📅 2021-yil 1-mart · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 1 март · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 1 марта 2021 г. · Постановления Кабинета Министров
Официальный текст. Официальный документ. Редакционные примечания не включены.
📅 1 March 2021 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
СХЕМАСИ
Қашқадарё вилоятида туризм соҳасини янада қўллаб-қувватлаш ва ривожлантириш чора-тадбирлари тўғрисида
Ўзбекистон Республикаси Президентининг «Ўзбекистон Республикасида ички ва зиёрат туризмини янада ривожлантириш чора-тадбирлари тўғрисида» 2021 йил 9 февралдаги ПФ-6165-сон Фармони ижросини таъминлаш, шунингдек, Қашқадарё вилоятининг туризм ҳамда унга бевосита боғлиқ бўлган ижтимоий инфратузилмасини ривожлантириш, вилоятдаги муҳандислик-коммуникация тармоқларидаги мавжуд муаммоларни ҳал этиш, кўрсатилаётган хизматлар сифатини янада яхшилаш ва диверсификациялаш мақсадида Вазирлар Маҳкамаси қарор қилади:
1. Ўзбекистон Республикаси Президентининг «Ўзбекистон Республикасида ички ва зиёрат туризмини янада ривожлантириш чора-тадбирлари тўғрисида» 2021 йил 9 февралдаги ПФ-6165-сон Фармонининг 9-бандига мувофиқ Қашқадарё вилояти ҳокимлиги ҳузурида бюджетдан ташқари Қашқадарё ҳудудида туризмни ривожлантириш жамғармасини (кейинги ўринларда — Жамғарма) ташкил этиш ва унга Ўзбекистон Республикасининг Тикланиш ва тараққиёт жамғармаси маблағлари ҳисобидан, истисно тариқасида, 200 млрд сўм миқдоридаги маблағларни ажратиш белгиланганлиги маълумот учун қабул қилинсин.
2. Қашқадарё вилояти ҳокимлиги ҳузурида бюджетдан ташқари Жамғарма ташкил этилсин.
Ўзбекистон Республикасининг Тикланиш ва тараққиёт жамғармаси икки ҳафта муддатда Жамғармага, истисно тариқасида, 200 млрд сўм миқдоридаги маблағларнинг ажратилишини таъминласин.
3. Қуйидагилар Жамғарма маблағлари сарфланадиган асосий йўналишлар этиб белгилансин:
Қашқадарё вилоятидаги туризм салоҳиятига эга ҳудудларнинг муҳандислик-коммуникация инфратузилмасини тартибга келтириш;
туризм инфратузилмаси ва ёндош инфратузилмани қуриш, реконструкция қилиш, кенгайтириш, модернизация қилиш ишларини олиб бориш ва ободонлаштириш;
оилавий меҳмон уйларини ташкил қилиш харажатларининг бир қисмини субсидиялаш;
туризм зоналарининг бош режа ва батафсил режалаштириш лойиҳаларини тайёрлаш, туризм кўчаларини ташкил этиш;
моддий маданий мерос объектларини консервация ва реставрация қилиш;
махсус пиёдалар ва велосипед йўлакларини яратиш;
туризм тарғиботи ишларини ташкиллаштириш;
Шаҳрисабз туризм ва сервис коллежини таъмирлаш.
4. Қуйидагиларни назарда тутувчи Қашқадарё ҳудудида туризмни ривожлантириш жамғармаси маблағларини шакллантириш ва улардан фойдаланиш тартиби тўғрисидаги низом иловага мувофиқ тасдиқлансин:
Жамғарма маблағларини шакллантириш манбалари;
Жамғарма маблағларидан фойдаланиш тартиби ва йўналишлари;
субсидия ажратиш тартиби ва шартлари;
Жамғарма маблағларидан фойдаланилиши юзасидан ҳисоботни шакллантириш ва назорат ўрнатиш.
5. Белгилаб қўйилсинки, Жамғарма маблағларидан ҳар йили Ўзбекистон Республикаси Молия вазирлиги билан келишилган ҳолда Вазирлар Маҳкамаси (А.А. Абдухакимов, Ж.А. Қўчқоров) томонидан тасдиқланадиган харажатлар сметасига мувофиқ фойдаланилади.
6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — Туризмни ривожлантириш давлат қўмитаси раиси А.А. Абдухакимов, Ўзбекистон Республикаси Бош вазирининг ўринбосари — иқтисодий тараққиёт ва камбағалликни қисқартириш вазири Ж.А. Қўчқоров ҳамда Қашқадарё вилояти ҳокими З.Т. Мирзаев зиммасига юклансин.
Вазирлар Маҳкамасининг 2021 йил 1 мартдаги 112-сон қарорига ИЛОВА
Қашқадарё ҳудудида туризмни ривожлантириш жамғармаси маблағларини шакллантириш ва улардан фойдаланиш тартиби тўғрисида
1-боб. Умумий қоидалар
1. Ушбу Низом Қашқадарё ҳудудида туризмни ривожлантириш жамғармаси (кейинги ўринларда — Жамғарма) маблағларини шакллантириш ва улардан фойдаланиш тартибини белгилайди.
2. Жамғарма Қашқадарё вилояти ҳокимлиги (кейинги ўринларда — Вилоят ҳокимлиги) ҳузурида юридик шахс мақомисиз, маблағлардан кейинчалик туризм ҳамда унга бевосита боғлиқ бўлган инфратузилмани ривожлантиришда фойдаланиш учун уларнинг жамланишини таъминлаш мақсадида ташкил этилади.
3. Вилоят ҳокимлиги ҳузурида юридик шахс ташкил этмаган ҳолда Лойиҳа офиси ташкил этилади ва ушбу Лойиҳа офисига Қашқадарё вилояти ҳокимининг туризм ва спортни ривожлантириш масалалари бўйича маслаҳатчиси раҳбарлик қилади.
2-боб. Жамғарма маблағларини шакллантириш манбалари
4. Жамғарма қуйидаги манбалар ҳисобига шакллантирилади:
Ўзбекистон Республикасининг Тикланиш ва тараққиёт жамғармасининг 200 млрд сўм миқдоридаги маблағлари;
Жамғарманинг вақтинча бўш маблағларини Ўзбекистон Республикаси Марказий банки ва тижорат банкларига белгиланган тартибда депозитларга Молия вазирлиги Ғазначилигига буюртманомалар тақдим этиш йўли билан жойлаштиришдан тушадиган даромадлар бўйича тушумлар;
қонун ва қонунчилик ҳужжатларида тақиқланмаган бошқа манбалар.
5. Жамғармага тушадиган маблағлар Вилоят ҳокимлиги томонидан очиладиган миллий ва чет эл валютасидаги шахсий ғазна ҳисобварақларида жамланади.
3-боб. Жамғарма маблағларидан фойдаланиш
6. Вилоят ҳокимлиги томонидан 2021 йил учун 20 март кунига қадар ҳамда кейинги йиллар учун 1 декабрь кунига қадар ушбу низомнинг 10-бандида белгиланган тадбирларни амалга оширишни таъминлаш бўйича йиллик манзилли дастур (кейинги ўринларда — Дастур) лойиҳаси ишлаб чиқилади.
7. Дастур лойиҳаси Ўзбекистон Республикаси Туризм ва маданий мерос вазирлиги ва Маданият вазирлиги билан мажбурий тартибда келишилади ва тасдиқлаш учун Вазирлар Маҳкамасига киритилади.
8. Вилоят ҳокимлиги Ўзбекистон Республикаси Вазирлар Маҳкамаси томонидан тасдиқланган Дастурда белгиланган харажатлардан келиб чиқиб, Жамғарманинг йиллик даромадлар ва харажатлар сметаси лойиҳасини 2021 йил учун 10 апрель кунига ҳамда кейинги йиллар учун 20 декабрь кунига қадар ишлаб чиқади ва Молия вазирлиги, Туризм ва маданий мерос вазирлиги ва Маданият вазирлиги билан келишган ҳолда тасдиқлаш учун Вазирлар Маҳкамасига киритади.
9. Ўзбекистон Республикаси Вазирлар Маҳкамаси томонидан тасдиқланган Дастурда белгиланган чора-тадбирларни даромадлар ва харажатлар сметасига қатъий амал қилган ҳолда бажарилишини таъминлаш учун тегишли маблағларни ажратиш тўғрисида Қашқадарё вилояти ҳокимининг фармойиши қабул қилинади.
Бунда, Қашқадарё вилояти ҳокимининг фармойиши асосида Лойиҳа офиси раҳбари томонидан тўлов топшириқномалари расмийлаштирилади ва пул маблағларини чиқариш учун вилоят молия бошқармасига тақдим этилади.
10. Жамғарма маблағларидан қуйидаги мақсадларда фойдаланилади:
а) вилоятнинг туризм салоҳияти мавжуд ҳудудларида муҳандислик-коммуникация ва туризм инфратузилмасини яхшилаш, ёндош инфратузилмани қуриш, реконструкция қилиш, кенгайтириш ва модернизация қилиш ишларини олиб бориш (йўл, электр энергияси, табиий газ ва сув таъминоти, сув-оқава тизимлари, ахборот-телекоммуникация тармоқлари);
б) вилоятдаги моддий маданий мерос объектларини консервация ва реставрация қилиш;
в) туристик индустрия, дор йўли, сиҳатгоҳлар ва туризм зоналари ва мажмуалари лойиҳаларининг бош режа ва батафсил режалаштириш лойиҳаларини тайёрлаш харажатларини қоплаш;
г) аэронавигация воситалари ва кичик сиғимдаги ҳаво кемалари (вертолётлар, кичик двигателли самолётлар ва бошқалар) учун учиш-қўниш майдончаларини ташкил қилиш;
д) вилоятдаги оилавий меҳмон уйлари йўналишида фаолиятини ташкил қилган тадбиркорлик субъектларига оилавий меҳмон уйлари ташкил қилиш харажатларининг 30 фоизгача, лекин 10 млн сўмдан ошмаган миқдорда, камида 3 йил давомида фаолият олиб бориш ҳамда белгиланган тартибда ташриф буюрувчиларни автоматлаштирилган махсус электрон дастурга киритиб бориш шарти билан субсидиялар ажратиш;
е) вилоятда замонавий санитария-гигиена шохобчалари, туристик ахборот марказлари ёки ташриф марказлари («visitor center») ташкил қилиш ҳамда туристик хариталар, йўл кўрсаткичларини ўрнатиш;
ё) сувенир, ҳунармандчилик ва озиқ-овқат маҳсулотлари савдо шоҳобчалари жойлаштирилишини назарда тутувчи туристик кўчалар, шунингдек, вилоятдаги йўлларда махсус пиёдалар ва велосипед йўлакларини ташкил қилиш;
ж) «туризм маҳалласи», «туризм қишлоғи» лойиҳаларини амалга ошириш доирасида ободонлаштириш ва сайёҳлар учун фольклор-этнографик чиқишларни ташкил қилиш харажатларини қоплаш;
з) вилоят туризм салоҳиятини тарғиб қилишга қаратилган чора-тадбирларни (тарғибот маҳсулотларини тайёрлаш, халқаро тадбирлар ташкил этиш, хорижий туроператорлар, оммавий ахборот воситалари ва бошқа ташкилотлар вакиллари иштирокида ахборот турлари (инфотурлар) ташкил қилиш, халқаро ва маҳаллий туризм кўргазмаларида иштирок этиш) молиялаштириш.
11. Қашқадарё вилояти ҳокими Жамғарма маблағларининг тасарруф этувчиси ҳисобланади. Бунда, Жамғарма маблағларини «Давлат харидлари тўғрисида»ги Ўзбекистон Республикаси Қонуни талабларига қатъий амал қилган ҳолда тасарруф этилади.
12. Жамғарма маблағларидан гаров, қарздорнинг мол-мулкини ушлаб қолиш, кафиллик ва мажбуриятларни бажаришнинг бошқа усули сифатида фойдаланиш, жамғарма маблағлари ҳисобидан ссудалар ва кредитлар беришга йўл қўйилмайди.
4-боб. Субсидия ажратиш тартиби ва шартлари
13. Субсидия 2021 йил 1 майдан 2022 йил 31 декабрга қадар оилавий меҳмон уйлари ташкил қилган хусусий ёки оилавий тадбиркорлик субъектларига ушбу Низомнинг 10-банди «д» кичик бандида белгиланган шартларга мувофиқ ажратилади.
14. Жамғарма томонидан субсидия ажратиш ушбу Низомнинг 1-иловасига мувофиқ схема асосида амалга оширилади.
15. Субсидия олиш учун тадбиркорлик субъектлари ҳар ойнинг 1-санасидан 5-санасига қадар Вилоят ҳокимлигига ушбу Низомнинг 2-иловасига мувофиқ тасдиқланган шаклда субсидия олиш тўғрисидаги ариза билан ёзма ёки электрон шаклда мурожаат қилади.
16. Аризага қуйидаги ҳужжатлар илова қилинади:
ариза берувчининг номи (Ф.И.О.), жойлашган жойи (почта манзили), СТИР ва хизмат кўрсатувчи тижорат банкидаги ҳисобварағи реквизитлари тўғрисидаги маълумотлар;
оилавий меҳмон уйлари ва хостеллар ягона реестрига киритилганлигини тасдиқловчи ҳужжат нусхаси;
оилавий меҳмон уйи ташкил қилишга кетган харажатларни тасдиқловчи ҳужжатлар (шартнома нусхаси, тўлов чеклари/квитанцияси ва бошқалар) нусхалари.
17. Ариза ва унга илова қилинган ҳужжатларнинг асослилиги Вилоят ҳокимлиги томонидан текширилади.
18. Вилоят ҳокимлиги ариза келиб тушган кундан бошлаб беш иш кунида ариза ва унга илова қилинган ҳужжатларнинг ушбу Низом талабларига мувофиқлигини ўрганади.
19. Вилоят ҳокимлиги аризани кўриб чиққандан сўнг, бир иш кунида Қашқадарё вилояти ҳокими томонидан субсидия ажратиш ёки рад этиш тўғрисида қарор қабул қилинади ва у баённома билан расмийлаштирилади. Қарорнинг нусхаси қарор қабул қилинган кунда ариза берувчига юборилади.
20. Субсидия ажратиш тўғрисида ижобий қарор қабул қилинганда, белгиланган тартибда бир иш кунида тадбиркорлик субъектига зарур суммани унга хизмат кўрсатувчи тижорат банкидаги ҳисобварағига белгиланган тартибда ўтказиб берилади.
21. Субсидия ажратиш рад этилган тақдирда, рад этиш учун асос бўлган сабаблар аниқ кўрсатиб ўтилган қарор нусхаси ариза берувчига ушбу қарор қабул қилинган кунда юборилади.
Ариза берувчи қарорни олган кундан бошлаб кўпи билан икки ҳафта муддатда кўрсатиб ўтилган камчиликлар бартараф этилганлигини тасдиқловчи тегишли ҳужжатларни илова қилган ҳолда Вилоят ҳокимлигига такроран ариза билан мурожаат қилиш ҳуқуқига эга.
22. Субсидия ажратиш қуйидаги асосларга кўра рад этилиши мумкин:
ушбу Низомнинг 16-бандида кўрсатиб ўтилган ҳужжатлар тақдим қилинмаган ёки тўлиқ ҳажмда тақдим қилинмаганлиги;
тақдим этилган ҳужжатлардаги маълумотларнинг нотўғрилиги.
Субсидия ажратишни ушбу бандда кўрсатиб ўтилмаган бошқа асослар бўйича рад этиш мумкин эмас.
23. Ариза такроран тақдим этилган кундан бошлаб уч иш куни мобайнида Вилоят ҳокимлиги томонидан қайта кўриб чиқилади. Бунда янги асослар бўйича субсидия ажратишни рад этиш мумкин эмас.
24. Ушбу Низомнинг 21-банди иккинчи хатбошисида кўрсатилган муддат тугагандан кейин тақдим қилинган ариза янгидан берилган ариза ҳисобланади.
25. Лойиҳа офиси Вилоят ҳокимлигининг расмий сайтида Жамғарма маблағларидан субсидия ажратилган ҳолда ташкил этилган оилавий меҳмон уйлари ва аризалари рад этилган шахсларнинг рўйхатини юритади.
Бунда, ташкил этилган оилавий меҳмон уйлари тўғрисида, уларнинг манзилларини кўрсатган ва фотосуратларини илова қилган ҳолда, тарғибот ишлари ташкил этилади.
5-боб. Лойиҳа офисининг фаолиятини ташкил этиш
26. Қуйидагилар Лойиҳа офисининг асосий вазифалари ҳисобланади:
а) ушбу Низомнинг 10-бандида белгиланган мақсадларни амалга оширишга қаратилган йиллик манзилли дастур лойиҳасини (кейинги ўринларда — Дастур) ишлаб чиқиш учун Қашқадарё вилоятида ўрганиш ўтказиш ва Дастурни шакллантириш;
б) Дастур асосида Жамғарманинг йиллик даромадлар ва харажатлар сметаси лойиҳасини шакллантириш;
в) Дастур ҳамда Жамғарманинг йиллик даромадлар ва харажатлар сметаси лойиҳаларини Қашқадарё вилоят ҳокимига тақдим этиш;
г) Дастур ҳамда Жамғарманинг йиллик даромадлар ва харажатлар сметаси лойиҳаларини Ўзбекистон Республикаси Туризм ва маданий мерос вазирлиги, Молия вазирлиги, Маданият вазирлиги ва Маданий мерос департаментига келишиш учун ҳамда Вазирлар Маҳкамасига тасдиқлаш учун киритиш мақсадида тегишли ҳужжатларни тайёрлаш;
д) Дастурда белгиланган чора-тадбирларни даромадлар ва харажатлар сметасига қатъий амал қилган ҳолда амалга ошириш учун тегишли маблағларни ажратиш бўйича Қашқадарё вилояти ҳокимининг фармойиши лойиҳаларини тайёрлаш ҳамда тўлов топшириқномаларини расмийлаштириш;
е) Ўзбекистон Республикаси Вазирлар Маҳкамаси томонидан тасдиқланган Дастур ҳамда Жамғарманинг йиллик даромадлар ва харажатлар сметасининг амалга оширилиши бўйича доимий мониторинг олиб бориш ва унинг натижалари бўйича Қашқадарё вилояти ҳокимига ахборот тақдим этиш;
ё) Жамғармага маблағлар тушиши ва улардан фойдаланилиши тўғрисида, шу жумладан Дастур ижроси ва Жамғарманинг даромадлар ва харажатлар сметасига тўлиқ риоя этилаётгани бўйича Вазирлар Маҳкамасига тақдим этиладиган ҳисоботларни тайёрлаш;
ж) Жамғарманинг мақсад ва вазифаларидан келиб чиқиб, тарғибот ишларини олиб бориш;
з) Жамғарма маблағларидан фойдаланган ҳолда амалга оширилган лойиҳалар тўғрисида ахборот тайёрлаш ва тарғибот ишларини ташкил этиш.
6-боб. Жамғарма маблағларидан фойдаланилиши юзасидан ҳисобот ва назорат
27. Жамғарма маблағларидан оқилона ва мақсадли фойдаланишни назорат қилиш ҳар йил якуни билан кейинги йилнинг 1 февраль кунига қадар белгиланган тартибда Давлат молиявий назорати инспекцияси томонидан амалга оширилади. Бунда 10 февралга қадар амалга оширилган назорат якунлари бўйича Вазирлар Маҳкамасига ахборот тақдим этилади.
28. Қашқадарё вилояти ҳокими ва Вилоят ҳокимлиги бош бухгалтери бухгалтерия ҳисоби тўғри юритилиши, Жамғармага маблағлар тушиши ва улардан фойдаланилиши тўғрисидаги ҳисоботларни тузиш ва тақдим этиш бўйича белгиланган тартибда жавобгар ҳисобланади.
29. Қашқадарё вилояти ҳокими Жамғармага маблағлар тушиши ва улардан фойдаланилиши тўғрисида, шу жумладан Йиллик дастур ижроси ва Жамғарманинг даромадлар ва харажатлар сметасига тўлиқ риоя этилаётгани бўйича ҳар чорак якуни билан кейинги ойнинг 20-кунига қадар Молия вазирлиги ва Вазирлар Маҳкамасига ҳисобот тақдим этади.
30. Жамғарманинг фойдаланилмаган маблағлари Ўзбекистон Республикаси Бюджет кодексида белгиланган тартибда кейинги йилга ўтади ва олиб қўйилмайди.
31. Қашқадарё вилояти ҳокими Жамғарма маблағларидан мақсадли фойдаланилиши юзасидан шахсан жавобгар ҳисобланади.
7-боб. Якунловчи қоида
32. Ушбу Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб берадилар.
Қашқадарё ҳудудида туризмни ривожлантириш жамғармаси маблағларини шакллантириш ва улардан фойдаланиш тартиби тўғрисида низомга 1-ИЛОВА
Қашқадарё ҳудудида туризмни ривожлантириш жамғармаси томонидан оилавий меҳмон уйи ташкил қилиш учун субсидия ажратиш
Субъектлар Тадбирлар Бажариш муддати Ариза берувчи Субсидия олиш учун Ҳокимликка ёзма ёки электрон шаклда мурожаат қилади. Ариза берувчининг хоҳишига кўра Ҳокимлик Ариза ва унга илова қилинган ҳужжатларни ўрганиб чиқади. 5 иш кунида Ҳокимлик Субсидия ажратиш ёки рад этиш тўғрисида қарор қабул қилади. Қарорнинг нусхасини қарор қабул қилинган кунда ариза берувчига юборади. 1 иш кунида Ариза берувчи Рад этиш тўғрисидаги қарорни олган тақдирда, камчиликларни бартараф этиб, тегишли ҳужжатларни илова қилган ҳолда Ҳокимликка такроран ариза билан мурожаат қилади. 14 кунда Ҳокимлик Такроран тақдим этилган аризани қайта кўриб чиқади. 3 иш кунида Ҳокимлик Субсидия ажратиш тўғрисида ижобий қарор қабул қилинганда, зарур суммани ариза берувчига унинг хизмат кўрсатувчи тижорат банкидаги ҳисобварағига белгиланган тартибда ўтказиб беради. 1 иш кунида
Қашқадарё ҳудудида туризмни ривожлантириш жамғармаси маблағларини шакллантириш ва улардан фойдаланиш тартиби тўғрисида низомга 2-ИЛОВА
Қашқадарё вилояти ҳокимлигига АРИЗА ______________________________________________________________________________________________________________, (ариза берувчининг тўлиқ номи, Ф.И.О.) ______________________________________________________________________________________________________________ _____________________________________________________________________________________манзил бўйича рўйхатдан ўтган (почта манзили, телефон, факс) __________________________________________________________________________________________________шахс номидан, (оилавий меҳмон уйи эгасининг лавозими, Ф.И.О.) ______________________________________________________________________________________________________________ _____________________________________________________________________________________________манзилда жойлашган (вилоят, туман, шаҳар, кўча, бино рақами) _______________________________________________________________________________оилавий меҳмон уйи хизмати фаолияти (хоналар ва жойлар сони) йўлга қўйилганлиги учун тегишли субсидия берилишини сўрайман. СТИР рақами:___________________________________________________________________________________________________ Электрон почта манзили: __________________________________________________________________________________________ _____________________________ Сана _________________ (шахсий имзо)
Ўзбекистон Республикасининг Бош вазири А. АРИПОВ
Тошкент ш.,
2021 йил 1 март,
112-сон
Oʻzbekiston Respublikasi Vazirlar Mahkamasining
qarori
NIZOM
SXEMASI
Qashqadaryo viloyatida turizm sohasini yanada qoʻllab-quvvatlash va rivojlantirish chora-tadbirlari toʻgʻrisida
Oʻzbekiston Respublikasi Prezidentining “Oʻzbekiston Respublikasida ichki va ziyorat turizmini yanada rivojlantirish chora-tadbirlari toʻgʻrisida” 2021-yil 9-fevraldagi PF-6165-son Farmoni ijrosini taʼminlash, shuningdek, Qashqadaryo viloyatining turizm hamda unga bevosita bogʻliq boʻlgan ijtimoiy infratuzilmasini rivojlantirish, viloyatdagi muhandislik-kommunikatsiya tarmoqlaridagi mavjud muammolarni hal etish, koʻrsatilayotgan xizmatlar sifatini yanada yaxshilash va diversifikatsiyalash maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining “Oʻzbekiston Respublikasida ichki va ziyorat turizmini yanada rivojlantirish chora-tadbirlari toʻgʻrisida” 2021-yil 9-fevraldagi PF-6165-son Farmonining 9-bandiga muvofiq Qashqadaryo viloyati hokimligi huzurida budjetdan tashqari Qashqadaryo hududida turizmni rivojlantirish jamgʻarmasini (keyingi oʻrinlarda — Jamgʻarma) tashkil etish va unga Oʻzbekiston Respublikasining Tiklanish va taraqqiyot jamgʻarmasi mablagʻlari hisobidan, istisno tariqasida, 200 mlrd soʻm miqdoridagi mablagʻlarni ajratish belgilanganligi maʼlumot uchun qabul qilinsin.
2. Qashqadaryo viloyati hokimligi huzurida budjetdan tashqari Jamgʻarma tashkil etilsin.
Oʻzbekiston Respublikasining Tiklanish va taraqqiyot jamgʻarmasi ikki hafta muddatda Jamgʻarmaga, istisno tariqasida, 200 mlrd soʻm miqdoridagi mablagʻlarning ajratilishini taʼminlasin.
3. Quyidagilar Jamgʻarma mablagʻlari sarflanadigan asosiy yoʻnalishlar etib belgilansin:
Qashqadaryo viloyatidagi turizm salohiyatiga ega hududlarning muhandislik-kommunikatsiya infratuzilmasini tartibga keltirish;
turizm infratuzilmasi va yondosh infratuzilmani qurish, rekonstruksiya qilish, kengaytirish, modernizatsiya qilish ishlarini olib borish va obodonlashtirish;
oilaviy mehmon uylarini tashkil qilish xarajatlarining bir qismini subsidiyalash;
turizm zonalarining bosh reja va batafsil rejalashtirish loyihalarini tayyorlash, turizm koʻchalarini tashkil etish;
moddiy madaniy meros obyektlarini konservatsiya va restavratsiya qilish;
maxsus piyodalar va velosiped yoʻlaklarini yaratish;
turizm targʻiboti ishlarini tashkillashtirish;
Shahrisabz turizm va servis kollejini taʼmirlash.
4. Quyidagilarni nazarda tutuvchi Qashqadaryo hududida turizmni rivojlantirish jamgʻarmasi mablagʻlarini shakllantirish va ulardan foydalanish tartibi toʻgʻrisidagi nizom ilovaga muvofiq tasdiqlansin:
Jamgʻarma mablagʻlarini shakllantirish manbalari;
Jamgʻarma mablagʻlaridan foydalanish tartibi va yoʻnalishlari;
subsidiya ajratish tartibi va shartlari;
Jamgʻarma mablagʻlaridan foydalanilishi yuzasidan hisobotni shakllantirish va nazorat oʻrnatish.
5. Belgilab qoʻyilsinki, Jamgʻarma mablagʻlaridan har yili Oʻzbekiston Respublikasi Moliya vazirligi bilan kelishilgan holda Vazirlar Mahkamasi (A.A. Abduxakimov, J.A. Qoʻchqorov) tomonidan tasdiqlanadigan xarajatlar smetasiga muvofiq foydalaniladi.
6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — Turizmni rivojlantirish davlat qoʻmitasi raisi A.A. Abduxakimov, Oʻzbekiston Respublikasi Bosh vazirining oʻrinbosari — iqtisodiy taraqqiyot va kambagʻallikni qisqartirish vaziri J.A. Qoʻchqorov hamda Qashqadaryo viloyati hokimi Z.T. Mirzayev zimmasiga yuklansin.
Vazirlar Mahkamasining 2021-yil 1-martdagi 112-son qaroriga ILOVA
Qashqadaryo hududida turizmni rivojlantirish jamgʻarmasi mablagʻlarini shakllantirish va ulardan foydalanish tartibi toʻgʻrisida
1-bob. Umumiy qoidalar
1. Ushbu Nizom Qashqadaryo hududida turizmni rivojlantirish jamgʻarmasi (keyingi oʻrinlarda — Jamgʻarma) mablagʻlarini shakllantirish va ulardan foydalanish tartibini belgilaydi.
2. Jamgʻarma Qashqadaryo viloyati hokimligi (keyingi oʻrinlarda — Viloyat hokimligi) huzurida yuridik shaxs maqomisiz, mablagʻlardan keyinchalik turizm hamda unga bevosita bogʻliq boʻlgan infratuzilmani rivojlantirishda foydalanish uchun ularning jamlanishini taʼminlash maqsadida tashkil etiladi.
3. Viloyat hokimligi huzurida yuridik shaxs tashkil etmagan holda Loyiha ofisi tashkil etiladi va ushbu Loyiha ofisiga Qashqadaryo viloyati hokimining turizm va sportni rivojlantirish masalalari boʻyicha maslahatchisi rahbarlik qiladi.
2-bob. Jamgʻarma mablagʻlarini shakllantirish manbalari
4. Jamgʻarma quyidagi manbalar hisobiga shakllantiriladi:
Oʻzbekiston Respublikasining Tiklanish va taraqqiyot jamgʻarmasining 200 mlrd soʻm miqdoridagi mablagʻlari;
Jamgʻarmaning vaqtincha boʻsh mablagʻlarini Oʻzbekiston Respublikasi Markaziy banki va tijorat banklariga belgilangan tartibda depozitlarga Moliya vazirligi Gʻaznachiligiga buyurtmanomalar taqdim etish yoʻli bilan joylashtirishdan tushadigan daromadlar boʻyicha tushumlar;
qonun va qonunchilik hujjatlarida taqiqlanmagan boshqa manbalar.
5. Jamgʻarmaga tushadigan mablagʻlar Viloyat hokimligi tomonidan ochiladigan milliy va chet el valyutasidagi shaxsiy gʻazna hisobvaraqlarida jamlanadi.
3-bob. Jamgʻarma mablagʻlaridan foydalanish
6. Viloyat hokimligi tomonidan 2021-yil uchun 20-mart kuniga qadar hamda keyingi yillar uchun 1-dekabr kuniga qadar ushbu nizomning 10-bandida belgilangan tadbirlarni amalga oshirishni taʼminlash boʻyicha yillik manzilli dastur (keyingi oʻrinlarda — Dastur) loyihasi ishlab chiqiladi.
7. Dastur loyihasi Oʻzbekiston Respublikasi Turizm va madaniy meros vazirligi va Madaniyat vazirligi bilan majburiy tartibda kelishiladi va tasdiqlash uchun Vazirlar Mahkamasiga kiritiladi.
8. Viloyat hokimligi Oʻzbekiston Respublikasi Vazirlar Mahkamasi tomonidan tasdiqlangan Dasturda belgilangan xarajatlardan kelib chiqib, Jamgʻarmaning yillik daromadlar va xarajatlar smetasi loyihasini 2021-yil uchun 10-aprel kuniga hamda keyingi yillar uchun 20-dekabr kuniga qadar ishlab chiqadi va Moliya vazirligi, Turizm va madaniy meros vazirligi va Madaniyat vazirligi bilan kelishgan holda tasdiqlash uchun Vazirlar Mahkamasiga kiritadi.
9. Oʻzbekiston Respublikasi Vazirlar Mahkamasi tomonidan tasdiqlangan Dasturda belgilangan chora-tadbirlarni daromadlar va xarajatlar smetasiga qatʼiy amal qilgan holda bajarilishini taʼminlash uchun tegishli mablagʻlarni ajratish toʻgʻrisida Qashqadaryo viloyati hokimining farmoyishi qabul qilinadi.
Bunda, Qashqadaryo viloyati hokimining farmoyishi asosida Loyiha ofisi rahbari tomonidan toʻlov topshiriqnomalari rasmiylashtiriladi va pul mablagʻlarini chiqarish uchun viloyat moliya boshqarmasiga taqdim etiladi.
10. Jamgʻarma mablagʻlaridan quyidagi maqsadlarda foydalaniladi:
a) viloyatning turizm salohiyati mavjud hududlarida muhandislik-kommunikatsiya va turizm infratuzilmasini yaxshilash, yondosh infratuzilmani qurish, rekonstruksiya qilish, kengaytirish va modernizatsiya qilish ishlarini olib borish (yoʻl, elektr energiyasi, tabiiy gaz va suv taʼminoti, suv-oqava tizimlari, axborot-telekommunikatsiya tarmoqlari);
b) viloyatdagi moddiy madaniy meros obyektlarini konservatsiya va restavratsiya qilish;
v) turistik industriya, dor yoʻli, sihatgohlar va turizm zonalari va majmualari loyihalarining bosh reja va batafsil rejalashtirish loyihalarini tayyorlash xarajatlarini qoplash;
g) aeronavigatsiya vositalari va kichik sigʻimdagi havo kemalari (vertolyotlar, kichik dvigatelli samolyotlar va boshqalar) uchun uchish-qoʻnish maydonchalarini tashkil qilish;
d) viloyatdagi oilaviy mehmon uylari yoʻnalishida faoliyatini tashkil qilgan tadbirkorlik subyektlariga oilaviy mehmon uylari tashkil qilish xarajatlarining 30 foizgacha, lekin 10 mln soʻmdan oshmagan miqdorda, kamida 3 yil davomida faoliyat olib borish hamda belgilangan tartibda tashrif buyuruvchilarni avtomatlashtirilgan maxsus elektron dasturga kiritib borish sharti bilan subsidiyalar ajratish;
e) viloyatda zamonaviy sanitariya-gigiyena shoxobchalari, turistik axborot markazlari yoki tashrif markazlari (“visitor center”) tashkil qilish hamda turistik xaritalar, yoʻl koʻrsatkichlarini oʻrnatish;
yo) suvenir, hunarmandchilik va oziq-ovqat mahsulotlari savdo shohobchalari joylashtirilishini nazarda tutuvchi turistik koʻchalar, shuningdek, viloyatdagi yoʻllarda maxsus piyodalar va velosiped yoʻlaklarini tashkil qilish;
j) “turizm mahallasi”, “turizm qishlogʻi” loyihalarini amalga oshirish doirasida obodonlashtirish va sayyohlar uchun folklor-etnografik chiqishlarni tashkil qilish xarajatlarini qoplash;
z) viloyat turizm salohiyatini targʻib qilishga qaratilgan chora-tadbirlarni (targʻibot mahsulotlarini tayyorlash, xalqaro tadbirlar tashkil etish, xorijiy turoperatorlar, ommaviy axborot vositalari va boshqa tashkilotlar vakillari ishtirokida axborot turlari (infoturlar) tashkil qilish, xalqaro va mahalliy turizm koʻrgazmalarida ishtirok etish) moliyalashtirish.
11. Qashqadaryo viloyati hokimi Jamgʻarma mablagʻlarining tasarruf etuvchisi hisoblanadi. Bunda, Jamgʻarma mablagʻlarini “Davlat xaridlari toʻgʻrisida”gi Oʻzbekiston Respublikasi Qonuni talablariga qatʼiy amal qilgan holda tasarruf etiladi.
12. Jamgʻarma mablagʻlaridan garov, qarzdorning mol-mulkini ushlab qolish, kafillik va majburiyatlarni bajarishning boshqa usuli sifatida foydalanish, jamgʻarma mablagʻlari hisobidan ssudalar va kreditlar berishga yoʻl qoʻyilmaydi.
4-bob. Subsidiya ajratish tartibi va shartlari
13. Subsidiya 2021-yil 1-maydan 2022-yil 31-dekabrga qadar oilaviy mehmon uylari tashkil qilgan xususiy yoki oilaviy tadbirkorlik subyektlariga ushbu Nizomning 10-bandi “d” kichik bandida belgilangan shartlarga muvofiq ajratiladi.
14. Jamgʻarma tomonidan subsidiya ajratish ushbu Nizomning 1-ilovasiga muvofiq sxema asosida amalga oshiriladi.
15. Subsidiya olish uchun tadbirkorlik subyektlari har oyning 1-sanasidan 5-sanasiga qadar Viloyat hokimligiga ushbu Nizomning 2-ilovasiga muvofiq tasdiqlangan shaklda subsidiya olish toʻgʻrisidagi ariza bilan yozma yoki elektron shaklda murojaat qiladi.
16. Arizaga quyidagi hujjatlar ilova qilinadi:
ariza beruvchining nomi (F.I.O.), joylashgan joyi (pochta manzili), STIR va xizmat koʻrsatuvchi tijorat bankidagi hisobvaragʻi rekvizitlari toʻgʻrisidagi maʼlumotlar;
oilaviy mehmon uylari va xostellar yagona reyestriga kiritilganligini tasdiqlovchi hujjat nusxasi;
oilaviy mehmon uyi tashkil qilishga ketgan xarajatlarni tasdiqlovchi hujjatlar (shartnoma nusxasi, toʻlov cheklari/kvitansiyasi va boshqalar) nusxalari.
17. Ariza va unga ilova qilingan hujjatlarning asosliligi Viloyat hokimligi tomonidan tekshiriladi.
18. Viloyat hokimligi ariza kelib tushgan kundan boshlab besh ish kunida ariza va unga ilova qilingan hujjatlarning ushbu Nizom talablariga muvofiqligini oʻrganadi.
19. Viloyat hokimligi arizani koʻrib chiqqandan soʻng, bir ish kunida Qashqadaryo viloyati hokimi tomonidan subsidiya ajratish yoki rad etish toʻgʻrisida qaror qabul qilinadi va u bayonnoma bilan rasmiylashtiriladi. Qarorning nusxasi qaror qabul qilingan kunda ariza beruvchiga yuboriladi.
20. Subsidiya ajratish toʻgʻrisida ijobiy qaror qabul qilinganda, belgilangan tartibda bir ish kunida tadbirkorlik subyektiga zarur summani unga xizmat koʻrsatuvchi tijorat bankidagi hisobvaragʻiga belgilangan tartibda oʻtkazib beriladi.
21. Subsidiya ajratish rad etilgan taqdirda, rad etish uchun asos boʻlgan sabablar aniq koʻrsatib oʻtilgan qaror nusxasi ariza beruvchiga ushbu qaror qabul qilingan kunda yuboriladi.
Ariza beruvchi qarorni olgan kundan boshlab koʻpi bilan ikki hafta muddatda koʻrsatib oʻtilgan kamchiliklar bartaraf etilganligini tasdiqlovchi tegishli hujjatlarni ilova qilgan holda Viloyat hokimligiga takroran ariza bilan murojaat qilish huquqiga ega.
22. Subsidiya ajratish quyidagi asoslarga koʻra rad etilishi mumkin:
ushbu Nizomning 16-bandida koʻrsatib oʻtilgan hujjatlar taqdim qilinmagan yoki toʻliq hajmda taqdim qilinmaganligi;
taqdim etilgan hujjatlardagi maʼlumotlarning notoʻgʻriligi.
Subsidiya ajratishni ushbu bandda koʻrsatib oʻtilmagan boshqa asoslar boʻyicha rad etish mumkin emas.
23. Ariza takroran taqdim etilgan kundan boshlab uch ish kuni mobaynida Viloyat hokimligi tomonidan qayta koʻrib chiqiladi. Bunda yangi asoslar boʻyicha subsidiya ajratishni rad etish mumkin emas.
24. Ushbu Nizomning 21-bandi ikkinchi xatboshisida koʻrsatilgan muddat tugagandan keyin taqdim qilingan ariza yangidan berilgan ariza hisoblanadi.
25. Loyiha ofisi Viloyat hokimligining rasmiy saytida Jamgʻarma mablagʻlaridan subsidiya ajratilgan holda tashkil etilgan oilaviy mehmon uylari va arizalari rad etilgan shaxslarning roʻyxatini yuritadi.
Bunda, tashkil etilgan oilaviy mehmon uylari toʻgʻrisida, ularning manzillarini koʻrsatgan va fotosuratlarini ilova qilgan holda, targʻibot ishlari tashkil etiladi.
5-bob. Loyiha ofisining faoliyatini tashkil etish
26. Quyidagilar Loyiha ofisining asosiy vazifalari hisoblanadi:
a) ushbu Nizomning 10-bandida belgilangan maqsadlarni amalga oshirishga qaratilgan yillik manzilli dastur loyihasini (keyingi oʻrinlarda — Dastur) ishlab chiqish uchun Qashqadaryo viloyatida oʻrganish oʻtkazish va Dasturni shakllantirish;
b) Dastur asosida Jamgʻarmaning yillik daromadlar va xarajatlar smetasi loyihasini shakllantirish;
v) Dastur hamda Jamgʻarmaning yillik daromadlar va xarajatlar smetasi loyihalarini Qashqadaryo viloyat hokimiga taqdim etish;
g) Dastur hamda Jamgʻarmaning yillik daromadlar va xarajatlar smetasi loyihalarini Oʻzbekiston Respublikasi Turizm va madaniy meros vazirligi, Moliya vazirligi, Madaniyat vazirligi va Madaniy meros departamentiga kelishish uchun hamda Vazirlar Mahkamasiga tasdiqlash uchun kiritish maqsadida tegishli hujjatlarni tayyorlash;
d) Dasturda belgilangan chora-tadbirlarni daromadlar va xarajatlar smetasiga qatʼiy amal qilgan holda amalga oshirish uchun tegishli mablagʻlarni ajratish boʻyicha Qashqadaryo viloyati hokimining farmoyishi loyihalarini tayyorlash hamda toʻlov topshiriqnomalarini rasmiylashtirish;
e) Oʻzbekiston Respublikasi Vazirlar Mahkamasi tomonidan tasdiqlangan Dastur hamda Jamgʻarmaning yillik daromadlar va xarajatlar smetasining amalga oshirilishi boʻyicha doimiy monitoring olib borish va uning natijalari boʻyicha Qashqadaryo viloyati hokimiga axborot taqdim etish;
yo) Jamgʻarmaga mablagʻlar tushishi va ulardan foydalanilishi toʻgʻrisida, shu jumladan Dastur ijrosi va Jamgʻarmaning daromadlar va xarajatlar smetasiga toʻliq rioya etilayotgani boʻyicha Vazirlar Mahkamasiga taqdim etiladigan hisobotlarni tayyorlash;
j) Jamgʻarmaning maqsad va vazifalaridan kelib chiqib, targʻibot ishlarini olib borish;
z) Jamgʻarma mablagʻlaridan foydalangan holda amalga oshirilgan loyihalar toʻgʻrisida axborot tayyorlash va targʻibot ishlarini tashkil etish.
6-bob. Jamgʻarma mablagʻlaridan foydalanilishi yuzasidan hisobot va nazorat
27. Jamgʻarma mablagʻlaridan oqilona va maqsadli foydalanishni nazorat qilish har yil yakuni bilan keyingi yilning 1-fevral kuniga qadar belgilangan tartibda Davlat moliyaviy nazorati inspeksiyasi tomonidan amalga oshiriladi. Bunda 10-fevralga qadar amalga oshirilgan nazorat yakunlari boʻyicha Vazirlar Mahkamasiga axborot taqdim etiladi.
28. Qashqadaryo viloyati hokimi va Viloyat hokimligi bosh buxgalteri buxgalteriya hisobi toʻgʻri yuritilishi, Jamgʻarmaga mablagʻlar tushishi va ulardan foydalanilishi toʻgʻrisidagi hisobotlarni tuzish va taqdim etish boʻyicha belgilangan tartibda javobgar hisoblanadi.
29. Qashqadaryo viloyati hokimi Jamgʻarmaga mablagʻlar tushishi va ulardan foydalanilishi toʻgʻrisida, shu jumladan Yillik dastur ijrosi va Jamgʻarmaning daromadlar va xarajatlar smetasiga toʻliq rioya etilayotgani boʻyicha har chorak yakuni bilan keyingi oyning 20-kuniga qadar Moliya vazirligi va Vazirlar Mahkamasiga hisobot taqdim etadi.
30. Jamgʻarmaning foydalanilmagan mablagʻlari Oʻzbekiston Respublikasi Budjet kodeksida belgilangan tartibda keyingi yilga oʻtadi va olib qoʻyilmaydi.
31. Qashqadaryo viloyati hokimi Jamgʻarma mablagʻlaridan maqsadli foydalanilishi yuzasidan shaxsan javobgar hisoblanadi.
7-bob. Yakunlovchi qoida
32. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.
Qashqadaryo hududida turizmni rivojlantirish jamgʻarmasi mablagʻlarini shakllantirish va ulardan foydalanish tartibi toʻgʻrisida nizomga 1-ILOVA
Qashqadaryo hududida turizmni rivojlantirish jamgʻarmasi tomonidan oilaviy mehmon uyi tashkil qilish uchun subsidiya ajratish
Subyektlar Tadbirlar Bajarish muddati Ariza beruvchi Subsidiya olish uchun Hokimlikka yozma yoki elektron shaklda murojaat qiladi. Ariza beruvchining xohishiga koʻra Hokimlik Ariza va unga ilova qilingan hujjatlarni oʻrganib chiqadi. 5 ish kunida Hokimlik Subsidiya ajratish yoki rad etish toʻgʻrisida qaror qabul qiladi. Qarorning nusxasini qaror qabul qilingan kunda ariza beruvchiga yuboradi. 1 ish kunida Ariza beruvchi Rad etish toʻgʻrisidagi qarorni olgan taqdirda, kamchiliklarni bartaraf etib, tegishli hujjatlarni ilova qilgan holda Hokimlikka takroran ariza bilan murojaat qiladi. 14 kunda Hokimlik Takroran taqdim etilgan arizani qayta koʻrib chiqadi. 3 ish kunida Hokimlik Subsidiya ajratish toʻgʻrisida ijobiy qaror qabul qilinganda, zarur summani ariza beruvchiga uning xizmat koʻrsatuvchi tijorat bankidagi hisobvaragʻiga belgilangan tartibda oʻtkazib beradi. 1 ish kunida
Qashqadaryo hududida turizmni rivojlantirish jamgʻarmasi mablagʻlarini shakllantirish va ulardan foydalanish tartibi toʻgʻrisida nizomga 2-ILOVA
Qashqadaryo viloyati hokimligiga ARIZA ______________________________________________________________________________________________________________, (ariza beruvchining toʻliq nomi, F.I.O.) ______________________________________________________________________________________________________________ _____________________________________________________________________________________manzil boʻyicha roʻyxatdan oʻtgan (pochta manzili, telefon, faks) __________________________________________________________________________________________________shaxs nomidan, (oilaviy mehmon uyi egasining lavozimi, F.I.O.) ______________________________________________________________________________________________________________ _____________________________________________________________________________________________manzilda joylashgan (viloyat, tuman, shahar, koʻcha, bino raqami) _______________________________________________________________________________oilaviy mehmon uyi xizmati faoliyati (xonalar va joylar soni) yoʻlga qoʻyilganligi uchun tegishli subsidiya berilishini soʻrayman. STIR raqami:___________________________________________________________________________________________________ Elektron pochta manzili: __________________________________________________________________________________________ _____________________________ Sana _________________ (shaxsiy imzo)
Oʻzbekiston Respublikasining Bosh vaziri A. ARIPOV
Toshkent sh.,
2021-yil 1-mart,
112-son