UzbekAI

Ўзбекистон Республикаси Вазирлар Маҳкамасининг

қарори

НИЗОМ

СХЕМАСИ

рўйхати

Хавфли маҳсулотлар ва чиқиндиларни Ўзбекистон Республикаси ҳудудига олиб кириш ва республика ҳудудидан олиб чиқиш тартибини янада такомиллаштириш чора-тадбирлари тўғрисида

Хавфли чиқиндиларни чегаралараро ташиш ва йўқ қилиб ташлаш устидан назорат қилиш тўғрисидаги Базель конвенциясига (1989 йил 22 март, Базель) (кейинги ўринларда — Базель конвенцияси) ҳамда Ўзбекистон Республикасининг «Чиқиндилар тўғрисида»ги Қонунига мувофиқ экологик сертификатланиши лозим бўлган хавфли маҳсулотлар ва олди-сотди, импорт-экспорт операцияси объекти бўлган чиқиндилар, шунингдек, ташилиши керак бўлган хавфли чиқиндилар билан боғлиқ ишларни давлат томонидан тартибга солиш тизимини янада такомиллаштириш мақсадида Вазирлар Маҳкамаси қарор қилади:

1. Хавфли маҳсулотлар ва чиқиндиларни мажбурий экологик сертификатлаштириш тартиби тўғрисидаги низом 1-иловага мувофиқ тасдиқлансин

2. Ўзбекистон Республикаси Экология ва атроф-муҳитни муҳофаза қилиш давлат қўмитаси манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни икки ой муддатда ушбу қарорга мувофиқлаштирсин.

3. Ўзбекистон Республикаси Ҳукуматининг 2-иловага мувофиқ баъзи қарорлари ўз кучини йўқотган деб ҳисоблансин.

4. Мазкур қарор 2021 йил 1 майдан бошлаб кучга киради.

5. Ушбу қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари А.Ж. Раматов ва Ўзбекистон Республикаси Экология ва атроф-муҳитни муҳофаза қилиш давлат қўмитаси раиси А.И. Максудов зиммасига юклансин.

Вазирлар Маҳкамасининг 2021 йил 16 февралдаги 75-сон қарорига 1-ИЛОВА

Хавфли маҳсулотлар ва чиқиндиларни мажбурий экологик сертификатлаштириш тартиби тўғрисида

1-боб. Умумий қоидалар

1. Ушбу Низом хавфли маҳсулотлар ҳамда олди-сотди, импорт-экспорт операцияси объекти бўлган чиқиндилар, шунингдек, ташилиши керак бўлган хавфли чиқиндиларни (кейинги ўринларда — хавфли маҳсулотлар ва чиқиндилар) мажбурий экологик сертификатлаштириш тартибини белгилайди.

2. Ушбу Низом қоидалари алоҳида белгиланган тартибда республика ҳудудидан транзит ўтадиган махсус юкларга нисбатан татбиқ этилмайди.

3. Хавфли маҳсулотлар ва чиқиндиларнинг олди-сотди, импорт-экспорт операциялари, шунингдек, ташилиши Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги (кейинги ўринларда — Экология вазирлиги) тизимидаги белгиланган тартибда аккредитациядан ўтган экологик сертификатлаштириш органи (кейинги ўринларда — экологик сертификатлаштириш органи) томонидан бериладиган экологик сертификат асосида амалга оширилади.

4. Экологик сертификат хавфли маҳсулотлар ва чиқиндиларнинг норматив-ҳуқуқий ва техник жиҳатдан тартибга солувчи норматив ҳужжатларда белгиланган экологик хавфсизлик талабларига жавоб беришини тасдиқлайдиган Миллий сертификатлаштириш тизими қоидаларига мувофиқ бериладиган ҳужжат ҳисобланади.

5. «Хавфли чиқиндиларни чегаралараро ташиш ва йўқ қилиб ташлаш устидан назорат қилиш тўғрисида»ги 1989 йил 22 мартдаги Базель Конвенцияси (кейинги ўринларда Базель конвенцияси деб аталади) иштирокчиси бўлмаган давлатлар Ўзбекистон Республикаси Вазирлар Маҳкамаси томонидан рўйхати тасдиқланган экологик хавфли маҳсулотлар ва чиқиндилар турларини Ўзбекистон Республикаси ҳудудига олиб киришлари ва республика ҳудудидан олиб чиқишлари қатъиян тақиқланади. Ўзбекистон Республикаси билан Базель конвенцияси иштирокчиси бўлмаган давлат ўртасида чиқиндиларни транзит тарзида олиб ўтишга доир халқаро шартнома мавжуд бўлган ҳолларда, бундай олиб ўтиш ушбу халқаро шартнома қоидалари, шунингдек, устувор равишда, Базель конвенциясида белгиланган умумий талаблар асосида амалга оширилади.

Экология вазирлиги томонидан Базель конвенциясининг талабларига мувофиқ импорт-экспорт қилинган ҳамда экологик сертификатлаштирилган хавфли маҳсулотлар ва чиқиндиларга доир ҳисобот тайёрланиб, белгиланган муддатларда ҳар йили Базель конвенциясининг Котибиятига тақдим этиб борилади.

Ушбу ҳисобот:

импорт-экспорт қилинган хавфли маҳсулотлар ва чиқиндилар миқдори ҳақидаги маълумотлар;

Ўзбекистон Республикаси Президенти ҳузуридаги Статистика агентлигидан олинадиган — маҳаллий ишлаб чиқарувчи ва хизмат кўрсатувчи ташкилотлардан Ўзбекистон Республикаси ҳудудида йиллик ҳосил бўладиган хавфли маҳсулотлар ва чиқиндилар миқдори ҳақидаги маълумотлар;

Ўзбекистон Республикаси Иқтисодиёт ва молия вазирлиги ҳузуридаги Божхона қўмитасининг электрон ахборот алмашинув тизимидан олинадиган — хавфли маҳсулотлар ва чиқиндиларнинг импорт-экспорти ҳақидаги маълумотлар асосида тайёрланади.

6. Хавфли маҳсулотлар ва чиқиндилар ушбу Низомга 1-иловада келтирилган схемага мувофиқ экологик сертификатлаштирилади.

7. Сертификатлаштирилган импорт-экспорт қилинадиган хавфли маҳсулотлар ва чиқиндиларга божхона юк декларациясини расмийлаштириш вақтида экологик сертификат рўйхат рақами ва берилган санаси кўрсатилади.

8. Хавфли маҳсулотлар ва чиқиндиларда уларнинг экологик сертификатлаштирилганлигига оид маълумотлар мавжуд бўлмаганда, бундай чиқиндиларни олди-сотди ва импорт-экспорт қилиш ишлари, шунингдек, ташиш керак бўлганда улар ушбу Низомда кўрсатилган тартибда экологик сертификатлаштирилади.

9. Экологик сертификатлаштириш ишлари ариза берувчи билан тузилган шартномага мувофиқ амалга оширилади.

2-боб. Экологик сертификатлаштириш тартиби

10. Импорт-экспорт қилинадиган хавфли маҳсулотлар ва чиқиндиларни экологик сертификатлаштириш учун ариза берувчи «Ягона дарча» божхона ахборот тизими орқали, мамлакат ҳудудида олди-сотди қилинадиган, шунингдек, ташилиши керак бўлган чиқиндиларни экологик сертификатлаштириш учун эса, тўғридан-тўғри экологик сертификатлаштириш органига ариза билан мурожаат қилади. Бунда аризага қуйидагилар илова қилинади:

а) хавфли маҳсулотлар ва чиқиндиларни импорт-экспорт қилишга экологик сертификат олиш учун:

Вазирлар Маҳкамаси томонидан тасдиқланган Импорт-экспорт қилиниши давлат томонидан тартибга солинадиган ва мажбурий экологик сертификатлаштириш лозим бўлган хавфли маҳсулотлар ва чиқиндилар рўйхатига асосан ушбу Низомга 2-иловага мувофиқ шаклда буюртма;

хавфли маҳсулотлар ва чиқиндиларни импорт қилиш учун — Ўзбекистон Республикаси божхона ҳудудига кирганлиги тўғрисида белги қўйилган юк ташиш ҳужжатларининг нусхаси (инвойс/ҳисоб-фактура, юк хати) ёки экспорт қилиш учун — инвойс/ҳисоб-фактура;

импорт қилинаётган чиқиндиларга — уларнинг мустақил равишда тўлиқ утилизация қиладиган, қайта ишлайдиган ёки улардан такрорий фойдаланадиган ташкилотларга ушбу жараёнларнинг атроф-муҳитга таъсир кўрсатилиши тўғрисидаги баёнот лойиҳаси бўйича давлат экологик экспертизасининг ижобий хулосаси нусхаси;

чиқиндиларни утилизация қилиш ва (ёки) қайта ишлаш билан шуғулланувчи юридик шахслар билан мазкур чиқиндиларни топшириш (бериш) ёки реализация қилиш юзасидан тузилган шартнома нусхаси (мустақил равишда тўлиқ утилизация қилиниши, қайта ишланиши ёки такрорий фойдаланилиши таъминланадиган чиқиндилар бундан мустасно);

импорт қилинаётган хавфли маҳсулотлар ва чиқиндиларнинг аниқ ҳажми (сони) кўрсатилган ташқи савдо шартномаси (контракти) ва маҳсулотларни етказиб берувчи ҳамда қабул қилувчи ўртасида тузилган келишув(лар) нусхаси (экологик сертификатлаштириш бир календарь йилга амалга оширилганда);

б) мамлакат ҳудудида олди-сотди қилинадиган чиқиндиларга экологик сертификат олиш учун:

чиқинди паспорти;

чиқиндиларнинг аниқ ҳажми (сони) кўрсатилган, мазкур чиқиндиларни олди-сотди қилиш юзасидан юридик шахслар билан тузилган шартнома нусхаси;

в) мамлакат ҳудудида ташилиши керак бўлган хавфли чиқиндиларга экологик сертификат олиш учун:

чиқинди паспорти;

чиқиндиларнинг аниқ ҳажми (сони) кўрсатилган, мазкур чиқиндиларни ташиш юзасидан етказиб берувчи ҳамда қабул қилувчи ўртасида тузилган шартнома(лар) нусхаси.

11. Ариза берувчи ушбу Низомнинг 10-бандига мувофиқ экологик сертификат олиш мақсадида аризани кўриб чиқиш учун экологик сертификатлаш органига тақдим этган ҳужжатлар ва маълумотларнинг ишончлилиги ва ҳаққонийлиги учун жавобгар ҳисобланади.

Экологик сертификат олиш учун экологик сертификатлаш органи ушбу Низомнинг 10-бандида кўрсатилганидан бошқа маълумотлар ва ҳужжатларни талаб қилишга ҳақли эмас.

12. Экологик сертификатлаштириш органи бир иш куни мобайнида тақдим этилган ҳужжатларни таҳлил қилади ҳамда ҳужжатлар тўлиқ бўлганда ва камчиликлар аниқланмаган тақдирда, хавфли маҳсулотлар ва чиқиндиларни сертификатлаштириш тўғрисида қарор қабул қилади. Агар ҳужжатлар ушбу Низомнинг 10-банди талабларига жавоб бермаса ва (ёки) уларда камчиликлар аниқланган тақдирда, тегишли камчиликларни кўрсатган ҳолда аризани қайтаради ва бу ҳақда ариза берувчини хабардор қилади.

13. Ариза берувчи томонидан шартнома имзоланиб, шартномада белгиланган тўлов амалга оширилганидан сўнг экологик сертификатлаштириш органи бир иш куни мобайнида экологик сертификатлаштириш дастурини ишлаб чиқади ва тасдиқлайди.

15. Экологик сертификатлаштириш органи томонидан тасдиқланган дастур асосида икки иш куни мобайнида синов лабораторияси билан биргаликда тегишли хавфли маҳсулотлар ва чиқиндилар Сертификатлаштириш миллий тизими қоидаларига мувофиқ идентификациядан ўтказилади, идентификациядан ўтказиш далолатномаси тузилади ҳамда уларнинг атроф-муҳитга таъсирини ўрганиш учун тегишли норматив-ҳуқуқий ва техник жиҳатдан тартибга солиш соҳасидаги норматив ҳужжатларга мувофиқ намуналар олиниб, лаборатория синовлари ўтказилади ва синов баённомалари расмийлаштирилади.

16. Намуналар сони, танлаш тартиби, уларни идентификациялаш ва сақлаш қоидалари экологик сертификатлаштириш органи ва синов лабораториясининг сифат менежмент тизими ҳужжатлари, экологик сертификатлаштириладиган хавфли маҳсулотлар ва чиқиндиларга норматив ҳужжатларда, шу жумладан, синов усулларида белгиланади.

17. Муайян турдаги хавфли маҳсулотлар ва чиқиндиларга синов баённомаларини расмийлаштириш ва бериш муддати техник жиҳатдан тартибга солиш соҳасидаги норматив ҳужжатлар билан белгиланадиган усулларга мувофиқ амалга ошириладиган ушбу турдаги маҳсулотлар ва чиқиндиларни синовдан ўтказишнинг умумий давомийлигидан келиб чиқиб белгиланади.

Намуна олиш имкони бўлмаган кам миқдорни ташкил этган, норматив ҳужжати, шунингдек, синовларни амалга ошириш учун аккредитациядан ўтган синов лабораторияси мавжуд бўлмаган тақдирда хавфли маҳсулотлар ва чиқиндиларни экологик сертификатлаш идентификациялаш йўли билан амалга оширилади.

18. Синовларининг сифати ва натижаларнинг ишончлилиги, шунингдек, синовлар баённомалари сақланиши учун синовларни ўтказган лаборатория жавобгар ҳисобланади. Синов баённомалари лабораториянинг техник эксперти томонидан имзоланади ва аккредитациядан ўтган синов лабораторияси раҳбари томонидан тасдиқланади.

19. Аккредитациядан ўтган синов лабораторияси синов баённомаларини ариза берувчига ва/ёки экологик сертификатлаш органига тақдим этади. Агар хавфли маҳсулотлар ва чиқиндилар синовлари бошқа аккредитациядан ўтган синов лабораторияларида алоҳида параметрлар бўйича ўтказилган бўлса, баённомалар билан тасдиқланган синовларнинг ижобий натижалари мавжудлиги хавфли маҳсулот ва чиқиндиларнинг мувофиқлиги ижобий баҳоланиши деб ҳисобланади.

20. Аккредитациядан ўтган синов лабораторияларида ўтказилган лаборатория синовларининг ижобий натижаси олинганда, экологик сертификатлаш органи ҳужжатларни техник экспертга баҳолаш учун юборади.

Техник экспертнинг ижобий қарори қабул қилинганда экологик сертификатлаш органи бир иш куни мобайнида экологик сертификатни расмийлаштиради ва давлат реестридан рўйхатдан ўтказади.

21. Экологик сертификат белгиланган намунадаги шаклда давлат ёки рус тилида расмийлаштирилади ҳамда бланкада (босма иш қоғози) ёки QR-код (матрик штрихли код) билан ҳимояланган электрон шаклда ариза берувчига тўлов амалга оширилган кундан бошлаб тўрт иш куни давомида тақдим этилади.

22. Ариза берувчи импорт-экспорт қилинадиган хавфли маҳсулотлар ва чиқиндиларга экологик сертификатни «Ягона дарча» божхона ахборот тизими орқали, мамлакат ҳудудида олди-сотди қилинадиган, шунингдек, ташилиши керак бўлган чиқиндиларга экологик сертификатни эса, ўз хоҳишига кўра шахсан ёки ишончли вакили орқали экологик сертификатлаштириш органидан олиши мумкин.

23. Экологик сертификат ариза берувчига «Ягона дарча» божхона ахборот тизими орқали электрон шаклда экологик сертификатлаш органининг электрон имзоси билан берилганда ёки қоғоз шаклида экологик сертификатлаш органининг муҳри ва имзосининг асли бўлганда ҳамда давлат реестрида қайд этилганлигини тасдиқловчи сана ва рақам кўрсатилганда ҳақиқий ҳисобланади.

24. Экологик сертификат бланки рақамланган, ҳимоя қилиш даражасига эга, қатьий ҳисобда турадиган ва жавобгарлиги белгиланган ҳужжат ҳисобланади.

Экологик сертификат бланкаси ушбу Низомга 3-иловага мувофиқ шаклда «Давлат белгиси» давлат-ишлаб чиқариш бирлашмаси томонидан тайёрланади.

25. Экологик сертификат:

а) импорт қилишда:

хавфли маҳсулотлар ва чиқиндиларга (транспорт воситаларидан ташқари) аниқ ҳажми (сони) кўрсатилган битта ташқи савдо шартномаси (контракти) ва етказиб берувчи ҳамда қабул қилувчи ўртасида тузилган келишув(лар) нусхасига асосан — бир календарь йилдан ошмаган муддатга, бунда бир календарь йил давомида импорт қилинаётган хавфли маҳсулотлар ва чиқиндиларнинг ҳар бир тўпи (партияси) Сертификатлаштириш миллий тизими қоидаларига мувофиқ идентификация қилинади ҳамда уларнинг атроф-муҳитга таъсирини ўрганиш учун тегишли техник жиҳатдан тартибга солиш соҳасидаги норматив ҳужжатларга мувофиқ лаборатория синовлари ўтказилади ва синов баённомалари расмийлаштирилади;

инвойс/ҳисоб-фактура, юк хатига асосан хавфли маҳсулотлар ва чиқиндиларнинг ҳар тўпига — божхона юк декларациясини расмийлаштириш муддатига;

б) мамлакат ҳудудида ишлаб чиқариш ва хизмат кўрсатиш жараёнида ҳосил бўладиган олди-сотди объекти бўлган хавфли маҳсулотлар ва чиқиндиларнинг ҳар тўпига — бир йилдан ошмаган муддатга берилади.

26. Экологик сертификатлаш органи фаолиятига тааллуқли сертификат нусхаси ва сертификатлаштириш ишларини олиб боришда зарур бўлган ҳужжатлар тўплами (намуна олиш далолатномалари, идентификация далолатномалари, синов баённомалари) экологик сертификат амал қилиш муддатида, лекин бир йилдан кам бўлмаган муддатда сақланади. Сақлаш муддати тугаган ҳужжатлар архивга топширилади ёки қонунчилик ҳужжатларида белгиланган тартибда йўқ қилинади.

3-боб. Экологик сертификатнинг амал қилиш муддатини тўхтатиш, бекор қилиш, қайта расмийлаштириш

27. Экологик сертификатнинг амал қилиши:

ариза берувчи экологик сертификатнинг амал қилишини тўхтатиш тўғрисида белгиланган тартибда экологик сертификатлаш органига ариза билан мурожаат қилганда — мурожаат қилган кундан бошлаб;

ариза берувчи (юридик шахс)нинг фаолияти тугатилган ёки тўхтатилганда — ушбу кундан бошлаб;

ариза берувчи қайта ташкил этилганда — қайта ташкил этилган кундан бошлаб;

ариза берувчига бир календарь йилга берилган экологик сертификатнинг талаблари бир йил мобайнида мунтазам равишда (икки ёки ундан ортиқ) бузилиши, агар ушбу қоидабузарликлар фуқароларнинг ҳаёти ва соғлиғига, жамоат хавфсизлигига ва атроф-муҳитга зарар етказилишига олиб келса ўн иш кунига тўхтатилади.

28. Экологик сертификатлаш органининг экологик сертификат амал қилишини тўхтатиш тўғрисидаги қарори ариза берувчига қарор қабул қилинган кундан бошлаб уч иш куни мобайнида экологик сертификат амал қилишини тўхтатишнинг сабаблари кўрсатилган ҳолда ёзма ёки электрон шаклда етказилади, бунда экологик сертификатнинг амал қилишини тўхтатиш сабаблари ва қонунчилик ҳужжатларининг аниқ нормалари кўрсатилади.

Ариза берувчи томонидан экологик сертификатнинг амал қилишини тўхтатишга сабаб бўлган ҳолатлар бартараф этилган тақдирда, кўрсатиб ўтилган ҳолатлар бартараф этилганлиги тўғрисида тасдиқнома олинган кундан бошлаб ўн иш куни мобайнида экологик сертификатнинг амал қилишини тиклаш тўғрисида қарор қабул қилинади.

29. Ариза берувчи томонидан экологик сертификатнинг амал қилишини тўхтатиш сабаблари ўн иш куни мобайнида бартараф этилмаган, шунингдек, мазкур Низомнинг 25-банди «а» кичик бандининг иккинчи хатбошисида белгиланган талаб бузилган тақдирда, экологик сертификат бекор қилинади.

30. Қоғоз шаклида берилган экологик сертификат бекор қилинган тақдирда, сертификатнинг асл нусхаси ариза берувчи томонидан экологик сертификатнинг амал қилишини бекор қилиш тўғрисидаги қарор олинган кундан бошлаб ўн иш куни мобайнида экологик сертификатлаштириш органига қайтарилиши керак.

Агар электрон шаклда берилган экологик сертификат бекор қилинган тақдирда, экологик сертификатлаштириш органи бир иш куни мобайнида ариза берувчини бу ҳақда хабардор қилади.

Бекор қилинган экологик сертификатлар экологик сертификатлаштириш органи томонидан йўқ қилинади ва бу ҳақда тегишли далолатнома тузилади. Бекор қилинган экологик сертификатлар тўғрисидаги маълумотлар экологик сертификатлаштириш органининг веб-сайтида барча оммавий танишиш учун эълон қилиниши керак.

31. Ариза берувчи экологик сертификатлаш органининг қароридан норози бўлган тақдирда, судга мурожаат қилиш ҳуқуқига эга. экологик сертификатлаш органининг қарори устидан судга қонунчилик ҳужжатларида белгиланган тартибда шикоят қилиниши мумкин.

32. Ариза берувчи (юридик шахс) қайта ташкил этилганда, унинг номи, юридик манзили ёки жойлашган жойи (почта манзили) ўзгарганда ўн иш куни мобайнида мазкур ўзгартишлар ҳақида амалдаги экологик сертификатнинг асл нусхасини илова қилиб, уни қайта расмийлаштириш учун экологик сертификатлаш органига ёзма равишда мурожаат қилиши лозим.

Агар ариза берувчи илгари берилган экологик сертификатнинг ҳуқуқий вориси бўлмаса, ҳужжатларни кўриб чиқиш билан боғлиқ кейинги тартиб-таомиллар ушбу Низомда назарда тутилган талаблар асосида амалга оширилади.

Ариза берувчининг номи ёки жойлашган жойи (почта манзили) ўзгарганда унинг номига экологик сертификатлаш органи томонидан бир иш куни мобайнида амалдаги экологик сертификат муддатига экологик сертификат расмийлаштирилади.

4-боб. Экологик сертификатлар реестрини юритиш тартиби

33. Экологик сертификатлаш органи берилган экологик сертификатлар реестрини юритади ва уларни ўз веб-сайтида жойлаштиради.

34. Берилган экологик сертификатлар реестрида:

ариза берувчининг номи, унинг манзили, солиқ тўловчининг идентификация рақами;

экологик сертификат берилган сана, амал қилиш даври ва унинг рўйхатдан ўтган рақами;

бекор қилинган ва тўхтатиб қўйилган экологик сертификатларнинг рақами, ариза берувчининг номи, юридик манзили, асослари ва саналари кўрсатилиши лозим.

35. Экологик сертификатлар реестридаги маълумотлар ҳамма танишиши учун очиқ ҳисобланади.

35 1 . Импорт-экспорт қилинадиган хавфли маҳсулотлар ва чиқиндилар назоратини таъминлаш учун Экология вазирлиги ҳамда Божхона қўмитаси ўртасида ахборот алмашилади.

5-боб. Якунловчи қоидалар

36. Ушбу Низомни қўллашда юзага келадиган низолар қонунчилик ҳужжатларида белгиланган тартибда ҳал этилади.

37. Ушбу Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

Хавфли маҳсулотлар ва чиқиндиларни мажбурий экологик сертификатлаштириш тартиби тўғрисидаги низомга 1-ИЛОВА

Хавфли маҳсулотлар ва чиқиндиларга экологик сертификат бериш

Босқичлар Субъектлар Чора-тадбирлар Бажариш муддатлари 1-босқич Ариза берувчи (юридик шахс) Тегишли ҳужжатларни илова қилган ҳолда, экологик сертификатлаштириш органига: импорт-экспорт қилинадиган хавфли маҳсулотлар ва чиқиндиларни экологик сертификатлаштириш учун — «Ягона дарча» божхона ахборот тизими орқали; мамлакат ҳудудида олди-сотди қилинадиган, шунингдек, ташилиши керак бўлган чиқиндиларни экологик сертификатлаштириш учун — бевосита расмий хат орқали ариза тақдим этади. Хоҳишига кўра 2-босқич Экологик сертификатлаштириш органи 1. Ариза ва тақдим этилган ҳужжатларни кўриб чиқади ҳамда кўриб чиқиш натижалари бўйича: ҳужжатлар тўлиқ бўлганда ва камчиликлар аниқланмаганда — хавфли маҳсулотлар ва чиқиндиларни сертификатлаштириш тўғрисида қарор қабул қилади; ҳужжатлар тўлиқ бўлмаганда ёки камчиликлар аниқланганда — тегишли камчиликларни кўрсатган ҳолда аризани қайтаради ва бу ҳақда ариза берувчини хабардор қилади. 2. Сертификатлаштириш тўғрисида қарор қабул қилинганда экологик сертификатлаштириш ишларига шартнома лойиҳасини ишлаб чиқади ва ариза берувчига имзолаш учун тақдим этади. Бир иш куни да 3-босқич Ариза берувчи Шартномада белгиланган тўловни амалга оширади. Шартномада белгиланган муддатда 4-босқич Экологик сертификатлаштириш органи 1. Экологик сертификатлаштириш дастурини ишлаб чиқади ва тасдиқлайди. 1. Ариза берувчи томонидан тўлов амалга оширилганидан сўнг бир иш куни да 2. Тасдиқланган дастур асосида аккредитациядан ўтган синов лабораторияси билан биргаликда: хавфли маҳсулотлар ва чиқиндиларни идентификациядан ўтказади, намуналар олади ва лабораторияга тақдим қилади; намуналарни синовдан ўтказади ва синов баённомасини расмийлаштиради; якуний ҳужжатларни баҳолаш учун техник экспертга тақдим қилади. 2. Икки иш кунида 5-босқич Техник эксперт 1. Техник эксперт ҳужжатлар тўпламини ўрганиб чиқиб, экологик сертификат бериш ёки беришни рад этиш тўғрисида қарор қабул қилади. Бир иш кунида Экологик сертификатлаштириш органи 2. Техник экспертнинг ижобий қарори асосида экологик сертификат расмийлаштиради ва реестрда рўйхатдан ўтказади. 3. Ариза берувчига: импорт ва экспорт қилинадиган хавфли маҳсулотлар ва чиқиндилар учун экологик сертификатни «Ягона дарча» божхона ахборот хизмати тизими орқали; мамлакат ҳудудида олди-сотди қилинадиган, шунингдек, ташилиши керак бўлган чиқиндилар учун экологик сертификат ни бевосита ёки унинг ишончли вакилига тақдим этади.

Хавфли маҳсулотлар ва чиқиндиларни мажбурий экологик сертификатлаштириш тартиби тўғрисидаги низомга 2-ИЛОВА

‎ ‎________________________________________________________________ ‎ ‎ ‎ ‎ ‎ ‎ ‎ ‎‎(экологик сертификатлаштириш органи номи) ‎ ‎ ‎ ‎ ‎ ‎ ‎ _________________________________________________________________ ‎ ‎ ‎ ‎ ‎ ‎ ‎ ‎‎(почта манзили) ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎‎Экологик сертификатлашни ўтказиш бўйича ‎БУЮРТМА ‎ ‎‎_____________________________________________________________________________________________________ ‎‎буюртмачининг номланиши (тайёрловчи, етказиб берувчи ташкилот ёки якка тартибдаги тадбиркор Ф.И.О.) _____________________________________________________________________________________________________ ‎‎(буюртмачининг почта манзили, алоқа телефонлари) _____________________________________________________________________________________________________ ________________________________________________________________________________________ томонидан ‎‎(раҳбарнинг Ф.И.О.) _____________________________________________________________________________________________________‎‎ _____________________________________________________________________________________________________ ‎‎(маҳсулотларнинг номланиши, ТИФ ТН коди, ишлаб чиқариш серияси) _____________________________________________________________________________________________________ транзит сони (партияси)‎‎ ‎‎норматив ҳужжат асосида ________________________________________________________________________ ‎ ‎ ‎ ‎ ‎ ‎ ‎‎(норматив ҳужжатнинг номланиши) ‎‎_____________________________________________________ талабларига мос келади ‎‎(норматив ҳужжатнинг рақамлари ва номи) ‎ ‎ ‎ ‎ ‎ ‎ ‎‎ва чиқиндиларни ёки маҳсулотларни __ -сон чизмада кўрсатилган ҳужжатлар ‎ ‎ ‎ ‎ (экологик сертификатлаш чизмасининг сони) ‎ ‎ ‎ ‎ ‎ ‎ ‎ ‎‎қўшимча маълумотлар _____________________________________________________ ‎ ‎ ‎ ‎ ‎ ‎ ‎‎(хатлов, экологик норматив ҳужжатлар ва бошқалар тўғрисида маълумотлар _____________________________________________________________________________________________________ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎‎Ариза берувчи ‎‎______________________ ‎ ‎‎__________________ ‎ ‎ ‎ ‎ ‎ ‎ ‎ ‎ ‎ ‎ ‎‎‎‎‎(имзо) ‎ ‎ ‎ ‎ ‎ (Ф.И.О.) ‎ ‎ ‎ ‎‎М.Ў. ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎‎20 йил «___» _______ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎

Хавфли маҳсулотлар ва чиқиндиларни мажбурий экологик сертификатлаштириш тартиби тўғрисидаги низомга 3-ИЛОВА

‎‎ OʻZBEKISTON RESPUBLIKASI EKOLOGIYA, ATROF-MUHITNI MUHOFAZA QILISH VA IQLIM OʻZGARISHI VAZIRLIGI EKOLOGIK SERTIFIKATLASHTIRISH TIZIMI ‎‎‎МИНИСТЕРСТВО ЭКОЛОГИИ, ОХРАНЫ ОКРУЖАЮЩЕЙ СРЕДЫ И ИЗМЕНЕНИЯ КЛИМАТА СИСТЕМА ЭКОЛОГИЧЕСКОЙ СЕРТИФИКАЦИИ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ blanka raqami № __________‎‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎‎номер бланка № __________ _____________________________________________________________________________________________________ ‎‎(ekologik sertifikatlashtirish organing nomi va pochta manzili — наименование и почтовый адрес органа по экологической сертификации) ‎‎ ‎‎ ‎‎Reestirda qayd etilgan № ____________________ ‎Зарегистрировано в реестре ‎_______ -son bilan 20__ yil “__” __da qayd qilindi ‎Регистрационный № ________ от «___» ______ 20__ г. ‎Amal qilish muddati “___” ________ 20___ gacha ‎Действителен до «___» ______________ 20__ г. ‎‎Ushbu sertifikat ekologik sertifikatlashtirilgan obʼyekt:_______________________________ ‎Настоящий сертификат удостоверяет, что должным образом идентифицированный объект экологической сертификации:________________________________________________ ‎‎ning lozim ravishdagi identifikatsiyasiga javob berishi va normativ-uslubiy jihatlari: _________ ‎________________________________________________________________________ ‎‎(normativ hujjatlar nomi — наименование нормативного документа) ‎‎и его нормативно-методическая база соответствует требованием следующих нормативных и правовых актов ‎‎Sertifikat egasi haqida maʼlumot:________________________________________________ ‎ ‎ ‎ ‎ ‎ ‎ ‎ ‎‎(nomi va pochta manzili — наименование и почтовый адрес) ‎‎Сведения о держателе сертификата:____________________________________________ ‎‎Telefon: _________________________ Faks:____________________________________ ‎‎Телефон: ________________________ Факс: ___________________________________ ‎‎‎Mahsulot yoki xizmatning ekologik sertifikatlashtirishda qoʻllanilgan talablar: ______________ ‎________________________________________________________________________ ‎‎(mahsulot va xizmatga doir tekshiruv, kuzatuv yoki normativ hujjatlar tahlili — экспертиза нормативных документов или испытания продукции) ‎‎_______________________________________________________________ ‎‎Данные о проведении экологической сертификации по требуемым критериям: ‎‎ ‎Izoh: Ekologik sertifikat berilganlik shartlariga amal qilinmagan taqdirda ecologik sertifikatlashtirish organi tomonidan bekor qilinishi mumkin. ‎‎ ‎Примечание: Орган по экологической сертификации, выдавший сертификат, вправе аннулировать сертификат, если получатель данного сертификата не выполняет требования на соответствие которым он выдан. ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ Sertifikatlashtirish оrgan rahbari Руководитель орган сертифкации ‎‎ ‎‎ _____________ ‎ ‎ ‎‎__________________ ‎ ‎ ‎ ‎ ‎ ‎ ‎ ‎ Imzo/подпись ‎ ‎ ‎‎(F.I.О)/ (Ф.И.О) ‎‎Ekspert/ Эксперт ‎‎ _____________ ‎ ‎ __________________‎‎ ‎ ‎ ‎ ‎ ‎ ‎ ‎ ‎ ‎‎Imzo/подпись ‎ ‎ ‎‎‎‎(F.I.О)/ (Ф.И.О) ‎‎M.Oʻ/М.П‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎

Вазирлар Маҳкамасининг 2021 йил 16 февралдаги 75-сон қарорига 2-ИЛОВА

Ўзбекистон Республикаси Ҳукуматининг ўз кучини йўқотган деб эътироф этилаётган баъзи қарорлари

1. Вазирлар Маҳкамасининг «Экологик хавфли маҳсулотлар ва чиқиндиларни Ўзбекистон Республикасига олиб киришни ва уларни унинг ҳудудидан олиб чиқишни тартибга солиш тўғрисида» 2000 йил 19 апрелдаги 151-сон қарори (Ўзбекистон Республикаси ҚТ, 2000 й., 4-сон, 21-модда).

2. Вазирлар Маҳкамасининг «Ўзбекистон Республикаси ҳудуди орқали махсус юклар ва ҳарбий таркибларнинг транзитини давлат томонидан тартибга солиш ва назорат қилиш тўғрисида» 2002 йил 21 февралдаги 62-сон қарорига 4-илованинг 2-банди (Ўзбекистон Республикаси ҚТ, 2002 й., 2-сон, 10-модда).

3. Вазирлар Маҳкамасининг «Ўзбекистон Республикаси ҳукуматининг айрим қарорларига ўзгартириш ва қўшимчалар киритиш тўғрисида» 2003 йил 13 январдаги 14-сон қарорига илованинг 17-банди (Ўзбекистон Республикаси ҚТ, 2003 й., 1-сон, 5-модда).

4. Вазирлар Маҳкамасининг «Ўзбекистон Республикаси ҳукуматининг айрим қарорларига ўзгартиришлар киритиш тўғрисида» 2017 йил 14 ноябрдаги 915-сон қарорига 1-илованинг 7-банди (Ўзбекистон Республикаси ҚТ, 2017 й., 11-сон, 261-модда).

5. Вазирлар Маҳкамасининг «Ўзбекистон Республикаси ҳукуматининг айрим қарорларига ўзгартириш ва қўшимчалар киритиш тўғрисида» 2019 йил 18 сентябрдаги 787-сон қарорига илованинг 1-банди (Ўзбекистон Республикаси ҚХ, 2019 й., 19 сентябрь, 3770-модда).

Ўзбекистон Республикасининг Бош вазири А. АРИПОВ

Тошкент ш.,

2021 йил 16 февраль,

75-сон

(Қонун ҳужжатлари маълумотлари миллий базаси, 17.02.2021 й., 09/21/75/0121-сон, Қонунчилик маълумотлари миллий базаси, 05.04.2022 й., 09/22/153/0266-сон; 10.01.2025 й., 09/25/916/0017-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

SXEMASI

roʻyxati

Xavfli mahsulotlar va chiqindilarni Oʻzbekiston Respublikasi hududiga olib kirish va respublika hududidan olib chiqish tartibini yanada takomillashtirish chora-tadbirlari toʻgʻrisida

Xavfli chiqindilarni chegaralararo tashish va yoʻq qilib tashlash ustidan nazorat qilish toʻgʻrisidagi Bazel konvensiyasiga (1989-yil 22-mart, Bazel) (keyingi oʻrinlarda — Bazel konvensiyasi) hamda Oʻzbekiston Respublikasining “Chiqindilar toʻgʻrisida”gi Qonuniga muvofiq ekologik sertifikatlanishi lozim boʻlgan xavfli mahsulotlar va oldi-sotdi, import-eksport operatsiyasi obyekti boʻlgan chiqindilar, shuningdek, tashilishi kerak boʻlgan xavfli chiqindilar bilan bogʻliq ishlarni davlat tomonidan tartibga solish tizimini yanada takomillashtirish maqsadida Vazirlar Mahkamasi qaror qiladi:

1. Xavfli mahsulotlar va chiqindilarni majburiy ekologik sertifikatlashtirish tartibi toʻgʻrisidagi nizom 1-ilovaga muvofiq tasdiqlansin

2. Oʻzbekiston Respublikasi Ekologiya va atrof-muhitni muhofaza qilish davlat qoʻmitasi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

3. Oʻzbekiston Respublikasi Hukumatining 2-ilovaga muvofiq baʼzi qarorlari oʻz kuchini yoʻqotgan deb hisoblansin.

4. Mazkur qaror 2021-yil 1-maydan boshlab kuchga kiradi.

5. Ushbu qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari A.J. Ramatov va Oʻzbekiston Respublikasi Ekologiya va atrof-muhitni muhofaza qilish davlat qoʻmitasi raisi A.I. Maksudov zimmasiga yuklansin.

Vazirlar Mahkamasining 2021-yil 16-fevraldagi 75-son qaroriga 1-ILOVA

Xavfli mahsulotlar va chiqindilarni majburiy ekologik sertifikatlashtirish tartibi toʻgʻrisida

1-bob. Umumiy qoidalar

1. Ushbu Nizom xavfli mahsulotlar hamda oldi-sotdi, import-eksport operatsiyasi obyekti boʻlgan chiqindilar, shuningdek, tashilishi kerak boʻlgan xavfli chiqindilarni (keyingi oʻrinlarda — xavfli mahsulotlar va chiqindilar) majburiy ekologik sertifikatlashtirish tartibini belgilaydi.

2. Ushbu Nizom qoidalari alohida belgilangan tartibda respublika hududidan tranzit oʻtadigan maxsus yuklarga nisbatan tatbiq etilmaydi.

3. Xavfli mahsulotlar va chiqindilarning oldi-sotdi, import-eksport operatsiyalari, shuningdek, tashilishi Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi (keyingi oʻrinlarda — Ekologiya vazirligi) tizimidagi belgilangan tartibda akkreditatsiyadan oʻtgan ekologik sertifikatlashtirish organi (keyingi oʻrinlarda — ekologik sertifikatlashtirish organi) tomonidan beriladigan ekologik sertifikat asosida amalga oshiriladi.

4. Ekologik sertifikat xavfli mahsulotlar va chiqindilarning normativ-huquqiy va texnik jihatdan tartibga soluvchi normativ hujjatlarda belgilangan ekologik xavfsizlik talablariga javob berishini tasdiqlaydigan Milliy sertifikatlashtirish tizimi qoidalariga muvofiq beriladigan hujjat hisoblanadi.

5. “Xavfli chiqindilarni chegaralararo tashish va yoʻq qilib tashlash ustidan nazorat qilish toʻgʻrisida”gi 1989-yil 22-martdagi Bazel Konvensiyasi (keyingi oʻrinlarda Bazel konvensiyasi deb ataladi) ishtirokchisi boʻlmagan davlatlar Oʻzbekiston Respublikasi Vazirlar Mahkamasi tomonidan roʻyxati tasdiqlangan ekologik xavfli mahsulotlar va chiqindilar turlarini Oʻzbekiston Respublikasi hududiga olib kirishlari va respublika hududidan olib chiqishlari qatʼiyan taqiqlanadi. Oʻzbekiston Respublikasi bilan Bazel konvensiyasi ishtirokchisi boʻlmagan davlat oʻrtasida chiqindilarni tranzit tarzida olib oʻtishga doir xalqaro shartnoma mavjud boʻlgan hollarda, bunday olib oʻtish ushbu xalqaro shartnoma qoidalari, shuningdek, ustuvor ravishda, Bazel konvensiyasida belgilangan umumiy talablar asosida amalga oshiriladi.

Ekologiya vazirligi tomonidan Bazel konvensiyasining talablariga muvofiq import-eksport qilingan hamda ekologik sertifikatlashtirilgan xavfli mahsulotlar va chiqindilarga doir hisobot tayyorlanib, belgilangan muddatlarda har yili Bazel konvensiyasining Kotibiyatiga taqdim etib boriladi.

Ushbu hisobot:

import-eksport qilingan xavfli mahsulotlar va chiqindilar miqdori haqidagi maʼlumotlar;

Oʻzbekiston Respublikasi Prezidenti huzuridagi Statistika agentligidan olinadigan — mahalliy ishlab chiqaruvchi va xizmat koʻrsatuvchi tashkilotlardan Oʻzbekiston Respublikasi hududida yillik hosil boʻladigan xavfli mahsulotlar va chiqindilar miqdori haqidagi maʼlumotlar;

Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining elektron axborot almashinuv tizimidan olinadigan — xavfli mahsulotlar va chiqindilarning import-eksporti haqidagi maʼlumotlar asosida tayyorlanadi.

6. Xavfli mahsulotlar va chiqindilar ushbu Nizomga 1-ilovada keltirilgan sxemaga muvofiq ekologik sertifikatlashtiriladi.

7. Sertifikatlashtirilgan import-eksport qilinadigan xavfli mahsulotlar va chiqindilarga bojxona yuk deklaratsiyasini rasmiylashtirish vaqtida ekologik sertifikat roʻyxat raqami va berilgan sanasi koʻrsatiladi.

8. Xavfli mahsulotlar va chiqindilarda ularning ekologik sertifikatlashtirilganligiga oid maʼlumotlar mavjud boʻlmaganda, bunday chiqindilarni oldi-sotdi va import-eksport qilish ishlari, shuningdek, tashish kerak boʻlganda ular ushbu Nizomda koʻrsatilgan tartibda ekologik sertifikatlashtiriladi.

9. Ekologik sertifikatlashtirish ishlari ariza beruvchi bilan tuzilgan shartnomaga muvofiq amalga oshiriladi.

2-bob. Ekologik sertifikatlashtirish tartibi

10. Import-eksport qilinadigan xavfli mahsulotlar va chiqindilarni ekologik sertifikatlashtirish uchun ariza beruvchi “Yagona darcha” bojxona axborot tizimi orqali, mamlakat hududida oldi-sotdi qilinadigan, shuningdek, tashilishi kerak boʻlgan chiqindilarni ekologik sertifikatlashtirish uchun esa, toʻgʻridan-toʻgʻri ekologik sertifikatlashtirish organiga ariza bilan murojaat qiladi. Bunda arizaga quyidagilar ilova qilinadi:

a) xavfli mahsulotlar va chiqindilarni import-eksport qilishga ekologik sertifikat olish uchun:

Vazirlar Mahkamasi tomonidan tasdiqlangan Import-eksport qilinishi davlat tomonidan tartibga solinadigan va majburiy ekologik sertifikatlashtirish lozim boʻlgan xavfli mahsulotlar va chiqindilar roʻyxatiga asosan ushbu Nizomga 2-ilovaga muvofiq shaklda buyurtma;

xavfli mahsulotlar va chiqindilarni import qilish uchun — Oʻzbekiston Respublikasi bojxona hududiga kirganligi toʻgʻrisida belgi qoʻyilgan yuk tashish hujjatlarining nusxasi (invoys/hisob-faktura, yuk xati) yoki eksport qilish uchun — invoys/hisob-faktura;

import qilinayotgan chiqindilarga — ularning mustaqil ravishda toʻliq utilizatsiya qiladigan, qayta ishlaydigan yoki ulardan takroriy foydalanadigan tashkilotlarga ushbu jarayonlarning atrof-muhitga taʼsir koʻrsatilishi toʻgʻrisidagi bayonot loyihasi boʻyicha davlat ekologik ekspertizasining ijobiy xulosasi nusxasi;

chiqindilarni utilizatsiya qilish va (yoki) qayta ishlash bilan shugʻullanuvchi yuridik shaxslar bilan mazkur chiqindilarni topshirish (berish) yoki realizatsiya qilish yuzasidan tuzilgan shartnoma nusxasi (mustaqil ravishda toʻliq utilizatsiya qilinishi, qayta ishlanishi yoki takroriy foydalanilishi taʼminlanadigan chiqindilar bundan mustasno);

import qilinayotgan xavfli mahsulotlar va chiqindilarning aniq hajmi (soni) koʻrsatilgan tashqi savdo shartnomasi (kontrakti) va mahsulotlarni yetkazib beruvchi hamda qabul qiluvchi oʻrtasida tuzilgan kelishuv(lar) nusxasi (ekologik sertifikatlashtirish bir kalendar yilga amalga oshirilganda);

b) mamlakat hududida oldi-sotdi qilinadigan chiqindilarga ekologik sertifikat olish uchun:

chiqindi pasporti;

chiqindilarning aniq hajmi (soni) koʻrsatilgan, mazkur chiqindilarni oldi-sotdi qilish yuzasidan yuridik shaxslar bilan tuzilgan shartnoma nusxasi;

v) mamlakat hududida tashilishi kerak boʻlgan xavfli chiqindilarga ekologik sertifikat olish uchun:

chiqindi pasporti;

chiqindilarning aniq hajmi (soni) koʻrsatilgan, mazkur chiqindilarni tashish yuzasidan yetkazib beruvchi hamda qabul qiluvchi oʻrtasida tuzilgan shartnoma(lar) nusxasi.

11. Ariza beruvchi ushbu Nizomning 10-bandiga muvofiq ekologik sertifikat olish maqsadida arizani koʻrib chiqish uchun ekologik sertifikatlash organiga taqdim etgan hujjatlar va maʼlumotlarning ishonchliligi va haqqoniyligi uchun javobgar hisoblanadi.

Ekologik sertifikat olish uchun ekologik sertifikatlash organi ushbu Nizomning 10-bandida koʻrsatilganidan boshqa maʼlumotlar va hujjatlarni talab qilishga haqli emas.

12. Ekologik sertifikatlashtirish organi bir ish kuni mobaynida taqdim etilgan hujjatlarni tahlil qiladi hamda hujjatlar toʻliq boʻlganda va kamchiliklar aniqlanmagan taqdirda, xavfli mahsulotlar va chiqindilarni sertifikatlashtirish toʻgʻrisida qaror qabul qiladi. Agar hujjatlar ushbu Nizomning 10-bandi talablariga javob bermasa va (yoki) ularda kamchiliklar aniqlangan taqdirda, tegishli kamchiliklarni koʻrsatgan holda arizani qaytaradi va bu haqda ariza beruvchini xabardor qiladi.

13. Ariza beruvchi tomonidan shartnoma imzolanib, shartnomada belgilangan toʻlov amalga oshirilganidan soʻng ekologik sertifikatlashtirish organi bir ish kuni mobaynida ekologik sertifikatlashtirish dasturini ishlab chiqadi va tasdiqlaydi.

15. Ekologik sertifikatlashtirish organi tomonidan tasdiqlangan dastur asosida ikki ish kuni mobaynida sinov laboratoriyasi bilan birgalikda tegishli xavfli mahsulotlar va chiqindilar Sertifikatlashtirish milliy tizimi qoidalariga muvofiq identifikatsiyadan oʻtkaziladi, identifikatsiyadan oʻtkazish dalolatnomasi tuziladi hamda ularning atrof-muhitga taʼsirini oʻrganish uchun tegishli normativ-huquqiy va texnik jihatdan tartibga solish sohasidagi normativ hujjatlarga muvofiq namunalar olinib, laboratoriya sinovlari oʻtkaziladi va sinov bayonnomalari rasmiylashtiriladi.

16. Namunalar soni, tanlash tartibi, ularni identifikatsiyalash va saqlash qoidalari ekologik sertifikatlashtirish organi va sinov laboratoriyasining sifat menejment tizimi hujjatlari, ekologik sertifikatlashtiriladigan xavfli mahsulotlar va chiqindilarga normativ hujjatlarda, shu jumladan, sinov usullarida belgilanadi.

17. Muayyan turdagi xavfli mahsulotlar va chiqindilarga sinov bayonnomalarini rasmiylashtirish va berish muddati texnik jihatdan tartibga solish sohasidagi normativ hujjatlar bilan belgilanadigan usullarga muvofiq amalga oshiriladigan ushbu turdagi mahsulotlar va chiqindilarni sinovdan oʻtkazishning umumiy davomiyligidan kelib chiqib belgilanadi.

Namuna olish imkoni boʻlmagan kam miqdorni tashkil etgan, normativ hujjati, shuningdek, sinovlarni amalga oshirish uchun akkreditatsiyadan oʻtgan sinov laboratoriyasi mavjud boʻlmagan taqdirda xavfli mahsulotlar va chiqindilarni ekologik sertifikatlash identifikatsiyalash yoʻli bilan amalga oshiriladi.

18. Sinovlarining sifati va natijalarning ishonchliligi, shuningdek, sinovlar bayonnomalari saqlanishi uchun sinovlarni oʻtkazgan laboratoriya javobgar hisoblanadi. Sinov bayonnomalari laboratoriyaning texnik eksperti tomonidan imzolanadi va akkreditatsiyadan oʻtgan sinov laboratoriyasi rahbari tomonidan tasdiqlanadi.

19. Akkreditatsiyadan oʻtgan sinov laboratoriyasi sinov bayonnomalarini ariza beruvchiga va/yoki ekologik sertifikatlash organiga taqdim etadi. Agar xavfli mahsulotlar va chiqindilar sinovlari boshqa akkreditatsiyadan oʻtgan sinov laboratoriyalarida alohida parametrlar boʻyicha oʻtkazilgan boʻlsa, bayonnomalar bilan tasdiqlangan sinovlarning ijobiy natijalari mavjudligi xavfli mahsulot va chiqindilarning muvofiqligi ijobiy baholanishi deb hisoblanadi.

20. Akkreditatsiyadan oʻtgan sinov laboratoriyalarida oʻtkazilgan laboratoriya sinovlarining ijobiy natijasi olinganda, ekologik sertifikatlash organi hujjatlarni texnik ekspertga baholash uchun yuboradi.

Texnik ekspertning ijobiy qarori qabul qilinganda ekologik sertifikatlash organi bir ish kuni mobaynida ekologik sertifikatni rasmiylashtiradi va davlat reyestridan roʻyxatdan oʻtkazadi.

21. Ekologik sertifikat belgilangan namunadagi shaklda davlat yoki rus tilida rasmiylashtiriladi hamda blankada (bosma ish qogʻozi) yoki QR-kod (matrik shtrixli kod) bilan himoyalangan elektron shaklda ariza beruvchiga toʻlov amalga oshirilgan kundan boshlab toʻrt ish kuni davomida taqdim etiladi.

22. Ariza beruvchi import-eksport qilinadigan xavfli mahsulotlar va chiqindilarga ekologik sertifikatni “Yagona darcha” bojxona axborot tizimi orqali, mamlakat hududida oldi-sotdi qilinadigan, shuningdek, tashilishi kerak boʻlgan chiqindilarga ekologik sertifikatni esa, oʻz xohishiga koʻra shaxsan yoki ishonchli vakili orqali ekologik sertifikatlashtirish organidan olishi mumkin.

23. Ekologik sertifikat ariza beruvchiga “Yagona darcha” bojxona axborot tizimi orqali elektron shaklda ekologik sertifikatlash organining elektron imzosi bilan berilganda yoki qogʻoz shaklida ekologik sertifikatlash organining muhri va imzosining asli boʻlganda hamda davlat reyestrida qayd etilganligini tasdiqlovchi sana va raqam koʻrsatilganda haqiqiy hisoblanadi.

24. Ekologik sertifikat blanki raqamlangan, himoya qilish darajasiga ega, qatiy hisobda turadigan va javobgarligi belgilangan hujjat hisoblanadi.

Ekologik sertifikat blankasi ushbu Nizomga 3-ilovaga muvofiq shaklda “Davlat belgisi” davlat-ishlab chiqarish birlashmasi tomonidan tayyorlanadi.

25. Ekologik sertifikat:

a) import qilishda:

xavfli mahsulotlar va chiqindilarga (transport vositalaridan tashqari) aniq hajmi (soni) koʻrsatilgan bitta tashqi savdo shartnomasi (kontrakti) va yetkazib beruvchi hamda qabul qiluvchi oʻrtasida tuzilgan kelishuv(lar) nusxasiga asosan — bir kalendar yildan oshmagan muddatga, bunda bir kalendar yil davomida import qilinayotgan xavfli mahsulotlar va chiqindilarning har bir toʻpi (partiyasi) Sertifikatlashtirish milliy tizimi qoidalariga muvofiq identifikatsiya qilinadi hamda ularning atrof-muhitga taʼsirini oʻrganish uchun tegishli texnik jihatdan tartibga solish sohasidagi normativ hujjatlarga muvofiq laboratoriya sinovlari oʻtkaziladi va sinov bayonnomalari rasmiylashtiriladi;

invoys/hisob-faktura, yuk xatiga asosan xavfli mahsulotlar va chiqindilarning har toʻpiga — bojxona yuk deklaratsiyasini rasmiylashtirish muddatiga;

b) mamlakat hududida ishlab chiqarish va xizmat koʻrsatish jarayonida hosil boʻladigan oldi-sotdi obyekti boʻlgan xavfli mahsulotlar va chiqindilarning har toʻpiga — bir yildan oshmagan muddatga beriladi.

26. Ekologik sertifikatlash organi faoliyatiga taalluqli sertifikat nusxasi va sertifikatlashtirish ishlarini olib borishda zarur boʻlgan hujjatlar toʻplami (namuna olish dalolatnomalari, identifikatsiya dalolatnomalari, sinov bayonnomalari) ekologik sertifikat amal qilish muddatida, lekin bir yildan kam boʻlmagan muddatda saqlanadi. Saqlash muddati tugagan hujjatlar arxivga topshiriladi yoki qonunchilik hujjatlarida belgilangan tartibda yoʻq qilinadi.

3-bob. Ekologik sertifikatning amal qilish muddatini toʻxtatish, bekor qilish, qayta rasmiylashtirish

27. Ekologik sertifikatning amal qilishi:

ariza beruvchi ekologik sertifikatning amal qilishini toʻxtatish toʻgʻrisida belgilangan tartibda ekologik sertifikatlash organiga ariza bilan murojaat qilganda — murojaat qilgan kundan boshlab;

ariza beruvchi (yuridik shaxs)ning faoliyati tugatilgan yoki toʻxtatilganda — ushbu kundan boshlab;

ariza beruvchi qayta tashkil etilganda — qayta tashkil etilgan kundan boshlab;

ariza beruvchiga bir kalendar yilga berilgan ekologik sertifikatning talablari bir yil mobaynida muntazam ravishda (ikki yoki undan ortiq) buzilishi, agar ushbu qoidabuzarliklar fuqarolarning hayoti va sogʻligʻiga, jamoat xavfsizligiga va atrof-muhitga zarar yetkazilishiga olib kelsa oʻn ish kuniga toʻxtatiladi.

28. Ekologik sertifikatlash organining ekologik sertifikat amal qilishini toʻxtatish toʻgʻrisidagi qarori ariza beruvchiga qaror qabul qilingan kundan boshlab uch ish kuni mobaynida ekologik sertifikat amal qilishini toʻxtatishning sabablari koʻrsatilgan holda yozma yoki elektron shaklda yetkaziladi, bunda ekologik sertifikatning amal qilishini toʻxtatish sabablari va qonunchilik hujjatlarining aniq normalari koʻrsatiladi.

Ariza beruvchi tomonidan ekologik sertifikatning amal qilishini toʻxtatishga sabab boʻlgan holatlar bartaraf etilgan taqdirda, koʻrsatib oʻtilgan holatlar bartaraf etilganligi toʻgʻrisida tasdiqnoma olingan kundan boshlab oʻn ish kuni mobaynida ekologik sertifikatning amal qilishini tiklash toʻgʻrisida qaror qabul qilinadi.

29. Ariza beruvchi tomonidan ekologik sertifikatning amal qilishini toʻxtatish sabablari oʻn ish kuni mobaynida bartaraf etilmagan, shuningdek, mazkur Nizomning 25-bandi “a” kichik bandining ikkinchi xatboshisida belgilangan talab buzilgan taqdirda, ekologik sertifikat bekor qilinadi.

30. Qogʻoz shaklida berilgan ekologik sertifikat bekor qilingan taqdirda, sertifikatning asl nusxasi ariza beruvchi tomonidan ekologik sertifikatning amal qilishini bekor qilish toʻgʻrisidagi qaror olingan kundan boshlab oʻn ish kuni mobaynida ekologik sertifikatlashtirish organiga qaytarilishi kerak.

Agar elektron shaklda berilgan ekologik sertifikat bekor qilingan taqdirda, ekologik sertifikatlashtirish organi bir ish kuni mobaynida ariza beruvchini bu haqda xabardor qiladi.

Bekor qilingan ekologik sertifikatlar ekologik sertifikatlashtirish organi tomonidan yoʻq qilinadi va bu haqda tegishli dalolatnoma tuziladi. Bekor qilingan ekologik sertifikatlar toʻgʻrisidagi maʼlumotlar ekologik sertifikatlashtirish organining veb-saytida barcha ommaviy tanishish uchun eʼlon qilinishi kerak.

31. Ariza beruvchi ekologik sertifikatlash organining qaroridan norozi boʻlgan taqdirda, sudga murojaat qilish huquqiga ega. ekologik sertifikatlash organining qarori ustidan sudga qonunchilik hujjatlarida belgilangan tartibda shikoyat qilinishi mumkin.

32. Ariza beruvchi (yuridik shaxs) qayta tashkil etilganda, uning nomi, yuridik manzili yoki joylashgan joyi (pochta manzili) oʻzgarganda oʻn ish kuni mobaynida mazkur oʻzgartishlar haqida amaldagi ekologik sertifikatning asl nusxasini ilova qilib, uni qayta rasmiylashtirish uchun ekologik sertifikatlash organiga yozma ravishda murojaat qilishi lozim.

Agar ariza beruvchi ilgari berilgan ekologik sertifikatning huquqiy vorisi boʻlmasa, hujjatlarni koʻrib chiqish bilan bogʻliq keyingi tartib-taomillar ushbu Nizomda nazarda tutilgan talablar asosida amalga oshiriladi.

Ariza beruvchining nomi yoki joylashgan joyi (pochta manzili) oʻzgarganda uning nomiga ekologik sertifikatlash organi tomonidan bir ish kuni mobaynida amaldagi ekologik sertifikat muddatiga ekologik sertifikat rasmiylashtiriladi.

4-bob. Ekologik sertifikatlar reyestrini yuritish tartibi

33. Ekologik sertifikatlash organi berilgan ekologik sertifikatlar reyestrini yuritadi va ularni oʻz veb-saytida joylashtiradi.

34. Berilgan ekologik sertifikatlar reyestrida:

ariza beruvchining nomi, uning manzili, soliq toʻlovchining identifikatsiya raqami;

ekologik sertifikat berilgan sana, amal qilish davri va uning roʻyxatdan oʻtgan raqami;

bekor qilingan va toʻxtatib qoʻyilgan ekologik sertifikatlarning raqami, ariza beruvchining nomi, yuridik manzili, asoslari va sanalari koʻrsatilishi lozim.

35. Ekologik sertifikatlar reyestridagi maʼlumotlar hamma tanishishi uchun ochiq hisoblanadi.

35 1 . Import-eksport qilinadigan xavfli mahsulotlar va chiqindilar nazoratini taʼminlash uchun Ekologiya vazirligi hamda Bojxona qoʻmitasi oʻrtasida axborot almashiladi.

5-bob. Yakunlovchi qoidalar

36. Ushbu Nizomni qoʻllashda yuzaga keladigan nizolar qonunchilik hujjatlarida belgilangan tartibda hal etiladi.

37. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Xavfli mahsulotlar va chiqindilarni majburiy ekologik sertifikatlashtirish tartibi toʻgʻrisidagi nizomga 1-ILOVA

Xavfli mahsulotlar va chiqindilarga ekologik sertifikat berish

Bosqichlar Subyektlar Chora-tadbirlar Bajarish muddatlari 1-bosqich Ariza beruvchi (yuridik shaxs) Tegishli hujjatlarni ilova qilgan holda, ekologik sertifikatlashtirish organiga: import-eksport qilinadigan xavfli mahsulotlar va chiqindilarni ekologik sertifikatlashtirish uchun — “Yagona darcha” bojxona axborot tizimi orqali; mamlakat hududida oldi-sotdi qilinadigan, shuningdek, tashilishi kerak boʻlgan chiqindilarni ekologik sertifikatlashtirish uchun — bevosita rasmiy xat orqali ariza taqdim etadi. Xohishiga koʻra 2-bosqich Ekologik sertifikatlashtirish organi 1. Ariza va taqdim etilgan hujjatlarni koʻrib chiqadi hamda koʻrib chiqish natijalari boʻyicha: hujjatlar toʻliq boʻlganda va kamchiliklar aniqlanmaganda — xavfli mahsulotlar va chiqindilarni sertifikatlashtirish toʻgʻrisida qaror qabul qiladi; hujjatlar toʻliq boʻlmaganda yoki kamchiliklar aniqlanganda — tegishli kamchiliklarni koʻrsatgan holda arizani qaytaradi va bu haqda ariza beruvchini xabardor qiladi. 2. Sertifikatlashtirish toʻgʻrisida qaror qabul qilinganda ekologik sertifikatlashtirish ishlariga shartnoma loyihasini ishlab chiqadi va ariza beruvchiga imzolash uchun taqdim etadi. Bir ish kuni da 3-bosqich Ariza beruvchi Shartnomada belgilangan toʻlovni amalga oshiradi. Shartnomada belgilangan muddatda 4-bosqich Ekologik sertifikatlashtirish organi 1. Ekologik sertifikatlashtirish dasturini ishlab chiqadi va tasdiqlaydi. 1. Ariza beruvchi tomonidan toʻlov amalga oshirilganidan soʻng bir ish kuni da 2. Tasdiqlangan dastur asosida akkreditatsiyadan oʻtgan sinov laboratoriyasi bilan birgalikda: xavfli mahsulotlar va chiqindilarni identifikatsiyadan oʻtkazadi, namunalar oladi va laboratoriyaga taqdim qiladi; namunalarni sinovdan oʻtkazadi va sinov bayonnomasini rasmiylashtiradi; yakuniy hujjatlarni baholash uchun texnik ekspertga taqdim qiladi. 2. Ikki ish kunida 5-bosqich Texnik ekspert 1. Texnik ekspert hujjatlar toʻplamini oʻrganib chiqib, ekologik sertifikat berish yoki berishni rad etish toʻgʻrisida qaror qabul qiladi. Bir ish kunida Ekologik sertifikatlashtirish organi 2. Texnik ekspertning ijobiy qarori asosida ekologik sertifikat rasmiylashtiradi va reyestrda roʻyxatdan oʻtkazadi. 3. Ariza beruvchiga: import va eksport qilinadigan xavfli mahsulotlar va chiqindilar uchun ekologik sertifikatni “Yagona darcha” bojxona axborot xizmati tizimi orqali; mamlakat hududida oldi-sotdi qilinadigan, shuningdek, tashilishi kerak boʻlgan chiqindilar uchun ekologik sertifikat ni bevosita yoki uning ishonchli vakiliga taqdim etadi.

Xavfli mahsulotlar va chiqindilarni majburiy ekologik sertifikatlashtirish tartibi toʻgʻrisidagi nizomga 2-ILOVA

‎ ‎________________________________________________________________ ‎ ‎ ‎ ‎ ‎ ‎ ‎ ‎‎(ekologik sertifikatlashtirish organi nomi) ‎ ‎ ‎ ‎ ‎ ‎ ‎ _________________________________________________________________ ‎ ‎ ‎ ‎ ‎ ‎ ‎ ‎‎(pochta manzili) ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎‎Ekologik sertifikatlashni oʻtkazish boʻyicha ‎BUYURTMA ‎ ‎‎_____________________________________________________________________________________________________ ‎‎buyurtmachining nomlanishi (tayyorlovchi, yetkazib beruvchi tashkilot yoki yakka tartibdagi tadbirkor F.I.O.) _____________________________________________________________________________________________________ ‎‎(buyurtmachining pochta manzili, aloqa telefonlari) _____________________________________________________________________________________________________ ________________________________________________________________________________________ tomonidan ‎‎(rahbarning F.I.O.) _____________________________________________________________________________________________________‎‎ _____________________________________________________________________________________________________ ‎‎(mahsulotlarning nomlanishi, TIF TN kodi, ishlab chiqarish seriyasi) _____________________________________________________________________________________________________ tranzit soni (partiyasi)‎‎ ‎‎normativ hujjat asosida ________________________________________________________________________ ‎ ‎ ‎ ‎ ‎ ‎ ‎‎(normativ hujjatning nomlanishi) ‎‎_____________________________________________________ talablariga mos keladi ‎‎(normativ hujjatning raqamlari va nomi) ‎ ‎ ‎ ‎ ‎ ‎ ‎‎va chiqindilarni yoki mahsulotlarni __ -son chizmada koʻrsatilgan hujjatlar ‎ ‎ ‎ ‎ (ekologik sertifikatlash chizmasining soni) ‎ ‎ ‎ ‎ ‎ ‎ ‎ ‎‎qoʻshimcha maʼlumotlar _____________________________________________________ ‎ ‎ ‎ ‎ ‎ ‎ ‎‎(xatlov, ekologik normativ hujjatlar va boshqalar toʻgʻrisida maʼlumotlar _____________________________________________________________________________________________________ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎‎Ariza beruvchi ‎‎______________________ ‎ ‎‎__________________ ‎ ‎ ‎ ‎ ‎ ‎ ‎ ‎ ‎ ‎ ‎‎‎‎‎(imzo) ‎ ‎ ‎ ‎ ‎ (F.I.O.) ‎ ‎ ‎ ‎‎M.Oʻ. ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎‎20 yil “___” _______ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎

Xavfli mahsulotlar va chiqindilarni majburiy ekologik sertifikatlashtirish tartibi toʻgʻrisidagi nizomga 3-ILOVA

‎‎ OʻZBEKISTON RESPUBLIKASI EKOLOGIYA, ATROF-MUHITNI MUHOFAZA QILISH VA IQLIM OʻZGARISHI VAZIRLIGI EKOLOGIK SERTIFIKATLASHTIRISH TIZIMI ‎‎‎MINISTERSTVO EKOLOGII, OXRANI OKRUJAYUSHEY SREDI I IZMENENIYA KLIMATA SISTEMA EKOLOGICHESKOY SERTIFIKATSII ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ blanka raqami № __________‎‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎‎nomer blanka № __________ _____________________________________________________________________________________________________ ‎‎(ekologik sertifikatlashtirish organing nomi va pochta manzili — naimenovaniye i pochtoviy adres organa po ekologicheskoy sertifikatsii) ‎‎ ‎‎ ‎‎Reestirda qayd etilgan № ____________________ ‎Zaregistrirovano v reyestre ‎_______ -son bilan 20__ yil “__” __da qayd qilindi ‎Registratsionniy № ________ ot “___” ______ 20__ g. ‎Amal qilish muddati “___” ________ 20___ gacha ‎Deystvitelen do “___” ______________ 20__ g. ‎‎Ushbu sertifikat ekologik sertifikatlashtirilgan obʼyekt:_______________________________ ‎Nastoyashiy sertifikat udostoveryayet, chto doljnim obrazom identifitsirovanniy obyekt ekologicheskoy sertifikatsii:________________________________________________ ‎‎ning lozim ravishdagi identifikatsiyasiga javob berishi va normativ-uslubiy jihatlari: _________ ‎________________________________________________________________________ ‎‎(normativ hujjatlar nomi — naimenovaniye normativnogo dokumenta) ‎‎i yego normativno-metodicheskaya baza sootvetstvuyet trebovaniyem sleduyushix normativnix i pravovix aktov ‎‎Sertifikat egasi haqida maʼlumot:________________________________________________ ‎ ‎ ‎ ‎ ‎ ‎ ‎ ‎‎(nomi va pochta manzili — naimenovaniye i pochtoviy adres) ‎‎Svedeniya o derjatele sertifikata:____________________________________________ ‎‎Telefon: _________________________ Faks:____________________________________ ‎‎Telefon: ________________________ Faks: ___________________________________ ‎‎‎Mahsulot yoki xizmatning ekologik sertifikatlashtirishda qoʻllanilgan talablar: ______________ ‎________________________________________________________________________ ‎‎(mahsulot va xizmatga doir tekshiruv, kuzatuv yoki normativ hujjatlar tahlili — ekspertiza normativnix dokumentov ili ispitaniya produksii) ‎‎_______________________________________________________________ ‎‎Dannie o provedenii ekologicheskoy sertifikatsii po trebuyemim kriteriyam: ‎‎ ‎Izoh: Ekologik sertifikat berilganlik shartlariga amal qilinmagan taqdirda ecologik sertifikatlashtirish organi tomonidan bekor qilinishi mumkin. ‎‎ ‎Primechaniye: Organ po ekologicheskoy sertifikatsii, vidavshiy sertifikat, vprave annulirovat sertifikat, yesli poluchatel dannogo sertifikata ne vipolnyayet trebovaniya na sootvetstviye kotorim on vidan. ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ Sertifikatlashtirish organ rahbari Rukovoditel organ sertifkatsii ‎‎ ‎‎ _____________ ‎ ‎ ‎‎__________________ ‎ ‎ ‎ ‎ ‎ ‎ ‎ ‎ Imzo/podpis ‎ ‎ ‎‎(F.I.O)/ (F.I.O) ‎‎Ekspert/ Ekspert ‎‎ _____________ ‎ ‎ __________________‎‎ ‎ ‎ ‎ ‎ ‎ ‎ ‎ ‎ ‎‎Imzo/podpis ‎ ‎ ‎‎‎‎(F.I.O)/ (F.I.O) ‎‎M.Oʻ/M.P‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎

Vazirlar Mahkamasining 2021-yil 16-fevraldagi 75-son qaroriga 2-ILOVA

Oʻzbekiston Respublikasi Hukumatining oʻz kuchini yoʻqotgan deb eʼtirof etilayotgan baʼzi qarorlari

1. Vazirlar Mahkamasining “Ekologik xavfli mahsulotlar va chiqindilarni Oʻzbekiston Respublikasiga olib kirishni va ularni uning hududidan olib chiqishni tartibga solish toʻgʻrisida” 2000-yil 19-apreldagi 151-son qarori (Oʻzbekiston Respublikasi QT, 2000-y., 4-son, 21-modda).

2. Vazirlar Mahkamasining “Oʻzbekiston Respublikasi hududi orqali maxsus yuklar va harbiy tarkiblarning tranzitini davlat tomonidan tartibga solish va nazorat qilish toʻgʻrisida” 2002-yil 21-fevraldagi 62-son qaroriga 4-ilovaning 2-bandi (Oʻzbekiston Respublikasi QT, 2002-y., 2-son, 10-modda).

3. Vazirlar Mahkamasining “Oʻzbekiston Respublikasi hukumatining ayrim qarorlariga oʻzgartirish va qoʻshimchalar kiritish toʻgʻrisida” 2003-yil 13-yanvardagi 14-son qaroriga ilovaning 17-bandi (Oʻzbekiston Respublikasi QT, 2003-y., 1-son, 5-modda).

4. Vazirlar Mahkamasining “Oʻzbekiston Respublikasi hukumatining ayrim qarorlariga oʻzgartirishlar kiritish toʻgʻrisida” 2017-yil 14-noyabrdagi 915-son qaroriga 1-ilovaning 7-bandi (Oʻzbekiston Respublikasi QT, 2017-y., 11-son, 261-modda).

5. Vazirlar Mahkamasining “Oʻzbekiston Respublikasi hukumatining ayrim qarorlariga oʻzgartirish va qoʻshimchalar kiritish toʻgʻrisida” 2019-yil 18-sentabrdagi 787-son qaroriga ilovaning 1-bandi (Oʻzbekiston Respublikasi QX, 2019-y., 19-sentabr, 3770-modda).

Oʻzbekiston Respublikasining Bosh vaziri A. ARIPOV

Toshkent sh.,

2021-yil 16-fevral,

75-son

(Qonun hujjatlari maʼlumotlari milliy bazasi, 17.02.2021-y., 09/21/75/0121-son, Qonunchilik maʼlumotlari milliy bazasi, 05.04.2022-y., 09/22/153/0266-son; 10.01.2025-y., 09/25/916/0017-son)

lex.uz