📅 2021-yil 20-fevral · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 20 февраль · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 20 февраля 2021 г. · Постановления Кабинета Министров
Официальный текст. Официальный документ. Редакционные примечания не включены.
📅 20 February 2021 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Қашқадарё вилояти Ғузор тумани Олимпия ва миллий спорт турлари бўйича давлат ихтисослаштирилган мактаб-интернатини ташкил этиш тўғрисида
Спортнинг Олимпия ва миллий турларини янада ривожлантириш ҳамда мамлакат миллий терма жамоаларининг ишончли захираларини шакллантириш мақсадида Вазирлар Маҳкамаси қарор қилади:
1. Қашқадарё вилояти ҳокимлиги ҳамда Ўзбекистон Республикаси Жисмоний тарбия ва спорт вазирлигининг Қашқадарё вилояти Ғузор тумани Олимпия ва миллий спорт турлари бўйича давлат ихтисослаштирилган мактаб-интернатини (кейинги ўринларда — мактаб-интернат) ташкил этиш тўғрисидаги таклифига розилик берилсин.
2. Белгилаб қўйилсинки, мактаб-интернат:
ўз фаолиятини Вазирлар Маҳкамасининг «Спорт турлари бўйича ихтисослаштирилган давлат мактаб-интернатлари фаолиятини такомиллаштириш тўғрисида» 2018 йил 2 июндаги 410-сон қарори асосида амалга оширувчи Олимпия ва миллий спорт турлари бўйича давлат ихтисослаштирилган мактаб-интернати ҳисобланади;
фаолияти ва унга ўқувчиларни қабул қилиш 2021/2022 ўқув йилидан бошлаб ташкил этилади;
бино ва иншоотларини таъмирлаш ва моддий-техник базасини яхшилаш 2021 йилда Қашқадарё вилояти маҳаллий бюджетининг даромадлар режасининг режадан орттириб бажарилган қисми ҳамда қўшимча даромадлари ҳисобидан амалга оширилади;
2021 йилда сақлаш харажатлари Қашқадарё вилояти маҳаллий бюджетининг 2021 йил учун тасдиқланган параметрларида назарда тутилган маблағларнинг иқтисод қилинган қисми ҳисобидан амалга оширилади.
3. Қуйидагилар мактаб-интернатнинг асосий вазифалари этиб белгилансин:
Олимпия ва миллий спорт турлари бўйича янги илмий-методик тавсиялар ва ютуқлар асосида спорт захираларини, терма жамоаларга юқори маҳоратли спортчиларни тайёрлаш;
давлат таълим стандартлари, ўқув режаси ва дастурлари талаблари асосида ўқувчиларнинг таълим тайёргарлигини таъминлаш;
зарур ҳолларда, Олимпия спорт турлари бўйича хорижий тренерлар ва мутахассисларни таклиф қилган ҳолда илғор илмий-методик тавсиялар асосида ёш спортчиларни тайёрлаш борасида ўқув-машқ жараёнларини юқори даражада ташкил этиш;
ўқувчиларнинг жисмоний тайёргарлиги ва техник-тактик кўникмаларини такомиллаштириш, профессионал маҳоратини ривожлантириш, шунингдек, спортни ривожлантириш халқаро талабларига мувофиқ Ўзбекистон миллий терма жамоалари захирасини тайёрлаш даражасини ошириш;
ўқувчи-спортчилар ва тренерлар таркибининг профессионал маҳоратини ошириш учун хорижий спорт мактаблари ва клублари билан тажриба алмашиш бўйича ҳамкорликни кенгайтириш.
4. Ўзбекистон Республикаси Жисмоний тарбия ва спорт вазирлиги:
бир ой муддатда мактаб-интернатнинг устави тасдиқланиши, шунингдек, белгиланган тартибда давлат рўйхатидан ўтказилишини таъминласин;
уч ой муддатда ўқув-машғулот жараёнини зарур даражада ташкил этиш мақсадида мактаб-интернатни замонавий педагогик технологияларни эгаллаган малакали педагог кадрлар ҳамда тренерлар билан таъминлаш юзасидан зарур чора-тадбирларни кўрсин;
Қашқадарё вилояти ҳокимлиги билан биргаликда мактаб-интернатнинг бино ва иншоотларида қурилиш-таъмирлаш ҳамда жиҳозлаш ишларини 2022 йил Инвестиция дастури доирасида амалга ошириш бўйича таклиф киритсин.
5. Қашқадарё вилояти ҳокимлиги Ўзбекистон Республикаси Жисмоний тарбия ва спорт вазирлиги ҳамда Соғлиқни сақлаш вазирлиги билан биргаликда икки ой муддатда Қашқадарё вилояти, Ғузор тумани, Ярғунчи МФЙ, Ярғунчи қишлоғи манзилида жойлашган собиқ Ғузор саноат-транспорт касб-ҳунар коллежининг бино ва иншоотларини оператив бошқарув ҳуқуқи асосида мактаб-интернатга бепул берилишини таъминласин.
6. Қашқадарё вилояти ҳокимлиги мазкур қарор талабларидан келиб чиқиб, 2022 йилдан бошлаб мактаб-интернатни сақлаш харажатлари учун зарур маблағларни Қашқадарё вилояти маҳаллий бюджет параметрларини шакллантиришда назарда тутсин.
7. Мазкур қарорнинг бажарилишини назорат қилиш Ўзбекистон Республикаси Бош вазири ўринбосари — Ўзбекистон Республикаси Туризмни ривожлантириш давлат қўмитаси раиси А.А. Абдухакимов ҳамда Ўзбекистон Республикаси жисмоний тарбия ва спорт вазирининг биринчи ўринбосари Р.С. Ирматов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2021 йил 20 февраль,
86-сон
Oʻzbekiston Respublikasi Vazirlar Mahkamasining
qarori
Qashqadaryo viloyati Gʻuzor tumani Olimpiya va milliy sport turlari boʻyicha davlat ixtisoslashtirilgan maktab-internatini tashkil etish toʻgʻrisida
Sportning Olimpiya va milliy turlarini yanada rivojlantirish hamda mamlakat milliy terma jamoalarining ishonchli zaxiralarini shakllantirish maqsadida Vazirlar Mahkamasi qaror qiladi:
1. Qashqadaryo viloyati hokimligi hamda Oʻzbekiston Respublikasi Jismoniy tarbiya va sport vazirligining Qashqadaryo viloyati Gʻuzor tumani Olimpiya va milliy sport turlari boʻyicha davlat ixtisoslashtirilgan maktab-internatini (keyingi oʻrinlarda — maktab-internat) tashkil etish toʻgʻrisidagi taklifiga rozilik berilsin.
2. Belgilab qoʻyilsinki, maktab-internat:
oʻz faoliyatini Vazirlar Mahkamasining “Sport turlari boʻyicha ixtisoslashtirilgan davlat maktab-internatlari faoliyatini takomillashtirish toʻgʻrisida” 2018-yil 2-iyundagi 410-son qarori asosida amalga oshiruvchi Olimpiya va milliy sport turlari boʻyicha davlat ixtisoslashtirilgan maktab-internati hisoblanadi;
faoliyati va unga oʻquvchilarni qabul qilish 2021/2022 oʻquv yilidan boshlab tashkil etiladi;
bino va inshootlarini taʼmirlash va moddiy-texnik bazasini yaxshilash 2021-yilda Qashqadaryo viloyati mahalliy budjetining daromadlar rejasining rejadan orttirib bajarilgan qismi hamda qoʻshimcha daromadlari hisobidan amalga oshiriladi;
2021-yilda saqlash xarajatlari Qashqadaryo viloyati mahalliy budjetining 2021-yil uchun tasdiqlangan parametrlarida nazarda tutilgan mablagʻlarning iqtisod qilingan qismi hisobidan amalga oshiriladi.
3. Quyidagilar maktab-internatning asosiy vazifalari etib belgilansin:
Olimpiya va milliy sport turlari boʻyicha yangi ilmiy-metodik tavsiyalar va yutuqlar asosida sport zaxiralarini, terma jamoalarga yuqori mahoratli sportchilarni tayyorlash;
davlat taʼlim standartlari, oʻquv rejasi va dasturlari talablari asosida oʻquvchilarning taʼlim tayyorgarligini taʼminlash;
zarur hollarda, Olimpiya sport turlari boʻyicha xorijiy trenyerlar va mutaxassislarni taklif qilgan holda ilgʻor ilmiy-metodik tavsiyalar asosida yosh sportchilarni tayyorlash borasida oʻquv-mashq jarayonlarini yuqori darajada tashkil etish;
oʻquvchilarning jismoniy tayyorgarligi va texnik-taktik koʻnikmalarini takomillashtirish, professional mahoratini rivojlantirish, shuningdek, sportni rivojlantirish xalqaro talablariga muvofiq Oʻzbekiston milliy terma jamoalari zaxirasini tayyorlash darajasini oshirish;
oʻquvchi-sportchilar va trenyerlar tarkibining professional mahoratini oshirish uchun xorijiy sport maktablari va klublari bilan tajriba almashish boʻyicha hamkorlikni kengaytirish.
4. Oʻzbekiston Respublikasi Jismoniy tarbiya va sport vazirligi:
bir oy muddatda maktab-internatning ustavi tasdiqlanishi, shuningdek, belgilangan tartibda davlat roʻyxatidan oʻtkazilishini taʼminlasin;
uch oy muddatda oʻquv-mashgʻulot jarayonini zarur darajada tashkil etish maqsadida maktab-internatni zamonaviy pedagogik texnologiyalarni egallagan malakali pedagog kadrlar hamda trenyerlar bilan taʼminlash yuzasidan zarur chora-tadbirlarni koʻrsin;
Qashqadaryo viloyati hokimligi bilan birgalikda maktab-internatning bino va inshootlarida qurilish-taʼmirlash hamda jihozlash ishlarini 2022-yil Investitsiya dasturi doirasida amalga oshirish boʻyicha taklif kiritsin.
5. Qashqadaryo viloyati hokimligi Oʻzbekiston Respublikasi Jismoniy tarbiya va sport vazirligi hamda Sogʻliqni saqlash vazirligi bilan birgalikda ikki oy muddatda Qashqadaryo viloyati, Gʻuzor tumani, Yargʻunchi MFY, Yargʻunchi qishlogʻi manzilida joylashgan sobiq Gʻuzor sanoat-transport kasb-hunar kollejining bino va inshootlarini operativ boshqaruv huquqi asosida maktab-internatga bepul berilishini taʼminlasin.
6. Qashqadaryo viloyati hokimligi mazkur qaror talablaridan kelib chiqib, 2022-yildan boshlab maktab-internatni saqlash xarajatlari uchun zarur mablagʻlarni Qashqadaryo viloyati mahalliy budjet parametrlarini shakllantirishda nazarda tutsin.
7. Mazkur qarorning bajarilishini nazorat qilish Oʻzbekiston Respublikasi Bosh vaziri oʻrinbosari — Oʻzbekiston Respublikasi Turizmni rivojlantirish davlat qoʻmitasi raisi A.A. Abduxakimov hamda Oʻzbekiston Respublikasi jismoniy tarbiya va sport vazirining birinchi oʻrinbosari R.S. Irmatov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2021-yil 20-fevral,
86-son