📅 2020-yil 6-oktabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 6 октябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 6 октября 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 6 October 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Наманган вилоятида жойлашган давлат мулки объектларидан самарали ва оқилона фойдаланиш чора-тадбирлари тўғрисида
Наманган вилояти Поп туманини ижтимоий-иқтисодий ривожлантириш, аҳолининг турмуш даражасини яхшилаш, соғломлаштириш тизимини янада такомиллаштириш ҳамда ҳудуддаги мавжуд табиий ва меҳнат ресурсларидан тўлиқ ва самарали фойдаланиш, табиий доривор ўсимликларни қайта ишлаш, даволаш ва соғломлаштириш комплексини ташкил этиш мақсадида Вазирлар Маҳкамаси қарор қилади:
1. Ўзбекистон касаба уюшмалари Федерацияси, Ўзбекистон Республикаси Ўрмон хўжалиги давлат қўмитаси ва Наманган вилояти ҳокимлигининг Наманган вилояти, Поп тумани, «Чодак» қишлоқ фуқаролар йиғини ҳудудида жойлашган Ўзбекистон касаба уюшмалари Федерациясининг А. Набиев номидаги болалар соғломлаштириш оромгоҳининг бино ва иншоотларини тегишли ҳудуди билан биргаликда (кейинги ўринларда — объект) Ўрмон хўжалиги давлат қўмитаси тизимидаги Қўқон давлат ўрмон хўжалигига оператив бошқариш ҳуқуқи асосида текин бериш тўғрисидаги таклифига розилик берилсин.
2. Ўзбекистон касаба уюшмалари Федерацияси ва Ўрмон хўжалиги давлат қўмитасига объектни бир ой муддатда белгиланган тартибда топшириш ва қабул қилиш ҳамда тегишли ҳужжатларни расмийлаштириш чораларини кўрсин.
3. Ўзбекистон Республикаси Ўрмон хўжалиги давлат қўмитаси қабул қилиб олинган объектдан, ҳудуддаги мавжуд меҳнат ресурсларидан самарали фойдаланилишини таъминлаш мақсадида табиий доривор ўсимликларни қайта ишлаш, даволаш ва соғломлаштириш комплексини ташкил этиш ишларини амалга оширсин.
4. Вазирлар Маҳкамасининг «Давлат мулки объектларидан самарали ва оқилона фойдаланиш бўйича қўшимча чора-тадбирлар тўғрисида» 2015 йил 9 октябрдаги 289-сон қарори 1-иловасининг 134-позицияси ўз кучини йўқотган деб ҳисоблансин.
5. Мазкур қарорнинг бажарилишини назорат қилиш Ўзбекистон Республикаси Бош вазирининг аграр ва озиқ-овқат соҳаларини ривожлантириш масалалари бўйича ўринбосари Ш.М. Ғаниев ҳамда Ўзбекистон Республикаси Ўрмон хўжалиги давлат қўмитаси раиси Н.Ж. Бакиров зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2020 йил 6 октябрь,
599-сон
Oʻzbekiston Respublikasi Vazirlar Mahkamasining
qarori
Namangan viloyatida joylashgan davlat mulki obyektlaridan samarali va oqilona foydalanish chora-tadbirlari toʻgʻrisida
Namangan viloyati Pop tumanini ijtimoiy-iqtisodiy rivojlantirish, aholining turmush darajasini yaxshilash, sogʻlomlashtirish tizimini yanada takomillashtirish hamda hududdagi mavjud tabiiy va mehnat resurslaridan toʻliq va samarali foydalanish, tabiiy dorivor oʻsimliklarni qayta ishlash, davolash va sogʻlomlashtirish kompleksini tashkil etish maqsadida Vazirlar Mahkamasi qaror qiladi:
1. Oʻzbekiston kasaba uyushmalari Federatsiyasi, Oʻzbekiston Respublikasi Oʻrmon xoʻjaligi davlat qoʻmitasi va Namangan viloyati hokimligining Namangan viloyati, Pop tumani, “Chodak” qishloq fuqarolar yigʻini hududida joylashgan Oʻzbekiston kasaba uyushmalari Federatsiyasining A. Nabiyev nomidagi bolalar sogʻlomlashtirish oromgohining bino va inshootlarini tegishli hududi bilan birgalikda (keyingi oʻrinlarda — obyekt) Oʻrmon xoʻjaligi davlat qoʻmitasi tizimidagi Qoʻqon davlat oʻrmon xoʻjaligiga operativ boshqarish huquqi asosida tekin berish toʻgʻrisidagi taklifiga rozilik berilsin.
2. Oʻzbekiston kasaba uyushmalari Federatsiyasi va Oʻrmon xoʻjaligi davlat qoʻmitasiga obyektni bir oy muddatda belgilangan tartibda topshirish va qabul qilish hamda tegishli hujjatlarni rasmiylashtirish choralarini koʻrsin.
3. Oʻzbekiston Respublikasi Oʻrmon xoʻjaligi davlat qoʻmitasi qabul qilib olingan obyektdan, hududdagi mavjud mehnat resurslaridan samarali foydalanilishini taʼminlash maqsadida tabiiy dorivor oʻsimliklarni qayta ishlash, davolash va sogʻlomlashtirish kompleksini tashkil etish ishlarini amalga oshirsin.
4. Vazirlar Mahkamasining “Davlat mulki obyektlaridan samarali va oqilona foydalanish boʻyicha qoʻshimcha chora-tadbirlar toʻgʻrisida” 2015-yil 9-oktabrdagi 289-son qarori 1-ilovasining 134-pozitsiyasi oʻz kuchini yoʻqotgan deb hisoblansin.
5. Mazkur qarorning bajarilishini nazorat qilish Oʻzbekiston Respublikasi Bosh vazirining agrar va oziq-ovqat sohalarini rivojlantirish masalalari boʻyicha oʻrinbosari Sh.M. Gʻaniyev hamda Oʻzbekiston Respublikasi Oʻrmon xoʻjaligi davlat qoʻmitasi raisi N.J. Bakirov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 6-oktabr,
599-son