📅 2020-yil 30-sentabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 30 сентябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 30 сентября 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 30 September 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Опера санъатига ихтисослаштирилган мактаб-интернат ташкил этиш тўғрисида
Опера санъатининг кўп асрлик ижро йўлларини пухта ўзлаштириш, ёш авлод вакилларига ўргатиш, уларга миллий ва жаҳон классик мусиқасининг ноёб намуналаридан баҳраманд бўлишлари учун кенг имкониятлар яратиш, шунингдек, опера санъати бўйича малакали мутахассислар тайёрлаш тизимини янада такомиллаштириш мақсадида Вазирлар Маҳкамаси қарор қилади:
1. Ўзбекистон Республикаси Маданият вазирлиги, Қорақалпоғистон Республикаси Вазирлар Кенгаши, Ўзбекистон композиторлари ва бастакорлари уюшмасининг:
2021/2022 ўқув йилидан бошлаб Қорақалпоғистон Республикаси Нукус шаҳридаги 24-сон болалар мусиқа ва санъат мактаби негизида опера санъатига ихтисослаштирилган мактаб-интернат (кейинги ўринларда — мактаб-интернат) ташкил этиш;
мактаб-интернат учун қўшимча бино ва иншоотлар, шу жумладан, 100 ўринли ётоқхона ва ошхона, 120 ўринли қўшимча ўқув биноси қуриш тўғрисидаги таклифи маъқуллансин.
2. Белгилаб қўйилсинки:
мактаб-интернат Ўзбекистон Республикаси Маданият вазирлиги тизимидаги давлат ихтисослаштирилган таълим муассасаси ҳисобланади;
2022/2023 ўқув йилидан бошлаб мактаб-интернатнинг 8-синфига 25 нафар ўқувчи танлов асосида қабул қилинади.
Ўзбекистон Республикаси маданият вазирига мактаб-интернатнинг моддий-техника базасидан, педагог кадрларнинг салоҳияти ва эҳтиёжидан келиб чиққан ҳолда кейинги йилларда ўқувчиларни қабул қилиш параметрларига ўзгартиришлар киритиш ҳуқуқи берилсин.
3. Ўзбекистон Республикаси Маданият вазирлиги:
а) 2021 йил 1 июнга қадар:
мактаб-интернатни жиҳозлаш учун мусиқа чолғулари ва ускуналарининг техник параметрларини ишлаб чиқиш;
мактаб-интернатнинг уставини тасдиқлаш ва белгиланган тартибда давлат рўйхатидан ўтказилишини таъминлаш;
б) 2021 йил 1 сентябрга қадар мактаб-интернатнинг самарали фаолият кўрсатишини ҳамда уни танлов асосида малакали педагог кадрлар билан таъминлаш;
мактаб-интернатни дарсликлар, ўқув-методик қўлланмалар ва бадиий адабиётлар билан таъминлаш чораларини кўрсин.
4. Қорақалпоғистон Республикаси Вазирлар Кенгаши Ўзбекистон Республикаси Маданият вазирлиги билан келишган ҳолда:
бир ой муддатда мактаб-интернатга бино ва иншоотлар қурилиши учун белгиланган тартибда ер участкалари ажратилишини таъминласин;
2021 йил 1 августга қадар мактаб-интернат бино ва иншоотларини фойдаланишга топшириш чораларини кўрсин.
5. Қорақалпоғистон Республикаси Вазирлар Кенгаши мактаб-интернатнинг бино ва иншоотларини қуриш ҳамда жиҳозлаш ишларининг молиялаштириш манбаларини белгилаш мақсадида икки ой муддатда тегишли қарор қабул қилсин. Бунда қуйидагиларни назарда тутсин:
Қорақалпоғистон Республикаси бюджетининг қўшимча манбалари;
жисмоний ва юридик шахсларнинг ҳомийлик хайриялари;
қонун ҳужжатларида тақиқланмаган бошқа маблағлар.
6. Белгилаб қўйилсинки, мактаб-интернатни жорий сақлаш учун Қорақалпоғистон Республикаси бюджети харажатлар параметрларига тегишли ўзгартиришлар киритилади, 2022 йилдан бошлаб эса харажатлар Ўзбекистон Республикаси Давлат бюджети параметрларида назарда тутилади.
7. Ўзбекистон Республикаси Маданият вазирлиги манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
8. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари Б.А. Мусаев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2020 йил 30 сентябрь,
595-сон
Oʻzbekiston Respublikasi Vazirlar Mahkamasining
qarori
Opera sanʼatiga ixtisoslashtirilgan maktab-internat tashkil etish toʻgʻrisida
Opera sanʼatining koʻp asrlik ijro yoʻllarini puxta oʻzlashtirish, yosh avlod vakillariga oʻrgatish, ularga milliy va jahon klassik musiqasining noyob namunalaridan bahramand boʻlishlari uchun keng imkoniyatlar yaratish, shuningdek, opera sanʼati boʻyicha malakali mutaxassislar tayyorlash tizimini yanada takomillashtirish maqsadida Vazirlar Mahkamasi qaror qiladi:
1. Oʻzbekiston Respublikasi Madaniyat vazirligi, Qoraqalpogʻiston Respublikasi Vazirlar Kengashi, Oʻzbekiston kompozitorlari va bastakorlari uyushmasining:
2021/2022 oʻquv yilidan boshlab Qoraqalpogʻiston Respublikasi Nukus shahridagi 24-son bolalar musiqa va sanʼat maktabi negizida opera sanʼatiga ixtisoslashtirilgan maktab-internat (keyingi oʻrinlarda — maktab-internat) tashkil etish;
maktab-internat uchun qoʻshimcha bino va inshootlar, shu jumladan, 100 oʻrinli yotoqxona va oshxona, 120 oʻrinli qoʻshimcha oʻquv binosi qurish toʻgʻrisidagi taklifi maʼqullansin.
2. Belgilab qoʻyilsinki:
maktab-internat Oʻzbekiston Respublikasi Madaniyat vazirligi tizimidagi davlat ixtisoslashtirilgan taʼlim muassasasi hisoblanadi;
2022/2023 oʻquv yilidan boshlab maktab-internatning 8-sinfiga 25 nafar oʻquvchi tanlov asosida qabul qilinadi.
Oʻzbekiston Respublikasi madaniyat vaziriga maktab-internatning moddiy-texnika bazasidan, pedagog kadrlarning salohiyati va ehtiyojidan kelib chiqqan holda keyingi yillarda oʻquvchilarni qabul qilish parametrlariga oʻzgartirishlar kiritish huquqi berilsin.
3. Oʻzbekiston Respublikasi Madaniyat vazirligi:
a) 2021-yil 1-iyunga qadar:
maktab-internatni jihozlash uchun musiqa cholgʻulari va uskunalarining texnik parametrlarini ishlab chiqish;
maktab-internatning ustavini tasdiqlash va belgilangan tartibda davlat roʻyxatidan oʻtkazilishini taʼminlash;
b) 2021-yil 1-sentabrga qadar maktab-internatning samarali faoliyat koʻrsatishini hamda uni tanlov asosida malakali pedagog kadrlar bilan taʼminlash;
maktab-internatni darsliklar, oʻquv-metodik qoʻllanmalar va badiiy adabiyotlar bilan taʼminlash choralarini koʻrsin.
4. Qoraqalpogʻiston Respublikasi Vazirlar Kengashi Oʻzbekiston Respublikasi Madaniyat vazirligi bilan kelishgan holda:
bir oy muddatda maktab-internatga bino va inshootlar qurilishi uchun belgilangan tartibda yer uchastkalari ajratilishini taʼminlasin;
2021-yil 1-avgustga qadar maktab-internat bino va inshootlarini foydalanishga topshirish choralarini koʻrsin.
5. Qoraqalpogʻiston Respublikasi Vazirlar Kengashi maktab-internatning bino va inshootlarini qurish hamda jihozlash ishlarining moliyalashtirish manbalarini belgilash maqsadida ikki oy muddatda tegishli qaror qabul qilsin. Bunda quyidagilarni nazarda tutsin:
Qoraqalpogʻiston Respublikasi budjetining qoʻshimcha manbalari;
jismoniy va yuridik shaxslarning homiylik xayriyalari;
qonun hujjatlarida taqiqlanmagan boshqa mablagʻlar.
6. Belgilab qoʻyilsinki, maktab-internatni joriy saqlash uchun Qoraqalpogʻiston Respublikasi budjeti xarajatlar parametrlariga tegishli oʻzgartirishlar kiritiladi, 2022-yildan boshlab esa xarajatlar Oʻzbekiston Respublikasi Davlat budjeti parametrlarida nazarda tutiladi.
7. Oʻzbekiston Respublikasi Madaniyat vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
8. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A. Musayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 30-sentabr,
595-son