📅 2020-yil 9-oktabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 9 октябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 9 октября 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 9 October 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
СХЕМАСИ
Давлат органлари ва ташкилотлари томонидан йўлланувчи хат-хабарларни етказиб бериш, етказилганлигини тасдиқлаш, маълумотларни сақлаш ва ҳисобга олишнинг ягона миллий тизимини жорий этиш чора-тадбирлари тўғрисида
Ўзбекистон Республикаси Президентининг «Рақамли иқтисодиёт ва электрон ҳукуматни кенг жорий этиш чора-тадбирлари тўғрисида» 2020 йил 28 апрелдаги ПҚ-4699-сон қарори ижросини таъминлаш, шунингдек, замонавий ахборот технологияларини жорий этиш орқали давлат бошқаруви органлари, маҳаллий ижро этувчи ҳокимият органлари, давлат корхоналари, муассасалари, ташкилотлари, суд ва ҳуқуқни муҳофаза қилувчи органлар (кейинги ўринларда — давлат органлари ва ташкилотлари) томонидан юридик ва жисмоний шахслар номига йўлланувчи хат-хабарлар, хабарномалар, чақирув қоғозлари ва бошқа юридик ҳужжатларни почта алоқаси объектлари тармоғи орқали етказиб бериш жараёнини такомиллаштириш мақсадида Вазирлар Маҳкамаси қарор қилади:
1. Ўзбекистон Республикаси Президентининг «Рақамли иқтисодиёт ва электрон ҳукуматни кенг жорий этиш чора-тадбирлари тўғрисида» 2020 йил 28 апрелдаги ПҚ-4699-сон қарорига мувофиқ Ўзбекистон Республикаси Ахборот технологиялари ва коммуникацияларини ривожлантириш вазирлиги томонидан Давлат органлари ва ташкилотлари томонидан йўлланувчи хат-хабарларни етказиб бериш, етказилганлигини тасдиқлаш, маълумотларни сақлаш ва ҳисобга олишнинг ягона миллий тизими (кейинги ўринларда — Ягона миллий тизим) яратилганлиги маълумот учун қабул қилинсин.
2. Қуйидагиларни назарда тутувчи Давлат органлари ва ташкилотлари томонидан йўлланувчи хат-хабарларни етказиб бериш, етказилганлигини тасдиқлаш, маълумотларни сақлаш ва ҳисобга олишнинг ягона миллий тизими тўғрисидаги низом иловага мувофиқ тасдиқлансин:
хат-хабарларни етказиб бериш, етказилганлигини тасдиқлаш, маълумотларни сақлаш ва ҳисобга олишнинг ягона миллий тизими бўйича умумий қоидалар;
ягона миллий тизим орқали почта жўнатмаларини юбориш тартиби;
ягона миллий тизим орқали почта жўнатмаларини етказиш тартиби;
ахборот хавфсизлигини таъминлаш тартиби.
3. «Ўзбекистон почтаси» акциядорлик жамияти Ягона миллий тизим оператори этиб белгилансин.
4. Ўзбекистон Республикаси Ахборот технологиялари ва коммуникацияларини ривожлантириш вазирлиги:
бир ой муддатда Ягона миллий тизимдан фойдаланилган ҳолда почта жўнатмаларини етказиб бериш назорат муддатларини тасдиқласин;
доимий равишда почта жўнатмаларининг хавфсизлиги ва ёзишмалар сири таъминланган ҳолда қабул қилувчиларга белгиланган муддатларида етказиб берилишини назоратга олсин.
5. Вазирликлар, идоралар, маҳаллий ижро этувчи ҳокимият органлари, бошқа давлат органлари ва ташкилотлари:
Ўзбекистон Республикаси Ахборот технологиялари ва коммуникацияларини ривожлантириш вазирлиги билан биргаликда идоравий ахборот тизимларини Ягона миллий тизим билан интеграция қилиш орқали жисмоний ва юридик шахслар номига почта жўнатмаларини ушбу тизимдан фойдаланилган ҳолда юборишни жорий этсин;
ҳар йили келгуси йил учун харажатлар сметасини шакллантиришда почта жўнатмаларини Ягона миллий тизимдан фойдаланган ҳолда юбориш учун маблағлар назарда тутилишини таъминласин;
юридик ва жисмоний шахслар номига йўлланувчи ҳуқуқий жиҳатдан аҳамиятли бўлмаган хат-хабарларни етказиб бериш жараёнини босқичма-босқич тўлиқ электрон шаклга ўтказиш чораларини кўрсин.
6. Ўзбекистон Республикаси Ахборот технологиялари ва коммуникацияларини ривожлантириш вазирлиги манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
7. Ушбу қарорнинг бажарилишини назорат қилиш Ўзбекистон Республикаси Бош вазирининг маслаҳатчиси — IТ-технологиялар, телекоммуникациялар ва инновацион фаолиятни ривожлантириш масалалари департаменти бошлиғи О.М. Умаров ҳамда Ўзбекистон Республикаси ахборот технологиялари ва коммуникацияларини ривожлантириш вазири Ш.М. Садиков зиммасига юклансин.
Вазирлар Маҳкамасининг 2020 йил 9 октябрдаги 637-сон қарорига ИЛОВА
Давлат органлари ва ташкилотлари томонидан йўлланувчи хат-хабарларни етказиб бериш, етказилганлигини тасдиқлаш, маълумотларни сақлаш ва ҳисобга олишнинг ягона миллий тизими тўғрисида
1-боб. Умумий қоидалар
1. Ушбу Низом давлат бошқаруви органлари, маҳаллий ижро этувчи ҳокимият органлари, давлат ташкилотлари, суд ва ҳуқуқни муҳофаза қилувчи органлар (кейинги ўринларда — давлат органлари ва ташкилотлари) томонидан жисмоний ва юридик шахслар номига йўлланувчи хат-хабарлар, хабарномалар, чақирув қоғозлари ва бошқа юридик ҳужжатларни (кейинги ўринларда — почта жўнатмалари) Ягона миллий тизимдан фойдаланилган ҳолда почта алоқаси объектлари тармоғи орқали етказиб бериш тартибини белгилайди.
2. Ушбу Низом талаблари давлат органлари ва ташкилотлари томонидан ўзаро алмашинувчи, шу жумладан, «Ijro.gov.uz» ижро интизоми идоралараро ягона электрон тизими орқали электрон алмашинувчи хат-хабарлар ва ҳужжатларга, суд ва ҳуқуқни муҳофаза қилувчи органларнинг жиноят, маъмурий, фуқаролик ҳамда иқтисодий ишлар, терговга қадар текширув, хизмат текшируви ва шу каби тўпланган ҳужжатларига ҳамда давлат сирлари ёки тарқатилиши қонун билан чекланувчи бошқа маълумотларга эга ҳужжатларга, шунингдек, хорижий давлатларга йўлланадиган почта жўнатмаларига, бундан ташқари юридик ва жисмоний шахсларнинг ўз хоҳишларига кўра жавоб хатларини уларнинг электрон почта манзилига юборилишини сўраб қилган мурожаатларига нисбатан татбиқ этилмайди.
3. Мазкур Низомда қуйидаги асосий тушунчалар қўлланилади:
почта алоқаси боғламалари — почта йўналишларининг кесишган ёки туташган пунктида жойлашган, бириктирилган ҳудудда почта жўнатмаларини жўнатиш ва етказиб бериш (топшириш), почтага ишлов бериш ва унинг алмашинуви бўйича ўзаро боғлиқ вазифалар бажарилишини таъминловчи почта алоқаси объекти;
почта алоқаси объектлари — почта алоқаси операторларининг алоҳида бўлинмалари (почтамтлар, почта алоқаси боғламалари, бўлимлари, пунктлари, шунингдек, бошқа бўлинмалар);
Ягона миллий тизим — хат-хабарлар, хабарномалар, чақирув қоғозлари ва бошқа юридик ҳужжатларнинг электрон тарзда қабул қилиниши ҳамда тегишли почта алоқаси боғламаси томонидан қоғоз кўринишида чоп этилиб, кўрсатилган манзиллар бўйича почта алоқаси объектлари тармоғи орқали етказиб берилишини, етказилганлигини тасдиқлашни, маълумотларни сақлаш ва ҳисобга олишни таъминловчи ахборот тизими;
қабул қилувчи — хат-хабарлар, хабарномалар, чақирув қоғозлари ва бошқа юридик ҳужжатлар юборилган юридик ёки жисмоний шахс.
4. Давлат органлари ва ташкилотлари томонидан қуйидаги почта жўнатмалари Ягона миллий тизим орқали йўлланади:
юридик ва жисмоний шахслар номига юборилувчи хат-хабарлар, шу жумладан, улар томонидан йўлланган мурожаатларга ёзилган жавоб хатлари;
тўлов хабарномалари ва билдиришномалар;
чақирув қоғозлари, суд хабарномалари ва процессуал ҳужжатлар;
давлат хизматларини кўрсатишнинг натижалари;
маъмурий ҳуқуқбузарлик содир этганлик учун жаримага тортиш тўғрисидаги қарорлар.
5. Ягона миллий тизимдан фойдаланилган ҳолда почта жўнатмаларини етказиб бериш ва тизим орқали кўрсатилувчи қўшимча хизматлар Ягона миллий тизим оператори томонидан шартнома асосида амалга оширилади.
2-боб. Ягона миллий тизим орқали почта жўнатмаларини юбориш тартиби
6. Почта жўнатмаларини Ягона миллий тизим орқали етказиб бериш ушбу Низомга иловага мувофиқ схема бўйича амалга оширилади.
7. Давлат органлари ва ташкилотларида мавжуд ахборот тизимларини, шу жумладан, электрон ҳужжат айланиши тизимларини Ягона миллий тизимга интеграция қилиш орқали почта жўнатмаларини юбориш амалга оширилади.
Ягона миллий тизим, шунингдек, «Ijro.gov.uz» ижро интизоми идоралараро ягона электрон тизимига интеграция қилинади, давлат органлари ва ташкилотларига ушбу тизимдан фойдаланган ҳолда Ягона миллий тизим орқали почта жўнатмаларини юбориш имконияти яратилади.
8. Давлат органлари ва ташкилотларида почта жўнатмаларини электрон шаклда Ягона миллий тизим орқали юборишнинг имконияти бўлмаган ҳолларда ушбу давлат органлари ва ташкилотларининг хоҳишига кўра почта жўнатмалари Ягона миллий тизим операторининг почта алоқаси объектларида қоғоз кўринишда қабул қилиниши мумкин. Қоғоз кўринишида қабул қилинган почта жўнатмалари Ягона миллий тизим оператори томонидан қўшимча ҳақ эвазига электрон шаклга ўтказилиб Ягона миллий тизимга киритилади.
3-боб. Ягона миллий тизим орқали почта жўнатмаларини етказиш тартиби
9. Ягона миллий тизимга электрон тарзда тушган (ўзаро келишилган форматдаги) почта жўнатмаларини юклаш ва кейинги ишлов бериш жараёнида давлат органлари ва ташкилотларига берилган штрих коддан фойдаланилади, шунингдек, почта жўнатмалари автоматик равишда тегишли манзиллар бўйича почта алоқаси боғламаларига тарқатилади.
10. Тегишли почта алоқаси боғламаларига электрон шаклда тушган почта жўнатмалари қоғоз кўринишида чоп этилиб, бошқа почта жўнатмаларидан фарқланиб турадиган махсус почта конвертига жойлаштирилади ёки конвертсиз кўрсатилган манзиллар бўйича жўнатилади ва қабул қилувчиларга назорат муддатларида етказиб берилади.
11. Почта жўнатмаларини қабул қилувчиларга топшириш қонунчиликда белгиланган талабларга мувофиқ амалга оширилади.
12. Агар қабул қилувчи унинг номига келадиган почта жўнатмаларини электрон шаклда олиш тўғрисида почта алоқаси объектларига ёзма равишда мурожаат қилган бўлса, у ҳолда почта жўнатмаси электрон шаклда қабул қилувчи томонидан кўрсатилган электрон почта манзилига юборилиши мумкин.
13. Почта жўнатмалари етказиб берилганлиги ёки етказиб берилмаганлиги сабаблари ва бошқа маълумотлар тегишли почта алоқаси боғламаси томонидан Ягона миллий тизимга мунтазам равишда киритилиб борилади.
14. Ҳар бир почта жўнатмаси тўғрисидаги маълумот унга тақдим қилинган штрих код орқали Ягона миллий тизимдан онлайн кузатиб борилиши мумкин.
15. Қоғоз кўринишида чоп этилган почта жўнатмаларини қабул қилувчиларга етказиб беришнинг имконияти бўлмаган ҳолларда ушбу почта жўнатмалари почта алоқаси боғламасида олти ой давомида сақланади.
Сақлаш муддати тугаганидан сўнг ҳужжатлар уларни жўнатган корхоналар, муассасалар ва ташкилотларнинг талабларига биноан қайтарилади, талаб қилиб олинмаган хат-хабарлар ва ҳужжатлар тегишли далолатнома тузилиб, йўқ қилинади.
16. Давлат органлари ва ташкилотлари томонидан электрон шаклда юборилган почта жўнатмалари қачон ва кимга топширилганлиги ёки топширилмаганлиги сабаблари ҳамда почта жўнатмаларининг электрон шаклдаги маълумотлари Ягона миллий тизимда бир йил давомида сақланади.
Тизимда сақлаш муддати тугаганидан сўнг ушбу почта жўнатмаларининг электрон шаклдаги маълумотлари дастурий равишда архивланиб, белгиланган муддатда сақлаш учун идоравий архивга топширилади.
4-боб. Ягона миллий тизимда ахборот хавфсизлигини таъминлаш тартиби
17. Ягона миллий тизим оператори тизим орқали почта алоқаси хизматларини кўрсатишда фойдаланиладиган ахборот тизимлари ва ахборот ресурсларининг ахборот хавфсизлигини, тизимда шахсга доир маълумотлар, шунингдек, почта жўнатмаларидаги маълумотларнинг муҳофаза қилинишини таъминлайди.
18. Ягона миллий тизимда сақланадиган почта жўнатмаларидан фақат уларни юборган давлат органлари ва ташкилотларининг, шунингдек, қабул қилувчининг розилиги билан ушбу почта жўнатмаларига ишлов бериш, уларни юбориш ва олиш учун фойдаланилади, бундан қонунчилик ҳужжатларида белгиланган ҳолатлар мустасно.
5-боб. Якунловчи қоидалар
19. Ушбу Низом талабларини бузганликда айбдор бўлган шахслар қонунчилик ҳужжатларида белгиланган тартибда жавоб берадилар.
20. Ушбу Низом билан тартибга солинган масалалар бўйича пайдо бўладиган низолар қонунчилик ҳужжатларида белгиланган тартибда ҳал этилади.
Давлат органлари ва ташкилотлари томонидан йўлланувчи хат-хабарларни етказиб бериш, етказилганлигини тасдиқлаш, маълумотларни сақлаш ва ҳисобга олишнинг ягона миллий тизими тўғрисидаги низомга ИЛОВА
Давлат органлари ва ташкилотлари томонидан йўлланадиган хат-хабарлар, хабарномалар, чақирув қоғозлари ва бошқа юридик ҳужжатларни Ягона миллий тизим орқали етказиб бериш
Ўзбекистон Республикасининг Бош вазири А. АРИПОВ
Тошкент ш.,
2020 йил 9 октябрь,
637-сон
Oʻzbekiston Respublikasi Vazirlar Mahkamasining
qarori
NIZOM
SXEMASI
Davlat organlari va tashkilotlari tomonidan yoʻllanuvchi xat-xabarlarni yetkazib berish, yetkazilganligini tasdiqlash, maʼlumotlarni saqlash va hisobga olishning yagona milliy tizimini joriy etish chora-tadbirlari toʻgʻrisida
Oʻzbekiston Respublikasi Prezidentining “Raqamli iqtisodiyot va elektron hukumatni keng joriy etish chora-tadbirlari toʻgʻrisida” 2020-yil 28-apreldagi PQ-4699-son qarori ijrosini taʼminlash, shuningdek, zamonaviy axborot texnologiyalarini joriy etish orqali davlat boshqaruvi organlari, mahalliy ijro etuvchi hokimiyat organlari, davlat korxonalari, muassasalari, tashkilotlari, sud va huquqni muhofaza qiluvchi organlar (keyingi oʻrinlarda — davlat organlari va tashkilotlari) tomonidan yuridik va jismoniy shaxslar nomiga yoʻllanuvchi xat-xabarlar, xabarnomalar, chaqiruv qogʻozlari va boshqa yuridik hujjatlarni pochta aloqasi obyektlari tarmogʻi orqali yetkazib berish jarayonini takomillashtirish maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining “Raqamli iqtisodiyot va elektron hukumatni keng joriy etish chora-tadbirlari toʻgʻrisida” 2020-yil 28-apreldagi PQ-4699-son qaroriga muvofiq Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi tomonidan Davlat organlari va tashkilotlari tomonidan yoʻllanuvchi xat-xabarlarni yetkazib berish, yetkazilganligini tasdiqlash, maʼlumotlarni saqlash va hisobga olishning yagona milliy tizimi (keyingi oʻrinlarda — Yagona milliy tizim) yaratilganligi maʼlumot uchun qabul qilinsin.
2. Quyidagilarni nazarda tutuvchi Davlat organlari va tashkilotlari tomonidan yoʻllanuvchi xat-xabarlarni yetkazib berish, yetkazilganligini tasdiqlash, maʼlumotlarni saqlash va hisobga olishning yagona milliy tizimi toʻgʻrisidagi nizom ilovaga muvofiq tasdiqlansin:
xat-xabarlarni yetkazib berish, yetkazilganligini tasdiqlash, maʼlumotlarni saqlash va hisobga olishning yagona milliy tizimi boʻyicha umumiy qoidalar;
yagona milliy tizim orqali pochta joʻnatmalarini yuborish tartibi;
yagona milliy tizim orqali pochta joʻnatmalarini yetkazish tartibi;
axborot xavfsizligini taʼminlash tartibi.
3. “Oʻzbekiston pochtasi” aksiyadorlik jamiyati Yagona milliy tizim operatori etib belgilansin.
4. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi:
bir oy muddatda Yagona milliy tizimdan foydalanilgan holda pochta joʻnatmalarini yetkazib berish nazorat muddatlarini tasdiqlasin;
doimiy ravishda pochta joʻnatmalarining xavfsizligi va yozishmalar siri taʼminlangan holda qabul qiluvchilarga belgilangan muddatlarida yetkazib berilishini nazoratga olsin.
5. Vazirliklar, idoralar, mahalliy ijro etuvchi hokimiyat organlari, boshqa davlat organlari va tashkilotlari:
Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi bilan birgalikda idoraviy axborot tizimlarini Yagona milliy tizim bilan integratsiya qilish orqali jismoniy va yuridik shaxslar nomiga pochta joʻnatmalarini ushbu tizimdan foydalanilgan holda yuborishni joriy etsin;
har yili kelgusi yil uchun xarajatlar smetasini shakllantirishda pochta joʻnatmalarini Yagona milliy tizimdan foydalangan holda yuborish uchun mablagʻlar nazarda tutilishini taʼminlasin;
yuridik va jismoniy shaxslar nomiga yoʻllanuvchi huquqiy jihatdan ahamiyatli boʻlmagan xat-xabarlarni yetkazib berish jarayonini bosqichma-bosqich toʻliq elektron shaklga oʻtkazish choralarini koʻrsin.
6. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
7. Ushbu qarorning bajarilishini nazorat qilish Oʻzbekiston Respublikasi Bosh vazirining maslahatchisi — IT-texnologiyalar, telekommunikatsiyalar va innovatsion faoliyatni rivojlantirish masalalari departamenti boshligʻi O.M. Umarov hamda Oʻzbekiston Respublikasi axborot texnologiyalari va kommunikatsiyalarini rivojlantirish vaziri Sh.M. Sadikov zimmasiga yuklansin.
Vazirlar Mahkamasining 2020-yil 9-oktabrdagi 637-son qaroriga ILOVA
Davlat organlari va tashkilotlari tomonidan yoʻllanuvchi xat-xabarlarni yetkazib berish, yetkazilganligini tasdiqlash, maʼlumotlarni saqlash va hisobga olishning yagona milliy tizimi toʻgʻrisida
1-bob. Umumiy qoidalar
1. Ushbu Nizom davlat boshqaruvi organlari, mahalliy ijro etuvchi hokimiyat organlari, davlat tashkilotlari, sud va huquqni muhofaza qiluvchi organlar (keyingi oʻrinlarda — davlat organlari va tashkilotlari) tomonidan jismoniy va yuridik shaxslar nomiga yoʻllanuvchi xat-xabarlar, xabarnomalar, chaqiruv qogʻozlari va boshqa yuridik hujjatlarni (keyingi oʻrinlarda — pochta joʻnatmalari) Yagona milliy tizimdan foydalanilgan holda pochta aloqasi obyektlari tarmogʻi orqali yetkazib berish tartibini belgilaydi.
2. Ushbu Nizom talablari davlat organlari va tashkilotlari tomonidan oʻzaro almashinuvchi, shu jumladan, “Ijro.gov.uz” ijro intizomi idoralararo yagona elektron tizimi orqali elektron almashinuvchi xat-xabarlar va hujjatlarga, sud va huquqni muhofaza qiluvchi organlarning jinoyat, maʼmuriy, fuqarolik hamda iqtisodiy ishlar, tergovga qadar tekshiruv, xizmat tekshiruvi va shu kabi toʻplangan hujjatlariga hamda davlat sirlari yoki tarqatilishi qonun bilan cheklanuvchi boshqa maʼlumotlarga ega hujjatlarga, shuningdek, xorijiy davlatlarga yoʻllanadigan pochta joʻnatmalariga, bundan tashqari yuridik va jismoniy shaxslarning oʻz xohishlariga koʻra javob xatlarini ularning elektron pochta manziliga yuborilishini soʻrab qilgan murojaatlariga nisbatan tatbiq etilmaydi.
3. Mazkur Nizomda quyidagi asosiy tushunchalar qoʻllaniladi:
pochta aloqasi bogʻlamalari — pochta yoʻnalishlarining kesishgan yoki tutashgan punktida joylashgan, biriktirilgan hududda pochta joʻnatmalarini joʻnatish va yetkazib berish (topshirish), pochtaga ishlov berish va uning almashinuvi boʻyicha oʻzaro bogʻliq vazifalar bajarilishini taʼminlovchi pochta aloqasi obyekti;
pochta aloqasi obyektlari — pochta aloqasi operatorlarining alohida boʻlinmalari (pochtamtlar, pochta aloqasi bogʻlamalari, boʻlimlari, punktlari, shuningdek, boshqa boʻlinmalar);
Yagona milliy tizim — xat-xabarlar, xabarnomalar, chaqiruv qogʻozlari va boshqa yuridik hujjatlarning elektron tarzda qabul qilinishi hamda tegishli pochta aloqasi bogʻlamasi tomonidan qogʻoz koʻrinishida chop etilib, koʻrsatilgan manzillar boʻyicha pochta aloqasi obyektlari tarmogʻi orqali yetkazib berilishini, yetkazilganligini tasdiqlashni, maʼlumotlarni saqlash va hisobga olishni taʼminlovchi axborot tizimi;
qabul qiluvchi — xat-xabarlar, xabarnomalar, chaqiruv qogʻozlari va boshqa yuridik hujjatlar yuborilgan yuridik yoki jismoniy shaxs.
4. Davlat organlari va tashkilotlari tomonidan quyidagi pochta joʻnatmalari Yagona milliy tizim orqali yoʻllanadi:
yuridik va jismoniy shaxslar nomiga yuboriluvchi xat-xabarlar, shu jumladan, ular tomonidan yoʻllangan murojaatlarga yozilgan javob xatlari;
toʻlov xabarnomalari va bildirishnomalar;
chaqiruv qogʻozlari, sud xabarnomalari va protsessual hujjatlar;
davlat xizmatlarini koʻrsatishning natijalari;
maʼmuriy huquqbuzarlik sodir etganlik uchun jarimaga tortish toʻgʻrisidagi qarorlar.
5. Yagona milliy tizimdan foydalanilgan holda pochta joʻnatmalarini yetkazib berish va tizim orqali koʻrsatiluvchi qoʻshimcha xizmatlar Yagona milliy tizim operatori tomonidan shartnoma asosida amalga oshiriladi.
2-bob. Yagona milliy tizim orqali pochta joʻnatmalarini yuborish tartibi
6. Pochta joʻnatmalarini Yagona milliy tizim orqali yetkazib berish ushbu Nizomga ilovaga muvofiq sxema boʻyicha amalga oshiriladi.
7. Davlat organlari va tashkilotlarida mavjud axborot tizimlarini, shu jumladan, elektron hujjat aylanishi tizimlarini Yagona milliy tizimga integratsiya qilish orqali pochta joʻnatmalarini yuborish amalga oshiriladi.
Yagona milliy tizim, shuningdek, “Ijro.gov.uz” ijro intizomi idoralararo yagona elektron tizimiga integratsiya qilinadi, davlat organlari va tashkilotlariga ushbu tizimdan foydalangan holda Yagona milliy tizim orqali pochta joʻnatmalarini yuborish imkoniyati yaratiladi.
8. Davlat organlari va tashkilotlarida pochta joʻnatmalarini elektron shaklda Yagona milliy tizim orqali yuborishning imkoniyati boʻlmagan hollarda ushbu davlat organlari va tashkilotlarining xohishiga koʻra pochta joʻnatmalari Yagona milliy tizim operatorining pochta aloqasi obyektlarida qogʻoz koʻrinishda qabul qilinishi mumkin. Qogʻoz koʻrinishida qabul qilingan pochta joʻnatmalari Yagona milliy tizim operatori tomonidan qoʻshimcha haq evaziga elektron shaklga oʻtkazilib Yagona milliy tizimga kiritiladi.
3-bob. Yagona milliy tizim orqali pochta joʻnatmalarini yetkazish tartibi
9. Yagona milliy tizimga elektron tarzda tushgan (oʻzaro kelishilgan formatdagi) pochta joʻnatmalarini yuklash va keyingi ishlov berish jarayonida davlat organlari va tashkilotlariga berilgan shtrix koddan foydalaniladi, shuningdek, pochta joʻnatmalari avtomatik ravishda tegishli manzillar boʻyicha pochta aloqasi bogʻlamalariga tarqatiladi.
10. Tegishli pochta aloqasi bogʻlamalariga elektron shaklda tushgan pochta joʻnatmalari qogʻoz koʻrinishida chop etilib, boshqa pochta joʻnatmalaridan farqlanib turadigan maxsus pochta konvertiga joylashtiriladi yoki konvertsiz koʻrsatilgan manzillar boʻyicha joʻnatiladi va qabul qiluvchilarga nazorat muddatlarida yetkazib beriladi.
11. Pochta joʻnatmalarini qabul qiluvchilarga topshirish qonunchilikda belgilangan talablarga muvofiq amalga oshiriladi.
12. Agar qabul qiluvchi uning nomiga keladigan pochta joʻnatmalarini elektron shaklda olish toʻgʻrisida pochta aloqasi obyektlariga yozma ravishda murojaat qilgan boʻlsa, u holda pochta joʻnatmasi elektron shaklda qabul qiluvchi tomonidan koʻrsatilgan elektron pochta manziliga yuborilishi mumkin.
13. Pochta joʻnatmalari yetkazib berilganligi yoki yetkazib berilmaganligi sabablari va boshqa maʼlumotlar tegishli pochta aloqasi bogʻlamasi tomonidan Yagona milliy tizimga muntazam ravishda kiritilib boriladi.
14. Har bir pochta joʻnatmasi toʻgʻrisidagi maʼlumot unga taqdim qilingan shtrix kod orqali Yagona milliy tizimdan onlayn kuzatib borilishi mumkin.
15. Qogʻoz koʻrinishida chop etilgan pochta joʻnatmalarini qabul qiluvchilarga yetkazib berishning imkoniyati boʻlmagan hollarda ushbu pochta joʻnatmalari pochta aloqasi bogʻlamasida olti oy davomida saqlanadi.
Saqlash muddati tugaganidan soʻng hujjatlar ularni joʻnatgan korxonalar, muassasalar va tashkilotlarning talablariga binoan qaytariladi, talab qilib olinmagan xat-xabarlar va hujjatlar tegishli dalolatnoma tuzilib, yoʻq qilinadi.
16. Davlat organlari va tashkilotlari tomonidan elektron shaklda yuborilgan pochta joʻnatmalari qachon va kimga topshirilganligi yoki topshirilmaganligi sabablari hamda pochta joʻnatmalarining elektron shakldagi maʼlumotlari Yagona milliy tizimda bir yil davomida saqlanadi.
Tizimda saqlash muddati tugaganidan soʻng ushbu pochta joʻnatmalarining elektron shakldagi maʼlumotlari dasturiy ravishda arxivlanib, belgilangan muddatda saqlash uchun idoraviy arxivga topshiriladi.
4-bob. Yagona milliy tizimda axborot xavfsizligini taʼminlash tartibi
17. Yagona milliy tizim operatori tizim orqali pochta aloqasi xizmatlarini koʻrsatishda foydalaniladigan axborot tizimlari va axborot resurslarining axborot xavfsizligini, tizimda shaxsga doir maʼlumotlar, shuningdek, pochta joʻnatmalaridagi maʼlumotlarning muhofaza qilinishini taʼminlaydi.
18. Yagona milliy tizimda saqlanadigan pochta joʻnatmalaridan faqat ularni yuborgan davlat organlari va tashkilotlarining, shuningdek, qabul qiluvchining roziligi bilan ushbu pochta joʻnatmalariga ishlov berish, ularni yuborish va olish uchun foydalaniladi, bundan qonunchilik hujjatlarida belgilangan holatlar mustasno.
5-bob. Yakunlovchi qoidalar
19. Ushbu Nizom talablarini buzganlikda aybdor boʻlgan shaxslar qonunchilik hujjatlarida belgilangan tartibda javob beradilar.
20. Ushbu Nizom bilan tartibga solingan masalalar boʻyicha paydo boʻladigan nizolar qonunchilik hujjatlarida belgilangan tartibda hal etiladi.
Davlat organlari va tashkilotlari tomonidan yoʻllanuvchi xat-xabarlarni yetkazib berish, yetkazilganligini tasdiqlash, maʼlumotlarni saqlash va hisobga olishning yagona milliy tizimi toʻgʻrisidagi nizomga ILOVA
Davlat organlari va tashkilotlari tomonidan yoʻllanadigan xat-xabarlar, xabarnomalar, chaqiruv qogʻozlari va boshqa yuridik hujjatlarni Yagona milliy tizim orqali yetkazib berish
Oʻzbekiston Respublikasining Bosh vaziri A. ARIPOV
Toshkent sh.,
2020-yil 9-oktabr,
637-son