📅 2021-yil 14-yanvar · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 14 январь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 14 января 2021 г. · Постановления Кабинета Министров
Официальный текст. Официальный документ. Редакционные примечания не включены.
📅 14 January 2021 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Даволаш-профилактика муассасаларини замонавий тиббий техника билан жиҳозлашда Япония Ҳукумати грантидан самарали фойдаланиш чора-тадбирлари тўғрисида
Ўзбекистон Республикаси Соғлиқни сақлаш вазирлиги даволаш-профилактика муассасаларини замонавий тиббий техника билан жиҳозлашда Япония Ҳукумати грантидан самарали фойдаланиш мақсадида Вазирлар Маҳкамаси қарор қилади:
1. Ўзбекистон Республикаси ҳамда Япония Ҳукумати ўртасида 2020 йил 17 июнда Ўзбекистон Республикаси соғлиқни сақлаш тизимига грант ажратиш тўғрисида Ҳукуматлараро ноталар алмашинуви имзоланганлиги ва унда:
Ўзбекистон Республикаси Соғлиқни сақлаш вазирлиги даволаш-профилактика муассасаларига Япония Ҳукуматининг беғараз кўмак дастури бўйича қиймати 500 миллион япон йени миқдоридаги гранти ҳисобидан Японияда ишлаб чиқарилган тиббий техника етказиб бериш белгиланганлиги (кейинги ўринларда — лойиҳа);
Япония Ҳукумати томонидан «Crown Agents Japan Limited (CA)» компанияси барча харидларни амалга ошириш ва етказиб бериш бўйича вакил этиб тайинлаганлиги;
Соғлиқни сақлаш вазирлиги номига Япония ваколатли банкида грант бўйича ҳисоб-китоб хизматларини амалга ошириш учун махсус ҳисобварақ очилиши кўзда тутилганлиги маълумот учун қабул қилинсин.
2. «Ўзбекистон Республикаси Ташқи иқтисодий фаолият миллий банки» АЖга (кейинги ўринларда — «Ўзмиллийбанк» АЖ) Япониянинг ваколатли банки билан банклараро шартномани имзолаш ваколати берилсин.
«Ўзмиллийбанк» АЖ Соғлиқни сақлаш вазирлиги номига Япониянинг ваколатли банкида грант бўйича ҳисоб-китоб хизматларини амалга ошириш учун махсус ҳисобварақ очилишини таъминласин.
3. Ўзбекистон Республикаси Соғлиқни сақлаш вазирлиги:
Япония томони билан келишган ҳолда лойиҳани амалга ошириш доирасида грант олиш ва унга хизмат кўрсатиш билан боғлиқ барча тартиботларни расмийлаштириш, харидлар жараёнининг бориши бўйича тегишли мониторинг олиб борсин;
лойиҳа доирасида етказиб берилган тиббий техникалар, истисно тариқасида, давлат рўйхатидан ўтказилмасдан, мажбурий сертификатлаш шарти билан божхона расмийлаштирувидан ўтказилишини таъминласин;
Япония Ҳукумати гранти ҳисоб-китоблари доирасида хизмат кўрсатувчи Япониянинг ваколатли банки фойдасига белгиланган шаклда кафолат хати (Acknowledgement letter) тақдим қилсин;
Япония Ҳукумати грантига сифатли хизмат кўрсатиш мақсадида Ўзбекистон Республикаси Соғлиқни сақлаш вазирлиги ва «Ўзмиллийбанк» АЖ ўртасида тузилиши лозим бўлган Агентлик битими лойиҳасини ишлаб чиқсин;
«Ўзмиллийбанк» АЖ томонидан тегишли буюртманома тақдим этилгандан сўнг беш иш куни ичида Япония ваколатли банкининг воситачилик харажатлари тўлаб берилишини таъминласин.
4. «Ўзбекистон меҳр-шафқат ва саломатлик» жамоат фондига лойиҳани амалга ошириш доирасида Япония ваколатли банкининг воситачилик харажатларини фонд маблағлари ҳисобидан қоплаб бериш тавсия этилсин.
5. Ўзбекистон Республикаси Соғлиқни сақлаш вазирлигининг буюртманомалари бўйича:
Ташқи ишлар вазирлиги лойиҳани амалга оширишда иштирок этувчи хорижий мутахассисларга кириш визалари консуллик йиғимлари ва ҳақиқий харажатларнинг ўрнини қоплаш ҳисобидан йиғимлар ундирилмасдан белгиланган тартибда расмийлаштирилишини;
Ички ишлар вазирлиги лойиҳани амалга оширишда иштирок этувчи хорижий мутахассисларга давлат божлари ундирилмасдан визалар берилиши (муддати узайтирилиши)ни ҳамда уларнинг яшаш жойида вақтинча рўйхатдан ўтказилишини (муддати узайтирилишини) таъминласин.
6. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари Б.А. Мусаев ҳамда Ўзбекистон Республикаси соғлиқни сақлаш вазири А.М. Хаджибаев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2021 йил 14 январь,
17-сон
Oʻzbekiston Respublikasi Vazirlar Mahkamasining
qarori
Davolash-profilaktika muassasalarini zamonaviy tibbiy texnika bilan jihozlashda Yaponiya Hukumati grantidan samarali foydalanish chora-tadbirlari toʻgʻrisida
Oʻzbekiston Respublikasi Sogʻliqni saqlash vazirligi davolash-profilaktika muassasalarini zamonaviy tibbiy texnika bilan jihozlashda Yaponiya Hukumati grantidan samarali foydalanish maqsadida Vazirlar Mahkamasi qaror qiladi:
1. Oʻzbekiston Respublikasi hamda Yaponiya Hukumati oʻrtasida 2020-yil 17-iyunda Oʻzbekiston Respublikasi sogʻliqni saqlash tizimiga grant ajratish toʻgʻrisida Hukumatlararo notalar almashinuvi imzolanganligi va unda:
Oʻzbekiston Respublikasi Sogʻliqni saqlash vazirligi davolash-profilaktika muassasalariga Yaponiya Hukumatining begʻaraz koʻmak dasturi boʻyicha qiymati 500 million yapon yeni miqdoridagi granti hisobidan Yaponiyada ishlab chiqarilgan tibbiy texnika yetkazib berish belgilanganligi (keyingi oʻrinlarda — loyiha);
Yaponiya Hukumati tomonidan “Crown Agents Japan Limited (CA)” kompaniyasi barcha xaridlarni amalga oshirish va yetkazib berish boʻyicha vakil etib tayinlaganligi;
Sogʻliqni saqlash vazirligi nomiga Yaponiya vakolatli bankida grant boʻyicha hisob-kitob xizmatlarini amalga oshirish uchun maxsus hisobvaraq ochilishi koʻzda tutilganligi maʼlumot uchun qabul qilinsin.
2. “Oʻzbekiston Respublikasi Tashqi iqtisodiy faoliyat milliy banki” AJga (keyingi oʻrinlarda — “Oʻzmilliybank” AJ) Yaponiyaning vakolatli banki bilan banklararo shartnomani imzolash vakolati berilsin.
“Oʻzmilliybank” AJ Sogʻliqni saqlash vazirligi nomiga Yaponiyaning vakolatli bankida grant boʻyicha hisob-kitob xizmatlarini amalga oshirish uchun maxsus hisobvaraq ochilishini taʼminlasin.
3. Oʻzbekiston Respublikasi Sogʻliqni saqlash vazirligi:
Yaponiya tomoni bilan kelishgan holda loyihani amalga oshirish doirasida grant olish va unga xizmat koʻrsatish bilan bogʻliq barcha tartibotlarni rasmiylashtirish, xaridlar jarayonining borishi boʻyicha tegishli monitoring olib borsin;
loyiha doirasida yetkazib berilgan tibbiy texnikalar, istisno tariqasida, davlat roʻyxatidan oʻtkazilmasdan, majburiy sertifikatlash sharti bilan bojxona rasmiylashtiruvidan oʻtkazilishini taʼminlasin;
Yaponiya Hukumati granti hisob-kitoblari doirasida xizmat koʻrsatuvchi Yaponiyaning vakolatli banki foydasiga belgilangan shaklda kafolat xati (Acknowledgement letter) taqdim qilsin;
Yaponiya Hukumati grantiga sifatli xizmat koʻrsatish maqsadida Oʻzbekiston Respublikasi Sogʻliqni saqlash vazirligi va “Oʻzmilliybank” AJ oʻrtasida tuzilishi lozim boʻlgan Agentlik bitimi loyihasini ishlab chiqsin;
“Oʻzmilliybank” AJ tomonidan tegishli buyurtmanoma taqdim etilgandan soʻng besh ish kuni ichida Yaponiya vakolatli bankining vositachilik xarajatlari toʻlab berilishini taʼminlasin.
4. “Oʻzbekiston mehr-shafqat va salomatlik” jamoat fondiga loyihani amalga oshirish doirasida Yaponiya vakolatli bankining vositachilik xarajatlarini fond mablagʻlari hisobidan qoplab berish tavsiya etilsin.
5. Oʻzbekiston Respublikasi Sogʻliqni saqlash vazirligining buyurtmanomalari boʻyicha:
Tashqi ishlar vazirligi loyihani amalga oshirishda ishtirok etuvchi xorijiy mutaxassislarga kirish vizalari konsullik yigʻimlari va haqiqiy xarajatlarning oʻrnini qoplash hisobidan yigʻimlar undirilmasdan belgilangan tartibda rasmiylashtirilishini;
Ichki ishlar vazirligi loyihani amalga oshirishda ishtirok etuvchi xorijiy mutaxassislarga davlat bojlari undirilmasdan vizalar berilishi (muddati uzaytirilishi)ni hamda ularning yashash joyida vaqtincha roʻyxatdan oʻtkazilishini (muddati uzaytirilishini) taʼminlasin.
6. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A. Musayev hamda Oʻzbekiston Respublikasi sogʻliqni saqlash vaziri A.M. Xadjibayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2021-yil 14-yanvar,
17-son