📅 2021-yil 16-mart · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 16 март · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 16 марта 2021 г. · Постановления Кабинета Министров
Официальный текст. Официальный документ. Редакционные примечания не включены.
📅 16 March 2021 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Савдо, ишлаб чиқариш ва хизмат кўрсатиш объектларига ном беришни такомиллаштириш чора-тадбирлари тўғрисида
Ўзбекистон Республикаси Президентининг «Мамлакатимизда ўзбек тилини янада ривожлантириш ва тил сиёсатини такомиллаштириш чора-тадбирлари тўғрисида» 2020 йил 20 октябрдаги ПФ-6084-сон Фармони ижросини таъминлаш, шунингдек, савдо, ишлаб чиқариш ва хизмат кўрсатиш объектларига ном беришни такомиллаштириш мақсадида Вазирлар Маҳкамаси қарор қилади:
1. Ўзбекистон Республикаси Олий ва ўрта махсус таълим вазирлиги, Адлия вазирлиги, Ўзбекистон Савдо-саноат палатасининг Алишер Навоий номидаги Тошкент давлат ўзбек тили ва адабиёти университети ҳузуридаги Давлат тилида иш юритиш асосларини ўқитиш ва малака ошириш маркази (кейинги ўринларда — Марказ) ҳамда унинг ҳудудий бўлинмалари томонидан савдо, ишлаб чиқариш ва хизмат кўрсатиш объектларига (кейинги ўринларда — объектлар) давлат тилида ном бериш (нейминг) хизматини кўрсатиш тўғрисидаги таклифи маъқуллансин.
2. Марказ ва унинг ҳудудий бўлинмаларига объектларга давлат тилида ном бериш хизматини кўрсатишга оид қуйидаги қўшимча вазифалар юклансин:
давлат тили қоида ва меъёрларига мувофиқ келадиган, миллий қадриятларга мос ҳамда объектларга қўйиш тавсия этиладиган номлар захирасини онлайн режимида шакллантириш ҳамда уни доимий янгилаб бориш;
ташқи ёзув, пешлавҳа, реклама ва эълонлар матнини тайёрлаш, шунингдек, уларнинг давлат тили қоида ва меъёрларига мувофиқлиги, номларнинг бир хил ёки ўхшашлик даражаси юзасидан лингвистик экспертиза ўтказиш;
номлаш, ном яратиш фаолияти билан шуғулланаётган тадбиркорлик субъектлари билан ҳамкорлик қилиш, уларга маслаҳат ёрдамлари кўрсатиш;
жисмоний ва юридик шахсларнинг мурожаатларига кўра объектлар учун давлат тили қоида ва меъёрларига, қонунчилик ҳужжатларига ва миллий қадриятларга мос бўлган давлат тилида номлар яратиш ва танлаш бўйича шартнома асосида хизматлар кўрсатиш.
3. Белгилаб қўйилсинки, объектларга ном бериш « Давлат тили ҳақида », « Фирма номлари тўғрисида » ва « Товар белгилари, хизмат кўрсатиш белгилари ва товар келиб чиққан жой номлари тўғрисида »ги Ўзбекистон Республикаси қонунлари талабларига риоя этилган ҳолда амалга оширилади.
4. Ўзбекистон Республикаси Олий ва ўрта махсус таълим вазирлиги:
бир ой муддатда Марказга ушбу қарорда назарда тутилган қўшимча вазифалар юкланганлигини ҳисобга олган ҳолда унинг уставини янги таҳрирда тасдиқласин ҳамда белгиланган тартибда давлат рўйхатидан қайта ўтказилишини таъминласин;
икки ой муддатда Марказни давлат тилида номлашнинг лингвистик меъёрлари ва методикасини ишлаб чиқиш ҳамда номлаш, ном яратиш бўйича методик қўлланма ва адабиётлар билан таъминлаш чораларини кўрсин;
олти ой муддатда Давлат хизматлари агентлиги билан биргаликда тадбиркорлик субъектлари учун давлат тилида номлашнинг лингвистик меъёрлари ва методикаси асосида яратилган номлар захирасининг электрон дастурий таъминотини ишлаб чиқиш ва уни Давлат хизматлари агентлигининг Тадбиркорлик субъектларини давлат рўйхатидан ўтказиш ва ҳисобга қўйишнинг автоматлаштирилган тизимига интеграция қилиш чораларини кўрсин;
Ўзбекистон Миллий телерадиокомпанияси ва Ўзбекистон Миллий ахборот агентлиги билан биргаликда ушбу қарорнинг мазмун ва моҳияти оммавий ахборот воситаларида кенг ёритилишини ташкил этсин;
манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
5. Ўзбекистон Республикаси Инновацион ривожланиш вазирлиги тегишли вазирлик ва идоралар билан биргаликда икки ой муддатда ўзбек тилида ном яратишнинг лингвистик асосларини яратишга, соҳалар бўйича номлар захирасини шакллантириш ва уларнинг электрон дастурий таъминотини ишлаб чиқиш ҳамда миллий бренд қийматини оширишга қаратилган илмий-тадқиқот ишларига давлат буюртмаси талабларига мувофиқ илмий лойиҳалар танловини эълон қилсин.
6. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари Б.А. Мусаев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2021 йил 16 март,
144-сон
Oʻzbekiston Respublikasi Vazirlar Mahkamasining
qarori
Savdo, ishlab chiqarish va xizmat koʻrsatish obyektlariga nom berishni takomillashtirish chora-tadbirlari toʻgʻrisida
Oʻzbekiston Respublikasi Prezidentining “Mamlakatimizda oʻzbek tilini yanada rivojlantirish va til siyosatini takomillashtirish chora-tadbirlari toʻgʻrisida” 2020-yil 20-oktabrdagi PF-6084-son Farmoni ijrosini taʼminlash, shuningdek, savdo, ishlab chiqarish va xizmat koʻrsatish obyektlariga nom berishni takomillashtirish maqsadida Vazirlar Mahkamasi qaror qiladi:
1. Oʻzbekiston Respublikasi Oliy va oʻrta maxsus taʼlim vazirligi, Adliya vazirligi, Oʻzbekiston Savdo-sanoat palatasining Alisher Navoiy nomidagi Toshkent davlat oʻzbek tili va adabiyoti universiteti huzuridagi Davlat tilida ish yuritish asoslarini oʻqitish va malaka oshirish markazi (keyingi oʻrinlarda — Markaz) hamda uning hududiy boʻlinmalari tomonidan savdo, ishlab chiqarish va xizmat koʻrsatish obyektlariga (keyingi oʻrinlarda — obyektlar) davlat tilida nom berish (neyming) xizmatini koʻrsatish toʻgʻrisidagi taklifi maʼqullansin.
2. Markaz va uning hududiy boʻlinmalariga obyektlarga davlat tilida nom berish xizmatini koʻrsatishga oid quyidagi qoʻshimcha vazifalar yuklansin:
davlat tili qoida va meʼyorlariga muvofiq keladigan, milliy qadriyatlarga mos hamda obyektlarga qoʻyish tavsiya etiladigan nomlar zaxirasini onlayn rejimida shakllantirish hamda uni doimiy yangilab borish;
tashqi yozuv, peshlavha, reklama va eʼlonlar matnini tayyorlash, shuningdek, ularning davlat tili qoida va meʼyorlariga muvofiqligi, nomlarning bir xil yoki oʻxshashlik darajasi yuzasidan lingvistik ekspertiza oʻtkazish;
nomlash, nom yaratish faoliyati bilan shugʻullanayotgan tadbirkorlik subyektlari bilan hamkorlik qilish, ularga maslahat yordamlari koʻrsatish;
jismoniy va yuridik shaxslarning murojaatlariga koʻra obyektlar uchun davlat tili qoida va meʼyorlariga, qonunchilik hujjatlariga va milliy qadriyatlarga mos boʻlgan davlat tilida nomlar yaratish va tanlash boʻyicha shartnoma asosida xizmatlar koʻrsatish.
3. Belgilab qoʻyilsinki, obyektlarga nom berish “ Davlat tili haqida ”, “ Firma nomlari toʻgʻrisida ” va “ Tovar belgilari, xizmat koʻrsatish belgilari va tovar kelib chiqqan joy nomlari toʻgʻrisida ”gi Oʻzbekiston Respublikasi qonunlari talablariga rioya etilgan holda amalga oshiriladi.
4. Oʻzbekiston Respublikasi Oliy va oʻrta maxsus taʼlim vazirligi:
bir oy muddatda Markazga ushbu qarorda nazarda tutilgan qoʻshimcha vazifalar yuklanganligini hisobga olgan holda uning ustavini yangi tahrirda tasdiqlasin hamda belgilangan tartibda davlat roʻyxatidan qayta oʻtkazilishini taʼminlasin;
ikki oy muddatda Markazni davlat tilida nomlashning lingvistik meʼyorlari va metodikasini ishlab chiqish hamda nomlash, nom yaratish boʻyicha metodik qoʻllanma va adabiyotlar bilan taʼminlash choralarini koʻrsin;
olti oy muddatda Davlat xizmatlari agentligi bilan birgalikda tadbirkorlik subyektlari uchun davlat tilida nomlashning lingvistik meʼyorlari va metodikasi asosida yaratilgan nomlar zaxirasining elektron dasturiy taʼminotini ishlab chiqish va uni Davlat xizmatlari agentligining Tadbirkorlik subyektlarini davlat roʻyxatidan oʻtkazish va hisobga qoʻyishning avtomatlashtirilgan tizimiga integratsiya qilish choralarini koʻrsin;
Oʻzbekiston Milliy teleradiokompaniyasi va Oʻzbekiston Milliy axborot agentligi bilan birgalikda ushbu qarorning mazmun va mohiyati ommaviy axborot vositalarida keng yoritilishini tashkil etsin;
manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
5. Oʻzbekiston Respublikasi Innovatsion rivojlanish vazirligi tegishli vazirlik va idoralar bilan birgalikda ikki oy muddatda oʻzbek tilida nom yaratishning lingvistik asoslarini yaratishga, sohalar boʻyicha nomlar zaxirasini shakllantirish va ularning elektron dasturiy taʼminotini ishlab chiqish hamda milliy brend qiymatini oshirishga qaratilgan ilmiy-tadqiqot ishlariga davlat buyurtmasi talablariga muvofiq ilmiy loyihalar tanlovini eʼlon qilsin.
6. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A. Musayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2021-yil 16-mart,
144-son