UzbekAI

Ўзбекистон Республикаси Вазирлар Маҳкамасининг

қарори

Урганч шаҳрида халқаро «Binary» университети фаолиятини ташкил этиш тўғрисида

Олий таълим соҳасида замонавий технологиялар ва инновацияларга асосланган нодавлат таълим хизматлари кўрсатилишини янада ривожлантириш, олий маълумотли кадрлар тайёрлашда давлат ташкилотлари ва нодавлат ташкилотлар ўртасида соғлом рақобат муҳитини шакллантириш, етакчи халқаро таълим ташкилотлари билан ҳамкорликни янада кенгайтириш мақсадида Вазирлар Маҳкамаси қарор қилади:

1. Ўзбекистон Республикаси Олий ва ўрта махсус таълим вазирлиги, Хоразм вилояти ҳокимлиги билан «Binary» университети (Малайзия) ўртасида 2020 йил 8 майда Урганч шаҳрида халқаро «Binary» университетини ташкил этиш бўйича ҳамкорликдаги ҳаракатларнинг асосий принциплари тўғрисида келишув (кейинги ўринларда — Келишув) имзоланганлиги маълумот учун қабул қилинсин.

2. Хоразм вилояти ҳокимлиги, Ўзбекистон Республикаси Олий ва ўрта махсус таълим вазирлиги ҳамда «Binary» университетининг (Малайзия) (кейинги ўринларда — Университет) Урганч шаҳрида халқаро «Binary» университетини (кейинги ўринларда — Филиал) ташкил этиш тўғрисидаги таклифига розилик берилсин.

3. Қуйидагилар Филиалнинг асосий вазифалари ва фаолияти йўналишлари этиб белгилансин:

ҳудудда ижтимоий соҳа ва иқтисодиёт тармоқларининг ривожланиши истиқболлари ва устувор вазифаларини, замонавий тадбиркорликнинг ривожланиши тенденцияларини инобатга олган ҳолда тадбиркорлик ва бошқарув, ижтимоий-иқтисодий ҳамда иқтисодиётнинг эҳтиёж юқори бўлган бошқа соҳалари бўйича малакали олий маълумотли кадрларни халқаро стандартлар даражасида сифатли тайёрлашни таъминлаш;

ўқув ва илмий лойиҳаларни амалга оширишда, шунингдек, илм-фан ва ишлаб чиқариш соҳаларидаги долзарб муаммоларни ҳал этишга йўналтирилган илмий-амалий тадқиқотлар олиб боришда республика ва хорижий етакчи олий таълим ва илмий-тадқиқот муассасалари билан ҳамкорлик қилиш;

Филиалда етакчи хорижий олий таълим муассасаларининг таълим дастурларини жорий этиш;

хорижнинг илғор олий таълим муассасалари билан ҳамкорлик асосида тажриба алмашиш дастурларини амалга ошириш;

таълим дастурларига замонавий фанларни киритиб бориш, инновацион ҳамда илм-фанга асосланган технологияларни татбиқ қилиш;

таълим жараёнига етакчи хорижий олий таълим муассасаларининг малакали профессор-ўқитувчилари, олим ва мутахассисларини кенг жалб қилиш орқали замонавий педагогик ва ахборот-коммуникация технологияларини, илм-фан ва техниканинг янги ютуқларини жорий этиш;

профессор-ўқитувчилар малакасини ошириш ва қайта тайёрлаш, шу жумладан, уларнинг стажировкасини нуфузли хорижий олий таълим ва илмий-тадқиқот муассасаларида ташкил этиш;

республика иқтисодиёти тармоқларига инновацияларни жорий қилишни рағбатлантириш, илмий тадқиқотлар натижаларини тижоратлаштириш имкониятларини кенгайтириш;

таълим ва илм-фаннинг узлуксизлиги ва изчиллиги тамойили, шунингдек, жаҳон таълими ва илмий ҳамжамиятга уйғун интеграциялашуви асосида мутахассислар ва илмий-педагог кадрлар тайёрлаш тизимини ривожлантириш.

4. Белгилаб қўйилсинки:

Филиал нодавлат олий таълим ташкилоти ҳисобланади;

Филиалда ўқитиш Ўзбекистон Республикаси давлат таълим стандартлари талаблари инобатга олинган, Олий ва ўрта махсус таълим вазирлиги билан келишган ҳолда Университет томонидан тасдиқланадиган ўқув режалари ва фан дастурларига мувофиқ инглиз, рус ва ўзбек тилларида тўлов-контракт асосида амалга оширилади;

Филиалда бакалавриатнинг кундузги ва сиртқи таълим шакллари ҳамда магистратура бўйича кадрлар тайёрлаш амалга оширилади;

Филиалга абитуриентларни қабул қилиш ва битирувчиларни аттестациядан ўтказиш Университет ҳамда Ўзбекистон Республикаси Олий ва ўрта махсус таълим вазирлиги билан келишган ҳолда Филиал томонидан белгиланадиган талаблар, тартиб ва муддатларга мувофиқ амалга оширилади;

Филиал битирувчиларига Ўзбекистон Республикаси ва Малайзияда олий таълим тўғрисидаги ҳужжат сифатида тан олинадиган Университетнинг белгиланган намунадаги дипломи берилади;

Филиалга Университет томонидан лавозимга тайинланадиган ва лавозимдан озод этиладиган ижрочи директор раҳбарлик қилади;

Филиалда талабалар ўқиши учун тўлов-контракт маблағлари миқдори Университет томонидан белгиланади;

Филиалга белгиланган тартибда Ўзбекистон Республикаси Вазирлар Маҳкамаси ҳузуридаги Таълим сифатини назорат қилиш давлат инспекциясидан лицензия олингандан сўнг таълим фаолияти билан шуғулланишга рухсат этилади.

5. Қуйидагилар:

а) Филиал фаолиятини молиялаштириш, моддий-техник ва ўқув-методик базасини шакллантириш Филиалнинг ўз маблағлари, ўқитишдан тушадиган маблағлар, шу жумладан, тўлов-контракт бўйича ўқитишдан тушадиган маблағлар, хўжалик фаолияти ва шартнома асосида хизматлар кўрсатишдан олинадиган даромадлар, жисмоний ва юридик шахсларнинг ҳомийлик хайриялари, грантлар ва Ўзбекистон Республикаси қонун ҳужжатларида тақиқланмаган бошқа манбалар ҳисобига амалга оширилиши;

б) Университет Келишувга асосан қуйидагиларни таъминлаш мажбуриятини ўзига олиши:

Филиал битирувчиларига Университетнинг белгиланган намунадаги дипломини бериш;

Университетнинг ягона электрон базасига Филиалда таҳсил олаётган талабалар ҳақида маълумотлар ҳамда талабаларга бериладиган дипломларнинг қайд рақамларини киритиш;

таълим жараёнига инновацион таълим методларини, илғор тажрибаларни, замонавий педагогик ва ахборот технологияларини ҳамда фаннинг сўнгги ютуқларини жорий этиш;

педагоглар ва мутахассисларнинг малакасини ошириш, Филиалнинг профессор-ўқитувчилари таркибини қайта тайёрлаш;

Филиалнинг кутубхона фондини шакллантириш ва уни замонавий ўқув, ўқув-методик ҳамда илмий адабиётлар билан тўлдириш;

Филиалнинг ўқув-лаборатория базасини шакллантириш, шунингдек, махсус фанларни ўқитиш учун замонавий ўқув воситалари билан жиҳозлаш;

Филиални жойлаштириш учун ажратилган бино ва иншоотларни жиҳозлаш;

Филиалнинг ҳар йилги қабул параметрларининг 5 фоизидан кам бўлмаган қисмини ижтимоий ҳимояга муҳтож оилаларнинг қобилиятли, иқтидорли ҳамда ўзлаштириш кўрсаткичлари юқори бўлган фарзандлари орасидан танлов асосида абитуриентларни бепул (Филиал гранти асосида) ўқишга қабул қилиш учун ажратиш;

Филиалда таълим жараёнини ташкил этишда мутахассислик фанларидан дарс бериш учун профессор-ўқитувчилар таркибининг 40 фоизидан кам бўлмаган қисмини малакали хорижий профессор-ўқитувчилар билан тўлдириш;

Филиал ўз фаолиятини тугатган тақдирда, Филиалда таҳсил олаётган талабаларга ўз йўналишлари бўйича Университетда ўқув жараёнини давом эттириб, Университетнинг белгиланган намунадаги дипломини олишга имконият яратиш;

Филиалда Ўзбекистон Республикаси қонун ҳужжатлари ҳамда Келишув шартларига мувофиқ тўлақонли таълим-тарбия жараёнини ташкил этиш;

в) Хоразм вилояти ҳокимлиги Филиални жойлаштириш учун ажратилган бино ва иншоотларни ўз маблағлари ҳисобига реконструкция қилиш мажбуриятини олиши маълумот учун қабул қилинсин.

6. Филиал Хоразм вилояти, Урганч шаҳар, А. Баҳодирхон кўчаси, 195-уй манзилидаги Урганч давлат университетининг бино ва иншоотларида текин фойдаланиш ҳуқуқи асосида жойлаштирилсин.

Бунда мазкур бино ва иншоотлар ҳамда унга тегишли ҳудудни сақлаш билан боғлиқ барча харажатлар, жумладан, коммунал тўловлар Филиал маблағлари ҳисобига қопланади.

7. Хоразм вилояти ҳокимлиги ва Ўзбекистон Республикаси Олий ва ўрта махсус таълим вазирлиги Университетга:

Филиал уставини тасдиқлаш ҳамда белгиланган тартибда давлат рўйхатидан ўтказишда;

Филиални танлов асосида малакали профессор-ўқитувчилар таркиби билан таъминлашда зарур ёрдам кўрсатсин.

8. Филиалга ўқув ва илмий-тадқиқот ишларига таклиф қилинадиган хорижий профессор-ўқитувчиларнинг яшаш ҳамда транспорт харажатларини тузиладиган шартномалар асосида Ўзбекистон Республикаси фуқаролари учун белгиланган тарифларда тўлашга рухсат берилсин.

9. Ўзбекистон Республикаси Вазирлар Маҳкамаси ҳузуридаги Таълим сифатини назорат қилиш давлат инспекцияси Филиалда таълим сифатини таъминлаш ҳамда қонунчиликка риоя этилишини белгиланган тартибда назорат қилсин.

10. Ўзбекистон Республикаси Олий ва ўрта махсус таълим вазирлиги манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.

11. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари Б.А. Мусаев, Ўзбекистон Республикаси олий ва ўрта махсус таълим вазири И.У. Маджидов, Хоразм вилояти ҳокими Ф.Ў. Эрманов ҳамда Вазирлар Маҳкамаси ҳузуридаги Таълим сифатини назорат қилиш давлат инспекцияси бошлиғи У.Н. Ташкенбаев зиммасига юклансин.

Ўзбекистон Республикасининг Бош вазири А. АРИПОВ

Тошкент ш.,

2020 йил 17 сентябрь,

558-сон

(Қонун ҳужжатлари маълумотлари миллий базаси, 17.09.2020 й., 09/20/558/1293-сон)

lex.uz

Oʻzbekiston Respublikasi Vazirlar Mahkamasining

qarori

Urganch shahrida xalqaro “Binary” universiteti faoliyatini tashkil etish toʻgʻrisida

Oliy taʼlim sohasida zamonaviy texnologiyalar va innovatsiyalarga asoslangan nodavlat taʼlim xizmatlari koʻrsatilishini yanada rivojlantirish, oliy maʼlumotli kadrlar tayyorlashda davlat tashkilotlari va nodavlat tashkilotlar oʻrtasida sogʻlom raqobat muhitini shakllantirish, yetakchi xalqaro taʼlim tashkilotlari bilan hamkorlikni yanada kengaytirish maqsadida Vazirlar Mahkamasi qaror qiladi:

1. Oʻzbekiston Respublikasi Oliy va oʻrta maxsus taʼlim vazirligi, Xorazm viloyati hokimligi bilan “Binary” universiteti (Malayziya) oʻrtasida 2020-yil 8-mayda Urganch shahrida xalqaro “Binary” universitetini tashkil etish boʻyicha hamkorlikdagi harakatlarning asosiy prinsiplari toʻgʻrisida kelishuv (keyingi oʻrinlarda — Kelishuv) imzolanganligi maʼlumot uchun qabul qilinsin.

2. Xorazm viloyati hokimligi, Oʻzbekiston Respublikasi Oliy va oʻrta maxsus taʼlim vazirligi hamda “Binary” universitetining (Malayziya) (keyingi oʻrinlarda — Universitet) Urganch shahrida xalqaro “Binary” universitetini (keyingi oʻrinlarda — Filial) tashkil etish toʻgʻrisidagi taklifiga rozilik berilsin.

3. Quyidagilar Filialning asosiy vazifalari va faoliyati yoʻnalishlari etib belgilansin:

hududda ijtimoiy soha va iqtisodiyot tarmoqlarining rivojlanishi istiqbollari va ustuvor vazifalarini, zamonaviy tadbirkorlikning rivojlanishi tendensiyalarini inobatga olgan holda tadbirkorlik va boshqaruv, ijtimoiy-iqtisodiy hamda iqtisodiyotning ehtiyoj yuqori boʻlgan boshqa sohalari boʻyicha malakali oliy maʼlumotli kadrlarni xalqaro standartlar darajasida sifatli tayyorlashni taʼminlash;

oʻquv va ilmiy loyihalarni amalga oshirishda, shuningdek, ilm-fan va ishlab chiqarish sohalaridagi dolzarb muammolarni hal etishga yoʻnaltirilgan ilmiy-amaliy tadqiqotlar olib borishda respublika va xorijiy yetakchi oliy taʼlim va ilmiy-tadqiqot muassasalari bilan hamkorlik qilish;

Filialda yetakchi xorijiy oliy taʼlim muassasalarining taʼlim dasturlarini joriy etish;

xorijning ilgʻor oliy taʼlim muassasalari bilan hamkorlik asosida tajriba almashish dasturlarini amalga oshirish;

taʼlim dasturlariga zamonaviy fanlarni kiritib borish, innovatsion hamda ilm-fanga asoslangan texnologiyalarni tatbiq qilish;

taʼlim jarayoniga yetakchi xorijiy oliy taʼlim muassasalarining malakali professor-oʻqituvchilari, olim va mutaxassislarini keng jalb qilish orqali zamonaviy pedagogik va axborot-kommunikatsiya texnologiyalarini, ilm-fan va texnikaning yangi yutuqlarini joriy etish;

professor-oʻqituvchilar malakasini oshirish va qayta tayyorlash, shu jumladan, ularning stajirovkasini nufuzli xorijiy oliy taʼlim va ilmiy-tadqiqot muassasalarida tashkil etish;

respublika iqtisodiyoti tarmoqlariga innovatsiyalarni joriy qilishni ragʻbatlantirish, ilmiy tadqiqotlar natijalarini tijoratlashtirish imkoniyatlarini kengaytirish;

taʼlim va ilm-fanning uzluksizligi va izchilligi tamoyili, shuningdek, jahon taʼlimi va ilmiy hamjamiyatga uygʻun integratsiyalashuvi asosida mutaxassislar va ilmiy-pedagog kadrlar tayyorlash tizimini rivojlantirish.

4. Belgilab qoʻyilsinki:

Filial nodavlat oliy taʼlim tashkiloti hisoblanadi;

Filialda oʻqitish Oʻzbekiston Respublikasi davlat taʼlim standartlari talablari inobatga olingan, Oliy va oʻrta maxsus taʼlim vazirligi bilan kelishgan holda Universitet tomonidan tasdiqlanadigan oʻquv rejalari va fan dasturlariga muvofiq ingliz, rus va oʻzbek tillarida toʻlov-kontrakt asosida amalga oshiriladi;

Filialda bakalavriatning kunduzgi va sirtqi taʼlim shakllari hamda magistratura boʻyicha kadrlar tayyorlash amalga oshiriladi;

Filialga abituriyentlarni qabul qilish va bitiruvchilarni attestatsiyadan oʻtkazish Universitet hamda Oʻzbekiston Respublikasi Oliy va oʻrta maxsus taʼlim vazirligi bilan kelishgan holda Filial tomonidan belgilanadigan talablar, tartib va muddatlarga muvofiq amalga oshiriladi;

Filial bitiruvchilariga Oʻzbekiston Respublikasi va Malayziyada oliy taʼlim toʻgʻrisidagi hujjat sifatida tan olinadigan Universitetning belgilangan namunadagi diplomi beriladi;

Filialga Universitet tomonidan lavozimga tayinlanadigan va lavozimdan ozod etiladigan ijrochi direktor rahbarlik qiladi;

Filialda talabalar oʻqishi uchun toʻlov-kontrakt mablagʻlari miqdori Universitet tomonidan belgilanadi;

Filialga belgilangan tartibda Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasidan litsenziya olingandan soʻng taʼlim faoliyati bilan shugʻullanishga ruxsat etiladi.

5. Quyidagilar:

a) Filial faoliyatini moliyalashtirish, moddiy-texnik va oʻquv-metodik bazasini shakllantirish Filialning oʻz mablagʻlari, oʻqitishdan tushadigan mablagʻlar, shu jumladan, toʻlov-kontrakt boʻyicha oʻqitishdan tushadigan mablagʻlar, xoʻjalik faoliyati va shartnoma asosida xizmatlar koʻrsatishdan olinadigan daromadlar, jismoniy va yuridik shaxslarning homiylik xayriyalari, grantlar va Oʻzbekiston Respublikasi qonun hujjatlarida taqiqlanmagan boshqa manbalar hisobiga amalga oshirilishi;

b) Universitet Kelishuvga asosan quyidagilarni taʼminlash majburiyatini oʻziga olishi:

Filial bitiruvchilariga Universitetning belgilangan namunadagi diplomini berish;

Universitetning yagona elektron bazasiga Filialda tahsil olayotgan talabalar haqida maʼlumotlar hamda talabalarga beriladigan diplomlarning qayd raqamlarini kiritish;

taʼlim jarayoniga innovatsion taʼlim metodlarini, ilgʻor tajribalarni, zamonaviy pedagogik va axborot texnologiyalarini hamda fanning soʻnggi yutuqlarini joriy etish;

pedagoglar va mutaxassislarning malakasini oshirish, Filialning professor-oʻqituvchilari tarkibini qayta tayyorlash;

Filialning kutubxona fondini shakllantirish va uni zamonaviy oʻquv, oʻquv-metodik hamda ilmiy adabiyotlar bilan toʻldirish;

Filialning oʻquv-laboratoriya bazasini shakllantirish, shuningdek, maxsus fanlarni oʻqitish uchun zamonaviy oʻquv vositalari bilan jihozlash;

Filialni joylashtirish uchun ajratilgan bino va inshootlarni jihozlash;

Filialning har yilgi qabul parametrlarining 5 foizidan kam boʻlmagan qismini ijtimoiy himoyaga muhtoj oilalarning qobiliyatli, iqtidorli hamda oʻzlashtirish koʻrsatkichlari yuqori boʻlgan farzandlari orasidan tanlov asosida abituriyentlarni bepul (Filial granti asosida) oʻqishga qabul qilish uchun ajratish;

Filialda taʼlim jarayonini tashkil etishda mutaxassislik fanlaridan dars berish uchun professor-oʻqituvchilar tarkibining 40 foizidan kam boʻlmagan qismini malakali xorijiy professor-oʻqituvchilar bilan toʻldirish;

Filial oʻz faoliyatini tugatgan taqdirda, Filialda tahsil olayotgan talabalarga oʻz yoʻnalishlari boʻyicha Universitetda oʻquv jarayonini davom ettirib, Universitetning belgilangan namunadagi diplomini olishga imkoniyat yaratish;

Filialda Oʻzbekiston Respublikasi qonun hujjatlari hamda Kelishuv shartlariga muvofiq toʻlaqonli taʼlim-tarbiya jarayonini tashkil etish;

v) Xorazm viloyati hokimligi Filialni joylashtirish uchun ajratilgan bino va inshootlarni oʻz mablagʻlari hisobiga rekonstruksiya qilish majburiyatini olishi maʼlumot uchun qabul qilinsin.

6. Filial Xorazm viloyati, Urganch shahar, A. Bahodirxon koʻchasi, 195-uy manzilidagi Urganch davlat universitetining bino va inshootlarida tekin foydalanish huquqi asosida joylashtirilsin.

Bunda mazkur bino va inshootlar hamda unga tegishli hududni saqlash bilan bogʻliq barcha xarajatlar, jumladan, kommunal toʻlovlar Filial mablagʻlari hisobiga qoplanadi.

7. Xorazm viloyati hokimligi va Oʻzbekiston Respublikasi Oliy va oʻrta maxsus taʼlim vazirligi Universitetga:

Filial ustavini tasdiqlash hamda belgilangan tartibda davlat roʻyxatidan oʻtkazishda;

Filialni tanlov asosida malakali professor-oʻqituvchilar tarkibi bilan taʼminlashda zarur yordam koʻrsatsin.

8. Filialga oʻquv va ilmiy-tadqiqot ishlariga taklif qilinadigan xorijiy professor-oʻqituvchilarning yashash hamda transport xarajatlarini tuziladigan shartnomalar asosida Oʻzbekiston Respublikasi fuqarolari uchun belgilangan tariflarda toʻlashga ruxsat berilsin.

9. Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi Filialda taʼlim sifatini taʼminlash hamda qonunchilikka rioya etilishini belgilangan tartibda nazorat qilsin.

10. Oʻzbekiston Respublikasi Oliy va oʻrta maxsus taʼlim vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A. Musayev, Oʻzbekiston Respublikasi oliy va oʻrta maxsus taʼlim vaziri I.U. Madjidov, Xorazm viloyati hokimi F.Oʻ. Ermanov hamda Vazirlar Mahkamasi huzuridagi Taʼlim sifatini nazorat qilish davlat inspeksiyasi boshligʻi U.N. Tashkenbayev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2020-yil 17-sentabr,

558-son

(Qonun hujjatlari maʼlumotlari milliy bazasi, 17.09.2020-y., 09/20/558/1293-son)

lex.uz