📅 2020-yil 17-sentabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 17 сентябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 17 сентября 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 17 September 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Тест тизимини такомиллаштиришга қаратилган қўшимча чора-тадбирлар тўғрисида
Иқтисодиёт тармоқлари ва ижтимоий соҳани юқори малакали кадрлар билан таъминлаш, жадал иқтисодий ўсиш учун мос профессионал кадрларни тайёрлашда соғлом муҳитни яратиш, халқаро майдонда миллий кадрларнинг рақобатбардошлигини ошириш, шунингдек, Ўзбекистон Республикаси Вазирлар Маҳкамаси ҳузуридаги Давлат тест марказида тўпланган тажриба ва илмий салоҳиятдан самарали фойдаланиш мақсадида Вазирлар Маҳкамаси қарор қилади:
1. Тестология ва педагогик ўлчовлар, чет тилидан малака ошириш курсларини ташкил этиш ҳамда соҳада етакчи халқаро ташкилотлар билан ҳамкорликни йўлга қўйиш, Марказий Осиёда тестология бўйича минтақавий илмий мактаб яратиш мақсадида Ўзбекистон Республикаси Вазирлар Маҳкамаси ҳузуридаги Давлат тест маркази (кейинги ўринларда Давлат тест маркази деб аталади) ҳузурида «Илмий-ўқув амалий маркази» давлат муассасаси (кейинги ўринларда Илмий марказ деб аталади) ташкил этилсин.
2. Илмий марказнинг асосий вазифалари этиб қуйидагилар белгилансин:
тест материалларини ишлаб чиқиш ва уларнинг сифатини аниқлаш, тестология ва педагогик ўлчовлар соҳасидаги илмий-тадқиқот натижаларини нашр этиш;
тест материалларини ишлаб чиқиш ва уларнинг сифатини аниқлаш бўйича мутахассислар — тестологларни тайёрлаш, бу борада маҳаллий ва халқаро олий таълим муассасалари билан ўзаро ҳамкорликни йўлга қўйиш;
шартнома асосида қисқа ва узоқ муддатли тестология, педагогик ўлчовлар, чет тиллари бўйича тингловчиларнинг малакасини ошириш, диагностик тест синовларини ташкил этиш;
тестология ва педагогик ўлчовлар соҳасида илмий изланиш олиб борувчи шахслар учун зарур шарт-шароитлар яратиш, хорижий тажрибани ўрганиш асосида миллий тизимни яратиш бўйича таклифлар ишлаб чиқиш;
халқаро имтиҳон олувчи ташкилотлар билан ҳамкорликда имтиҳонларни ташкил этиш ва ўтказиш.
3. Илмий марказ фаолиятини молиялаштириш манбалари этиб қуйидагилар белгилансин:
Ўзбекистон Республикаси Вазирлар Маҳкамаси ҳузуридаги Давлат тест маркази фаолиятини ривожлантириш жамғармаси маблағлари;
шартнома бўйича жисмоний ва юридик шахсларга хизматлар кўрсатишдан тушган маблағлар;
юридик ва жисмоний шахсларнинг ҳомийлик хайриялари;
қонунчилик ҳужжатлари билан тақиқланмаган бошқа манбалар.
4. Давлат тест маркази бир ой муддатда:
Ўзбекистон Республикаси Молия вазирлиги билан биргаликда Илмий марказ тузилмасини тасдиқласин, ходимларнинг умумий чекланган сонига мувофиқ уларнинг меҳнатига тўланадиган иш ҳақи миқдорларини белгиласин;
Илмий марказ уставини тасдиқласин ва белгиланган тартибда давлат рўйхатидан ўтказсин.
5. 2020 йил 1 ноябрдан бошлаб ягона тариф сеткаси бўйича меҳнатга ҳақ тўлашнинг тасдиқланган разрядларига кўра Давлат тест маркази бошқарув ходимлари лавозим маошларини аниқлашда тариф коэффициентлари бир ярим баравар миқдорида қўллансин ҳамда бу билан боғлиқ қўшимча харажатлар Давлат тест маркази фаолиятини ривожлантириш жамғармаси маблағлари ҳисобидан қоплансин.
6. Ўзбекистон Республикаси Ҳукуматининг иловага мувофиқ айрим қарорларига ўзгартириш ва қўшимчалар киритилсин.
7. Ўзбекистон Республикаси Вазирлар Маҳкамаси ҳузуридаги Давлат тест маркази манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
8. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари Б.А. Мусаев ҳамда Вазирлар Маҳкамаси ҳузуридаги Давлат тест маркази директори М.М. Каримов зиммасига юклансин.
Вазирлар Маҳкамасининг 2020 йил 17 сентябрдаги 562-сон қарорига ИЛОВА
Ўзбекистон Республикаси Ҳукуматининг айрим қарорларига киритилаётган ўзгартириш ва қўшимчалар
2. Вазирлар Маҳкамасининг 2018 йил 3 апрелдаги 261-сон қарори (Ўзбекистон Республикаси ҚТ, 2018 йил, 4-сон, 76-модда) билан тасдиқланган Ўзбекистон Республикаси олий таълим муассасаларининг бакалавриатига ўқишга қабул қилиш учун кириш тест синовларини ўтказиш тартиби тўғрисидаги низомда :
а) 24-банддан ўнинчи хатбоши чиқариб ташлансин;
б) 28-бандда :
қуйидаги мазмундаги учинчи хатбоши қўшилсин:
«Ўзбекистон Республикаси Президенти ҳамда Вазирлар Маҳкамаси томонидан белгиланган имтиёзларга эга бўлмаган абитуриентларни Давлат тест марказининг расмий веб-сайти орқали ҳам рўйхатдан ўтишига имконият яратиш»;
учинчи — ўнинчи хатбошилар тегишли равишда тўртинчи — ўн биринчи хатбошилар деб ҳисоблансин;
в) 43-банднинг еттинчи хатбошиси қуйидаги таҳрирда баён этилсин:
«абитуриентларга тест топшириқлари китоби ва Давлат комиссияси томонидан намуна сифатида тасдиқланган жавоблар варақаларини тарқатиш»;
г) Низомга 11-илова ўз кучини йўқотган деб ҳисоблансин.
3. Вазирлар Маҳкамасининг «Олий таълим муассасаларига тест синовлари орқали қабул қилиш тизими такомиллаштирилиши муносабати билан Ўзбекистон Республикаси Вазирлар Маҳкамаси ҳузуридаги Давлат тест марказининг фаолиятини кучайтириш тўғрисида» 2019 йил 9 июлдаги 572-сон қарорининг 1-иловаси матни қуйидаги таҳрирда баён этилсин:
«Ўзбекистон Республикаси Вазирлар Маҳкамаси ҳузуридаги Давлат тест марказининг ТУЗИЛМАСИ
Ўзбекистон Республикасининг Бош вазири А. АРИПОВ
Тошкент ш.,
2020 йил 17 сентябрь,
562-сон
Oʻzbekiston Respublikasi Vazirlar Mahkamasining
qarori
Test tizimini takomillashtirishga qaratilgan qoʻshimcha chora-tadbirlar toʻgʻrisida
Iqtisodiyot tarmoqlari va ijtimoiy sohani yuqori malakali kadrlar bilan taʼminlash, jadal iqtisodiy oʻsish uchun mos professional kadrlarni tayyorlashda sogʻlom muhitni yaratish, xalqaro maydonda milliy kadrlarning raqobatbardoshligini oshirish, shuningdek, Oʻzbekiston Respublikasi Vazirlar Mahkamasi huzuridagi Davlat test markazida toʻplangan tajriba va ilmiy salohiyatdan samarali foydalanish maqsadida Vazirlar Mahkamasi qaror qiladi:
1. Testologiya va pedagogik oʻlchovlar, chet tilidan malaka oshirish kurslarini tashkil etish hamda sohada yetakchi xalqaro tashkilotlar bilan hamkorlikni yoʻlga qoʻyish, Markaziy Osiyoda testologiya boʻyicha mintaqaviy ilmiy maktab yaratish maqsadida Oʻzbekiston Respublikasi Vazirlar Mahkamasi huzuridagi Davlat test markazi (keyingi oʻrinlarda Davlat test markazi deb ataladi) huzurida “Ilmiy-oʻquv amaliy markazi” davlat muassasasi (keyingi oʻrinlarda Ilmiy markaz deb ataladi) tashkil etilsin.
2. Ilmiy markazning asosiy vazifalari etib quyidagilar belgilansin:
test materiallarini ishlab chiqish va ularning sifatini aniqlash, testologiya va pedagogik oʻlchovlar sohasidagi ilmiy-tadqiqot natijalarini nashr etish;
test materiallarini ishlab chiqish va ularning sifatini aniqlash boʻyicha mutaxassislar — testologlarni tayyorlash, bu borada mahalliy va xalqaro oliy taʼlim muassasalari bilan oʻzaro hamkorlikni yoʻlga qoʻyish;
shartnoma asosida qisqa va uzoq muddatli testologiya, pedagogik oʻlchovlar, chet tillari boʻyicha tinglovchilarning malakasini oshirish, diagnostik test sinovlarini tashkil etish;
testologiya va pedagogik oʻlchovlar sohasida ilmiy izlanish olib boruvchi shaxslar uchun zarur shart-sharoitlar yaratish, xorijiy tajribani oʻrganish asosida milliy tizimni yaratish boʻyicha takliflar ishlab chiqish;
xalqaro imtihon oluvchi tashkilotlar bilan hamkorlikda imtihonlarni tashkil etish va oʻtkazish.
3. Ilmiy markaz faoliyatini moliyalashtirish manbalari etib quyidagilar belgilansin:
Oʻzbekiston Respublikasi Vazirlar Mahkamasi huzuridagi Davlat test markazi faoliyatini rivojlantirish jamgʻarmasi mablagʻlari;
shartnoma boʻyicha jismoniy va yuridik shaxslarga xizmatlar koʻrsatishdan tushgan mablagʻlar;
yuridik va jismoniy shaxslarning homiylik xayriyalari;
qonunchilik hujjatlari bilan taqiqlanmagan boshqa manbalar.
4. Davlat test markazi bir oy muddatda:
Oʻzbekiston Respublikasi Moliya vazirligi bilan birgalikda Ilmiy markaz tuzilmasini tasdiqlasin, xodimlarning umumiy cheklangan soniga muvofiq ularning mehnatiga toʻlanadigan ish haqi miqdorlarini belgilasin;
Ilmiy markaz ustavini tasdiqlasin va belgilangan tartibda davlat roʻyxatidan oʻtkazsin.
5. 2020-yil 1-noyabrdan boshlab yagona tarif setkasi boʻyicha mehnatga haq toʻlashning tasdiqlangan razryadlariga koʻra Davlat test markazi boshqaruv xodimlari lavozim maoshlarini aniqlashda tarif koeffitsiyentlari bir yarim baravar miqdorida qoʻllansin hamda bu bilan bogʻliq qoʻshimcha xarajatlar Davlat test markazi faoliyatini rivojlantirish jamgʻarmasi mablagʻlari hisobidan qoplansin.
6. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.
7. Oʻzbekiston Respublikasi Vazirlar Mahkamasi huzuridagi Davlat test markazi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
8. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A. Musayev hamda Vazirlar Mahkamasi huzuridagi Davlat test markazi direktori M.M. Karimov zimmasiga yuklansin.
Vazirlar Mahkamasining 2020-yil 17-sentabrdagi 562-son qaroriga ILOVA
Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar
2. Vazirlar Mahkamasining 2018-yil 3-apreldagi 261-son qarori (Oʻzbekiston Respublikasi QT, 2018-yil, 4-son, 76-modda) bilan tasdiqlangan Oʻzbekiston Respublikasi oliy taʼlim muassasalarining bakalavriatiga oʻqishga qabul qilish uchun kirish test sinovlarini oʻtkazish tartibi toʻgʻrisidagi nizomda :
a) 24-banddan oʻninchi xatboshi chiqarib tashlansin;
b) 28-bandda :
quyidagi mazmundagi uchinchi xatboshi qoʻshilsin:
“Oʻzbekiston Respublikasi Prezidenti hamda Vazirlar Mahkamasi tomonidan belgilangan imtiyozlarga ega boʻlmagan abituriyentlarni Davlat test markazining rasmiy veb-sayti orqali ham roʻyxatdan oʻtishiga imkoniyat yaratish”;
uchinchi — oʻninchi xatboshilar tegishli ravishda toʻrtinchi — oʻn birinchi xatboshilar deb hisoblansin;
v) 43-bandning yettinchi xatboshisi quyidagi tahrirda bayon etilsin:
“abituriyentlarga test topshiriqlari kitobi va Davlat komissiyasi tomonidan namuna sifatida tasdiqlangan javoblar varaqalarini tarqatish”;
g) Nizomga 11-ilova oʻz kuchini yoʻqotgan deb hisoblansin.
3. Vazirlar Mahkamasining “Oliy taʼlim muassasalariga test sinovlari orqali qabul qilish tizimi takomillashtirilishi munosabati bilan Oʻzbekiston Respublikasi Vazirlar Mahkamasi huzuridagi Davlat test markazining faoliyatini kuchaytirish toʻgʻrisida” 2019-yil 9-iyuldagi 572-son qarorining 1-ilovasi matni quyidagi tahrirda bayon etilsin:
“Oʻzbekiston Respublikasi Vazirlar Mahkamasi huzuridagi Davlat test markazining TUZILMASI
Oʻzbekiston Respublikasining Bosh vaziri A. ARIPOV
Toshkent sh.,
2020-yil 17-sentabr,
562-son