📅 2020-yil 21-sentabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 21 сентябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 21 сентября 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 21 September 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Якка тартибдаги уй-жойларни қуриш ва қайта қуриш учун ипотека кредити ажратишнинг соддалаштирилган тизимини жорий қилиш тўғрисида
Ўзбекистон Республикаси Президентининг «Ипотека кредити механизмларини такомиллаштиришга оид қўшимча чора-тадбирлар тўғрисида» 2019 йил 28 ноябрдаги ПФ-5886-сон Фармони ижросини таъминлаш, шунингдек, якка тартибдаги уй-жойларни қуриш ва қайта қуриш учун ипотека кредити ажратишни янада соддалаштириш мақсадида Вазирлар Маҳкамаси қарор қилади:
1. Ипотека кредитларининг соддалаштирилган тизимини жорий қилиш мақсадида тажриба тариқасида Андижон вилоятининг Андижон шаҳри, Қўрғонтепа ва Шаҳрихон туманларида Ўзбекистон Республикаси Молия вазирлиги томонидан ажратиладиган маблағлар ҳисобидан «Ипотека-банк» АТИБ ва «Бизнесни ривожлантириш банки» АТБлар томонидан аҳолига ипотека кредитлари ажратиш бўйича қуйидагиларга:
мижознинг танловига кўра, хўжалик усулида якка тартибдаги уй-жойларни қуриш (қайта қуриш) учун ипотека кредити қарз олувчининг банк пластик карточкасига босқичма-босқич ўтказиш йўли билан ажратилишига;
қурилиш даври учун 6 ой имтиёзли давр белгиланишига;
даромадлари тўғрисида камида охирги уч ой учун иш жойидан берилган маълумотномалар, иш берувчи томонидан берилган иш ҳақи ва унга тенглаштирилган тўловлар, пенсия тўловлари, фоизлар, дивидендлар, мол-мулкни ижарага беришдан олинган доимий тарздаги даромадлар давлат солиқ хизмати органи томонидан тасдиқланган жисмоний шахсларнинг даромадлари бўйича декларациялар билан бирга ва халқаро пул ўтказмалари тизими орқали келиб тушган маблағлар ҳамда қонунчиликда тақиқланмаган бошқа даромадларни қарз олувчининг (биргаликда қарз олувчининг) кредитга лаёқатлилигини ҳисоблашда инобатга олишга;
кредитнинг мақсадли ишлатилишини банк ва қарз олувчи ўртасида дастлаб имзоланган уй-жой қурилишини бажариш режа-жадвали асосида бажарилган ишлар сифатида қабул қилишга;
кредит ажратиш учун якка тартибдаги уй-жойларнинг тегишли лойиҳа ташкилотлари томонидан ишлаб чиқилган лойиҳа-смета ҳужжатлари (ер усти ва ер ости муҳандислик коммуникациялари акс эттирилган ер участкаси тарҳи, якка тартибда уй-жойнинг пойдеворлари, ертўлалари, қаватлари, уларнинг кесимлари ва бинонинг олд томони тарҳлари, молиявий смета ҳисоб-китоби) ҳамда асосий турдаги қурилиш материаллари қиймати асос сифатида қабул қилинишига;
якка тартибдаги уй-жойларнинг молиявий смета ҳисоб-китобининг 10 фоизи миқдорида бошланғич бадал сифатида қарз олувчининг маблағлари, мавжуд қурилиш материаллари, ишчи кучи ва бажарилган қурилиш-монтаж ишлари қабул қилинишига рухсат берилсин.
2. «Ипотека-банк» АТИБ ва «Бизнесни ривожлантириш банки» АТБга мазкур қарор талабларидан келиб чиққан ҳолда, ўзининг ички низомларига тегишли ўзгартириш ва қўшимчалар киритиш тавсия этилсин.
3. Мазкур қарорнинг бажарилишини назорат қилиш Ўзбекистон Республикаси Бош вазирининг молия-иқтисодиёт ва камбағалликни қисқартириш масалалари бўйича ўринбосари — иқтисодий тараққиёт ва камбағалликни қисқартириш вазири Ж.А. Қўчқоров ҳамда Андижон вилояти ҳокими Ш.Қ. Абдураҳмонов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2020 йил 21 сентябрь,
576-сон
Oʻzbekiston Respublikasi Vazirlar Mahkamasining
qarori
Yakka tartibdagi uy-joylarni qurish va qayta qurish uchun ipoteka krediti ajratishning soddalashtirilgan tizimini joriy qilish toʻgʻrisida
Oʻzbekiston Respublikasi Prezidentining “Ipoteka krediti mexanizmlarini takomillashtirishga oid qoʻshimcha chora-tadbirlar toʻgʻrisida” 2019-yil 28-noyabrdagi PF-5886-son Farmoni ijrosini taʼminlash, shuningdek, yakka tartibdagi uy-joylarni qurish va qayta qurish uchun ipoteka krediti ajratishni yanada soddalashtirish maqsadida Vazirlar Mahkamasi qaror qiladi:
1. Ipoteka kreditlarining soddalashtirilgan tizimini joriy qilish maqsadida tajriba tariqasida Andijon viloyatining Andijon shahri, Qoʻrgʻontepa va Shahrixon tumanlarida Oʻzbekiston Respublikasi Moliya vazirligi tomonidan ajratiladigan mablagʻlar hisobidan “Ipoteka-bank” ATIB va “Biznesni rivojlantirish banki” ATBlar tomonidan aholiga ipoteka kreditlari ajratish boʻyicha quyidagilarga:
mijozning tanloviga koʻra, xoʻjalik usulida yakka tartibdagi uy-joylarni qurish (qayta qurish) uchun ipoteka krediti qarz oluvchining bank plastik kartochkasiga bosqichma-bosqich oʻtkazish yoʻli bilan ajratilishiga;
qurilish davri uchun 6 oy imtiyozli davr belgilanishiga;
daromadlari toʻgʻrisida kamida oxirgi uch oy uchun ish joyidan berilgan maʼlumotnomalar, ish beruvchi tomonidan berilgan ish haqi va unga tenglashtirilgan toʻlovlar, pensiya toʻlovlari, foizlar, dividendlar, mol-mulkni ijaraga berishdan olingan doimiy tarzdagi daromadlar davlat soliq xizmati organi tomonidan tasdiqlangan jismoniy shaxslarning daromadlari boʻyicha deklaratsiyalar bilan birga va xalqaro pul oʻtkazmalari tizimi orqali kelib tushgan mablagʻlar hamda qonunchilikda taqiqlanmagan boshqa daromadlarni qarz oluvchining (birgalikda qarz oluvchining) kreditga layoqatliligini hisoblashda inobatga olishga;
kreditning maqsadli ishlatilishini bank va qarz oluvchi oʻrtasida dastlab imzolangan uy-joy qurilishini bajarish reja-jadvali asosida bajarilgan ishlar sifatida qabul qilishga;
kredit ajratish uchun yakka tartibdagi uy-joylarning tegishli loyiha tashkilotlari tomonidan ishlab chiqilgan loyiha-smeta hujjatlari (yer usti va yer osti muhandislik kommunikatsiyalari aks ettirilgan yer uchastkasi tarhi, yakka tartibda uy-joyning poydevorlari, yertoʻlalari, qavatlari, ularning kesimlari va binoning old tomoni tarhlari, moliyaviy smeta hisob-kitobi) hamda asosiy turdagi qurilish materiallari qiymati asos sifatida qabul qilinishiga;
yakka tartibdagi uy-joylarning moliyaviy smeta hisob-kitobining 10 foizi miqdorida boshlangʻich badal sifatida qarz oluvchining mablagʻlari, mavjud qurilish materiallari, ishchi kuchi va bajarilgan qurilish-montaj ishlari qabul qilinishiga ruxsat berilsin.
2. “Ipoteka-bank” ATIB va “Biznesni rivojlantirish banki” ATBga mazkur qaror talablaridan kelib chiqqan holda, oʻzining ichki nizomlariga tegishli oʻzgartirish va qoʻshimchalar kiritish tavsiya etilsin.
3. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — iqtisodiy taraqqiyot va kambagʻallikni qisqartirish vaziri J.A. Qoʻchqorov hamda Andijon viloyati hokimi Sh.Q. Abdurahmonov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 21-sentabr,
576-son