📅 2020-yil 22-dekabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 22 декабрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 22 декабря 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 22 December 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
НИЗОМ
ДАЛОЛАТНОМА
РЎЙХАТИ
Ўзбекистон Республикаси ҳудудида ташқи савдо юкларини божхона назорати остида ташишни соддалаштириш, шунингдек, ташқи иқтисодий фаолият қатнашчиларини янада қўллаб-қувватлаш тўғрисида
Ўзбекистон Республикаси Президентининг «Божхона маъмуриятчилигини ислоҳ этиш ва Ўзбекистон Республикаси давлат божхона хизмати органлари фаолиятини такомиллаштириш тўғрисида» 2020 йил 5 июндаги ПФ-6005-сон Фармонига мувофиқ, шунингдек, мамлакатимизнинг транспорт логистика салоҳиятини кенгайтириш, транзит жозибадорлигини ошириш ҳамда ташқи савдо юкларини божхона назорати остидаги ташишни соддалаштириш, ташқи иқтисодий фаолият қатнашчиларини янада қўллаб-қувватлаш мақсадида Вазирлар Маҳкамаси қарор қилади:
1. Қуйидагилар:
Ўзбекистон Республикаси автомобиль йўлларида ташиладиган ва божхона ҳамроҳлигида кузатиб бориладиган божхона назорати остидаги транспорт воситалари ва товарларни, божхона ҳамроҳлигидаги кузатувни ташкил этиш, божхона ҳамроҳлигидаги кузатувлар учун божхона йиғимларини ундириш тартибини, шунингдек, божхона ҳамроҳлигидаги кузатувни амалга оширувчи ходимларнинг ҳуқуқ ва мажбуриятларини назарда тутувчи Божхона назорати остида автомобиль йўлларида ташилаётган товарларнинг божхона ҳамроҳлигидаги кузатувини ташкил этиш тартиби тўғрисидаги низом 1-иловага мувофиқ;
чет эл товарларини ташиш жараёнида божхона тўловлари тўланишини таъминлашни ваколатли шахслар билан реал вақт режимида ва интерактив шаклда ўзаро ҳамкорлик асосида ҳисобга олиш ва назорат қилиш, шунингдек, божхона органи рухсатисиз товарлар бериб юборилганда, йўқотилганда ёки манзил божхона постига белгиланган муддатда ҳамда ўзгармас ҳолатда етказилмаганда, божхона тўловларини ҳисоблаш ва ундириш тартибини назарда тутувчи Чет эл товарларини ташиш жараёнида божхона тўловлари тўланишини таъминлашни ваколатли шахслар билан реал вақт режимида ва интерактив шаклда ўзаро ҳамкорлик асосида ҳисобга олиш ва назорат қилиш тартиби тўғрисидаги низом 2-иловага мувофиқ тасдиқлансин.
2. Белгилансинки, божхона ҳамроҳлигида кузатиб бориладиган товарлар ва транспорт воситаларининг божхона расмийлаштируви жўнатувчи ҳамда манзил божхона постларида, шунингдек, қабул қилиш-топшириш пунктларида устувор тартибда амалга оширилади.
3. Ўзбекистон Республикаси Ҳукуматининг 3-иловага мувофиқ баъзи қарорлари ўз кучини йўқотган деб ҳисоблансин.
4. Ўзбекистон Республикаси Давлат божхона қўмитаси манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
5. Мазкур қарорнинг бажарилишини назорат қилиш Ўзбекистон Республикаси Бош вазирининг молия-иқтисодиёт ва камбағалликни қисқартириш масалалари бўйича ўринбосари — иқтисодий тараққиёт ва камбағалликни қисқартириш вазири Ж.А. Қўчқоров зиммасига юклансин.
Вазирлар Маҳкамасининг 2020 йил 22 декабрдаги 800-сон қарорига 1-ИЛОВА
Божхона назорати остида автомобиль йўлларида ташилаётган товарларнинг божхона ҳамроҳлигидаги кузатувини ташкил этиш тартиби тўғрисида
1-боб. Умумий қоидалар
1. Мазкур Низом Ўзбекистон Республикаси автомобиль йўлларида ташиладиган божхона назорати остидаги транспорт воситалари ва товарларни божхона ҳамроҳлигида кузатиб бориш тартибини белгилайди.
2. Ушбу Низомда қуйидаги асосий тушунчалар қўлланилади:
божхона ҳамроҳлигида кузатиб бориш — автотранспорт воситаларининг божхона органлари томонидан хавфсиз ҳаракатланишини таъминлаш мақсадида божхона назорати остида махсус жиҳозланган автомобиль ёрдамида кузатиб борилиши;
жўнатувчи божхона пости — товарларнинг барча туркуми ёки унинг бир қисми учун божхона ҳамроҳлигидаги кузатув бошланадиган божхона пости;
қабул қилиш-топшириш пункти — божхона ҳамроҳлигида кузатиб борилаётган товарлар, транспорт воситалари ва уларга тегишли ҳужжатларни қабул қилиш-топшириш амалга ошириладиган жой;
манзилдаги божхона пости — товарларнинг барча туркуми ёки унинг бир қисми учун божхона ҳамроҳлигидаги кузатув тугайдиган божхона пости;
ташувчи — божхона назорати остида турган чет эл товарлари ташилишини амалга оширувчи ёки транспорт воситасидан фойдаланиш учун масъул шахс;
транспорт воситалари — йўловчиларни ва товарларни ташиш учун фойдаланиладиган барча воситалар, шу жумладан, контейнерлар ва бошқа транспорт жиҳозлари.
3. Товарлар ва транспорт воситаларини божхона ҳамроҳлигида кузатиб бориш товарлар ва транспорт воситалари божхона назорати остида ташилаётганда Ўзбекистон Республикасининг божхона тўғрисидаги қонунчилик ҳужжатларига риоя этилишини таъминлаш мақсадида амалга оширилади.
4. Божхона ҳамроҳлигидаги кузатувни амалга оширувчи ходимлар ушбу Низом талабларига амал қилади ва божхона пости бошлиғига бўйсунади.
5. Божхона ҳамроҳлигидаги кузатувни амалга ошириш учун ходимлар ва махсус жиҳозланган автомобилларни ажратиш, божхона ҳамроҳлигида кузатиладиган товарлар ва транспорт воситаларини қабул қилиш-топшириш пунктлари, кузатув ҳужжатларини расмийлаштириш тартиби ва уларнинг шакллари, шунингдек, божхона ҳамроҳлигида кузатувни амалга оширувчи ходимларнинг ўзаро ҳамкорлик тартиби Ўзбекистон Республикаси Давлат божхона қўмитаси (кейинги ўринларда — Давлат божхона қўмитаси) томонидан белгиланади.
6. Божхона ҳамроҳлигида кузатувни амалга оширишда ташувчи, юк жўнатувчи ёки юк қабул қилувчининг сарфланган харажатлари божхона органлари томонидан қоплаб берилмайди.
7. Божхона ҳамроҳлигида кузатиб борилаётган божхона назорати остидаги товарлар, транспорт воситалари ва уларнинг ҳужжатларига нисбатан Ўзбекистон Республикасининг божхона тўғрисидаги қонунчилик ҳужжатларида назарда тутилган божхона назорати шакллари қўлланилиши мумкин.
8. Жўнатувчи ҳамда манзилдаги божхона постларида, шунингдек, қабул қилиш-топшириш пунктларида божхона ҳамроҳлигида кузатиб бориладиган товарлар ва транспорт воситаларининг божхона расмийлаштируви устувор тартибда амалга оширилади.
2-боб. Божхона ҳамроҳлигидаги кузатув остида амалга ошириладиган ташиш
9. Божхона ҳамроҳлигида кузатиб бориш чет эл товарларини ташиётган автотранспорт воситаларига нисбатан қўлланилади, қуйидаги ҳоллар бундан мустасно:
товарлар Халқаро йўлларда ташиш дафтарчасини қўллаган ҳолда юкларни халқаро ташиш тўғрисидаги божхона конвенциясига (Женева, 1975 йил 14 ноябрь) мувофиқ ташилган тақдирда;
миллий автоташувчилар томонидан импорт товарларни божхона назорати остида ташиш учун жиҳозланган транспорт воситаларида ташилган тақдирда;
товарлар қонунчилик ҳужжатларига мувофиқ, биринчи ва учинчи турдаги гувоҳнома асосида ваколатли иқтисодий операторлар реестрига киритилган юридик шахслар томонидан амалга оширилганда;
Ўзбекистон Республикаси Божхона кодексининг 47-бобига мувофиқ божхона тўловлари тўланиши таъминланган тақдирда;
товарлар божхона ҳудудига инсонпарварлик ёрдами ва техник кўмак сифатида, шунингдек, халқаро почта жўнатмалари ва фельдъегер почтаси сифатида тасдиқловчи ҳужжатлар бўлган тақдирда олиб кирилганда.
Агар хавфни бошқариш тизимида назорат чораси мавжуд бўлса, давлат божхона хизмати органлари қонунчилик ҳужжатларида белгиланган тартибда чет эл товарларини ташиётган автотранспорт воситаларига нисбатан божхона ҳамроҳлигида кузатиб бориш қўлланилади.
10. Божхона ҳамроҳлигидаги кузатувдан озод этиш учун божхона тўловлари тўланишини таъминлаш чет эл товарлари «эркин муомалага чиқариш» божхона режимига расмийлаштирилганда тўланиши лозим бўлган фоиз ва миқдорларда, преференциялар ҳамда имтиёзлар инобатга олинмаган ҳолда ҳисобланган миқдордан кам бўлмаслиги лозим.
11. Божхона ҳамроҳлигидаги кузатувдан озод этиш учун божхона тўловлари тўланишини таъминлашнинг энг юқори миқдори миллий валютада компенсация тўлаш тўғрисида қарор қабул қилинган кундаги Ўзбекистон Республикаси Марказий банкининг расмий курси бўйича, чет эл товарлари ташилаётган битта транспорт воситаси учун юз минг евро эквивалентидан ошмаслиги лозим, тирик ҳайвонлар ташилаётган транспорт воситаларини божхона ҳамроҳлигидаги кузатувдан озод этиш учун божхона тўловлари тўланишини таъминлаш бундан мустасно.
12. Божхона ҳамроҳлигидаги кузатувдан озод этиш учун божхона тўловлари тўланишини таъминлаш Ўзбекистон Республикаси Ягона интерактив давлат хизматлари портали (кейинги ўринларда — ЯИДХП) орқали Давлат божхона қўмитасига миллий валютада тақдим этилади.
13. Божхона тўловларининг тўланиши таъминланган суммаси чет эл товарлари «эркин муомалага чиқариш» божхона режимига расмийлаштирилганда тўланиши лозим бўлган божхона тўловлари миқдорига мувофиқ бўлмаганда ёки кам бўлганда, божхона пости ходими шу вақтнинг ўзида ЯИДХП орқали сабабларини кўрсатган ҳолда, чет эл товарларини ташиётган автотранспорт воситаларига нисбатан божхона ҳамроҳлигида кузатиб боришдан озод қилишни рад этади.
3-боб. Божхона ҳамроҳлигидаги кузатувни ташкиллаштириш
14. Товарлар ва транспорт воситаларининг божхона ҳамроҳлигидаги кузатуви автотранспорт воситаларининг турини инобатга олган ҳолда, ҳаракатланиш учун қулай ва якуний манзилга етказиб бериш учун қисқа йўналиш (катта ҳажмли ва оғир вазнли автотранспорт воситалари, шунингдек, махсус, хавфли ҳамда катта ҳажмли ва оғир вазнли юкларни ташийдиган автотранспорт воситалари бундан мустасно) бўйлаб амалга оширилади.
Божхона ҳамроҳлигидаги кузатувни амалга ошириш давомийлиги оддий юкларни якуний манзилгача ташиш муддатларидан кўп бўлмаслиги лозим.
15. Божхона ҳамроҳлигидаги кузатув «BOJXONA NAZORATI» ёзувли, овоз бериш, сигнал ёритгичли қурилмалар билан жиҳозланган махсус транспорт воситасида амалга оширилади.
Қўл юки сифатида ташилаётган чет эл товарининг божхона ҳамроҳлигидаги кузатуви ушбу қўл юкини божхона чегараси орқали амалда олиб ўтаётган шахснинг Ўзбекистон Республикаси Божхона кодекси талаблари асосида ташувчи сифатида жавобгарлиги остида ва ушбу шахс хоҳишига кўра, унга тегишли бўлган ёки у томонидан ижарага олинган (ёлланган) ёхуд бошқа транспорт воситасида амалга оширилиши мумкин.
Бунда божхона ҳамкорлигида кузатиб бориш билан боғлиқ харажатлар ташувчи ёки бошқа манфаатдор шахслар томонидан қопланади.
16. Божхона ҳамроҳлигида кузатиб бориш куннинг ёруғ вақтида, автотранспорт воситаси жўнатувчи божхона органига етиб келган пайтдан эътиборан олти соатдан кечиктирмай бошланиши керак. Ўзбекистон Республикаси Президенти Администрацияси ёки Вазирлар Маҳкамасининг тегишли ёзма топшириғи асосида куннинг қоронғи вақтида ҳам кузатув амалга оширилиши мумкин.
Агар бир йўналиш бўйлаб ҳаракатланувчи транспорт воситаларининг сони йигирматага етса, божхона ҳамроҳлигидаги кузатув дарҳол бошланади.
17. Қабул қилиш ва топшириш пунктларида тескари йўналиш бўйича божхона ҳамроҳлигида кузатиб борилаётган товарлар ва транспорт воситалари ҳаракатланиш учун тайёр бўлганда, божхона ходимлари қабул қилиш ва топширишни ушбу пунктда амалга оширади.
Қарама-қарши йўналишда ҳаракатланаётган автотранспорт воситалари колоннаси ҳаракатининг йўналиши ва вақти мос тушган ҳолларда, учрашув жойида қабул қилиш-топширишни амалга оширишга рухсат берилади. Бунда божхона ҳамроҳлигида кузатиб борилаётган ҳамда хизмат автотранспорт воситалари тўхтаганда, бошқа транспорт воситалари ҳаракатига халал бермаслиги ва шахслар ҳаётига хавф солмаслиги лозим.
Божхона ҳамроҳлигидаги кузатувни амалга оширишда ҳужжатлар ушбу Низомнинг 26 — 31-бандларига мувофиқ расмийлаштирилади.
18. Жўнатувчи божхона пости бошлиғи ёки унинг вазифасини бажарувчи шахс:
автотранспорт воситаларини божхона ҳамроҳлигида кузатиб бориш учун ходимларни ажратади;
божхона ҳамроҳлигида кузатувни амалга оширувчи ходимларга божхона тўғрисидаги қонунчилик ҳужжатларига риоя этилиши, маълумотларни электрон тизимларга ўз вақтида, тўғри киритиш, божхона ҳужжатларини тўғри расмийлаштириш ҳамда ҳудудий божхона бошқармалари масъул ходимлари билан ўзаро алоқада бўлиш тартиблари юзасидан тушунтиришлар беради.
19. Божхона ҳамроҳлигида кузатиб бориладиган транспорт воситалари ҳужжатларини расмийлаштирадиган жўнатувчи божхона пости масъул ходими:
ҳужжатларни ўрганиб чиқади, транспорт воситалари эшик ва люкларининг, қўл юки идиши ҳамда улардаги қулфларнинг ишончлилиги, шунингдек, қиёслаш воситаларини, муҳрларнинг бутлигини текширган ҳолда, божхона ҳамроҳлигидаги кузатувни амалга ошириш учун зарур ҳужжатларни расмийлаштиради. Агар текшириш давомида товарлар ташилаётган транспорт воситаси қонунчилик ҳужжатларида белгиланган талабларга мувофиқ бўлмаса, товарларни ташишга транспорт воситасини лозим даражада жиҳозлаш ёхуд божхона тўғрисидаги қонунчилик ҳужжатларига риоя этилишини таъминлаш бўйича чоралар кўриш шарти билан рухсат беради;
божхона ҳамроҳлигида кузатиб борилаётган товарлар, транспорт воситалари ва уларга тегишли ҳужжатларни белгиланган тартибда топширади.
20. Божхона ҳамроҳлигидаги кузатувни амалга оширувчи ходим:
божхона ҳамроҳлигида кузатиб борилаётган товарлар, транспорт воситалари ва уларга тегишли ҳужжатларни белгиланган тартибда қабул қилади;
божхона ҳамроҳлигида кузатиб бориладиган товарлар ва транспорт воситаларини қабул қилиб олишда транспорт воситалари эшик ва люкларининг, қўл юки идиши ҳамда улардаги қулфларнинг ишончлилиги, шунингдек, улардаги қиёслаш воситалари, муҳрларнинг бутлигини текширади, камчиликлар аниқланганда, ташувчидан аниқланган камчиликларни бартараф қилишни талаб қилади;
тижорат ва транспорт ҳужжатларида кўрсатилган маълумотлар билан транспорт воситасига қўйилган божхона идентификация воситалари мослигини текширади;
божхона ҳамроҳлигида кузатиб боришни амалга ошириш жараёнида кузатилаётган товарга тегишли бўлган барча ҳужжатларни шахсан ўзида сақлайди;
пост бошлиғи ёки унинг ўринбосари кўрсатмасига асосан товар ва транспорт воситаларининг белгиланган тартибда божхона ҳамроҳлигида кузатиб борилишини амалга ошириш ва уларни белгиланган манзилга етказиш чораларини кўради.
Бир йўналишда ҳаракатланишга мўлжалланган йўлларда кузатилаётган автотранспорт воситалари ортида тўпланган транспорт воситаларини ўтказиб юбориш чораларини кўради.
21. Йўналиш бўйича кейинги ҳудудий божхона бошқармасининг божхона ҳамроҳлигидаги кузатувни амалга оширувчи масъул ходимлари қабул қилиш-топширишни мазкур Низомнинг 17-бандига мувофиқ белгиланган жойларда ва 22-бандида келтирилган тартибда амалга оширадилар.
22. Сўнги манзилдаги божхона постига етказиб берилган товарлар ва транспорт воситалари мазкур божхона постининг масъул ходимига топширилади ҳамда божхона назорати зонасига жойлаштирилади.
4-боб. Божхона ҳамроҳлигидаги кузатув учун божхона йиғимлари
23. Божхона ҳамроҳлигидаги кузатув учун божхона йиғимлари Вазирлар Маҳкамаси томонидан тасдиқланган миқдорларда ундирилади, қонунчилик ҳужжатларига мувофиқ божхона ҳамроҳлигидаги кузатув учун божхона йиғимларидан озод этилган ҳолатлар бундан мустасно.
24. Божхона ҳамроҳлигидаги кузатув учун божхона йиғимлари олдиндан ёки божхона ҳудудида тўланиши лозим.
Бир транспорт воситасида ҳамда битта қўл юки ташилаётган транспорт воситасида бир нечта божхона постлари учун мўлжалланган товарларни ташишда, божхона ҳамроҳлигидаги кузатув учун божхона йиғими, биринчи жўнатиш божхона постидан якуний манзилдаги постигача бўлган масофадан келиб чиққан ҳолда бир маротаба ундирилади.
25. Божхона ҳамроҳлигидаги кузатув учун божхона йиғимлари ташувчи ёки бошқа манфаатдор шахслар томонидан тўланади.
5-боб. Божхона ҳамроҳлигидаги кузатув
26. Божхона ҳамроҳлигидаги кузатувни амалга оширувчи ходимлар томонидан ташув иш шартлари ва товарларнинг хусусиятларидан келиб чиққан ҳолда йигирматадан кўп бўлмаган автотранспорт воситалари кузатиб борилиши мумкин.
Тўхташ вақтида божхона ҳамроҳлигидаги кузатувни амалга оширувчи ходимлар автотранспорт воситалари гуруҳи назоратини таъминлаши лозим.
27. Божхона ҳамроҳлигидаги кузатувни амалга ошириш давомида авария ёки енгиб бўлмас куч таъсирида ёхуд бошқа ҳолларда транспорт воситаларидан бирининг носозлиги юзага келиб, ҳаракатни давом эттира олмаганда, божхона ҳамроҳлигидаги кузатувни амалга оширувчи ходимлар транспорт воситалари гуруҳи ҳаракатини тўхтатади ва бу ҳақда ушбу ҳудуддаги ҳудудий божхона бошқармасига ёки энг яқин ҳудудда жойлашган божхона постига хабар беради, шунингдек, товарлар йўқотилишининг олдини олиш бўйича зудлик билан божхона назоратини таъминлаш чораларини кўради.
Ҳаракатни давом эттириш учун носоз ҳолга келган автотранспорт воситасини ҳудудий божхона бошқармаси ёки божхона пости масъул ходимига топширгандан сўнг белгиланган тартибда қолган автотранспорт воситаларининг божхона ҳамроҳлигидаги кузатувини давом эттиради.
Агарда, автотранспорт воситаси носозлигини қисқа вақтда бартараф этиш имкони мавжуд бўлса, таъмирлаш тугатилгандан сўнг божхона ҳамроҳлигидаги кузатув давом эттирилади. Содир бўлган ҳолат тўғрисида юзага келган ҳолат, уни бартараф этиш юзасидан кўрилган чоралар, товарларнинг ҳолати ҳамда кейинчалик божхона назорати ва расмийлаштирувини амалга ошириш учун зарур бўлган бошқа маълумотларни акс эттирган ҳолда далолатнома тузилади.
28. Божхона ҳамроҳлигида кузатиб бориш жараёнида товар ва транспорт воситаси авария ёки енгиб бўлмас куч таъсирида шикастланган, фойдаланиш учун яроқсиз ҳолга келиб қолган ёки йўқ бўлганда, божхона ҳамроҳлигидаги кузатувни амалга оширувчи ходимлар ташувчи ва ҳалокат содир бўлган йўл участкасида хизмат кўрсатувчи йўл-патруль хизмати ва бошқа ваколатли орган ходимлари билан биргаликда содир бўлган ҳолат тўғрисида далолатнома тўлдиради.
Божхона ҳамроҳлигидаги кузатувни амалга ошираётган ходимлар юзага келган ҳолат бўйича зудлик билан ҳудудий божхона бошқармаси навбатчилик қисмига ва божхона пости бошлиғига хабар беради.
Ҳудудий божхона бошқармаси ва божхона пости раҳбарияти содир бўлган ҳолат бўйича кечиктириб бўлмайдиган зарур чораларни кўради.
29. Божхона ҳамроҳлигида кузатиб борилаётган транспорт воситалари ички ишлар органларининг блок постларида тўхтатилиши ҳамда товарларни кўриш учун автомобилнинг юк бўлмаси очилиши тақиқланади.
Божхона ҳамроҳлигида кузатиб борилаётган транспорт воситаларини тўхтатишга фақат товар ва транспорт воситалари Ўзбекистон Республикаси қонунчилик ҳужжатлари талабларини бузган ҳолда, божхона ҳамроҳлигидаги кузатув остида ҳаракатланаётганлиги тўғрисида гумон қилиш учун жиддий асослар мавжуд бўлган тақдирда, Давлат божхона қўмитаси ва унинг ҳудудий бошқармаси раҳбарияти томонидан берилган ёзма кўрсатма мавжуд бўлганда йўл қўйилади.
30. Божхона ҳамроҳлигида кузатиб бориш давомида товарлар ва транспорт воситалари божхона кўригидан ўтказилганда белгиланган тартибда далолатнома тўлдирилиб, унинг бир нусхаси тижорат ҳамда транспорт ҳужжатларига илова қилинади, иккинчи нусхаси божхона кўригини амалга оширган божхона органи иш юритувида қолади ва Давлат божхона қўмитасининг ягона автоматлаштирилган ахборот тизимига тегишли маълумотлар киритилади. Божхона ҳамроҳлигидаги кузатув остида бўлган транспорт воситасининг юкхонаси ёки қўл юки идишига янги махсус божхона пломбаси қўйилади.
31. Божхона ҳамроҳлигидаги кузатув остида олиб кетилаётган транспорт воситаси божхона ҳамроҳлигидаги кузатувни амалга оширувчи ходимларнинг қонуний талабини бажармасдан кетиб қолганда, зудлик билан бу ҳақда ушбу ҳудуддаги ҳудудий божхона бошқармаси ҳамда ўзи хизмат олиб бораётган ҳудудий божхона бошқармалари навбатчилик қисмига хабар беради.
Хабарни олган навбатчилик қисми ички ишлар органларининг ҳудудий таркибий тузилмаларига божхона ҳамроҳлигидаги кузатувдан қочиб кетган транспорт воситасини қидириб топиш бўйича маълумот беради.
Ички ишлар органлари:
божхона органидан хабар келиб тушиши билан божхона ҳамроҳлигидаги кузатувдан қочиб кетган транспорт воситасини қидириб топиш ва блок постларида тўхтатиш ҳамда божхона органларига топшириш чораларини кўради;
республикамиз магистраль йўлларидаги автотранспорт воситаларини назорат қилиш («Автотранспорт воситаларининг ҳаракатланишини видеокузатуви тизими») тизими маълумотларини электрон шаклда Давлат божхона қўмитасига онлайн режимида тақдим этади.
Божхона органлари ваколатли вазирлик ва идоралар билан ҳамкорликда ички ишлар органи томонидан онлайн режимида тақдим этилган электрон маълумотлар асосида республика ҳудудида ҳаракатланаётган божхона назорати остидаги товарлар ва транспорт воситалари устидан назоратни амалга ошириб боради.
Божхона ҳамроҳлигидаги кузатувни амалга оширувчи ходимларнинг қонуний талабини бажармасдан, божхона ҳамроҳлигидаги кузатувдан кетиб қолган транспорт воситаси топилганда, ушбу транспорт воситаси божхона кўригидан ўтказилади ва ташувчига нисбатан божхона қонунбузилиш ҳолати юритилади.
Агар товарлар йўқотилганлиги аниқланса, Кодекс ҳамда ушбу Низомнинг 10-банди талаблари асосида ҳисоблаб чиқарилган божхона тўловлари ташувчидан сўзсиз ундириб олинади.
6-боб. Божхона ҳамроҳлигидаги кузатувни амалга оширувчи ходимларнинг ҳуқуқ ва мажбуриятлари
32. Божхона ҳамроҳлигидаги кузатувни амалга оширувчи ходимлар қуйидагиларга мажбур:
товарлар ва транспорт воситаларини божхона ҳамроҳлигидаги кузатув остида етказиб беришда божхона қонунчилик ҳужжатлари талабларига риоя этиш;
божхона ҳамроҳлигидаги кузатув давомида хавфсизлик чораларини кўриш ва уларга риоя этиш;
божхона ҳамроҳлигидаги кузатувга олинган товарлар ва автотранспорт воситаларига тегишли ҳужжатларнинг сақланишини таъминлаш;
кузатилаётган товарга тегишли ҳужжатларни транспорт воситаси ҳайдовчисига ёки товар кузатувчисига (экспедиторга) ёхуд бошқа шахсларга бермаслик;
вақти-вақти билан автотранспорт воситасининг юк жойлаштирилган қисмига қўйилган муҳрлар ва пломбаларнинг ҳолатини, шунингдек, ташилаётган товарларни идентификацияловчи бошқа таъминлов воситаларининг сақланишини текшириш;
авария ёки енгиб бўлмас куч таъсирида содир бўлган вазиятларда юк ташувчига кўмаклашиш;
йўл ҳаракати қоидаларига, йўналишига, етказиб бериш муддатларига ва вақтларига қатъий риоя қилиш.
33. Божхона ҳамроҳлигидаги кузатувни амалга оширувчи ходимларга қуйидагилар тақиқланади:
мазкур Низом талабларини бузиш;
божхона ҳамроҳлигида кузатиб борилаётган товарлар ва транспорт воситаларини назоратсиз қолдириш;
автотранспорт воситаси юкхонасини зарурат бўлмаганда очиш, қонунчилик ҳужжатларида назарда тутилган ҳолатлар бундан мустасно.
34. Божхона ҳамроҳлигидаги кузатувни амалга оширувчи ходимлар кузатиб борилаётган товарлар, автотранспорт воситалари ва уларнинг ҳужжатлари йўқ қилиниши ёки йўқолишига сабаб бўладиган ҳолатлар вужудга келган вазиятда товарлар, автотранспорт воситалари ва уларнинг ҳужжатлари сақланишини таъминлаш бўйича зарур чораларни кўриши шарт.
7-боб. Якунловчи қоидалар
35. Божхона ҳамроҳлигидаги кузатув остида ташиладиган товарлар, транспорт воситаларини ташиш қоидаларини бузганлик, шунингдек, божхона ҳамроҳлигидаги кузатувни амалга оширувчи ходимларнинг қонуний талабларига бўйсунмаслик учун ташувчи Ўзбекистон Республикасининг қонунчилик ҳужжатларига мувофиқ жавобгарликка тортилади.
36. Божхона органлари ва ички ишлар органларининг мансабдор шахслари ушбу Низом талабларини бузганликлари учун Ўзбекистон Республикасининг қонунчилик ҳужжатларига мувофиқ жавобгарликка тортилади.
Вазирлар Маҳкамасининг 2020 йил 22 декабрдаги 800-сон қарорига 2-ИЛОВА
Чет эл товарларини ташиш жараёнида божхона тўловлари тўланишини таъминлашни ваколатли шахслар билан реал вақт режимида ва интерактив шаклда ўзаро ҳамкорлик асосида ҳисобга олиш ва назорат қилиш тартиби тўғрисида
1-боб. Умумий қоидалар
1. Ушбу Низом чет эл товарларини ташиш жараёнида божхона тўловлари тўланишини таъминлашни ваколатли шахслар билан реал вақт режимида ва интерактив шаклда ўзаро ҳамкорлик асосида ҳисобга олиш ва назорат қилиш тартибини белгилайди.
2. Мазкур Низомда қуйидаги асосий тушунчалар қўлланилади:
ваколатли шахс — чет эл товарлари учун божхона тўловларининг тўланишини таъминловчи сифатида Ўзбекистон Республикаси Давлат божхона қўмитаси (кейинги ўринларда — Давлат божхона қўмитаси) реестрига киритилган, шунингдек божхона тўловлари тўланишига жавобгар бўлган банк, суғурта ташкилотлари, ташқи иқтисодий фаолият субъектлари (юк жўнатувчи, юк қабул қилувчи, ташувчи) ёки бошқа манфаатдор шахс;
жўнатувчи божхона пости — товарнинг тўлиқ туркуми ёки унинг қисмини божхона назорати остида ташиш бошланган божхона пости;
манзилдаги божхона пости — товарнинг тўлиқ туркуми ёки унинг қисмини божхона назорати остида ташиш тугалланадиган божхона пости;
Ўзбекистон Республикаси Давлат божхона қўмитасининг ягона автоматлаштирилган ахборот тизими (кейинги ўринларда — ДБҚ ЯААТ) — божхона чегараси орқали олиб ўтиладиган товарларнинг ва транспорт воситаларининг божхона назоратини амалга ошириш учун уларга доир ҳужжатлар ва маълумотларнинг киритилишини, ҳисобга олинишини ҳамда мониторинг қилинишини назарда тутувчи Ўзбекистон Республикаси Давлат божхона қўмитасининг автоматлаштирилган тизими.
3. Чет эл товарлари ташилаётган автотранспорт воситалари учун божхона тўловлари тўланишини таъминлаш (пул маблағларини божхона органининг шахсий ғазна ҳисобварағига киритишдан ташқари) банклар ва суғурта ташкилотлари марказий идоралари билан Давлат божхона қўмитаси ўртасида тузилган томонларнинг жавобгарлигини белгиловчи шартнома асосида амалга оширилади. Бунда банк ва суғурта ташкилотларининг тўлов қобилияти инобатга олинади.
Банк кафолати ҳамда суғурта полислари Давлат божхона қўмитаси билан тузилган шартнома асосида банклар ва суғурта ташкилотлари томонидан Давлат божхона қўмитасига электрон шаклда, онлайн режимда тақдим этилади.
Чет эл товарларини ташиш жараёнида божхона органи рухсатисиз товарлар бериб юборилганда, йўқотилганда ёки манзилга белгиланган муддатда ўзгармас ҳолатда (табиий эскириш ёхуд нормал ташиш ва сақлаш шароитларида камайиш оқибатидаги ўзгаришлар бундан мустасно) етказиб берилмаганда, ушбу товарларга ҳисобланган божхона тўловлари таъминлов божхона расмийлаштируви учун қабул қилинган кунда амалда бўлган банк кафолати ёки суғурта полиси асосида ундириб олинади.
4. Банклар ва суғурта ташкилотлари томонидан божхона тўловлари тўланиши таъминланган банк кафолати ва суғурта полиси, ушбу банк кафолати ҳамда суғурта полиси бўйича мажбуриятлар бажарилмагунга қадар бекор қилиниши мумкин эмас.
5. Чет эл товарларини ташиш жараёнида божхона тўловлари тўланишини таъминлашни ҳисобга олиш ҳамда назорат қилиш Ўзбекистон Республикаси Ягона интерактив давлат хизматлари портали (кейинги ўринларда — ЯИДХП) ва ДБҚ ЯААТ орқали электрон шаклда амалга оширилади.
2-боб. Чет эл товарларини ташиш жараёнида божхона тўловлари тўланишини таъминлаш ва ҳисобга олиш
1-§. Божхона тўловлари тўланишини таъминлашнинг умумий қоидалари
6. Божхона тўловлари тўланишини таъминлаш ваколатли шахслар томонидан электрон шаклда онлайн режимида тақдим этилади.
7. Чет эл товарларини ташиётган автотранспорт воситаларини божхона ҳамроҳлигида кузатиб боришдан озод қилиш учун божхона тўловларини таъминловчи ваколатли шахс ЯИДХП орқали Ўзбекистон Республикаси Божхона кодексининг 47-бобига мувофиқ божхона тўловлари тўланишини қуйидаги исталган усуллар орқали таъминлаши мумкин:
пул маблағларини божхона органининг шахсий ғазна ҳисобварағига (кейинги ўринларда — депозит) киритиш;
товарларни гаровга қўйиш;
банк кафолатини тақдим этиш;
божхона тўловларини тўлаш мажбуриятини суғурталаш;
кафиллик.
8. Божхона тўловлари тўланишини таъминлаш суммаси, божхона назорати остида ташилаётган товарларни «эркин муомалага чиқариш (импорт)» божхона режимига жойлаштиришда преференциялар ҳамда имтиёзлар инобатга олинмаган ҳолда ҳисоблаб чиқарилган божхона тўловлари суммасига мос ёки ундан кам бўлмаслиги керак.
9. Чет эл товарларини Ўзбекистон Республикаси ҳудуди орқали ташиш бошланишидан олдин ваколатли шахс электрон рақамли имзо билан ЯИДХПнинг «Чет эл товарларининг ҳаракатига божхона тўловлари тўланишини таъминлаш» интерактив хизмати орқали электрон шаклда божхона тўловлари тўланиши таъминотини киритади.
Бунда чет эл товарлари ташилаётган ҳар бир автотранспорт воситаси учун божхона тўловлари тўланишини таъминлаш алоҳида амалга оширилиши лозим.
10. ЯИДХП орқали божхона тўловлари тўланишини таъминлашда, чет эл товарлари ташилаётган ҳар бир автотранспорт воситаси учун маълумотлар алоҳида шакллантирилиб, божхона органига юборилади.
Божхона органига келиб тушган маълумотлар ДБҚ ЯААТдаги форматли-мантиқий назоратдан ижобий ўтганда, чет эл товарлари ташилаётган ҳар бир автотранспорт воситаси бўйича божхона тўловлари тўланиши таъминланганлиги тўғрисида идентификация коди автоматик тарзда ваколатли шахсга тақдим этилади ва товарларни манзилга етказиб бериш билан боғлиқ мажбуриятлар бажарилгунига қадар ушбу маблағлардан фойдаланиш чекланади.
11. Идентификация коди чет эл товарларини ташиётган автотранспорт воситаларига нисбатан божхона ҳамроҳлигида кузатиб боришдан озод қилиш мақсадида божхона расмийлаштирувини амалга ошириш вақтида ёки Ўзбекистон Республикаси божхона ҳудудига келадиган товарлар ва транспорт воситалари тўғрисида электрон шаклда олдиндан хабардор қилишда жўнатувчи божхона постига тақдим қилинади.
12. Битта автотранспорт воситасига қўлланилган божхона тўловлари тўланишини таъминлаш суммасидан ушбу автотранспорт воситасига нисбатан товарларни ташиш мажбуриятлари бажарилгунга қадар бошқа автотранспорт воситасига нисбатан божхона тўловлари тўланишини таъминлаш мақсадида фойдаланишга йўл қўйилмайди.
2-§. Пул маблағларини божхона органининг депозитига киритиш орқали божхона тўловлари тўланишини таъминлаш
13. Тўловчи божхона тўловлари тўланишини таъминлаш учун божхона органининг депозитига пул маблағлари суммасини миллий валютада ҳамда чет эл валютасида киритиши мумкин.
Божхона тўловлари тўланишини таъминлаш чет эл валютасида депозитга киритилган маблағлар ҳисобидан амалга оширилганда, божхона расмийлаштируви амалга оширилаётган кундаги Ўзбекистон Республикаси Марказий банки томонидан белгиланган расмий курс бўйича ҳисобланади.
14. Божхона органининг депозитига киритилган маблағлардан божхона тўловларини таъминлаш депозитга маблағ киритган шахснинг электрон аризаси асосида автотранспорт воситасида ташилаётган чет эл товарлари учун фойдаланилади.
15. Божхона тўловлари тўланиши таъминланган пул маблағларидан фойдаланиш учун қўйилган чеклов чет эл товарларини етказиб бериш бўйича мажбуриятлар бажарилгандан сўнг автоматик тарзда бекор бўлади.
Мажбуриятлар бажарилмаган тақдирда, киритилган пул маблағлари божхона тўловларини тўлаш бўйича қарздорликни тўлаш ҳисобидан амалдаги қонунчилик ҳужжатларига мувофиқ депозит суммасидан сўзсиз ундирилади.
3-§. Товарларни гаровга қўйиш орқали божхона тўловлари тўланишини таъминлаш
16. Божхона тўловлари тўланишини таъминлаш суммаси гаров тўғрисидаги шартнома асосида товарларни гаровга қўйиш орқали таъминланади.
17. Гаровга қўйилган товарлардан божхона тўловлари тўланишини таъминлаш гаровга қўйган шахс номига олиб келинаётган чет эл товарлари учун фойдаланилади.
18. Божхона тўловлари тўланишини таъминлаш учун гаровга қўйилган товарлардан фойдаланиш учун қўйилган чеклов чет эл товарларини етказиб бериш бўйича мажбуриятлар бажарилгандан сўнг автоматик тарзда бекор бўлади.
Мажбуриятлар бажарилмаган тақдирда, божхона тўловларини тўлаш бўйича қарздорликни гаровга қўйилган товарлар ҳисобидан ундириб олиш чоралари кўрилади.
4-§. Банк кафолатини тақдим этиш орқали божхона тўловлари тўланишини таъминлаш
19. Божхона тўловлари тўланишини таъминлаш суммаси Ўзбекистон Республикасида банк операцияларини ўтказиш ҳуқуқига эга бўлган банкнинг кафолатини онлайн режимда электрон шаклда тақдим этиш орқали таъминланади.
20. Банк кафолати асосида божхона тўловларини таъминлаш банк кафолатини олган шахс номига олиб келинаётган ёки ушбу шахсга тегишли автотранспорт воситасида ташилаётган чет эл товарлари учун фойдаланилади.
Божхона тўловлари тўланишини таъминлаш учун импорт қилувчи томонидан банк кафолати тақдим этилганда, банк кафолатида унинг СТИРи, транспорт корхоналари томонидан банк кафолати тақдим этилганда эса банк кафолатида чет эл товарини ташийдиган автотранспорт воситалари давлат рақами кўрсатилиши лозим.
21. Божхона тўловлари тўланиши таъминланган чет эл товарлари бўйича мажбуриятлар бажарилганда, банк кафолати асосида божхона тўловлари тўланиши таъминланган суммага нисбатан ўрнатилган чекловлар автоматик тарзда бекор қилинади.
Мажбуриятлар бажарилмаган тақдирда, божхона тўловларини тўлаш бўйича қарздорлик банк кафолатини тақдим этган тижорат банкидан қонунчилик ҳужжатларига мувофиқ сўзсиз ундирилади.
5-§. Божхона тўловларини тўлаш мажбуриятини суғурталаш орқали божхона тўловлари тўланишини таъминлаш
22. Божхона тўловлари тўланишини таъминлаш суммаси Ўзбекистон Республикасида рўйхатдан ўтган суғурта ташкилотларининг суғурта полисини онлайн режимда электрон шаклда тақдим этиш орқали таъминланади.
23. Суғурта полиси асосида божхона тўловлари таъминотидан суғурта полиси берилган шахс номига олиб келинаётган ёки ушбу шахсга тегишли автотранспорт воситасида ташилаётган чет эл товарлари учун фойдаланилади.
24. Божхона тўловлари тўланишини таъминлаш учун импорт қилувчи томонидан суғурта полиси тақдим этилганда, суғурта полисида унинг СТИРи, транспорт корхоналари томонидан суғурта полиси тақдим этилганда эса суғурта полисида чет эл товарини ташийдиган автотранспорт воситалари давлат рақами кўрсатилиши лозим.
25. Суғурта полиси битта автотранспорт воситасига олинганда, божхона ҳамроҳлигида кузатиб боришдан озод этиш учун ЯИДХПга мурожаат этмасдан, тўғридан-тўғри жўнатувчи божхона постига мурожаат этиши мумкин. Бунда идентификация коди талаб этилмайди.
26. Божхона тўловлари тўланиши таъминланган чет эл товарлари бўйича мажбуриятлар бажарилганда, божхона тўловлари тўланиши таъминланган суғурта полисига нисбатан ўрнатилган чекловлар автоматик тарзда бекор қилинади.
Мажбуриятлар бажарилмаган тақдирда, божхона тўловларини тўлаш бўйича қарздорликни суғурта полиси асосида ундириб олиш чоралари кўрилади.
6-§. Кафиллик орқали божхона тўловлари тўланишини таъминлаш
27. Кафиллик божхона органининг депозитига пул маблағлари суммасини Ўзбекистон Республикасининг миллий валютасида ҳамда чет эл валютасида киритиш орқали таъминланади.
28. Божхона тўловлари тўланишини таъминлаш чет эл валютасида депозитга киритилган маблағлар ҳисобидан амалга оширилганда, божхона расмийлаштируви амалга оширилаётган кундаги Ўзбекистон Республикаси Марказий банки томонидан белгиланган расмий курс бўйича ҳисобланади.
29. Кафил томонидан божхона органининг депозитига киритилган маблағлардан депозитга маблағ киритган ёки бошқа шахслар номига олиб келинаётган ёхуд ушбу шахсларга тегишли автотранспорт воситасида ташилаётган чет эл товарлари учун божхона тўловлари тўланишини таъминлашда фойдаланилади.
30. Божхона тўловлари тўланиши таъминланган пул маблағларидан фойдаланиш учун қўйилган чеклов чет эл товарларини етказиб бериш бўйича мажбуриятлар бажарилгандан сўнг автоматик тарзда бекор бўлади.
Мажбуриятлар бажарилмаган тақдирда, киритилган пул маблағлари божхона тўловларини тўлаш бўйича қарздорликни тўлаш ҳисобига депозитга киритилган кафиллик суммасидан олинади.
3-боб. Чет эл товарларини ташиш жараёнида божхона тўловлари тўланишини таъминлашни назорат қилиш
31. ДБҚ ЯААТда чет эл товарларини ташиётган автотранспорт воситаларига нисбатан божхона ҳамроҳлигида кузатиб боришдан озод қилиш билан боғлиқ бўлган ҳаракатларни бажаришнинг ҳар бир босқичида форматли-мантиқий назорат амалга оширилади.
Форматли-мантиқий назоратни амалга ошириш натижасида хатоликлар аниқланган тақдирда, автоматик тарзда электрон шаклда ваколатли шахсга тегишли маълумотлар уларни тўғрилаш учун юборилади.
32. Божхона расмийлаштирувини амалга ошириш вақтида ёки электрон тарзда олдиндан хабардор қилишда тақдим қилинган идентификация коди орқали божхона пости ходими товарнинг кузатув ҳужжатларида кўрсатилган маълумотлар билан ДБҚ ЯААТдаги маълумотларни солиштиради.
Солиштириш натижаси бўйича маълумотлар ўртасида номувофиқликлар аниқланмаган тақдирда, транспорт воситаси божхона ҳамроҳлигида кузатиб боришдан озод қилинади.
Солиштириш натижаси бўйича маълумотлар ўртасида номувофиқликлар аниқланганда, божхона пости ходими шу вақтнинг ўзида ваколатли шахсга ЯИДХП орқали сабабларини кўрсатган ҳолда,чет эл товарларини ташиётган автотранспорт воситаларига нисбатан божхона ҳамроҳлигида кузатиб боришдан озод қилишни рад этади.
33. Идентификация коди ва божхона тўловлари тўланишини таъминлаш суммасини божхона пости ходими ДБҚ ЯААТда мустақил текширади.
4-боб. Божхона органи рухсатисиз товарлар бериб юборилганда, йўқотилганда ёки манзилдаги божхона постига белгиланган муддатда ҳамда ўзгармас ҳолатда етказилмаганда, божхона тўловларини ҳисоблаш ва ундириш
34. Божхона органи рухсатисиз товарлар бериб юборилганда, йўқотилганда ёки манзилдаги божхона постига белгиланган муддатда ўзгармас ҳолатда (табиий эскириш ёхуд нормал ташиш ва сақлаш шароитларида камайиш оқибатидаги ўзгаришлар бундан мустасно) етказилмаганлиги ҳолати аниқланганда, манзилдаги божхона пости, агар мазкур ҳолат бошқа ҳудудий бошқарма жойлашган ҳудудда аниқланганда, ушбу ҳудудий бошқарма масъул таркибий тузилмалари аниқланган куннинг ўзида ҳудудий бошқарма раҳбариятига ёзма ахборот беради.
Мазкур банднинг биринчи хатбошида кўрсатилган ҳолатлар бўйича манзилдаги божхона постидан ахборот келиб тушиши билан ҳудудий бошқарма раҳбарияти товарларга божхона тўловларини ҳисоблаш бўйича зарур чораларни кўради.
Тақдим қилинган ҳамда ДБҚ ЯААТдан олинган маълумотлар асосида мазкур банднинг биринчи хатбошида кўрсатилган ҳолатлар аниқланган кундан бошлаб икки иш куни ичида мазкур Низомга иловада кўрсатилган шаклда далолатнома тўлдирилади. Ушбу далолатнома божхона тўловлари ва пеняларни сўзсиз ундириб олиш ҳақидаги талабнома билан бирга ДБҚ ЯААТ орқали ёки қонунчилик ҳужжатларига мувофиқ бошқа йўл билан:
ваколатли шахсга;
кафилга (кафиллик билан таъминланганда);
банкка (банк кафолати билан таъминланганда);
суғурталовчи ташкилотга (суғурта билан таъминланганда) юборилади.
Давлат божхона қўмитасининг ҳудудий бошқармалари ваколатли ташкилот ва идоралар билан ҳамкорликда уч иш куни ичида ҳолатга аниқлик киритиш ҳамда товарларни қидириб топиш чораларини кўради.
35. Божхона назорати остида ташилаётган товарларни манзилдаги божхона постига тўлиқ етказиш чоралари кўрилиши ёки далолатнома асосида божхона тўловларини тўлаш муддати талабнома тўловчига топширилган ёки тўловчи томонидан талабнома олинган куннинг эртасидан эътиборан ўн иш кунини ташкил этади.
36. Ваколатли шахс томонидан талабномада кўрсатилган талаблар бажарилмаганда, Ўзбекистон Республикаси Божхона кодексининг 47-бобига мувофиқ чоралар кўрилади, шу жумладан, талабнома юборган ҳудудий бошқарма томонидан судга ваколатли шахс томонидан чет эл товарларини ташиётган автотранспорт воситаларига нисбатан божхона ҳамроҳлигида кузатиб боришдан озод қилиш бўйича идентификация коди беришни вақтинча тўхтатиб туриш тўғрисида белгиланган тартибда суд органларига мурожаат қилинади.
37. Идентификацион код беришни вақтинча тўхтатиб туриш ҳақидаги суд қарори қабул қилинганда, тўланиши лозим бўлган божхона тўловлари ва пенялар тўлиқ ундирилгунга қадар ваколатли шахсга чет эл товарларини ташиётган автотранспорт воситаларига нисбатан божхона ҳамроҳлигида кузатиб боришдан озод қилиш бўйича идентификацион код берилиши тўхтатилади. Бу ҳақида божхона органи томонидан ДБҚ ЯААТга тегишли форматли-мантиқий назорат ўрнатилади.
38. Товарларни божхона органининг рухсатисиз бериб юбориш, йўқотиш ёки манзилдаги божхона постига белгиланган муддатда ўзгармас ҳолатда етказмаслик оқибатида ҳисобланган божхона тўловлари ундириб олингандан сўнг товарни етказиб беришнинг назорат ҳужжати назоратдан ечилади.
5-боб. Якунловчи қоида
39. Мазкур Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавобгарликка тортилади.
Чет эл товарларини ташиш жараёнида божхона тўловлари тўланишини таъминлашни ваколатли шахслар билан реал вақт режимида интерактив шаклда ўзаро ҳамкорлик асосида ҳисобга олиш ва назорат қилиш тартиби тўғрисидаги низомга ИЛОВА
Божхона тўловлари ва пеняларни ваколатли шахсдан сўзсиз ундириш тўғрисида
20___ йил «_____» _____________ рўйхатдан ўтган, давлат рақами ________________________________________________________ (рақами) бўлган автотранспорт воситасини расмийлаштириш ______________/_______________/_________________ рақамли (пост коди) (санаси) (рақами) Юкни етказиб бериш назорат ҳужжати асосида божхона назорати остида __________________________________________________________________________________________дан (божхона органи номи) __________________________________________________________________________________________гача (божхона органи номи) ___________________________________________________________________томонидан берилган (ваколатли шахс номи, жойлашуви (почта манзили) чет эл товарларини ташиш жараёнида божхона тўловларини таъминлаш асосида __________сон идентификация коди __________________________________________________________________________ томонидан ташилаётган (ташувчи номи, жойлашуви (почта манзили) божхона қиймати ______________________________ га тенг, вазни ___________ кг бўлган товарлар (АҚШ долларида) (нетто вазни) божхона органи рухсатисиз товарлар бериб юборилганлиги (йўқотилганлиги, белгиланган божхона органига етказилмаганлиги) ҳолати аниқланган ва 20 ____ й. «____» _____________________________________________ куни қайд этилган. ______________________________________________________________________________________________________________________________________________________________товарини божхона органи рухсатисиз товарлар бериб юборилганлиги (йўқотилганлиги, белгиланган божхона органига етказилмаганлиги) учун идентификация кодининг эгаси ______________________________________ томонидан (ваколатли шахс номи) Ўзбекистон Республикаси Божхона кодексига мувофиқ қуйидаги божхона тўловлари ва пенялар тўланиши лозим: Божхона божи _____________________________________________________________________/сумма/ ҚҚС_________________________________________________________________/сумма/ Акциз солиғи _________________________________________________________/сумма/ Бошқа божхона тўловлари______________________________________________/сумма/ Тўловлар тўланиши кечиктирилганлиги учун пеня _________________________/сумма/ Жами: тўланиши лозим бўлган _________________________________________/сумма/ 20__ й. «___» ___________ даги _____________________________-сон сўзсиз ундирилган тўлов ҳужжати умумий суммаси _____________________________________ божхона органлари ______________________________________________________сон ҳисобрақамига (божхона органи ҳисоб рақами, банк номи, КТУТ рақами) ____ йил «____»__________________ куни келиб тушган сумма Ваколатли шахсдан талаб қилинган суммани ___________________________________________________ _______________________________________________ сабабли ундириш имконияти мавжуд эмас. Божхона органи ходими имзоси ___________________________________ ___________________________________________________________________________ (лавозими, Ф.И.О., имзо) М.Ў.
Вазирлар Маҳкамасининг 2020 йил 22 декабрдаги 800-сон қарорига 3-ИЛОВА
Ўзбекистон Республикаси Ҳукуматининг ўз кучини йўқотган деб эътироф этилаётган қарорлари
1. Вазирлар Маҳкамасининг «Ўзбекистон Республикаси ҳудудида ташилаётган товарларни божхона томонидан назорат қилишни кучайтириш тўғрисида» 2004 йил 20 майдаги 239-сон қарори (Ўзбекистон Республикаси ҚТ, 2004 й., 5-сон, 49-модда).
2. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш тўғрисида (Ўзбекистон Республикаси Президентининг «Ишбилармонлик муҳитини янада тубдан яхшилаш ва тадбиркорликка янада кенг эркинлик бериш чора-тадбирлари тўғрисида» 2012 йил 18 июлдаги ПФ-4455-сон Фармони)» 2012 йил 31 июлдаги 232-сон қарорига (Ўзбекистон Республикаси ҚҲТ, 2012 й., 31-сон, 357-модда) илованинг 5-банди .
3. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш, шунингдек баъзиларини ўз кучини йўқотган деб ҳисоблаш тўғрисида (Ўзбекистон Республикасининг «Ўзбекистон Республикасининг Бюджет кодексини тасдиқлаш тўғрисида» 2013 йил 26 декабрдаги ЎРҚ-360-сон ҳамда «Солиқ ва бюджет сиёсатининг 2016 йилга мўлжалланган асосий йўналишлари қабул қилинганлиги муносабати билан Ўзбекистон Республикасининг Солиқ кодексига ўзгартиш ва қўшимчалар киритиш тўғрисида» 2015 йил 31 декабрдаги ЎРҚ-398-сон қонунлари)» 2016 йил 26 апрелдаги 122-сон қарорига (Ўзбекистон Республикаси ҚҲТ, 2016 й., 17-сон, 176-модда) 1-илованинг 71-банди .
4. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш, шунингдек баъзиларини ўз кучини йўқотган деб ҳисоблаш тўғрисида (Ўзбекистон Республикасининг «Ўзбекистон Республикасининг Божхона кодексини тасдиқлаш тўғрисида» 2016 йил 20 январдаги ЎРҚ-400-сон ҳамда «Ўзбекистон Республикасининг Божхона кодекси қабул қилиниши муносабати билан Ўзбекистон Республикасининг айрим қонун ҳужжатларига ўзгартишлар киритиш, шунингдек баъзиларини ўз кучини йўқотган деб топиш тўғрисида» 2016 йил 20 январдаги ЎРҚ-401-сон қонунлари)» 2016 йил 20 июндаги 211-сон қарорига (Ўзбекистон Республикаси ҚҲТ, 2016 й., 25-сон, 308-модда) 1-илованинг 12-банди.
5. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш ҳамда баъзиларини ўз кучини йўқотган деб ҳисоблаш ҳақида (Ўзбекистон Республикаси Президентининг «Ўзбекистон Республикаси Давлат божхона хизмати органлари фаолиятини тубдан такомиллаштириш чора-тадбирлари тўғрисида» 2018 йил 12 апрелдаги ПФ-5414-сон Фармони, Ўзбекистон Республикаси Президентининг «Ўзбекистон Республикаси Давлат божхона хизмати органларининг фаолиятини ташкил этиш тўғрисида» 2018 йил 12 апрелдаги ПҚ-3665-сон қарори)» 2018 йил 18 июлдаги 553-сон қарорига 2-илованинг 2-банди .
Ўзбекистон Республикасининг Бош вазири А. АРИПОВ
Тошкент ш.,
2020 йил 22 декабрь,
800-сон
Oʻzbekiston Respublikasi Vazirlar Mahkamasining
qarori
NIZOM
NIZOM
DALOLATNOMA
ROʻYXATI
Oʻzbekiston Respublikasi hududida tashqi savdo yuklarini bojxona nazorati ostida tashishni soddalashtirish, shuningdek, tashqi iqtisodiy faoliyat qatnashchilarini yanada qoʻllab-quvvatlash toʻgʻrisida
Oʻzbekiston Respublikasi Prezidentining “Bojxona maʼmuriyatchiligini isloh etish va Oʻzbekiston Respublikasi davlat bojxona xizmati organlari faoliyatini takomillashtirish toʻgʻrisida” 2020-yil 5-iyundagi PF-6005-son Farmoniga muvofiq, shuningdek, mamlakatimizning transport logistika salohiyatini kengaytirish, tranzit jozibadorligini oshirish hamda tashqi savdo yuklarini bojxona nazorati ostidagi tashishni soddalashtirish, tashqi iqtisodiy faoliyat qatnashchilarini yanada qoʻllab-quvvatlash maqsadida Vazirlar Mahkamasi qaror qiladi:
1. Quyidagilar:
Oʻzbekiston Respublikasi avtomobil yoʻllarida tashiladigan va bojxona hamrohligida kuzatib boriladigan bojxona nazorati ostidagi transport vositalari va tovarlarni, bojxona hamrohligidagi kuzatuvni tashkil etish, bojxona hamrohligidagi kuzatuvlar uchun bojxona yigʻimlarini undirish tartibini, shuningdek, bojxona hamrohligidagi kuzatuvni amalga oshiruvchi xodimlarning huquq va majburiyatlarini nazarda tutuvchi Bojxona nazorati ostida avtomobil yoʻllarida tashilayotgan tovarlarning bojxona hamrohligidagi kuzatuvini tashkil etish tartibi toʻgʻrisidagi nizom 1-ilovaga muvofiq;
chet el tovarlarini tashish jarayonida bojxona toʻlovlari toʻlanishini taʼminlashni vakolatli shaxslar bilan real vaqt rejimida va interaktiv shaklda oʻzaro hamkorlik asosida hisobga olish va nazorat qilish, shuningdek, bojxona organi ruxsatisiz tovarlar berib yuborilganda, yoʻqotilganda yoki manzil bojxona postiga belgilangan muddatda hamda oʻzgarmas holatda yetkazilmaganda, bojxona toʻlovlarini hisoblash va undirish tartibini nazarda tutuvchi Chet el tovarlarini tashish jarayonida bojxona toʻlovlari toʻlanishini taʼminlashni vakolatli shaxslar bilan real vaqt rejimida va interaktiv shaklda oʻzaro hamkorlik asosida hisobga olish va nazorat qilish tartibi toʻgʻrisidagi nizom 2-ilovaga muvofiq tasdiqlansin.
2. Belgilansinki, bojxona hamrohligida kuzatib boriladigan tovarlar va transport vositalarining bojxona rasmiylashtiruvi joʻnatuvchi hamda manzil bojxona postlarida, shuningdek, qabul qilish-topshirish punktlarida ustuvor tartibda amalga oshiriladi.
3. Oʻzbekiston Respublikasi Hukumatining 3-ilovaga muvofiq baʼzi qarorlari oʻz kuchini yoʻqotgan deb hisoblansin.
4. Oʻzbekiston Respublikasi Davlat bojxona qoʻmitasi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
5. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — iqtisodiy taraqqiyot va kambagʻallikni qisqartirish vaziri J.A. Qoʻchqorov zimmasiga yuklansin.
Vazirlar Mahkamasining 2020-yil 22 dekabrdagi 800-son qaroriga 1-ILOVA
Bojxona nazorati ostida avtomobil yoʻllarida tashilayotgan tovarlarning bojxona hamrohligidagi kuzatuvini tashkil etish tartibi toʻgʻrisida
1-bob. Umumiy qoidalar
1. Mazkur Nizom Oʻzbekiston Respublikasi avtomobil yoʻllarida tashiladigan bojxona nazorati ostidagi transport vositalari va tovarlarni bojxona hamrohligida kuzatib borish tartibini belgilaydi.
2. Ushbu Nizomda quyidagi asosiy tushunchalar qoʻllaniladi:
bojxona hamrohligida kuzatib borish — avtotransport vositalarining bojxona organlari tomonidan xavfsiz harakatlanishini taʼminlash maqsadida bojxona nazorati ostida maxsus jihozlangan avtomobil yordamida kuzatib borilishi;
joʻnatuvchi bojxona posti — tovarlarning barcha turkumi yoki uning bir qismi uchun bojxona hamrohligidagi kuzatuv boshlanadigan bojxona posti;
qabul qilish-topshirish punkti — bojxona hamrohligida kuzatib borilayotgan tovarlar, transport vositalari va ularga tegishli hujjatlarni qabul qilish-topshirish amalga oshiriladigan joy;
manzildagi bojxona posti — tovarlarning barcha turkumi yoki uning bir qismi uchun bojxona hamrohligidagi kuzatuv tugaydigan bojxona posti;
tashuvchi — bojxona nazorati ostida turgan chet el tovarlari tashilishini amalga oshiruvchi yoki transport vositasidan foydalanish uchun masʼul shaxs;
transport vositalari — yoʻlovchilarni va tovarlarni tashish uchun foydalaniladigan barcha vositalar, shu jumladan, konteynerlar va boshqa transport jihozlari.
3. Tovarlar va transport vositalarini bojxona hamrohligida kuzatib borish tovarlar va transport vositalari bojxona nazorati ostida tashilayotganda Oʻzbekiston Respublikasining bojxona toʻgʻrisidagi qonunchilik hujjatlariga rioya etilishini taʼminlash maqsadida amalga oshiriladi.
4. Bojxona hamrohligidagi kuzatuvni amalga oshiruvchi xodimlar ushbu Nizom talablariga amal qiladi va bojxona posti boshligʻiga boʻysunadi.
5. Bojxona hamrohligidagi kuzatuvni amalga oshirish uchun xodimlar va maxsus jihozlangan avtomobillarni ajratish, bojxona hamrohligida kuzatiladigan tovarlar va transport vositalarini qabul qilish-topshirish punktlari, kuzatuv hujjatlarini rasmiylashtirish tartibi va ularning shakllari, shuningdek, bojxona hamrohligida kuzatuvni amalga oshiruvchi xodimlarning oʻzaro hamkorlik tartibi Oʻzbekiston Respublikasi Davlat bojxona qoʻmitasi (keyingi oʻrinlarda — Davlat bojxona qoʻmitasi) tomonidan belgilanadi.
6. Bojxona hamrohligida kuzatuvni amalga oshirishda tashuvchi, yuk joʻnatuvchi yoki yuk qabul qiluvchining sarflangan xarajatlari bojxona organlari tomonidan qoplab berilmaydi.
7. Bojxona hamrohligida kuzatib borilayotgan bojxona nazorati ostidagi tovarlar, transport vositalari va ularning hujjatlariga nisbatan Oʻzbekiston Respublikasining bojxona toʻgʻrisidagi qonunchilik hujjatlarida nazarda tutilgan bojxona nazorati shakllari qoʻllanilishi mumkin.
8. Joʻnatuvchi hamda manzildagi bojxona postlarida, shuningdek, qabul qilish-topshirish punktlarida bojxona hamrohligida kuzatib boriladigan tovarlar va transport vositalarining bojxona rasmiylashtiruvi ustuvor tartibda amalga oshiriladi.
2-bob. Bojxona hamrohligidagi kuzatuv ostida amalga oshiriladigan tashish
9. Bojxona hamrohligida kuzatib borish chet el tovarlarini tashiyotgan avtotransport vositalariga nisbatan qoʻllaniladi, quyidagi hollar bundan mustasno:
tovarlar Xalqaro yoʻllarda tashish daftarchasini qoʻllagan holda yuklarni xalqaro tashish toʻgʻrisidagi bojxona konvensiyasiga (Jeneva, 1975-yil 14-noyabr) muvofiq tashilgan taqdirda;
milliy avtotashuvchilar tomonidan import tovarlarni bojxona nazorati ostida tashish uchun jihozlangan transport vositalarida tashilgan taqdirda;
tovarlar qonunchilik hujjatlariga muvofiq, birinchi va uchinchi turdagi guvohnoma asosida vakolatli iqtisodiy operatorlar reyestriga kiritilgan yuridik shaxslar tomonidan amalga oshirilganda;
Oʻzbekiston Respublikasi Bojxona kodeksining 47-bobiga muvofiq bojxona toʻlovlari toʻlanishi taʼminlangan taqdirda;
tovarlar bojxona hududiga insonparvarlik yordami va texnik koʻmak sifatida, shuningdek, xalqaro pochta joʻnatmalari va feldyeger pochtasi sifatida tasdiqlovchi hujjatlar boʻlgan taqdirda olib kirilganda.
Agar xavfni boshqarish tizimida nazorat chorasi mavjud boʻlsa, davlat bojxona xizmati organlari qonunchilik hujjatlarida belgilangan tartibda chet el tovarlarini tashiyotgan avtotransport vositalariga nisbatan bojxona hamrohligida kuzatib borish qoʻllaniladi.
10. Bojxona hamrohligidagi kuzatuvdan ozod etish uchun bojxona toʻlovlari toʻlanishini taʼminlash chet el tovarlari “erkin muomalaga chiqarish” bojxona rejimiga rasmiylashtirilganda toʻlanishi lozim boʻlgan foiz va miqdorlarda, preferensiyalar hamda imtiyozlar inobatga olinmagan holda hisoblangan miqdordan kam boʻlmasligi lozim.
11. Bojxona hamrohligidagi kuzatuvdan ozod etish uchun bojxona toʻlovlari toʻlanishini taʼminlashning eng yuqori miqdori milliy valyutada kompensatsiya toʻlash toʻgʻrisida qaror qabul qilingan kundagi Oʻzbekiston Respublikasi Markaziy bankining rasmiy kursi boʻyicha, chet el tovarlari tashilayotgan bitta transport vositasi uchun yuz ming yevro ekvivalentidan oshmasligi lozim, tirik hayvonlar tashilayotgan transport vositalarini bojxona hamrohligidagi kuzatuvdan ozod etish uchun bojxona toʻlovlari toʻlanishini taʼminlash bundan mustasno.
12. Bojxona hamrohligidagi kuzatuvdan ozod etish uchun bojxona toʻlovlari toʻlanishini taʼminlash Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali Davlat bojxona qoʻmitasiga milliy valyutada taqdim etiladi.
13. Bojxona toʻlovlarining toʻlanishi taʼminlangan summasi chet el tovarlari “erkin muomalaga chiqarish” bojxona rejimiga rasmiylashtirilganda toʻlanishi lozim boʻlgan bojxona toʻlovlari miqdoriga muvofiq boʻlmaganda yoki kam boʻlganda, bojxona posti xodimi shu vaqtning oʻzida YIDXP orqali sabablarini koʻrsatgan holda, chet el tovarlarini tashiyotgan avtotransport vositalariga nisbatan bojxona hamrohligida kuzatib borishdan ozod qilishni rad etadi.
3-bob. Bojxona hamrohligidagi kuzatuvni tashkillashtirish
14. Tovarlar va transport vositalarining bojxona hamrohligidagi kuzatuvi avtotransport vositalarining turini inobatga olgan holda, harakatlanish uchun qulay va yakuniy manzilga yetkazib berish uchun qisqa yoʻnalish (katta hajmli va ogʻir vaznli avtotransport vositalari, shuningdek, maxsus, xavfli hamda katta hajmli va ogʻir vaznli yuklarni tashiydigan avtotransport vositalari bundan mustasno) boʻylab amalga oshiriladi.
Bojxona hamrohligidagi kuzatuvni amalga oshirish davomiyligi oddiy yuklarni yakuniy manzilgacha tashish muddatlaridan koʻp boʻlmasligi lozim.
15. Bojxona hamrohligidagi kuzatuv “BOJXONA NAZORATI” yozuvli, ovoz berish, signal yoritgichli qurilmalar bilan jihozlangan maxsus transport vositasida amalga oshiriladi.
Qoʻl yuki sifatida tashilayotgan chet el tovarining bojxona hamrohligidagi kuzatuvi ushbu qoʻl yukini bojxona chegarasi orqali amalda olib oʻtayotgan shaxsning Oʻzbekiston Respublikasi Bojxona kodeksi talablari asosida tashuvchi sifatida javobgarligi ostida va ushbu shaxs xohishiga koʻra, unga tegishli boʻlgan yoki u tomonidan ijaraga olingan (yollangan) yoxud boshqa transport vositasida amalga oshirilishi mumkin.
Bunda bojxona hamkorligida kuzatib borish bilan bogʻliq xarajatlar tashuvchi yoki boshqa manfaatdor shaxslar tomonidan qoplanadi.
16. Bojxona hamrohligida kuzatib borish kunning yorugʻ vaqtida, avtotransport vositasi joʻnatuvchi bojxona organiga yetib kelgan paytdan eʼtiboran olti soatdan kechiktirmay boshlanishi kerak. Oʻzbekiston Respublikasi Prezidenti Administratsiyasi yoki Vazirlar Mahkamasining tegishli yozma topshirigʻi asosida kunning qorongʻi vaqtida ham kuzatuv amalga oshirilishi mumkin.
Agar bir yoʻnalish boʻylab harakatlanuvchi transport vositalarining soni yigirmataga yetsa, bojxona hamrohligidagi kuzatuv darhol boshlanadi.
17. Qabul qilish va topshirish punktlarida teskari yoʻnalish boʻyicha bojxona hamrohligida kuzatib borilayotgan tovarlar va transport vositalari harakatlanish uchun tayyor boʻlganda, bojxona xodimlari qabul qilish va topshirishni ushbu punktda amalga oshiradi.
Qarama-qarshi yoʻnalishda harakatlanayotgan avtotransport vositalari kolonnasi harakatining yoʻnalishi va vaqti mos tushgan hollarda, uchrashuv joyida qabul qilish-topshirishni amalga oshirishga ruxsat beriladi. Bunda bojxona hamrohligida kuzatib borilayotgan hamda xizmat avtotransport vositalari toʻxtaganda, boshqa transport vositalari harakatiga xalal bermasligi va shaxslar hayotiga xavf solmasligi lozim.
Bojxona hamrohligidagi kuzatuvni amalga oshirishda hujjatlar ushbu Nizomning 26 — 31-bandlariga muvofiq rasmiylashtiriladi.
18. Joʻnatuvchi bojxona posti boshligʻi yoki uning vazifasini bajaruvchi shaxs:
avtotransport vositalarini bojxona hamrohligida kuzatib borish uchun xodimlarni ajratadi;
bojxona hamrohligida kuzatuvni amalga oshiruvchi xodimlarga bojxona toʻgʻrisidagi qonunchilik hujjatlariga rioya etilishi, maʼlumotlarni elektron tizimlarga oʻz vaqtida, toʻgʻri kiritish, bojxona hujjatlarini toʻgʻri rasmiylashtirish hamda hududiy bojxona boshqarmalari masʼul xodimlari bilan oʻzaro aloqada boʻlish tartiblari yuzasidan tushuntirishlar beradi.
19. Bojxona hamrohligida kuzatib boriladigan transport vositalari hujjatlarini rasmiylashtiradigan joʻnatuvchi bojxona posti masʼul xodimi:
hujjatlarni oʻrganib chiqadi, transport vositalari eshik va lyuklarining, qoʻl yuki idishi hamda ulardagi qulflarning ishonchliligi, shuningdek, qiyoslash vositalarini, muhrlarning butligini tekshirgan holda, bojxona hamrohligidagi kuzatuvni amalga oshirish uchun zarur hujjatlarni rasmiylashtiradi. Agar tekshirish davomida tovarlar tashilayotgan transport vositasi qonunchilik hujjatlarida belgilangan talablarga muvofiq boʻlmasa, tovarlarni tashishga transport vositasini lozim darajada jihozlash yoxud bojxona toʻgʻrisidagi qonunchilik hujjatlariga rioya etilishini taʼminlash boʻyicha choralar koʻrish sharti bilan ruxsat beradi;
bojxona hamrohligida kuzatib borilayotgan tovarlar, transport vositalari va ularga tegishli hujjatlarni belgilangan tartibda topshiradi.
20. Bojxona hamrohligidagi kuzatuvni amalga oshiruvchi xodim:
bojxona hamrohligida kuzatib borilayotgan tovarlar, transport vositalari va ularga tegishli hujjatlarni belgilangan tartibda qabul qiladi;
bojxona hamrohligida kuzatib boriladigan tovarlar va transport vositalarini qabul qilib olishda transport vositalari eshik va lyuklarining, qoʻl yuki idishi hamda ulardagi qulflarning ishonchliligi, shuningdek, ulardagi qiyoslash vositalari, muhrlarning butligini tekshiradi, kamchiliklar aniqlanganda, tashuvchidan aniqlangan kamchiliklarni bartaraf qilishni talab qiladi;
tijorat va transport hujjatlarida koʻrsatilgan maʼlumotlar bilan transport vositasiga qoʻyilgan bojxona identifikatsiya vositalari mosligini tekshiradi;
bojxona hamrohligida kuzatib borishni amalga oshirish jarayonida kuzatilayotgan tovarga tegishli boʻlgan barcha hujjatlarni shaxsan oʻzida saqlaydi;
post boshligʻi yoki uning oʻrinbosari koʻrsatmasiga asosan tovar va transport vositalarining belgilangan tartibda bojxona hamrohligida kuzatib borilishini amalga oshirish va ularni belgilangan manzilga yetkazish choralarini koʻradi.
Bir yoʻnalishda harakatlanishga moʻljallangan yoʻllarda kuzatilayotgan avtotransport vositalari ortida toʻplangan transport vositalarini oʻtkazib yuborish choralarini koʻradi.
21. Yoʻnalish boʻyicha keyingi hududiy bojxona boshqarmasining bojxona hamrohligidagi kuzatuvni amalga oshiruvchi masʼul xodimlari qabul qilish-topshirishni mazkur Nizomning 17-bandiga muvofiq belgilangan joylarda va 22-bandida keltirilgan tartibda amalga oshiradilar.
22. Soʻngi manzildagi bojxona postiga yetkazib berilgan tovarlar va transport vositalari mazkur bojxona postining masʼul xodimiga topshiriladi hamda bojxona nazorati zonasiga joylashtiriladi.
4-bob. Bojxona hamrohligidagi kuzatuv uchun bojxona yigʻimlari
23. Bojxona hamrohligidagi kuzatuv uchun bojxona yigʻimlari Vazirlar Mahkamasi tomonidan tasdiqlangan miqdorlarda undiriladi, qonunchilik hujjatlariga muvofiq bojxona hamrohligidagi kuzatuv uchun bojxona yigʻimlaridan ozod etilgan holatlar bundan mustasno.
24. Bojxona hamrohligidagi kuzatuv uchun bojxona yigʻimlari oldindan yoki bojxona hududida toʻlanishi lozim.
Bir transport vositasida hamda bitta qoʻl yuki tashilayotgan transport vositasida bir nechta bojxona postlari uchun moʻljallangan tovarlarni tashishda, bojxona hamrohligidagi kuzatuv uchun bojxona yigʻimi, birinchi joʻnatish bojxona postidan yakuniy manzildagi postigacha boʻlgan masofadan kelib chiqqan holda bir marotaba undiriladi.
25. Bojxona hamrohligidagi kuzatuv uchun bojxona yigʻimlari tashuvchi yoki boshqa manfaatdor shaxslar tomonidan toʻlanadi.
5-bob. Bojxona hamrohligidagi kuzatuv
26. Bojxona hamrohligidagi kuzatuvni amalga oshiruvchi xodimlar tomonidan tashuv ish shartlari va tovarlarning xususiyatlaridan kelib chiqqan holda yigirmatadan koʻp boʻlmagan avtotransport vositalari kuzatib borilishi mumkin.
Toʻxtash vaqtida bojxona hamrohligidagi kuzatuvni amalga oshiruvchi xodimlar avtotransport vositalari guruhi nazoratini taʼminlashi lozim.
27. Bojxona hamrohligidagi kuzatuvni amalga oshirish davomida avariya yoki yengib boʻlmas kuch taʼsirida yoxud boshqa hollarda transport vositalaridan birining nosozligi yuzaga kelib, harakatni davom ettira olmaganda, bojxona hamrohligidagi kuzatuvni amalga oshiruvchi xodimlar transport vositalari guruhi harakatini toʻxtatadi va bu haqda ushbu hududdagi hududiy bojxona boshqarmasiga yoki eng yaqin hududda joylashgan bojxona postiga xabar beradi, shuningdek, tovarlar yoʻqotilishining oldini olish boʻyicha zudlik bilan bojxona nazoratini taʼminlash choralarini koʻradi.
Harakatni davom ettirish uchun nosoz holga kelgan avtotransport vositasini hududiy bojxona boshqarmasi yoki bojxona posti masʼul xodimiga topshirgandan soʻng belgilangan tartibda qolgan avtotransport vositalarining bojxona hamrohligidagi kuzatuvini davom ettiradi.
Agarda, avtotransport vositasi nosozligini qisqa vaqtda bartaraf etish imkoni mavjud boʻlsa, taʼmirlash tugatilgandan soʻng bojxona hamrohligidagi kuzatuv davom ettiriladi. Sodir boʻlgan holat toʻgʻrisida yuzaga kelgan holat, uni bartaraf etish yuzasidan koʻrilgan choralar, tovarlarning holati hamda keyinchalik bojxona nazorati va rasmiylashtiruvini amalga oshirish uchun zarur boʻlgan boshqa maʼlumotlarni aks ettirgan holda dalolatnoma tuziladi.
28. Bojxona hamrohligida kuzatib borish jarayonida tovar va transport vositasi avariya yoki yengib boʻlmas kuch taʼsirida shikastlangan, foydalanish uchun yaroqsiz holga kelib qolgan yoki yoʻq boʻlganda, bojxona hamrohligidagi kuzatuvni amalga oshiruvchi xodimlar tashuvchi va halokat sodir boʻlgan yoʻl uchastkasida xizmat koʻrsatuvchi yoʻl-patrul xizmati va boshqa vakolatli organ xodimlari bilan birgalikda sodir boʻlgan holat toʻgʻrisida dalolatnoma toʻldiradi.
Bojxona hamrohligidagi kuzatuvni amalga oshirayotgan xodimlar yuzaga kelgan holat boʻyicha zudlik bilan hududiy bojxona boshqarmasi navbatchilik qismiga va bojxona posti boshligʻiga xabar beradi.
Hududiy bojxona boshqarmasi va bojxona posti rahbariyati sodir boʻlgan holat boʻyicha kechiktirib boʻlmaydigan zarur choralarni koʻradi.
29. Bojxona hamrohligida kuzatib borilayotgan transport vositalari ichki ishlar organlarining blok postlarida toʻxtatilishi hamda tovarlarni koʻrish uchun avtomobilning yuk boʻlmasi ochilishi taqiqlanadi.
Bojxona hamrohligida kuzatib borilayotgan transport vositalarini toʻxtatishga faqat tovar va transport vositalari Oʻzbekiston Respublikasi qonunchilik hujjatlari talablarini buzgan holda, bojxona hamrohligidagi kuzatuv ostida harakatlanayotganligi toʻgʻrisida gumon qilish uchun jiddiy asoslar mavjud boʻlgan taqdirda, Davlat bojxona qoʻmitasi va uning hududiy boshqarmasi rahbariyati tomonidan berilgan yozma koʻrsatma mavjud boʻlganda yoʻl qoʻyiladi.
30. Bojxona hamrohligida kuzatib borish davomida tovarlar va transport vositalari bojxona koʻrigidan oʻtkazilganda belgilangan tartibda dalolatnoma toʻldirilib, uning bir nusxasi tijorat hamda transport hujjatlariga ilova qilinadi, ikkinchi nusxasi bojxona koʻrigini amalga oshirgan bojxona organi ish yurituvida qoladi va Davlat bojxona qoʻmitasining yagona avtomatlashtirilgan axborot tizimiga tegishli maʼlumotlar kiritiladi. Bojxona hamrohligidagi kuzatuv ostida boʻlgan transport vositasining yukxonasi yoki qoʻl yuki idishiga yangi maxsus bojxona plombasi qoʻyiladi.
31. Bojxona hamrohligidagi kuzatuv ostida olib ketilayotgan transport vositasi bojxona hamrohligidagi kuzatuvni amalga oshiruvchi xodimlarning qonuniy talabini bajarmasdan ketib qolganda, zudlik bilan bu haqda ushbu hududdagi hududiy bojxona boshqarmasi hamda oʻzi xizmat olib borayotgan hududiy bojxona boshqarmalari navbatchilik qismiga xabar beradi.
Xabarni olgan navbatchilik qismi ichki ishlar organlarining hududiy tarkibiy tuzilmalariga bojxona hamrohligidagi kuzatuvdan qochib ketgan transport vositasini qidirib topish boʻyicha maʼlumot beradi.
Ichki ishlar organlari:
bojxona organidan xabar kelib tushishi bilan bojxona hamrohligidagi kuzatuvdan qochib ketgan transport vositasini qidirib topish va blok postlarida toʻxtatish hamda bojxona organlariga topshirish choralarini koʻradi;
respublikamiz magistral yoʻllaridagi avtotransport vositalarini nazorat qilish (“Avtotransport vositalarining harakatlanishini videokuzatuvi tizimi”) tizimi maʼlumotlarini elektron shaklda Davlat bojxona qoʻmitasiga onlayn rejimida taqdim etadi.
Bojxona organlari vakolatli vazirlik va idoralar bilan hamkorlikda ichki ishlar organi tomonidan onlayn rejimida taqdim etilgan elektron maʼlumotlar asosida respublika hududida harakatlanayotgan bojxona nazorati ostidagi tovarlar va transport vositalari ustidan nazoratni amalga oshirib boradi.
Bojxona hamrohligidagi kuzatuvni amalga oshiruvchi xodimlarning qonuniy talabini bajarmasdan, bojxona hamrohligidagi kuzatuvdan ketib qolgan transport vositasi topilganda, ushbu transport vositasi bojxona koʻrigidan oʻtkaziladi va tashuvchiga nisbatan bojxona qonunbuzilish holati yuritiladi.
Agar tovarlar yoʻqotilganligi aniqlansa, Kodeks hamda ushbu Nizomning 10-bandi talablari asosida hisoblab chiqarilgan bojxona toʻlovlari tashuvchidan soʻzsiz undirib olinadi.
6-bob. Bojxona hamrohligidagi kuzatuvni amalga oshiruvchi xodimlarning huquq va majburiyatlari
32. Bojxona hamrohligidagi kuzatuvni amalga oshiruvchi xodimlar quyidagilarga majbur:
tovarlar va transport vositalarini bojxona hamrohligidagi kuzatuv ostida yetkazib berishda bojxona qonunchilik hujjatlari talablariga rioya etish;
bojxona hamrohligidagi kuzatuv davomida xavfsizlik choralarini koʻrish va ularga rioya etish;
bojxona hamrohligidagi kuzatuvga olingan tovarlar va avtotransport vositalariga tegishli hujjatlarning saqlanishini taʼminlash;
kuzatilayotgan tovarga tegishli hujjatlarni transport vositasi haydovchisiga yoki tovar kuzatuvchisiga (ekspeditorga) yoxud boshqa shaxslarga bermaslik;
vaqti-vaqti bilan avtotransport vositasining yuk joylashtirilgan qismiga qoʻyilgan muhrlar va plombalarning holatini, shuningdek, tashilayotgan tovarlarni identifikatsiyalovchi boshqa taʼminlov vositalarining saqlanishini tekshirish;
avariya yoki yengib boʻlmas kuch taʼsirida sodir boʻlgan vaziyatlarda yuk tashuvchiga koʻmaklashish;
yoʻl harakati qoidalariga, yoʻnalishiga, yetkazib berish muddatlariga va vaqtlariga qatʼiy rioya qilish.
33. Bojxona hamrohligidagi kuzatuvni amalga oshiruvchi xodimlarga quyidagilar taqiqlanadi:
mazkur Nizom talablarini buzish;
bojxona hamrohligida kuzatib borilayotgan tovarlar va transport vositalarini nazoratsiz qoldirish;
avtotransport vositasi yukxonasini zarurat boʻlmaganda ochish, qonunchilik hujjatlarida nazarda tutilgan holatlar bundan mustasno.
34. Bojxona hamrohligidagi kuzatuvni amalga oshiruvchi xodimlar kuzatib borilayotgan tovarlar, avtotransport vositalari va ularning hujjatlari yoʻq qilinishi yoki yoʻqolishiga sabab boʻladigan holatlar vujudga kelgan vaziyatda tovarlar, avtotransport vositalari va ularning hujjatlari saqlanishini taʼminlash boʻyicha zarur choralarni koʻrishi shart.
7-bob. Yakunlovchi qoidalar
35. Bojxona hamrohligidagi kuzatuv ostida tashiladigan tovarlar, transport vositalarini tashish qoidalarini buzganlik, shuningdek, bojxona hamrohligidagi kuzatuvni amalga oshiruvchi xodimlarning qonuniy talablariga boʻysunmaslik uchun tashuvchi Oʻzbekiston Respublikasining qonunchilik hujjatlariga muvofiq javobgarlikka tortiladi.
36. Bojxona organlari va ichki ishlar organlarining mansabdor shaxslari ushbu Nizom talablarini buzganliklari uchun Oʻzbekiston Respublikasining qonunchilik hujjatlariga muvofiq javobgarlikka tortiladi.
Vazirlar Mahkamasining 2020-yil 22-dekabrdagi 800-son qaroriga 2-ILOVA
Chet el tovarlarini tashish jarayonida bojxona toʻlovlari toʻlanishini taʼminlashni vakolatli shaxslar bilan real vaqt rejimida va interaktiv shaklda oʻzaro hamkorlik asosida hisobga olish va nazorat qilish tartibi toʻgʻrisida
1-bob. Umumiy qoidalar
1. Ushbu Nizom chet el tovarlarini tashish jarayonida bojxona toʻlovlari toʻlanishini taʼminlashni vakolatli shaxslar bilan real vaqt rejimida va interaktiv shaklda oʻzaro hamkorlik asosida hisobga olish va nazorat qilish tartibini belgilaydi.
2. Mazkur Nizomda quyidagi asosiy tushunchalar qoʻllaniladi:
vakolatli shaxs — chet el tovarlari uchun bojxona toʻlovlarining toʻlanishini taʼminlovchi sifatida Oʻzbekiston Respublikasi Davlat bojxona qoʻmitasi (keyingi oʻrinlarda — Davlat bojxona qoʻmitasi) reyestriga kiritilgan, shuningdek bojxona toʻlovlari toʻlanishiga javobgar boʻlgan bank, sugʻurta tashkilotlari, tashqi iqtisodiy faoliyat subyektlari (yuk joʻnatuvchi, yuk qabul qiluvchi, tashuvchi) yoki boshqa manfaatdor shaxs;
joʻnatuvchi bojxona posti — tovarning toʻliq turkumi yoki uning qismini bojxona nazorati ostida tashish boshlangan bojxona posti;
manzildagi bojxona posti — tovarning toʻliq turkumi yoki uning qismini bojxona nazorati ostida tashish tugallanadigan bojxona posti;
Oʻzbekiston Respublikasi Davlat bojxona qoʻmitasining yagona avtomatlashtirilgan axborot tizimi (keyingi oʻrinlarda — DBQ YAAAT) — bojxona chegarasi orqali olib oʻtiladigan tovarlarning va transport vositalarining bojxona nazoratini amalga oshirish uchun ularga doir hujjatlar va maʼlumotlarning kiritilishini, hisobga olinishini hamda monitoring qilinishini nazarda tutuvchi Oʻzbekiston Respublikasi Davlat bojxona qoʻmitasining avtomatlashtirilgan tizimi.
3. Chet el tovarlari tashilayotgan avtotransport vositalari uchun bojxona toʻlovlari toʻlanishini taʼminlash (pul mablagʻlarini bojxona organining shaxsiy gʻazna hisobvaragʻiga kiritishdan tashqari) banklar va sugʻurta tashkilotlari markaziy idoralari bilan Davlat bojxona qoʻmitasi oʻrtasida tuzilgan tomonlarning javobgarligini belgilovchi shartnoma asosida amalga oshiriladi. Bunda bank va sugʻurta tashkilotlarining toʻlov qobiliyati inobatga olinadi.
Bank kafolati hamda sugʻurta polislari Davlat bojxona qoʻmitasi bilan tuzilgan shartnoma asosida banklar va sugʻurta tashkilotlari tomonidan Davlat bojxona qoʻmitasiga elektron shaklda, onlayn rejimda taqdim etiladi.
Chet el tovarlarini tashish jarayonida bojxona organi ruxsatisiz tovarlar berib yuborilganda, yoʻqotilganda yoki manzilga belgilangan muddatda oʻzgarmas holatda (tabiiy eskirish yoxud normal tashish va saqlash sharoitlarida kamayish oqibatidagi oʻzgarishlar bundan mustasno) yetkazib berilmaganda, ushbu tovarlarga hisoblangan bojxona toʻlovlari taʼminlov bojxona rasmiylashtiruvi uchun qabul qilingan kunda amalda boʻlgan bank kafolati yoki sugʻurta polisi asosida undirib olinadi.
4. Banklar va sugʻurta tashkilotlari tomonidan bojxona toʻlovlari toʻlanishi taʼminlangan bank kafolati va sugʻurta polisi, ushbu bank kafolati hamda sugʻurta polisi boʻyicha majburiyatlar bajarilmagunga qadar bekor qilinishi mumkin emas.
5. Chet el tovarlarini tashish jarayonida bojxona toʻlovlari toʻlanishini taʼminlashni hisobga olish hamda nazorat qilish Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) va DBQ YAAAT orqali elektron shaklda amalga oshiriladi.
2-bob. Chet el tovarlarini tashish jarayonida bojxona toʻlovlari toʻlanishini taʼminlash va hisobga olish
1-§. Bojxona toʻlovlari toʻlanishini taʼminlashning umumiy qoidalari
6. Bojxona toʻlovlari toʻlanishini taʼminlash vakolatli shaxslar tomonidan elektron shaklda onlayn rejimida taqdim etiladi.
7. Chet el tovarlarini tashiyotgan avtotransport vositalarini bojxona hamrohligida kuzatib borishdan ozod qilish uchun bojxona toʻlovlarini taʼminlovchi vakolatli shaxs YIDXP orqali Oʻzbekiston Respublikasi Bojxona kodeksining 47-bobiga muvofiq bojxona toʻlovlari toʻlanishini quyidagi istalgan usullar orqali taʼminlashi mumkin:
pul mablagʻlarini bojxona organining shaxsiy gʻazna hisobvaragʻiga (keyingi oʻrinlarda — depozit) kiritish;
tovarlarni garovga qoʻyish;
bank kafolatini taqdim etish;
bojxona toʻlovlarini toʻlash majburiyatini sugʻurtalash;
kafillik.
8. Bojxona toʻlovlari toʻlanishini taʼminlash summasi, bojxona nazorati ostida tashilayotgan tovarlarni “erkin muomalaga chiqarish (import)” bojxona rejimiga joylashtirishda preferensiyalar hamda imtiyozlar inobatga olinmagan holda hisoblab chiqarilgan bojxona toʻlovlari summasiga mos yoki undan kam boʻlmasligi kerak.
9. Chet el tovarlarini Oʻzbekiston Respublikasi hududi orqali tashish boshlanishidan oldin vakolatli shaxs elektron raqamli imzo bilan YIDXPning “Chet el tovarlarining harakatiga bojxona toʻlovlari toʻlanishini taʼminlash” interaktiv xizmati orqali elektron shaklda bojxona toʻlovlari toʻlanishi taʼminotini kiritadi.
Bunda chet el tovarlari tashilayotgan har bir avtotransport vositasi uchun bojxona toʻlovlari toʻlanishini taʼminlash alohida amalga oshirilishi lozim.
10. YIDXP orqali bojxona toʻlovlari toʻlanishini taʼminlashda, chet el tovarlari tashilayotgan har bir avtotransport vositasi uchun maʼlumotlar alohida shakllantirilib, bojxona organiga yuboriladi.
Bojxona organiga kelib tushgan maʼlumotlar DBQ YAAATdagi formatli-mantiqiy nazoratdan ijobiy oʻtganda, chet el tovarlari tashilayotgan har bir avtotransport vositasi boʻyicha bojxona toʻlovlari toʻlanishi taʼminlanganligi toʻgʻrisida identifikatsiya kodi avtomatik tarzda vakolatli shaxsga taqdim etiladi va tovarlarni manzilga yetkazib berish bilan bogʻliq majburiyatlar bajarilguniga qadar ushbu mablagʻlardan foydalanish cheklanadi.
11. Identifikatsiya kodi chet el tovarlarini tashiyotgan avtotransport vositalariga nisbatan bojxona hamrohligida kuzatib borishdan ozod qilish maqsadida bojxona rasmiylashtiruvini amalga oshirish vaqtida yoki Oʻzbekiston Respublikasi bojxona hududiga keladigan tovarlar va transport vositalari toʻgʻrisida elektron shaklda oldindan xabardor qilishda joʻnatuvchi bojxona postiga taqdim qilinadi.
12. Bitta avtotransport vositasiga qoʻllanilgan bojxona toʻlovlari toʻlanishini taʼminlash summasidan ushbu avtotransport vositasiga nisbatan tovarlarni tashish majburiyatlari bajarilgunga qadar boshqa avtotransport vositasiga nisbatan bojxona toʻlovlari toʻlanishini taʼminlash maqsadida foydalanishga yoʻl qoʻyilmaydi.
2-§. Pul mablagʻlarini bojxona organining depozitiga kiritish orqali bojxona toʻlovlari toʻlanishini taʼminlash
13. Toʻlovchi bojxona toʻlovlari toʻlanishini taʼminlash uchun bojxona organining depozitiga pul mablagʻlari summasini milliy valyutada hamda chet el valyutasida kiritishi mumkin.
Bojxona toʻlovlari toʻlanishini taʼminlash chet el valyutasida depozitga kiritilgan mablagʻlar hisobidan amalga oshirilganda, bojxona rasmiylashtiruvi amalga oshirilayotgan kundagi Oʻzbekiston Respublikasi Markaziy banki tomonidan belgilangan rasmiy kurs boʻyicha hisoblanadi.
14. Bojxona organining depozitiga kiritilgan mablagʻlardan bojxona toʻlovlarini taʼminlash depozitga mablagʻ kiritgan shaxsning elektron arizasi asosida avtotransport vositasida tashilayotgan chet el tovarlari uchun foydalaniladi.
15. Bojxona toʻlovlari toʻlanishi taʼminlangan pul mablagʻlaridan foydalanish uchun qoʻyilgan cheklov chet el tovarlarini yetkazib berish boʻyicha majburiyatlar bajarilgandan soʻng avtomatik tarzda bekor boʻladi.
Majburiyatlar bajarilmagan taqdirda, kiritilgan pul mablagʻlari bojxona toʻlovlarini toʻlash boʻyicha qarzdorlikni toʻlash hisobidan amaldagi qonunchilik hujjatlariga muvofiq depozit summasidan soʻzsiz undiriladi.
3-§. Tovarlarni garovga qoʻyish orqali bojxona toʻlovlari toʻlanishini taʼminlash
16. Bojxona toʻlovlari toʻlanishini taʼminlash summasi garov toʻgʻrisidagi shartnoma asosida tovarlarni garovga qoʻyish orqali taʼminlanadi.
17. Garovga qoʻyilgan tovarlardan bojxona toʻlovlari toʻlanishini taʼminlash garovga qoʻygan shaxs nomiga olib kelinayotgan chet el tovarlari uchun foydalaniladi.
18. Bojxona toʻlovlari toʻlanishini taʼminlash uchun garovga qoʻyilgan tovarlardan foydalanish uchun qoʻyilgan cheklov chet el tovarlarini yetkazib berish boʻyicha majburiyatlar bajarilgandan soʻng avtomatik tarzda bekor boʻladi.
Majburiyatlar bajarilmagan taqdirda, bojxona toʻlovlarini toʻlash boʻyicha qarzdorlikni garovga qoʻyilgan tovarlar hisobidan undirib olish choralari koʻriladi.
4-§. Bank kafolatini taqdim etish orqali bojxona toʻlovlari toʻlanishini taʼminlash
19. Bojxona toʻlovlari toʻlanishini taʼminlash summasi Oʻzbekiston Respublikasida bank operatsiyalarini oʻtkazish huquqiga ega boʻlgan bankning kafolatini onlayn rejimda elektron shaklda taqdim etish orqali taʼminlanadi.
20. Bank kafolati asosida bojxona toʻlovlarini taʼminlash bank kafolatini olgan shaxs nomiga olib kelinayotgan yoki ushbu shaxsga tegishli avtotransport vositasida tashilayotgan chet el tovarlari uchun foydalaniladi.
Bojxona toʻlovlari toʻlanishini taʼminlash uchun import qiluvchi tomonidan bank kafolati taqdim etilganda, bank kafolatida uning STIRi, transport korxonalari tomonidan bank kafolati taqdim etilganda esa bank kafolatida chet el tovarini tashiydigan avtotransport vositalari davlat raqami koʻrsatilishi lozim.
21. Bojxona toʻlovlari toʻlanishi taʼminlangan chet el tovarlari boʻyicha majburiyatlar bajarilganda, bank kafolati asosida bojxona toʻlovlari toʻlanishi taʼminlangan summaga nisbatan oʻrnatilgan cheklovlar avtomatik tarzda bekor qilinadi.
Majburiyatlar bajarilmagan taqdirda, bojxona toʻlovlarini toʻlash boʻyicha qarzdorlik bank kafolatini taqdim etgan tijorat bankidan qonunchilik hujjatlariga muvofiq soʻzsiz undiriladi.
5-§. Bojxona toʻlovlarini toʻlash majburiyatini sugʻurtalash orqali bojxona toʻlovlari toʻlanishini taʼminlash
22. Bojxona toʻlovlari toʻlanishini taʼminlash summasi Oʻzbekiston Respublikasida roʻyxatdan oʻtgan sugʻurta tashkilotlarining sugʻurta polisini onlayn rejimda elektron shaklda taqdim etish orqali taʼminlanadi.
23. Sugʻurta polisi asosida bojxona toʻlovlari taʼminotidan sugʻurta polisi berilgan shaxs nomiga olib kelinayotgan yoki ushbu shaxsga tegishli avtotransport vositasida tashilayotgan chet el tovarlari uchun foydalaniladi.
24. Bojxona toʻlovlari toʻlanishini taʼminlash uchun import qiluvchi tomonidan sugʻurta polisi taqdim etilganda, sugʻurta polisida uning STIRi, transport korxonalari tomonidan sugʻurta polisi taqdim etilganda esa sugʻurta polisida chet el tovarini tashiydigan avtotransport vositalari davlat raqami koʻrsatilishi lozim.
25. Sugʻurta polisi bitta avtotransport vositasiga olinganda, bojxona hamrohligida kuzatib borishdan ozod etish uchun YIDXPga murojaat etmasdan, toʻgʻridan-toʻgʻri joʻnatuvchi bojxona postiga murojaat etishi mumkin. Bunda identifikatsiya kodi talab etilmaydi.
26. Bojxona toʻlovlari toʻlanishi taʼminlangan chet el tovarlari boʻyicha majburiyatlar bajarilganda, bojxona toʻlovlari toʻlanishi taʼminlangan sugʻurta polisiga nisbatan oʻrnatilgan cheklovlar avtomatik tarzda bekor qilinadi.
Majburiyatlar bajarilmagan taqdirda, bojxona toʻlovlarini toʻlash boʻyicha qarzdorlikni sugʻurta polisi asosida undirib olish choralari koʻriladi.
6-§. Kafillik orqali bojxona toʻlovlari toʻlanishini taʼminlash
27. Kafillik bojxona organining depozitiga pul mablagʻlari summasini Oʻzbekiston Respublikasining milliy valyutasida hamda chet el valyutasida kiritish orqali taʼminlanadi.
28. Bojxona toʻlovlari toʻlanishini taʼminlash chet el valyutasida depozitga kiritilgan mablagʻlar hisobidan amalga oshirilganda, bojxona rasmiylashtiruvi amalga oshirilayotgan kundagi Oʻzbekiston Respublikasi Markaziy banki tomonidan belgilangan rasmiy kurs boʻyicha hisoblanadi.
29. Kafil tomonidan bojxona organining depozitiga kiritilgan mablagʻlardan depozitga mablagʻ kiritgan yoki boshqa shaxslar nomiga olib kelinayotgan yoxud ushbu shaxslarga tegishli avtotransport vositasida tashilayotgan chet el tovarlari uchun bojxona toʻlovlari toʻlanishini taʼminlashda foydalaniladi.
30. Bojxona toʻlovlari toʻlanishi taʼminlangan pul mablagʻlaridan foydalanish uchun qoʻyilgan cheklov chet el tovarlarini yetkazib berish boʻyicha majburiyatlar bajarilgandan soʻng avtomatik tarzda bekor boʻladi.
Majburiyatlar bajarilmagan taqdirda, kiritilgan pul mablagʻlari bojxona toʻlovlarini toʻlash boʻyicha qarzdorlikni toʻlash hisobiga depozitga kiritilgan kafillik summasidan olinadi.
3-bob. Chet el tovarlarini tashish jarayonida bojxona toʻlovlari toʻlanishini taʼminlashni nazorat qilish
31. DBQ YAAATda chet el tovarlarini tashiyotgan avtotransport vositalariga nisbatan bojxona hamrohligida kuzatib borishdan ozod qilish bilan bogʻliq boʻlgan harakatlarni bajarishning har bir bosqichida formatli-mantiqiy nazorat amalga oshiriladi.
Formatli-mantiqiy nazoratni amalga oshirish natijasida xatoliklar aniqlangan taqdirda, avtomatik tarzda elektron shaklda vakolatli shaxsga tegishli maʼlumotlar ularni toʻgʻrilash uchun yuboriladi.
32. Bojxona rasmiylashtiruvini amalga oshirish vaqtida yoki elektron tarzda oldindan xabardor qilishda taqdim qilingan identifikatsiya kodi orqali bojxona posti xodimi tovarning kuzatuv hujjatlarida koʻrsatilgan maʼlumotlar bilan DBQ YAAATdagi maʼlumotlarni solishtiradi.
Solishtirish natijasi boʻyicha maʼlumotlar oʻrtasida nomuvofiqliklar aniqlanmagan taqdirda, transport vositasi bojxona hamrohligida kuzatib borishdan ozod qilinadi.
Solishtirish natijasi boʻyicha maʼlumotlar oʻrtasida nomuvofiqliklar aniqlanganda, bojxona posti xodimi shu vaqtning oʻzida vakolatli shaxsga YIDXP orqali sabablarini koʻrsatgan holda,chet el tovarlarini tashiyotgan avtotransport vositalariga nisbatan bojxona hamrohligida kuzatib borishdan ozod qilishni rad etadi.
33. Identifikatsiya kodi va bojxona toʻlovlari toʻlanishini taʼminlash summasini bojxona posti xodimi DBQ YAAATda mustaqil tekshiradi.
4-bob. Bojxona organi ruxsatisiz tovarlar berib yuborilganda, yoʻqotilganda yoki manzildagi bojxona postiga belgilangan muddatda hamda oʻzgarmas holatda yetkazilmaganda, bojxona toʻlovlarini hisoblash va undirish
34. Bojxona organi ruxsatisiz tovarlar berib yuborilganda, yoʻqotilganda yoki manzildagi bojxona postiga belgilangan muddatda oʻzgarmas holatda (tabiiy eskirish yoxud normal tashish va saqlash sharoitlarida kamayish oqibatidagi oʻzgarishlar bundan mustasno) yetkazilmaganligi holati aniqlanganda, manzildagi bojxona posti, agar mazkur holat boshqa hududiy boshqarma joylashgan hududda aniqlanganda, ushbu hududiy boshqarma masʼul tarkibiy tuzilmalari aniqlangan kunning oʻzida hududiy boshqarma rahbariyatiga yozma axborot beradi.
Mazkur bandning birinchi xatboshida koʻrsatilgan holatlar boʻyicha manzildagi bojxona postidan axborot kelib tushishi bilan hududiy boshqarma rahbariyati tovarlarga bojxona toʻlovlarini hisoblash boʻyicha zarur choralarni koʻradi.
Taqdim qilingan hamda DBQ YAAATdan olingan maʼlumotlar asosida mazkur bandning birinchi xatboshida koʻrsatilgan holatlar aniqlangan kundan boshlab ikki ish kuni ichida mazkur Nizomga ilovada koʻrsatilgan shaklda dalolatnoma toʻldiriladi. Ushbu dalolatnoma bojxona toʻlovlari va penyalarni soʻzsiz undirib olish haqidagi talabnoma bilan birga DBQ YAAAT orqali yoki qonunchilik hujjatlariga muvofiq boshqa yoʻl bilan:
vakolatli shaxsga;
kafilga (kafillik bilan taʼminlanganda);
bankka (bank kafolati bilan taʼminlanganda);
sugʻurtalovchi tashkilotga (sugʻurta bilan taʼminlanganda) yuboriladi.
Davlat bojxona qoʻmitasining hududiy boshqarmalari vakolatli tashkilot va idoralar bilan hamkorlikda uch ish kuni ichida holatga aniqlik kiritish hamda tovarlarni qidirib topish choralarini koʻradi.
35. Bojxona nazorati ostida tashilayotgan tovarlarni manzildagi bojxona postiga toʻliq yetkazish choralari koʻrilishi yoki dalolatnoma asosida bojxona toʻlovlarini toʻlash muddati talabnoma toʻlovchiga topshirilgan yoki toʻlovchi tomonidan talabnoma olingan kunning ertasidan eʼtiboran oʻn ish kunini tashkil etadi.
36. Vakolatli shaxs tomonidan talabnomada koʻrsatilgan talablar bajarilmaganda, Oʻzbekiston Respublikasi Bojxona kodeksining 47-bobiga muvofiq choralar koʻriladi, shu jumladan, talabnoma yuborgan hududiy boshqarma tomonidan sudga vakolatli shaxs tomonidan chet el tovarlarini tashiyotgan avtotransport vositalariga nisbatan bojxona hamrohligida kuzatib borishdan ozod qilish boʻyicha identifikatsiya kodi berishni vaqtincha toʻxtatib turish toʻgʻrisida belgilangan tartibda sud organlariga murojaat qilinadi.
37. Identifikatsion kod berishni vaqtincha toʻxtatib turish haqidagi sud qarori qabul qilinganda, toʻlanishi lozim boʻlgan bojxona toʻlovlari va penyalar toʻliq undirilgunga qadar vakolatli shaxsga chet el tovarlarini tashiyotgan avtotransport vositalariga nisbatan bojxona hamrohligida kuzatib borishdan ozod qilish boʻyicha identifikatsion kod berilishi toʻxtatiladi. Bu haqida bojxona organi tomonidan DBQ YAAATga tegishli formatli-mantiqiy nazorat oʻrnatiladi.
38. Tovarlarni bojxona organining ruxsatisiz berib yuborish, yoʻqotish yoki manzildagi bojxona postiga belgilangan muddatda oʻzgarmas holatda yetkazmaslik oqibatida hisoblangan bojxona toʻlovlari undirib olingandan soʻng tovarni yetkazib berishning nazorat hujjati nazoratdan yechiladi.
5-bob. Yakunlovchi qoida
39. Mazkur Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javobgarlikka tortiladi.
Chet el tovarlarini tashish jarayonida bojxona toʻlovlari toʻlanishini taʼminlashni vakolatli shaxslar bilan real vaqt rejimida interaktiv shaklda oʻzaro hamkorlik asosida hisobga olish va nazorat qilish tartibi toʻgʻrisidagi nizomga ILOVA
Bojxona toʻlovlari va penyalarni vakolatli shaxsdan soʻzsiz undirish toʻgʻrisida
20___ yil “_____” _____________ roʻyxatdan oʻtgan, davlat raqami ________________________________________________________ (raqami) boʻlgan avtotransport vositasini rasmiylashtirish ______________/_______________/_________________ raqamli (post kodi) (sanasi) (raqami) Yukni yetkazib berish nazorat hujjati asosida bojxona nazorati ostida __________________________________________________________________________________________dan (bojxona organi nomi) __________________________________________________________________________________________gacha (bojxona organi nomi) ___________________________________________________________________tomonidan berilgan (vakolatli shaxs nomi, joylashuvi (pochta manzili) chet el tovarlarini tashish jarayonida bojxona toʻlovlarini taʼminlash asosida __________son identifikatsiya kodi __________________________________________________________________________ tomonidan tashilayotgan (tashuvchi nomi, joylashuvi (pochta manzili) bojxona qiymati ______________________________ ga teng, vazni ___________ kg boʻlgan tovarlar (AQSH dollarida) (netto vazni) bojxona organi ruxsatisiz tovarlar berib yuborilganligi (yoʻqotilganligi, belgilangan bojxona organiga yetkazilmaganligi) holati aniqlangan va 20 ____ y. “____” _____________________________________________ kuni qayd etilgan. ______________________________________________________________________________________________________________________________________________________________tovarini bojxona organi ruxsatisiz tovarlar berib yuborilganligi (yoʻqotilganligi, belgilangan bojxona organiga yetkazilmaganligi) uchun identifikatsiya kodining egasi ______________________________________ tomonidan (vakolatli shaxs nomi) Oʻzbekiston Respublikasi Bojxona kodeksiga muvofiq quyidagi bojxona toʻlovlari va penyalar toʻlanishi lozim: Bojxona boji _____________________________________________________________________/summa/ QQS_________________________________________________________________/summa/ Aksiz soligʻi _________________________________________________________/summa/ Boshqa bojxona toʻlovlari______________________________________________/summa/ Toʻlovlar toʻlanishi kechiktirilganligi uchun penya _________________________/summa/ Jami: toʻlanishi lozim boʻlgan _________________________________________/summa/ 20__ y. “___” ___________ dagi _____________________________-son soʻzsiz undirilgan toʻlov hujjati umumiy summasi _____________________________________ bojxona organlari ______________________________________________________son hisobraqamiga (bojxona organi hisob raqami, bank nomi, KTUT raqami) ____ yil “____”__________________ kuni kelib tushgan summa Vakolatli shaxsdan talab qilingan summani ___________________________________________________ _______________________________________________ sababli undirish imkoniyati mavjud emas. Bojxona organi xodimi imzosi ___________________________________ ___________________________________________________________________________ (lavozimi, F.I.O., imzo) M.Oʻ.
Vazirlar Mahkamasining 2020-yil 22-dekabrdagi 800-son qaroriga 3-ILOVA
Oʻzbekiston Respublikasi Hukumatining oʻz kuchini yoʻqotgan deb eʼtirof etilayotgan qarorlari
1. Vazirlar Mahkamasining “Oʻzbekiston Respublikasi hududida tashilayotgan tovarlarni bojxona tomonidan nazorat qilishni kuchaytirish toʻgʻrisida” 2004-yil 20-maydagi 239-son qarori (Oʻzbekiston Respublikasi QT, 2004-y., 5-son, 49-modda).
2. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasi Prezidentining “Ishbilarmonlik muhitini yanada tubdan yaxshilash va tadbirkorlikka yanada keng erkinlik berish chora-tadbirlari toʻgʻrisida” 2012-yil 18-iyuldagi PF-4455-son Farmoni)” 2012-yil 31-iyuldagi 232-son qaroriga (Oʻzbekiston Respublikasi QHT, 2012-y., 31-son, 357-modda) ilovaning 5-bandi .
3. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasining “Oʻzbekiston Respublikasining Budjet kodeksini tasdiqlash toʻgʻrisida” 2013-yil 26-dekabrdagi OʻRQ-360-son hamda “Soliq va budjet siyosatining 2016-yilga moʻljallangan asosiy yoʻnalishlari qabul qilinganligi munosabati bilan Oʻzbekiston Respublikasining Soliq kodeksiga oʻzgartish va qoʻshimchalar kiritish toʻgʻrisida” 2015-yil 31-dekabrdagi OʻRQ-398-son qonunlari)” 2016-yil 26-apreldagi 122-son qaroriga (Oʻzbekiston Respublikasi QHT, 2016-y., 17-son, 176-modda) 1-ilovaning 71-bandi .
4. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasining “Oʻzbekiston Respublikasining Bojxona kodeksini tasdiqlash toʻgʻrisida” 2016-yil 20-yanvardagi OʻRQ-400-son hamda “Oʻzbekiston Respublikasining Bojxona kodeksi qabul qilinishi munosabati bilan Oʻzbekiston Respublikasining ayrim qonun hujjatlariga oʻzgartishlar kiritish, shuningdek baʼzilarini oʻz kuchini yoʻqotgan deb topish toʻgʻrisida” 2016-yil 20-yanvardagi OʻRQ-401-son qonunlari)” 2016-yil 20-iyundagi 211-son qaroriga (Oʻzbekiston Respublikasi QHT, 2016-y., 25-son, 308-modda) 1-ilovaning 12-bandi.
5. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish hamda baʼzilarini oʻz kuchini yoʻqotgan deb hisoblash haqida (Oʻzbekiston Respublikasi Prezidentining “Oʻzbekiston Respublikasi Davlat bojxona xizmati organlari faoliyatini tubdan takomillashtirish chora-tadbirlari toʻgʻrisida” 2018-yil 12-apreldagi PF-5414-son Farmoni, Oʻzbekiston Respublikasi Prezidentining “Oʻzbekiston Respublikasi Davlat bojxona xizmati organlarining faoliyatini tashkil etish toʻgʻrisida” 2018-yil 12-apreldagi PQ-3665-son qarori)” 2018-yil 18-iyuldagi 553-son qaroriga 2-ilovaning 2-bandi .
Oʻzbekiston Respublikasining Bosh vaziri A. ARIPOV
Toshkent sh.,
2020-yil 22-dekabr,
800-son