📅 2020-yil 29-dekabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2020 йил 29 декабрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 29 декабря 2020 г. · Постановления Кабинета Министров
Официальный текст. Официальный документ. Редакционные примечания не включены.
📅 29 December 2020 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Ўзбекистон Республикаси Маданий мерос агентлиги ҳузуридаги Маданий мерос илмий-тадқиқот институти фаолиятини ташкил этиш тўғрисида
Ўзбекистон Республикаси Президентининг 2020 йил 26 майдаги «Маданият ва санъат соҳасининг жамият ҳаётидаги ўрни ва таъсирини янада ошириш чора-тадбирлари тўғрисида» ПФ-6000-сон Фармони ҳамда «Ўзбекистон Республикаси Маданият вазирлиги фаолиятини такомиллаштириш чора-тадбирлари тўғрисида» ПҚ-4730-сон қарори ижросини таъминлаш мақсадида Вазирлар Маҳкамаси қарор қилади:
1. Қуйидагилар:
а) Ўзбекистон Республикаси Президентининг «Маъмурий ислоҳотлар доирасида Маданий мерос соҳасида давлат бошқарувини самарали ташкил қилиш чора-тадбирлари тўғрисида» 2023 йил 1 июндаги ПҚ-177-сон қарори билан Туризм ва маданий мерос вазирлиги тизимидаги Маданий мерос объектларини асраш ва туризм ҳудудларининг мастер-режалари бўйича лойиҳалаштириш институти Маданий мерос илмий-тадқиқот институти (кейинги ўринларда — Институт) деб қайта номланган ҳолда Маданий мерос агентлиги тизимига ўтказилгани;
б) Ўзбекистон Республикаси Президентининг «Ўзбекистон Республикаси Маданият вазирлиги фаолиятини такомиллаштириш чора-тадбирлари тўғрисида» 2020 йил 26 майдаги ПҚ-4730-сон қарори билан қуйидагилар Институтни молиялаштириш манбалари этиб:
фундаментал, амалий ва инновацион тадқиқотларнинг давлат илмий-техникавий дастурларида назарда тутилган маблағлар;
ўз фаолиятидан олган маблағлари;
халқаро молия институтлари ва бошқа ташкилотларнинг грантлари;
қонун ҳужжатлари билан тақиқланмаган бошқа манбалар белгилангани маълумот учун қабул қилинсин.
2. Қуйидагилар Институтнинг асосий вазифалари этиб белгилансин:
моддий маданий мероснинг кўчмас мулк объектлари ва уларнинг қўриқланадиган теграларида ҳамда археология мероси объектлари, музей ашёлари ва коллекциялари ҳамда маданий бойликларни уларнинг тарихий-маданий қиммати ва ноёблигини сақлаган ҳолда консервациялаш, тузатиш, таъмирлаш, ҳозирги замонда фойдаланишга мослаштириш, шунингдек, улар билан боғлиқ илмий ва илмий-техник тадқиқотлар, лойиҳалаш ҳамда лойиҳа-смета ҳужжатларини ишлаб чиқиш;
моддий маданий мероснинг кўчмас мулк объектлари кадастр ҳужжатлари ва унинг қўриқланадиган тегралари лойиҳаларини, алоҳида муҳофаза қилинадиган тарихий-маданий ҳудудлар, шу жумладан, ЮНЕСКОнинг Умумжаҳон мероси рўйхатига киритилган ҳудудларни бошқариш режалари ва меросга бўлган таъсирини баҳолаш ҳисоботларини ишлаб чиқиш;
моддий маданий мерос объектларини асрашга доир ишлар учун уларнинг ўзига хос жиҳатларини инобатга олган янги усул, материал ва технологияларни ишлаб чиқиш, бу борадаги хорижий илғор тажрибаларни чуқур ўрганиш ва амалиётга татбиқ этиш, ёдгорликларни музейлаштириш, музейлар экспозицияларини яратиш;
маданий меросни, шу жумладан, номоддий маданий меросни ва алоҳида муҳофаза қилинадиган тарихий-маданий ҳудудларни илмий ўрганиш, ҳужжатлаштиришда иштирок этиш, шунингдек, уларни муҳофаза қилиш, оммалаштириш ва улардан оқилона фойдаланиш бўйича илмий-методик тавсиялар ишлаб чиқиш, соҳага инновацион технологияларни кенг жорий этиш.
3. Белгилаб қўйилсинки:
Институт директори Ўзбекистон Республикаси Маданий мерос агентлиги директори томонидан белгиланган тартибда лавозимга тайинланади ва лавозимидан озод этилади;
Институт моддий маданий мероснинг кўчмас мулк объектлари ва уларнинг қўриқланадиган теграларидаги консервациялаш, таъмирлаш, объектларни қуриш, бузиш ва ободонлаштириш ишлари, ҳозирги замонда фойдаланишга мослаштириш, шунингдек, улар билан боғлиқ илмий ва илмий-техник тадқиқотлар, лойиҳалаш ҳамда лойиҳа-смета ҳужжатларини ишлаб чиқиш ишларини қонунчилик ҳужжатларида белгиланган тартибда амалга оширади.
4. Ўзбекистон Республикаси Маданият вазирлиги бир ой муддатда Институтнинг уставини, Институт даромадларини инобатга олган ҳолда унинг тузилмаси ҳамда ходимлари меҳнатига ҳақ тўлаш ва уларни рағбатлантириш тартибини ишлаб чиқсин ҳамда белгиланган тартибда тасдиқласин.
5. Институтга унинг ўз даромадлари ҳисобидан 1 та енгил автотранспорт воситасини сақлаш учун лимит ажратилсин.
6. Институт Тошкент шаҳар, Шайхонтоҳур тумани, Ўзгариш кўчаси, 18-уй манзилида жойлашган Ўзбекистон Республикаси Маданий мерос агентлигининг биносига текин фойдаланиш ҳуқуқи асосида жойлаштирилсин.
7. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари Б.А. Мусаев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2020 йил 29 декабрь,
814-сон
Oʻzbekiston Respublikasi Vazirlar Mahkamasining
qarori
Oʻzbekiston Respublikasi Madaniy meros agentligi huzuridagi Madaniy meros ilmiy-tadqiqot instituti faoliyatini tashkil etish toʻgʻrisida
Oʻzbekiston Respublikasi Prezidentining 2020-yil 26-maydagi “Madaniyat va sanʼat sohasining jamiyat hayotidagi oʻrni va taʼsirini yanada oshirish chora-tadbirlari toʻgʻrisida” PF-6000-son Farmoni hamda “Oʻzbekiston Respublikasi Madaniyat vazirligi faoliyatini takomillashtirish chora-tadbirlari toʻgʻrisida” PQ-4730-son qarori ijrosini taʼminlash maqsadida Vazirlar Mahkamasi qaror qiladi:
1. Quyidagilar:
a) Oʻzbekiston Respublikasi Prezidentining “Maʼmuriy islohotlar doirasida Madaniy meros sohasida davlat boshqaruvini samarali tashkil qilish chora-tadbirlari toʻgʻrisida” 2023-yil 1-iyundagi PQ-177-son qarori bilan Turizm va madaniy meros vazirligi tizimidagi Madaniy meros obyektlarini asrash va turizm hududlarining master-rejalari boʻyicha loyihalashtirish instituti Madaniy meros ilmiy-tadqiqot instituti (keyingi oʻrinlarda — Institut) deb qayta nomlangan holda Madaniy meros agentligi tizimiga oʻtkazilgani;
b) Oʻzbekiston Respublikasi Prezidentining “Oʻzbekiston Respublikasi Madaniyat vazirligi faoliyatini takomillashtirish chora-tadbirlari toʻgʻrisida” 2020-yil 26-maydagi PQ-4730-son qarori bilan quyidagilar Institutni moliyalashtirish manbalari etib:
fundamental, amaliy va innovatsion tadqiqotlarning davlat ilmiy-texnikaviy dasturlarida nazarda tutilgan mablagʻlar;
oʻz faoliyatidan olgan mablagʻlari;
xalqaro moliya institutlari va boshqa tashkilotlarning grantlari;
qonun hujjatlari bilan taqiqlanmagan boshqa manbalar belgilangani maʼlumot uchun qabul qilinsin.
2. Quyidagilar Institutning asosiy vazifalari etib belgilansin:
moddiy madaniy merosning koʻchmas mulk obyektlari va ularning qoʻriqlanadigan tegralarida hamda arxeologiya merosi obyektlari, muzey ashyolari va kolleksiyalari hamda madaniy boyliklarni ularning tarixiy-madaniy qimmati va noyobligini saqlagan holda konservatsiyalash, tuzatish, taʼmirlash, hozirgi zamonda foydalanishga moslashtirish, shuningdek, ular bilan bogʻliq ilmiy va ilmiy-texnik tadqiqotlar, loyihalash hamda loyiha-smeta hujjatlarini ishlab chiqish;
moddiy madaniy merosning koʻchmas mulk obyektlari kadastr hujjatlari va uning qoʻriqlanadigan tegralari loyihalarini, alohida muhofaza qilinadigan tarixiy-madaniy hududlar, shu jumladan, YUNESKOning Umumjahon merosi roʻyxatiga kiritilgan hududlarni boshqarish rejalari va merosga boʻlgan taʼsirini baholash hisobotlarini ishlab chiqish;
moddiy madaniy meros obyektlarini asrashga doir ishlar uchun ularning oʻziga xos jihatlarini inobatga olgan yangi usul, material va texnologiyalarni ishlab chiqish, bu boradagi xorijiy ilgʻor tajribalarni chuqur oʻrganish va amaliyotga tatbiq etish, yodgorliklarni muzeylashtirish, muzeylar ekspozitsiyalarini yaratish;
madaniy merosni, shu jumladan, nomoddiy madaniy merosni va alohida muhofaza qilinadigan tarixiy-madaniy hududlarni ilmiy oʻrganish, hujjatlashtirishda ishtirok etish, shuningdek, ularni muhofaza qilish, ommalashtirish va ulardan oqilona foydalanish boʻyicha ilmiy-metodik tavsiyalar ishlab chiqish, sohaga innovatsion texnologiyalarni keng joriy etish.
3. Belgilab qoʻyilsinki:
Institut direktori Oʻzbekiston Respublikasi Madaniy meros agentligi direktori tomonidan belgilangan tartibda lavozimga tayinlanadi va lavozimidan ozod etiladi;
Institut moddiy madaniy merosning koʻchmas mulk obyektlari va ularning qoʻriqlanadigan tegralaridagi konservatsiyalash, taʼmirlash, obyektlarni qurish, buzish va obodonlashtirish ishlari, hozirgi zamonda foydalanishga moslashtirish, shuningdek, ular bilan bogʻliq ilmiy va ilmiy-texnik tadqiqotlar, loyihalash hamda loyiha-smeta hujjatlarini ishlab chiqish ishlarini qonunchilik hujjatlarida belgilangan tartibda amalga oshiradi.
4. Oʻzbekiston Respublikasi Madaniyat vazirligi bir oy muddatda Institutning ustavini, Institut daromadlarini inobatga olgan holda uning tuzilmasi hamda xodimlari mehnatiga haq toʻlash va ularni ragʻbatlantirish tartibini ishlab chiqsin hamda belgilangan tartibda tasdiqlasin.
5. Institutga uning oʻz daromadlari hisobidan 1 ta yengil avtotransport vositasini saqlash uchun limit ajratilsin.
6. Institut Toshkent shahar, Shayxontohur tumani, Oʻzgarish koʻchasi, 18-uy manzilida joylashgan Oʻzbekiston Respublikasi Madaniy meros agentligining binosiga tekin foydalanish huquqi asosida joylashtirilsin.
7. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A. Musayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2020-yil 29-dekabr,
814-son