📅 2020-yil 15-dekabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 15 декабрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 15 декабря 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 15 December 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Судьялар ва уларнинг оила аъзолари пенсия таъминоти шартлари, меъёрлари ҳамда тартиби тўғрисидаги низомга ўзгартиришлар ва қўшимча киритиш ҳақида
Ўзбекистон Республикаси Президентининг «Судлар фаолиятини янада такомиллаштириш ва одил судлов самарадорлигини оширишга доир қўшимча чора-тадбирлар тўғрисида» 2020 йил 24 июлдаги ПФ-6034-сон Фармонига мувофиқ, шунингдек, судьяларнинг пенсия таъминоти шартлари, меъёрлари ва тартибини янада такомиллаштириш мақсадида Вазирлар Маҳкамаси қарор қилади:
1. Ўзбекистон Республикаси Президентининг «Судлар фаолиятини янада такомиллаштириш ва одил судлов самарадорлигини оширишга доир қўшимча чора-тадбирлар тўғрисида» 2020 йил 24 июлдаги ПФ-6034-сон Фармонининг 6-бандига мувофиқ:
Ўзбекистон Республикаси Олий суди аппарати раҳбари, бошқарма бошлиқларига нисбатан Олий суд судьялари учун белгиланган, Олий суднинг бошқарув ходимлари таркибига киритилган бошқа ходимларига нисбатан эса, вилоят судлари судьялари учун белгиланган меҳнатга ҳақ тўлаш ва моддий рағбатлантириш шартлари татбиқ этилганлиги;
бунда, қайд этилган шартлар фақат муқаддам судьялик лавозимида ишлаган шахсларга нисбатан қўлланилиши, ушбу шахсларнинг шу лавозимларда ишлаган вақти судьялик стажига қўшилиши ва пенсия тайинлашда ҳисобга олиниши белгиланганлиги маълумот учун қабул қилинсин.
2. Вазирлар Маҳкамасининг 2019 йил 9 январдаги 11-сон қарори (Ўзбекистон Республикаси ҚТ, 2019 й., 1-сон, 1-модда) билан тасдиқланган Судьялар ва уларнинг оила аъзолари пенсия таъминоти шартлари, меъёрлари ҳамда тартиби тўғрисидаги низомга ўзгартиришлар ва қўшимча киритилсин.
3. Ўзбекистон Республикаси Молия вазирлиги манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
4. Мазкур қарор 2021 йил 1 январдан бошлаб кучга киради.
5. Ушбу қарорнинг бажарилишини назорат қилиш Ўзбекистон Республикаси Бош вазирининг молия-иқтисодиёт ва камбағалликни қисқартириш масалалари бўйича ўринбосари — Ўзбекистон Республикаси иқтисодий тараққиёт ва камбағалликни қисқартириш вазири Ж.А. Қўчқоров зиммасига юклатилсин.
Вазирлар Маҳкамасининг 2020 йил 15 декабрдаги 783-сон қарорига ИЛОВА
Судьялар ва уларнинг оила аъзолари пенсия таъминоти шартлари, меъёрлари ҳамда тартиби тўғрисидаги низомга киритилаётган ўзгартиришлар ва қўшимча
1. 3-банднинг «в» кичик банди «Ёш» устунидаги «50 ёшдан 60 ёшгача» сўзлари «50 ёш ва ундан ошганда» сўзлари билан алмаштирилсин.
2. 4-банд қуйидаги таҳрирда баён этилсин:
«4. Судья лавозимидаги иш стажига эга бўлган ва ушбу Низомнинг 30-бандида назарда тутилган лавозимларда ишлаган шахслар ҳам, мазкур лавозимларда узлуксиз бўлганлигидан қатъи назар, ушбу бандда белгиланган тартибда пенсия олиш ҳуқуқига эга».
3. 30-бандда :
а) иккинчи , учинчи ва бешинчи хатбошилар қуйидаги таҳрирда баён этилсин:
«шахснинг Ўзбекистон Республикаси Олий Мажлиси Қонунчилик палатаси, Сенати, Ўзбекистон Республикаси Президенти ёки Ҳукуматининг қарорлари билан лавозимда бўлган даври;
шахснинг Ўзбекистон Республикаси Олий Мажлиси Қонунчилик палатаси ёки Сенати аъзоси этиб сайланган (тайинланган) даври;
ҳарбий хизматчилар, ички ишлар идоралари бошлиқлар ва оддий ходимлар таркибидан бўлган шахсларнинг юридик ихтисослик бўйича хизмати даври, шунингдек, прокуратура идораларида даражали унвонлар (ҳарбий унвонлар)га эга ходимларнинг ишлаган даври»;
б) қуйидаги мазмундаги олтинчи ва еттинчи хатбошилар қўшилсин:
«илгари судья лавозимида ишлаган шахсларнинг Ўзбекистон Республикаси Олий суди аппарати раҳбари, бошқарма бошлиғи ёки Олий суднинг бошқарув ходимлари таркибига киритилган бошқа лавозимларда ишлаган даври;
Ўзбекистон Республикаси Судьялар олий кенгаши ҳузуридаги Судьялар олий мактабига ишга жалб қилинган ва малака даражаларига эга бўлган судьялар ва уларга тенглаштирилган шахсларнинг Судьялар олий мактабида ишлаган даври ҳисобга олинади»;
в) олтинчи ва еттинчи хатбошилар тегишлича саккизинчи ва тўққизинчи хатбошилар деб ҳисоблансин.
4. 49-банднинг учинчи хатбошисидаги «3-банди «г» кичик бандига» сўзлари «3-банди «в» кичик бандига» сўзлари билан алмаштирилсин.
Ўзбекистон Республикасининг Бош вазири А. АРИПОВ
Тошкент ш.,
2020 йил 15 декабрь,
783-сон
Oʻzbekiston Respublikasi Vazirlar Mahkamasining
qarori
Sudyalar va ularning oila aʼzolari pensiya taʼminoti shartlari, meʼyorlari hamda tartibi toʻgʻrisidagi nizomga oʻzgartirishlar va qoʻshimcha kiritish haqida
Oʻzbekiston Respublikasi Prezidentining “Sudlar faoliyatini yanada takomillashtirish va odil sudlov samaradorligini oshirishga doir qoʻshimcha chora-tadbirlar toʻgʻrisida” 2020-yil 24-iyuldagi PF-6034-son Farmoniga muvofiq, shuningdek sudyalarning pensiya taʼminoti shartlari, meʼyorlari va tartibini yanada takomillashtirish maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining “Sudlar faoliyatini yanada takomillashtirish va odil sudlov samaradorligini oshirishga doir qoʻshimcha chora-tadbirlar toʻgʻrisida” 2020-yil 24-iyuldagi PF-6034-son Farmonining 6-bandiga muvofiq:
Oʻzbekiston Respublikasi Oliy sudi apparati rahbari, boshqarma boshliqlariga nisbatan Oliy sud sudyalari uchun belgilangan, Oliy sudning boshqaruv xodimlari tarkibiga kiritilgan boshqa xodimlariga nisbatan esa, viloyat sudlari sudyalari uchun belgilangan mehnatga haq toʻlash va moddiy ragʻbatlantirish shartlari tatbiq etilganligi;
bunda, qayd etilgan shartlar faqat muqaddam sudyalik lavozimida ishlagan shaxslarga nisbatan qoʻllanilishi, ushbu shaxslarning shu lavozimlarda ishlagan vaqti sudyalik stajiga qoʻshilishi va pensiya tayinlashda hisobga olinishi belgilanganligi maʼlumot uchun qabul qilinsin.
2. Vazirlar Mahkamasining 2019-yil 9-yanvardagi 11-son qarori (Oʻzbekiston Respublikasi QT, 2019-y., 1-son, 1-modda) bilan tasdiqlangan Sudyalar va ularning oila aʼzolari pensiya taʼminoti shartlari, meʼyorlari hamda tartibi toʻgʻrisidagi nizomga oʻzgartirishlar va qoʻshimcha kiritilsin.
3. Oʻzbekiston Respublikasi Moliya vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
4. Mazkur qaror 2021-yil 1-yanvardan boshlab kuchga kiradi.
5. Ushbu qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — Oʻzbekiston Respublikasi iqtisodiy taraqqiyot va kambagʻallikni qisqartirish vaziri J.A. Qoʻchqorov zimmasiga yuklatilsin.
Vazirlar Mahkamasining 2020-yil 15-dekabrdagi 783-son qaroriga ILOVA
Sudyalar va ularning oila aʼzolari pensiya taʼminoti shartlari, meʼyorlari hamda tartibi toʻgʻrisidagi nizomga kiritilayotgan oʻzgartirishlar va qoʻshimcha
1. 3-bandning “v” kichik bandi “Yosh” ustunidagi “50 yoshdan 60 yoshgacha” soʻzlari “50 yosh va undan oshganda” soʻzlari bilan almashtirilsin.
2. 4-band quyidagi tahrirda bayon etilsin:
“4. Sudya lavozimidagi ish stajiga ega boʻlgan va ushbu Nizomning 30-bandida nazarda tutilgan lavozimlarda ishlagan shaxslar ham, mazkur lavozimlarda uzluksiz boʻlganligidan qatʼi nazar, ushbu bandda belgilangan tartibda pensiya olish huquqiga ega”.
3. 30-bandda :
a) ikkinchi , uchinchi va beshinchi xatboshilar quyidagi tahrirda bayon etilsin:
“shaxsning Oʻzbekiston Respublikasi Oliy Majlisi Qonunchilik palatasi, Senati, Oʻzbekiston Respublikasi Prezidenti yoki Hukumatining qarorlari bilan lavozimda boʻlgan davri;
shaxsning Oʻzbekiston Respublikasi Oliy Majlisi Qonunchilik palatasi yoki Senati aʼzosi etib saylangan (tayinlangan) davri;
harbiy xizmatchilar, ichki ishlar idoralari boshliqlar va oddiy xodimlar tarkibidan boʻlgan shaxslarning yuridik ixtisoslik boʻyicha xizmati davri, shuningdek, prokuratura idoralarida darajali unvonlar (harbiy unvonlar)ga ega xodimlarning ishlagan davri”;
b) quyidagi mazmundagi oltinchi va yettinchi xatboshilar qoʻshilsin:
“ilgari sudya lavozimida ishlagan shaxslarning Oʻzbekiston Respublikasi Oliy sudi apparati rahbari, boshqarma boshligʻi yoki Oliy sudning boshqaruv xodimlari tarkibiga kiritilgan boshqa lavozimlarda ishlagan davri;
Oʻzbekiston Respublikasi Sudyalar oliy kengashi huzuridagi Sudyalar oliy maktabiga ishga jalb qilingan va malaka darajalariga ega boʻlgan sudyalar va ularga tenglashtirilgan shaxslarning Sudyalar oliy maktabida ishlagan davri hisobga olinadi”;
v) oltinchi va yettinchi xatboshilar tegishlicha sakkizinchi va toʻqqizinchi xatboshilar deb hisoblansin.
4. 49-bandning uchinchi xatboshisidagi “3-bandi “g” kichik bandiga” soʻzlari “3-bandi “v” kichik bandiga” soʻzlari bilan almashtirilsin.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 15-dekabr,
783-son