📅 2021-yil 19-aprel · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 19 апрель · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 19 апреля 2021 г. · Постановления Кабинета Министров
Официальный текст. Официальный документ. Редакционные примечания не включены.
📅 19 April 2021 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
СХЕМАСИ
РЎЙХАТИ
Давлат хизматларини кўрсатишда агентлар фаолиятини ташкил этиш чора-тадбирлари тўғрисида
Ўзбекистон Республикаси Президентининг «Давлат томонидан тартибга солинадиган соҳаларга хусусий секторни жалб этиш бўйича қўшимча чора-тадбирлар тўғрисида» 2020 йил 7 декабрдаги ПҚ-4913-сон қарорининг ижросини таъминлаш, шунингдек, фуқароларга ва тадбиркорлик субъектларига давлат хизматлари кўрсатиш самарадорлигини янада ошириш мақсадида Вазирлар Маҳкамаси қарор қилади:
1. Ўзбекистон Республикаси Президентининг «Давлат томонидан тартибга солинадиган соҳаларга хусусий секторни жалб этиш бўйича қўшимча чора-тадбирлар тўғрисида» 2020 йил 7 декабрдаги ПҚ-4913-сон қарорининг 6-бандига мувофиқ:
тадбиркорлик субъектларига давлат хизматлари марказлари томонидан айрим турдаги давлат хизматлари кўрсатилишида агент сифатида иштирок этишга рухсат берилганлиги;
агент хизматларини кўрсатувчи тадбиркорлик субъектларининг ходимлари аккредитациядан ўтган нодавлат таълим муассасалари томонидан 3 йил муддатга бериладиган ҳамда кўрсатилиши мумкин бўлган хизматлар турлари аниқ белгиланган сертификатга (кейинги ўринларда — сертификат) эга бўлиши шартлиги;
агент хизматларини кўрсатиш Ўзбекистон Республикаси Адлия вазирлиги ҳузуридаги Давлат хизматлари агентлигининг (кейинги ўринларда — Давлат хизматлари агентлиги) ягона платформаси доирасида амалга оширилиши белгиланганлиги маълумот учун қабул қилинсин.
2. Белгилансинки:
агентлар томонидан хизмат кўрсатиш қонунчилик ҳужжатлари, шу жумладан маъмурий регламентларда давлат хизматлари марказлари учун ўрнатилган тартибда амалга оширилади;
агент томонидан қонунчилик ҳужжатлари, шу жумладан маъмурий регламентларда назарда тутилган, давлат хизматларини кўрсатиш учун қилинган тўловлар (давлат божи, йиғим, тўлов) ушбу ҳужжатларда белгиланган тартибда тақсимланади, агентнинг пуллик хизматлари учун қилинган алоҳида тўлов тўлиқ ҳажмда унинг тасарруфида қолади.
давлат хизматларини кўрсатиш жараёнида агентнинг хатоси (айби) сабабли ваколатли органлар томонидан ариза берувчининг аризасини кўриб чиқиш рад этилган тақдирда, ариза берувчи томонидан қилинган барча тўловлар миқдори агент ҳисобидан қопланади.
3. Қуйидагиларни назарда тутувчи Давлат хизматларини кўрсатишда тадбиркорлик субъектларига агент сифатида иштирок этиш учун сертификат бериш тартиби тўғрисидаги низом 1-иловага мувофиқ тасдиқлансин:
сертификат олиши учун бажарилиши лозим бўлган талаблар;
ўқув курсларини ташкил этиш, малака имтиҳонини ўтказиш ва сертификат бериш тартиби;
сертификатни қайта расмийлаштириш, амал қилишини тугатиш ва бекор қилиш тартиби;
сертификат берилган агентлар реестрини шакллантириш ва юритиш.
4. Тадбиркорлик субъектлари томонидан агент сифатида кўрсатилиши тақиқланган давлат хизматлари рўйхати 2-иловага мувофиқ тасдиқлансин.
5. Давлат хизматлари агентлиги:
икки ой муддатда нодавлат таълим муассасалари томонидан агентларга QR-код қўйилган сертификат бериш, уни қайта расмийлаштириш, амал қилишини тугатиш, бекор қилиш ва сертификатларнинг электрон реестрини автоматик равишда юритиш, шунингдек, Агентлик томонидан сертификат бериш жараёнини тўлиқ мониторинг қилиш имконини берувчи ахборот тизимини жорий этсин;
сертификатга эга бўлган тадбиркорлик субъектлари ва (ёки) уларнинг ходимларининг dxa.gov.uz давлат хизматлари кўрсатиш ахборот тизимига уланишини таъминласин;
агентлар томонидан қонунчилик ҳужжатлари, шу жумладан маъмурий регламентлар талабларига риоя этилиши устидан белгиланган тартибда назоратни амалга оширсин.
6. Ўзбекистон Республикаси Ахборот технологиялари ва коммуникацияларини ривожлантириш вазирлиги Давлат хизматлари агентлиги билан биргаликда икки ой муддатда Ягона интерактив давлат хизматлари порталида агент сифатида хизматларни кўрсатувчи тадбиркорлик субъектларининг электрон реестрини шакллантириш ва юритиш функциясини жорий этсин.
Белгилаб қўйилсинки, ушбу электрон реестрни шакллантириш ва юритиш функциясини жорий этиш билан боғлиқ харажатлар Давлат хизматлари агентлигининг бюджетдан ташқари жамғармаси маблағлари ҳисобидан амалга оширилади.
7. Ўзбекистон Республикаси Ҳукуматининг айрим қарорларига 3-иловага мувофиқ қўшимчалар киритилсин.
8. Ўзбекистон Республикаси Адлия вазирлиги манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
9. Мазкур қарорнинг бажарилишини назорат қилиш Ўзбекистон Республикаси адлия вазири Р.К. Давлетов зиммасига юклансин.
Вазирлар Маҳкамасининг 2021 йил 19 апрелдаги 221-сон қарорига 1-ИЛОВА
Давлат хизматларини кўрсатишда тадбиркорлик субъектларига агент сифатида иштирок этиш учун сертификат бериш тартиби тўғрисида
1-боб. Умумий қоидалар
1. Ушбу Низом Давлат хизматларини кўрсатишда тадбиркорлик субъектларига агент сифатида иштирок этиш учун сертификат бериш тартибини белгилайди.
Мазкур Низом талаблари почта алоқаси миллий операторига нисбатан татбиқ этилмайди.
2. Ушбу Низомда қуйидаги асосий тушунчалардан фойдаланилади:
агент — аккредитациядан ўтган ўқув марказлари томонидан бериладиган сертификатга эга бўлган, давлат хизматлари кўрсатиш ахборот тизими (кейинги ўринларда — ахборот тизими) орқали ариза берувчиларнинг маълумот ва ҳужжатларини тегишли давлат органи ёки ташкилотига юбориш ҳамда хизмат натижасини ариза берувчига тақдим этиш фаолиятини амалга оширувчи якка тартибдаги тадбиркор (ходими) ёки юридик шахс бўлган тадбиркорлик субъектининг ходими;
ваколатли орган — Ўзбекистон Республикаси Адлия вазирлиги ҳузуридаги Давлат хизматлари агентлигининг (кейинги ўринларда — Агентлик) Қорақалпоғистон Республикаси, вилоятлар ва Тошкент шаҳар бошқармалари;
малака имтиҳони — сертификат олиш учун қўйилган талабларга талабгорнинг мос келишини аниқлашга йўналтирилган, малака комиссияси томонидан ўтказиладиган имтиҳон;
сертификат — малака имтиҳонини муваффақиятли топширган талабгорга бериладиган, давлат хизматини кўрсатиш ҳуқуқини тасдиқловчи давлат намунасидаги ҳужжат;
талабгор — сертификат олиш учун мурожаат қилувчи якка тартибдаги тадбиркор (ходими) ёки юридик шахс мақомидаги тадбиркорлик субъектининг ходими.
3. Сертификат Ўзбекистон Республикаси Вазирлар Маҳкамаси ҳузуридаги Таълим сифатини назорат қилиш давлат инспекциясида аккредитациядан ўтган нодавлат таълим муассасалари (кейинги ўринларда — ўқув марказлари) томонидан давлат хизматларини кўрсатиш бўйича ўқув курслари якунларига кўра 3 йил муддатга берилади.
Амал қилиш муддати тугагач янги сертификат олиш ҳамда амалдаги сертификатда назарда тутилмаган хизматларни кўрсатиш учун сертификат олиш мазкур Низомнинг 2-бобига мувофиқ умумий тартибда амалга оширилади.
4. Тадбиркорлик субъекти унинг ходимлари сертификат олиши учун қуйидаги талабларга жавоб бериши лозим:
давлат хизматини кўрсатиш учун камида 15 м 2 майдонга эга бўлган бино мавжудлиги;
давлат хизматини кўрсатувчи ҳар бир ходим компьютер ва бошқа зарур ташкилий техника билан таъминланганлиги;
камида 5 киши учун мўлжалланган кутиш ўриндиқлари мавжудлиги;
банк ҳисобварағига эга бўлиши;
назорат-касса техникаси ва (ёки) ҳисоб-китоб терминаллари ўрнатилганлиги.
5. Давлат хизматларини кўрсатишда тадбиркорлик субъектларига агент сифатида иштирок этиш учун сертификат бериш ушбу Низомнинг 1-иловасидаги схемага мувофиқ амалга оширилади.
2-боб. Ўқув курсларини ташкил этиш, малака имтиҳонини ўтказиш ва сертификат бериш тартиби
6. Ўқув марказлари белгиланган тартибда аккредитациядан ўтгандан сўнг ваколатли органни хабардор қилади.
7. Ўқув марказларининг рўйхати Агентликнинг расмий веб-сайтига жойлаштирилади.
8. Талабгорлар ўқув курсларида қатнашиш учун ўзига қулай бўлган ҳудуддаги ўқув марказларига мурожаат қилишлари мумкин.
9. Ўқув курслари давлат хизматлари марказлари томонидан кўрсатиладиган, талабгорлар танлаган хизматлар турлари бўйича 40 соатлик ўқув дастури асосида ўқув марказининг биносида ташкил этилади.
10. Талабгорларни ўқитиш учун ўқув марказлари томонидан шартнома асосида ваколатли органнинг масъул ходимлари жалб этилиши мумкин.
11. Ўқув курсларида қатнашиш учун тўлов миқдори ўқув марказлари томонидан мустақил белгиланади. Бироқ, ушбу миқдор ҳар бир талабгор учун базавий ҳисоблаш миқдорининг беш бараваридан ошмаслиги лозим.
12. Ўқув курслари якуни бўйича талабгорлар сертификат олиш учун малака имтиҳони топширадилар.
13. Малака имтиҳонини ўтказиш учун ваколатли органнинг қарори билан беш кишидан кам бўлмаган таркибда малака имтиҳони комиссияси (кейинги ўринларда — комиссия) ташкил этилади. Комиссия таркибига ваколатли орган раҳбари ва ходимлари, келишув асосида Агентлик ходими ҳамда ўқув марказлари вакиллари киритилади.
Ваколатли орган раҳбари комиссия раиси ҳисобланади.
14. Малака имтиҳони ўқув марказида гуруҳлар шаклланишига қараб, лекин икки ойда камида бир маротаба ўтказилиши лозим.
15. Малака имтиҳони топширадиган талабгорлар рўйхати ваколатли орган томонидан шакллантирилгандан сўнг, ушбу Низомнинг 4-бандида кўрсатилган талабларнинг бажарилганлиги тадбиркорлик субъекти жойлашган (унга энг яқин) ҳудуддаги давлат хизмати маркази ходимлари томонидан имтиҳон кунига қадар жойига чиққан ҳолда текширилади ҳамда натижаси бўйича марказ директори томонидан ваколатли органга маълумот берилади.
Мазкур Низомнинг 4-бандида назарда тутилган талабларнинг барчасини бажарган тадбиркорлик субъектининг ходимлари (талабгорлар) малака имтиҳонига киришига рухсат берилади. Ушбу талаблар тўлиқ бажарилмаган тақдирда, талабгорлар талабларнинг барчаси бажарилгандан сўнг навбатдаги малака имтиҳонига киритилиши мумкин.
16. Малака имтиҳонини топширишда талабгорлар паспорт ёки шахсини тасдиқловчи бошқа ҳужжатни кўрсатади.
17. Малака имтиҳонига келмаган ёки кечиккан талабгор навбатдаги малака имтиҳонидаги талабгорлар рўйхатига киритилади ва бу ҳақда почта хизмати орқали ёки электрон равишда уч иш куни ичида хабардор қилинади.
18. Малака имтиҳонининг шаффофлиги ва холислигини таъминлаш мақсадида имтиҳон жараёни узлуксиз равишда овозли видеоёзувга туширилади.
19. Малака имтиҳони тест кўринишида электрон шаклда ваколатли орган биносида топширилади.
20. Тест саволлари Агентлик томонидан ўқув дастури доирасида ўтилган мавзулар бўйича ишлаб чиқилади.
Тест саволларини тузиш жараёнида фойдаланилган мавзулар Агентликнинг расмий веб-сайтида жойлаштирилади.
Тест саволлари соҳадаги қонунчилик ҳужжатлари такомиллаштирилишини ҳисобга олган ҳолда янгилаб борилади.
21. Тест синови 50 та саволдан иборат бўлади.
Талабгорга малака имтиҳонини топшириш учун икки академик соат вақт берилади.
22. Тест синови ўтказиладиган хонага уяли телефон, телекоммуникация воситалари ва шпаргалкалар олиб кириш, бошқа талабгорлар билан суҳбатлашиш тақиқланади.
Ушбу талабларни бузган талабгорлар тест синовидан четлаштирилади ва малака имтиҳонидан ўтмаган деб ҳисобланади. Малака имтиҳонидан четлаштирилган талабгорлар бўйича далолатнома тузилиб, комиссия раиси томонидан имзоланади.
23. Малака имтиҳони натижалари тест синови якунланиши билан эълон қилинади, шу куннинг ўзида комиссиянинг баённомаси билан расмийлаштирилади ҳамда Агентликнинг расмий веб-сайтига жойлаштирилади.
24. Тест саволларининг камида 35 тасига (70%) тўғри жавоб берган талабгор малака имтиҳонидан ўтган ҳисобланади.
25. Малака имтиҳонидан ўтмаган талабгорлар базавий ҳисоблаш миқдорининг икки баравари миқдорида йиғим тўлаб, навбатдаги малака имтиҳонидаги талабгорлар рўйхатига киритилган ҳолда такроран имтиҳон топшириш ҳуқуқига эга.
Йиғим суммаси Агентликнинг бюджетдан ташқари ҳисобварағига ўтказилади.
Комиссиянинг қароридан норози бўлган талабгорлар белгиланган тартибда тегишли юқори турувчи органга ёки судга мурожаат қилишлари мумкин.
26. Малака имтиҳонини муваффақиятли топширган талабгорларга комиссиянинг баённомаси расмийлаштирилгандан бошлаб уч иш куни ичида мазкур Низомнинг 2-иловасига мувофиқ QR-код (матрик штрихли код) қўйилган сертификат берилади.
Сертификатга агент томонидан кўрсатиладиган хизматлар рўйхати илова қилинади ҳамда агентга давлат хизматлари кўрсатиш ахборот тизимида ушбу рўйхатдаги хизматларни кўрсатиш имконияти яратилади.
3-боб. Сертификатни қайта расмийлаштириш, амал қилишини тугатиш ва бекор қилиш тартиби
27. Агентнинг фамилияси, исми ёки отасининг исми ўзгарган тақдирда, у тегишли ўзгартиришларни тасдиқловчи ҳужжатлар берилган санадан бошлаб ўн кун ичида ўқув марказига сертификатни қайта расмийлаштириш учун ариза билан мурожаат қилади.
Янги сертификат агент томонидан ариза берилган пайтдан бошлаб икки иш куни ичида бепул берилади ҳамда унда қайта расмийлаштирилаётган сертификатнинг рақами қайд қилинади.
28. Сертификатнинг амал қилишини тугатиш ва уни бекор қилиш ваколатли органнинг қарорига асосан амалга оширилади.
29. Қуйидагилар сертификатнинг амал қилишини тугатиш учун асос ҳисобланади:
сертификатнинг амал қилиш муддати тугаганлиги;
сертификатнинг амал қилишини тугатиш тўғрисида сертификат эгасининг аризаси тақдим этилганлиги;
фаолиятини тугатган ёки тўхтатган тадбиркорлик субъектининг аризаси тақдим этилганлиги;
тадбиркорлик субъектини тугатиш ёки унинг фаолиятини тўхтатиш тўғрисида суд, назорат ёки рўйхатга олиш органларидан ахборот олинганлиги;
агент томонидан давлат хизматлари кўрсатиш соҳасидаги қонунчилик ҳужжатлари, шу жумладан маъмурий регламентлар ва мазкур Низом талаблари бузилишини бартараф этиш тўғрисида ваколатли орган тақдимномасининг бажарилмаганлиги;
сертификат эгасининг вафоти, шунингдек, уни белгиланган тартибда муомалага лаёқатсиз ёки муомалага лаёқати чекланган деб эътироф этиш тўғрисидаги суднинг қарори ёхуд озодликдан маҳрум қилиш тўғрисидаги суднинг ҳукми кучга кирганлиги;
агент ва тадбиркорлик субъекти ўртасидаги меҳнат ёки фуқаролик-ҳуқуқий шартномаси бекор қилинганлиги.
30. Сертификатнинг амал қилиши уни тугатиш тўғрисида қарор қабул қилинган санадан бошлаб тугатилади ва агентнинг давлат хизматини кўрсатиш тизимига кириш имконияти тўхтатилади.
31. Сертификат агент томонидан мазкур Низом талабларини бузган ҳолда олинганлиги аниқланган тақдирда, у ваколатли орган томонидан бекор қилинади ҳамда агентнинг давлат хизматини кўрсатиш тизимига кириш имконияти тўхтатилади.
32. Сертификатнинг амал қилишини тугатиш ёки бекор қилиш тўғрисидаги қарорнинг нусхаси қарор қабул қилинган куннинг ўзида агентга юборилади.
Сертификатнинг амал қилишини тугатиш ёки уни бекор қилиш тўғрисидаги қарор устидан қонун ҳужжатларида белгиланган тартибда судга шикоят қилиниши мумкин.
33. Ушбу Низомнинг 29-банди олтинчи хатбошисига асосан сертификатнинг амал қилиши тугатилган, шунингдек, сертификат бекор қилинган агентга, унинг амал қилиши тугатилган ёки бекор қилинган санадан бошлаб олти ой мобайнида сертификат берилмайди. Бунда агентга янги сертификат бериш олти ойдан сўнг мазкур Низомнинг 2-бобида белгиланган тартибда амалга оширилади.
4-боб. Сертификат берилган агентлар реестри ва уни юритиш
34. Ягона интерактив давлат хизматлари порталида Агентлик томонидан тасдиқланадиган шаклда агентларнинг электрон реестри юритилади.
Реестрда қуйидаги маълумотлар қайд этилади:
агентнинг фамилияси, исми, отасининг исми, фаолият юритиш жойининг почта манзили, электрон почта манзили (мавжуд бўлса), телефон рақами;
агент фаолият юритадиган юридик шахснинг номи, почта манзили;
жисмоний шахснинг шахсий идентификация рақами (ЖШ ШИР);
сертификат рақами, берилган сана, унинг амал қилиш муддати;
сертификатнинг амал қилиши тугатилганлиги, бекор қилинганлиги ҳамда қайта расмийлаштирилганлиги тўғрисида маълумотлар.
35. Реестрни юритиш тартиби Агентлик томонидан белгиланади.
36. Реестр Агентликнинг расмий веб-сайтига ҳам жойлаштирилади.
37. Тадбиркорлик субъектлари ушбу Низомнинг 34-банди учинчи ва тўртинчи хатбошиларида кўрсатилган маълумотларнинг ўзгарганлиги тўғрисида ваколатли органга уч кун ичида хабар беришлари лозим.
5-боб. Якунловчи қоидалар
38. Агентлар ўз фаолиятини амалга ошириши натижасида олинган маълумотларнинг сир сақланишини ҳамда «Шахсга доир маълумотлар тўғрисида»ги Ўзбекистон Республикасининг Қонуни талабларига риоя этилишини таъминлаши шарт.
39. Агентлик ва ваколатли органлар агентлар томонидан давлат хизматлари соҳасидаги қонунчилик ҳужжатлари, шу жумладан маъмурий регламентлар ва ушбу Низом талабларига риоя этилишини белгиланган тартибда назорат қилади ҳамда Ягона интерактив давлат хизматлари портали орқали мониторинг қилиб боради.
40. Мазкур Низом талаблари бузилишида айбдор бўлган шахслар қонунчилик ҳужжатларида белгиланган тартибда жавобгар бўлади.
Давлат хизматларини кўрсатишда тадбиркорлик субъектларига агент сифатида иштирок этиш учун сертификат бериш тартиби тўғрисидаги низомга 1-ИЛОВА
Давлат хизматлари кўрсатишда тадбиркорлик субъектларига агент сифатида иштирок этиш учун сертификат бериш
Босқичлар Субъектлар Тадбирлар Бажариш муддатлари 1-босқич Ўқув марказлари Талабгорларни ўқитиш учун Давлат хизматлари агентлигининг ҳудудий бошқармаларига мурожаат қилиш Аккредитациядан ўтгандан сўнг 2-босқич Давлат хизматлари агентлигининг ҳудудий бошқармалари Ўқув марказларининг мурожаатига кўра уларнинг рўйхатини шакллантириш 1 кун ичида 3-босқич Талабгорлар Ўқув марказларига белгиланган тўловни амалга оширган ҳолда ўқув курсларида иштирок этиш Хоҳишига кўра 4-босқич Давлат хизматлари агентлигининг ҳудудий бошқармалари Ўқув курсларида қатнашган талабгорлар учун малака имтиҳонини ўтказиш Ўқув курслари тугагандан сўнг 5-босқич Ўқув марказлари Имтиҳонни муваффақиятли топширган талабгорларга QR-код қўйилган сертификат бериш Малака имтиҳони ўтказилгандан бошлаб 3 кун ичида 6-босқич Давлат хизматлари агентлигининг ҳудудий бошқармалари Агентни давлат хизматини кўрсатиш ахборот тизимига улаш Сертификат берилгандан бошлаб 1 иш куни ичида 7-босқич Давлат хизматлари агентлиги Сертификат берилган агентларни электрон реестрга киритиш Сертификат берилгандан бошлаб 1 иш куни ичида
Давлат хизматларини кўрсатишда тадбиркорлик субъектларига агент сифатида иштирок этиш учун сертификат бериш тартиби тўғрисидаги низомга 2-ИЛОВА
НАМУНА Нодавлат таълим муассасасининг белгиси (логотипи) ________________________________________________ (Нодавлат таълим муассасасининг номи) АГЕНТ СЕРТИФИКАТИ _________-сон 20__ йил «___» ___________ Давлат хизматини кўрсатиш учун агент сертификати ________________________________________________________________________ га (сертификат олган шахснинг Ф.И.О.) Малака имтиҳон комиссиясининг 20___ йил «____»__________даги қарорига асосан берилди. Сертификатнинг амал қилиш муддати __.__.20__ гача. QR-код ўрни
Вазирлар Маҳкамасининг 2021 йил 19 апрелдаги 221-сон қарорига 2-ИЛОВА
Тадбиркорлик субъектлари томонидан агент сифатида кўрсатилиши тақиқланган давлат хизматлари
Т/р Давлат хизматининг тури 1. Тадбиркорлик субъектлари фаолиятини тўхтатиш ва тугатиш 2. Туғилганликни қайд этиш 3. Оталикни белгилаш 4. Фарзандликка олиш 5. Никоҳ тузилганлигини қайд этиш 6. Никоҳдан ажратишни қайд этиш (эр ёки хотиндан бирининг аризаси асосида) 7. Никоҳдан ажратишни қайд этиш (эр ва хотиннинг биргаликдаги аризаси асосида) 8. Никоҳдан ажратишни қайд этиш (суд қарори билан) 9. Ўлимни қайд этиш 10. Далолатнома ёзувларини тиклаш 11. Фуқаролик ҳолати далолатнома ёзувларини ўзгартириш, тўлдириш 12. Фамилия, исм ва ота исмини ўзгартириш 13. Такрорий гувоҳномалар ва бошқа маълумотномалар бериш
Вазирлар Маҳкамасининг 2021 йил 19 апрелдаги 221-сон қарорига 3-ИЛОВА
Ўзбекистон Республикаси Ҳукуматининг айрим қарорларига киритилаётган қўшимчалар
1. Вазирлар Маҳкамасининг 2011 йил 7 январдаги 6-сон қарори билан тасдиқланган Хусусий тадбиркорлар юридик шахс ташкил этмасдан шуғулланиши мумкин бўлган фаолият турлари рўйхатининг IV бўлимига қуйидаги мазмундаги 87-банд қўшилсин:
« 87. Давлат хизматлари кўрсатишда агент сифатида иштирок этиш » .
Ўзбекистон Республикасининг Бош вазири А. АРИПОВ
Тошкент ш.,
2021 йил 19 апрель,
221-сон
Oʻzbekiston Respublikasi Vazirlar Mahkamasining
qarori
NIZOM
SXEMASI
ROʻYXATI
Davlat xizmatlarini koʻrsatishda agentlar faoliyatini tashkil etish chora-tadbirlari toʻgʻrisida
Oʻzbekiston Respublikasi Prezidentining “Davlat tomonidan tartibga solinadigan sohalarga xususiy sektorni jalb etish boʻyicha qoʻshimcha chora-tadbirlar toʻgʻrisida” 2020-yil 7-dekabrdagi PQ-4913-son qarorining ijrosini taʼminlash, shuningdek, fuqarolarga va tadbirkorlik subyektlariga davlat xizmatlari koʻrsatish samaradorligini yanada oshirish maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining “Davlat tomonidan tartibga solinadigan sohalarga xususiy sektorni jalb etish boʻyicha qoʻshimcha chora-tadbirlar toʻgʻrisida” 2020-yil 7-dekabrdagi PQ-4913-son qarorining 6-bandiga muvofiq:
tadbirkorlik subyektlariga davlat xizmatlari markazlari tomonidan ayrim turdagi davlat xizmatlari koʻrsatilishida agent sifatida ishtirok etishga ruxsat berilganligi;
agent xizmatlarini koʻrsatuvchi tadbirkorlik subyektlarining xodimlari akkreditatsiyadan oʻtgan nodavlat taʼlim muassasalari tomonidan 3 yil muddatga beriladigan hamda koʻrsatilishi mumkin boʻlgan xizmatlar turlari aniq belgilangan sertifikatga (keyingi oʻrinlarda — sertifikat) ega boʻlishi shartligi;
agent xizmatlarini koʻrsatish Oʻzbekiston Respublikasi Adliya vazirligi huzuridagi Davlat xizmatlari agentligining (keyingi oʻrinlarda — Davlat xizmatlari agentligi) yagona platformasi doirasida amalga oshirilishi belgilanganligi maʼlumot uchun qabul qilinsin.
2. Belgilansinki:
agentlar tomonidan xizmat koʻrsatish qonunchilik hujjatlari, shu jumladan maʼmuriy reglamentlarda davlat xizmatlari markazlari uchun oʻrnatilgan tartibda amalga oshiriladi;
agent tomonidan qonunchilik hujjatlari, shu jumladan maʼmuriy reglamentlarda nazarda tutilgan, davlat xizmatlarini koʻrsatish uchun qilingan toʻlovlar (davlat boji, yigʻim, toʻlov) ushbu hujjatlarda belgilangan tartibda taqsimlanadi, agentning pullik xizmatlari uchun qilingan alohida toʻlov toʻliq hajmda uning tasarrufida qoladi.
davlat xizmatlarini koʻrsatish jarayonida agentning xatosi (aybi) sababli vakolatli organlar tomonidan ariza beruvchining arizasini koʻrib chiqish rad etilgan taqdirda, ariza beruvchi tomonidan qilingan barcha toʻlovlar miqdori agent hisobidan qoplanadi.
3. Quyidagilarni nazarda tutuvchi Davlat xizmatlarini koʻrsatishda tadbirkorlik subyektlariga agent sifatida ishtirok etish uchun sertifikat berish tartibi toʻgʻrisidagi nizom 1-ilovaga muvofiq tasdiqlansin:
sertifikat olishi uchun bajarilishi lozim boʻlgan talablar;
oʻquv kurslarini tashkil etish, malaka imtihonini oʻtkazish va sertifikat berish tartibi;
sertifikatni qayta rasmiylashtirish, amal qilishini tugatish va bekor qilish tartibi;
sertifikat berilgan agentlar reyestrini shakllantirish va yuritish.
4. Tadbirkorlik subyektlari tomonidan agent sifatida koʻrsatilishi taqiqlangan davlat xizmatlari roʻyxati 2-ilovaga muvofiq tasdiqlansin.
5. Davlat xizmatlari agentligi:
ikki oy muddatda nodavlat taʼlim muassasalari tomonidan agentlarga QR-kod qoʻyilgan sertifikat berish, uni qayta rasmiylashtirish, amal qilishini tugatish, bekor qilish va sertifikatlarning elektron reyestrini avtomatik ravishda yuritish, shuningdek, Agentlik tomonidan sertifikat berish jarayonini toʻliq monitoring qilish imkonini beruvchi axborot tizimini joriy etsin;
sertifikatga ega boʻlgan tadbirkorlik subyektlari va (yoki) ularning xodimlarining dxa.gov.uz davlat xizmatlari koʻrsatish axborot tizimiga ulanishini taʼminlasin;
agentlar tomonidan qonunchilik hujjatlari, shu jumladan maʼmuriy reglamentlar talablariga rioya etilishi ustidan belgilangan tartibda nazoratni amalga oshirsin.
6. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi Davlat xizmatlari agentligi bilan birgalikda ikki oy muddatda Yagona interaktiv davlat xizmatlari portalida agent sifatida xizmatlarni koʻrsatuvchi tadbirkorlik subyektlarining elektron reyestrini shakllantirish va yuritish funksiyasini joriy etsin.
Belgilab qoʻyilsinki, ushbu elektron reyestrni shakllantirish va yuritish funksiyasini joriy etish bilan bogʻliq xarajatlar Davlat xizmatlari agentligining budjetdan tashqari jamgʻarmasi mablagʻlari hisobidan amalga oshiriladi.
7. Oʻzbekiston Respublikasi Hukumatining ayrim qarorlariga 3-ilovaga muvofiq qoʻshimchalar kiritilsin.
8. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
9. Mazkur qarorning bajarilishini nazorat qilish Oʻzbekiston Respublikasi adliya vaziri R.K. Davletov zimmasiga yuklansin.
Vazirlar Mahkamasining 2021-yil 19-apreldagi 221-son qaroriga 1-ILOVA
Davlat xizmatlarini koʻrsatishda tadbirkorlik subyektlariga agent sifatida ishtirok etish uchun sertifikat berish tartibi toʻgʻrisida
1-bob. Umumiy qoidalar
1. Ushbu Nizom Davlat xizmatlarini koʻrsatishda tadbirkorlik subyektlariga agent sifatida ishtirok etish uchun sertifikat berish tartibini belgilaydi.
Mazkur Nizom talablari pochta aloqasi milliy operatoriga nisbatan tatbiq etilmaydi.
2. Ushbu Nizomda quyidagi asosiy tushunchalardan foydalaniladi:
agent — akkreditatsiyadan oʻtgan oʻquv markazlari tomonidan beriladigan sertifikatga ega boʻlgan, davlat xizmatlari koʻrsatish axborot tizimi (keyingi oʻrinlarda — axborot tizimi) orqali ariza beruvchilarning maʼlumot va hujjatlarini tegishli davlat organi yoki tashkilotiga yuborish hamda xizmat natijasini ariza beruvchiga taqdim etish faoliyatini amalga oshiruvchi yakka tartibdagi tadbirkor (xodimi) yoki yuridik shaxs boʻlgan tadbirkorlik subyektining xodimi;
vakolatli organ — Oʻzbekiston Respublikasi Adliya vazirligi huzuridagi Davlat xizmatlari agentligining (keyingi oʻrinlarda — Agentlik) Qoraqalpogʻiston Respublikasi, viloyatlar va Toshkent shahar boshqarmalari;
malaka imtihoni — sertifikat olish uchun qoʻyilgan talablarga talabgorning mos kelishini aniqlashga yoʻnaltirilgan, malaka komissiyasi tomonidan oʻtkaziladigan imtihon;
sertifikat — malaka imtihonini muvaffaqiyatli topshirgan talabgorga beriladigan, davlat xizmatini koʻrsatish huquqini tasdiqlovchi davlat namunasidagi hujjat;
talabgor — sertifikat olish uchun murojaat qiluvchi yakka tartibdagi tadbirkor (xodimi) yoki yuridik shaxs maqomidagi tadbirkorlik subyektining xodimi.
3. Sertifikat Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasida akkreditatsiyadan oʻtgan nodavlat taʼlim muassasalari (keyingi oʻrinlarda — oʻquv markazlari) tomonidan davlat xizmatlarini koʻrsatish boʻyicha oʻquv kurslari yakunlariga koʻra 3 yil muddatga beriladi.
Amal qilish muddati tugagach yangi sertifikat olish hamda amaldagi sertifikatda nazarda tutilmagan xizmatlarni koʻrsatish uchun sertifikat olish mazkur Nizomning 2-bobiga muvofiq umumiy tartibda amalga oshiriladi.
4. Tadbirkorlik subyekti uning xodimlari sertifikat olishi uchun quyidagi talablarga javob berishi lozim:
davlat xizmatini koʻrsatish uchun kamida 15 m 2 maydonga ega boʻlgan bino mavjudligi;
davlat xizmatini koʻrsatuvchi har bir xodim kompyuter va boshqa zarur tashkiliy texnika bilan taʼminlanganligi;
kamida 5 kishi uchun moʻljallangan kutish oʻrindiqlari mavjudligi;
bank hisobvaragʻiga ega boʻlishi;
nazorat-kassa texnikasi va (yoki) hisob-kitob terminallari oʻrnatilganligi.
5. Davlat xizmatlarini koʻrsatishda tadbirkorlik subyektlariga agent sifatida ishtirok etish uchun sertifikat berish ushbu Nizomning 1-ilovasidagi sxemaga muvofiq amalga oshiriladi.
2-bob. Oʻquv kurslarini tashkil etish, malaka imtihonini oʻtkazish va sertifikat berish tartibi
6. Oʻquv markazlari belgilangan tartibda akkreditatsiyadan oʻtgandan soʻng vakolatli organni xabardor qiladi.
7. Oʻquv markazlarining roʻyxati Agentlikning rasmiy veb-saytiga joylashtiriladi.
8. Talabgorlar oʻquv kurslarida qatnashish uchun oʻziga qulay boʻlgan hududdagi oʻquv markazlariga murojaat qilishlari mumkin.
9. Oʻquv kurslari davlat xizmatlari markazlari tomonidan koʻrsatiladigan, talabgorlar tanlagan xizmatlar turlari boʻyicha 40 soatlik oʻquv dasturi asosida oʻquv markazining binosida tashkil etiladi.
10. Talabgorlarni oʻqitish uchun oʻquv markazlari tomonidan shartnoma asosida vakolatli organning masʼul xodimlari jalb etilishi mumkin.
11. Oʻquv kurslarida qatnashish uchun toʻlov miqdori oʻquv markazlari tomonidan mustaqil belgilanadi. Biroq, ushbu miqdor har bir talabgor uchun bazaviy hisoblash miqdorining besh baravaridan oshmasligi lozim.
12. Oʻquv kurslari yakuni boʻyicha talabgorlar sertifikat olish uchun malaka imtihoni topshiradilar.
13. Malaka imtihonini oʻtkazish uchun vakolatli organning qarori bilan besh kishidan kam boʻlmagan tarkibda malaka imtihoni komissiyasi (keyingi oʻrinlarda — komissiya) tashkil etiladi. Komissiya tarkibiga vakolatli organ rahbari va xodimlari, kelishuv asosida Agentlik xodimi hamda oʻquv markazlari vakillari kiritiladi.
Vakolatli organ rahbari komissiya raisi hisoblanadi.
14. Malaka imtihoni oʻquv markazida guruhlar shakllanishiga qarab, lekin ikki oyda kamida bir marotaba oʻtkazilishi lozim.
15. Malaka imtihoni topshiradigan talabgorlar roʻyxati vakolatli organ tomonidan shakllantirilgandan soʻng, ushbu Nizomning 4-bandida koʻrsatilgan talablarning bajarilganligi tadbirkorlik subyekti joylashgan (unga eng yaqin) hududdagi davlat xizmati markazi xodimlari tomonidan imtihon kuniga qadar joyiga chiqqan holda tekshiriladi hamda natijasi boʻyicha markaz direktori tomonidan vakolatli organga maʼlumot beriladi.
Mazkur Nizomning 4-bandida nazarda tutilgan talablarning barchasini bajargan tadbirkorlik subyektining xodimlari (talabgorlar) malaka imtihoniga kirishiga ruxsat beriladi. Ushbu talablar toʻliq bajarilmagan taqdirda, talabgorlar talablarning barchasi bajarilgandan soʻng navbatdagi malaka imtihoniga kiritilishi mumkin.
16. Malaka imtihonini topshirishda talabgorlar pasport yoki shaxsini tasdiqlovchi boshqa hujjatni koʻrsatadi.
17. Malaka imtihoniga kelmagan yoki kechikkan talabgor navbatdagi malaka imtihonidagi talabgorlar roʻyxatiga kiritiladi va bu haqda pochta xizmati orqali yoki elektron ravishda uch ish kuni ichida xabardor qilinadi.
18. Malaka imtihonining shaffofligi va xolisligini taʼminlash maqsadida imtihon jarayoni uzluksiz ravishda ovozli videoyozuvga tushiriladi.
19. Malaka imtihoni test koʻrinishida elektron shaklda vakolatli organ binosida topshiriladi.
20. Test savollari Agentlik tomonidan oʻquv dasturi doirasida oʻtilgan mavzular boʻyicha ishlab chiqiladi.
Test savollarini tuzish jarayonida foydalanilgan mavzular Agentlikning rasmiy veb-saytida joylashtiriladi.
Test savollari sohadagi qonunchilik hujjatlari takomillashtirilishini hisobga olgan holda yangilab boriladi.
21. Test sinovi 50 ta savoldan iborat boʻladi.
Talabgorga malaka imtihonini topshirish uchun ikki akademik soat vaqt beriladi.
22. Test sinovi oʻtkaziladigan xonaga uyali telefon, telekommunikatsiya vositalari va shpargalkalar olib kirish, boshqa talabgorlar bilan suhbatlashish taqiqlanadi.
Ushbu talablarni buzgan talabgorlar test sinovidan chetlashtiriladi va malaka imtihonidan oʻtmagan deb hisoblanadi. Malaka imtihonidan chetlashtirilgan talabgorlar boʻyicha dalolatnoma tuzilib, komissiya raisi tomonidan imzolanadi.
23. Malaka imtihoni natijalari test sinovi yakunlanishi bilan eʼlon qilinadi, shu kunning oʻzida komissiyaning bayonnomasi bilan rasmiylashtiriladi hamda Agentlikning rasmiy veb-saytiga joylashtiriladi.
24. Test savollarining kamida 35 tasiga (70%) toʻgʻri javob bergan talabgor malaka imtihonidan oʻtgan hisoblanadi.
25. Malaka imtihonidan oʻtmagan talabgorlar bazaviy hisoblash miqdorining ikki baravari miqdorida yigʻim toʻlab, navbatdagi malaka imtihonidagi talabgorlar roʻyxatiga kiritilgan holda takroran imtihon topshirish huquqiga ega.
Yigʻim summasi Agentlikning budjetdan tashqari hisobvaragʻiga oʻtkaziladi.
Komissiyaning qaroridan norozi boʻlgan talabgorlar belgilangan tartibda tegishli yuqori turuvchi organga yoki sudga murojaat qilishlari mumkin.
26. Malaka imtihonini muvaffaqiyatli topshirgan talabgorlarga komissiyaning bayonnomasi rasmiylashtirilgandan boshlab uch ish kuni ichida mazkur Nizomning 2-ilovasiga muvofiq QR-kod (matrik shtrixli kod) qoʻyilgan sertifikat beriladi.
Sertifikatga agent tomonidan koʻrsatiladigan xizmatlar roʻyxati ilova qilinadi hamda agentga davlat xizmatlari koʻrsatish axborot tizimida ushbu roʻyxatdagi xizmatlarni koʻrsatish imkoniyati yaratiladi.
3-bob. Sertifikatni qayta rasmiylashtirish, amal qilishini tugatish va bekor qilish tartibi
27. Agentning familiyasi, ismi yoki otasining ismi oʻzgargan taqdirda, u tegishli oʻzgartirishlarni tasdiqlovchi hujjatlar berilgan sanadan boshlab oʻn kun ichida oʻquv markaziga sertifikatni qayta rasmiylashtirish uchun ariza bilan murojaat qiladi.
Yangi sertifikat agent tomonidan ariza berilgan paytdan boshlab ikki ish kuni ichida bepul beriladi hamda unda qayta rasmiylashtirilayotgan sertifikatning raqami qayd qilinadi.
28. Sertifikatning amal qilishini tugatish va uni bekor qilish vakolatli organning qaroriga asosan amalga oshiriladi.
29. Quyidagilar sertifikatning amal qilishini tugatish uchun asos hisoblanadi:
sertifikatning amal qilish muddati tugaganligi;
sertifikatning amal qilishini tugatish toʻgʻrisida sertifikat egasining arizasi taqdim etilganligi;
faoliyatini tugatgan yoki toʻxtatgan tadbirkorlik subyektining arizasi taqdim etilganligi;
tadbirkorlik subyektini tugatish yoki uning faoliyatini toʻxtatish toʻgʻrisida sud, nazorat yoki roʻyxatga olish organlaridan axborot olinganligi;
agent tomonidan davlat xizmatlari koʻrsatish sohasidagi qonunchilik hujjatlari, shu jumladan maʼmuriy reglamentlar va mazkur Nizom talablari buzilishini bartaraf etish toʻgʻrisida vakolatli organ taqdimnomasining bajarilmaganligi;
sertifikat egasining vafoti, shuningdek, uni belgilangan tartibda muomalaga layoqatsiz yoki muomalaga layoqati cheklangan deb eʼtirof etish toʻgʻrisidagi sudning qarori yoxud ozodlikdan mahrum qilish toʻgʻrisidagi sudning hukmi kuchga kirganligi;
agent va tadbirkorlik subyekti oʻrtasidagi mehnat yoki fuqarolik-huquqiy shartnomasi bekor qilinganligi.
30. Sertifikatning amal qilishi uni tugatish toʻgʻrisida qaror qabul qilingan sanadan boshlab tugatiladi va agentning davlat xizmatini koʻrsatish tizimiga kirish imkoniyati toʻxtatiladi.
31. Sertifikat agent tomonidan mazkur Nizom talablarini buzgan holda olinganligi aniqlangan taqdirda, u vakolatli organ tomonidan bekor qilinadi hamda agentning davlat xizmatini koʻrsatish tizimiga kirish imkoniyati toʻxtatiladi.
32. Sertifikatning amal qilishini tugatish yoki bekor qilish toʻgʻrisidagi qarorning nusxasi qaror qabul qilingan kunning oʻzida agentga yuboriladi.
Sertifikatning amal qilishini tugatish yoki uni bekor qilish toʻgʻrisidagi qaror ustidan qonun hujjatlarida belgilangan tartibda sudga shikoyat qilinishi mumkin.
33. Ushbu Nizomning 29-bandi oltinchi xatboshisiga asosan sertifikatning amal qilishi tugatilgan, shuningdek, sertifikat bekor qilingan agentga, uning amal qilishi tugatilgan yoki bekor qilingan sanadan boshlab olti oy mobaynida sertifikat berilmaydi. Bunda agentga yangi sertifikat berish olti oydan soʻng mazkur Nizomning 2-bobida belgilangan tartibda amalga oshiriladi.
4-bob. Sertifikat berilgan agentlar reyestri va uni yuritish
34. Yagona interaktiv davlat xizmatlari portalida Agentlik tomonidan tasdiqlanadigan shaklda agentlarning elektron reyestri yuritiladi.
Reyestrda quyidagi maʼlumotlar qayd etiladi:
agentning familiyasi, ismi, otasining ismi, faoliyat yuritish joyining pochta manzili, elektron pochta manzili (mavjud boʻlsa), telefon raqami;
agent faoliyat yuritadigan yuridik shaxsning nomi, pochta manzili;
jismoniy shaxsning shaxsiy identifikatsiya raqami (JSH SHIR);
sertifikat raqami, berilgan sana, uning amal qilish muddati;
sertifikatning amal qilishi tugatilganligi, bekor qilinganligi hamda qayta rasmiylashtirilganligi toʻgʻrisida maʼlumotlar.
35. Reyestrni yuritish tartibi Agentlik tomonidan belgilanadi.
36. Reyestr Agentlikning rasmiy veb-saytiga ham joylashtiriladi.
37. Tadbirkorlik subyektlari ushbu Nizomning 34-bandi uchinchi va toʻrtinchi xatboshilarida koʻrsatilgan maʼlumotlarning oʻzgarganligi toʻgʻrisida vakolatli organga uch kun ichida xabar berishlari lozim.
5-bob. Yakunlovchi qoidalar
38. Agentlar oʻz faoliyatini amalga oshirishi natijasida olingan maʼlumotlarning sir saqlanishini hamda “Shaxsga doir maʼlumotlar toʻgʻrisida”gi Oʻzbekiston Respublikasining Qonuni talablariga rioya etilishini taʼminlashi shart.
39. Agentlik va vakolatli organlar agentlar tomonidan davlat xizmatlari sohasidagi qonunchilik hujjatlari, shu jumladan maʼmuriy reglamentlar va ushbu Nizom talablariga rioya etilishini belgilangan tartibda nazorat qiladi hamda Yagona interaktiv davlat xizmatlari portali orqali monitoring qilib boradi.
40. Mazkur Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladi.
Davlat xizmatlarini koʻrsatishda tadbirkorlik subyektlariga agent sifatida ishtirok etish uchun sertifikat berish tartibi toʻgʻrisidagi nizomga 1-ILOVA
Davlat xizmatlari koʻrsatishda tadbirkorlik subyektlariga agent sifatida ishtirok etish uchun sertifikat berish
Bosqichlar Subyektlar Tadbirlar Bajarish muddatlari 1-bosqich Oʻquv markazlari Talabgorlarni oʻqitish uchun Davlat xizmatlari agentligining hududiy boshqarmalariga murojaat qilish Akkreditatsiyadan oʻtgandan soʻng 2-bosqich Davlat xizmatlari agentligining hududiy boshqarmalari Oʻquv markazlarining murojaatiga koʻra ularning roʻyxatini shakllantirish 1 kun ichida 3-bosqich Talabgorlar Oʻquv markazlariga belgilangan toʻlovni amalga oshirgan holda oʻquv kurslarida ishtirok etish Xohishiga koʻra 4-bosqich Davlat xizmatlari agentligining hududiy boshqarmalari Oʻquv kurslarida qatnashgan talabgorlar uchun malaka imtihonini oʻtkazish Oʻquv kurslari tugagandan soʻng 5-bosqich Oʻquv markazlari Imtihonni muvaffaqiyatli topshirgan talabgorlarga QR-kod qoʻyilgan sertifikat berish Malaka imtihoni oʻtkazilgandan boshlab 3 kun ichida 6-bosqich Davlat xizmatlari agentligining hududiy boshqarmalari Agentni davlat xizmatini koʻrsatish axborot tizimiga ulash Sertifikat berilgandan boshlab 1 ish kuni ichida 7-bosqich Davlat xizmatlari agentligi Sertifikat berilgan agentlarni elektron reyestrga kiritish Sertifikat berilgandan boshlab 1 ish kuni ichida
Davlat xizmatlarini koʻrsatishda tadbirkorlik subyektlariga agent sifatida ishtirok etish uchun sertifikat berish tartibi toʻgʻrisidagi nizomga 2-ILOVA
NAMUNA Nodavlat taʼlim muassasasining belgisi (logotipi) ________________________________________________ (Nodavlat taʼlim muassasasining nomi) AGENT SERTIFIKATI _________-son 20__ yil “___” ___________ Davlat xizmatini koʻrsatish uchun agent sertifikati ________________________________________________________________________ ga (sertifikat olgan shaxsning F.I.O.) Malaka imtihon komissiyasining 20___ yil “____”__________dagi qaroriga asosan berildi. Sertifikatning amal qilish muddati __.__.20__ gacha. QR-kod oʻrni
Vazirlar Mahkamasining 2021-yil 19-apreldagi 221-son qaroriga 2-ILOVA
Tadbirkorlik subyektlari tomonidan agent sifatida koʻrsatilishi taqiqlangan davlat xizmatlari
T/r Davlat xizmatining turi 1. Tadbirkorlik subyektlari faoliyatini toʻxtatish va tugatish 2. Tugʻilganlikni qayd etish 3. Otalikni belgilash 4. Farzandlikka olish 5. Nikoh tuzilganligini qayd etish 6. Nikohdan ajratishni qayd etish (er yoki xotindan birining arizasi asosida) 7. Nikohdan ajratishni qayd etish (er va xotinning birgalikdagi arizasi asosida) 8. Nikohdan ajratishni qayd etish (sud qarori bilan) 9. Oʻlimni qayd etish 10. Dalolatnoma yozuvlarini tiklash 11. Fuqarolik holati dalolatnoma yozuvlarini oʻzgartirish, toʻldirish 12. Familiya, ism va ota ismini oʻzgartirish 13. Takroriy guvohnomalar va boshqa maʼlumotnomalar berish
Vazirlar Mahkamasining 2021-yil 19-apreldagi 221-son qaroriga 3-ILOVA
Oʻzbekiston Respublikasi Hukumatining ayrim qarorlariga kiritilayotgan qoʻshimchalar
1. Vazirlar Mahkamasining 2011-yil 7-yanvardagi 6-son qarori bilan tasdiqlangan Xususiy tadbirkorlar yuridik shaxs tashkil etmasdan shugʻullanishi mumkin boʻlgan faoliyat turlari roʻyxatining IV boʻlimiga quyidagi mazmundagi 87-band qoʻshilsin:
“ 87. Davlat xizmatlari koʻrsatishda agent sifatida ishtirok etish ” .
Oʻzbekiston Respublikasining Bosh vaziri A. ARIPOV
Toshkent sh.,
2021-yil 19-aprel,
221-son