📅 2020-yil 9-noyabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 9 ноябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 9 ноября 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 9 November 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Ўзбекистон Республикаси Ўрмон хўжалиги давлат қўмитаси тизимида Ўрмон хўжалиги техникуми фаолиятини ташкил этиш чора-тадбирлари тўғрисида
Ўзбекистон Республикаси Президентининг «Ўзбекистон Республикасида ўрмон хўжалиги тизимини 2030 йилгача ривожлантириш концепциясини тасдиқлаш тўғрисида» 2020 йил 6 октябрдаги ПҚ-4850-сон қарори ижросини таъминлаш, шунингдек, ўрмон хўжалиги соҳасида илм-фан билан ишлаб чиқариш интеграциясини таъминлаш ҳамда илғор хорижий тажриба бўйича етарли билим ва малакага эга бўлган кадрлар тайёрлаш тизимини такомиллаштириш мақсадида Вазирлар Маҳкамаси қарор қилади:
1. Ўзбекистон Республикаси Ўрмон хўжалиги давлат қўмитаси, Олий ва ўрта махсус таълим вазирлигининг ўрмон хўжалиги соҳасини ривожлантириш истиқболларини ҳисобга олган ҳолда 2021/2022 ўқув йилидан бошлаб Тошкент тумани ўрмон хўжалиги коллежи негизида Ўрмон хўжалиги давлат қўмитаси тизимидаги Ўрмон хўжалиги техникумини (кейинги ўринларда — Техникум) ташкил этиш тўғрисидаги таклифи маъқуллансин.
2. Қуйидагилар Техникумнинг асосий вазифалари этиб белгилансин:
ўрмон хўжалиги ва унинг тармоқлари учун кадрлар тайёрлашнинг узлуксизлиги ва узвийлиги асосида ўрта махсус профессионал таълим босқичида кундузги, кечки ва сиртқи таълим шаклларида олий таълимнинг бакалавриат таълим йўналишлари билан интеграциялашган дастурлар асосида кадрлар тайёрлаш;
ўрмон хўжалиги соҳаси ва тармоқлари учун таълимнинг халқаро таснифлагичи билан уйғунлашган миллий профессионал стандартларга мос ўрта махсус маълумотли кадрлар тайёрлашни тизимли йўлга қўйиш;
халқаро таснифлагич даражалари билан уйғунлашган табақалаштирилган таълим дастурларини ҳамда ўқитишнинг кредит-модуль тизимини босқичма-босқич жорий этиш;
ўрмонлар барпо этиш, ўларни асраш, кўпайтириш, муҳофаза қилиш, ўрмон флораси ва фаунаси, соҳани рақамлаштириш, агробизнес, маркетинг, логистика, қишлоқ хўжалиги ва органик маҳсулотларни ҳамда доривор ўсимликларни етиштириш, қайта ишлаш, сақлаш ва қадоқлаш, шунингдек, экотуризм ва ов хўжаликларини ташкил этиш бўйича зарур билим, кўникма ва малакаларни шакллантириш.
3. Белгилансинки:
Техникум республикадаги ўрмончилик соҳасидаги таълим йўналиши бўйича таянч ўрта махсус профессионал таълим муассасаси ҳисобланади;
Техникум директори Ўзбекистон Республикаси Ўрмон хўжалиги давлат қўмитаси раиси ўринбосарининг тавсиясига кўра Ўрмон хўжалиги давлат қўмитаси раиси томонидан лавозимга тайинланади ва лавозимидан озод этилади;
Техникумда таълим стандартлари, малака талаблари, ўқув режаси ва дастурларини жорий этишни мувофиқлаштириш Тошкент давлат аграр университети, унга методик раҳбарлик қилиш эса — Ўзбекистон Республикаси Олий ва ўрта махсус таълим вазирлиги томонидан амалга оширилади;
Техникумни жорий сақлаш, унинг фаолият юритиши, моддий-техник базасини мустаҳкамлаш ва кадрлар тайёрлаш харажатлари Ўзбекистон Республикаси Давлат бюджети, Ўрмон хўжалиги давлат қўмитасининг Ўрмон хўжалигини ривожлантириш жамғармаси, тўлов-контракт асосида тушган тушумлар, юридик ва жисмоний шахсларнинг ҳомийлик хайриялари ва халқаро молия институтлари грантлари, шунингдек, қонунчиликда тақиқланмаган бошқа манбалар ҳисобидан амалга оширилади;
Ўзбекистон Республикаси Ўрмон хўжалиги давлат қўмитаси ҳар йили 15 январга қадар ўрмон хўжалиги соҳасидаги касблар ва мутахассисликлар бўйича қабул параметрларига таклифларни касблар ва мутахассисликлар ҳамда ҳудудлар бўйича Ўзбекистон Республикаси Олий ва ўрта махсус таълим вазирлигига тақдим этиб боради;
Техникумда юқори малакали педагог ходимлар таркибини шакллантиришда Ўзбекистон Республикаси Ўрмон хўжалиги давлат қўмитаси тизимидаги илмий ташкилотлар ҳамда аграр соҳадаги олий таълим муассасаларининг турдош кафедралари профессор-ўқитувчиларига устунлик берилади;
Техникум Тошкент тумани ўрмон хўжалиги коллежининг ҳуқуқлари, мажбуриятлари ва шартномалари бўйича ҳуқуқий вориси ҳисобланади.
4. Ўзбекистон Республикаси Ўрмон хўжалиги давлат қўмитаси бир ой муддатда Техникумнинг уставини белгиланган тартибда тасдиқласин.
5. Ўзбекистон Республикаси Молия вазирлиги:
Ўзбекистон Республикаси Давлат бюджети параметрлари доирасида Техникумга 2021/2022 ўқув йилидан бошлаб ўқув жиҳозлари ва лаборатория ускуналари сотиб олиниши;
Техникумга 2 та автотранспорт воситаси, шу жумладан, 1 та енгил автомобиль ва 1 та автобус ажратилишини назарда тутсин.
6. Ўзбекистон Республикаси Иқтисодий тараққиёт ва камбағалликни қисқартириш вазирлиги Ўрмон хўжалиги давлат қўмитасининг асосланган ҳисоб-китобларига мувофиқ 2021 йил ва ундан кейинги йиллар учун Ўзбекистон Республикасини ривожлантириш давлат дастурларини шакллантиришда Техникумнинг ўқув биноларини реконструкция қилиш, ўқув-лаборатория ва ахборот-коммуникация технологиялари воситалари билан жиҳозлаш, ётоқхона ва ошхона биноларини қуриш бўйича лойиҳалар мазкур дастурларга белгиланган тартибда киритилишини назарда тутсин.
7. Ўзбекистон Республикаси Ўрмон хўжалиги давлат қўмитаси манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
8. Мазкур қарорнинг бажарилишини назорат қилиш Ўзбекистон Республикаси Бош вазирининг аграр ва озиқ-овқат соҳаларини ривожлантириш масалалари бўйича ўринбосари Ш.М. Ғаниев ва Ўрмон хўжалиги давлат қўмитаси раиси Н.Ж. Бакиров зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2020 йил 9 ноябрь,
701-сон
Oʻzbekiston Respublikasi Vazirlar Mahkamasining
qarori
Oʻzbekiston Respublikasi Oʻrmon xoʻjaligi davlat qoʻmitasi tizimida Oʻrmon xoʻjaligi texnikumi faoliyatini tashkil etish chora-tadbirlari toʻgʻrisida
Oʻzbekiston Respublikasi Prezidentining “Oʻzbekiston Respublikasida oʻrmon xoʻjaligi tizimini 2030-yilgacha rivojlantirish konsepsiyasini tasdiqlash toʻgʻrisida” 2020-yil 6-oktabrdagi PQ-4850-son qarori ijrosini taʼminlash, shuningdek, oʻrmon xoʻjaligi sohasida ilm-fan bilan ishlab chiqarish integratsiyasini taʼminlash hamda ilgʻor xorijiy tajriba boʻyicha yetarli bilim va malakaga ega boʻlgan kadrlar tayyorlash tizimini takomillashtirish maqsadida Vazirlar Mahkamasi qaror qiladi:
1. Oʻzbekiston Respublikasi Oʻrmon xoʻjaligi davlat qoʻmitasi, Oliy va oʻrta maxsus taʼlim vazirligining oʻrmon xoʻjaligi sohasini rivojlantirish istiqbollarini hisobga olgan holda 2021/2022 oʻquv yilidan boshlab Toshkent tumani oʻrmon xoʻjaligi kolleji negizida Oʻrmon xoʻjaligi davlat qoʻmitasi tizimidagi Oʻrmon xoʻjaligi texnikumini (keyingi oʻrinlarda — Texnikum) tashkil etish toʻgʻrisidagi taklifi maʼqullansin.
2. Quyidagilar Texnikumning asosiy vazifalari etib belgilansin:
oʻrmon xoʻjaligi va uning tarmoqlari uchun kadrlar tayyorlashning uzluksizligi va uzviyligi asosida oʻrta maxsus professional taʼlim bosqichida kunduzgi, kechki va sirtqi taʼlim shakllarida oliy taʼlimning bakalavriat taʼlim yoʻnalishlari bilan integratsiyalashgan dasturlar asosida kadrlar tayyorlash;
oʻrmon xoʻjaligi sohasi va tarmoqlari uchun taʼlimning xalqaro tasniflagichi bilan uygʻunlashgan milliy professional standartlarga mos oʻrta maxsus maʼlumotli kadrlar tayyorlashni tizimli yoʻlga qoʻyish;
xalqaro tasniflagich darajalari bilan uygʻunlashgan tabaqalashtirilgan taʼlim dasturlarini hamda oʻqitishning kredit-modul tizimini bosqichma-bosqich joriy etish;
oʻrmonlar barpo etish, oʻlarni asrash, koʻpaytirish, muhofaza qilish, oʻrmon florasi va faunasi, sohani raqamlashtirish, agrobiznes, marketing, logistika, qishloq xoʻjaligi va organik mahsulotlarni hamda dorivor oʻsimliklarni yetishtirish, qayta ishlash, saqlash va qadoqlash, shuningdek, ekoturizm va ov xoʻjaliklarini tashkil etish boʻyicha zarur bilim, koʻnikma va malakalarni shakllantirish.
3. Belgilansinki:
Texnikum respublikadagi oʻrmonchilik sohasidagi taʼlim yoʻnalishi boʻyicha tayanch oʻrta maxsus professional taʼlim muassasasi hisoblanadi;
Texnikum direktori Oʻzbekiston Respublikasi Oʻrmon xoʻjaligi davlat qoʻmitasi raisi oʻrinbosarining tavsiyasiga koʻra Oʻrmon xoʻjaligi davlat qoʻmitasi raisi tomonidan lavozimga tayinlanadi va lavozimidan ozod etiladi;
Texnikumda taʼlim standartlari, malaka talablari, oʻquv rejasi va dasturlarini joriy etishni muvofiqlashtirish Toshkent davlat agrar universiteti, unga metodik rahbarlik qilish esa — Oʻzbekiston Respublikasi Oliy va oʻrta maxsus taʼlim vazirligi tomonidan amalga oshiriladi;
Texnikumni joriy saqlash, uning faoliyat yuritishi, moddiy-texnik bazasini mustahkamlash va kadrlar tayyorlash xarajatlari Oʻzbekiston Respublikasi Davlat budjeti, Oʻrmon xoʻjaligi davlat qoʻmitasining Oʻrmon xoʻjaligini rivojlantirish jamgʻarmasi, toʻlov-kontrakt asosida tushgan tushumlar, yuridik va jismoniy shaxslarning homiylik xayriyalari va xalqaro moliya institutlari grantlari, shuningdek, qonunchilikda taqiqlanmagan boshqa manbalar hisobidan amalga oshiriladi;
Oʻzbekiston Respublikasi Oʻrmon xoʻjaligi davlat qoʻmitasi har yili 15-yanvarga qadar oʻrmon xoʻjaligi sohasidagi kasblar va mutaxassisliklar boʻyicha qabul parametrlariga takliflarni kasblar va mutaxassisliklar hamda hududlar boʻyicha Oʻzbekiston Respublikasi Oliy va oʻrta maxsus taʼlim vazirligiga taqdim etib boradi;
Texnikumda yuqori malakali pedagog xodimlar tarkibini shakllantirishda Oʻzbekiston Respublikasi Oʻrmon xoʻjaligi davlat qoʻmitasi tizimidagi ilmiy tashkilotlar hamda agrar sohadagi oliy taʼlim muassasalarining turdosh kafedralari professor-oʻqituvchilariga ustunlik beriladi;
Texnikum Toshkent tumani oʻrmon xoʻjaligi kollejining huquqlari, majburiyatlari va shartnomalari boʻyicha huquqiy vorisi hisoblanadi.
4. Oʻzbekiston Respublikasi Oʻrmon xoʻjaligi davlat qoʻmitasi bir oy muddatda Texnikumning ustavini belgilangan tartibda tasdiqlasin.
5. Oʻzbekiston Respublikasi Moliya vazirligi:
Oʻzbekiston Respublikasi Davlat budjeti parametrlari doirasida Texnikumga 2021/2022 oʻquv yilidan boshlab oʻquv jihozlari va laboratoriya uskunalari sotib olinishi;
Texnikumga 2 ta avtotransport vositasi, shu jumladan, 1 ta yengil avtomobil va 1 ta avtobus ajratilishini nazarda tutsin.
6. Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi Oʻrmon xoʻjaligi davlat qoʻmitasining asoslangan hisob-kitoblariga muvofiq 2021-yil va undan keyingi yillar uchun Oʻzbekiston Respublikasini rivojlantirish davlat dasturlarini shakllantirishda Texnikumning oʻquv binolarini rekonstruksiya qilish, oʻquv-laboratoriya va axborot-kommunikatsiya texnologiyalari vositalari bilan jihozlash, yotoqxona va oshxona binolarini qurish boʻyicha loyihalar mazkur dasturlarga belgilangan tartibda kiritilishini nazarda tutsin.
7. Oʻzbekiston Respublikasi Oʻrmon xoʻjaligi davlat qoʻmitasi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
8. Mazkur qarorning bajarilishini nazorat qilish Oʻzbekiston Respublikasi Bosh vazirining agrar va oziq-ovqat sohalarini rivojlantirish masalalari boʻyicha oʻrinbosari Sh.M. Gʻaniyev va Oʻrmon xoʻjaligi davlat qoʻmitasi raisi N.J. Bakirov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 9-noyabr,
701-son