📅 2021-yil 2-fevral · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 2 февраль · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 2 февраля 2021 г. · Постановления Кабинета Министров
Официальный текст. Официальный документ. Редакционные примечания не включены.
📅 2 February 2021 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
ТУЗИЛМАСИ
УСТАВИ
ДАСТУРИ
ЎЗГАРТИРИШ
«Термиз халқаро савдо маркази» эркин савдо зонаси фаолиятини ташкил этиш чора-тадбирлари тўғрисида
Ўзбекистон Республикаси Президентининг «Сурхондарё вилояти ва Тошкент шаҳрида махсус иқтисодий ва кичик саноат зоналари фаолиятини янада ривожлантириш чора-тадбирлари тўғрисида» 2020 йил 12 ноябрдаги ПФ-6109-сон Фармонининг ижросини таъминлаш мақсадида Вазирлар Маҳкамаси қарор қилади:
1. Ўзбекистон Республикаси Президентининг «Афғонистон Ислом Республикаси билан иқтисодий ҳамкорликни янада кенгайтириш ва мустаҳкамлаш чора-тадбирлари тўғрисида» 2020 йил 12 ноябрдаги ПҚ-4892-сон қарорига асосан:
Афғонистон Ислом Республикаси билан савдо-иқтисодий ҳамкорликни янада ривожлантириш чора-тадбирлари тасдиқланганлиги;
Ўзбекистон Республикаси инвестициялар ва ташқи савдо вазирининг Афғонистон Ислом Республикаси билан ташқи иқтисодий ҳамкорлик бўйича ўринбосари лавозими жорий этилганлиги ҳамда у бир вақтнинг ўзида «Термиз халқаро савдо маркази» эркин савдо зонаси дирекцияси директори этиб белгиланганлиги маълумот учун қабул қилинсин.
2. Қуйидагилар:
«Термиз халқаро савдо маркази» эркин савдо зонаси таркибига кирувчи ҳудудлар чегараси 1-иловага мувофиқ;
«Термиз халқаро савдо маркази» эркин савдо зонаси дирекцияси» давлат унитар корхонасининг тузилмаси 2-иловага мувофиқ;
«Термиз халқаро савдо маркази» эркин савдо зонаси дирекцияси» давлат унитар корхонасининг устави 3-иловага мувофиқ;
«Термиз халқаро савдо маркази» эркин савдо маркази ҳамда «Термиз» эркин иқтисодий зонасининг муҳандислик-коммуникация, йўл-транспорт ва ишлаб чиқариш инфратузилмасини ривожлантириш дастури 4-иловага мувофиқ тасдиқлансин.
3. Белгилансинки, «Термиз халқаро савдо маркази» эркин савдо зонаси дирекцияси» давлат унитар корхонаси ходимларининг меҳнатига ҳақ тўлаш билан боғлиқ харажатлар дирекциянинг ўз маблағлари ва Сурхондарё вилояти маҳаллий бюджет маблағлари ҳисобидан амалга оширилади.
4. Ўзбекистон Республикаси Ахборот технологиялари ва коммуникацияларини ривожлантириш вазирлиги, Автомобиль йўллари қўмитаси, Энергетика вазирлиги, «Ўзсувтаъминот» АЖ, «Ҳудудгазтаъминот» АЖ, «Ҳудудий электр тармоқлари» АЖ, Сурхондарё вилояти ҳокимлигига қарорга 4-иловадаги тадбирларнинг тўлиқ ҳажмда ва ўз вақтида бажарилиши юзасидан шахсий масъулият юклансин.
5. Ўзбекистон Республикаси Вазирлар Маҳкамасининг «Термиз» эркин иқтисодий зонаси фаолиятини такомиллаштириш чора-тадбирлари тўғрисида» 2020 йил 13 мартдаги 148-сон қарорига 5-иловага мувофиқ ўзгартириш киритилсин.
6. Мазкур қарорнинг бажарилишини назорат қилиш Ўзбекистон Республикаси Бош вазирининг инвестициялар ва ташқи иқтисодий алоқалар масалалари бўйича ўринбосари — инвестициялар ва ташқи савдо вазири С.У. Умурзаков ва Сурхондарё вилояти ҳокими Т.А. Боболов зиммасига юклансин.
Вазирлар Маҳкамасининг 2021 йил 2 февралдаги 47-сон қарорига 1-ИЛОВА
«Термиз халқаро савдо маркази» эркин савдо зонаси таркибига кирувчи ҳудудларнинг чегаралари
1-бошланғич нуқта Термиз туманидаги Ўзбекистон Республикасининг Давлат чегараси бўйлаб муҳофаза қилиш зонасининг ғарб томонида, «Термиз халқаро савдо маркази» эркин савдо зонаси ҳудудида жойлашган.
1-нуқтадан чегара Ўзбекистон Республикасининг Давлат чегараси бўйлаб муҳофаза қилиш зонасининг «Термиз халқаро савдо маркази» эркин савдо зонаси ҳудуди бўйлаб шимолий йўналишда 328 метр масофада 2-нуқтагача давом этади.
2-нуқтадан чегара «Аму-занг» канали муҳофаза зонасининг «Термиз халқаро савдо маркази» эркин савдо зонаси ҳудуди бўйлаб ғарбий йўналишда 705,0 метр масофада 3-нуқтагача давом этади.
3-нуқтадан чегара «Термиз» эркин иқтисодий зонаси ҳудуди бўйлаб жанубий йўналишда 330,0 метр масофада 4-нуқтагача давом этади.
4-нуқтадан чегара «Айритом» автомагистрал йўлининг «Термиз халқаро савдо маркази» эркин савдо зонаси ҳудуди бўйлаб шарқий йўналишда 657,0 метр масофада 1-нуқтагача давом этади.
5-нуқтадан чегара «Гулбаҳор-Айритом» автомобиль йўлининг «Термиз халқаро савдо маркази» эркин савдо зонаси ҳудуди бўйлаб ғарбий йўналишда 304,0 метр масофада 6-нуқтагача давом этади.
6-нуқтадан чегара «Гулбаҳор-Айритом» автомобиль йўлининг «Термиз халқаро савдо маркази» эркин савдо зонаси ҳудуди бўйлаб шимолий йўналишда 1005,0 метр масофада 7-нуқтагача давом этади.
7-нуқтадан чегара «Аму-занг» канали муҳофаза зонасининг «Термиз халқаро савдо маркази» эркин савдо зонаси ҳудуди бўйлаб шарқий йўналишда 281,0 метр масофада 8-нуқтагача давом этади.
8-нуқтадан чегара «Термиз халқаро савдо маркази» эркин савдо зонаси ҳудуди бўйлаб жанубий йўналишда 1050,0 метр масофада 5-нуқтагача давом этади.
Вазирлар Маҳкамасининг 2021 йил 2 февралдаги 47-сон қарорига 2-ИЛОВА
«Термиз халқаро савдо маркази» эркин савдо зонаси дирекцияси» давлат унитар корхонасининг
Директор Ёрдамчи Хорижий ва маҳаллий инвесторларни жалб этиш бўлими 3 Юрисконсульт Хорижий ҳамкорлар билан ишлаш бўлими 3 Молия-иқтисодиёт бўлими 1 Эркин савдо зонасининг инфратузилмасини ривожлантириш ва архитектура — қурилиш бўлими 2 Маркетинг тадқиқотлари ва экспортни рағбатлантириш бўлими 3
Вазирлар Маҳкамасининг 2021 йил 2 февралдаги 47-сон қарорига 3-ИЛОВА
«Термиз халқаро савдо маркази» эркин савдо зонаси дирекцияси» давлат унитар корхонасининг
1-боб. Умумий қоидалар
1. «Термиз халқаро савдо маркази» эркин савдо зонаси дирекцияси» (кейинги ўринларда — Дирекция) оператив бошқарув учун ўзига берилган давлат мулки негизида давлат унитар корхонаси шаклида ташкил этилган тижорат ташкилоти ҳисобланади. Дирекция ўзига бириктирилган мулкка нисбатан қонунчилик ҳужжатларида белгиланган доирада ўз фаолияти мақсадларига, мулкдор (ёки унинг топшириғига биноан масъул этиб тайинланган давлат органи — муассис) топшириқларига мувофиқ эгалик қилиш, ундан фойдаланиш ва уни тасарруф этиш ҳуқуқини амалга оширади.
2. Дирекция ўз фаолиятида Ўзбекистон Республикаси Конституциясига ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, ушбу Уставга ҳамда бошқа қонунчилик ҳужжатларига амал қилади.
3. Дирекция юридик шахс ҳисобланади, алоҳида мулкка, мустақил балансга, банкларда ҳисобварақларига, шу жумладан, валюта ҳисобварақларига, эмблемага, штамплар ва бланкаларга, Ўзбекистон Республикаси Давлат герби тасвири туширилган, ўз номи давлат тилида ёзилган муҳрга ва бошқа реквизитларга эга бўлади.
4. Дирекциянинг расмий номи:
а) давлат тилида:
тўлиқ номи — «Termiz» xalqaro savdo markazi» erkin savdo zonasi direktsiyasi» davlat unitar korxonasi;
қисқартирилган номи — «Termiz» xalqaro savdo markazi» ESZ direktsiyasi» DUK;
б) рус тилида:
тўлиқ номи — Государственное унитарное предприятие «Дирекция зоны свободной торговли «Международный торговый центр Термез»
қисқартирилган номи — ГУП «Дирекция СТЗ «Международный торговый центр Термез»;
в) инглиз тилида:
тўлиқ номи — «Directorate of free trade zone «International trade center Termiz» State Unitary Company;
қисқартирилган номи — «Directorate of FTZ «International trade center Termiz» SUC.
5. Дирекциянинг жойлашган жойи (почта манзили): Сурхондарё вилояти, Термиз шаҳри, Ат-Термизий кўчаси, 1а-уй.
6. Ўзбекистон Республикаси Вазирлар Маҳкамаси Дирекциянинг муассиси (кейинги ўринларда — Муассис) ҳисобланади.
7. Дирекция ўз номидан қонунчилик ҳужжатларида белгиланган тартибда мулкий ва шахсий номулкий ҳуқуқларни олиши ва амалга ошириши, мажбуриятлар олиши, судда даъвогар ва жавобгар бўлиши, низоларни ҳал этишда бошқа органларда вакиллик қилиши мумкин.
8. Дирекция Муассиснинг розилигига кўра тижорат ташкилотларининг, шунингдек, қонунчилик ҳужжатларига мувофиқ юридик шахсларнинг қатнашишига йўл қўйиладиган нотижорат ташкилотларда иштирокчи (акциядор, аъзо) бўлиши мумкин.
9. Дирекция бошқа давлат корхонасининг муассиси бўлиши мумкин эмас.
2-боб. Дирекция фаолиятининг мақсади ва асосий йўналишлари
10. «Термиз халқаро савдо маркази» эркин савдо зонаси (кейинги ўринларда — «Термиз халқаро савдо маркази» ЭСЗ) ривожлантириш давлат дастурларининг тўлиқ ва ўз вақтида бажарилишини, шунингдек, «Термиз халқаро савдо маркази» ЭСЗ ҳудудида алоҳида ҳуқуқий режимга риоя этилишини таъминлаш орқали оператив бошқариш, «Термиз халқаро савдо маркази» ЭСЗ иштирокчиларига хизматлар кўрсатишдан ҳамда ушбу Уставда назарда тутилган бошқа ишларни (хизматларни) бажаришдан (кўрсатишдан) фойда олиш Дирекция фаолиятининг асосий мақсади ҳисобланади.
11. Қуйидагилар Дирекция фаолиятининг асосий йўналишлари ҳисобланади:
«Термиз халқаро савдо маркази» ЭСЗ ҳудудида махсус ҳуқуқий режимнинг амал қилишини таъминлаш;
салоҳиятли инвесторлар ва «Термиз халқаро савдо маркази» ЭСЗ иштирокчилари билан ўзаро ҳамкорликни, шу жумладан инвестиция буюртманомасини кўриб чиқиш ва танлаб олиш учун қабул қилишни, муҳандислик-коммуникация инфратузилмаси тармоқларига уланиш учун зарур рухсатномалар беришни «ягона дарча» тамойили асосида ташкил этиш;
«Термиз халқаро савдо маркази» ЭСЗ ҳудудидаги инвестиция лойиҳаларининг амалга оширилишини мониторинг қилиш, шунингдек, «Термиз халқаро савдо маркази» ЭСЗ иштирокчилари томонидан инвестиция битимига киритилган мажбуриятларнинг бажарилишини назорат қилиш;
«Термиз халқаро савдо маркази» ЭСЗни ривожлантириш дастури амалга оширилишини таъминлаш;
«Термиз халқаро савдо маркази» ЭСЗ иштирокчиларининг реестрини юритиш;
«Термиз халқаро савдо маркази» ЭСЗ ҳудудида экологик назорат, шунингдек, маданий мерос объектларини муҳофаза қилиш ва улардан фойдаланиш тўғрисидаги қонунчилик ҳужжатларига риоя этилишининг назоратини ташкил этиш;
«Термиз халқаро савдо маркази» ЭСЗга иштирокчилари билан шартномалар асосида маркетинг хизматлари, шунингдек, маҳсулотларни ички ва ташқи бозорларда тарғиб қилиш бўйича хизматлар кўрсатиш;
«Термиз халқаро савдо маркази» ЭСЗ инвесторларни жалб этиш тадбирларини амалга ошириш;
«Термиз халқаро савдо маркази» ЭСЗ ҳудудига қизиқиш билдирган инвесторларни, эркин савдо зона иштирокчиларини ахборот билан таъминлаш, шу жумладан уларнинг давлат органлари ва бошқа ташкилотлар вакиллари билан учрашувларини ташкил этиш;
«Термиз халқаро савдо маркази» ЭСЗ ҳудудидаги ер участкаларини, шунингдек, бинолар ва иншоотларни эркин савдо зонаси иштирокчиларига эгалик қилишга, фойдаланишга ва ижарага бериш;
давлат-хусусий шериклик лойиҳаларида иштирок этиш.
«Термиз халқаро савдо маркази» ЭСЗ ўз фаолиятини бошқариш бўйича бошқа функцияларни ҳам амалга оширишга ҳақлидир.
12. Дирекция қонунчилик ҳужжатларида фаолиятнинг тақиқланмаган бошқа турларини ҳам амалга ошириши мумкин.
3-боб. Дирекция фаолиятини бошқариш
13. Дирекция Муассисга ва Сурхондарё вилояти махсус иқтисодий зоналар ва кичик саноат зоналарининг маъмурий кенгашига ҳисобот беради.
14. Муассис қуйидаги ҳуқуқларга эга:
Дирекция фаолиятининг мақсади ва йўналишларини белгилаш;
Дирекция Уставига ўзгартириш ва қўшимчалар киритиш;
Дирекциянинг ортиқча, фойдаланилмаётган ёки белгиланган мақсадда фойдаланилмаётган мулкини олиб қўйиш ва тасарруф этиш;
Дирекцияга берилган мулкдан фойдаланишдан олинган соф фойданинг бир қисмини ёки ҳаммасини олиш;
Дирекция мулки билан амалга оширилган битимларни ҳақиқий эмас деб ҳисоблаш ва Дирекцияга етказилган зарарларни қоплаш тўғрисида судга даъво аризаси билан мурожаат қилиш;
Дирекцияни қайта ташкил этиш ёки тугатиш тўғрисида қарор қабул қилиш, тугатиш комиссиясини тайинлаш ва оралиқ, тугатиш балансини тасдиқлаш;
меҳнатга оид қонунчилик ҳужжатларида белгиланган тартибда Дирекция раҳбари билан меҳнат шартномасини муддатидан олдин тўхтатиш ёки бекор қилиш.
15. «Термиз халқаро савдо маркази» ЭСЗнинг мустақил бюджети ва «Термиз халқаро савдо маркази» ЭСЗни ривожлантириш жамғармаси маблағларидан мақсадли фойдаланиш Сурхондарё вилояти махсус иқтисодий зоналар ва кичик саноат зоналарининг маъмурий кенгаши томонидан назорат қилинади.
16. «Термиз халқаро савдо маркази» ЭСЗ дирекциясига белгиланган тартибда лавозимга тайинланадиган ва лавозимидан озод этиладиган Ўзбекистон Республикаси инвестициялар ва ташқи савдо вазирининг Афғонистон Ислом Республикаси билан ташқи иқтисодий ҳамкорлик бўйича ўринбосари раҳбарлик қилади.
17. Дирекция «Термиз халқаро савдо маркази» ЭСЗ иштирокчиларининг қонунчилик ҳужжатларига мувофиқ амалга ошириладиган фаолиятига аралашишга ҳақли эмас.
18. Дирекция ижро этувчи орган ҳисобланади.
19. Директор:
қонунчилик ҳужжатлари талабларини бажаришга, Дирекция ходимларининг меҳнат шароитларини муҳофаза қилиш ва яхшилаш, атроф-муҳитни муҳофаза қилиш ва табиий ресурслардан оқилона фойдаланиш соҳасидаги қонунчилик ҳужжатларига риоя қилинишини таъминлаш тадбирларини ишлаб чиқади ва жорий этади;
«Термиз халқаро савдо маркази» ЭСЗни ривожлантириш дастурларининг амалга оширилишини ташкил қилади;
Дирекциянинг асосий фаолиятини такомиллаштиришга, бошқаришнинг замонавий усулларини жорий этишга доир чора-тадбирларни амалга оширади;
Дирекция номидан ишончномасиз ҳаракат қилади, барча ташкилотларда, шу жумладан, хорижий ташкилотларда унинг манфаатларини ифода этади;
ходимларни ишга қабул қилади, улар билан меҳнат шартномаларини (контрактларни) тузади, ўзгартиради ва уларнинг амал қилишини тўхтатади;
қонунчилик ҳужжатларида белгиланган тартибда ишончномалар беради;
кадрларни тайёрлаш, уларнинг малакасини ошириш чора-тадбирларини амалга оширади;
Дирекциянинг барча ходимлари учун мажбурий бўлган буйруқлар чиқаради ва кўрсатмалар беради;
Дирекциянинг ички иш тартибини ва хўжалик фаолиятини тартибга солувчи ҳужжатларни тасдиқлайди;
Дирекция томонидан қонунчилик ҳужжатларига риоя қилинишини ташкил этиш ва назорат қилишни таъминлайди;
Дирекцияга юкланган мақсадлар ва вазифаларни бажариш учун зарур бўлган бошқа функцияларни амалга оширади.
20. Директор:
Муассисга Дирекция фаолияти тўғрисида белгиланган тартибда ҳисобот беради;
ўз ҳуқуқларини амалга оширишда ва вазифаларни бажаришда Дирекция манфаатларини кўзлаган ҳолда ҳаракат қилиши лозим ҳамда бюджетга ва бюджетдан ташқари жамғармаларга тўловлар, иш ҳақининг ўз вақтида тўланиши, меҳнатга оид ҳуқуқий муносабатлардан келиб чиқувчи барча талабларнинг таъминланиши ва уларга тенглаштирилган тўловларнинг тўланишини, ишлаб чиқариш фаолияти билан бевосита боғлиқ эҳтиёжларга маблағлар ўтказилмаганлиги, Дирекциянинг хатти-ҳаракатлари (ҳаракатсизлиги) учун, шу жумладан Дирекцияга берилган давлат мол-мулки йўқолган тақдирда, етказилган зарар юзасидан қонунчилик ҳужжатларида белгиланган тартибда жавоб беради;
«Термиз халқаро савдо маркази» ЭСЗнинг «Термиз халқаро савдо маркази» ЭСЗ томонидан Ўзбекистон Республикаси Молия вазирлиги билан келишган ҳолда тасдиқланадиган мустақил бюджети маблағларининг тасарруф этувчиси ҳисобланади;
Ўзбекистон Республикаси Молия вазирлигига «Термиз халқаро савдо маркази» ЭСЗнинг мустақил бюджети ижроси тўғрисидаги ҳисоботни келишиш учун белгиланган тартибда тақдим этади.
21. Директор ўз зиммасига юкланган вазифаларнинг бажарилиши, шунингдек, Дирекцияга берилган давлат мулкининг сақланиши ва ундан мақсадли фойдаланилиши юзасидан қонунчилик ҳужжатларида белгиланган тартибда жавоб беради.
4-боб. Дирекциянинг устав фонди
22. Дирекциянинг устав фонди «Термиз халқаро савдо маркази» ЭСЗ фаолиятини оператив бошқариш учун Муассис томонидан ўзига берилган маблағлар, мол-мулк ва бошқа активлар йиғиндисидан иборат бўлади.
23. Дирекция устав фондининг миқдори 5 млрд сўмни ташкил қилади.
5-боб. Дирекциянинг устав фондини кўпайтириш ва камайтириш тартиби
24. Дирекциянинг устав фонди қонунчилик ҳужжатларида белгиланган тартибда Муассис қарорига биноан кўпайтирилади ёки камайтирилади.
6-боб. Дирекция мулкини тасарруф этиш
25. Муассис томонидан Дирекцияга оператив бошқарув ҳуқуқи билан берилган асосий фондлар ва айланма маблағлар Дирекция мол-мулкини ташкил қилади.
26. Дирекциянинг асосий фондлари ва айланма маблағлари бўлинмайди ва улушлар (ҳиссалар, пайлар) бўйича тақсимланиши мумкин эмас.
27. Сурхондарё вилояти махсус иқтисодий зоналар ва кичик саноат зоналарининг маъмурий кенгаши Дирекцияга берилган давлат мулкидан белгиланган мақсадда фойдаланилишини ва унинг сақланишини, шунингдек, ўзгага берилишини Муассис номидан назорат қилади.
28. Директор Муассис билан келишган ҳолда, Дирекция мулкини қуйидагича тасарруф этиши мумкин:
асосий воситаларни сотиш, ижарага ёки гаровга бериш;
мол-мулкни бошқа хўжалик жамиятларининг устав фондига улуш сифатида киритиш;
бошқа хўжалик жамиятларининг акцияларини (улушларини) сотиб олиш ва сотиш;
мол-мулкни қонунчилик ҳужжатларида белгиланган тартибда бошқача тарзда тасарруф этиш.
7-боб. Дирекция бюджетини шакллантириш
29. Қуйидагилар Дирекция фаолиятини молиялаштириш манбалари ҳисобланади:
давлат мулки бўлган ва «Термиз халқаро савдо маркази» ЭСЗ ҳудудида жойлашган бинолар ва иншоотларни ижарага беришдан олинган даромадларнинг бир қисми;
хизматлар кўрсатишдан олинган даромадлар;
«Термиз халқаро савдо маркази» ЭСЗ иштирокчиларининг ажратмалари ва «Термиз халқаро савдо маркази» ЭСЗ иштирокчилари сифатида рўйхатдан ўтиш учун тўловлар;
қонунчилик ҳужжатларида тақиқланмаган бошқа маблағлар.
8-боб. Захира фондини ва бошқа фондларни шакллантириш тартиби
30. Дирекция ўз тасарруфида қоладиган соф фойда ҳисобига захира фондини, шунингдек, бошқа фондларни ташкил этиши мумкин, уларнинг миқдори ва шакллантириш тартиби Муассис томонидан тасдиқланади.
9-боб. Даромадни (фойдани) тақсимлаш ва зарарларни қоплаш тартиби
31. Дирекциянинг соф фойдаси Дирекция тасарруфида қолади ва ундан Муассис қарорига биноан фойдаланилади.
32. Муассис ўз қарори билан бошқа юридик ва жисмоний шахсларга ҳомийлик хайрияси сифатида йўналтириладиган маблағларнинг чекланган суммасини, уларни тасарруф этиш ҳуқуқини Директорга берган ҳолда белгилайди.
33. Дирекциянинг хўжалик фаолияти натижасида кўрилган зарарлари ушбу мақсадлар учун ташкил этилган захира фонди маблағлари ҳисобидан қопланиши мумкин.
10-боб. Ҳисоботларни тақдим этиш тартиби
34. Дирекция ҳисобот даври тугагач, ваколатли органларга молия ҳисоботини ва рўйхати қонунчилик ҳужжатларида белгиланадиган бошқа ҳужжатларни тақдим этади ҳамда ҳужжатларнинг сақланиши ва давлат томонидан сақлашга берилиши юзасидан белгиланган тартибда жавоб беради.
35. Дирекциянинг хўжалик субъекти сифатидаги фаолияти Сурхондарё вилояти махсус иқтисодий зоналар ва кичик саноат зоналарининг маъмурий кенгаши томонидан қонунчилик ҳужжатларида белгиланган тартибда назорат қилинади.
36. Директор ҳар чоракда Дирекция фаолиятининг натижалари ва тасдиқланган ривожлантириш дастурларининг амалга оширилиши тўғрисида Вазирлар Маҳкамасига ҳисобот беради.
11-боб. Дирекциянинг жавобгарлиги
37. Дирекция ўз мажбуриятлари бўйича ўзига тегишли мулк билан жавоб беради. Муассис Дирекциянинг мулки етарли бўлмаган тақдирда, унинг мажбуриятлари бўйича субсидиар жавобгарликни амалга оширади.
38. Дирекция Муассис мажбуриятлари бўйича жавоб бермайди.
12-боб. Дирекцияни тугатиш ва қайта ташкил этиш
39. Дирекция Муассиснинг қарорига кўра, қонунчилик ҳужжатларида назарда тутилган тартибда ёки суд қарорига биноан тугатилиши ёхуд қайта ташкил этилиши мумкин.
40. Дирекцияни тугатиш Дирекция фаолиятининг ҳуқуқ ва мажбуриятлари ҳуқуқий ворислик тартибида бошқа шахсларга ўтмаган ҳолда тўхтатилишига сабаб бўлади.
Дирекция қайта ташкил этилган тақдирда, унинг ҳуқуқ ва мажбуриятлари ҳуқуқий ворисга ўтади.
Вазирлар Маҳкамасининг 2021 йил 2 февралдаги 47-сон қарорига 4-ИЛОВА
«Термиз халқаро савдо маркази» эркин савдо маркази ҳамда «Термиз» эркин иқтисодий зонасининг муҳандислик-коммуникация, йўл-транспорт ва ишлаб чиқариш инфратузилмасини ривожлантириш
Т/р Объект номи Ўлчов бирлиги Қуввати Қиймати * (млрд сўм) Молиялаштириш манбаси Амалга ошириш муддати Масъул вазирлик ва идоралар Жами: 111,50 Ичимлик сув тармоғини қуриш, реконструкция қилиш ва капитал таъмирлаш 1. Термиз тумани «Айратом» маҳалласидаги мавжуд сув минораси ёнидан қўшимча 2 та янги сув қудуғи қазиш, 500 м3 ҳажмдаги битта сув йиғиш иншооти ва 1,8 км сув қувури тармоғини қуриш. «Термиз» эркин иқтисодий зонаси ҳудуди ичида ўлчами 500 м3 ҳажмдаги иккита сув йиғиш иншоотини қуриш. км/ дона 10,2 км/ 3 та иншоот 6,08 2021 — 2023 йилларга мўлжалланган Инвестиция дастури доирасида 2021 — 2023 йил «Ўзсувтаъминот» АЖ, Сурхондарё вилояти ҳокимлиги Канализация тармоғини қуриш, реконструкция қилиш ва капитал таъмирлаш 2. Оқова сув тармоғини қуриш ва 1 та 600 м3 (биологик), 300 м3 (кимёвий) ҳажмдаги битта оқова сувни тозалаш иншооти ва 4 та сув насос станцияларини қуриш. км/ дона 7,12 км/ 2 та иншоот 17,10 2021 — 2023 йилларга мўлжалланган Инвестиция дастури доирасида 2021 — 2023 йил «Ўзсувтаъминот» АЖ, Сурхондарё вилояти ҳокимлиги Табиий газ тармоғини қуриш, реконструкция қилиш ва капитал таъмирлаш 3. Газ билан таъминлаш бўйича техник шартга асосан: Ангор тумани «Баҳор» маҳалласидаги мавжуд кичик газ тақсимлаш станциясидан юқори босимли газ тармоғини (Д-219 мм) 28,5 км узунликда «Термиз» эркин иқтисодий ҳудудигача тортиш. км 28,5 км 12,50 2021 — 2023 йилларга мўлжалланган Инвестиция дастури доирасида 2021 — 2023 йил Энергетика вазирлиги, «Ҳудудгазтаъминот» АЖ, Сурхондарё вилояти ҳокимлиги Электр энергияси тармоғини қуриш, реконструкция қилиш ва капитал таъмирлаш 4. Электр энергияси билан таъминлашда техник шартга асосан: 1-босқич «АМУ» кичик станциясидан 10 кВа электр тармоғини «Термиз» эркин иқтисодий зонаси ҳудудигача тортиш ва ички ҳудудларда электр тармоғини қуриш. 2-босқич «АМУ» кичик станциясидан 110/10 кВа электр тармоғини «Термиз» эркин иқтисодий ҳудудигача тортиш ва янги кичик станция қуриш ҳамда ҳудуд ичидаги мавжуд 10 кВа электр тармоғини ҳудуддан ташқарига кўчириш. км 28,66 км 27,35 2021 — 2023 йилларга мўлжалланган Инвестиция дастури доирасида 2021 — 2023 йил Энергетика вазирлиги, «Ҳудудий электр тармоқлар» АЖ, Сурхондарё вилояти ҳокимлиги Автомобиль йўлларини қуриш, реконструкция қилиш ва капитал таъмирлаш бўйича 5. «Термиз халқаро савдо маркази» эркин савдо маркази ҳамда «Термиз» эркин иқтисодий зонасигача жами 10,5 км ички автомобиль йўлларини қуриш. км 10,5 км 46,80 Маҳаллий бюджет маблағлари 2021 — 2023 йил Транспорт вазирлиги, Автомобиль йўллари қўмитаси, Сурхондарё вилояти ҳокимлиги Алоқа тармоғини қуриш, реконструкция қилиш ва капитал таъмирлаш бўйича 6. Оптик толали алоқа линияси билан таъминлаш техник шарти асосида Термиз шаҳар телекоммуникация боғланмасига тегишли 225 АТС дан ҳудудгача 15,08 км, «Термиз» эркин иқтисодий зонаси ҳудуди ичида 6,15 км, жами 21,23 км оптик толали тармоқ тортиш. км 21,23 км 1,68 2021 — 2023 йилларга мўлжалланган Инвестиция дастури доирасида 2021 — 2023 йил Ахборот технологиялари ва коммуникацияларни ривожлантириш вазирлиги, Сурхондарё вилояти ҳокимлиги «Термиз халқаро савдо маркази» эркин савдо маркази ҳамда «Термиз» эркин иқтисодий зонаси ҳудудлари атрофида махсус инфратузилмани барпо этиш 7. «Термиз-автойўл» ўтказиш пунктидан «Термиз халқаро савдо маркази» эркин савдо зонасигача бўлган ҳудудда йўлаклар, ушбу йўлаклар бўйлаб деворлар, махсус тўсиқлар, ёритиш мосламалари ва кузатув камераларини ўрнатиш билан боғлиқ тадбирларни амалга ошириш. Ҳисоб-китобларга кўра Маҳаллий бюджет маблағлари 2021 — 2023 йил Сурхондарё вилояти ҳокимлиги
Вазирлар Маҳкамасининг 2021 йил 2 февралдаги 47-сон қарорига 5-ИЛОВА
Вазирлар Маҳкамасининг «Термиз» эркин иқтисодий зонаси фаолиятини такомиллаштириш чора-тадбирлари тўғрисида» 2020 йил 13 мартдаги 148-сон қарорига киритилаётган
1-илованинг матни қуйидаги таҳрирда баён этилсин:
«Термиз» эркин иқтисодий зонаси таркибига кирувчи ҳудудларнинг чегаралари
1-бошланғич нуқта Термиз туманидаги «Термиз халқаро савдо маркази» эркин савдо зонаси ҳудудининг ғарб томонида, «Термиз» эркин иқтисодий зонаси ҳудудида жойлашган.
1-нуқтадан чегара «Термиз халқаро савдо маркази» эркин савдо зонаси ҳудуди бўйлаб жанубий йўналишда 330,0 метр масофада 2-нуқтагача давом этади.
2-нуқтадан чегара Айритом автомагистрал йўлининг «Термиз» эркин иқтисодий зонаси ҳудуди бўйлаб ғарб йўналишда 616,0 метр масофада 3-нуқтагача давом этади.
3-нуқтадан чегара «Термиз халқаро савдо маркази» эркин савдо зонаси ҳудуди бўйлаб шимолий йўналишда 1050,0 метр масофада 4-нуқтагача давом этади.
4-нуқтадан чегара «Аму-занг» канали муҳофаза зонасининг «Термиз» эркин иқтисодий зонаси ҳудуди бўйлаб шарқий йўналишда 320,0 метр масофада 5-нуқтагача давом этади.
5-нуқтадан чегара «Аму-занг» канали муҳофаза зонасининг «Термиз» эркин иқтисодий зонаси ҳудуди бўйлаб жануб йўналишда 755,0 метр масофада 6-нуқтагача давом этади.
6-нуқтадан чегара «Термиз халқаро савдо маркази» эркин савдо зонаси ҳудуди бўйлаб ғарбий йўналишда 315,0 метр масофада 1-нуқтагача давом этади.»
Ўзбекистон Республикасининг Бош вазири А. АРИПОВ
Тошкент ш.,
2021 йил 2 февраль,
47-сон
Oʻzbekiston Respublikasi Vazirlar Mahkamasining
qarori
TUZILMASI
USTAVI
DASTURI
OʻZGARTIRISh
“Termiz xalqaro savdo markazi” erkin savdo zonasi faoliyatini tashkil etish chora-tadbirlari toʻgʻrisida
Oʻzbekiston Respublikasi Prezidentining “Surxondaryo viloyati va Toshkent shahrida maxsus iqtisodiy va kichik sanoat zonalari faoliyatini yanada rivojlantirish chora-tadbirlari toʻgʻrisida” 2020-yil 12-noyabrdagi PF-6109-son Farmonining ijrosini taʼminlash maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining “Afgʻoniston Islom Respublikasi bilan iqtisodiy hamkorlikni yanada kengaytirish va mustahkamlash chora-tadbirlari toʻgʻrisida” 2020-yil 12-noyabrdagi PQ-4892-son qaroriga asosan:
Afgʻoniston Islom Respublikasi bilan savdo-iqtisodiy hamkorlikni yanada rivojlantirish chora-tadbirlari tasdiqlanganligi;
Oʻzbekiston Respublikasi investitsiyalar va tashqi savdo vazirining Afgʻoniston Islom Respublikasi bilan tashqi iqtisodiy hamkorlik boʻyicha oʻrinbosari lavozimi joriy etilganligi hamda u bir vaqtning oʻzida “Termiz xalqaro savdo markazi” erkin savdo zonasi direksiyasi direktori etib belgilanganligi maʼlumot uchun qabul qilinsin.
2. Quyidagilar:
“Termiz xalqaro savdo markazi” erkin savdo zonasi tarkibiga kiruvchi hududlar chegarasi 1-ilovaga muvofiq;
“Termiz xalqaro savdo markazi” erkin savdo zonasi direksiyasi” davlat unitar korxonasining tuzilmasi 2-ilovaga muvofiq;
“Termiz xalqaro savdo markazi” erkin savdo zonasi direksiyasi” davlat unitar korxonasining ustavi 3-ilovaga muvofiq;
“Termiz xalqaro savdo markazi” erkin savdo markazi hamda “Termiz” erkin iqtisodiy zonasining muhandislik-kommunikatsiya, yoʻl-transport va ishlab chiqarish infratuzilmasini rivojlantirish dasturi 4-ilovaga muvofiq tasdiqlansin.
3. Belgilansinki, “Termiz xalqaro savdo markazi” erkin savdo zonasi direksiyasi” davlat unitar korxonasi xodimlarining mehnatiga haq toʻlash bilan bogʻliq xarajatlar direksiyaning oʻz mablagʻlari va Surxondaryo viloyati mahalliy budjet mablagʻlari hisobidan amalga oshiriladi.
4. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi, Avtomobil yoʻllari qoʻmitasi, Energetika vazirligi, “Oʻzsuvtaʼminot” AJ, “Hududgaztaʼminot” AJ, “Hududiy elektr tarmoqlari” AJ, Surxondaryo viloyati hokimligiga qarorga 4-ilovadagi tadbirlarning toʻliq hajmda va oʻz vaqtida bajarilishi yuzasidan shaxsiy masʼuliyat yuklansin.
5. Oʻzbekiston Respublikasi Vazirlar Mahkamasining “Termiz” erkin iqtisodiy zonasi faoliyatini takomillashtirish chora-tadbirlari toʻgʻrisida” 2020-yil 13-martdagi 148-son qaroriga 5-ilovaga muvofiq oʻzgartirish kiritilsin.
6. Mazkur qarorning bajarilishini nazorat qilish Oʻzbekiston Respublikasi Bosh vazirining investitsiyalar va tashqi iqtisodiy aloqalar masalalari boʻyicha oʻrinbosari — investitsiyalar va tashqi savdo vaziri S.U. Umurzakov va Surxondaryo viloyati hokimi T.A. Bobolov zimmasiga yuklansin.
Vazirlar Mahkamasining 2021-yil 2-fevraldagi 47-son qaroriga 1-ILOVA
“Termiz xalqaro savdo markazi” erkin savdo zonasi tarkibiga kiruvchi hududlarning chegaralari
1-boshlangʻich nuqta Termiz tumanidagi Oʻzbekiston Respublikasining Davlat chegarasi boʻylab muhofaza qilish zonasining gʻarb tomonida, “Termiz xalqaro savdo markazi” erkin savdo zonasi hududida joylashgan.
1-nuqtadan chegara Oʻzbekiston Respublikasining Davlat chegarasi boʻylab muhofaza qilish zonasining “Termiz xalqaro savdo markazi” erkin savdo zonasi hududi boʻylab shimoliy yoʻnalishda 328 metr masofada 2-nuqtagacha davom etadi.
2-nuqtadan chegara “Amu-zang” kanali muhofaza zonasining “Termiz xalqaro savdo markazi” erkin savdo zonasi hududi boʻylab gʻarbiy yoʻnalishda 705,0 metr masofada 3-nuqtagacha davom etadi.
3-nuqtadan chegara “Termiz” erkin iqtisodiy zonasi hududi boʻylab janubiy yoʻnalishda 330,0 metr masofada 4-nuqtagacha davom etadi.
4-nuqtadan chegara “Ayritom” avtomagistral yoʻlining “Termiz xalqaro savdo markazi” erkin savdo zonasi hududi boʻylab sharqiy yoʻnalishda 657,0 metr masofada 1-nuqtagacha davom etadi.
5-nuqtadan chegara “Gulbahor-Ayritom” avtomobil yoʻlining “Termiz xalqaro savdo markazi” erkin savdo zonasi hududi boʻylab gʻarbiy yoʻnalishda 304,0 metr masofada 6-nuqtagacha davom etadi.
6-nuqtadan chegara “Gulbahor-Ayritom” avtomobil yoʻlining “Termiz xalqaro savdo markazi” erkin savdo zonasi hududi boʻylab shimoliy yoʻnalishda 1005,0 metr masofada 7-nuqtagacha davom etadi.
7-nuqtadan chegara “Amu-zang” kanali muhofaza zonasining “Termiz xalqaro savdo markazi” erkin savdo zonasi hududi boʻylab sharqiy yoʻnalishda 281,0 metr masofada 8-nuqtagacha davom etadi.
8-nuqtadan chegara “Termiz xalqaro savdo markazi” erkin savdo zonasi hududi boʻylab janubiy yoʻnalishda 1050,0 metr masofada 5-nuqtagacha davom etadi.
Vazirlar Mahkamasining 2021-yil 2-fevraldagi 47-son qaroriga 2-ILOVA
“Termiz xalqaro savdo markazi” erkin savdo zonasi direksiyasi” davlat unitar korxonasining
Direktor Yordamchi Xorijiy va mahalliy investorlarni jalb etish boʻlimi 3 Yuriskonsult Xorijiy hamkorlar bilan ishlash boʻlimi 3 Moliya-iqtisodiyot boʻlimi 1 Erkin savdo zonasining infratuzilmasini rivojlantirish va arxitektura — qurilish boʻlimi 2 Marketing tadqiqotlari va eksportni ragʻbatlantirish boʻlimi 3
Vazirlar Mahkamasining 2021-yil 2-fevraldagi 47-son qaroriga 3-ILOVA
“Termiz xalqaro savdo markazi” erkin savdo zonasi direksiyasi” davlat unitar korxonasining
1-bob. Umumiy qoidalar
1. “Termiz xalqaro savdo markazi” erkin savdo zonasi direksiyasi” (keyingi oʻrinlarda — Direksiya) operativ boshqaruv uchun oʻziga berilgan davlat mulki negizida davlat unitar korxonasi shaklida tashkil etilgan tijorat tashkiloti hisoblanadi. Direksiya oʻziga biriktirilgan mulkka nisbatan qonunchilik hujjatlarida belgilangan doirada oʻz faoliyati maqsadlariga, mulkdor (yoki uning topshirigʻiga binoan masʼul etib tayinlangan davlat organi — muassis) topshiriqlariga muvofiq egalik qilish, undan foydalanish va uni tasarruf etish huquqini amalga oshiradi.
2. Direksiya oʻz faoliyatida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, ushbu Ustavga hamda boshqa qonunchilik hujjatlariga amal qiladi.
3. Direksiya yuridik shaxs hisoblanadi, alohida mulkka, mustaqil balansga, banklarda hisobvaraqlariga, shu jumladan, valyuta hisobvaraqlariga, emblemaga, shtamplar va blankalarga, Oʻzbekiston Respublikasi Davlat gerbi tasviri tushirilgan, oʻz nomi davlat tilida yozilgan muhrga va boshqa rekvizitlarga ega boʻladi.
4. Direksiyaning rasmiy nomi:
a) davlat tilida:
toʻliq nomi — “Termiz” xalqaro savdo markazi” erkin savdo zonasi direktsiyasi” davlat unitar korxonasi;
qisqartirilgan nomi — “Termiz” xalqaro savdo markazi” ESZ direktsiyasi” DUK;
b) rus tilida:
toʻliq nomi — Gosudarstvennoye unitarnoye predpriyatiye “Direksiya zoni svobodnoy torgovli “Mejdunarodniy torgoviy tsentr Termez”
qisqartirilgan nomi — GUP “Direksiya STZ “Mejdunarodniy torgoviy tsentr Termez”;
v) ingliz tilida:
toʻliq nomi — “Directorate of free trade zone “International trade center Termiz” State Unitary Company;
qisqartirilgan nomi — “Directorate of FTZ “International trade center Termiz” SUC.
5. Direksiyaning joylashgan joyi (pochta manzili): Surxondaryo viloyati, Termiz shahri, At-Termiziy koʻchasi, 1a-uy.
6. Oʻzbekiston Respublikasi Vazirlar Mahkamasi Direksiyaning muassisi (keyingi oʻrinlarda — Muassis) hisoblanadi.
7. Direksiya oʻz nomidan qonunchilik hujjatlarida belgilangan tartibda mulkiy va shaxsiy nomulkiy huquqlarni olishi va amalga oshirishi, majburiyatlar olishi, sudda daʼvogar va javobgar boʻlishi, nizolarni hal etishda boshqa organlarda vakillik qilishi mumkin.
8. Direksiya Muassisning roziligiga koʻra tijorat tashkilotlarining, shuningdek, qonunchilik hujjatlariga muvofiq yuridik shaxslarning qatnashishiga yoʻl qoʻyiladigan notijorat tashkilotlarda ishtirokchi (aksiyador, aʼzo) boʻlishi mumkin.
9. Direksiya boshqa davlat korxonasining muassisi boʻlishi mumkin emas.
2-bob. Direksiya faoliyatining maqsadi va asosiy yoʻnalishlari
10. “Termiz xalqaro savdo markazi” erkin savdo zonasi (keyingi oʻrinlarda — “Termiz xalqaro savdo markazi” ESZ) rivojlantirish davlat dasturlarining toʻliq va oʻz vaqtida bajarilishini, shuningdek, “Termiz xalqaro savdo markazi” ESZ hududida alohida huquqiy rejimga rioya etilishini taʼminlash orqali operativ boshqarish, “Termiz xalqaro savdo markazi” ESZ ishtirokchilariga xizmatlar koʻrsatishdan hamda ushbu Ustavda nazarda tutilgan boshqa ishlarni (xizmatlarni) bajarishdan (koʻrsatishdan) foyda olish Direksiya faoliyatining asosiy maqsadi hisoblanadi.
11. Quyidagilar Direksiya faoliyatining asosiy yoʻnalishlari hisoblanadi:
“Termiz xalqaro savdo markazi” ESZ hududida maxsus huquqiy rejimning amal qilishini taʼminlash;
salohiyatli investorlar va “Termiz xalqaro savdo markazi” ESZ ishtirokchilari bilan oʻzaro hamkorlikni, shu jumladan investitsiya buyurtmanomasini koʻrib chiqish va tanlab olish uchun qabul qilishni, muhandislik-kommunikatsiya infratuzilmasi tarmoqlariga ulanish uchun zarur ruxsatnomalar berishni “yagona darcha” tamoyili asosida tashkil etish;
“Termiz xalqaro savdo markazi” ESZ hududidagi investitsiya loyihalarining amalga oshirilishini monitoring qilish, shuningdek, “Termiz xalqaro savdo markazi” ESZ ishtirokchilari tomonidan investitsiya bitimiga kiritilgan majburiyatlarning bajarilishini nazorat qilish;
“Termiz xalqaro savdo markazi” ESZni rivojlantirish dasturi amalga oshirilishini taʼminlash;
“Termiz xalqaro savdo markazi” ESZ ishtirokchilarining reyestrini yuritish;
“Termiz xalqaro savdo markazi” ESZ hududida ekologik nazorat, shuningdek, madaniy meros obyektlarini muhofaza qilish va ulardan foydalanish toʻgʻrisidagi qonunchilik hujjatlariga rioya etilishining nazoratini tashkil etish;
“Termiz xalqaro savdo markazi” ESZga ishtirokchilari bilan shartnomalar asosida marketing xizmatlari, shuningdek, mahsulotlarni ichki va tashqi bozorlarda targʻib qilish boʻyicha xizmatlar koʻrsatish;
“Termiz xalqaro savdo markazi” ESZ investorlarni jalb etish tadbirlarini amalga oshirish;
“Termiz xalqaro savdo markazi” ESZ hududiga qiziqish bildirgan investorlarni, erkin savdo zona ishtirokchilarini axborot bilan taʼminlash, shu jumladan ularning davlat organlari va boshqa tashkilotlar vakillari bilan uchrashuvlarini tashkil etish;
“Termiz xalqaro savdo markazi” ESZ hududidagi yer uchastkalarini, shuningdek, binolar va inshootlarni erkin savdo zonasi ishtirokchilariga egalik qilishga, foydalanishga va ijaraga berish;
davlat-xususiy sheriklik loyihalarida ishtirok etish.
“Termiz xalqaro savdo markazi” ESZ oʻz faoliyatini boshqarish boʻyicha boshqa funksiyalarni ham amalga oshirishga haqlidir.
12. Direksiya qonunchilik hujjatlarida faoliyatning taqiqlanmagan boshqa turlarini ham amalga oshirishi mumkin.
3-bob. Direksiya faoliyatini boshqarish
13. Direksiya Muassisga va Surxondaryo viloyati maxsus iqtisodiy zonalar va kichik sanoat zonalarining maʼmuriy kengashiga hisobot beradi.
14. Muassis quyidagi huquqlarga ega:
Direksiya faoliyatining maqsadi va yoʻnalishlarini belgilash;
Direksiya Ustaviga oʻzgartirish va qoʻshimchalar kiritish;
Direksiyaning ortiqcha, foydalanilmayotgan yoki belgilangan maqsadda foydalanilmayotgan mulkini olib qoʻyish va tasarruf etish;
Direksiyaga berilgan mulkdan foydalanishdan olingan sof foydaning bir qismini yoki hammasini olish;
Direksiya mulki bilan amalga oshirilgan bitimlarni haqiqiy emas deb hisoblash va Direksiyaga yetkazilgan zararlarni qoplash toʻgʻrisida sudga daʼvo arizasi bilan murojaat qilish;
Direksiyani qayta tashkil etish yoki tugatish toʻgʻrisida qaror qabul qilish, tugatish komissiyasini tayinlash va oraliq, tugatish balansini tasdiqlash;
mehnatga oid qonunchilik hujjatlarida belgilangan tartibda Direksiya rahbari bilan mehnat shartnomasini muddatidan oldin toʻxtatish yoki bekor qilish.
15. “Termiz xalqaro savdo markazi” ESZning mustaqil budjeti va “Termiz xalqaro savdo markazi” ESZni rivojlantirish jamgʻarmasi mablagʻlaridan maqsadli foydalanish Surxondaryo viloyati maxsus iqtisodiy zonalar va kichik sanoat zonalarining maʼmuriy kengashi tomonidan nazorat qilinadi.
16. “Termiz xalqaro savdo markazi” ESZ direksiyasiga belgilangan tartibda lavozimga tayinlanadigan va lavozimidan ozod etiladigan Oʻzbekiston Respublikasi investitsiyalar va tashqi savdo vazirining Afgʻoniston Islom Respublikasi bilan tashqi iqtisodiy hamkorlik boʻyicha oʻrinbosari rahbarlik qiladi.
17. Direksiya “Termiz xalqaro savdo markazi” ESZ ishtirokchilarining qonunchilik hujjatlariga muvofiq amalga oshiriladigan faoliyatiga aralashishga haqli emas.
18. Direksiya ijro etuvchi organ hisoblanadi.
19. Direktor:
qonunchilik hujjatlari talablarini bajarishga, Direksiya xodimlarining mehnat sharoitlarini muhofaza qilish va yaxshilash, atrof-muhitni muhofaza qilish va tabiiy resurslardan oqilona foydalanish sohasidagi qonunchilik hujjatlariga rioya qilinishini taʼminlash tadbirlarini ishlab chiqadi va joriy etadi;
“Termiz xalqaro savdo markazi” ESZni rivojlantirish dasturlarining amalga oshirilishini tashkil qiladi;
Direksiyaning asosiy faoliyatini takomillashtirishga, boshqarishning zamonaviy usullarini joriy etishga doir chora-tadbirlarni amalga oshiradi;
Direksiya nomidan ishonchnomasiz harakat qiladi, barcha tashkilotlarda, shu jumladan, xorijiy tashkilotlarda uning manfaatlarini ifoda etadi;
xodimlarni ishga qabul qiladi, ular bilan mehnat shartnomalarini (kontraktlarni) tuzadi, oʻzgartiradi va ularning amal qilishini toʻxtatadi;
qonunchilik hujjatlarida belgilangan tartibda ishonchnomalar beradi;
kadrlarni tayyorlash, ularning malakasini oshirish chora-tadbirlarini amalga oshiradi;
Direksiyaning barcha xodimlari uchun majburiy boʻlgan buyruqlar chiqaradi va koʻrsatmalar beradi;
Direksiyaning ichki ish tartibini va xoʻjalik faoliyatini tartibga soluvchi hujjatlarni tasdiqlaydi;
Direksiya tomonidan qonunchilik hujjatlariga rioya qilinishini tashkil etish va nazorat qilishni taʼminlaydi;
Direksiyaga yuklangan maqsadlar va vazifalarni bajarish uchun zarur boʻlgan boshqa funksiyalarni amalga oshiradi.
20. Direktor:
Muassisga Direksiya faoliyati toʻgʻrisida belgilangan tartibda hisobot beradi;
oʻz huquqlarini amalga oshirishda va vazifalarni bajarishda Direksiya manfaatlarini koʻzlagan holda harakat qilishi lozim hamda budjetga va budjetdan tashqari jamgʻarmalarga toʻlovlar, ish haqining oʻz vaqtida toʻlanishi, mehnatga oid huquqiy munosabatlardan kelib chiquvchi barcha talablarning taʼminlanishi va ularga tenglashtirilgan toʻlovlarning toʻlanishini, ishlab chiqarish faoliyati bilan bevosita bogʻliq ehtiyojlarga mablagʻlar oʻtkazilmaganligi, Direksiyaning xatti-harakatlari (harakatsizligi) uchun, shu jumladan Direksiyaga berilgan davlat mol-mulki yoʻqolgan taqdirda, yetkazilgan zarar yuzasidan qonunchilik hujjatlarida belgilangan tartibda javob beradi;
“Termiz xalqaro savdo markazi” ESZning “Termiz xalqaro savdo markazi” ESZ tomonidan Oʻzbekiston Respublikasi Moliya vazirligi bilan kelishgan holda tasdiqlanadigan mustaqil budjeti mablagʻlarining tasarruf etuvchisi hisoblanadi;
Oʻzbekiston Respublikasi Moliya vazirligiga “Termiz xalqaro savdo markazi” ESZning mustaqil budjeti ijrosi toʻgʻrisidagi hisobotni kelishish uchun belgilangan tartibda taqdim etadi.
21. Direktor oʻz zimmasiga yuklangan vazifalarning bajarilishi, shuningdek, Direksiyaga berilgan davlat mulkining saqlanishi va undan maqsadli foydalanilishi yuzasidan qonunchilik hujjatlarida belgilangan tartibda javob beradi.
4-bob. Direksiyaning ustav fondi
22. Direksiyaning ustav fondi “Termiz xalqaro savdo markazi” ESZ faoliyatini operativ boshqarish uchun Muassis tomonidan oʻziga berilgan mablagʻlar, mol-mulk va boshqa aktivlar yigʻindisidan iborat boʻladi.
23. Direksiya ustav fondining miqdori 5 mlrd soʻmni tashkil qiladi.
5-bob. Direksiyaning ustav fondini koʻpaytirish va kamaytirish tartibi
24. Direksiyaning ustav fondi qonunchilik hujjatlarida belgilangan tartibda Muassis qaroriga binoan koʻpaytiriladi yoki kamaytiriladi.
6-bob. Direksiya mulkini tasarruf etish
25. Muassis tomonidan Direksiyaga operativ boshqaruv huquqi bilan berilgan asosiy fondlar va aylanma mablagʻlar Direksiya mol-mulkini tashkil qiladi.
26. Direksiyaning asosiy fondlari va aylanma mablagʻlari boʻlinmaydi va ulushlar (hissalar, paylar) boʻyicha taqsimlanishi mumkin emas.
27. Surxondaryo viloyati maxsus iqtisodiy zonalar va kichik sanoat zonalarining maʼmuriy kengashi Direksiyaga berilgan davlat mulkidan belgilangan maqsadda foydalanilishini va uning saqlanishini, shuningdek, oʻzgaga berilishini Muassis nomidan nazorat qiladi.
28. Direktor Muassis bilan kelishgan holda, Direksiya mulkini quyidagicha tasarruf etishi mumkin:
asosiy vositalarni sotish, ijaraga yoki garovga berish;
mol-mulkni boshqa xoʻjalik jamiyatlarining ustav fondiga ulush sifatida kiritish;
boshqa xoʻjalik jamiyatlarining aksiyalarini (ulushlarini) sotib olish va sotish;
mol-mulkni qonunchilik hujjatlarida belgilangan tartibda boshqacha tarzda tasarruf etish.
7-bob. Direksiya budjetini shakllantirish
29. Quyidagilar Direksiya faoliyatini moliyalashtirish manbalari hisoblanadi:
davlat mulki boʻlgan va “Termiz xalqaro savdo markazi” ESZ hududida joylashgan binolar va inshootlarni ijaraga berishdan olingan daromadlarning bir qismi;
xizmatlar koʻrsatishdan olingan daromadlar;
“Termiz xalqaro savdo markazi” ESZ ishtirokchilarining ajratmalari va “Termiz xalqaro savdo markazi” ESZ ishtirokchilari sifatida roʻyxatdan oʻtish uchun toʻlovlar;
qonunchilik hujjatlarida taqiqlanmagan boshqa mablagʻlar.
8-bob. Zaxira fondini va boshqa fondlarni shakllantirish tartibi
30. Direksiya oʻz tasarrufida qoladigan sof foyda hisobiga zaxira fondini, shuningdek, boshqa fondlarni tashkil etishi mumkin, ularning miqdori va shakllantirish tartibi Muassis tomonidan tasdiqlanadi.
9-bob. Daromadni (foydani) taqsimlash va zararlarni qoplash tartibi
31. Direksiyaning sof foydasi Direksiya tasarrufida qoladi va undan Muassis qaroriga binoan foydalaniladi.
32. Muassis oʻz qarori bilan boshqa yuridik va jismoniy shaxslarga homiylik xayriyasi sifatida yoʻnaltiriladigan mablagʻlarning cheklangan summasini, ularni tasarruf etish huquqini Direktorga bergan holda belgilaydi.
33. Direksiyaning xoʻjalik faoliyati natijasida koʻrilgan zararlari ushbu maqsadlar uchun tashkil etilgan zaxira fondi mablagʻlari hisobidan qoplanishi mumkin.
10-bob. Hisobotlarni taqdim etish tartibi
34. Direksiya hisobot davri tugagach, vakolatli organlarga moliya hisobotini va roʻyxati qonunchilik hujjatlarida belgilanadigan boshqa hujjatlarni taqdim etadi hamda hujjatlarning saqlanishi va davlat tomonidan saqlashga berilishi yuzasidan belgilangan tartibda javob beradi.
35. Direksiyaning xoʻjalik subyekti sifatidagi faoliyati Surxondaryo viloyati maxsus iqtisodiy zonalar va kichik sanoat zonalarining maʼmuriy kengashi tomonidan qonunchilik hujjatlarida belgilangan tartibda nazorat qilinadi.
36. Direktor har chorakda Direksiya faoliyatining natijalari va tasdiqlangan rivojlantirish dasturlarining amalga oshirilishi toʻgʻrisida Vazirlar Mahkamasiga hisobot beradi.
11-bob. Direksiyaning javobgarligi
37. Direksiya oʻz majburiyatlari boʻyicha oʻziga tegishli mulk bilan javob beradi. Muassis Direksiyaning mulki yetarli boʻlmagan taqdirda, uning majburiyatlari boʻyicha subsidiar javobgarlikni amalga oshiradi.
38. Direksiya Muassis majburiyatlari boʻyicha javob bermaydi.
12-bob. Direksiyani tugatish va qayta tashkil etish
39. Direksiya Muassisning qaroriga koʻra, qonunchilik hujjatlarida nazarda tutilgan tartibda yoki sud qaroriga binoan tugatilishi yoxud qayta tashkil etilishi mumkin.
40. Direksiyani tugatish Direksiya faoliyatining huquq va majburiyatlari huquqiy vorislik tartibida boshqa shaxslarga oʻtmagan holda toʻxtatilishiga sabab boʻladi.
Direksiya qayta tashkil etilgan taqdirda, uning huquq va majburiyatlari huquqiy vorisga oʻtadi.
Vazirlar Mahkamasining 2021-yil 2-fevraldagi 47-son qaroriga 4-ILOVA
“Termiz xalqaro savdo markazi” erkin savdo markazi hamda “Termiz” erkin iqtisodiy zonasining muhandislik-kommunikatsiya, yoʻl-transport va ishlab chiqarish infratuzilmasini rivojlantirish
T/r Obyekt nomi Oʻlchov birligi Quvvati Qiymati * (mlrd soʻm) Moliyalashtirish manbasi Amalga oshirish muddati Masʼul vazirlik va idoralar Jami: 111,50 Ichimlik suv tarmogʻini qurish, rekonstruksiya qilish va kapital taʼmirlash 1. Termiz tumani “Ayratom” mahallasidagi mavjud suv minorasi yonidan qoʻshimcha 2 ta yangi suv qudugʻi qazish, 500 m3 hajmdagi bitta suv yigʻish inshooti va 1,8 km suv quvuri tarmogʻini qurish. “Termiz” erkin iqtisodiy zonasi hududi ichida oʻlchami 500 m3 hajmdagi ikkita suv yigʻish inshootini qurish. km/ dona 10,2 km/ 3 ta inshoot 6,08 2021 — 2023-yillarga moʻljallangan Investitsiya dasturi doirasida 2021 — 2023-yil “Oʻzsuvtaʼminot” AJ, Surxondaryo viloyati hokimligi Kanalizatsiya tarmogʻini qurish, rekonstruksiya qilish va kapital taʼmirlash 2. Oqova suv tarmogʻini qurish va 1 ta 600 m3 (biologik), 300 m3 (kimyoviy) hajmdagi bitta oqova suvni tozalash inshooti va 4 ta suv nasos stansiyalarini qurish. km/ dona 7,12 km/ 2 ta inshoot 17,10 2021 — 2023-yillarga moʻljallangan Investitsiya dasturi doirasida 2021 — 2023-yil “Oʻzsuvtaʼminot” AJ, Surxondaryo viloyati hokimligi Tabiiy gaz tarmogʻini qurish, rekonstruksiya qilish va kapital taʼmirlash 3. Gaz bilan taʼminlash boʻyicha texnik shartga asosan: Angor tumani “Bahor” mahallasidagi mavjud kichik gaz taqsimlash stansiyasidan yuqori bosimli gaz tarmogʻini (D-219 mm) 28,5 km uzunlikda “Termiz” erkin iqtisodiy hududigacha tortish. km 28,5 km 12,50 2021 — 2023-yillarga moʻljallangan Investitsiya dasturi doirasida 2021 — 2023-yil Energetika vazirligi, “Hududgaztaʼminot” AJ, Surxondaryo viloyati hokimligi Elektr energiyasi tarmogʻini qurish, rekonstruksiya qilish va kapital taʼmirlash 4. Elektr energiyasi bilan taʼminlashda texnik shartga asosan: 1-bosqich “AMU” kichik stansiyasidan 10 kVa elektr tarmogʻini “Termiz” erkin iqtisodiy zonasi hududigacha tortish va ichki hududlarda elektr tarmogʻini qurish. 2-bosqich “AMU” kichik stansiyasidan 110/10 kVa elektr tarmogʻini “Termiz” erkin iqtisodiy hududigacha tortish va yangi kichik stansiya qurish hamda hudud ichidagi mavjud 10 kVa elektr tarmogʻini hududdan tashqariga koʻchirish. km 28,66 km 27,35 2021 — 2023-yillarga moʻljallangan Investitsiya dasturi doirasida 2021 — 2023-yil Energetika vazirligi, “Hududiy elektr tarmoqlar” AJ, Surxondaryo viloyati hokimligi Avtomobil yoʻllarini qurish, rekonstruksiya qilish va kapital taʼmirlash boʻyicha 5. “Termiz xalqaro savdo markazi” erkin savdo markazi hamda “Termiz” erkin iqtisodiy zonasigacha jami 10,5 km ichki avtomobil yoʻllarini qurish. km 10,5 km 46,80 Mahalliy budjet mablagʻlari 2021 — 2023-yil Transport vazirligi, Avtomobil yoʻllari qoʻmitasi, Surxondaryo viloyati hokimligi Aloqa tarmogʻini qurish, rekonstruksiya qilish va kapital taʼmirlash boʻyicha 6. Optik tolali aloqa liniyasi bilan taʼminlash texnik sharti asosida Termiz shahar telekommunikatsiya bogʻlanmasiga tegishli 225 ATS dan hududgacha 15,08 km, “Termiz” erkin iqtisodiy zonasi hududi ichida 6,15 km, jami 21,23 km optik tolali tarmoq tortish. km 21,23 km 1,68 2021 — 2023-yillarga moʻljallangan Investitsiya dasturi doirasida 2021 — 2023-yil Axborot texnologiyalari va kommunikatsiyalarni rivojlantirish vazirligi, Surxondaryo viloyati hokimligi “Termiz xalqaro savdo markazi” erkin savdo markazi hamda “Termiz” erkin iqtisodiy zonasi hududlari atrofida maxsus infratuzilmani barpo etish 7. “Termiz-avtoyoʻl” oʻtkazish punktidan “Termiz xalqaro savdo markazi” erkin savdo zonasigacha boʻlgan hududda yoʻlaklar, ushbu yoʻlaklar boʻylab devorlar, maxsus toʻsiqlar, yoritish moslamalari va kuzatuv kameralarini oʻrnatish bilan bogʻliq tadbirlarni amalga oshirish. Hisob-kitoblarga koʻra Mahalliy budjet mablagʻlari 2021 — 2023-yil Surxondaryo viloyati hokimligi
Vazirlar Mahkamasining 2021-yil 2-fevraldagi 47-son qaroriga 5-ILOVA
Vazirlar Mahkamasining “Termiz” erkin iqtisodiy zonasi faoliyatini takomillashtirish chora-tadbirlari toʻgʻrisida” 2020-yil 13-martdagi 148-son qaroriga kiritilayotgan
1-ilovaning matni quyidagi tahrirda bayon etilsin:
“Termiz” erkin iqtisodiy zonasi tarkibiga kiruvchi hududlarning chegaralari
1-boshlangʻich nuqta Termiz tumanidagi “Termiz xalqaro savdo markazi” erkin savdo zonasi hududining gʻarb tomonida, “Termiz” erkin iqtisodiy zonasi hududida joylashgan.
1-nuqtadan chegara “Termiz xalqaro savdo markazi” erkin savdo zonasi hududi boʻylab janubiy yoʻnalishda 330,0 metr masofada 2-nuqtagacha davom etadi.
2-nuqtadan chegara Ayritom avtomagistral yoʻlining “Termiz” erkin iqtisodiy zonasi hududi boʻylab gʻarb yoʻnalishda 616,0 metr masofada 3-nuqtagacha davom etadi.
3-nuqtadan chegara “Termiz xalqaro savdo markazi” erkin savdo zonasi hududi boʻylab shimoliy yoʻnalishda 1050,0 metr masofada 4-nuqtagacha davom etadi.
4-nuqtadan chegara “Amu-zang” kanali muhofaza zonasining “Termiz” erkin iqtisodiy zonasi hududi boʻylab sharqiy yoʻnalishda 320,0 metr masofada 5-nuqtagacha davom etadi.
5-nuqtadan chegara “Amu-zang” kanali muhofaza zonasining “Termiz” erkin iqtisodiy zonasi hududi boʻylab janub yoʻnalishda 755,0 metr masofada 6-nuqtagacha davom etadi.
6-nuqtadan chegara “Termiz xalqaro savdo markazi” erkin savdo zonasi hududi boʻylab gʻarbiy yoʻnalishda 315,0 metr masofada 1-nuqtagacha davom etadi.”
Oʻzbekiston Respublikasining Bosh vaziri A. ARIPOV
Toshkent sh.,
2021-yil 2-fevral,
47-son