📅 2020-yil 15-dekabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 15 декабрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 15 декабря 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 15 December 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Ўзбекистон Бадиий академияси ҳузурида Рассомлик маҳорат устахонаси (олий рассомлик курси) фаолиятини ташкил этиш чора-тадбирлари тўғрисида
Ўзбекистон Республикаси Президентининг «Тасвирий ва амалий санъат соҳаси самарадорлигини янада оширишга доир чора-тадбирлар тўғрисида» 2020 йил 21 апрелдаги ПҚ-4688-сон қарори ижросини таъминлаш, рассомлар учун тажриба устахонаси фаолиятини ташкил этиш, тасвирий санъат соҳасида малакали кадрлар тайёрлаш учун қўшимча шароитлар яратиш ҳамда соҳада олий таълимдан кейинги таълим тизимида тайёргарлик босқичини ташкил этиш мақсадида Вазирлар Маҳкамаси қарор қилади:
1. Ўзбекистон Республикаси Президентининг «Тасвирий ва амалий санъат соҳаси самарадорлигини янада оширишга доир чора-тадбирлар тўғрисида» 2020 йил 21 апрелдаги ПҚ-4688-сон қарорига асосан:
а) Ўзбекистон Бадиий академияси ҳузурида олий ўқув юртидан кейинги таълим тизимида тайёргарлик босқичи сифатида Рассомлик маҳорат устахонаси (олий рассомлик курси) (кейинги ўринларда — Рассомлик маҳорат устахонаси) ташкил этилганлиги;
б) Рассомлик маҳорат устахонаси фаолияти 2022/2023 ўқув йилидан бошланиши;
Рассомлик маҳорат устахонаси юридик шахс мақомига эга бўлмаслиги ва Ўзбекистон Республикаси Давлат бюджети маблағлари ҳисобидан молиялаштирилиши;
ёш ижодкорлар Рассомлик маҳорат устахонасига стажёр-тадқиқотчилар учун белгиланган тартиб асосида қабул қилиниши белгиланганлиги маълумот учун қабул қилинсин.
2. Белгилаб қўйилсинки:
Рассомлик маҳорат устахонасига икки йилда бир маротаба 10 нафар стажёр-тадқиқотчилар қабул қилинади ҳамда ўқиш муддати соҳа хусусиятидан келиб чиққан ҳолда икки йил давом этади;
Рассомлик маҳорат устахонасини сақлаш харажатлари 2022 йилдан бошлаб Ўзбекистон Республикаси Давлат бюджети параметрларида Ўзбекистон Бадиий академиясига ажратиладиган маблағлар доирасида назарда тутилади.
3. Ўзбекистон Бадиий академияси белгиланган тартибда:
Рассомлик маҳорат устахонаси фаолиятини самарали ташкил этиш (моддий-техника базасини шакллантириш, асбоб-ускуна ва бошқа анжомлар билан жиҳозлаш) учун халқаро молия институтлари ва хорижий ташкилотларнинг грантларини жалб қилиш бўйича чоралар кўрсин;
бир ой муддатда Рассомлик маҳорат устахонаси тўғрисидаги низомни ишлаб чиқсин ва белгиланган тартибда тасдиқласин;
2021 йил 1 июнга қадар Ўзбекистон Республикаси Иқтисодий тараққиёт ва камбағалликни қисқартириш вазирлиги, Молия вазирлиги ҳамда манфаатдор вазирликлар ва идоралар билан келишган ҳолда Рассомлик маҳорат устахонасини махсус мебеллар, асбоб-ускуналар, стажёрлар томонидан ижодий ишларни тайёрлаш учун хомашё ва бошқа анжомлар билан жиҳозлаш нормативларини ишлаб чиқсин ва тасдиқласин;
2022 йил 1 февралга қадар Рассомлик маҳорат устахонасига Ўзбекистон Бадиий академияси биносидан хоналар ажратиш ва зарур шарт-шароитлар яратиш чораларини кўрсин.
4. Ўзбекистон Бадиий академияси манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
5. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари Б.А. Мусаев ва Ўзбекистон Бадиий академияси раиси А.В. Нуридинов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2020 йил 15 декабрь,
786-сон
Oʻzbekiston Respublikasi Vazirlar Mahkamasining
qarori
Oʻzbekiston Badiiy akademiyasi huzurida Rassomlik mahorat ustaxonasi (oliy rassomlik kursi) faoliyatini tashkil etish chora-tadbirlari toʻgʻrisida
Oʻzbekiston Respublikasi Prezidentining “Tasviriy va amaliy sanʼat sohasi samaradorligini yanada oshirishga doir chora-tadbirlar toʻgʻrisida” 2020-yil 21-apreldagi PQ-4688-son qarori ijrosini taʼminlash, rassomlar uchun tajriba ustaxonasi faoliyatini tashkil etish, tasviriy sanʼat sohasida malakali kadrlar tayyorlash uchun qoʻshimcha sharoitlar yaratish hamda sohada oliy taʼlimdan keyingi taʼlim tizimida tayyorgarlik bosqichini tashkil etish maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining “Tasviriy va amaliy sanʼat sohasi samaradorligini yanada oshirishga doir chora-tadbirlar toʻgʻrisida” 2020-yil 21-apreldagi PQ-4688-son qaroriga asosan:
a) Oʻzbekiston Badiiy akademiyasi huzurida oliy oʻquv yurtidan keyingi taʼlim tizimida tayyorgarlik bosqichi sifatida Rassomlik mahorat ustaxonasi (oliy rassomlik kursi) (keyingi oʻrinlarda — Rassomlik mahorat ustaxonasi) tashkil etilganligi;
b) Rassomlik mahorat ustaxonasi faoliyati 2022/2023 oʻquv yilidan boshlanishi;
Rassomlik mahorat ustaxonasi yuridik shaxs maqomiga ega boʻlmasligi va Oʻzbekiston Respublikasi Davlat budjeti mablagʻlari hisobidan moliyalashtirilishi;
yosh ijodkorlar Rassomlik mahorat ustaxonasiga stajyor-tadqiqotchilar uchun belgilangan tartib asosida qabul qilinishi belgilanganligi maʼlumot uchun qabul qilinsin.
2. Belgilab qoʻyilsinki:
Rassomlik mahorat ustaxonasiga ikki yilda bir marotaba 10 nafar stajyor-tadqiqotchilar qabul qilinadi hamda oʻqish muddati soha xususiyatidan kelib chiqqan holda ikki yil davom etadi;
Rassomlik mahorat ustaxonasini saqlash xarajatlari 2022-yildan boshlab Oʻzbekiston Respublikasi Davlat budjeti parametrlarida Oʻzbekiston Badiiy akademiyasiga ajratiladigan mablagʻlar doirasida nazarda tutiladi.
3. Oʻzbekiston Badiiy akademiyasi belgilangan tartibda:
Rassomlik mahorat ustaxonasi faoliyatini samarali tashkil etish (moddiy-texnika bazasini shakllantirish, asbob-uskuna va boshqa anjomlar bilan jihozlash) uchun xalqaro moliya institutlari va xorijiy tashkilotlarning grantlarini jalb qilish boʻyicha choralar koʻrsin;
bir oy muddatda Rassomlik mahorat ustaxonasi toʻgʻrisidagi nizomni ishlab chiqsin va belgilangan tartibda tasdiqlasin;
2021-yil 1-iyunga qadar Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi, Moliya vazirligi hamda manfaatdor vazirliklar va idoralar bilan kelishgan holda Rassomlik mahorat ustaxonasini maxsus mebellar, asbob-uskunalar, stajyorlar tomonidan ijodiy ishlarni tayyorlash uchun xomashyo va boshqa anjomlar bilan jihozlash normativlarini ishlab chiqsin va tasdiqlasin;
2022-yil 1-fevralga qadar Rassomlik mahorat ustaxonasiga Oʻzbekiston Badiiy akademiyasi binosidan xonalar ajratish va zarur shart-sharoitlar yaratish choralarini koʻrsin.
4. Oʻzbekiston Badiiy akademiyasi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
5. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A. Musayev va Oʻzbekiston Badiiy akademiyasi raisi A.V. Nuridinov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 15-dekabr,
786-son