доирасида Ўзбекистон Республикаси ва Япония халқаро ҳамкорлик агентлиги (JICA) ўртасида «Навоий иссиқлик электр станциясида 650 МВт қувватли учинчи буғ-газ қурилмасини қуриш» инвестиция лойиҳасини (кейинги ўринларда — инвестиция лойиҳаси) амалга ошириш учун 10 йиллик имтиёзли давр билан 30 йил муддатга қуйидаги фоиз ставкаларда 128 246,0 миллион япон иенаси миқдорида:
консалтинг хизматлари учун йиллик 0,01 фоиз ставкада;
буғ-газ қурилмасини қуриш учун йиллик 0,5 фоиз ставкада қарз битими имзоланганлиги;
б) Ўзбекистон Республикаси Президентининг «Халкаро молия институтлари ва хорижий ҳукумат молия ташкилотлари иштирокидаги лойиҳаларни тайёрлаш ва амалга ошириш самарадорлигини ошириш чора-тадбирлари тўғрисида» 2018 йил 16 июлдаги ПҚ-3857-сон қарорига мувофиқ халқаро молия институтлари ва хорижий ҳукумат молия ташкилотлари иштирокидаги инвестиция лойиҳаларини амалга ошириш доирасида солиқ ва божхона имтиёзлари тақдим қилиниши;
в) инвестиция лойиҳасини амалга ошириш муддати 5 йил (2020 — 2024 йиллар) этиб белгиланганлиги маълумот учун қабул қилинсин.
2. Белгилаб қўйилсинки:
«Иссиқлик электр станциялари» АЖ инвестиция лойиҳасининг амалга оширилишини мувофиқлаштириш ва мониторинг қилиш юзасидан масъул ижрочи ҳисобланади;
«Навоий иссиқлик электр станцияси» АЖ томонидан Япония халқаро ҳамкорлик агентлигининг (JICA) қарз маблағларини ўзлаштириш инвестиция лойиҳасининг техник-иқтисодий асослари ўрнатилган тартибда тасдиқлангандан сўнг бошланади;
«Навоий иссиқлик электр станцияси» АЖ инвестиция лойиҳасининг ўз вақтида ва сифатли амалга оширилиши ҳамда Япония халқаро ҳамкорлик агентлиги (JICA) ажратган қарзлардан мақсадли ва самарали фойдаланиш учун масъул ташаббускор ҳисобланади;
инвестиция лойиҳаси учун Япония халқаро ҳамкорлик агентлиги (JICA) ажратган қарзларни қайтариш, фоиз ҳамда воситачилик ва бошқа харажатлар билан боғлиқ тўловларни тўлаш «Навоий иссиқлик электр станцияси» АЖнинг ўз маблағлари ҳисобидан амалга оширилади.
3. «Ўзбекистон Республикаси Ташқи иқтисодий фаолият миллий банки» АЖга инвестиция лойиҳасини амалга ошириш учун Япония халқаро ҳамкорлик агентлиги (JICA) томонидан ажратилган қарзлардан фойдаланиш ва унга хизмат кўрсатиш юзасидан «MUFG Bank, Ltd» (Япония) банки билан банклараро битимни тузиш тавсия этилсин.
4. Ўзбекистон Республикаси молия вазирига Ўзбекистон Республикаси, «Ўзбекистон Республикаси Ташқи иқтисодий фаолият миллий банки» АЖ (молиявий агент), «Иссиқлик электр станциялари» АЖ ва «Навоий иссиқлик электр станцияси» АЖ ўртасидаги қарзлардан фойдаланиш тартиби тўғрисидаги агентлик битимини Ўзбекистон Республикаси номидан имзолаш ваколати берилсин.
5. «Навоий иссиқлик электр станцияси» АЖга инвестиция лойиҳаси доирасида бош пудратчини танлаб олиш учун тендер ҳужжатларини ишлаб чиқиш, тендер ўтказиш ва тендер қатнашчиларининг тендер таклифларини баҳолаш бўйича консалтинг хизматлари учун, истисно тариқасида, тендер ўтказмасдан «Tokyo Electric Power Services Co., Ltd» (Япония) компаниями билан 589,0 миллион япон иенаси миқдорида тўғридан-тўғри шартнома тузишга рухсат берилсин.
6. Мазкур карорнинг бажарилишини назорат килиш Ўзбекистон Республикаси Бош вазирининг инвестициялар ва ташқи иктисодий алокалар масалалари бўйича ўринбосари — инвестициялар ва ташқи савдо вазири С.У. Умурзаков ва Ўзбекистон Республикаси энергетика вазири А.С. Султанов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2020 йил 9 сентябрь,
549-сон
Oʻzbekiston Respublikasi Vazirlar Mahkamasining
qarori
“Navoiy issiqlik elektr stansiyasida 650 MVt quvvatli uchinchi bugʻ-gaz qurilmasini qurish” investitsiya loyihasini amalga oshirish boʻyicha birinchi navbatdagi chora-tadbirlar toʻgʻrisida
Oʻzbekiston Respublikasi Prezidentining “ Oʻzbekiston Respublikasi va Yaponiya oʻrtasida ikki tomonlama hamkorlikni yanada kengaytirish va mustahkamlash chora-tadbirlari toʻgʻrisida ” 2019-yil 28-dekabrdagi PQ-4553-son va “ Oʻzbekiston Respublikasining 2020 — 2022-yillarga moʻljallangan Investitsiya dasturini amalga oshirish chora-tadbirlari toʻgʻrisida ” 2020-yil 9-yanvardagi PQ-4563-son qarorlariga muvofiq, shuningdek zamonaviy energiya samarador texnologiyalarni joriy etish yoʻli bilan elektr energiyasini ishlab chiqarish quvvatlarini yanada rivojlantirish, respublikaning yagona energetika tizimining shimoli-gʻarbiy qismida elektr tarmoqlarini rivojlantirish evaziga 2020 — 2026-yillarda yangi tashkil etiladigan sanoat obyektlarini hamda respublika aholisini barqaror elektr energiyasi bilan taʼminlash maqsadida Vazirlar Mahkamasi qaror qiladi:
1. Quyidagilar:
a) Oʻzbekiston Respublikasi Prezidentining 2019-yil 17 — 20-dekabr kunlari Yaponiyaga rasmiy tashrifi doirasida Oʻzbekiston Respublikasi va Yaponiya xalqaro hamkorlik agentligi (JICA) oʻrtasida “Navoiy issiqlik elektr stansiyasida 650 MVt quvvatli uchinchi bugʻ-gaz qurilmasini qurish” investitsiya loyihasini (keyingi oʻrinlarda — investitsiya loyihasi) amalga oshirish uchun 10 yillik imtiyozli davr bilan 30 yil muddatga quyidagi foiz stavkalarda 128 246,0 million yapon iyenasi miqdorida:
konsalting xizmatlari uchun yillik 0,01 foiz stavkada;
bugʻ-gaz qurilmasini qurish uchun yillik 0,5 foiz stavkada qarz bitimi imzolanganligi;
b) Oʻzbekiston Respublikasi Prezidentining “Xalkaro moliya institutlari va xorijiy hukumat moliya tashkilotlari ishtirokidagi loyihalarni tayyorlash va amalga oshirish samaradorligini oshirish chora-tadbirlari toʻgʻrisida” 2018-yil 16-iyuldagi PQ-3857-son qaroriga muvofiq xalqaro moliya institutlari va xorijiy hukumat moliya tashkilotlari ishtirokidagi investitsiya loyihalarini amalga oshirish doirasida soliq va bojxona imtiyozlari taqdim qilinishi;
v) investitsiya loyihasini amalga oshirish muddati 5 yil (2020 — 2024-yillar) etib belgilanganligi maʼlumot uchun qabul qilinsin.
2. Belgilab qoʻyilsinki:
“Issiqlik elektr stansiyalari” AJ investitsiya loyihasining amalga oshirilishini muvofiqlashtirish va monitoring qilish yuzasidan masʼul ijrochi hisoblanadi;
“Navoiy issiqlik elektr stansiyasi” AJ tomonidan Yaponiya xalqaro hamkorlik agentligining (JICA) qarz mablagʻlarini oʻzlashtirish investitsiya loyihasining texnik-iqtisodiy asoslari oʻrnatilgan tartibda tasdiqlangandan soʻng boshlanadi;
“Navoiy issiqlik elektr stansiyasi” AJ investitsiya loyihasining oʻz vaqtida va sifatli amalga oshirilishi hamda Yaponiya xalqaro hamkorlik agentligi (JICA) ajratgan qarzlardan maqsadli va samarali foydalanish uchun masʼul tashabbuskor hisoblanadi;
investitsiya loyihasi uchun Yaponiya xalqaro hamkorlik agentligi (JICA) ajratgan qarzlarni qaytarish, foiz hamda vositachilik va boshqa xarajatlar bilan bogʻliq toʻlovlarni toʻlash “Navoiy issiqlik elektr stansiyasi” AJning oʻz mablagʻlari hisobidan amalga oshiriladi.
3. “Oʻzbekiston Respublikasi Tashqi iqtisodiy faoliyat milliy banki” AJga investitsiya loyihasini amalga oshirish uchun Yaponiya xalqaro hamkorlik agentligi (JICA) tomonidan ajratilgan qarzlardan foydalanish va unga xizmat koʻrsatish yuzasidan “MUFG Bank, Ltd” (Yaponiya) banki bilan banklararo bitimni tuzish tavsiya etilsin.
4. Oʻzbekiston Respublikasi moliya vaziriga Oʻzbekiston Respublikasi, “Oʻzbekiston Respublikasi Tashqi iqtisodiy faoliyat milliy banki” AJ (moliyaviy agent), “Issiqlik elektr stansiyalari” AJ va “Navoiy issiqlik elektr stansiyasi” AJ oʻrtasidagi qarzlardan foydalanish tartibi toʻgʻrisidagi agentlik bitimini Oʻzbekiston Respublikasi nomidan imzolash vakolati berilsin.
5. “Navoiy issiqlik elektr stansiyasi” AJga investitsiya loyihasi doirasida bosh pudratchini tanlab olish uchun tender hujjatlarini ishlab chiqish, tender oʻtkazish va tender qatnashchilarining tender takliflarini baholash boʻyicha konsalting xizmatlari uchun, istisno tariqasida, tender oʻtkazmasdan “Tokyo Electric Power Services Co., Ltd” (Yaponiya) kompaniyami bilan 589,0 million yapon iyenasi miqdorida toʻgʻridan toʻgʻri shartnoma tuzishga ruxsat berilsin.
6. Mazkur karorning bajarilishini nazorat kilish Oʻzbekiston Respublikasi Bosh vazirining investitsiyalar va tashqi iktisodiy alokalar masalalari boʻyicha oʻrinbosari — investitsiyalar va tashqi savdo vaziri S.U. Umurzakov va Oʻzbekiston Respublikasi energetika vaziri A.S. Sultanov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 9-sentabr,
549-son