📅 2020-yil 14-dekabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 14 декабрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 14 декабря 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 14 December 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Электрон турдаги суғурта хизматларини кўрсатиш тартибини такомиллаштириш бўйича қўшимча чора-тадбирлар тўғрисида
Ўзбекистон Республикаси Президентининг «Ўзбекистон Республикасининг суғурта бозорини ислоҳ қилиш ва унинг жадал ривожланишини таъминлаш чора-тадбирлари тўғрисида» 2019 йил 2 августдаги ПҚ-4412-сон қарори ижросини таъминлаш, шунингдек, замонавий ахборот технологияларидан кенг фойдаланиш, суғурта хизматларининг электрон турларини фаол жорий этиш ва ривожлантириш мақсадида Вазирлар Маҳкамаси қарор қилади:
1. Вазирлар Маҳкамасининг «Транспорт воситалари эгаларининг фуқаролик жавобгарлигини мажбурий суғурта қилишни янада такомиллаштириш чора-тадбирлари тўғрисида» 2019 йил 16 мартдаги 222-сон қарори ижросини таъминлаш мақсадида онлайн тартибида фаолият юритувчи тегишли вазирлик ва идораларнинг ахборот тизимлари, жисмоний ва юридик шахсларнинг марказий маълумотлар базаси билан интеграциялашган транспорт воситалари эгаларининг фуқаролик жавобгарлигини мажбурий суғурта қилиш бўйича ягона ахборот тизими (кейинги ўринларда — ягона ахборот тизими) жорий этилгани маълумот учун қабул қилинсин.
2. Ўзбекистон Республикаси Молия вазирлиги, Ахборот технологиялари ва коммуникацияларини ривожлантириш вазирлиги ва Суғурта тўловларини кафолатлаш жамғармасининг электрон турдаги суғурта хизматларини (кейинги ўринларда — Е-полис) ягона ахборот тизими таркибида амалга ошириш ҳақидаги таклифларига розилик берилсин.
3. Ўзбекистон Республикаси Молия вазирлиги Суғурта тўловларини кафолатлаш жамғармаси (кейинги ўринларда — Жамғарма) билан биргаликда 2021 йил 1 июлга қадар ягона ахборот тизими таркибида Е-полисларни сотиш ва расмийлаштиришга мўлжалланган мажбурий суғурта бўйича фаолият олиб борувчи суғурта ташкилотларининг ҳамда манфаатдор вазирликлар ва идораларнинг ахборот тизимлари ва маълумотлар базаси билан интеграциялашган ахборот модулларини жорий этсин.
5. Белгилансинки:
Ўзбекистон Республикаси Молия вазирлиги суғурта ташкилотлари билан биргаликда 2021 йил 1 мартдан бошлаб Транспорт воситалари эгаларининг фуқаролик жавобгарлигини мажбурий суғурта қилиш бўйича Е-полисни сотиш, расмийлаштиришни амалга оширади;
суғурта ташкилотлари томонидан хорижий давлатларда рўйхатдан ўтказилган ҳамда Ўзбекистон Республикаси ҳудудида вақтинча фойдаланилаётган транспорт воситалари эгалари билан Е-полисни расмийлаштиришга йўл қўйилмайди;
Е-полис қоғоз шаклидаги шартномага (полисга) тенглаштирилади;
ягона ахборот тизими таркибида Е-полисни расмийлаштириш бўйича тегишли ахборот модулларни ишлаб чиқиш ва жорий этишни молиялаштириш Жамғарма ҳисобидан амалга оширилади.
Бунда ушбу қарор билан жорий этилаётган механизмни амалга ошириш доирасида:
тегишли вазирликлар ва идоралар — Е-полисни расмийлаштиришда зарур бўлган маълумотларни ягона ахборот тизимига тақдим этиш учун;
суғурта ташкилотлари — мажбурий суғурта бўйича мажбуриятнинг транспорт воситалари эгалари томонидан бажарилишини назорат қилишда зарур бўлган маълумотларни ягона ахборот тизимига тақдим этиш учун;
Жамғарма — Е-полисни расмийлаштиришда зарур бўлган ахборот-маълумотлар тегишли вазирликлар ва идоралар ҳамда суғурта ташкилотлари ўртасида алмашинувини таъминлаш учун жавобгар эканлиги белгилаб қўйилсин.
6. Ўзбекистон Республикаси Ахборот технологиялари ва коммуникацияларини ривожлантириш вазирлиги:
манфаатдор вазирликлар ва идораларнинг ахборот тизимлари билан реал вақт режимида идоралараро ахборот алмашинувини ташкил қилиш учун ягона ахборот тизимини «Ўзбектелеком» АК электрон ҳукуматнинг идоралараро маълумотлар узатиш тармоғига уласин;
«UZINFOCOM» давлат ахборот тизимларини яратиш ва қўллаб-қувватлаш бўйича ягона интегратор» МЧЖ (кейинги ўринларда — Ягона интегратор) ҳамда «Ўзбектелеком» АК билан биргаликда ягона ахборот тизимини ишлаб чиқиш бўйича техник талабларга мувофиқ ягона ахборот тизимини Ягона интегратор серверлар майдонида белгиланган тартибда жойлаштирсин.
7. Ўзбекистон Республикаси Молия вазирлиги:
Ахборот технологиялари ва коммуникацияларини ривожлантириш вазирлиги ҳамда суғурта ташкилотлари билан биргаликда 2021 йил 1 апрелга қадар Е-полис тизимини бошқа мажбурий ва ихтиёрий суғурта турларига татбиқ этиш юзасидан Вазирлар Маҳкамасига таклиф киритсин;
Жамғарма ва суғурта ташкилотлари билан биргаликда ушбу қарорнинг моҳияти ва аҳамиятини оммавий ахборот воситаларида кенг ёритилишини ташкил этсин.
8. Вазирлар Маҳкамасининг 2008 йил 24 июндаги 141-сон қарори билан тасдиқланган Транспорт воситалари эгаларининг фуқаролик жавобгарлигини мажбурий суғурта қилиш бўйича тўловларни кафолатлаш жамғармаси тўғрисидаги низомнинг 5-банди қуйидаги мазмундаги хатбоши билан тўлдирилсин:
«Е-полислар, суғурта ҳодисалари, суғурта қилдирувчилар ва жабрланганлар тўғрисидаги шахсий маълумотлардан иборат бўлган, Е-полисни сотиш ва расмийлаштириш бўйича ахборот-маълумотлар базасини шакллантириш ҳамда мажбурий суғурта бўйича мажбуриятнинг транспорт воситалари эгалари томонидан бажарилишини назорат қилиш бўйича ваколатли давлат органлар билан маълумотлар алмашинувини ташкил этиш».
9. Мазкур қарорнинг бажарилишини назорат қилиш Ўзбекистон Республикаси Бош вазирининг молия-иқтисодиёт ва камбағалликни қисқартириш масалалари бўйича ўринбосари — иқтисодий тараққиёт ва камбағалликни қисқартириш вазири Ж.А. Қўчқоров ҳамда Ўзбекистон Республикаси молия вазири Т.А. Ишметов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2020 йил 14 декабрь,
780-сон
Oʻzbekiston Respublikasi Vazirlar Mahkamasining
qarori
Elektron turdagi sugʻurta xizmatlarini koʻrsatish tartibini takomillashtirish boʻyicha qoʻshimcha chora-tadbirlar toʻgʻrisida
Oʻzbekiston Respublikasi Prezidentining “Oʻzbekiston Respublikasining sugʻurta bozorini isloh qilish va uning jadal rivojlanishini taʼminlash chora-tadbirlari toʻgʻrisida” 2019-yil 2-avgustdagi PQ-4412-son qarori ijrosini taʼminlash, shuningdek, zamonaviy axborot texnologiyalaridan keng foydalanish, sugʻurta xizmatlarining elektron turlarini faol joriy etish va rivojlantirish maqsadida Vazirlar Mahkamasi qaror qiladi:
1. Vazirlar Mahkamasining “Transport vositalari egalarining fuqarolik javobgarligini majburiy sugʻurta qilishni yanada takomillashtirish chora-tadbirlari toʻgʻrisida” 2019-yil 16-martdagi 222-son qarori ijrosini taʼminlash maqsadida onlayn tartibida faoliyat yurituvchi tegishli vazirlik va idoralarning axborot tizimlari, jismoniy va yuridik shaxslarning markaziy maʼlumotlar bazasi bilan integratsiyalashgan transport vositalari egalarining fuqarolik javobgarligini majburiy sugʻurta qilish boʻyicha yagona axborot tizimi (keyingi oʻrinlarda — yagona axborot tizimi) joriy etilgani maʼlumot uchun qabul qilinsin.
2. Oʻzbekiston Respublikasi Moliya vazirligi, Axborot texnologiyalari va kommunikatsiyalarini rivojlantirish vazirligi va Sugʻurta toʻlovlarini kafolatlash jamgʻarmasining elektron turdagi sugʻurta xizmatlarini (keyingi oʻrinlarda — E-polis) yagona axborot tizimi tarkibida amalga oshirish haqidagi takliflariga rozilik berilsin.
3. Oʻzbekiston Respublikasi Moliya vazirligi Sugʻurta toʻlovlarini kafolatlash jamgʻarmasi (keyingi oʻrinlarda — Jamgʻarma) bilan birgalikda 2021-yil 1-iyulga qadar yagona axborot tizimi tarkibida E-polislarni sotish va rasmiylashtirishga moʻljallangan majburiy sugʻurta boʻyicha faoliyat olib boruvchi sugʻurta tashkilotlarining hamda manfaatdor vazirliklar va idoralarning axborot tizimlari va maʼlumotlar bazasi bilan integratsiyalashgan axborot modullarini joriy etsin.
5. Belgilansinki:
Oʻzbekiston Respublikasi Moliya vazirligi sugʻurta tashkilotlari bilan birgalikda 2021-yil 1-martdan boshlab Transport vositalari egalarining fuqarolik javobgarligini majburiy sugʻurta qilish boʻyicha E-polisni sotish, rasmiylashtirishni amalga oshiradi;
sugʻurta tashkilotlari tomonidan xorijiy davlatlarda roʻyxatdan oʻtkazilgan hamda Oʻzbekiston Respublikasi hududida vaqtincha foydalanilayotgan transport vositalari egalari bilan E-polisni rasmiylashtirishga yoʻl qoʻyilmaydi;
E-polis qogʻoz shaklidagi shartnomaga (polisga) tenglashtiriladi;
yagona axborot tizimi tarkibida E-polisni rasmiylashtirish boʻyicha tegishli axborot modullarni ishlab chiqish va joriy etishni moliyalashtirish Jamgʻarma hisobidan amalga oshiriladi.
Bunda ushbu qaror bilan joriy etilayotgan mexanizmni amalga oshirish doirasida:
tegishli vazirliklar va idoralar — E-polisni rasmiylashtirishda zarur boʻlgan maʼlumotlarni yagona axborot tizimiga taqdim etish uchun;
sugʻurta tashkilotlari — majburiy sugʻurta boʻyicha majburiyatning transport vositalari egalari tomonidan bajarilishini nazorat qilishda zarur boʻlgan maʼlumotlarni yagona axborot tizimiga taqdim etish uchun;
Jamgʻarma — E-polisni rasmiylashtirishda zarur boʻlgan axborot-maʼlumotlar tegishli vazirliklar va idoralar hamda sugʻurta tashkilotlari oʻrtasida almashinuvini taʼminlash uchun javobgar ekanligi belgilab qoʻyilsin.
6. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi:
manfaatdor vazirliklar va idoralarning axborot tizimlari bilan real vaqt rejimida idoralararo axborot almashinuvini tashkil qilish uchun yagona axborot tizimini “Oʻzbektelekom” AK elektron hukumatning idoralararo maʼlumotlar uzatish tarmogʻiga ulasin;
“UZINFOCOM” davlat axborot tizimlarini yaratish va qoʻllab-quvvatlash boʻyicha yagona integrator” MCHJ (keyingi oʻrinlarda — Yagona integrator) hamda “Oʻzbektelekom” AK bilan birgalikda yagona axborot tizimini ishlab chiqish boʻyicha texnik talablarga muvofiq yagona axborot tizimini Yagona integrator serverlar maydonida belgilangan tartibda joylashtirsin.
7. Oʻzbekiston Respublikasi Moliya vazirligi:
Axborot texnologiyalari va kommunikatsiyalarini rivojlantirish vazirligi hamda sugʻurta tashkilotlari bilan birgalikda 2021-yil 1-aprelga qadar E-polis tizimini boshqa majburiy va ixtiyoriy sugʻurta turlariga tatbiq etish yuzasidan Vazirlar Mahkamasiga taklif kiritsin;
Jamgʻarma va sugʻurta tashkilotlari bilan birgalikda ushbu qarorning mohiyati va ahamiyatini ommaviy axborot vositalarida keng yoritilishini tashkil etsin.
8. Vazirlar Mahkamasining 2008-yil 24-iyundagi 141-son qarori bilan tasdiqlangan Transport vositalari egalarining fuqarolik javobgarligini majburiy sugʻurta qilish boʻyicha toʻlovlarni kafolatlash jamgʻarmasi toʻgʻrisidagi nizomning 5-bandi quyidagi mazmundagi xatboshi bilan toʻldirilsin:
“E-polislar, sugʻurta hodisalari, sugʻurta qildiruvchilar va jabrlanganlar toʻgʻrisidagi shaxsiy maʼlumotlardan iborat boʻlgan, E-polisni sotish va rasmiylashtirish boʻyicha axborot-maʼlumotlar bazasini shakllantirish hamda majburiy sugʻurta boʻyicha majburiyatning transport vositalari egalari tomonidan bajarilishini nazorat qilish boʻyicha vakolatli davlat organlar bilan maʼlumotlar almashinuvini tashkil etish”.
9. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — iqtisodiy taraqqiyot va kambagʻallikni qisqartirish vaziri J.A. Qoʻchqorov hamda Oʻzbekiston Respublikasi moliya vaziri T.A. Ishmetov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 14-dekabr,
780-son