📅 2021-yil 13-aprel · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 13 апрель · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 13 апреля 2021 г. · Постановления Кабинета Министров
Официальный текст. Официальный документ. Редакционные примечания не включены.
📅 13 April 2021 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Тошкент давлат техника университетининг Термиз филиали ҳузурида Ангор кўп тармоқли техникумини ташкил этиш чора-тадбирлари тўғрисида
Ўзбекистон Республикаси Президентининг «Профессионал таълим тизимини янада такомиллаштиришга доир қўшимча чора-тадбирлар тўғрисида» 2019 йил 6 сентябрдаги ПФ-5812-сон Фармони ижросини таъминлаш, келгусида ҳудуднинг ижтимоий-иқтисодий ривожлантириш дастурлари доирасида яратиладиган янги иш ўринларига бўлган меҳнат бозори эҳтиёжларини ҳисобга олиб ўрта махсус профессионал таълим босқичидаги кадрларга бўлган талабни қондириш мақсадида Вазирлар Маҳкамаси қарор қилади:
1. Ўзбекистон Республикаси Олий ва ўрта махсус таълим вазирлиги, Уй-жой коммунал хизмат кўрсатиш вазирлиги ҳамда Сурхондарё вилояти ҳокимлигининг Ангор қурилиш ва коммунал хўжалиги коллежини Тошкент давлат техника университетининг Термиз филиали ҳузуридаги Ангор кўп тармоқли техникумига (кейинги ўринларда — Техникум) айлантириш тўғрисидаги таклифига розилик берилсин.
Белгилансинки, Техникум Ангор қурилиш ва коммунал хўжалиги коллежининг барча ҳуқуқлари, мажбуриятлари ва шартномалари бўйича ҳуқуқий вориси ҳисобланади.
2. Қуйидагилар Техникумнинг асосий вазифалари этиб белгилансин:
ҳудуднинг ижтимоий-иқтисодий ривожлантириш дастурлари доирасида ва келгусида яратиладиган янги иш ўринларига бўлган меҳнат бозори эҳтиёжларини ҳамда Техникумнинг имкониятларини ҳисобга олиб, белгиланган тартибда қабул параметрларини шакллантириш;
ўқувчиларни танланган мутахассислик бўйича замонавий талабларга жавоб берадиган, пухта билим, амалий кўникма ва малакага эга бўладиган, касбий тайёргарликни таъминлайдиган давлат таълим стандартлари асосида ўқитиш;
таълим жараёни инновацион технологиялар асосида ташкил этилишини таъминлаш;
таълим жараёни учун зарур моддий-техника, ўқув-методик базани яратиш ва ўқув жараёнига юқори иш тажрибасига эга бўлган амалиётчи мутахассисларни жалб этиш.
3. Белгилаб қўйилсинки:
Техникум давлат ўрта махсус профессионал таълим муассасаси ҳисобланади;
Техникум фаолияти 2021/2022 ўқув йилидан бошланади;
2020/2021 ўқув йилида Ангор қурилиш ва коммунал хўжалиги коллежига қабул қилинган ўқувчилар ўқишни битиргунларига қадар Техникум биноларида ўқув жараёнини амалдаги дастурларга мувофиқ давом эттирадилар.
4. Ўзбекистон Республикаси Олий ва ўрта махсус таълим вазирлиги:
бир ой муддатда Техникум уставини белгиланган тартибда тасдиқласин ҳамда давлат рўйхатидан ўтказилишини таъминласин;
Тошкент давлат техника университети билан биргаликда Техникумда ўқув жараёнини ташкил этиш мақсадида юқори малакали педагог ходимларни жалб этиш чораларини кўрсин.
5. Қуйидагилар Техникум фаолиятини молиялаштириш манбалари этиб белгилансин:
Ўзбекистон Республикаси Давлат бюджети маблағлари;
тўлов-контракт асосида ўқитишдан тушадиган маблағлар;
хўжалик фаолияти ва шартнома асосида хизматлар кўрсатишдан тушадиган маблағлар;
жисмоний ва юридик шахсларнинг ҳомийлик хайриялари;
халқаро молия ташкилотларининг грантлари;
қонунчилик ҳужжатларида тақиқланмаган бошқа манбалар.
Белгилаб қўйилсинки, Техникумда давлат буюртмаси бўйича давлат гранти асосида ўқувчиларнинг таълим олишини ташкил этиш 2021 йилда Ўзбекистон Республикасининг республика бюджетидан биринчи даражали бюджет маблағларини тақсимловчи сифатида Ўзбекистон Республикаси Олий ва ўрта махсус таълим вазирлигига ажратилган маблағлар доирасида назарда тутилади.
6. Ўзбекистон Республикаси Олий ва ўрта махсус таълим вазирлиги Ахборот технологиялари ва коммуникацияларини ривожлантириш вазирлиги билан биргаликда онлайн маъруза ўтказиш ҳамда масофавий таълим технологияларини жорий этиш учун 2021 йил 1 августга қадар Техникумни юқори тезликдаги Интернет жаҳон ахборот тармоғига ҳамда электрон таълим миллий тармоғига улаш чораларини кўрсин.
7. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари Б.А. Мусаев ҳамда Ўзбекистон Республикаси олий ва ўрта махсус таълим вазири А.Ҳ. Тошкулов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2021 йил 13 апрель,
207-сон
Oʻzbekiston Respublikasi Vazirlar Mahkamasining
qarori
Toshkent davlat texnika universitetining Termiz filiali huzurida Angor koʻp tarmoqli texnikumini tashkil etish chora-tadbirlari toʻgʻrisida
Oʻzbekiston Respublikasi Prezidentining “Professional taʼlim tizimini yanada takomillashtirishga doir qoʻshimcha chora-tadbirlar toʻgʻrisida” 2019-yil 6-sentabrdagi PF-5812-son Farmoni ijrosini taʼminlash, kelgusida hududning ijtimoiy-iqtisodiy rivojlantirish dasturlari doirasida yaratiladigan yangi ish oʻrinlariga boʻlgan mehnat bozori ehtiyojlarini hisobga olib oʻrta maxsus professional taʼlim bosqichidagi kadrlarga boʻlgan talabni qondirish maqsadida Vazirlar Mahkamasi qaror qiladi:
1. Oʻzbekiston Respublikasi Oliy va oʻrta maxsus taʼlim vazirligi, Uy-joy kommunal xizmat koʻrsatish vazirligi hamda Surxondaryo viloyati hokimligining Angor qurilish va kommunal xoʻjaligi kollejini Toshkent davlat texnika universitetining Termiz filiali huzuridagi Angor koʻp tarmoqli texnikumiga (keyingi oʻrinlarda — Texnikum) aylantirish toʻgʻrisidagi taklifiga rozilik berilsin.
Belgilansinki, Texnikum Angor qurilish va kommunal xoʻjaligi kollejining barcha huquqlari, majburiyatlari va shartnomalari boʻyicha huquqiy vorisi hisoblanadi.
2. Quyidagilar Texnikumning asosiy vazifalari etib belgilansin:
hududning ijtimoiy-iqtisodiy rivojlantirish dasturlari doirasida va kelgusida yaratiladigan yangi ish oʻrinlariga boʻlgan mehnat bozori ehtiyojlarini hamda Texnikumning imkoniyatlarini hisobga olib, belgilangan tartibda qabul parametrlarini shakllantirish;
oʻquvchilarni tanlangan mutaxassislik boʻyicha zamonaviy talablarga javob beradigan, puxta bilim, amaliy koʻnikma va malakaga ega boʻladigan, kasbiy tayyorgarlikni taʼminlaydigan davlat taʼlim standartlari asosida oʻqitish;
taʼlim jarayoni innovatsion texnologiyalar asosida tashkil etilishini taʼminlash;
taʼlim jarayoni uchun zarur moddiy-texnika, oʻquv-metodik bazani yaratish va oʻquv jarayoniga yuqori ish tajribasiga ega boʻlgan amaliyotchi mutaxassislarni jalb etish.
3. Belgilab qoʻyilsinki:
Texnikum davlat oʻrta maxsus professional taʼlim muassasasi hisoblanadi;
Texnikum faoliyati 2021/2022 oʻquv yilidan boshlanadi;
2020/2021 oʻquv yilida Angor qurilish va kommunal xoʻjaligi kollejiga qabul qilingan oʻquvchilar oʻqishni bitirgunlariga qadar Texnikum binolarida oʻquv jarayonini amaldagi dasturlarga muvofiq davom ettiradilar.
4. Oʻzbekiston Respublikasi Oliy va oʻrta maxsus taʼlim vazirligi:
bir oy muddatda Texnikum ustavini belgilangan tartibda tasdiqlasin hamda davlat roʻyxatidan oʻtkazilishini taʼminlasin;
Toshkent davlat texnika universiteti bilan birgalikda Texnikumda oʻquv jarayonini tashkil etish maqsadida yuqori malakali pedagog xodimlarni jalb etish choralarini koʻrsin.
5. Quyidagilar Texnikum faoliyatini moliyalashtirish manbalari etib belgilansin:
Oʻzbekiston Respublikasi Davlat budjeti mablagʻlari;
toʻlov-kontrakt asosida oʻqitishdan tushadigan mablagʻlar;
xoʻjalik faoliyati va shartnoma asosida xizmatlar koʻrsatishdan tushadigan mablagʻlar;
jismoniy va yuridik shaxslarning homiylik xayriyalari;
xalqaro moliya tashkilotlarining grantlari;
qonunchilik hujjatlarida taqiqlanmagan boshqa manbalar.
Belgilab qoʻyilsinki, Texnikumda davlat buyurtmasi boʻyicha davlat granti asosida oʻquvchilarning taʼlim olishini tashkil etish 2021-yilda Oʻzbekiston Respublikasining respublika budjetidan birinchi darajali budjet mablagʻlarini taqsimlovchi sifatida Oʻzbekiston Respublikasi Oliy va oʻrta maxsus taʼlim vazirligiga ajratilgan mablagʻlar doirasida nazarda tutiladi.
6. Oʻzbekiston Respublikasi Oliy va oʻrta maxsus taʼlim vazirligi Axborot texnologiyalari va kommunikatsiyalarini rivojlantirish vazirligi bilan birgalikda onlayn maʼruza oʻtkazish hamda masofaviy taʼlim texnologiyalarini joriy etish uchun 2021-yil 1-avgustga qadar Texnikumni yuqori tezlikdagi Internet jahon axborot tarmogʻiga hamda elektron taʼlim milliy tarmogʻiga ulash choralarini koʻrsin.
7. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A. Musayev hamda Oʻzbekiston Respublikasi oliy va oʻrta maxsus taʼlim vaziri A.H. Toshkulov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2021-yil 13-aprel,
207-son