📅 2020-yil 6-noyabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 6 ноябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 6 ноября 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 6 November 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
«Олтин давр» халқаро мусиқа ярмаркасини ташкил этиш ва ўтказиш чора-тадбирлари тўғрисида
Ўзбекистон Республикаси Президентининг «Маданият ва санъат соҳасининг жамият ҳаётидаги ўрни ва таъсирини янада ошириш чора-тадбирлари тўғрисида» 2020 йил 26 майдаги ПФ-6000-сон Фармони ижросини таъминлаш, дунё мусиқа санъати соҳасида эришилаётган ютуқлар, янги ижод намуналари, мусиқа ускуналари ва чолғу асбобларини мутахассислар, санъаткорлар, санъатшунослар ва кенг омма эътиборига ҳавола этиш мақсадида Вазирлар Маҳкамаси қарор қилади:
1. Ўзбекистон Республикаси Маданият вазирлигининг:
2021 йилдан бошлаб республикада ташкил этиладиган халқаро мусиқа анжуманлари ва фестиваллари доирасида «Олтин давр» халқаро мусиқа ярмаркасини (кейинги ўринларда — Ярмарка) ўтказиш;
Ярмаркани ташкил этиш ва ўтказиш билан боғлиқ сарф-харажатларни Ўзбекистон Республикаси Маданият вазирлиги ҳузуридаги Маданият ва санъатни ривожлантириш жамғармаси ҳамда юридик ва жисмоний шахсларнинг ҳомийлик хайриялари ҳисобидан амалга ошириш тўғрисидаги таклифига розилик берилсин.
2. «Олтин давр» халқаро мусиқа ярмаркасини ўтказиш тартиби тўғрисидаги низом иловага мувофиқ тасдиқлансин.
3. Ўзбекистон Республикаси Маданият вазирлигига Ярмаркани ташкил этиш ва ўтказиш доирасида:
ташкилотчи сифатида манфаатдор вазирликлар ва идоралар билан биргаликда барча ташкилий ва ижодий ишларни мувофиқлаштириб бориш;
Ярмаркада қатнашиш истагини билдирган иштирокчилар, хориждан таклиф этиладиган мутахассислар, санъаткорлар ва санъатшуносларнинг рўйхатини шакллантириш ҳамда уларни Ярмаркага жалб этиш;
Ярмаркани замонавий технологиялардан кенг фойдаланган ҳолда юқори бадиий савияда ўтказиш чора-тадбирларини амалга ошириш вазифалари юклансин.
4. Ўзбекистон Миллий телерадиокомпанияси, Ўзбекистон Миллий ахборот агентлиги, Ўзбекистон электрон оммавий ахборот воситалари миллий ассоциацияси, «Дунё» ахборот агентлигига Ярмаркани тарғиб этишга қаратилган ижтимоий реклама роликларини тайёрлаш, намойиш қилиш ва уни ўтказиш бўйича амалга оширилаётган ишларни ёритиб бориш тавсия этилсин.
5. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари Б.А. Мусаев ва Ўзбекистон Республикаси маданият вазири О.А. Назарбеков зиммасига юклансин.
Вазирлар Маҳкамасининг 2020 йил 6 ноябрдаги 692-сон қарорига ИЛОВА
«Олтин давр» халқаро мусиқа ярмаркасини ўтказиш тартиби тўғрисида
1-боб. Умумий қоидалар
1. Ушбу Низом «Олтин давр» халқаро мусиқа ярмаркасини (кейинги ўринларда — Ярмарка) ўтказиш тартибини белгилайди.
2. Ярмарка қуйидагиларни назарда тутган ҳолда ўтказилади:
Ўзбекистон ва хорижий мамлакатлар ўртасидаги маданий алоқаларни мустаҳкамлаш ва соҳа бўйича халқаро ҳамкорликни янада ривожлантириш;
ўзбек миллий мусиқа санъатининг ноёб дурдоналарини дунё миқёсида янада кенг тарғиб этиш;
санъат соҳасидаги етук мутахассисларни миллий мусиқа ва замонавий санъат асарлари ҳамда ижрочиларнинг маҳорати билан таништириш;
хорижий мамлакатларнинг мусиқа асбоб-ускуналарини ишлаб чиқарувчи етакчи корхоналарининг техник ускуналари ва мосламалари, ўзбек ҳунарманд усталари томонидан тайёрланган чолғу созлари намойишини ташкил этиш ва бу борада ўзаро ҳамкорликни йўлга қўйиш;
ишлаб чиқарувчилар томонидан ўз маҳсулотларини ҳамда хизмат кўрсатувчилар томонидан таклиф этилаётган хизматларни намойиш этиш, савдо ҳамда бошқа битимларни тузиш учун шарт-шароитлар яратиш;
янги ютуқлар ҳамда бошқа маҳсулотларни намойиш этиш учун имконият яратиш;
қўшма ижодий лойиҳаларни амалга оширишда халқаро шериклик муносабатларини шакллантириш.
3. Ярмарка 2021 йилдан бошлаб мамлакатимизда ўтказиб келинаётган «Шарқ тароналари» халқаро мусиқа фестивали, Халқаро мақом санъати анжумани, Халқаро бахшичилик санъати фестивали ҳамда келгусида ташкил этиладиган бошқа мусиқа анжуманлари ва фестиваллари доирасида ўтказилади.
4. Ўзбекистон Республикаси Маданият вазирлиги Ярмарка ташкилотчиси (кейинги ўринларда — Ташкилотчи) ҳисобланади.
Ярмарка Ўзбекистон Республикаси Маданият вазирлиги томонидан манфаатдор вазирликлар ва идоралар билан ҳамкорликда ташкил этилади ҳамда ўтказилади.
2-боб. Ярмаркани ўтказиш тартиби
5. Ярмарка доирасида қуйидаги тадбирлар ўтказилади:
Ярмарканинг тантанали очилиши маросими;
хориждан таклиф этилган продюсерлар, промоутерлар, санъаткорлар, мутахассисларнинг тақдимотлари, давра суҳбатлари ва маҳорат дарслари;
мусиқа санъати савдо ярмаркаси;
санъаткорларнинг концерт дастурлари;
Ярмарканинг тантанали ёпилиши маросими.
6. Ярмаркада иштирок этувчилар қуйидагилар ҳисобланади:
иштирокчилар — ишлаб чиқариш компаниялари ва корхоналари, ўқув ва PR-марказлари, таълим муассасалари, аудио ва видео маҳсулотлар тайёрлаш бўйича студиялар, санъат ва мусиқа лабораториялари, миллий созлар устахоналари ва ҳунармандлар, мусиқа санъатининг барча йўналишларида ижод қилаётган хорижий ва маҳаллий санъаткорлар, бастакорлар, созанда ва хонандалар жамоалари, турли танлов, фестиваль, кўргазма ва лойиҳаларнинг раҳбарлари, тасвирий ва амалий санъат усталари, раққос ва раққосалар, турли тадбирлар ташкилотчилари;
буюртмачи — таниқли продюсерлар ва промоутерлар, санъат соҳасидаги халқаро ташкилотлар вакиллари.
7. Ярмарканинг ишчи тиллари этиб ўзбек, рус ва инглиз тиллари белгиланади.
3-боб. Ярмаркада иштирок этиш тартиби
8. Ярмаркада иштирок этиш истагини билдирган иштирокчилар Ташкилотчига қуйидаги ҳужжатларни тақдим этади:
а) иштирокчининг шахсини тасдиқловчи ҳужжат (паспорт) нусхаси;
б) иштирокчи ҳақида маълумотнома (резюме);
в) 4 дона (2 дона 3х4 см ва 2 дона 9х12 см ҳажмда) рангли фотосурат;
г) ижод намунаси ҳақида маълумотлар (ижодий фаолият юзасидан фото ва видео материаллар).
9. Барча иштирокчиларга Ташкилотчи томонидан махсус қайд рақамига эга бўлган «Халқаро мусиқа ярмаркаси иштирокчиси» сертификати тақдим этилади.
10. Ярмарка халқаро миқёсда ўтказиладиган турли ярмаркалар ва музокаралар тажрибаларига таянган ҳолда ишбилармонларнинг ўзаро келишуви (B2B), ишбилармон ва истеъмолчи (B2C) ҳамда бошқа мулоқот форматларида ташкил этилади ва бунинг учун Ташкилотчи томонидан барча шарт-шароитлар яратилади.
11. Иштирокчиларга Ташкилотчи томонидан Ярмарка бўлиб ўтадиган ҳудуддан 3,5 х 4 метр ўлчамдаги майдон ажратилади.
12. Иштирокчилар ўзларига ажратилган ҳудудда ўз хизматлари ва маҳсулотларини турли стендлар, фотоальбомлар, аудио-, видео-, фототақдимотлар, роликлар, баннер ва флайерлар орқали тарғиб этишлари мумкин.
13. Ярмаркада одоб-ахлоқ нормаларига зид бўлган маҳсулот ва хизматларнинг тақдимотига йўл қўйилмайди.
14. Ярмарканинг ҳар бир иштирокчиси ўз тиббий суғуртасига эга бўлиши лозим.
4-боб. Ташкилотчининг ҳуқуқлари
15.Ташкилотчи қуйидаги ҳуқуқларга эга бўлади:
оммавий ахборот воситалари ва ижтимоий тармоқларда тарғибот материалларини тайёрлашда Ярмарка иштирокчилари томонидан тақдим этиладиган материаллардан фойдаланиш;
Ярмаркани телевидение, радио, бошқа оммавий ахборот воситалари ҳамда ижтимоий тармоқларда трансляция қилиш учун рухсат бериш.
5-боб. Ярмаркани молиялаштириш тартиби
16. Ярмаркада иштирок этиш истагини билдирган:
хорижий иштирокчиларнинг Ўзбекистонга келиб-кетиши, овқатланиши ва яшаш харажатлари иштирокчи ҳисобидан;
маҳаллий иштирокчиларнинг ички транспорт, овқатланиш, меҳмонхона харажатлари Ташкилотчи томонидан қопланади.
17. Хорижий продюсер ва промоутерлар, санъат соҳасидаги халқаро ташкилотлар вакилларининг нуфузи, тажрибаси, халқаро майдондаги маданият ва санъат соҳасидаги мавқеини инобатга олган ҳолда Ташкилотчининг таклифига биноан уларнинг Ярмаркада иштирок этиши билан боғлиқ барча харажатлар Ташкилотчи томонидан қопланиши мумкин.
18. Ярмаркани ташкил этиш ва ўтказиш билан боғлиқ сарф-харажатлар Ўзбекистон Республикаси Маданият вазирлиги ҳузуридаги Маданият ва санъатни ривожлантириш жамғармаси ҳамда юридик ва жисмоний шахсларнинг ҳомийлик хайриялари ҳисобидан қопланади.
Ўзбекистон Республикасининг Бош вазири А. АРИПОВ
Тошкент ш.,
2020 йил 6 ноябрь,
692-сон
Oʻzbekiston Respublikasi Vazirlar Mahkamasining
qarori
NIZOM
“Oltin davr” xalqaro musiqa yarmarkasini tashkil etish va oʻtkazish chora-tadbirlari toʻgʻrisida
Oʻzbekiston Respublikasi Prezidentining “Madaniyat va sanʼat sohasining jamiyat hayotidagi oʻrni va taʼsirini yanada oshirish chora-tadbirlari toʻgʻrisida” 2020-yil 26-maydagi PF-6000-son Farmoni ijrosini taʼminlash, dunyo musiqa sanʼati sohasida erishilayotgan yutuqlar, yangi ijod namunalari, musiqa uskunalari va cholgʻu asboblarini mutaxassislar, sanʼatkorlar, sanʼatshunoslar va keng omma eʼtiboriga havola etish maqsadida Vazirlar Mahkamasi qaror qiladi:
1. Oʻzbekiston Respublikasi Madaniyat vazirligining:
2021-yildan boshlab respublikada tashkil etiladigan xalqaro musiqa anjumanlari va festivallari doirasida “Oltin davr” xalqaro musiqa yarmarkasini (keyingi oʻrinlarda — Yarmarka) oʻtkazish;
Yarmarkani tashkil etish va oʻtkazish bilan bogʻliq sarf-xarajatlarni Oʻzbekiston Respublikasi Madaniyat vazirligi huzuridagi Madaniyat va sanʼatni rivojlantirish jamgʻarmasi hamda yuridik va jismoniy shaxslarning homiylik xayriyalari hisobidan amalga oshirish toʻgʻrisidagi taklifiga rozilik berilsin.
2. “Oltin davr” xalqaro musiqa yarmarkasini oʻtkazish tartibi toʻgʻrisidagi nizom ilovaga muvofiq tasdiqlansin.
3. Oʻzbekiston Respublikasi Madaniyat vazirligiga Yarmarkani tashkil etish va oʻtkazish doirasida:
tashkilotchi sifatida manfaatdor vazirliklar va idoralar bilan birgalikda barcha tashkiliy va ijodiy ishlarni muvofiqlashtirib borish;
Yarmarkada qatnashish istagini bildirgan ishtirokchilar, xorijdan taklif etiladigan mutaxassislar, sanʼatkorlar va sanʼatshunoslarning roʻyxatini shakllantirish hamda ularni Yarmarkaga jalb etish;
Yarmarkani zamonaviy texnologiyalardan keng foydalangan holda yuqori badiiy saviyada oʻtkazish chora-tadbirlarini amalga oshirish vazifalari yuklansin.
4. Oʻzbekiston Milliy teleradiokompaniyasi, Oʻzbekiston Milliy axborot agentligi, Oʻzbekiston elektron ommaviy axborot vositalari milliy assotsiatsiyasi, “Dunyo” axborot agentligiga Yarmarkani targʻib etishga qaratilgan ijtimoiy reklama roliklarini tayyorlash, namoyish qilish va uni oʻtkazish boʻyicha amalga oshirilayotgan ishlarni yoritib borish tavsiya etilsin.
5. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A. Musayev va Oʻzbekiston Respublikasi madaniyat vaziri O.A. Nazarbekov zimmasiga yuklansin.
Vazirlar Mahkamasining 2020-yil 6-noyabrdagi 692-son qaroriga ILOVA
“Oltin davr” xalqaro musiqa yarmarkasini oʻtkazish tartibi toʻgʻrisida
1-bob. Umumiy qoidalar
1. Ushbu Nizom “Oltin davr” xalqaro musiqa yarmarkasini (keyingi oʻrinlarda — Yarmarka) oʻtkazish tartibini belgilaydi.
2. Yarmarka quyidagilarni nazarda tutgan holda oʻtkaziladi:
Oʻzbekiston va xorijiy mamlakatlar oʻrtasidagi madaniy aloqalarni mustahkamlash va soha boʻyicha xalqaro hamkorlikni yanada rivojlantirish;
oʻzbek milliy musiqa sanʼatining noyob durdonalarini dunyo miqyosida yanada keng targʻib etish;
sanʼat sohasidagi yetuk mutaxassislarni milliy musiqa va zamonaviy sanʼat asarlari hamda ijrochilarning mahorati bilan tanishtirish;
xorijiy mamlakatlarning musiqa asbob-uskunalarini ishlab chiqaruvchi yetakchi korxonalarining texnik uskunalari va moslamalari, oʻzbek hunarmand ustalari tomonidan tayyorlangan cholgʻu sozlari namoyishini tashkil etish va bu borada oʻzaro hamkorlikni yoʻlga qoʻyish;
ishlab chiqaruvchilar tomonidan oʻz mahsulotlarini hamda xizmat koʻrsatuvchilar tomonidan taklif etilayotgan xizmatlarni namoyish etish, savdo hamda boshqa bitimlarni tuzish uchun shart-sharoitlar yaratish;
yangi yutuqlar hamda boshqa mahsulotlarni namoyish etish uchun imkoniyat yaratish;
qoʻshma ijodiy loyihalarni amalga oshirishda xalqaro sheriklik munosabatlarini shakllantirish.
3. Yarmarka 2021-yildan boshlab mamlakatimizda oʻtkazib kelinayotgan “Sharq taronalari” xalqaro musiqa festivali, Xalqaro maqom sanʼati anjumani, Xalqaro baxshichilik sanʼati festivali hamda kelgusida tashkil etiladigan boshqa musiqa anjumanlari va festivallari doirasida oʻtkaziladi.
4. Oʻzbekiston Respublikasi Madaniyat vazirligi Yarmarka tashkilotchisi (keyingi oʻrinlarda — Tashkilotchi) hisoblanadi.
Yarmarka Oʻzbekiston Respublikasi Madaniyat vazirligi tomonidan manfaatdor vazirliklar va idoralar bilan hamkorlikda tashkil etiladi hamda oʻtkaziladi.
2-bob. Yarmarkani oʻtkazish tartibi
5. Yarmarka doirasida quyidagi tadbirlar oʻtkaziladi:
Yarmarkaning tantanali ochilishi marosimi;
xorijdan taklif etilgan prodyuserlar, promouterlar, sanʼatkorlar, mutaxassislarning taqdimotlari, davra suhbatlari va mahorat darslari;
musiqa sanʼati savdo yarmarkasi;
sanʼatkorlarning konsert dasturlari;
Yarmarkaning tantanali yopilishi marosimi.
6. Yarmarkada ishtirok etuvchilar quyidagilar hisoblanadi:
ishtirokchilar — ishlab chiqarish kompaniyalari va korxonalari, oʻquv va PR-markazlari, taʼlim muassasalari, audio va video mahsulotlar tayyorlash boʻyicha studiyalar, sanʼat va musiqa laboratoriyalari, milliy sozlar ustaxonalari va hunarmandlar, musiqa sanʼatining barcha yoʻnalishlarida ijod qilayotgan xorijiy va mahalliy sanʼatkorlar, bastakorlar, sozanda va xonandalar jamoalari, turli tanlov, festival, koʻrgazma va loyihalarning rahbarlari, tasviriy va amaliy sanʼat ustalari, raqqos va raqqosalar, turli tadbirlar tashkilotchilari;
buyurtmachi — taniqli prodyuserlar va promouterlar, sanʼat sohasidagi xalqaro tashkilotlar vakillari.
7. Yarmarkaning ishchi tillari etib oʻzbek, rus va ingliz tillari belgilanadi.
3-bob. Yarmarkada ishtirok etish tartibi
8. Yarmarkada ishtirok etish istagini bildirgan ishtirokchilar Tashkilotchiga quyidagi hujjatlarni taqdim etadi:
a) ishtirokchining shaxsini tasdiqlovchi hujjat (pasport) nusxasi;
b) ishtirokchi haqida maʼlumotnoma (rezyume);
v) 4 dona (2 dona 3x4 sm va 2 dona 9x12 sm hajmda) rangli fotosurat;
g) ijod namunasi haqida maʼlumotlar (ijodiy faoliyat yuzasidan foto va video materiallar).
9. Barcha ishtirokchilarga Tashkilotchi tomonidan maxsus qayd raqamiga ega boʻlgan “Xalqaro musiqa yarmarkasi ishtirokchisi” sertifikati taqdim etiladi.
10. Yarmarka xalqaro miqyosda oʻtkaziladigan turli yarmarkalar va muzokaralar tajribalariga tayangan holda ishbilarmonlarning oʻzaro kelishuvi (B2B), ishbilarmon va isteʼmolchi (B2C) hamda boshqa muloqot formatlarida tashkil etiladi va buning uchun Tashkilotchi tomonidan barcha shart-sharoitlar yaratiladi.
11. Ishtirokchilarga Tashkilotchi tomonidan Yarmarka boʻlib oʻtadigan hududdan 3,5 x 4 metr oʻlchamdagi maydon ajratiladi.
12. Ishtirokchilar oʻzlariga ajratilgan hududda oʻz xizmatlari va mahsulotlarini turli stendlar, fotoalbomlar, audio-, video-, fototaqdimotlar, roliklar, banner va flayerlar orqali targʻib etishlari mumkin.
13. Yarmarkada odob-axloq normalariga zid boʻlgan mahsulot va xizmatlarning taqdimotiga yoʻl qoʻyilmaydi.
14. Yarmarkaning har bir ishtirokchisi oʻz tibbiy sugʻurtasiga ega boʻlishi lozim.
4-bob. Tashkilotchining huquqlari
15.Tashkilotchi quyidagi huquqlarga ega boʻladi:
ommaviy axborot vositalari va ijtimoiy tarmoqlarda targʻibot materiallarini tayyorlashda Yarmarka ishtirokchilari tomonidan taqdim etiladigan materiallardan foydalanish;
Yarmarkani televideniye, radio, boshqa ommaviy axborot vositalari hamda ijtimoiy tarmoqlarda translyatsiya qilish uchun ruxsat berish.
5-bob. Yarmarkani moliyalashtirish tartibi
16. Yarmarkada ishtirok etish istagini bildirgan:
xorijiy ishtirokchilarning Oʻzbekistonga kelib-ketishi, ovqatlanishi va yashash xarajatlari ishtirokchi hisobidan;
mahalliy ishtirokchilarning ichki transport, ovqatlanish, mehmonxona xarajatlari Tashkilotchi tomonidan qoplanadi.
17. Xorijiy prodyuser va promouterlar, sanʼat sohasidagi xalqaro tashkilotlar vakillarining nufuzi, tajribasi, xalqaro maydondagi madaniyat va sanʼat sohasidagi mavqeyini inobatga olgan holda Tashkilotchining taklifiga binoan ularning Yarmarkada ishtirok etishi bilan bogʻliq barcha xarajatlar Tashkilotchi tomonidan qoplanishi mumkin.
18. Yarmarkani tashkil etish va oʻtkazish bilan bogʻliq sarf-xarajatlar Oʻzbekiston Respublikasi Madaniyat vazirligi huzuridagi Madaniyat va sanʼatni rivojlantirish jamgʻarmasi hamda yuridik va jismoniy shaxslarning homiylik xayriyalari hisobidan qoplanadi.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 6-noyabr,
692-son