📅 2020-yil 30-oktabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 30 октябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 30 октября 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 30 October 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
СХЕМАСИ
Ўзбекистон Республикаси Президентининг Муҳаммад Ал-Хоразмий номидаги халқаро мукофоти билан тақдирлаш тартиби тўғрисидаги низомни тасдиқлаш ҳақида
Ўзбекистон Республикаси Президентининг «Математика соҳасидаги таълим сифатини ошириш ва илмий-тадқиқотларни ривожлантириш чора-тадбирлари тўғрисида» 2020 йил 7 майдаги ПҚ-4708-сон қарори ижросини таъминлаш мақсадида Вазирлар Маҳкамаси қарор қилади:
1. Ўзбекистон Республикаси Президентининг «Математика соҳасидаги таълим сифатини ошириш ва илмий-тадқиқотларни ривожлантириш чора-тадбирлари тўғрисида» 2020 йил 7 майдаги ПҚ-4708-сон қарори 14-бандига мувофиқ математика соҳасидаги фундаментал ва амалий илмий изланишлари натижаларига кўра амалиётдаги муайян муаммонинг ечимини таклиф этган олимларни мукофотлаш мақсадида Ўзбекистон Республикаси Президентининг Муҳаммад Ал-Хоразмий номидаги халқаро мукофоти таъсис этилганлиги маълумот учун қабул қилинсин.
2. Ўзбекистон Республикаси Президентининг Муҳаммад Ал-Хоразмий номидаги халқаро мукофоти билан тақдирлаш тартиби тўғрисида низом иловага мувофиқ тасдиқлансин.
3. Ўзбекистон Республикаси Инновацион ривожланиш вазирлиги бошқа манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни ушбу қарорга мувофиқлаштирсин.
4. Мазкур қарорнинг бажарилишини назорат қилиш Ўзбекистон Республикаси Бош вазирининг маслаҳатчиси — IТ-технологиялар, телекоммуникациялар ва инновацион фаолиятни ривожлантириш масалалари департаменти бошлиғи О.М. Умаров ҳамда Ўзбекистон Республикаси инновацион ривожланиш вазири И.Ю. Абдураҳмонов зиммасига юклансин.
Вазирлар Маҳкамасининг 2020 йил 30 октябрдаги 676-сон қарорига ИЛОВА
Ўзбекистон Республикаси Президентининг Муҳаммад Ал-Хоразмий номидаги халқаро мукофоти билан тақдирлаш тартиби тўғрисида
1-боб. Умумий қоидалар
1. Мазкур Низом Ўзбекистон Республикаси Президентининг Муҳаммад Ал-Хоразмий номидаги халқаро мукофоти (кейинги ўринларда — мукофот) билан тақдирлаш бўйича таклифларни тайёрлаш ва тақдирлаш тартибини белгилайди.
2. Мукофот билан математика соҳасида фундаментал ва амалий илмий изланишлар натижаларига кўра амалиётдаги муайян муаммонинг ечимини таклиф этган олимлар (шу жумладан, чет эл фуқаролари ва фуқаролиги бўлмаган шахслар) якка тартибда тақдирланади.
3. Ушбу Низомда куйидаги асосий тушунчалар қўлланилади:
кузатув — муайян мақсадда турли манбаларда эълон қилинган маълумотларни излаш, қайд қилиш ва тўплашга қаратилган ташкилий чора-тадбир;
илмий натижа — ахборот ресурсларида эълон қилинган ва қайд этилган илмий-тадқиқот ёки инновацион фаолиятнинг маҳсули;
илмий ютуқ — янги билим ёки муайян ечимни ифодаловчи интеллектуал фаолият натижаси;
эксперт баҳолаш — илмий натижа ва илмий ютуқларни алоҳида эксперт ёки экспертлар гуруҳининг жамоавий хулосаси асосида баҳолаш усули.
4. Мукофот билан тақдирлаш бир шахсга математика соҳасидаги бир ёки бир нечта ютуқлари учун амалга оширилиши мумкин.
5. Мукофот икки йилда бир марта Ўзбекистон Республикаси Президенти томонидан Фан ва технологиялар бўйича республика кенгашининг (кейинги ўринларда — Кенгаш) таклифига кўра учга йўналиш (фундаментал соҳадаги тадқиқот, ёшлар ўртасидаги тадқиқот ва иқтисодиётнинг реал секторидаги муаммонинг ечимини таъминлаган тадқиқот) бўйича берилади.
6. Мукофот билан тақдирлаш учун номзодлар бўйича таклифлар Ўзбекистон математика жамияти (кейинги ўринларда — Математика жамияти) томонидан ўтказиладиган доимий кузатувлар асосида шакллантирилади ва Ўзбекистон Республикаси Инновацион ривожланиш вазирлигига (кейинги ўринларда — Вазирлик) тақдим этилади.
7. Вазирлик Математика жамиятининг таклифлари асосида номзодлар бўйича тавсияномаларни тайёрлайди ва Кенгашга кўриб чиқиш учун киритади.
8. Мукофот билан тақдирлаш тартиби ушбу Низом иловасида келтирилган схемага мувофиқ амалга оширилади.
2-боб. Математика соҳасидаги ютуқларни аниқлаш учун кузатувларни ўтказиш
9. Математика соҳасидаги ютуқларни аниқлаш ва мукофот билан тақдирланадиган номзодларнинг дастлабки рўйхатини тайёрлаш учун Математика жамиятида доимий асосда фаолият олиб борувчи Ўзбекистон Республикаси Президентининг Муҳаммад ал-Хоразмий номидаги халқаро мукофотига номзодлар бўйича таклифларни тайёрлаш қўмитаси (кейинги ўринларда — Қўмита) тузилади.
10. Қўмита Математика жамиятига аъзо бўлган экспертлардан иборат таркибда тузилади ва Математика жамиятининг умумий йиғилиши қарори билан тасдиқланади, Қўмита раиси, унинг ўринбосари ва котиби тайинланади.
Қўмита таркибига Математика жамияти аъзо си бўлган математика соҳасидаги етакчи хорижий мутахассислар жалб этилиши мумкин.
11. Математика соҳасидаги илмий ютуқларни аниқлаш учун ўтказиладиган кузатувларда:
а) фундаментал соҳадаги тадқиқотлар бўйича:
илмий нашрлар жамланган ахборот ресурслари, жумладан, умумэътироф этилган индексацияланган маълумотлар базаларидаги журналларда;
даврий чоп этиладиган илмий ва илмий-оммабоп журналларда;
ёшлар ўртасидаги тадқиқот бўйича:
илмий нашрлар жамланган ахборот ресурслари, жумладан, умумэътироф этилган индексацияланган маълумотлар базаларида;
даврий чоп этиладиган илмий ва илмий-оммабоп журналларда;
ёшларнинг илмий таклиф ва тавсиялари тўғрисида Интернет жаҳон ахборот тармоғида;
б) иқтисодиётнинг реал секторидаги муаммонинг ечимини таъминлаган тадқиқотлар бўйича:
илмий нашрлар жамланган ахборот ресурслари, жумладан, умумэътироф этилган индексацияланган маълумотлар базаларидаги журналларда;
даврий чоп этиладиган илмий ва илмий-оммабоп журналларда;
иқтисодиётнинг реал секторидаги муайяан муаммонинг ечимини таъминлагани тўғрисида Интернет жаҳон ахборот тармоғида эълон қилинган илмий натижалар кўриб чиқилади.
12. Мукофот билан тақдирлашда қуйидаги ишлар кўриб чиқилмайди:
аввал мукофот билан тақдирланганлар;
аввал кўриб чиқилган, бироқ Кенгаш томонидан мукофот билан тақдирлаш учун тавсия этилмаган илмий ютуқлар;
манфаатдор ташкилотлар ёки жисмоний шахслар томонидан мукофот билан тақдирлаш учун илгари сурилган номзодлар бўйича мурожаатлар.
13. Кузатув натижаларига кўра аниқланган тегишли илмий ютуқлар бўйича Қўмита аъзолари томонидан эксперт баҳолаш асосида хулосалар тайёрланади.
14. Мукофот топшириладиган йилнинг март ойига қадар Қўмита тайёрланган барча хулосаларни жамлайди ва Қўмита йиғилишида муҳокама қилади.
15. Математика соҳасидаги ютуқларни аниқлаш учун ўтказилган кузатув натижалари ва мукофот билан тақдирлашга таклиф этилиши мумкин бўлган номзодлар рўйхати Қўмита йиғилиши баёни билан расмийлаштирилади ва Математика жамиятининг умумий йиғилишида кўриб чиқиш учун киритилади.
16. Математика жамияти номзодларни аниқлаш бўйича ўтказилган кузатувчинг холислигини ва номзодлар бўйича тайёрланган таклифларда манфаатдор ташкилот ёки жисмоний шахсларнинг аралашувига йўл қўйилмаслигини таъминлайди.
3-боб. Мукофот билан тақдирлаш учун номзодлар бўйича тавсияномаларни тайёрлаш
17. Мукофот билан тақдирлаш учун номзодлар бўйича таклифлар Математика жамиятининг умумий йиғилиши баёни билан тасдиқланган Ўзбекистон Республикаси Президентининг Муҳаммад Ал-Хоразмий номидаги халқаро мукофоти билан тақдирлаш учун таклиф этиладиган номзодлар рўйхати (кейинги ўринларда — номзодлар рўйхати) шаклида расмийлаштирилади.
18. Математика жамияти мукофот топшириладиган йилнинг апрель ойига қадар мукофот билан тақдирлаш учун номзодларга оид таклифларни куйидаги ҳужжатлар билан Вазирликка киритади:
йўлланма хат;
номзодлар рўйхати;
Қўмита йиғилиши баёнининг нусхаси;
Математика жамиятининг умумий йиғилиши баёнидан кўчирма;
ҳар бир номзод тўғрисида маълумотнома;
номзодларнинг тегишли йўналиш бўйича илмий ютуқлари тўғрисида маълумот.
19. Вазирлик бир ой муддатда номзодлар рўйхати ва уларга оид ҳужжатларни қуйидагиларга мувофиқлигини ўрганади:
номзодларни аниқлаш бўйича ўтказилган кузатув натижалари ва тайёрланган таклифларнинг Низом талабларига мувофиқ тайёрлангани;
илмий ютуқларни акс этувчи илмий натижалар эълон қилинган манбаларнинг ҳаққонийлиги;
илмий ютуқлар ва номзодлар бўйича таклифлар тегишли йўналишлар бўйича такрорланмаганлиги, аввал бошқа йўналишлар бўйича Мукофотга тақдим этилмаганлиги.
20. Мукофот билан тақдирлаш учун номзодлар бўйича тавсиянома ҳар бир йўналиш ва номзод бўйича алоҳида расмийлаштирилади.
21. Математика жамияти томонидан тақдим этилган ҳужжатлар белгиланган талабларга жавоб бермаган тақдирда, Вазирлик тегишли номзодлар бўйича ҳужжатларни тузатиб бериш ёки тегишли йўналишлар бўйича бошқа номзодларни киритишни сўраб мурожаат қилади.
22. Кузатув натижаларини, номзодлар бўйича таклифлар ва тавсияномаларни расмийлаштириш қоидалари Кенгаш томонидан белгиланади.
23. Вазирлик мукофот топшириладиган йилнинг июнь ойи якунига қадар мукофот билан тақдирлаш учун номзодлар бўйича тавсияномалар ва номзодларнинг илмий ютуқларига оид ҳужжатларни Вазирликнинг расмий бланкдаги хати билан кўриб чиқиш учун Кенгашга киритади.
4-боб. Мукофот билан тақдирлашга номзодлар бўйича тавсияномаларни кўриб чиқиш ва таклифларни тайёрлаш
24. Мукофот билан тақдирланадиганлар бўйича Кенгашнинг таклифи Ўзбекистон Республикаси Президентининг Муҳаммад Ал-Хоразмий номидаги халқаро мукофотига номзодлар бўйича тақдимнома (кейинги ўринларда — тақдимнома) шаклида расмийлаштирилади.
25. Кенгаш йиғилишидан икки ҳафта олдин Мукофот билан тақдирлашга тавсия этилаётган номзодлар ва уларнинг илмий ютоқларига оид ҳужжатлар Кенгаш аъзоларига тақдим этилади.
Кенгаш аъзолари томонидан Мукофотга тавсия этилган номзоднинг иши кўриб чиқилаётган Кенгаш йиғилишида унинг муаллифи иштирок этмаслиги лозим ҳамда Кенгаш қарори ва ушбу масала билан боғлиқ бошқа материаллар билан танишиш ҳуқуқига эга эмас.
26. Мукофотга тавсия этиш тўғрисидаги қарор Кенгаш мажлисида очиқ овоз бериш йўли билан қабул қилинади.
Мажлисда қатнашаётган Кенгаш аъзоларининг учдан икки қисмининг овозини олган номзод бўйича тақдимнома тайёрланиши мумкин.
27. Мукофотга номзодларни кўриб чиқиш натижалари Кенгаш баённомаси билан расмийлаштирилади.
28. Кенгаш баённомасига номзодларнинг рўйхати ва ишларининг қисқача тавсифи тегишли илова билан тасдиқланади, унинг асосида тақдимнома тайёрланади.
29. Тақдимнома Кенгаш раиси имзоси билан мукофот бериладиган йилнинг 25 августидан кечикмасдан Ўзбекистон Республикаси Президенти Администрациясига юборилади.
5-боб. Мукофотни топшириш
30. Тақдимнома маьқулланган тақдирда Мукофотга сазовор бўлганларга 50 минг АҚШ доллари эквивалентидаги бир марталик пул мукофоти тантанали равишда топширилади.
31. Мукофот совриндорига пул мукофотини тўлаш билан боғлик харажатларни молиялаштириш Ўзбекистон Республикасининг республика бюджетидан биринчи даражали бюджет маблағларини тақсимловчи сифатида Вазирликка ажратиладиган маблағлар доирасида амалга оширилади.
32. Мукофотга сазовор бўлган шахсларга Математика жамияти томонидан ўтказиладиган тадбирларда иштирок этиш, Ўзбекистонлик олимлар билан ҳамкорликда илмий ишлар олиб бориш ҳамда математика соҳасида қилган илмий-тадқиқотлари натижаларини, жумладан, мукофот топширилган ишлари натижаларини Ўзбекистонда қўллаш тавсия этилади.
33. Мукофотга сазовор бўлганлар ҳақида маълумотлар республика матбуот нашрлари ва оммавий ахборот воситаларида, жумладан, хорижий ахборот воситаларида эълон қилинади.
6-боб. Якунловчи қоидалар
34. Мукофот билан тақдирлаш учун тақдим этилган номзодлар бўйича материаллар белгиланган тартибда ҳисобга олинади, сақланади ва қайтарилмайди.
35. Ушбу Низом талаблари бузилишида айбдор шахслар қонунчилик ҳужжатларида белгиланган тартибда жавоб берадилар.
Ўзбекистон Республикаси Президентининг Муҳаммад Ал-Хоразмий номидаги халқаро мукофоти билан тақдирлаш тартиби тўғрисидаги низомга ИЛОВА
Ўзбекистон Республикаси Президентининг Муҳаммад Ал-Хоразмий номидаги халқаро мукофоти билан тақдирлаш
Босқичлар Масъуллар Амалга ошириш механизмлари Муддатлари 1-босқич Математика жамияти Математика соҳасидаги илмий ютуқларни аниқлаш учун кузатувлар ўтказиш. Доимий 2-босқич Математика жамияти 1. Хулосаларни жамлаш ва муҳокама қилиш. 2. Мукофотга номзодларнинг дастлабки рўйхатини шакллантириш. 3. Жамиятнинг умумий йиғилишида кўриб чиқиш учун киритиш. Мукофот топшириладиган йилнинг март ойига қадар 3-босқич Математика жамияти 1. Номзодлар рўйхатини кўриб чиқиш ва тасдиқлаш. 2. Номзодлар бўйича таклифлар ва уларга оид ҳужжатларни Инновацион ривожланиш вазирлигига юбориш. Мукофот топшириладиган йилнинг март ойига қадар 4-босқич Инновацион ривожланиш вазирлиги 1. Номзодлар рўйхати ва уларга оид ҳужжатларни ўрганиш. 2. Номзодлар бўйича тавсияномалар ва номзод ҳамда илмий ютуқларга оид ҳужжатларни Вазирлар Маҳкамасига Фан ва технологиялар бўйича республика кенгашида кўриб чиқиш учун киритиш. 1 ой муддатда Мукофот топшириладиган йилнинг июнь ойи 5-босқич Фан ва технологиялар бўйича республика кенгаши 1. Номзодлар бўйича таклифлар, тавсияномалар ва уларга оид ҳужжатларни қўриб чиқиш. 2. Номзодлар бўйича тақдимномани тайёрлаш ва Ўзбекистон Республикаси Президенти Администрациясига юбориш. 1 ой муддатда Мукофот бериладиган йилнинг 25 августига қадар 6-босқич Белгиланган масъуллар, Инновацион ривожланиш вазирлиги 1. Тақдимнома маъқулланган тақдирда Мукофотга сазовор бўлганларга 50минг АҚШ доллари эквивалентидаги бир марталик пул мукофоти тантанали равишда топширилади. 2. Совриндорга пул мукофотини тўлаш билан боғлиқ харажатлар Давлат бюджетидан Инновацион ривожланиш вазирлигига ажратиладиган маблағлар ҳисобидан қопланади. Белгиланган муддатларда
Ўзбекистон Республикасининг Бош вазири А. АРИПОВ
Тошкент ш.,
2020 йил 30 октябрь,
676-сон
Oʻzbekiston Respublikasi Vazirlar Mahkamasining
qarori
NIZOM
SXEMASI
Oʻzbekiston Respublikasi Prezidentining Muhammad Al-Xorazmiy nomidagi xalqaro mukofoti bilan taqdirlash tartibi toʻgʻrisidagi nizomni tasdiqlash haqida
Oʻzbekiston Respublikasi Prezidentining “Matematika sohasidagi taʼlim sifatini oshirish va ilmiy-tadqiqotlarni rivojlantirish chora-tadbirlari toʻgʻrisida” 2020-yil 7-maydagi PQ-4708-son qarori ijrosini taʼminlash maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining “Matematika sohasidagi taʼlim sifatini oshirish va ilmiy-tadqiqotlarni rivojlantirish chora-tadbirlari toʻgʻrisida” 2020-yil 7-maydagi PQ-4708-son qarori 14-bandiga muvofiq matematika sohasidagi fundamental va amaliy ilmiy izlanishlari natijalariga koʻra amaliyotdagi muayyan muammoning yechimini taklif etgan olimlarni mukofotlash maqsadida Oʻzbekiston Respublikasi Prezidentining Muhammad Al-Xorazmiy nomidagi xalqaro mukofoti taʼsis etilganligi maʼlumot uchun qabul qilinsin.
2. Oʻzbekiston Respublikasi Prezidentining Muhammad Al-Xorazmiy nomidagi xalqaro mukofoti bilan taqdirlash tartibi toʻgʻrisida nizom ilovaga muvofiq tasdiqlansin.
3. Oʻzbekiston Respublikasi Innovatsion rivojlanish vazirligi boshqa manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ushbu qarorga muvofiqlashtirsin.
4. Mazkur qarorning bajarilishini nazorat qilish Oʻzbekiston Respublikasi Bosh vazirining maslahatchisi — IT-texnologiyalar, telekommunikatsiyalar va innovatsion faoliyatni rivojlantirish masalalari departamenti boshligʻi O.M. Umarov hamda Oʻzbekiston Respublikasi innovatsion rivojlanish vaziri I.Yu. Abdurahmonov zimmasiga yuklansin.
Vazirlar Mahkamasining 2020-yil 30-oktabrdagi 676-son qaroriga ILOVA
Oʻzbekiston Respublikasi Prezidentining Muhammad Al-Xorazmiy nomidagi xalqaro mukofoti bilan taqdirlash tartibi toʻgʻrisida
1-bob. Umumiy qoidalar
1. Mazkur Nizom Oʻzbekiston Respublikasi Prezidentining Muhammad Al-Xorazmiy nomidagi xalqaro mukofoti (keyingi oʻrinlarda — mukofot) bilan taqdirlash boʻyicha takliflarni tayyorlash va taqdirlash tartibini belgilaydi.
2. Mukofot bilan matematika sohasida fundamental va amaliy ilmiy izlanishlar natijalariga koʻra amaliyotdagi muayyan muammoning yechimini taklif etgan olimlar (shu jumladan, chet el fuqarolari va fuqaroligi boʻlmagan shaxslar) yakka tartibda taqdirlanadi.
3. Ushbu Nizomda kuyidagi asosiy tushunchalar qoʻllaniladi:
kuzatuv — muayyan maqsadda turli manbalarda eʼlon qilingan maʼlumotlarni izlash, qayd qilish va toʻplashga qaratilgan tashkiliy chora-tadbir;
ilmiy natija — axborot resurslarida eʼlon qilingan va qayd etilgan ilmiy-tadqiqot yoki innovatsion faoliyatning mahsuli;
ilmiy yutuq — yangi bilim yoki muayyan yechimni ifodalovchi intellektual faoliyat natijasi;
ekspert baholash — ilmiy natija va ilmiy yutuqlarni alohida ekspert yoki ekspertlar guruhining jamoaviy xulosasi asosida baholash usuli.
4. Mukofot bilan taqdirlash bir shaxsga matematika sohasidagi bir yoki bir nechta yutuqlari uchun amalga oshirilishi mumkin.
5. Mukofot ikki yilda bir marta Oʻzbekiston Respublikasi Prezidenti tomonidan Fan va texnologiyalar boʻyicha respublika kengashining (keyingi oʻrinlarda — Kengash) taklifiga koʻra uchga yoʻnalish (fundamental sohadagi tadqiqot, yoshlar oʻrtasidagi tadqiqot va iqtisodiyotning real sektoridagi muammoning yechimini taʼminlagan tadqiqot) boʻyicha beriladi.
6. Mukofot bilan taqdirlash uchun nomzodlar boʻyicha takliflar Oʻzbekiston matematika jamiyati (keyingi oʻrinlarda — Matematika jamiyati) tomonidan oʻtkaziladigan doimiy kuzatuvlar asosida shakllantiriladi va Oʻzbekiston Respublikasi Innovatsion rivojlanish vazirligiga (keyingi oʻrinlarda — Vazirlik) taqdim etiladi.
7. Vazirlik Matematika jamiyatining takliflari asosida nomzodlar boʻyicha tavsiyanomalarni tayyorlaydi va Kengashga koʻrib chiqish uchun kiritadi.
8. Mukofot bilan taqdirlash tartibi ushbu Nizom ilovasida keltirilgan sxemaga muvofiq amalga oshiriladi.
2-bob. Matematika sohasidagi yutuqlarni aniqlash uchun kuzatuvlarni oʻtkazish
9. Matematika sohasidagi yutuqlarni aniqlash va mukofot bilan taqdirlanadigan nomzodlarning dastlabki roʻyxatini tayyorlash uchun Matematika jamiyatida doimiy asosda faoliyat olib boruvchi Oʻzbekiston Respublikasi Prezidentining Muhammad al-Xorazmiy nomidagi xalqaro mukofotiga nomzodlar boʻyicha takliflarni tayyorlash qoʻmitasi (keyingi oʻrinlarda — Qoʻmita) tuziladi.
10. Qoʻmita Matematika jamiyatiga aʼzo boʻlgan ekspertlardan iborat tarkibda tuziladi va Matematika jamiyatining umumiy yigʻilishi qarori bilan tasdiqlanadi, Qoʻmita raisi, uning oʻrinbosari va kotibi tayinlanadi.
Qoʻmita tarkibiga Matematika jamiyati aʼzo si boʻlgan matematika sohasidagi yetakchi xorijiy mutaxassislar jalb etilishi mumkin.
11. Matematika sohasidagi ilmiy yutuqlarni aniqlash uchun oʻtkaziladigan kuzatuvlarda:
a) fundamental sohadagi tadqiqotlar boʻyicha:
ilmiy nashrlar jamlangan axborot resurslari, jumladan, umumeʼtirof etilgan indeksatsiyalangan maʼlumotlar bazalaridagi jurnallarda;
davriy chop etiladigan ilmiy va ilmiy-ommabop jurnallarda;
yoshlar oʻrtasidagi tadqiqot boʻyicha:
ilmiy nashrlar jamlangan axborot resurslari, jumladan, umumeʼtirof etilgan indeksatsiyalangan maʼlumotlar bazalarida;
davriy chop etiladigan ilmiy va ilmiy-ommabop jurnallarda;
yoshlarning ilmiy taklif va tavsiyalari toʻgʻrisida Internet jahon axborot tarmogʻida;
b) iqtisodiyotning real sektoridagi muammoning yechimini taʼminlagan tadqiqotlar boʻyicha:
ilmiy nashrlar jamlangan axborot resurslari, jumladan, umumeʼtirof etilgan indeksatsiyalangan maʼlumotlar bazalaridagi jurnallarda;
davriy chop etiladigan ilmiy va ilmiy-ommabop jurnallarda;
iqtisodiyotning real sektoridagi muayyaan muammoning yechimini taʼminlagani toʻgʻrisida Internet jahon axborot tarmogʻida eʼlon qilingan ilmiy natijalar koʻrib chiqiladi.
12. Mukofot bilan taqdirlashda quyidagi ishlar koʻrib chiqilmaydi:
avval mukofot bilan taqdirlanganlar;
avval koʻrib chiqilgan, biroq Kengash tomonidan mukofot bilan taqdirlash uchun tavsiya etilmagan ilmiy yutuqlar;
manfaatdor tashkilotlar yoki jismoniy shaxslar tomonidan mukofot bilan taqdirlash uchun ilgari surilgan nomzodlar boʻyicha murojaatlar.
13. Kuzatuv natijalariga koʻra aniqlangan tegishli ilmiy yutuqlar boʻyicha Qoʻmita aʼzolari tomonidan ekspert baholash asosida xulosalar tayyorlanadi.
14. Mukofot topshiriladigan yilning mart oyiga qadar Qoʻmita tayyorlangan barcha xulosalarni jamlaydi va Qoʻmita yigʻilishida muhokama qiladi.
15. Matematika sohasidagi yutuqlarni aniqlash uchun oʻtkazilgan kuzatuv natijalari va mukofot bilan taqdirlashga taklif etilishi mumkin boʻlgan nomzodlar roʻyxati Qoʻmita yigʻilishi bayoni bilan rasmiylashtiriladi va Matematika jamiyatining umumiy yigʻilishida koʻrib chiqish uchun kiritiladi.
16. Matematika jamiyati nomzodlarni aniqlash boʻyicha oʻtkazilgan kuzatuvching xolisligini va nomzodlar boʻyicha tayyorlangan takliflarda manfaatdor tashkilot yoki jismoniy shaxslarning aralashuviga yoʻl qoʻyilmasligini taʼminlaydi.
3-bob. Mukofot bilan taqdirlash uchun nomzodlar boʻyicha tavsiyanomalarni tayyorlash
17. Mukofot bilan taqdirlash uchun nomzodlar boʻyicha takliflar Matematika jamiyatining umumiy yigʻilishi bayoni bilan tasdiqlangan Oʻzbekiston Respublikasi Prezidentining Muhammad Al-Xorazmiy nomidagi xalqaro mukofoti bilan taqdirlash uchun taklif etiladigan nomzodlar roʻyxati (keyingi oʻrinlarda — nomzodlar roʻyxati) shaklida rasmiylashtiriladi.
18. Matematika jamiyati mukofot topshiriladigan yilning aprel oyiga qadar mukofot bilan taqdirlash uchun nomzodlarga oid takliflarni kuyidagi hujjatlar bilan Vazirlikka kiritadi:
yoʻllanma xat;
nomzodlar roʻyxati;
Qoʻmita yigʻilishi bayonining nusxasi;
Matematika jamiyatining umumiy yigʻilishi bayonidan koʻchirma;
har bir nomzod toʻgʻrisida maʼlumotnoma;
nomzodlarning tegishli yoʻnalish boʻyicha ilmiy yutuqlari toʻgʻrisida maʼlumot.
19. Vazirlik bir oy muddatda nomzodlar roʻyxati va ularga oid hujjatlarni quyidagilarga muvofiqligini oʻrganadi:
nomzodlarni aniqlash boʻyicha oʻtkazilgan kuzatuv natijalari va tayyorlangan takliflarning Nizom talablariga muvofiq tayyorlangani;
ilmiy yutuqlarni aks etuvchi ilmiy natijalar eʼlon qilingan manbalarning haqqoniyligi;
ilmiy yutuqlar va nomzodlar boʻyicha takliflar tegishli yoʻnalishlar boʻyicha takrorlanmaganligi, avval boshqa yoʻnalishlar boʻyicha Mukofotga taqdim etilmaganligi.
20. Mukofot bilan taqdirlash uchun nomzodlar boʻyicha tavsiyanoma har bir yoʻnalish va nomzod boʻyicha alohida rasmiylashtiriladi.
21. Matematika jamiyati tomonidan taqdim etilgan hujjatlar belgilangan talablarga javob bermagan taqdirda, Vazirlik tegishli nomzodlar boʻyicha hujjatlarni tuzatib berish yoki tegishli yoʻnalishlar boʻyicha boshqa nomzodlarni kiritishni soʻrab murojaat qiladi.
22. Kuzatuv natijalarini, nomzodlar boʻyicha takliflar va tavsiyanomalarni rasmiylashtirish qoidalari Kengash tomonidan belgilanadi.
23. Vazirlik mukofot topshiriladigan yilning iyun oyi yakuniga qadar mukofot bilan taqdirlash uchun nomzodlar boʻyicha tavsiyanomalar va nomzodlarning ilmiy yutuqlariga oid hujjatlarni Vazirlikning rasmiy blankdagi xati bilan koʻrib chiqish uchun Kengashga kiritadi.
4-bob. Mukofot bilan taqdirlashga nomzodlar boʻyicha tavsiyanomalarni koʻrib chiqish va takliflarni tayyorlash
24. Mukofot bilan taqdirlanadiganlar boʻyicha Kengashning taklifi Oʻzbekiston Respublikasi Prezidentining Muhammad Al-Xorazmiy nomidagi xalqaro mukofotiga nomzodlar boʻyicha taqdimnoma (keyingi oʻrinlarda — taqdimnoma) shaklida rasmiylashtiriladi.
25. Kengash yigʻilishidan ikki hafta oldin Mukofot bilan taqdirlashga tavsiya etilayotgan nomzodlar va ularning ilmiy yutoqlariga oid hujjatlar Kengash aʼzolariga taqdim etiladi.
Kengash aʼzolari tomonidan Mukofotga tavsiya etilgan nomzodning ishi koʻrib chiqilayotgan Kengash yigʻilishida uning muallifi ishtirok etmasligi lozim hamda Kengash qarori va ushbu masala bilan bogʻliq boshqa materiallar bilan tanishish huquqiga ega emas.
26. Mukofotga tavsiya etish toʻgʻrisidagi qaror Kengash majlisida ochiq ovoz berish yoʻli bilan qabul qilinadi.
Majlisda qatnashayotgan Kengash aʼzolarining uchdan ikki qismining ovozini olgan nomzod boʻyicha taqdimnoma tayyorlanishi mumkin.
27. Mukofotga nomzodlarni koʻrib chiqish natijalari Kengash bayonnomasi bilan rasmiylashtiriladi.
28. Kengash bayonnomasiga nomzodlarning roʻyxati va ishlarining qisqacha tavsifi tegishli ilova bilan tasdiqlanadi, uning asosida taqdimnoma tayyorlanadi.
29. Taqdimnoma Kengash raisi imzosi bilan mukofot beriladigan yilning 25-avgustidan kechikmasdan Oʻzbekiston Respublikasi Prezidenti Administratsiyasiga yuboriladi.
5-bob. Mukofotni topshirish
30. Taqdimnoma maqullangan taqdirda Mukofotga sazovor boʻlganlarga 50 ming AQSH dollari ekvivalentidagi bir martalik pul mukofoti tantanali ravishda topshiriladi.
31. Mukofot sovrindoriga pul mukofotini toʻlash bilan bogʻlik xarajatlarni moliyalashtirish Oʻzbekiston Respublikasining respublika budjetidan birinchi darajali budjet mablagʻlarini taqsimlovchi sifatida Vazirlikka ajratiladigan mablagʻlar doirasida amalga oshiriladi.
32. Mukofotga sazovor boʻlgan shaxslarga Matematika jamiyati tomonidan oʻtkaziladigan tadbirlarda ishtirok etish, Oʻzbekistonlik olimlar bilan hamkorlikda ilmiy ishlar olib borish hamda matematika sohasida qilgan ilmiy-tadqiqotlari natijalarini, jumladan, mukofot topshirilgan ishlari natijalarini Oʻzbekistonda qoʻllash tavsiya etiladi.
33. Mukofotga sazovor boʻlganlar haqida maʼlumotlar respublika matbuot nashrlari va ommaviy axborot vositalarida, jumladan, xorijiy axborot vositalarida eʼlon qilinadi.
6-bob. Yakunlovchi qoidalar
34. Mukofot bilan taqdirlash uchun taqdim etilgan nomzodlar boʻyicha materiallar belgilangan tartibda hisobga olinadi, saqlanadi va qaytarilmaydi.
35. Ushbu Nizom talablari buzilishida aybdor shaxslar qonunchilik hujjatlarida belgilangan tartibda javob beradilar.
Oʻzbekiston Respublikasi Prezidentining Muhammad Al-Xorazmiy nomidagi xalqaro mukofoti bilan taqdirlash tartibi toʻgʻrisidagi nizomga ILOVA
Oʻzbekiston Respublikasi Prezidentining Muhammad Al-Xorazmiy nomidagi xalqaro mukofoti bilan taqdirlash
Bosqichlar Masʼullar Amalga oshirish mexanizmlari Muddatlari 1-bosqich Matematika jamiyati Matematika sohasidagi ilmiy yutuqlarni aniqlash uchun kuzatuvlar oʻtkazish. Doimiy 2-bosqich Matematika jamiyati 1. Xulosalarni jamlash va muhokama qilish. 2. Mukofotga nomzodlarning dastlabki roʻyxatini shakllantirish. 3. Jamiyatning umumiy yigʻilishida koʻrib chiqish uchun kiritish. Mukofot topshiriladigan yilning mart oyiga qadar 3-bosqich Matematika jamiyati 1. Nomzodlar roʻyxatini koʻrib chiqish va tasdiqlash. 2. Nomzodlar boʻyicha takliflar va ularga oid hujjatlarni Innovatsion rivojlanish vazirligiga yuborish. Mukofot topshiriladigan yilning mart oyiga qadar 4-bosqich Innovatsion rivojlanish vazirligi 1. Nomzodlar roʻyxati va ularga oid hujjatlarni oʻrganish. 2. Nomzodlar boʻyicha tavsiyanomalar va nomzod hamda ilmiy yutuqlarga oid hujjatlarni Vazirlar Mahkamasiga Fan va texnologiyalar boʻyicha respublika kengashida koʻrib chiqish uchun kiritish. 1 oy muddatda Mukofot topshiriladigan yilning iyun oyi 5-bosqich Fan va texnologiyalar boʻyicha respublika kengashi 1. Nomzodlar boʻyicha takliflar, tavsiyanomalar va ularga oid hujjatlarni qoʻrib chiqish. 2. Nomzodlar boʻyicha taqdimnomani tayyorlash va Oʻzbekiston Respublikasi Prezidenti Administratsiyasiga yuborish. 1 oy muddatda Mukofot beriladigan yilning 25-avgustiga qadar 6-bosqich Belgilangan masʼullar, Innovatsion rivojlanish vazirligi 1. Taqdimnoma maʼqullangan taqdirda Mukofotga sazovor boʻlganlarga 50ming AQSH dollari ekvivalentidagi bir martalik pul mukofoti tantanali ravishda topshiriladi. 2. Sovrindorga pul mukofotini toʻlash bilan bogʻliq xarajatlar Davlat budjetidan Innovatsion rivojlanish vazirligiga ajratiladigan mablagʻlar hisobidan qoplanadi. Belgilangan muddatlarda
Oʻzbekiston Respublikasining Bosh vaziri A. ARIPOV
Toshkent sh.,
2020-yil 30-oktabr,
676-son