UzbekAI

Ўзбекистон Республикаси Вазирлар Маҳкамасининг

қарори

НИЗОМ

Ўзбекистон Республикаси Ўрмон хўжалиги давлат қўмитаси ҳузуридаги Доривор ўсимликларни етиштириш ва қайта ишлаш илмий-ишлаб чиқариш маркази тўғрисидаги низомни тасдиқлаш ҳақида

Ўзбекистон Республикаси Президентининг «Доривор ўсимликларни етиштириш ва қайта ишлаш, уларнинг уруғчилигини йўлга қўйишни ривожлантириш бўйича илмий тадқиқотлар кўламини кенгайтиришга оид чора-тадбирлар тўғрисида» 2020 йил 26 ноябрдаги ПҚ-4901-сон қарори ижросини таъминлаш мақсадида Вазирлар Маҳкамаси қарор қилади:

1. Ўзбекистон Республикаси Президентининг «Доривор ўсимликларни етиштириш ва қайта ишлаш, уларнинг уруғчилигини йўлга қўйишни ривожлантириш бўйича илмий тадқиқотлар кўламини кенгайтиришга оид чора-тадбирлар тўғрисида» 2020 йил 26 ноябрдаги ПҚ-4901-сон қарорининг 1-бандига мувофиқ Ўрмон хўжалиги давлат қўмитаси ҳузурида давлат муассасаси шаклидаги Доривор ўсимликларни етиштириш ва қайта ишлаш илмий-ишлаб чиқариш маркази (кейинги ўринларда — Марказ) ташкил этилганлиги маълумот учун қабул қилинсин.

2. Қуйидагиларни назарда тутувчи Ўзбекистон Республикаси Ўрмон хўжалиги давлат қўмитаси ҳузуридаги Доривор ўсимликларни етиштириш ва қайта ишлаш илмий-ишлаб чиқариш маркази тўғрисидаги низом иловага мувофиқ тасдиқлансин:

Марказнинг мақоми, асосий вазифалари ва функциялари;

Марказнинг ҳуқуқлари ҳамда жавобгарлиги, шунингдек, унинг фаолиятини ташкил этиш тартиби;

Марказ фаолиятини молиялаштириш, Марказга тушадиган маблағларни йўналтириш ва ходимларини моддий рағбатлантириш тартиби.

3. Ўзбекистон Республикаси Ўрмон хўжалиги давлат қўмитаси манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.

4. Мазкур қарорнинг бажарилишини назорат қилиш Ўзбекистон Республикаси Бош вазирининг аграр ва озиқ-овқат соҳаларини ривожлантириш масалалари бўйича ўринбосари Ш.М. Ғаниев ва Ўзбекистон Республикаси Ўрмон хўжалиги давлат қўмитаси раиси Н.Ж. Бакиров зиммасига юклансин.

Вазирлар Маҳкамасининг 2021 йил 9 мартдаги 124-сон қарорига ИЛОВА

Ўзбекистон Республикаси Ўрмон хўжалиги давлат қўмитаси ҳузуридаги доривор ўсимликларни етиштириш ва қайта ишлаш илмий-ишлаб чиқариш маркази тўғрисида

1-боб.Умумий қоидалар

1. Ушбу Низом Ўзбекистон Республикаси Ўрмон хўжалиги давлат қўмитаси (кейинги ўринларда — Қўмита) ҳузуридаги Доривор ўсимликларни етиштириш ва қайта ишлаш илмий-ишлаб чиқариш марказининг (кейинги ўринларда — Марказ) мақоми, асосий вазифалари ва функциялари, ҳуқуқлари ва жавобгарлигини, шунингдек, фаолиятини ташкил этиш тартибини белгилайди.

2. Марказ республикада доривор ўсимликларни илмий асосда етиштириш ва қайта ишлаш, улардан оқилона фойдаланишнинг ягона стратегиясини шакллантириш ва амалга ошириш, ишлаб чиқаришга илмий асосланган технологияларни жорий этиш, доривор ўсимликлар плантацияларини барпо этиш, чет эл флорасига мансуб бўлган доривор ўсимликлар турларини иқлимлаштириш, нав намуналарини синовдан ўтказиш, танлаш, доривор ўсимликлар хомашёси ва улардан олинадиган маҳсулотларни сертификатлаш ва стандартлаштиришни амалга ошириш ҳамда ривожлантириш бўйича республика илмий-ишлаб чиқариш давлат муассасаси ҳисобланади.

3. Марказ Қўмитага бўйсунади ва ҳисобот беради.

4. Марказ ўз фаолиятида Ўзбекистон Республикаси Конституцияси ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, Қўмита ҳайъати йиғилиши қарорлари, буйруқлари ва топшириқларига ҳамда мазкур Низомга, шунингдек, бошқа қонунчилик ҳужжатларига амал қилади.

5. Марказ ўз фаолиятини давлат бошқаруви органлари, хўжалик бирлашмалари, Ўзбекистон Фанлар академияси, илмий-текшириш институтлари, маҳаллий давлат ҳокимияти органлари, нодавлат нотижорат ташкилотлар, хорижий ва халқаро ҳамда бошқа ташкилотлар билан ҳамкорликда амалга оширади.

6. Марказ юридик шахс ҳисобланади, Ўзбекистон Республикасининг Давлат герби тасвири ва ўз номи туширилган муҳр ва бланкаларга, мустақил балансга, Ўзбекистон Республикаси Молия вазирлигининг Ғазначилигида ҳисобварақларига, банк, шу жумладан чет эл валютасидаги ҳисобварақларига эга бўлади.

7. Марказнинг расмий номи:

а) давлат тилида:

тўлиқ номи — Ўзбекистон Республикаси Ўрмон хўжалиги давлат қўмитаси ҳузуридаги Доривор ўсимликларни етиштириш ва қайта ишлаш илмий-ишлаб чиқариш маркази;

қисқартирилган номи — Илмий-ишлаб чиқариш маркази (ИИЧМ);

б) рус тилида:

тўлиқ номи — Научно-производственный центр по выращиванию и переработке лекарственных растений при Государственном комитете по лесному хозяйству Республики Узбекистан;

қисқартирилган номи — Научно-производственный центр (НПЦ);

в) инглиз тилида:

тўлиқ номи — Research and production center for growingand processing medicinal plants under the state Forestry Committee of the Republic of Uzbekistan;

қисқартирилган номи — Research and production center (RPC);

г) лотин алифбосида:

тўлиқ номи — Oʻzbekiston Respublikasi Oʻrmon xoʻjaligi davlat qoʻmitasi huzuridagi Dorivor oʻsimliklarni yetishtirish va qayta ishlash ilmiy-ishlab chiqarish markazi;

қисқартирилган номи — Ilmiy-ishlab chiqarish markazi (IIChM).

8. Марказ жойлашган жой (почта манзили): 111104, Тошкент вилояти, Тошкент тумани, Дархон қўрғони, Чимкент йўли кўчаси, 2-уй.

2-боб. Марказнинг асосий вазифалари ва функциялари

9. Қуйидагилар Марказнинг асосий вазифалари ҳисобланади:

доривор ўсимликларни илмий асосда етиштириш ва қайта ишлаш, улардан оқилона фойдаланишнинг ягона стратегиясини шакллантириш ва амалга ошириш;

республика ҳудудидаги ёввойи ҳолда ўсувчи доривор ўсимликлар ареалларини ўрганиш ва захираларини аниқлаш, мавжуд биоресурслар генофондини сақлаш, оналик плантацияларини ташкил этиш;

уруғлик материалларни етиштириш ва тайёрлаш, кўпайтириш, коллекцион кўчатхоналар ташкил этиш ҳамда уларнинг хомашёларини қайта ишлаш билан боғлиқ илмий ва амалий тадқиқотларни олиб бориш;

доривор ўсимликларни муайян тупроқ-иқлим шароитларини ҳисобга олган ҳолда маданий ҳолда етиштиришни йўлга қўйиш бўйича аниқ илмий асосланган таклифлар ишлаб чиқиш;

тупроқ-иқлим шароитларини ҳисобга олиб маданий ҳолда етиштириладиган доривор ўсимликларнинг агротехнологик хариталарини Қишлоқ хўжалиги вазирлиги ва Қўмита буюртмасига кўра ишлаб чиқиш;

доривор ўсимликлар кимёвий таркибини ўрганиш, маҳсулотини стандартлаш ва амалдаги қонун ҳужжатларига мувофиқ сертификатлаш;

доривор ўсимликларга бўлган ички ва ташқи бозорлар талабини ўрганиш бўйича маркетинг тадқиқотлари олиб бориш;

доривор ўсимликлар етиштирувчи ва қайта ишловчи фермер хўжаликлари, ташкилотлар ва бошқа субъектлар раҳбарлари ва мутахассисларининг малакасини ошириб боришга йўналтирилган дастурларни тайёрлаш ва ўқитиш тизимини ташкил этиш.

10. Марказ ўзига юкланган асосий вазифаларга мувофиқ қуйидаги функцияларни амалга оширади:

а) доривор ўсимликларни илмий асосда етиштириш ва қайта ишлаш, улардан оқилона фойдаланишнинг ягона стратегиясини шакллантириш ва амалга ошириш соҳасида:

доривор ўсимликларни етиштириш, тайёрлаш, қайта ишлаш соҳасига замоновий технологияларни жорий этиш, ривожлантириш ва самарадорлигини ошириш, мавжуд муаммоларни доимий ўрганиш, уларни бартараф этиш юзасидан Вазирлар Маҳкамасига таклифлар киритиб бориш;

доривор ўсимликларни етиштириш, тайёрлаш ҳажмларини ошириш ва турларини кўпайтиришни ички ва ташқи бозор эҳтиёжларидан келиб чиққан ҳолда тизимли ўрганиш;

илмий-тадқиқот ва олий таълим муассасалари томонидан амалга оширилган доривор ўсимликларга доир илмий тадқиқотлар, янги инновацион ишланмалар бўйича маълумотлар базасини шакллантириш ва тизимли равишда янгиланиб борилишини амалга ошириш;

республикада фаолият олиб бораётган илмий-тадқиқот муассасалари томонидан амалга оширилаётган соҳага оид лойиҳаларни таҳлил қилиш ва натижаларига кўра хулоса бериш;

б) республика ҳудудидаги ёввойи ҳолда ўсувчи доривор ўсимликлар ареалларини ўрганиш ва захираларини аниқлаш, мавжуд биоресурслар генофондини сақлаш, оналик плантацияларини ташкил этиш соҳасида:

тегишли илмий-тадқиқот муассасалари билан ҳамкорликда ёввойи ҳолда ўсувчи доривор ўсимликлар ареалларини ва захираларини ўрганиш борасида илмий-тадқиқотлар олиб боришни ташкил этиш ва натижалари бўйича ишланмалар, таклифлар ишлаб чиқиш;

ёввойи ҳолда ўсувчи доривор ўсимликлар нав-намуналарини йиғиш ва улардан доривор моддалари энг кўп тўпланадиган нав-намуналарни аниқлаш ва селекция йўли билан янги навларни яратишни йўлга қўйиш;

ҳудудларнинг табиий-иқлим шароитидан келиб чиқиб ихтисослашган ўрмон хўжаликларида доривор ўсимликларнинг оналик плантацияларини барпо этиш ва тадқиқот ишларини ташкил этиш;

мавжуд биоресурслар генофондини сақлаш борасида илмий-тадқиқот ишларини амалга ошириш ва унга маҳаллий ҳамда хорижий инвесторларнинг инвестицияларини, халқаро молия институтлари грантларини жалб этиш;

ўрмон фонди ерларида доривор ўсимликларнинг қатъий ҳисобини юритиш;

в) уруғлик материалларни етиштириш ва тайёрлаш, кўпайтириш, коллекцион кўчатхоналар ташкил этиш ҳамда уларнинг хомашёларини қайта ишлаш билан боғлиқ илмий ва амалий тадқиқотларни олиб бориш соҳасида:

доривор ўсимликларнинг камайиб бораётган ноёб турларини сақлаш ва кўпайтиришни ташкил этиш;

янги турдаги доривор ўсимликларни маданийлаштириш бўйича ихтисослашган ўрмон хўжаликларида уруғчилик тажриба участкаларини ташкил этиш;

ихтисослашган ўрмон хўжаликларида доривор ўсимликларнинг, айниқса, камайиб бораётган ноёб турдаги доривор ўсимликларнинг коллекцион кўчатхоналарини ташкил этиш ҳамда хомашёсини тайёрлаш ва қайта ишлаш билан боғлиқ илмий ва амалий тадқиқотлар олиб бориш;

г) доривор ўсимликларни муайян тупроқ-иқлим шароитларини ҳисобга олган ҳолда маданий ҳолда етиштиришни йўлга қўйиш бўйича аниқ илмий асосланган таклифлар ишлаб чиқиш соҳасида:

ички ва ташқи бозор эҳтиёжларини ўрганиш асосида ўрмон хўжаликлари ва бошқа доривор ўсимликлар етиштирувчи субъектлар бўйича доривор ўсимликларни ривожлантириш бўйича «йўл харитаси»ни ишлаб чиқиш;

ҳудудларнинг тупроқ-иқлим шароитларидан келиб чиқиб доривор ўсимликларни илмий асосланган ҳолда жойлаштириш бўйича таклифлар ишлаб чиқиш;

табиий ҳолда ўсадиган доривор ўсимликларни маданийлаштириш, чет эл флорасига мансуб бўлган доривор ўсимликларни маҳаллий шароитда уруғларидан кўпайтириш ва интродукциялашни йўлга қўйиш;

д) тупроқ-иқлим шароитларини ҳисобга олиб маданий ҳолда етиштириладиган доривор ўсимликларнинг агротехнологик хариталарини Қишлоқ хўжалиги вазирлиги ва Ўрмон хўжалиги давлат қўмитаси буюртмасига кўра ишлаб чиқиш соҳасида:

агротехнолик хариталарни ишлаб чиқиш бўйича доривор ўсимлик турларини аниқлаш ва рўйхатини шакллантириш;

агротехнолик хариталарни ишлаб чиқиш учун кетадиган сарф-харажатларни аниқлаш ва белгиланган тартибда молиялаштириш учун маблағларни йўналтириш;

тегишли илмий-тадқиқот муассасалари билан ҳамкорликда доривор ўсимликларни маданий ҳолда етиштиришни илмий асосланган ҳолда ташкил этиш ва сарф-харажатларни белгилаш мақсадида агротехнологик хариталарни ишлаб чиқишни амалга ошириш;

е) доривор ўсимликлар кимёвий таркибини ўрганиш, маҳсулотини стандартлаш ва амалдаги қонун ҳужжатларига мувофиқ сертификатлаш соҳасида:

доривор ўсимликлар соҳасида халқаро стандартлар талабларини доимий ўрганиш;

лаборатория жиҳозларининг халқаро стандарт талабларига мослигини таъминлаш;

соҳага малакали мутахассисларни жалб этиш ва уларнинг тажриба ҳамда кўникмаларини ошириб бориш;

маҳсулотларни стандартлаш ва сертификатлаш бўйича ривожланган мамлакатлар илмий-тадқиқот муассасалари билан ҳамкорликни йўлга қўйиш ва уларнинг тажрибасини ўрганиш ва жорий этиш;

соҳага илғор технолигияларни жалб этиш ва уларни қўллаш ошириш;

доривор ўсимликлар маҳсулотларини ишлаб чиқаришнинг халқаро стандартларга мувофиқлигини назорат қилиш механизмларини ишлаб чиқиш;

лабораторияни замоновий жиҳозлар билан таъминлашга хорижий институт ҳамда донорларнинг маблағларини жалб этиш;

илмий лойиҳалар доирасида доривор ўсимликларнинг иқлим шароитига мос ҳолда ўсиши ва ривожланиши ҳамда олинган маҳсулотларнинг кимёвий таркиби мослиги бўйича доривор ўсимликларнинг ҳар бир тури ва навига алоҳида лицензия беришни ёки белгиланган тартибда аккредитациядан ўтган сертификатлаш органи томонидан сертификатлашни амалга ошириш;

ё) доривор ўсимликларга бўлган ички ва ташқи бозорлар талабини ўрганиш бўйича маркетинг тадқиқотлари олиб бориш соҳасида:

доривор ўсимликларга бўлган бозор талабларини ўрганиш бўйича жаҳон тажрибасини ўрганиш ва амалиётга жорий этиш;

соҳага малакали мутахассисларни жалб этиш ва маркетинг тадқиқотлари ўтказиш;

ички ва ташқи бозорлар талаблари асосида доривор ўсимликларни етиштириш бўйича таклифларни ишлаб чиқиш ҳамда Қишлоқ хўжалиги вазирлигига ва Ўрмон хўжалиги давлат қўмитасига киритиш;

ж) доривор ўсимликлар етиштирувчи ва қайта ишловчи фермер хўжаликлари, ташкилотлар ва бошқа субъектлар раҳбарлари ва мутахассисларининг малакасини ошириб боришга йўналтирилган дастурларни тайёрлаш ва ўқитиш тизимини ташкил этиш соҳасида:

соҳада илмий ходимларни тайёрлашни, фаолият кўрсатаётган ходимларни қайта тайёрлаш ва уларнинг малакасини оширишни ташкил этиш;

доривор ўсимликларни етиштириш, қуритиш, қайта ишлаш, маркетинг йўналиши бўйича раҳбар ва мутахассисларнинг малакасини оширишга қаратилган йиллик ўқув дастурларини ишлаб чиқиш;

маҳаллий ҳокимликлар ва вилоят ўрмон хўжаликлари бошқармалари билан биргаликда доривор ўсимликларни етиштирувчи ва қайта ишловчи фермер хўжаликлари, ташкилотлар ва бошқа субъектлар бўйича малака ошириш ўқув дастурларини ўтказиш график-жадвалини тайёрлаш хамда амалга ошириш механизимини ишлаб чиқиш;

республикада ҳамда хорижда соҳа раҳбарлари ва мутахассисларини қайта тайёрлаш ва уларнинг малакасини оширишни ташкил этишда қатнашиш.

11. Марказ қонунчилик ҳужжатларига мувофиқ бошқа функцияларни ҳам бажариши мумкин.

3-боб. Марказнинг ҳуқуқлари ва жавобгарлиги

12. Марказ ўзига юкланган асосий вазифалар ва функцияларни амалга ошириш учун қуйидаги ҳуқуқларга эга:

доривор ўсимликларни тўплаш (ғамлаш), уларни олиб кириш ва ташқарига олиб чиқишга рухсатномалар бериш;

илмий-тадқиқот ишларининг режаларини, иш дастурлари ва бажариш усулларини ҳамда илмий ҳисоботларни муҳокама қилиш мақсадида илмий кенгаш ташкил этиш;

республикада фаолият олиб бораётган илмий-тадқиқот муассасалари томонидан амалга ошириладиган соҳага оид илмий-тадқиқот ишларини мувофиқлаштиришда уларга кўмаклашиш;

доривор ўсимликларни етиштирувчи хўжалик субъектларига соҳани илмий асосда юритиш борасида илмий-методик ёрдам бериш;

соҳада амалга оширилиши режалаштирилган илмий-тадқиқот ишларининг кўлами ва долзарблигини инобатга олган ҳолда ихтисослаштирилган ўрмон хўжаликлари бизнес-режаларини қайта кўриб чиқиш ва ўзгартиришлар киритиш;

илмий-тадқиқот ишлари самарадорлигини таъминлаш ва тизимли амалга ошириш мақсадида илмий-тадқиқот муассасалари билан ҳамкорликни йўлга қўйиш;

дориворчилик соҳасида бошқа илмий-тадқиқот институтлари ва олий таълим муассасалари томонидан амалиётга жорий этишга тавсия қилинган ишланмаларни ўрганиш ва хулоса бериш;

илмий ишлар тўпламлари, монографиялар, дарсликлар, тавсияномалар ва брошюраларни, оммавий ахборот воситаларида илмий-оммабоп мақолаларни чоп эттириш;

соҳада илм-фан ютуқлари жорий этилишида муаллифлик назоратини олиб бориш;

жисмоний ва юридик шахсларга доривор ўсимликлар уруғлик материалларини етказиб бериш;

доривор ўсимликларни етиштириш, тайёрлаш ва қайта ишлаш соҳаси самарадорлигини ошириш, захираларидан тежамли фойдаланиш ва замонавий технологияларни жорий этиш борасида илмий-тадқиқот ишлари олиб бориш;

доривор ўсимликларни етиштириш ва қайта ишлаш, муҳофаза қилиш, улардан фойдаланиш, уларнинг майдонини кенгайтириш, ихтисослашган давлат ўрмон хўжаликларини ривожлантириш, уларнинг самарадорлигини ошириш;

жойларда соҳанинг илм-фан, илмий-тадқиқот йўналишларини ривожлантириш мақсадида белгиланган тартибда таянч пунктлари, тажриба участкаларини ташкил этиш;

шартнома асосида илмий-тадқиқот ишларини бажариш, илмий-методик хизматлар кўрсатиш;

бюджет ва Ўрмон хўжалигини ривожлантириш жамғармасидан ажратилган маблағлар бўйича белгиланган тартибда бухгалтерия ва ҳисоб-китоб ишларини олиб бориш;

Марказнинг фаолият тури бўйича товарлар (ишлар, хизматлар) ишлаб чиқариш ва сотиш ҳисобидан тушган пул маблағларидан белгиланган тартибда фойдаланиш;

қонун ҳужжатларига мувофиқ давлат, нодавлат ва нотижорат ташкилотлар, хорижий ташкилотлар билан ҳамкорлик қилиш;

соҳага оид қонун ҳужжатлари, давлат ва маҳаллий дастурлар лойиҳаларини ишлаб чиқиш ва Қўмитага тақдим этиш;

Марказ ходимларининг меҳнатига ҳақ тўлаш ва уларни моддий рағбатлантиришни қонунчилик ҳужжатларида белгиланган тартибда амалга ошириш;

Марказга тегишли иншоотлар, асбоб-ускуналар, транспорт воситаларидан оқилона фойдаланиш, сақлаш, бошқариш;

меҳнатни муҳофаза қилишни таъминлаш, техника хавфсизлиги қоидалари ва ишлаб чиқариш санитариясига риоя қилишни назорат қилиш;

давлат ўрмон хўжаликлари ходимларини қайта тайёрлаш ва малакасини ошириш ишларида иштирок этиш;

ўрмон фонди ерларида доривор ўсимликларнинг мониторинги, кадастри ҳисобини белгиланган тартибда олиб бориш;

Ўзбекистон Республикаси Қизил китобини юритишда иштирок этиш;

Марказнинг йиллик харажатлар сметасини, штат бирликлари жадвалларини ишлаб чиқиш ва Қўмитага киритиш;

республикада фаолият олиб бораётган доривор ўсимликларни етиштирувчи, тайёрловчи ва қайта ишловчи хўжалик субъектлари томонидан амалга оширилаётган ишларнинг доимий мониторингини олиб бориш ва мувофиқлаштириш;

барча ўрмон хўжаликларининг доривор ўсимликларни етиштириш, тайёрлашни амалга ошириш тўғрисидаги ҳисоботлар йилнинг ҳар чорагида тақдим этилишини ташкил этиш, қабул қилиб олиш, ўрганиш, таҳлил қилиш, жамлаш, мониторинг олиб бориш, тегишли чора-тадбирларни ишлаб чиқиш;

ихтисослаштирилган давлат ўрмон хўжаликларининг иқтисодий-молиявий ва ишлаб чиқариш ҳисоботлари йилнинг ҳар чорагида тақдим этилишини ташкил этиш, қабул қилиб олиш, ўрганиш, таҳлил қилиш, жамлаш, мониторингини юритиш, тегишли чора-тадбирлар кўриш.

Марказ қонунчилик ҳужжатларига мувофиқ бошқа ҳуқуқларга ҳам эга бўлиши мумкин.

13. Марказ амалга оширилган чора-тадбирлар, эришилган ютуқлар, амалиётдаги муаммолар ва уларнинг ечими бўйича таклифларни ҳар чоракда тааллуқлилигига қараб Қўмита ҳамда Қишлоқ хўжалиги вазирлигига тақдим этиб боради.

Марказ ва унинг мансабдор шахслари ўзларига юкланган асосий вазифалар ва функцияларнинг самарали бажарилиши учун жавоб берадилар.

4-боб. Марказ фаолиятини ташкил этиш

14. Марказга Қўмита раиси томонидан лавозимга тайинланадиган ва лавозимидан озод этиладиган бош директор раҳбарлик қилади.

Бош директорнинг икки нафар ўринбосари бўлади, улар бош директорнинг тақдимномасига асосан Қўмита раиси томонидан лавозимга тайинланади ва лавозимидан озод этилади.

Марказ бош бухгалтери Қўмита билан келишган ҳолда бош директор томонидан лавозимга тайинланади ва лавозимдан озод этилади.

15. Бош директор:

Марказ фаолиятига умумий раҳбарлик қилади ҳамда Марказга юкланган вазифалар ва функцияларнинг бажарилиши учун шахсан жавоб беради;

давлат органларида ва бошқа ташкилотларда Марказ номидан вакиллик қилади ёхуд Марказ номидан ишончнома ва (ёки) ваколатлар беради;

белгиланган умумий штатлар сони доирасида Марказнинг штат жадвалини тасдиқлайди;

Марказга ажратилган молиявий ва моддий маблағларни белгиланган тартибда бошқаради;

Марказ фаолият йўналиши бўйича ходимлар бажариши мажбурий бўлган буйруқлар чиқаради ва кўрсатмалар беради;

меҳнат тўғрисидаги қонун ҳужжатлари талабларига мувофиқ Марказ ходимларини ишга қабул қилади ва улар билан тузилган меҳнат шартномаларини бекор қилади;

Марказда фаолият юритаётган ходимларни рағбатлантириш ва интизомий жавобгарликка тортиш масалаларини ҳал этади, алоҳида ўрнак кўрсатган ходимларни фахрий унвонлар бериш ва Ўзбекистон Республикасининг давлат мукофотлари билан тақдирлаш учун Қўмитага тақдимнома киритади;

қонун билан тақиқланмаган барча турдаги шартномаларни тузади, имзолайди, Марказ номидан банк ва бошқа муассасаларда барча молиявий операцияларни амалга оширади;

доривор ўсимликларни тўплаш (ғамлаш), уларни олиб кириш ва ташқарига олиб чиқишга рухсатномалар беради.

Бош директор қонунчилик ҳужжатларига мувофиқ бошқа ваколатларга ҳам эга бўлади.

16. Бош директорнинг ўринбосарлари:

Марказ таркибий бўлинмаларига бевосита раҳбарлик қилади ва Марказга юкланган вазифалар ва функцияларнинг бажарилиши учун шахсан жавоб беради;

Марказ бош директори томонидан ўзларига юкланган бошқа функцияларни амалга оширади.

Марказнинг илмий ва инновациялар ҳамда ишлаб чиқариш фаолиятини ташкил қилади, Марказга юкланган вазифалар ва функцияларнинг бажарилиши учун шахсан жавоб беради;

ўрмон фонди ерларида доривор ўсимликларни жойлаштириш, етиштириш, сақлаш, қайта ишлашни ташкил этади, мувофиқлаштиради ва назоратни амалга оширади.

17. Марказда бош директор тавсияси асосида таркиби ва низоми Қўмита раиси томонидан тасдиқланадиган Илмий кенгаш тузилади.

Илмий кенгаш таркибига Марказнинг соҳада етук ва юқори малакага эга бўлим ва лабораториялар бошлиқлари, етакчи илмий ходимлар, касаба уюшмасининг вакиллари, шунингдек, юқори ташкилот, илмий муассасалар вакиллари киритилади.

5-боб. Марказ фаолиятини молиялаштириш ва ходимларини моддий рағбатлантириш

18. Қуйидагилар Марказ фаолиятини молиялаштириш манбалари ҳисобланади:

Марказнинг Қўмита тизимидаги мавжуд штат бирликларини мақбуллаштириш ҳисобига шакллантирилган бошқарув ходимларининг штат бирликлари бўйича Ўзбекистон Республикаси Давлат бюджети маблағлари;

Ўрмон хўжалигини ривожлантириш жамғармаси маблағлари;

хизмат кўрсатиш ва ўзи етиштирган доривор ўсимликларни сотишдан тушадиган даромадлар;

халқаро ва хорижий ҳукумат, халқаро молиявий ташкилотлар, молия институтлари ва бошқа донорларнинг грантлари ва кредитлари (қарзлари);

Марказнинг вақтинча бўш турган бюджетдан ташқари маблағларини тижорат банкларининг депозитларига жойлаштиришдан олинган даромадлар;

қонунчилик ҳужжатлари билан тақиқланмаган бошқа манбалар.

19. Марказ қонунчилик ҳужжатларида белгиланган тартибда соҳа ходимларининг ҳаётини суғурталаш, уларни моддий ва маънавий рағбатлантириш ҳамда ижтимоий муҳофаза қилиш тадбирларини амалга оширади.

Марказ ходимлари меҳнатига ҳақ тўлаш, уларни рағбатлантириш, мукофотлаш ва бошқа рағбатлантиришлар қонунчилик ҳужжатларида белгиланган тартибда амалга оширилади.

20. Марказ ходимларини моддий рағбатлантириш тўғрисидаги низом белгиланган тартибда Қўмита раиси томонидан тасдиқланади.

6-боб. Марказга тушадиган маблағларни йўналтириш

21. Доривор ўсимликларни тўплаш (ғамлаш), уларни олиб кириш ва олиб чиқишга рухсатномалар берганлик, аризаларни кўриб чиққанлик учун ундириладиган ва маҳаллий бюджетга йўналтириладиган тўловларнинг 20 фоизи Марказ томонидан табиий ҳолда ўсувчи, шу жумладан, йўқолиб бораётган доривор ўсимликларни сақлаш, хатловдан ўтказиш, уларнинг маданий плантацияларини яратиш, оналик кўчатзорларини ташкил этиш, доривор ўсимликларни етиштиришга доир технологик хариталарни ишлаб чиқиш харажатларини қоплаш учун йўналтирилади.

7-боб. Якунловчи қоида

22. Марказни қайта ташкил этиш ва тугатиш қонунчилик ҳужжатларида белгиланган тартибда амалга оширилади.

Ўзбекистон Республикасининг Бош вазири А. АРИПОВ

Тошкент ш.,

2021 йил 9 март,

124-сон

(Қонун ҳужжатлари маълумотлари миллий базаси, 10.03.2021 й., 09/21/124/0194-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

Oʻzbekiston Respublikasi Oʻrmon xoʻjaligi davlat qoʻmitasi huzuridagi Dorivor oʻsimliklarni yetishtirish va qayta ishlash ilmiy-ishlab chiqarish markazi toʻgʻrisidagi nizomni tasdiqlash haqida

Oʻzbekiston Respublikasi Prezidentining “Dorivor oʻsimliklarni yetishtirish va qayta ishlash, ularning urugʻchiligini yoʻlga qoʻyishni rivojlantirish boʻyicha ilmiy tadqiqotlar koʻlamini kengaytirishga oid chora-tadbirlar toʻgʻrisida” 2020-yil 26-noyabrdagi PQ-4901-son qarori ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Dorivor oʻsimliklarni yetishtirish va qayta ishlash, ularning urugʻchiligini yoʻlga qoʻyishni rivojlantirish boʻyicha ilmiy tadqiqotlar koʻlamini kengaytirishga oid chora-tadbirlar toʻgʻrisida” 2020-yil 26-noyabrdagi PQ-4901-son qarorining 1-bandiga muvofiq Oʻrmon xoʻjaligi davlat qoʻmitasi huzurida davlat muassasasi shaklidagi Dorivor oʻsimliklarni yetishtirish va qayta ishlash ilmiy-ishlab chiqarish markazi (keyingi oʻrinlarda — Markaz) tashkil etilganligi maʼlumot uchun qabul qilinsin.

2. Quyidagilarni nazarda tutuvchi Oʻzbekiston Respublikasi Oʻrmon xoʻjaligi davlat qoʻmitasi huzuridagi Dorivor oʻsimliklarni yetishtirish va qayta ishlash ilmiy-ishlab chiqarish markazi toʻgʻrisidagi nizom ilovaga muvofiq tasdiqlansin:

Markazning maqomi, asosiy vazifalari va funksiyalari;

Markazning huquqlari hamda javobgarligi, shuningdek, uning faoliyatini tashkil etish tartibi;

Markaz faoliyatini moliyalashtirish, Markazga tushadigan mablagʻlarni yoʻnaltirish va xodimlarini moddiy ragʻbatlantirish tartibi.

3. Oʻzbekiston Respublikasi Oʻrmon xoʻjaligi davlat qoʻmitasi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining agrar va oziq-ovqat sohalarini rivojlantirish masalalari boʻyicha oʻrinbosari Sh.M. Gʻaniyev va Oʻzbekiston Respublikasi Oʻrmon xoʻjaligi davlat qoʻmitasi raisi N.J. Bakirov zimmasiga yuklansin.

Vazirlar Mahkamasining 2021-yil 9-martdagi 124-son qaroriga ILOVA

Oʻzbekiston Respublikasi Oʻrmon xoʻjaligi davlat qoʻmitasi huzuridagi dorivor oʻsimliklarni yetishtirish va qayta ishlash ilmiy-ishlab chiqarish markazi toʻgʻrisida

1-bob.Umumiy qoidalar

1. Ushbu Nizom Oʻzbekiston Respublikasi Oʻrmon xoʻjaligi davlat qoʻmitasi (keyingi oʻrinlarda — Qoʻmita) huzuridagi Dorivor oʻsimliklarni yetishtirish va qayta ishlash ilmiy-ishlab chiqarish markazining (keyingi oʻrinlarda — Markaz) maqomi, asosiy vazifalari va funksiyalari, huquqlari va javobgarligini, shuningdek, faoliyatini tashkil etish tartibini belgilaydi.

2. Markaz respublikada dorivor oʻsimliklarni ilmiy asosda yetishtirish va qayta ishlash, ulardan oqilona foydalanishning yagona strategiyasini shakllantirish va amalga oshirish, ishlab chiqarishga ilmiy asoslangan texnologiyalarni joriy etish, dorivor oʻsimliklar plantatsiyalarini barpo etish, chet el florasiga mansub boʻlgan dorivor oʻsimliklar turlarini iqlimlashtirish, nav namunalarini sinovdan oʻtkazish, tanlash, dorivor oʻsimliklar xomashyosi va ulardan olinadigan mahsulotlarni sertifikatlash va standartlashtirishni amalga oshirish hamda rivojlantirish boʻyicha respublika ilmiy-ishlab chiqarish davlat muassasasi hisoblanadi.

3. Markaz Qoʻmitaga boʻysunadi va hisobot beradi.

4. Markaz oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, Qoʻmita hayʼati yigʻilishi qarorlari, buyruqlari va topshiriqlariga hamda mazkur Nizomga, shuningdek, boshqa qonunchilik hujjatlariga amal qiladi.

5. Markaz oʻz faoliyatini davlat boshqaruvi organlari, xoʻjalik birlashmalari, Oʻzbekiston Fanlar akademiyasi, ilmiy-tekshirish institutlari, mahalliy davlat hokimiyati organlari, nodavlat notijorat tashkilotlar, xorijiy va xalqaro hamda boshqa tashkilotlar bilan hamkorlikda amalga oshiradi.

6. Markaz yuridik shaxs hisoblanadi, Oʻzbekiston Respublikasining Davlat gerbi tasviri va oʻz nomi tushirilgan muhr va blankalarga, mustaqil balansga, Oʻzbekiston Respublikasi Moliya vazirligining Gʻaznachiligida hisobvaraqlariga, bank, shu jumladan chet el valyutasidagi hisobvaraqlariga ega boʻladi.

7. Markazning rasmiy nomi:

a) davlat tilida:

toʻliq nomi — Oʻzbekiston Respublikasi Oʻrmon xoʻjaligi davlat qoʻmitasi huzuridagi Dorivor oʻsimliklarni yetishtirish va qayta ishlash ilmiy-ishlab chiqarish markazi;

qisqartirilgan nomi — Ilmiy-ishlab chiqarish markazi (IIChM);

b) rus tilida:

toʻliq nomi — Nauchno-proizvodstvenniy tsentr po viraщivaniyu i pererabotke lekarstvennix rasteniy pri Gosudarstvennom komitete po lesnomu xozyaystvu Respubliki Uzbekistan;

qisqartirilgan nomi — Nauchno-proizvodstvenniy tsentr (NPS);

v) ingliz tilida:

toʻliq nomi — Research and production center for growingand processing medicinal plants under the state Forestry Committee of the Republic of Uzbekistan;

qisqartirilgan nomi — Research and production center (RPC);

g) lotin alifbosida:

toʻliq nomi — Oʻzbekiston Respublikasi Oʻrmon xoʻjaligi davlat qoʻmitasi huzuridagi Dorivor oʻsimliklarni yetishtirish va qayta ishlash ilmiy-ishlab chiqarish markazi;

qisqartirilgan nomi — Ilmiy-ishlab chiqarish markazi (IIChM).

8. Markaz joylashgan joy (pochta manzili): 111104, Toshkent viloyati, Toshkent tumani, Darxon qoʻrgʻoni, Chimkent yoʻli koʻchasi, 2-uy.

2-bob. Markazning asosiy vazifalari va funksiyalari

9. Quyidagilar Markazning asosiy vazifalari hisoblanadi:

dorivor oʻsimliklarni ilmiy asosda yetishtirish va qayta ishlash, ulardan oqilona foydalanishning yagona strategiyasini shakllantirish va amalga oshirish;

respublika hududidagi yovvoyi holda oʻsuvchi dorivor oʻsimliklar areallarini oʻrganish va zaxiralarini aniqlash, mavjud bioresurslar genofondini saqlash, onalik plantatsiyalarini tashkil etish;

urugʻlik materiallarni yetishtirish va tayyorlash, koʻpaytirish, kolleksion koʻchatxonalar tashkil etish hamda ularning xomashyolarini qayta ishlash bilan bogʻliq ilmiy va amaliy tadqiqotlarni olib borish;

dorivor oʻsimliklarni muayyan tuproq-iqlim sharoitlarini hisobga olgan holda madaniy holda yetishtirishni yoʻlga qoʻyish boʻyicha aniq ilmiy asoslangan takliflar ishlab chiqish;

tuproq-iqlim sharoitlarini hisobga olib madaniy holda yetishtiriladigan dorivor oʻsimliklarning agrotexnologik xaritalarini Qishloq xoʻjaligi vazirligi va Qoʻmita buyurtmasiga koʻra ishlab chiqish;

dorivor oʻsimliklar kimyoviy tarkibini oʻrganish, mahsulotini standartlash va amaldagi qonun hujjatlariga muvofiq sertifikatlash;

dorivor oʻsimliklarga boʻlgan ichki va tashqi bozorlar talabini oʻrganish boʻyicha marketing tadqiqotlari olib borish;

dorivor oʻsimliklar yetishtiruvchi va qayta ishlovchi fermer xoʻjaliklari, tashkilotlar va boshqa subyektlar rahbarlari va mutaxassislarining malakasini oshirib borishga yoʻnaltirilgan dasturlarni tayyorlash va oʻqitish tizimini tashkil etish.

10. Markaz oʻziga yuklangan asosiy vazifalarga muvofiq quyidagi funksiyalarni amalga oshiradi:

a) dorivor oʻsimliklarni ilmiy asosda yetishtirish va qayta ishlash, ulardan oqilona foydalanishning yagona strategiyasini shakllantirish va amalga oshirish sohasida:

dorivor oʻsimliklarni yetishtirish, tayyorlash, qayta ishlash sohasiga zamonoviy texnologiyalarni joriy etish, rivojlantirish va samaradorligini oshirish, mavjud muammolarni doimiy oʻrganish, ularni bartaraf etish yuzasidan Vazirlar Mahkamasiga takliflar kiritib borish;

dorivor oʻsimliklarni yetishtirish, tayyorlash hajmlarini oshirish va turlarini koʻpaytirishni ichki va tashqi bozor ehtiyojlaridan kelib chiqqan holda tizimli oʻrganish;

ilmiy-tadqiqot va oliy taʼlim muassasalari tomonidan amalga oshirilgan dorivor oʻsimliklarga doir ilmiy tadqiqotlar, yangi innovatsion ishlanmalar boʻyicha maʼlumotlar bazasini shakllantirish va tizimli ravishda yangilanib borilishini amalga oshirish;

respublikada faoliyat olib borayotgan ilmiy-tadqiqot muassasalari tomonidan amalga oshirilayotgan sohaga oid loyihalarni tahlil qilish va natijalariga koʻra xulosa berish;

b) respublika hududidagi yovvoyi holda oʻsuvchi dorivor oʻsimliklar areallarini oʻrganish va zaxiralarini aniqlash, mavjud bioresurslar genofondini saqlash, onalik plantatsiyalarini tashkil etish sohasida:

tegishli ilmiy-tadqiqot muassasalari bilan hamkorlikda yovvoyi holda oʻsuvchi dorivor oʻsimliklar areallarini va zaxiralarini oʻrganish borasida ilmiy-tadqiqotlar olib borishni tashkil etish va natijalari boʻyicha ishlanmalar, takliflar ishlab chiqish;

yovvoyi holda oʻsuvchi dorivor oʻsimliklar nav-namunalarini yigʻish va ulardan dorivor moddalari eng koʻp toʻplanadigan nav-namunalarni aniqlash va seleksiya yoʻli bilan yangi navlarni yaratishni yoʻlga qoʻyish;

hududlarning tabiiy-iqlim sharoitidan kelib chiqib ixtisoslashgan oʻrmon xoʻjaliklarida dorivor oʻsimliklarning onalik plantatsiyalarini barpo etish va tadqiqot ishlarini tashkil etish;

mavjud bioresurslar genofondini saqlash borasida ilmiy-tadqiqot ishlarini amalga oshirish va unga mahalliy hamda xorijiy investorlarning investitsiyalarini, xalqaro moliya institutlari grantlarini jalb etish;

oʻrmon fondi yerlarida dorivor oʻsimliklarning qatʼiy hisobini yuritish;

v) urugʻlik materiallarni yetishtirish va tayyorlash, koʻpaytirish, kolleksion koʻchatxonalar tashkil etish hamda ularning xomashyolarini qayta ishlash bilan bogʻliq ilmiy va amaliy tadqiqotlarni olib borish sohasida:

dorivor oʻsimliklarning kamayib borayotgan noyob turlarini saqlash va koʻpaytirishni tashkil etish;

yangi turdagi dorivor oʻsimliklarni madaniylashtirish boʻyicha ixtisoslashgan oʻrmon xoʻjaliklarida urugʻchilik tajriba uchastkalarini tashkil etish;

ixtisoslashgan oʻrmon xoʻjaliklarida dorivor oʻsimliklarning, ayniqsa, kamayib borayotgan noyob turdagi dorivor oʻsimliklarning kolleksion koʻchatxonalarini tashkil etish hamda xomashyosini tayyorlash va qayta ishlash bilan bogʻliq ilmiy va amaliy tadqiqotlar olib borish;

g) dorivor oʻsimliklarni muayyan tuproq-iqlim sharoitlarini hisobga olgan holda madaniy holda yetishtirishni yoʻlga qoʻyish boʻyicha aniq ilmiy asoslangan takliflar ishlab chiqish sohasida:

ichki va tashqi bozor ehtiyojlarini oʻrganish asosida oʻrmon xoʻjaliklari va boshqa dorivor oʻsimliklar yetishtiruvchi subyektlar boʻyicha dorivor oʻsimliklarni rivojlantirish boʻyicha “yoʻl xaritasi”ni ishlab chiqish;

hududlarning tuproq-iqlim sharoitlaridan kelib chiqib dorivor oʻsimliklarni ilmiy asoslangan holda joylashtirish boʻyicha takliflar ishlab chiqish;

tabiiy holda oʻsadigan dorivor oʻsimliklarni madaniylashtirish, chet el florasiga mansub boʻlgan dorivor oʻsimliklarni mahalliy sharoitda urugʻlaridan koʻpaytirish va introduksiyalashni yoʻlga qoʻyish;

d) tuproq-iqlim sharoitlarini hisobga olib madaniy holda yetishtiriladigan dorivor oʻsimliklarning agrotexnologik xaritalarini Qishloq xoʻjaligi vazirligi va Oʻrmon xoʻjaligi davlat qoʻmitasi buyurtmasiga koʻra ishlab chiqish sohasida:

agrotexnolik xaritalarni ishlab chiqish boʻyicha dorivor oʻsimlik turlarini aniqlash va roʻyxatini shakllantirish;

agrotexnolik xaritalarni ishlab chiqish uchun ketadigan sarf-xarajatlarni aniqlash va belgilangan tartibda moliyalashtirish uchun mablagʻlarni yoʻnaltirish;

tegishli ilmiy-tadqiqot muassasalari bilan hamkorlikda dorivor oʻsimliklarni madaniy holda yetishtirishni ilmiy asoslangan holda tashkil etish va sarf-xarajatlarni belgilash maqsadida agrotexnologik xaritalarni ishlab chiqishni amalga oshirish;

e) dorivor oʻsimliklar kimyoviy tarkibini oʻrganish, mahsulotini standartlash va amaldagi qonun hujjatlariga muvofiq sertifikatlash sohasida:

dorivor oʻsimliklar sohasida xalqaro standartlar talablarini doimiy oʻrganish;

laboratoriya jihozlarining xalqaro standart talablariga mosligini taʼminlash;

sohaga malakali mutaxassislarni jalb etish va ularning tajriba hamda koʻnikmalarini oshirib borish;

mahsulotlarni standartlash va sertifikatlash boʻyicha rivojlangan mamlakatlar ilmiy-tadqiqot muassasalari bilan hamkorlikni yoʻlga qoʻyish va ularning tajribasini oʻrganish va joriy etish;

sohaga ilgʻor texnoligiyalarni jalb etish va ularni qoʻllash oshirish;

dorivor oʻsimliklar mahsulotlarini ishlab chiqarishning xalqaro standartlarga muvofiqligini nazorat qilish mexanizmlarini ishlab chiqish;

laboratoriyani zamonoviy jihozlar bilan taʼminlashga xorijiy institut hamda donorlarning mablagʻlarini jalb etish;

ilmiy loyihalar doirasida dorivor oʻsimliklarning iqlim sharoitiga mos holda oʻsishi va rivojlanishi hamda olingan mahsulotlarning kimyoviy tarkibi mosligi boʻyicha dorivor oʻsimliklarning har bir turi va naviga alohida litsenziya berishni yoki belgilangan tartibda akkreditatsiyadan oʻtgan sertifikatlash organi tomonidan sertifikatlashni amalga oshirish;

yo) dorivor oʻsimliklarga boʻlgan ichki va tashqi bozorlar talabini oʻrganish boʻyicha marketing tadqiqotlari olib borish sohasida:

dorivor oʻsimliklarga boʻlgan bozor talablarini oʻrganish boʻyicha jahon tajribasini oʻrganish va amaliyotga joriy etish;

sohaga malakali mutaxassislarni jalb etish va marketing tadqiqotlari oʻtkazish;

ichki va tashqi bozorlar talablari asosida dorivor oʻsimliklarni yetishtirish boʻyicha takliflarni ishlab chiqish hamda Qishloq xoʻjaligi vazirligiga va Oʻrmon xoʻjaligi davlat qoʻmitasiga kiritish;

j) dorivor oʻsimliklar yetishtiruvchi va qayta ishlovchi fermer xoʻjaliklari, tashkilotlar va boshqa subyektlar rahbarlari va mutaxassislarining malakasini oshirib borishga yoʻnaltirilgan dasturlarni tayyorlash va oʻqitish tizimini tashkil etish sohasida:

sohada ilmiy xodimlarni tayyorlashni, faoliyat koʻrsatayotgan xodimlarni qayta tayyorlash va ularning malakasini oshirishni tashkil etish;

dorivor oʻsimliklarni yetishtirish, quritish, qayta ishlash, marketing yoʻnalishi boʻyicha rahbar va mutaxassislarning malakasini oshirishga qaratilgan yillik oʻquv dasturlarini ishlab chiqish;

mahalliy hokimliklar va viloyat oʻrmon xoʻjaliklari boshqarmalari bilan birgalikda dorivor oʻsimliklarni yetishtiruvchi va qayta ishlovchi fermer xoʻjaliklari, tashkilotlar va boshqa subyektlar boʻyicha malaka oshirish oʻquv dasturlarini oʻtkazish grafik-jadvalini tayyorlash xamda amalga oshirish mexanizimini ishlab chiqish;

respublikada hamda xorijda soha rahbarlari va mutaxassislarini qayta tayyorlash va ularning malakasini oshirishni tashkil etishda qatnashish.

11. Markaz qonunchilik hujjatlariga muvofiq boshqa funksiyalarni ham bajarishi mumkin.

3-bob. Markazning huquqlari va javobgarligi

12. Markaz oʻziga yuklangan asosiy vazifalar va funksiyalarni amalga oshirish uchun quyidagi huquqlarga ega:

dorivor oʻsimliklarni toʻplash (gʻamlash), ularni olib kirish va tashqariga olib chiqishga ruxsatnomalar berish;

ilmiy-tadqiqot ishlarining rejalarini, ish dasturlari va bajarish usullarini hamda ilmiy hisobotlarni muhokama qilish maqsadida ilmiy kengash tashkil etish;

respublikada faoliyat olib borayotgan ilmiy-tadqiqot muassasalari tomonidan amalga oshiriladigan sohaga oid ilmiy-tadqiqot ishlarini muvofiqlashtirishda ularga koʻmaklashish;

dorivor oʻsimliklarni yetishtiruvchi xoʻjalik subyektlariga sohani ilmiy asosda yuritish borasida ilmiy-metodik yordam berish;

sohada amalga oshirilishi rejalashtirilgan ilmiy-tadqiqot ishlarining koʻlami va dolzarbligini inobatga olgan holda ixtisoslashtirilgan oʻrmon xoʻjaliklari biznes-rejalarini qayta koʻrib chiqish va oʻzgartirishlar kiritish;

ilmiy-tadqiqot ishlari samaradorligini taʼminlash va tizimli amalga oshirish maqsadida ilmiy-tadqiqot muassasalari bilan hamkorlikni yoʻlga qoʻyish;

dorivorchilik sohasida boshqa ilmiy-tadqiqot institutlari va oliy taʼlim muassasalari tomonidan amaliyotga joriy etishga tavsiya qilingan ishlanmalarni oʻrganish va xulosa berish;

ilmiy ishlar toʻplamlari, monografiyalar, darsliklar, tavsiyanomalar va broshyuralarni, ommaviy axborot vositalarida ilmiy-ommabop maqolalarni chop ettirish;

sohada ilm-fan yutuqlari joriy etilishida mualliflik nazoratini olib borish;

jismoniy va yuridik shaxslarga dorivor oʻsimliklar urugʻlik materiallarini yetkazib berish;

dorivor oʻsimliklarni yetishtirish, tayyorlash va qayta ishlash sohasi samaradorligini oshirish, zaxiralaridan tejamli foydalanish va zamonaviy texnologiyalarni joriy etish borasida ilmiy-tadqiqot ishlari olib borish;

dorivor oʻsimliklarni yetishtirish va qayta ishlash, muhofaza qilish, ulardan foydalanish, ularning maydonini kengaytirish, ixtisoslashgan davlat oʻrmon xoʻjaliklarini rivojlantirish, ularning samaradorligini oshirish;

joylarda sohaning ilm-fan, ilmiy-tadqiqot yoʻnalishlarini rivojlantirish maqsadida belgilangan tartibda tayanch punktlari, tajriba uchastkalarini tashkil etish;

shartnoma asosida ilmiy-tadqiqot ishlarini bajarish, ilmiy-metodik xizmatlar koʻrsatish;

budjet va Oʻrmon xoʻjaligini rivojlantirish jamgʻarmasidan ajratilgan mablagʻlar boʻyicha belgilangan tartibda buxgalteriya va hisob-kitob ishlarini olib borish;

Markazning faoliyat turi boʻyicha tovarlar (ishlar, xizmatlar) ishlab chiqarish va sotish hisobidan tushgan pul mablagʻlaridan belgilangan tartibda foydalanish;

qonun hujjatlariga muvofiq davlat, nodavlat va notijorat tashkilotlar, xorijiy tashkilotlar bilan hamkorlik qilish;

sohaga oid qonun hujjatlari, davlat va mahalliy dasturlar loyihalarini ishlab chiqish va Qoʻmitaga taqdim etish;

Markaz xodimlarining mehnatiga haq toʻlash va ularni moddiy ragʻbatlantirishni qonunchilik hujjatlarida belgilangan tartibda amalga oshirish;

Markazga tegishli inshootlar, asbob-uskunalar, transport vositalaridan oqilona foydalanish, saqlash, boshqarish;

mehnatni muhofaza qilishni taʼminlash, texnika xavfsizligi qoidalari va ishlab chiqarish sanitariyasiga rioya qilishni nazorat qilish;

davlat oʻrmon xoʻjaliklari xodimlarini qayta tayyorlash va malakasini oshirish ishlarida ishtirok etish;

oʻrmon fondi yerlarida dorivor oʻsimliklarning monitoringi, kadastri hisobini belgilangan tartibda olib borish;

Oʻzbekiston Respublikasi Qizil kitobini yuritishda ishtirok etish;

Markazning yillik xarajatlar smetasini, shtat birliklari jadvallarini ishlab chiqish va Qoʻmitaga kiritish;

respublikada faoliyat olib borayotgan dorivor oʻsimliklarni yetishtiruvchi, tayyorlovchi va qayta ishlovchi xoʻjalik subyektlari tomonidan amalga oshirilayotgan ishlarning doimiy monitoringini olib borish va muvofiqlashtirish;

barcha oʻrmon xoʻjaliklarining dorivor oʻsimliklarni yetishtirish, tayyorlashni amalga oshirish toʻgʻrisidagi hisobotlar yilning har choragida taqdim etilishini tashkil etish, qabul qilib olish, oʻrganish, tahlil qilish, jamlash, monitoring olib borish, tegishli chora-tadbirlarni ishlab chiqish;

ixtisoslashtirilgan davlat oʻrmon xoʻjaliklarining iqtisodiy-moliyaviy va ishlab chiqarish hisobotlari yilning har choragida taqdim etilishini tashkil etish, qabul qilib olish, oʻrganish, tahlil qilish, jamlash, monitoringini yuritish, tegishli chora-tadbirlar koʻrish.

Markaz qonunchilik hujjatlariga muvofiq boshqa huquqlarga ham ega boʻlishi mumkin.

13. Markaz amalga oshirilgan chora-tadbirlar, erishilgan yutuqlar, amaliyotdagi muammolar va ularning yechimi boʻyicha takliflarni har chorakda taalluqliligiga qarab Qoʻmita hamda Qishloq xoʻjaligi vazirligiga taqdim etib boradi.

Markaz va uning mansabdor shaxslari oʻzlariga yuklangan asosiy vazifalar va funksiyalarning samarali bajarilishi uchun javob beradilar.

4-bob. Markaz faoliyatini tashkil etish

14. Markazga Qoʻmita raisi tomonidan lavozimga tayinlanadigan va lavozimidan ozod etiladigan bosh direktor rahbarlik qiladi.

Bosh direktorning ikki nafar oʻrinbosari boʻladi, ular bosh direktorning taqdimnomasiga asosan Qoʻmita raisi tomonidan lavozimga tayinlanadi va lavozimidan ozod etiladi.

Markaz bosh buxgalteri Qoʻmita bilan kelishgan holda bosh direktor tomonidan lavozimga tayinlanadi va lavozimdan ozod etiladi.

15. Bosh direktor:

Markaz faoliyatiga umumiy rahbarlik qiladi hamda Markazga yuklangan vazifalar va funksiyalarning bajarilishi uchun shaxsan javob beradi;

davlat organlarida va boshqa tashkilotlarda Markaz nomidan vakillik qiladi yoxud Markaz nomidan ishonchnoma va (yoki) vakolatlar beradi;

belgilangan umumiy shtatlar soni doirasida Markazning shtat jadvalini tasdiqlaydi;

Markazga ajratilgan moliyaviy va moddiy mablagʻlarni belgilangan tartibda boshqaradi;

Markaz faoliyat yoʻnalishi boʻyicha xodimlar bajarishi majburiy boʻlgan buyruqlar chiqaradi va koʻrsatmalar beradi;

mehnat toʻgʻrisidagi qonun hujjatlari talablariga muvofiq Markaz xodimlarini ishga qabul qiladi va ular bilan tuzilgan mehnat shartnomalarini bekor qiladi;

Markazda faoliyat yuritayotgan xodimlarni ragʻbatlantirish va intizomiy javobgarlikka tortish masalalarini hal etadi, alohida oʻrnak koʻrsatgan xodimlarni faxriy unvonlar berish va Oʻzbekiston Respublikasining davlat mukofotlari bilan taqdirlash uchun Qoʻmitaga taqdimnoma kiritadi;

qonun bilan taqiqlanmagan barcha turdagi shartnomalarni tuzadi, imzolaydi, Markaz nomidan bank va boshqa muassasalarda barcha moliyaviy operatsiyalarni amalga oshiradi;

dorivor oʻsimliklarni toʻplash (gʻamlash), ularni olib kirish va tashqariga olib chiqishga ruxsatnomalar beradi.

Bosh direktor qonunchilik hujjatlariga muvofiq boshqa vakolatlarga ham ega boʻladi.

16. Bosh direktorning oʻrinbosarlari:

Markaz tarkibiy boʻlinmalariga bevosita rahbarlik qiladi va Markazga yuklangan vazifalar va funksiyalarning bajarilishi uchun shaxsan javob beradi;

Markaz bosh direktori tomonidan oʻzlariga yuklangan boshqa funksiyalarni amalga oshiradi.

Markazning ilmiy va innovatsiyalar hamda ishlab chiqarish faoliyatini tashkil qiladi, Markazga yuklangan vazifalar va funksiyalarning bajarilishi uchun shaxsan javob beradi;

oʻrmon fondi yerlarida dorivor oʻsimliklarni joylashtirish, yetishtirish, saqlash, qayta ishlashni tashkil etadi, muvofiqlashtiradi va nazoratni amalga oshiradi.

17. Markazda bosh direktor tavsiyasi asosida tarkibi va nizomi Qoʻmita raisi tomonidan tasdiqlanadigan Ilmiy kengash tuziladi.

Ilmiy kengash tarkibiga Markazning sohada yetuk va yuqori malakaga ega boʻlim va laboratoriyalar boshliqlari, yetakchi ilmiy xodimlar, kasaba uyushmasining vakillari, shuningdek, yuqori tashkilot, ilmiy muassasalar vakillari kiritiladi.

5-bob. Markaz faoliyatini moliyalashtirish va xodimlarini moddiy ragʻbatlantirish

18. Quyidagilar Markaz faoliyatini moliyalashtirish manbalari hisoblanadi:

Markazning Qoʻmita tizimidagi mavjud shtat birliklarini maqbullashtirish hisobiga shakllantirilgan boshqaruv xodimlarining shtat birliklari boʻyicha Oʻzbekiston Respublikasi Davlat budjeti mablagʻlari;

Oʻrmon xoʻjaligini rivojlantirish jamgʻarmasi mablagʻlari;

xizmat koʻrsatish va oʻzi yetishtirgan dorivor oʻsimliklarni sotishdan tushadigan daromadlar;

xalqaro va xorijiy hukumat, xalqaro moliyaviy tashkilotlar, moliya institutlari va boshqa donorlarning grantlari va kreditlari (qarzlari);

Markazning vaqtincha boʻsh turgan budjetdan tashqari mablagʻlarini tijorat banklarining depozitlariga joylashtirishdan olingan daromadlar;

qonunchilik hujjatlari bilan taqiqlanmagan boshqa manbalar.

19. Markaz qonunchilik hujjatlarida belgilangan tartibda soha xodimlarining hayotini sugʻurtalash, ularni moddiy va maʼnaviy ragʻbatlantirish hamda ijtimoiy muhofaza qilish tadbirlarini amalga oshiradi.

Markaz xodimlari mehnatiga haq toʻlash, ularni ragʻbatlantirish, mukofotlash va boshqa ragʻbatlantirishlar qonunchilik hujjatlarida belgilangan tartibda amalga oshiriladi.

20. Markaz xodimlarini moddiy ragʻbatlantirish toʻgʻrisidagi nizom belgilangan tartibda Qoʻmita raisi tomonidan tasdiqlanadi.

6-bob. Markazga tushadigan mablagʻlarni yoʻnaltirish

21. Dorivor oʻsimliklarni toʻplash (gʻamlash), ularni olib kirish va olib chiqishga ruxsatnomalar berganlik, arizalarni koʻrib chiqqanlik uchun undiriladigan va mahalliy budjetga yoʻnaltiriladigan toʻlovlarning 20 foizi Markaz tomonidan tabiiy holda oʻsuvchi, shu jumladan, yoʻqolib borayotgan dorivor oʻsimliklarni saqlash, xatlovdan oʻtkazish, ularning madaniy plantatsiyalarini yaratish, onalik koʻchatzorlarini tashkil etish, dorivor oʻsimliklarni yetishtirishga doir texnologik xaritalarni ishlab chiqish xarajatlarini qoplash uchun yoʻnaltiriladi.

7-bob. Yakunlovchi qoida

22. Markazni qayta tashkil etish va tugatish qonunchilik hujjatlarida belgilangan tartibda amalga oshiriladi.

Oʻzbekiston Respublikasining Bosh vaziri A. ARIPOV

Toshkent sh.,

2021-yil 9-mart,

124-son

(Qonun hujjatlari maʼlumotlari milliy bazasi, 10.03.2021-y., 09/21/124/0194-son)

lex.uz