📅 2021-yil 3-aprel · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 3 апрель · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 3 апреля 2021 г. · Постановления Кабинета Министров
Официальный текст. Официальный документ. Редакционные примечания не включены.
📅 3 April 2021 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
ТУЗИЛМАСИ
Ўзбекистон Республикаси Қишлоқ хўжалиги вазирлиги ҳузурида «Агросервис оператор» давлат унитар корхонасини ташкил этиш тўғрисида
Ўзбекистон Республикаси Президентининг «Халқаро тикланиш ва тараққиёт банки ҳамда Халқаро тараққиёт уюшмаси иштирокида «Ўзбекистон Республикаси қишлоқ хўжалигини модернизация қилиш» лойиҳасини амалга ошириш чора-тадбирлари тўғрисида» 2020 йил 11 августдаги ПҚ-4803-сон қарори ижросини таъминлаш, шунингдек, интенсив технологияларга асосланган боғ ва токзорларни, шунингдек, қишлоқ хўжалиги озиқ-овқат маҳсулотларини қайта ишлаш, тайёрлаш ва сақлаш инфратузилмасини аҳоли ва тадбиркорлик субъектларига «тайёр ҳолда топширишнинг» замонавий механизмларини жорий этиш орқали аҳоли бандлигини таъминлаш мақсадида Вазирлар Маҳкамаси қарор қилади:
1. Ўзбекистон Республикаси Қишлоқ хўжалиги вазирлиги, Инвестициялар ва ташқи савдо вазирлиги ҳамда Молия вазирлигининг Қишлоқ хўжалиги вазирлиги ҳузурида «Агросервис оператор» давлат унитар корхонасини (кейинги ўринларда — «Агросервис оператор» ДУК) ташкил этиш тўғрисидаги таклифига розилик берилсин.
2. Қуйидагилар «Агросервис оператор» ДУКнинг асосий вазифалари этиб белгилансин:
боғдорчилик ва узумчилик хўжаликларини, қишлоқ хўжалиги озиқ-овқат маҳсулотларини қайта ишлаш, тайёрлаш ва сақлаш инфратузилмасини барқарор ривожлантиришни таъминлашга қаратилган мақсадли комплекс дастурларни амалга ошириш;
боғдорчилик ва узумчилик хўжалигида илмий ютуқлар, илғор илмий ишланмалар ва интенсив агротехнологияларни кенг жорий этишга қаратилган таклифларни ишлаб чиқиш;
рақобатбардош қишлоқ хўжалиги маҳсулотларини етиштириш, қайта ишлаш, тайёрлаш ва сақлаш, шунингдек, мамлакатнинг экспорт салоҳиятини ошириш мақсадида инвестицияларни, шу жумладан, хорижий инвестицияларни жалб этишга кўмаклашиш;
интенсив ва ресурстежамкор технологияларга асосланган боғ ва токзорлар плантацияларини, қишлоқ хўжалиги озиқ-овқат маҳсулотларини қайта ишлаш, тайёрлаш ва сақлаш инфратузилмасини барпо этишга илғор тажрибага эга салоҳиятли ва молиявий барқарор пудратчи ташкилотларни белгиланган тартибда жалб этиш;
Жаҳон банки томонидан белгиланган тартиб асосида боғ ва токзорлар плантацияларини босқичма-босқич барпо этиш ҳамда уларни тайёр ҳолда аҳоли ва тадбиркорлик субъектларига узоқ муддатга, бўлиб тўлаш шарти билан реализация қилиш;
боғдорчилик ва узумчилик хўжаликлари фаолиятини ҳамда қишлоқ хўжалиги озиқ-овқат маҳсулотларини қайта ишлаш, тайёрлаш ва сақлаш инфратузилмасини ташкил этишда аҳоли ва тадбиркорлик субъектларига шартнома асосида агротехник ҳамда бошқа хизматлар кўрсатиш.
3. Белгилансинки:
Ўзбекистон Республикаси Қишлоқ хўжалиги вазирлиги «Агросервис оператор» ДУКнинг муассиси ҳисобланади;
«Агросервис оператор» ДУКнинг фаолияти Қишлоқ хўжалиги вазирлиги ҳузуридаги Озиқ-овқат ва қишлоқ хўжалиги соҳасида стратегик ривожланиш ва тадқиқотлар халқаро маркази томонидан мувофиқлаштирилади.
4. Ўзбекистон Республикаси Қишлоқ хўжалиги вазирлиги ҳузуридаги «Агросервис оператор» давлат унитар корхонасининг тузилмаси 1-иловага мувофиқ тасдиқлансин.
5. Ўзбекистон Республикаси Қишлоқ хўжалиги вазирлиги бир ой муддатда:
«Агросервис оператор» ДУКнинг уставини тасдиқласин ҳамда белгиланган тартибда давлат рўйхатидан ўтказилишини таъминласин;
«Агросервис оператор» ДУКнинг моддий-техник базасини яратиш, шу жумладан, уни жойлаштириш ҳамда юқори малакали кадрлар билан жамлаш чораларини кўрсин.
6. Қуйидагилар «Агросервис оператор» ДУК фаолиятини молиялаштириш манбалари этиб белгилансин:
Ўзбекистон Республикаси Қишлоқ хўжалиги вазирлиги ҳузуридаги Озиқ-овқат ва қишлоқ хўжалиги соҳасида стратегик ривожланиш ва тадқиқотлар халқаро маркази томонидан ажратиладиган маблағлар;
хўжалик фаолиятидан ва шартномалар асосида хизматлар кўрсатишдан тушадиган тушумлар;
боғ ва токзорларни аҳоли ва тадбиркорлик субъектларига реализация қилишдан тушган маблағлар;
қонун ҳужжатларида тақиқланмаган бошқа манбалар.
Белгилансинки, «Агросервис оператор» ДУК томонидан барпо этилган боғ ва токзорларни аҳоли ва тадбиркорлик субъектларига реализация қилишдан тушган маблағлар янги боғлар ва токзорлар майдонини кенгайтириш ва агротехник тадбирларни ўтказиш, шунингдек, боғдорчилик ва узумчилик хўжаликлари салоҳиятини оширишга қаратилган тадбирлар учун йўналтирилади.
7. Қорақалпоғистон Республикаси Вазирлар Кенгаши ва вилоятлар ҳокимликлари «Агросервис оператор» ДУК томонидан янги боғ ва токзорлар барпо этишга қишлоқ хўжалигида фойдаланилмаётган очиқ ер майдонлари, захирада турган ҳосилдорлиги паст бўлган пахта ва ғалладан қисқарган майдонлар, яроқсиз ҳамда иқтисодий жиҳатдан самарасиз деб топилган боғ ва токзорлар жойлашган ер майдонлари ажратилишини таъминласин.
8. Вазирлар Маҳкамасининг «Фарғона вилоятида интенсив технологияларга асосланган боғ ва токзорлар барпо этиш лойиҳасини амалга оширишга доир чора-тадбирлар тўғрисида» 2019 йил 25 ноябрдаги 950-сон қарорининг 1-бандига 2-иловага мувофиқ ўзгартириш ва қўшимча киритилсин.
9. Мазкур қарорнинг бажарилишини назорат қилиш Ўзбекистон Республикаси Бош вазирининг аграр ва озиқ-овқат соҳаларини ривожлантириш масалалари бўйича ўринбосари Ш.М. Ғаниев ҳамда Ўзбекистон Республикаси қишлоқ хўжалиги вазири Ж.А. Ходжаев зиммасига юклансин.
Вазирлар Маҳкамасининг 2021 йил 3 апрелдаги 180-сон қарорига 1-ИЛОВА
Ўзбекистон Республикаси Қишлоқ хўжалиги вазирлиги ҳузуридаги «Агросервис оператор» давлат унитар корхонасининг
Вазирлар Маҳкамасининг 2021 йил 3 апрелдаги 180-сон қарорига 2-ИЛОВА
Вазирлар Маҳкамасининг «Фарғона вилоятида интенсив технологияларга асосланган боғ ва токзорлар барпо этиш лойиҳасини амалга оширишга доир чора-тадбирлар тўғрисида» 2019 йил 25 ноябрдаги 950-сон қарорининг 1-бандига киритилаётган ўзгартириш ва қўшимча
1. Иккинчи хатбошига «Фарғона вилоятининг Ўзбекистон, Олтиариқ, Қува» сўзларидан кейин «Қўштепа» сўзи қўшилсин;
2. Тўртинчи хатбоши қуйидаги таҳрирда баён қилинсин:
«акциядорлик жамияти устав капиталини Қишлоқ хўжалиги вазирлиги ҳузуридаги Боғдорчилик ва иссиқхона хўжалигини ривожлантириш агентлигига — 13 фоиз, Фарғона вилояти ҳокимлигига — 2 фоиз, маҳаллий ва хорижий инвесторларга — 85 фоиз миқдорида тақсимлаш тўғрисидаги таклифлари маъқуллансин».
Ўзбекистон Республикасининг Бош вазири А. АРИПОВ
Тошкент ш.,
2021 йил 3 апрель,
180-сон
Oʻzbekiston Respublikasi Vazirlar Mahkamasining
qarori
TUZILMASI
Oʻzbekiston Respublikasi Qishloq xoʻjaligi vazirligi huzurida “Agroservis operator” davlat unitar korxonasini tashkil etish toʻgʻrisida
Oʻzbekiston Respublikasi Prezidentining “Xalqaro tiklanish va taraqqiyot banki hamda Xalqaro taraqqiyot uyushmasi ishtirokida “Oʻzbekiston Respublikasi qishloq xoʻjaligini modernizatsiya qilish” loyihasini amalga oshirish chora-tadbirlari toʻgʻrisida” 2020-yil 11-avgustdagi PQ-4803-son qarori ijrosini taʼminlash, shuningdek, intensiv texnologiyalarga asoslangan bogʻ va tokzorlarni, shuningdek, qishloq xoʻjaligi oziq-ovqat mahsulotlarini qayta ishlash, tayyorlash va saqlash infratuzilmasini aholi va tadbirkorlik subyektlariga “tayyor holda topshirishning” zamonaviy mexanizmlarini joriy etish orqali aholi bandligini taʼminlash maqsadida Vazirlar Mahkamasi qaror qiladi:
1. Oʻzbekiston Respublikasi Qishloq xoʻjaligi vazirligi, Investitsiyalar va tashqi savdo vazirligi hamda Moliya vazirligining Qishloq xoʻjaligi vazirligi huzurida “Agroservis operator” davlat unitar korxonasini (keyingi oʻrinlarda — “Agroservis operator” DUK) tashkil etish toʻgʻrisidagi taklifiga rozilik berilsin.
2. Quyidagilar “Agroservis operator” DUKning asosiy vazifalari etib belgilansin:
bogʻdorchilik va uzumchilik xoʻjaliklarini, qishloq xoʻjaligi oziq-ovqat mahsulotlarini qayta ishlash, tayyorlash va saqlash infratuzilmasini barqaror rivojlantirishni taʼminlashga qaratilgan maqsadli kompleks dasturlarni amalga oshirish;
bogʻdorchilik va uzumchilik xoʻjaligida ilmiy yutuqlar, ilgʻor ilmiy ishlanmalar va intensiv agrotexnologiyalarni keng joriy etishga qaratilgan takliflarni ishlab chiqish;
raqobatbardosh qishloq xoʻjaligi mahsulotlarini yetishtirish, qayta ishlash, tayyorlash va saqlash, shuningdek, mamlakatning eksport salohiyatini oshirish maqsadida investitsiyalarni, shu jumladan, xorijiy investitsiyalarni jalb etishga koʻmaklashish;
intensiv va resurstejamkor texnologiyalarga asoslangan bogʻ va tokzorlar plantatsiyalarini, qishloq xoʻjaligi oziq-ovqat mahsulotlarini qayta ishlash, tayyorlash va saqlash infratuzilmasini barpo etishga ilgʻor tajribaga ega salohiyatli va moliyaviy barqaror pudratchi tashkilotlarni belgilangan tartibda jalb etish;
Jahon banki tomonidan belgilangan tartib asosida bogʻ va tokzorlar plantatsiyalarini bosqichma-bosqich barpo etish hamda ularni tayyor holda aholi va tadbirkorlik subyektlariga uzoq muddatga, boʻlib toʻlash sharti bilan realizatsiya qilish;
bogʻdorchilik va uzumchilik xoʻjaliklari faoliyatini hamda qishloq xoʻjaligi oziq-ovqat mahsulotlarini qayta ishlash, tayyorlash va saqlash infratuzilmasini tashkil etishda aholi va tadbirkorlik subyektlariga shartnoma asosida agrotexnik hamda boshqa xizmatlar koʻrsatish.
3. Belgilansinki:
Oʻzbekiston Respublikasi Qishloq xoʻjaligi vazirligi “Agroservis operator” DUKning muassisi hisoblanadi;
“Agroservis operator” DUKning faoliyati Qishloq xoʻjaligi vazirligi huzuridagi Oziq-ovqat va qishloq xoʻjaligi sohasida strategik rivojlanish va tadqiqotlar xalqaro markazi tomonidan muvofiqlashtiriladi.
4. Oʻzbekiston Respublikasi Qishloq xoʻjaligi vazirligi huzuridagi “Agroservis operator” davlat unitar korxonasining tuzilmasi 1-ilovaga muvofiq tasdiqlansin.
5. Oʻzbekiston Respublikasi Qishloq xoʻjaligi vazirligi bir oy muddatda:
“Agroservis operator” DUKning ustavini tasdiqlasin hamda belgilangan tartibda davlat roʻyxatidan oʻtkazilishini taʼminlasin;
“Agroservis operator” DUKning moddiy-texnik bazasini yaratish, shu jumladan, uni joylashtirish hamda yuqori malakali kadrlar bilan jamlash choralarini koʻrsin.
6. Quyidagilar “Agroservis operator” DUK faoliyatini moliyalashtirish manbalari etib belgilansin:
Oʻzbekiston Respublikasi Qishloq xoʻjaligi vazirligi huzuridagi Oziq-ovqat va qishloq xoʻjaligi sohasida strategik rivojlanish va tadqiqotlar xalqaro markazi tomonidan ajratiladigan mablagʻlar;
xoʻjalik faoliyatidan va shartnomalar asosida xizmatlar koʻrsatishdan tushadigan tushumlar;
bogʻ va tokzorlarni aholi va tadbirkorlik subyektlariga realizatsiya qilishdan tushgan mablagʻlar;
qonun hujjatlarida taqiqlanmagan boshqa manbalar.
Belgilansinki, “Agroservis operator” DUK tomonidan barpo etilgan bogʻ va tokzorlarni aholi va tadbirkorlik subyektlariga realizatsiya qilishdan tushgan mablagʻlar yangi bogʻlar va tokzorlar maydonini kengaytirish va agrotexnik tadbirlarni oʻtkazish, shuningdek, bogʻdorchilik va uzumchilik xoʻjaliklari salohiyatini oshirishga qaratilgan tadbirlar uchun yoʻnaltiriladi.
7. Qoraqalpogʻiston Respublikasi Vazirlar Kengashi va viloyatlar hokimliklari “Agroservis operator” DUK tomonidan yangi bogʻ va tokzorlar barpo etishga qishloq xoʻjaligida foydalanilmayotgan ochiq yer maydonlari, zaxirada turgan hosildorligi past boʻlgan paxta va gʻalladan qisqargan maydonlar, yaroqsiz hamda iqtisodiy jihatdan samarasiz deb topilgan bogʻ va tokzorlar joylashgan yer maydonlari ajratilishini taʼminlasin.
8. Vazirlar Mahkamasining “Fargʻona viloyatida intensiv texnologiyalarga asoslangan bogʻ va tokzorlar barpo etish loyihasini amalga oshirishga doir chora-tadbirlar toʻgʻrisida” 2019-yil 25-noyabrdagi 950-son qarorining 1-bandiga 2-ilovaga muvofiq oʻzgartirish va qoʻshimcha kiritilsin.
9. Mazkur qarorning bajarilishini nazorat qilish Oʻzbekiston Respublikasi Bosh vazirining agrar va oziq-ovqat sohalarini rivojlantirish masalalari boʻyicha oʻrinbosari Sh.M. Gʻaniyev hamda Oʻzbekiston Respublikasi qishloq xoʻjaligi vaziri J.A. Xodjayev zimmasiga yuklansin.
Vazirlar Mahkamasining 2021-yil 3-apreldagi 180-son qaroriga 1-ILOVA
Oʻzbekiston Respublikasi Qishloq xoʻjaligi vazirligi huzuridagi “Agroservis operator” davlat unitar korxonasining
Vazirlar Mahkamasining 2021-yil 3-apreldagi 180-son qaroriga 2-ILOVA
Vazirlar Mahkamasining “Fargʻona viloyatida intensiv texnologiyalarga asoslangan bogʻ va tokzorlar barpo etish loyihasini amalga oshirishga doir chora-tadbirlar toʻgʻrisida” 2019-yil 25-noyabrdagi 950-son qarorining 1-bandiga kiritilayotgan oʻzgartirish va qoʻshimcha
1. Ikkinchi xatboshiga “Fargʻona viloyatining Oʻzbekiston, Oltiariq, Quva” soʻzlaridan keyin “Qoʻshtepa” soʻzi qoʻshilsin;
2. Toʻrtinchi xatboshi quyidagi tahrirda bayon qilinsin:
“aksiyadorlik jamiyati ustav kapitalini Qishloq xoʻjaligi vazirligi huzuridagi Bogʻdorchilik va issiqxona xoʻjaligini rivojlantirish agentligiga — 13 foiz, Fargʻona viloyati hokimligiga — 2 foiz, mahalliy va xorijiy investorlarga — 85 foiz miqdorida taqsimlash toʻgʻrisidagi takliflari maʼqullansin”.
Oʻzbekiston Respublikasining Bosh vaziri A. ARIPOV
Toshkent sh.,
2021-yil 3-aprel,
180-son