📅 2021-yil 29-mart · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 29 март · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 29 марта 2021 г. · Постановления Кабинета Министров
Официальный текст. Официальный документ. Редакционные примечания не включены.
📅 29 March 2021 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Сурхондарё вилоятининг Сариосиё туманидаги «Тўполанг» сув омборидан хавфсиз ва самарали фойдаланишни таъминлаш чора-тадбирлари тўғрисида
Мамлакатимизда сув-энергетика ресурсларини бошқариш тизимини такомиллаштириш, «Тўполанг» сув омборидан хавфсиз ва ишончли фойдаланишни таъминлаш ҳамда давлат бюджетидан ажратилаётган маблағлардан самарали фойдаланиш мақсадида Вазирлар Маҳкамаси қарор қилади:
1. Ўзбекистон Республикаси Сув хўжалиги вазирлиги, «Ўзбекгидроэнерго» акциядорлик жамияти, Молия вазирлиги ҳамда Давлат активларини бошқариш агентлигининг Сурхондарё вилояти Сариосиё туманидаги «Тўполанг» сув омборини (кейинги ўринларда — объект) «Ўзбекгидроэнерго» акциядорлик жамиятига унинг устав капиталидаги давлат улушини объект баланс қийматига ошириш ҳисобига бериш тўғрисидаги таклифига розилик берилсин.
2. Ўзбекистон Республикаси Сув хўжалиги вазирлиги ва Молия вазирлиги «Ўзбекгидроэнерго» акциядорлик жамияти билан биргаликда бир ой муддатда объектнинг барча иншоотлари, асосий воситалари (механизмлар, автотранспорт воситалари) ва товар-моддий бойликлари тўлиқ хатловдан ўтказилиб, белгиланган тартибда топширилиши ва қабул қилинишини таъминласин.
3. «Ўзбекгидроэнерго» акциядорлик жамияти:
а) 2021 йил давомида объектнинг бошқарув тизимини ўз ичига олувчи сув ресурсларини бошқариш, объектнинг техник ҳолати ишончлилигини натурада кузатиш ишларини мунтазам амалга оширишга қаратилган назорат-ўлчаш ва сейсмик хавфсизлик қурилмалари, локал хабар бериш тизимини автоматлаштириш ҳамда қўриқлаш муҳандислик-техник воситалари билан жиҳозлаш ишлари амалга оширилишини;
б) объектдан фойдаланишда:
унинг хавфсиз ва ишончли ишлашини, жумладан, сувни тўплаш ва чиқаришда сув омборидан фойдаланиш қоидаларига қатъий амал қилинишини;
сув омборидан Гидрометеорология хизмати маркази маълумотлари ва ўртача кўп йиллик сув сарфларига кўра ишлаб чиқилган ва Сув хўжалиги вазирлиги билан келишилган жадвал асосида сув чиқарилишини;
сувнинг ҳисоби ва ҳисоботи «Тўполанг ГЭСлар каскади» УК томонидан амалга оширилишини ҳамда маълумотлар тизимли равишда Сув хўжалиги вазирлигига тақдим этиб борилишини таъминласин.
4. Мазкур қарорнинг бажарилишини назорат қилиш Ўзбекистон Республикаси Бош вазирининг аграр ва озиқ-овқат соҳаларини ривожлантириш масалалари бўйича ўринбосари Ш.М. Ғаниев, Ўзбекистон Республикаси сув хўжалиги вазири Ш.Р. Хамраев ҳамда «Ўзбекгидроэнерго» акциядорлик жамияти бошқаруви раиси А.А. Сангинов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2021 йил 29 март,
164-сон
Oʻzbekiston Respublikasi Vazirlar Mahkamasining
qarori
Surxondaryo viloyatining Sariosiyo tumanidagi “Toʻpolang” suv omboridan xavfsiz va samarali foydalanishni taʼminlash chora-tadbirlari toʻgʻrisida
Mamlakatimizda suv-energetika resurslarini boshqarish tizimini takomillashtirish, “Toʻpolang” suv omboridan xavfsiz va ishonchli foydalanishni taʼminlash hamda davlat budjetidan ajratilayotgan mablagʻlardan samarali foydalanish maqsadida Vazirlar Mahkamasi qaror qiladi:
1. Oʻzbekiston Respublikasi Suv xoʻjaligi vazirligi, “Oʻzbekgidroenergo” aksiyadorlik jamiyati, Moliya vazirligi hamda Davlat aktivlarini boshqarish agentligining Surxondaryo viloyati Sariosiyo tumanidagi “Toʻpolang” suv omborini (keyingi oʻrinlarda — obyekt) “Oʻzbekgidroenergo” aksiyadorlik jamiyatiga uning ustav kapitalidagi davlat ulushini obyekt balans qiymatiga oshirish hisobiga berish toʻgʻrisidagi taklifiga rozilik berilsin.
2. Oʻzbekiston Respublikasi Suv xoʻjaligi vazirligi va Moliya vazirligi “Oʻzbekgidroenergo” aksiyadorlik jamiyati bilan birgalikda bir oy muddatda obyektning barcha inshootlari, asosiy vositalari (mexanizmlar, avtotransport vositalari) va tovar-moddiy boyliklari toʻliq xatlovdan oʻtkazilib, belgilangan tartibda topshirilishi va qabul qilinishini taʼminlasin.
3. “Oʻzbekgidroenergo” aksiyadorlik jamiyati:
a) 2021-yil davomida obyektning boshqaruv tizimini oʻz ichiga oluvchi suv resurslarini boshqarish, obyektning texnik holati ishonchliligini naturada kuzatish ishlarini muntazam amalga oshirishga qaratilgan nazorat-oʻlchash va seysmik xavfsizlik qurilmalari, lokal xabar berish tizimini avtomatlashtirish hamda qoʻriqlash muhandislik-texnik vositalari bilan jihozlash ishlari amalga oshirilishini;
b) obyektdan foydalanishda:
uning xavfsiz va ishonchli ishlashini, jumladan, suvni toʻplash va chiqarishda suv omboridan foydalanish qoidalariga qatʼiy amal qilinishini;
suv omboridan Gidrometeorologiya xizmati markazi maʼlumotlari va oʻrtacha koʻp yillik suv sarflariga koʻra ishlab chiqilgan va Suv xoʻjaligi vazirligi bilan kelishilgan jadval asosida suv chiqarilishini;
suvning hisobi va hisoboti “Toʻpolang GESlar kaskadi” UK tomonidan amalga oshirilishini hamda maʼlumotlar tizimli ravishda Suv xoʻjaligi vazirligiga taqdim etib borilishini taʼminlasin.
4. Mazkur qarorning bajarilishini nazorat qilish Oʻzbekiston Respublikasi Bosh vazirining agrar va oziq-ovqat sohalarini rivojlantirish masalalari boʻyicha oʻrinbosari Sh.M. Gʻaniyev, Oʻzbekiston Respublikasi suv xoʻjaligi vaziri Sh.R. Xamrayev hamda “Oʻzbekgidroenergo” aksiyadorlik jamiyati boshqaruvi raisi A.A. Sanginov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2021-yil 29-mart,
164-son