📅 2020-yil 27-oktabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 27 октябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 27 октября 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 27 October 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Олий таълим муассасаларини нуфузли хорижий олий таълим муассасалари билан ҳамкорликда трансформация қилиш чора-тадбирлари тўғрисида
Ўзбекистон Республикаси Президентининг 2020 йил 2 мартдаги ПФ-5953-сон Фармони билан тасдиқланган 2017 — 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини «Илм, маърифат ва рақамли иқтисодиётни ривожлантириш йили»да амалга оширишга оид Давлат дастурида белгиланган вазифалар ижросини таъминлаш мақсадида Вазирлар Маҳкамаси қарор қилади:
1. Олий таълим муассасаларини нуфузли хорижий олий таълим даргоҳлари билан ҳамкорликда трансформация қилишнинг асосий йўналишлари этиб қуйидагилар белгилансин:
олий таълим жараёнини рақамли форматга ўтказиш, рақамли таълим технологияларини кенг жорий этиш асосида билимлар трансферини таъминлаш, ҳар бир таълим олувчининг шахсий хусусиятларини инобатга олган ҳолда билим, компетенция, кўникма ва малакаларни шакллантириш учун ахборот тизимларини жорий этиш;
лойиҳавий ўқитиш усулларини кенгайтириш, жаҳон миқёсидаги етакчи ташкилотлар билан ўзаро ҳамкорликка асосланган инновацион таълим муҳитини шакллантириш ҳамда инновацион тадқиқотларни ривожлантириш ва ишланмаларни амалиётга жорий этиш;
талабаларда тадбиркорлик кўникмаларини ривожлантириш, бизнес лойиҳаларни қўллаб-қувватлаш дастурларини яратиш;
олий таълим муассасасини ҳудуддаги маҳаллий жамоаларнинг таълим, илм-фан ва ижтимоий-маданий соҳаларда ривожланишини таъминлайдиган марказ сифатида шакллантириш;
ҳудуднинг ижтимоий-иқтисодий муаммолари ва вазифаларини ҳал қилиш борасида маҳаллий ижро этувчи ҳокимияти органлари ҳамда жамоат ташкилотлари билан стратегик шериклик муносабатларини мустаҳкамлаш ва ривожлантириш.
2. Ўзбекистон Республикаси Олий ва ўрта махсус таълим вазирлиги республика олий таълим муассасаларини трансформация қилиш учун:
2021 йил 1 мартга қадар 5 та олий таълим муассасасини саралаб олиш мақсадида очиқ танлов ўтказсин;
хориж тажрибасини ўрганиш асосида очиқ танлов шартлари ва уни ўтказиш тартибини икки ой муддатда ишлаб чиқсин ва тасдиқласин ҳамда кенг оммага эълон қилинишини ташкил этсин;
2021 йил 1 майга қадар танланган олий таълим муассасаларини трансформация қилиш дастурини ишлаб чиқсин ва тасдиқласин.
3. Белгилаб қўйилсинки:
а) трансформация қилинадиган олий таълим муассасалари босқичма-босқич ўзини ўзи молиялаштириш тизимига ўтказилади;
б) 2021/2022 ўқув йилидан бошлаб тажриба-синов тариқасида трансформация қилинадиган олий таълим муассасаларида:
бакалавриат таълим йўналишлари ва магистратура мутахассисликларига тўлов-контракт асосидаги қабул параметрлари уларнинг ўзлари томонидан белгиланади ҳамда Ўзбекистон Республикаси таълим муассасаларига ўқишга қабул қилиш бўйича давлат комиссияси билан келишилган ҳолда илғор халқаро амалиётлардан келиб чиқиб бакалавриатга кириш имтиҳонлари адолатли ва шаффоф тарзда мустақил ўтказилади;
ҳамкор сифатида бириктирилган нуфузли хорижий олий таълим муассасалари билан келишув асосида таълим жараёнига уларнинг профессор-ўқитувчилари жалб қилинади ва чет тилларида ўқитиладиган фанлар босқичма-босқич киритиб борилади.
Бунда, олий таълим муассасаларини трансформация қилиш дастури доирасида ҳамкорлик қилиниши режалаштирилган хорижий олий таълим муассасалари, жалб қилинадиган хорижий мутахассислар номзодлари ва жорий этиладиган ўқув-меъёрий ҳужжатлар белгиланган тартибда тизимида олий таълим муассасалари бўлган вазирлик ва идоралар билан келишилади.
4. Ўзбекистон Республикаси Олий ва ўрта махсус таълим вазирлиги 2021/2022 ўқув йилидан бошлаб трансформация қилиш учун танлаб олинган олий таълим муассасаларига кенг академик мустақиллик бериш чораларини кўрсин.
5. Қуйидагилар олий таълим муассасаларини трансформация қилишни молиялаштириш манбалари этиб белгилансин:
олий таълим муассасаларининг бюджетдан ташқари маблағлари;
Ўзбекистон Республикаси Олий ва ўрта махсус таълим вазирлигининг Олий таълим муассасаларини ривожлантириш жамғармаси маблағлари;
халқаро молия институтларининг грантлари;
қонунчилик ҳужжатлари билан тақиқланмаган бошқа манбалар.
6. Ўзбекистон Республикаси Олий ва ўрта махсус таълим вазирлиги олий таълим муассасаларини трансформация қилиш доирасида Инвестициялар ва ташқи савдо вазирлиги билан биргаликда халқаро молия институтларининг тегишли грантларини жалб қилиш чораларини кўрсин.
7. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари Б.А. Мусаев ҳамда Ўзбекистон Республикаси олий ва ўрта махсус таълим вазири И.У. Маджидов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2020 йил 27 октябрь,
655-сон
Oʻzbekiston Respublikasi Vazirlar Mahkamasining
qarori
Oliy taʼlim muassasalarini nufuzli xorijiy oliy taʼlim muassasalari bilan hamkorlikda transformatsiya qilish chora-tadbirlari toʻgʻrisida
Oʻzbekiston Respublikasi Prezidentining 2020-yil 2-martdagi PF-5953-son Farmoni bilan tasdiqlangan 2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Ilm, maʼrifat va raqamli iqtisodiyotni rivojlantirish yili”da amalga oshirishga oid Davlat dasturida belgilangan vazifalar ijrosini taʼminlash maqsadida Vazirlar Mahkamasi qaror qiladi:
1. Oliy taʼlim muassasalarini nufuzli xorijiy oliy taʼlim dargohlari bilan hamkorlikda transformatsiya qilishning asosiy yoʻnalishlari etib quyidagilar belgilansin:
oliy taʼlim jarayonini raqamli formatga oʻtkazish, raqamli taʼlim texnologiyalarini keng joriy etish asosida bilimlar transferini taʼminlash, har bir taʼlim oluvchining shaxsiy xususiyatlarini inobatga olgan holda bilim, kompetensiya, koʻnikma va malakalarni shakllantirish uchun axborot tizimlarini joriy etish;
loyihaviy oʻqitish usullarini kengaytirish, jahon miqyosidagi yetakchi tashkilotlar bilan oʻzaro hamkorlikka asoslangan innovatsion taʼlim muhitini shakllantirish hamda innovatsion tadqiqotlarni rivojlantirish va ishlanmalarni amaliyotga joriy etish;
talabalarda tadbirkorlik koʻnikmalarini rivojlantirish, biznes loyihalarni qoʻllab-quvvatlash dasturlarini yaratish;
oliy taʼlim muassasasini hududdagi mahalliy jamoalarning taʼlim, ilm-fan va ijtimoiy-madaniy sohalarda rivojlanishini taʼminlaydigan markaz sifatida shakllantirish;
hududning ijtimoiy-iqtisodiy muammolari va vazifalarini hal qilish borasida mahalliy ijro etuvchi hokimiyati organlari hamda jamoat tashkilotlari bilan strategik sheriklik munosabatlarini mustahkamlash va rivojlantirish.
2. Oʻzbekiston Respublikasi Oliy va oʻrta maxsus taʼlim vazirligi respublika oliy taʼlim muassasalarini transformatsiya qilish uchun:
2021-yil 1-martga qadar 5 ta oliy taʼlim muassasasini saralab olish maqsadida ochiq tanlov oʻtkazsin;
xorij tajribasini oʻrganish asosida ochiq tanlov shartlari va uni oʻtkazish tartibini ikki oy muddatda ishlab chiqsin va tasdiqlasin hamda keng ommaga eʼlon qilinishini tashkil etsin;
2021-yil 1-mayga qadar tanlangan oliy taʼlim muassasalarini transformatsiya qilish dasturini ishlab chiqsin va tasdiqlasin.
3. Belgilab qoʻyilsinki:
a) transformatsiya qilinadigan oliy taʼlim muassasalari bosqichma-bosqich oʻzini oʻzi moliyalashtirish tizimiga oʻtkaziladi;
b) 2021/2022 oʻquv yilidan boshlab tajriba-sinov tariqasida transformatsiya qilinadigan oliy taʼlim muassasalarida:
bakalavriat taʼlim yoʻnalishlari va magistratura mutaxassisliklariga toʻlov-kontrakt asosidagi qabul parametrlari ularning oʻzlari tomonidan belgilanadi hamda Oʻzbekiston Respublikasi taʼlim muassasalariga oʻqishga qabul qilish boʻyicha davlat komissiyasi bilan kelishilgan holda ilgʻor xalqaro amaliyotlardan kelib chiqib bakalavriatga kirish imtihonlari adolatli va shaffof tarzda mustaqil oʻtkaziladi;
hamkor sifatida biriktirilgan nufuzli xorijiy oliy taʼlim muassasalari bilan kelishuv asosida taʼlim jarayoniga ularning professor-oʻqituvchilari jalb qilinadi va chet tillarida oʻqitiladigan fanlar bosqichma-bosqich kiritib boriladi.
Bunda, oliy taʼlim muassasalarini transformatsiya qilish dasturi doirasida hamkorlik qilinishi rejalashtirilgan xorijiy oliy taʼlim muassasalari, jalb qilinadigan xorijiy mutaxassislar nomzodlari va joriy etiladigan oʻquv-meʼyoriy hujjatlar belgilangan tartibda tizimida oliy taʼlim muassasalari boʻlgan vazirlik va idoralar bilan kelishiladi.
4. Oʻzbekiston Respublikasi Oliy va oʻrta maxsus taʼlim vazirligi 2021/2022 oʻquv yilidan boshlab transformatsiya qilish uchun tanlab olingan oliy taʼlim muassasalariga keng akademik mustaqillik berish choralarini koʻrsin.
5. Quyidagilar oliy taʼlim muassasalarini transformatsiya qilishni moliyalashtirish manbalari etib belgilansin:
oliy taʼlim muassasalarining budjetdan tashqari mablagʻlari;
Oʻzbekiston Respublikasi Oliy va oʻrta maxsus taʼlim vazirligining Oliy taʼlim muassasalarini rivojlantirish jamgʻarmasi mablagʻlari;
xalqaro moliya institutlarining grantlari;
qonunchilik hujjatlari bilan taqiqlanmagan boshqa manbalar.
6. Oʻzbekiston Respublikasi Oliy va oʻrta maxsus taʼlim vazirligi oliy taʼlim muassasalarini transformatsiya qilish doirasida Investitsiyalar va tashqi savdo vazirligi bilan birgalikda xalqaro moliya institutlarining tegishli grantlarini jalb qilish choralarini koʻrsin.
7. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A. Musayev hamda Oʻzbekiston Respublikasi oliy va oʻrta maxsus taʼlim vaziri I.U. Madjidov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 27-oktabr,
655-son