📅 2021-yil 25-fevral · Vazirlik va idoralar hujjatlari · Tashqi ishlar vazirligi Moliya vazirligi
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 25 февраль · Вазирлик ва идоралар ҳужжатлари · Ташқи ишлар вазирлиги Молия вазирлиги
Расмий матн. Расмий ҳужжат. Таҳририй изоҳлар киритилмаган.
📅 25 февраля 2021 г. · Документы министерств и ведомств · Министерства иностранных дел Министерства финансов
Официальный текст. Официальный документ. Редакционные примечания не включены.
📅 25 February 2021 · Ministry and agency documents · Tashqi ishlar vazirligi Moliya vazirligi
Official text. Official document. Editorial notes are not included.
Ўзбекистон Республикаси Ташқи ишлар вазирлиги Ўзбекистон Республикаси Молия вазирлигининг
Қарори
НИЗОМ
Консуллик ҳаракатларини бажариш билан боғлиқ ҳақиқий харажатларнинг ўрнини қоплаш ҳисобидан йиғимлар ундириш ва келиб тушган пул маблағларидан фойдаланиш ҳамда консуллик йиғимлари тарифини АҚШ доллари курсига нисбатан қайта ҳисоблаш тартиби тўғрисидаги низомни тасдиқлаш ҳақида
Ўзбекистон Республикасининг «Ўзбекистон Республикасининг Консуллик уставини тасдиқлаш тўғрисида»ги Қонуни , Ўзбекистон Республикаси Президентининг 2018 йил 8 августдаги ПФ-5505-сон «Норма ижодкорлиги фаолиятини такомиллаштириш концепциясини тасдиқлаш тўғрисида»ги Фармони , 2013 йил 24 декабрдаги ПҚ-2095-сон «Ўзбекистон Республикасининг хориждаги дипломатик ваколатхоналари ва консуллик муассасалари ходимларининг меҳнатига ҳақ тўлаш тизимини такомиллаштириш тўғрисида»ги қарори ва Ўзбекистон Республикаси Вазирлар Маҳкамасининг 2010 йил 2 апрелдаги 62-сон «Вазирликлар. давлат қўмиталари ва идораларнинг бюджетдан ташқари жамғармаларига маблағлар ажратишни тартибга солиш чора-тадбирлари тўғрисида»ги қарорига мувофиқ Ўзбекистон Республикаси Ташқи ишлар вазирлиги ва Молия вазирлиги қарор қилади:
1. Консуллик ҳаракатларини бажариш билан боғлиқ ҳақиқий харажатларнинг ўрнини қоплаш ҳисобидан йиғимлар ундириш ва келиб тушган пул маблағларидан фойдаланиш ҳамда консуллик йиғимлари тарифини АҚШ доллари курсига нисбатан қайта ҳисоблаш тартиби тўғрисидаги низом иловага мувофиқ тасдиқлансин.
2. Мазкур қарор расмий эълон қилинган кундан эътиборан кучга киради.
Ўзбекистон Республикаси Ташқи ишлар вазирлигининг 2021 йил 25 февралдаги 61-сон ва Молия вазирлигининг 2021 йил 16 февралдаги 10-сон қарорига ИЛОВА
Консуллик ҳаракатларини бажариш билан боғлик ҳақиқий харажатларнинг ўрнини қоплаш ҳисобидан йиғимлар ундириш ва келиб тушган пул маблағларидан фойдаланиш хамда консуллик йиғимлари тарифини АҚШ доллари курсига нисбатан қайта ҳисоблаш тартиби тўғрисидаги
Мазкур Низом Ўзбекистон Республикасининг «Ўзбекистон Республикасининг Консуллик уставини тасдиқлаш тўғрисида»ги Қонунига мувофиқ консуллик ҳаракатларини бажариш билан боғлиқ ҳақиқий харажатларнинг ўрнини қоплаш ҳисобидан йиғимлар ундириш ва келиб тушган пул маблағларидан фойдаланиш ҳамда консуллик йиғимлари тарифини АҚШ доллари курсига нисбатан қайта ҳисоблаш тартибини белгилайди .
1-боб. Умумий қоидалар
1. Мазкур Низомда қуйидаги асосий тушунчалардан фойдаланилади:
консуллик йиғимлари тарифи — Ўзбекистон Республикаси Президентининг 2013 йил 24 декабрдаги ПҚ-2095-сон қарори билан тасдиқланган Ўзбекистон Республикаси консуллик йиғимлари тарифига мувофиқ ўрнатилган йиғимлар миқдори;
ҳақиқий харажатлар — консуллик ҳаракатларини амалга ошириш вақтида консуллик йиғимларига қўшимча равишда тўланадиган йиғим миқдоридан қопланувчи Ўзбекистон Республикасининг хориждаги дипломатик ваколатхоналари ва консуллик муассасалари томонидан бажариладиган моддий харажатлар;
Ўзбекистон Республикасининг хорижий муассасалари — Ўзбекистон Республикасининг хориждаги дипломатик ваколатхоналари ва консуллик муассасалари .
2. Консуллик ҳаракатларини амалга оширганлик учун консуллик йиғимлари, шунингдек кўрсатилган ҳаракатлар амалга оширилганлиги билан боғлиқ ҳақиқий харажатларнинг ўрнини қоплаш ҳисобидан йиғимлар ундирилади.
3. Ҳақиқий харажатлар қуйидагиларни ўз ичига олади:
почта, телеграф, телефон, телекс, факсимил ва модем орқали амалга оширилган алоқалар:
канцелярия молларини харид қилиш;
транспорт харажатлари;
Ўзбекистон Республикасининг хорижий муассасалари ходимларининг консуллик ҳаракати бажариладиган жойга хизмат сафарига юборилиши;
шошилинч консуллик ҳаракатларини амалга ошириш;
бланкалар сотиб олиш ва тайёрлаш, шу жумладан виза бланкаси;
бошқа харажатлар (сақлаш, мулкни қидириш, сотиш ва б.).
2-боб. Ҳақиқий харажатларнинг ўрнини қоплаш ҳисобидан йиғимларни ундириш
4. Ҳақиқий харажатларнинг ўрнини қоплаш ҳисобидан йиғимлар консуллик ҳаракатлари бажарилганда ундирилади. Бунда, йиғимлар қуйидаги миқдорлардан ошмаслиги лозим:
Ўзбекистон Республикаси визасини расмийлаштириш учун — 45 АҚШ доллари;
Ўзбекистон Республикаси фуқаросининг хорижга чиқиш биометрик паспортини, шунингдек фуқаролиги бўлмаган шахснинг биометрик ҳаракатланиш ҳужжатини расмийлаштириш учун — 20 АКШ доллари;
фуқаролик масалалари билан боғлиқ ҳужжатларни расмийлаштириш учун — 30 АҚШ доллари;
фуқароларни рўйхатга олиш учун — 25 АҚШ доллари;
ҳужжатларни легаллаштириш ва нотариал ҳаракатларни амалга ошириш учун — 15 АҚШ доллари;
бошқа консуллик хизматлари учун — 20 АҚШ доллари.
5. Ҳақиқий харажатларнинг ўрнини қоплаш ҳисобидан йиғим миқдорини ҳисоблаш ҳар бир Ўзбекистон Республикасининг хорижий муассасаси учун икки томонлама муносабатларни ривожлантириш истиқболлари, хорижий давлатдаги товарлар ва хизматларнинг қиймати ва бошқа ҳолатларни (тенглик принципи ва б.) ҳисобга олган ҳолда, бироқ мазкур Низомнинг 4-бандида кўрсатилган миқдорлардан кўп бўлмаган тарзда амалга оширилади.
Ҳақиқий харажатларнинг ўрнини қоплаш ҳисобидан йиғимнинг аниқ миқдорлари Ўзбекистон Республикасининг хорижий муассасаси раҳбари томонидан Ўзбекистон Республикаси Ташқи ишлар вазирлиги билан келишилган ҳолда белгиланади.
Агар ҳақиқий харажатларнинг ўрнини қоплаш ҳисобидан йиғим мазкур Низомнинг 4 ва 5-бандларида белгиланган тартибдаги йиғим миқдоридан ошиб кетган тақдирда (масалан, консуллик мансабдор шахсининг транспорт, кунлик, уй-жой ижараси ва бошқа харажатлари), Ўзбекистон Республикасининг хорижий муассасаси раҳбари аризачи билан келишган ҳолда ҳақиқий харажатлар ўрни тўлиқ қоплангунига қадар йиғим миқдорини ошириш ҳуқуқига эга.
6. Ариза берувчиларнинг (консуллик ҳаракатидан манфаатдор шахслар) консуллик йиғимларидан озод қилинганлиги ёки унга нисбатан камайтирилган тариф белгиланганидан қатъи назар, улардан ҳақиқий харажатларнинг ўрнини қоплаш ҳисобидан йиғим тўла ҳажмда ундирилади.
7. Ҳақиқий харажатларнинг ўрнини қоплаш ҳисобидан йиғим, консуллик йиғими билан бир вақтда АҚШ долларида, бошқа эркин алмаштириладиган валютада ёки Ўзбекистон Республикасининг хорижий муассасаси жойлашган хорижий давлатнинг миллий валютасида (миллий валюта эркин алмаштириладиган валюта бўлмаган жойларда) Ўзбекистон Республикасининг халқаро шартномаларига мувофиқ ёки ўзаролик тамойилига риоя этган ҳолда амалга оширилади.
Ҳақиқий харажатларнинг ўрнини қоплаш ҳисобидан тушган йиғим маблағларининг ҳисоб-китоби консуллик йиғими сифатида тушган маблағлардан алоҳида амалга оширилади.
Ариза берувчилардан (консуллик ҳаракатидан манфаатдор шахслар) ҳақиқий харажатларнинг ўрнини қоплаш ҳисобидан йиғим сифатида келиб тушган барча маблағлар касса кирим ордерлари ёки банк ҳужжатлари орқали расмийлаштирилади ва Ўзбекистон Республикаси хорижий муассасаларининг тегишли ҳисоботларида акс эттирилади.
3-боб. Қабул қилинган маблағлардан фойдаланиш
8. Консуллик ҳаракатлари амалга оширилгани учун келиб тушган ҳақиқий харажатларнинг ўрнини қоплаш ҳисобидан йиғимнинг 70 фоизи Давлат бюджетига, 30 фоизи эса Ўзбекистон Республикасининг Дипломатик хизмат органларини ривожлантириш жамғармасига (бундан буён матнда Жамғарма деб юритилади) йўналтирилади.
9. Давлат бюджетига тааллуқли (70 фоиз) маблағлар Ўзбекистон Республикаси хорижий муассасаларининг тасдиқланган смета харажатларини молиялаштириш учун юборилади.
10. Жамғарма маблағларидан фойдаланиш Ўзбекистон Республикаси Президентининг 2018 йил 5 апрелдаги ПҚ-3654-сон қарори билан тасдиқланган Ўзбекистон Республикасининг дипломатик хизмат органларини ривожлантириш жамғармаси тўғрисидаги низом талаблари асосида амалга оширилади.
4-боб. Бухгалтерия ҳисобини юритиш ва ҳисоботларни топшириш
11. Ҳақиқий харажатларнинг ўрнини қоплаш ҳисоби йиғимидан келиб тушган 70 фоиз миқдоридаги Давлат бюджетига ўтказиладиган пул маблағлари бухгалтерия ҳисоботидаги «Қуйи идоралар жорий ҳисоби», «Қуйи идоралар ғазнаси» ҳисобларида дебит, «Консуллик йиғимлари бўйича тўловлар ҳисобида кредит тарзида кўринади.
12. Ҳақиқий харажатларнинг ўрнини қоплаш ҳисоби йиғимидан келиб тушган 30 фоиз миқдоридаги Жамғарма пул маблағлари бухгалтерия ҳисоботида «Қуйи идоралар жорий ҳисоби», «Қуйи идоралар ғазнаси» ҳисобларида дебит ва «Консуллик йиғимлари бўйича тўловлар» ҳисобларида кредит тарзида кўринади.
13. Ўзбекистон Республикасининг хорижий муассасалари консуллик йиғимлари ва ҳақиқий харажатларнинг ўрнини қоплаш ҳисобидан йиғимларнинг алоҳида банк ҳисобварақасига (консуллик йиғимлари учун) келиб тушишини ҳисобга оладилар ва мунтазам равишда (бир ойда бир марта) хорижий муассасанинг асосий бюджет ҳисобидан Давлат бюджетига тегишли маблағлар ўтказилишини таъминлайди.
Жамғарма маблағлари харажатларини амалга оширишда консуллик йиғимлари ҳисоб рақамидан фойдаланилади.
14. Ҳақиқий харажатларнинг ўрнини қоплаш ҳисобидан тушган йиғимлар ва улардан фойдаланиш тўғрисида ҳисобот Ўзбекистон Республикаси Ташқи ишлар вазирлигининг Молия-иқтисод бошқармасига чораклик ва йиллик бухгалтерия ҳисоботлар доирасида юборилади.
Ўзбекистон Республикасининг хорижий муассасалари томонидан консуллик йиғимлари тушиши бўйича ҳар ойлик тезкор ҳисоботлар тузилганда, алоҳида жадвалда ҳақиқий харажатларнинг ўрнини қоплаш ҳисобидан ундирилган йиғимлар кўрсатилади.
15. Ҳақиқий харажатларнинг ўрнини қоплаш ҳисобидан йиғимлар ставкаларини тўғри қўлланилиши ва қабул қилинган маблағларнинг ишлатилиши учун жавобгарлик Ўзбекистон Республикасининг хорижий муассасалари раҳбарлари ва бухгалтерлари зиммасига юклатилади.
5-боб. Консуллик йиғимлари тарифини АҚШ доллари курсига нисбатан қайта ҳисоблаш
16. Ўзбекистон Республикасининг консуллик йиғимлари тарифига мувофиқ консуллик йиғимлари куйидаги валюталарда тўланади:
а) АҚШ долларида;
б) бошқа эркин алмаштириладиган валютада;
в) Ўзбекистон Республикасининг халқаро шартномаларига мувофиқ ёки ўзаро тенглик тамойилларига риоя қилиш асосида хорижий муассасалар жойлашган давлатларнинг миллий валютасида (миллий валюта эркин алмаштириладиган валюта бўлмаган жойларда).
17. Ўзбекистон Республикасининг хорижий муассасаси раҳбари томонидан консуллик йиғимлари тарифи учун тўланадиган валюта тўғрисида буйруқ чиқарилади.
Консуллик йиғимлари тарифини маҳаллий валютадаги миқдорини ҳисоблаш учун Ўзбекистон Республикаси Ташқи ишлар вазирлиги билан келишилган ҳолда Ўзбекистон Республикасининг хорижий муассасаси раҳбари томонидан ҳисоб-китоб курси ўрнатилади.
Ўрнатилган ҳисоб-китоб курси миқдорини белгилашда бошқа мамлакатлар томонидан Ўзбекистон Республикаси фуқаролари учун белгиланган консуллик йиғимлари миқдори бўйича ўзаро тенглик тамойилларига риоя қилинганлиги ва миллий валютанинг АҚШ долларига нисбатан курсининг ўзгариши натижасида консуллик йиғимларидан олинадиган даромадлар камайишининг олди олинганлиги каби омиллар инобатга олиниши лозим.
18. Консуллик йиғимлари тарифининг белгиланган курси Ўзбекистон Республикасининг хорижий муассасаси раҳбари томонидан ҳар чоракда буйруқ билан тасдиқланади. Зарурият тугилганда белгиланган ҳисоб-китоб курси чорак мобайнида ўзгартирилиши мумкин.
19. Консуллик йиғимлари ва ҳақиқий харажатларнинг ўрнини қоплаш ҳисобидан йиғимлар тарифининг маҳаллий валютадаги миқдорини аниқлаш учун белгиланган ҳисоб-китоб курси хорижий муассасалар бухгалтерия операцияларини амалга оширишда қўлланилмайди.
20. Консуллик йиғимлари тарифини Ўзбекистон Республикасининг хорижий муассасалари жойлашган давлатларнинг миллий валюталарига нисбатан қайта ҳисоблашда ҳисоб-китоб курсининг тўғри қўлланиши учун жавобгарлик Ўзбекистон Республикасининг хорижий муассасалари раҳбарлари ва бухгалтерлари зиммасига юклатилади.
6-боб. Якуний қоида
21. Мазкур Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавобгар бўлади.
Ташқи ишлар вазири А. КАМИЛОВ
Молия вазири Т. ИШМЕТОВ
Тошкент ш.,
2021 йил 25 февраль,
Тошкент ш.,
2021 йил 16 февраль,
61-сон
10-сон
Oʻzbekiston Respublikasi Tashqi ishlar vazirligi Oʻzbekiston Respublikasi Moliya vazirligining
Qarori
NIZOM
Konsullik harakatlarini bajarish bilan bogʻliq haqiqiy xarajatlarning oʻrnini qoplash hisobidan yigʻimlar undirish va kelib tushgan pul mablagʻlaridan foydalanish hamda konsullik yigʻimlari tarifini AQSH dollari kursiga nisbatan qayta hisoblash tartibi toʻgʻrisidagi nizomni tasdiqlash haqida
Oʻzbekiston Respublikasining “Oʻzbekiston Respublikasining Konsullik ustavini tasdiqlash toʻgʻrisida”gi Qonuni , Oʻzbekiston Respublikasi Prezidentining 2018-yil 8-avgustdagi PF-5505-son “Norma ijodkorligi faoliyatini takomillashtirish konsepsiyasini tasdiqlash toʻgʻrisida”gi Farmoni , 2013-yil 24-dekabrdagi PQ-2095-son “Oʻzbekiston Respublikasining xorijdagi diplomatik vakolatxonalari va konsullik muassasalari xodimlarining mehnatiga haq toʻlash tizimini takomillashtirish toʻgʻrisida”gi qarori va Oʻzbekiston Respublikasi Vazirlar Mahkamasining 2010-yil 2-apreldagi 62-son “Vazirliklar. davlat qoʻmitalari va idoralarning budjetdan tashqari jamgʻarmalariga mablagʻlar ajratishni tartibga solish chora-tadbirlari toʻgʻrisida”gi qaroriga muvofiq Oʻzbekiston Respublikasi Tashqi ishlar vazirligi va Moliya vazirligi qaror qiladi:
1. Konsullik harakatlarini bajarish bilan bogʻliq haqiqiy xarajatlarning oʻrnini qoplash hisobidan yigʻimlar undirish va kelib tushgan pul mablagʻlaridan foydalanish hamda konsullik yigʻimlari tarifini AQSH dollari kursiga nisbatan qayta hisoblash tartibi toʻgʻrisidagi nizom ilovaga muvofiq tasdiqlansin.
2. Mazkur qaror rasmiy eʼlon qilingan kundan eʼtiboran kuchga kiradi.
Oʻzbekiston Respublikasi Tashqi ishlar vazirligining 2021-yil 25-fevraldagi 61-son va Moliya vazirligining 2021-yil 16-fevraldagi 10-son qaroriga ILOVA
Konsullik harakatlarini bajarish bilan bogʻlik haqiqiy xarajatlarning oʻrnini qoplash hisobidan yigʻimlar undirish va kelib tushgan pul mablagʻlaridan foydalanish xamda konsullik yigʻimlari tarifini AQSH dollari kursiga nisbatan qayta hisoblash tartibi toʻgʻrisidagi
Mazkur Nizom Oʻzbekiston Respublikasining “Oʻzbekiston Respublikasining Konsullik ustavini tasdiqlash toʻgʻrisida”gi Qonuniga muvofiq konsullik harakatlarini bajarish bilan bogʻliq haqiqiy xarajatlarning oʻrnini qoplash hisobidan yigʻimlar undirish va kelib tushgan pul mablagʻlaridan foydalanish hamda konsullik yigʻimlari tarifini AQSH dollari kursiga nisbatan qayta hisoblash tartibini belgilaydi .
1-bob. Umumiy qoidalar
1. Mazkur Nizomda quyidagi asosiy tushunchalardan foydalaniladi:
konsullik yigʻimlari tarifi — Oʻzbekiston Respublikasi Prezidentining 2013-yil 24-dekabrdagi PQ-2095-son qarori bilan tasdiqlangan Oʻzbekiston Respublikasi konsullik yigʻimlari tarifiga muvofiq oʻrnatilgan yigʻimlar miqdori;
haqiqiy xarajatlar — konsullik harakatlarini amalga oshirish vaqtida konsullik yigʻimlariga qoʻshimcha ravishda toʻlanadigan yigʻim miqdoridan qoplanuvchi Oʻzbekiston Respublikasining xorijdagi diplomatik vakolatxonalari va konsullik muassasalari tomonidan bajariladigan moddiy xarajatlar;
Oʻzbekiston Respublikasining xorijiy muassasalari — Oʻzbekiston Respublikasining xorijdagi diplomatik vakolatxonalari va konsullik muassasalari .
2. Konsullik harakatlarini amalga oshirganlik uchun konsullik yigʻimlari, shuningdek koʻrsatilgan harakatlar amalga oshirilganligi bilan bogʻliq haqiqiy xarajatlarning oʻrnini qoplash hisobidan yigʻimlar undiriladi.
3. Haqiqiy xarajatlar quyidagilarni oʻz ichiga oladi:
pochta, telegraf, telefon, teleks, faksimil va modem orqali amalga oshirilgan aloqalar:
kanselyariya mollarini xarid qilish;
transport xarajatlari;
Oʻzbekiston Respublikasining xorijiy muassasalari xodimlarining konsullik harakati bajariladigan joyga xizmat safariga yuborilishi;
shoshilinch konsullik harakatlarini amalga oshirish;
blankalar sotib olish va tayyorlash, shu jumladan viza blankasi;
boshqa xarajatlar (saqlash, mulkni qidirish, sotish va b.).
2-bob. Haqiqiy xarajatlarning oʻrnini qoplash hisobidan yigʻimlarni undirish
4. Haqiqiy xarajatlarning oʻrnini qoplash hisobidan yigʻimlar konsullik harakatlari bajarilganda undiriladi. Bunda, yigʻimlar quyidagi miqdorlardan oshmasligi lozim:
Oʻzbekiston Respublikasi vizasini rasmiylashtirish uchun — 45 AQSH dollari;
Oʻzbekiston Respublikasi fuqarosining xorijga chiqish biometrik pasportini, shuningdek fuqaroligi boʻlmagan shaxsning biometrik harakatlanish hujjatini rasmiylashtirish uchun — 20 AKSH dollari;
fuqarolik masalalari bilan bogʻliq hujjatlarni rasmiylashtirish uchun — 30 AQSH dollari;
fuqarolarni roʻyxatga olish uchun — 25 AQSH dollari;
hujjatlarni legallashtirish va notarial harakatlarni amalga oshirish uchun — 15 AQSH dollari;
boshqa konsullik xizmatlari uchun — 20 AQSH dollari.
5. Haqiqiy xarajatlarning oʻrnini qoplash hisobidan yigʻim miqdorini hisoblash har bir Oʻzbekiston Respublikasining xorijiy muassasasi uchun ikki tomonlama munosabatlarni rivojlantirish istiqbollari, xorijiy davlatdagi tovarlar va xizmatlarning qiymati va boshqa holatlarni (tenglik prinsipi va b.) hisobga olgan holda, biroq mazkur Nizomning 4-bandida koʻrsatilgan miqdorlardan koʻp boʻlmagan tarzda amalga oshiriladi.
Haqiqiy xarajatlarning oʻrnini qoplash hisobidan yigʻimning aniq miqdorlari Oʻzbekiston Respublikasining xorijiy muassasasi rahbari tomonidan Oʻzbekiston Respublikasi Tashqi ishlar vazirligi bilan kelishilgan holda belgilanadi.
Agar haqiqiy xarajatlarning oʻrnini qoplash hisobidan yigʻim mazkur Nizomning 4 va 5-bandlarida belgilangan tartibdagi yigʻim miqdoridan oshib ketgan taqdirda (masalan, konsullik mansabdor shaxsining transport, kunlik, uy-joy ijarasi va boshqa xarajatlari), Oʻzbekiston Respublikasining xorijiy muassasasi rahbari arizachi bilan kelishgan holda haqiqiy xarajatlar oʻrni toʻliq qoplanguniga qadar yigʻim miqdorini oshirish huquqiga ega.
6. Ariza beruvchilarning (konsullik harakatidan manfaatdor shaxslar) konsullik yigʻimlaridan ozod qilinganligi yoki unga nisbatan kamaytirilgan tarif belgilanganidan qatʼi nazar, ulardan haqiqiy xarajatlarning oʻrnini qoplash hisobidan yigʻim toʻla hajmda undiriladi.
7. Haqiqiy xarajatlarning oʻrnini qoplash hisobidan yigʻim, konsullik yigʻimi bilan bir vaqtda AQSH dollarida, boshqa erkin almashtiriladigan valyutada yoki Oʻzbekiston Respublikasining xorijiy muassasasi joylashgan xorijiy davlatning milliy valyutasida (milliy valyuta erkin almashtiriladigan valyuta boʻlmagan joylarda) Oʻzbekiston Respublikasining xalqaro shartnomalariga muvofiq yoki oʻzarolik tamoyiliga rioya etgan holda amalga oshiriladi.
Haqiqiy xarajatlarning oʻrnini qoplash hisobidan tushgan yigʻim mablagʻlarining hisob-kitobi konsullik yigʻimi sifatida tushgan mablagʻlardan alohida amalga oshiriladi.
Ariza beruvchilardan (konsullik harakatidan manfaatdor shaxslar) haqiqiy xarajatlarning oʻrnini qoplash hisobidan yigʻim sifatida kelib tushgan barcha mablagʻlar kassa kirim orderlari yoki bank hujjatlari orqali rasmiylashtiriladi va Oʻzbekiston Respublikasi xorijiy muassasalarining tegishli hisobotlarida aks ettiriladi.
3-bob. Qabul qilingan mablagʻlardan foydalanish
8. Konsullik harakatlari amalga oshirilgani uchun kelib tushgan haqiqiy xarajatlarning oʻrnini qoplash hisobidan yigʻimning 70 foizi Davlat budjetiga, 30 foizi esa Oʻzbekiston Respublikasining Diplomatik xizmat organlarini rivojlantirish jamgʻarmasiga (bundan buyon matnda Jamgʻarma deb yuritiladi) yoʻnaltiriladi.
9. Davlat budjetiga taalluqli (70 foiz) mablagʻlar Oʻzbekiston Respublikasi xorijiy muassasalarining tasdiqlangan smeta xarajatlarini moliyalashtirish uchun yuboriladi.
10. Jamgʻarma mablagʻlaridan foydalanish Oʻzbekiston Respublikasi Prezidentining 2018-yil 5-apreldagi PQ-3654-son qarori bilan tasdiqlangan Oʻzbekiston Respublikasining diplomatik xizmat organlarini rivojlantirish jamgʻarmasi toʻgʻrisidagi nizom talablari asosida amalga oshiriladi.
4-bob. Buxgalteriya hisobini yuritish va hisobotlarni topshirish
11. Haqiqiy xarajatlarning oʻrnini qoplash hisobi yigʻimidan kelib tushgan 70 foiz miqdoridagi Davlat budjetiga oʻtkaziladigan pul mablagʻlari buxgalteriya hisobotidagi “Quyi idoralar joriy hisobi”, “Quyi idoralar gʻaznasi” hisoblarida debit, “Konsullik yigʻimlari boʻyicha toʻlovlar hisobida kredit tarzida koʻrinadi.
12. Haqiqiy xarajatlarning oʻrnini qoplash hisobi yigʻimidan kelib tushgan 30 foiz miqdoridagi Jamgʻarma pul mablagʻlari buxgalteriya hisobotida “Quyi idoralar joriy hisobi”, “Quyi idoralar gʻaznasi” hisoblarida debit va “Konsullik yigʻimlari boʻyicha toʻlovlar” hisoblarida kredit tarzida koʻrinadi.
13. Oʻzbekiston Respublikasining xorijiy muassasalari konsullik yigʻimlari va haqiqiy xarajatlarning oʻrnini qoplash hisobidan yigʻimlarning alohida bank hisobvaraqasiga (konsullik yigʻimlari uchun) kelib tushishini hisobga oladilar va muntazam ravishda (bir oyda bir marta) xorijiy muassasaning asosiy budjet hisobidan Davlat budjetiga tegishli mablagʻlar oʻtkazilishini taʼminlaydi.
Jamgʻarma mablagʻlari xarajatlarini amalga oshirishda konsullik yigʻimlari hisob raqamidan foydalaniladi.
14. Haqiqiy xarajatlarning oʻrnini qoplash hisobidan tushgan yigʻimlar va ulardan foydalanish toʻgʻrisida hisobot Oʻzbekiston Respublikasi Tashqi ishlar vazirligining Moliya-iqtisod boshqarmasiga choraklik va yillik buxgalteriya hisobotlar doirasida yuboriladi.
Oʻzbekiston Respublikasining xorijiy muassasalari tomonidan konsullik yigʻimlari tushishi boʻyicha har oylik tezkor hisobotlar tuzilganda, alohida jadvalda haqiqiy xarajatlarning oʻrnini qoplash hisobidan undirilgan yigʻimlar koʻrsatiladi.
15. Haqiqiy xarajatlarning oʻrnini qoplash hisobidan yigʻimlar stavkalarini toʻgʻri qoʻllanilishi va qabul qilingan mablagʻlarning ishlatilishi uchun javobgarlik Oʻzbekiston Respublikasining xorijiy muassasalari rahbarlari va buxgalterlari zimmasiga yuklatiladi.
5-bob. Konsullik yigʻimlari tarifini AQSH dollari kursiga nisbatan qayta hisoblash
16. Oʻzbekiston Respublikasining konsullik yigʻimlari tarifiga muvofiq konsullik yigʻimlari kuyidagi valyutalarda toʻlanadi:
a) AQSH dollarida;
b) boshqa erkin almashtiriladigan valyutada;
v) Oʻzbekiston Respublikasining xalqaro shartnomalariga muvofiq yoki oʻzaro tenglik tamoyillariga rioya qilish asosida xorijiy muassasalar joylashgan davlatlarning milliy valyutasida (milliy valyuta erkin almashtiriladigan valyuta boʻlmagan joylarda).
17. Oʻzbekiston Respublikasining xorijiy muassasasi rahbari tomonidan konsullik yigʻimlari tarifi uchun toʻlanadigan valyuta toʻgʻrisida buyruq chiqariladi.
Konsullik yigʻimlari tarifini mahalliy valyutadagi miqdorini hisoblash uchun Oʻzbekiston Respublikasi Tashqi ishlar vazirligi bilan kelishilgan holda Oʻzbekiston Respublikasining xorijiy muassasasi rahbari tomonidan hisob-kitob kursi oʻrnatiladi.
Oʻrnatilgan hisob-kitob kursi miqdorini belgilashda boshqa mamlakatlar tomonidan Oʻzbekiston Respublikasi fuqarolari uchun belgilangan konsullik yigʻimlari miqdori boʻyicha oʻzaro tenglik tamoyillariga rioya qilinganligi va milliy valyutaning AQSH dollariga nisbatan kursining oʻzgarishi natijasida konsullik yigʻimlaridan olinadigan daromadlar kamayishining oldi olinganligi kabi omillar inobatga olinishi lozim.
18. Konsullik yigʻimlari tarifining belgilangan kursi Oʻzbekiston Respublikasining xorijiy muassasasi rahbari tomonidan har chorakda buyruq bilan tasdiqlanadi. Zaruriyat tugilganda belgilangan hisob-kitob kursi chorak mobaynida oʻzgartirilishi mumkin.
19. Konsullik yigʻimlari va haqiqiy xarajatlarning oʻrnini qoplash hisobidan yigʻimlar tarifining mahalliy valyutadagi miqdorini aniqlash uchun belgilangan hisob-kitob kursi xorijiy muassasalar buxgalteriya operatsiyalarini amalga oshirishda qoʻllanilmaydi.
20. Konsullik yigʻimlari tarifini Oʻzbekiston Respublikasining xorijiy muassasalari joylashgan davlatlarning milliy valyutalariga nisbatan qayta hisoblashda hisob-kitob kursining toʻgʻri qoʻllanishi uchun javobgarlik Oʻzbekiston Respublikasining xorijiy muassasalari rahbarlari va buxgalterlari zimmasiga yuklatiladi.
6-bob. Yakuniy qoida
21. Mazkur Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladi.
Tashqi ishlar vaziri A. KAMILOV
Moliya vaziri T. ISHMETOV
Toshkent sh.,
2021-yil 25-fevral,
Toshkent sh.,
2021-yil 16-fevral,
61-son
10-son