📅 2021-yil 21-aprel · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 21 апрель · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 21 апреля 2021 г. · Постановления Кабинета Министров
Официальный текст. Официальный документ. Редакционные примечания не включены.
📅 21 April 2021 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Сурхондарё вилояти юқумли касалликлар шифохонасини моддий-техника базасини яхшилаш ҳамда давлат мулки объектларидан самарали фойдаланишни таъминлаш чора-тадбирлари тўғрисида
Сурхондарё вилоятининг тиббий хизматга эҳтиёжи мавжуд бўлган аҳолисига замонавий ва қулай шароитлар яратиш, юқумли касалликлар шифохонасининг моддий-техника базасини мустаҳкамлаш ҳамда давлат мулки объектларидан самарали фойдаланишни ташкил этиш мақсадида Вазирлар Маҳкамаси қарор қилади:
1. Қуйидагилар:
Вазирлар Маҳкамасининг «Республика ҳудудларида коронавирус пандемияси тарқалишининг олдини олишга доир қўшимча чора-тадбирлар тўғрисида» 2020 йил 20 майдаги 306-сон қарорига асосан Термиз тумани «Қорахон» маҳалла фуқаролар йиғини ҳудудида 1000 ўринли карантинда сақлаш маркази ва 180 ўринли махсус шифохона барпо этилганлиги ҳамда Ўзбекистон Республикаси Мудофаа вазирлиги тасарруфига берилиши белгиланганлиги;
Ўзбекистон Республикаси Президентининг «2021 — 2023 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида» 2020 йил 28 декабрдаги ПҚ-4936-сон қарорига асосан 2021 йил учун вилоят юқумли касалликлар шифохонасини реконструкция қилиш ишларига 5,0 млрд сўм ажратилганлиги маълумот учун қабул қилинсин.
2. Ўзбекистон Республикаси Соғлиқни сақлаш вазирлиги Мудофаа вазирлиги, Сурхондарё вилояти ҳокимлигининг Термиз шаҳар, Бинафша кўчаси, 92-уй, манзилида жойлашган вилоят юқумли касалликлар шифохонасини Термиз тумани, «Қорахон» маҳалла фуқаролар йиғини ҳудудида янгидан барпо этилган 180 ўринли махсус шифохона биносига жойлаштириш тўғрисидаги таклифига розилик берилсин.
3. Белгилансинки:
Термиз шаҳар, Бинафша кўчаси, 92-уй, манзилида жойлашган вилоят юқумли касалликлар шифохонаси ҳудудида тиббий ўқув-симуляция маркази ташкил этилади ҳамда шифохонанинг 2019 йилда таъмирланган ҳаво-томчи инфекцияси бўлими биносига вилоят ОИТСга қарши курашиш маркази оператив бошқарув ҳуқуқи асосида жойлаштирилади;
«2021 — 2023 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш» дастури доирасида Сурхондарё вилояти юқумли касалликлар шифохонаси реконструкцияси қилиш ишларига ажратилган 5,0 млрд сўм маблағ Бандихон тумани тиббиёт бирлашмасини реконструкция қилиш ишларига қайта тақсимланади.
4. Ўзбекистон Республикаси Соғлиқни сақлаш вазирлиги, Мудофаа вазирлиги ва Сурхондарё вилояти ҳокимлигининг Термиз тумани, «Қорахон» маҳалла фуқаролар йиғини ҳудудида жойлашган 1000 ўринли карантинда сақлаш марказини белгиланган тартибда оператив бошқарув ҳуқуқи асосида Сурхондарё вилояти ҳокимлиги тасарруфига бериш тўғрисидаги таклифи маъқуллансин.
Сурхондарё вилояти ҳокимлиги манфаатдор вазирлик ва идоралар билан биргаликда мазкур объектни қабул қилиш-топшириш ишларини, шунингдек, ундан келгусида самарали фойдаланилишини таъминласин.
5. Вазирлар Маҳкамасининг «Республика ҳудудларида коронавирус пандемияси тарқалишининг олдини олишга доир қўшимча чора-тадбирлар тўғрисида» 2020 йил 20 майдаги 306-сон қарорининг 3-банди тўртинчи хатбоши қуйидаги таҳрирда баён этилсин:
«карантин тадбирлари якунланиб, Қорақалпоғистон Республикаси, Наманган ва Самарқанд вилоятларидаги объектлар Мудофаа вазирлиги томонидан қабул қилиб олинганидан кейин объектларни сақлаш харажатлари республика бюджетидан Мудофаа вазирлиги учун ҳар йили ажратиладиган маблағлар ҳисобига амалга оширилади».
6. Мазкур қарорнинг ижросини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари Б.А. Мусаев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2021 йил 21 апрель,
231-сон
Oʻzbekiston Respublikasi Vazirlar Mahkamasining
qarori
Surxondaryo viloyati yuqumli kasalliklar shifoxonasini moddiy-texnika bazasini yaxshilash hamda davlat mulki obyektlaridan samarali foydalanishni taʼminlash chora-tadbirlari toʻgʻrisida
Surxondaryo viloyatining tibbiy xizmatga ehtiyoji mavjud boʻlgan aholisiga zamonaviy va qulay sharoitlar yaratish, yuqumli kasalliklar shifoxonasining moddiy-texnika bazasini mustahkamlash hamda davlat mulki obyektlaridan samarali foydalanishni tashkil etish maqsadida Vazirlar Mahkamasi qaror qiladi:
1. Quyidagilar:
Vazirlar Mahkamasining “Respublika hududlarida koronavirus pandemiyasi tarqalishining oldini olishga doir qoʻshimcha chora-tadbirlar toʻgʻrisida” 2020-yil 20-maydagi 306-son qaroriga asosan Termiz tumani “Qoraxon” mahalla fuqarolar yigʻini hududida 1000 oʻrinli karantinda saqlash markazi va 180 oʻrinli maxsus shifoxona barpo etilganligi hamda Oʻzbekiston Respublikasi Mudofaa vazirligi tasarrufiga berilishi belgilanganligi;
Oʻzbekiston Respublikasi Prezidentining “2021 — 2023-yillarda Oʻzbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari toʻgʻrisida” 2020-yil 28-dekabrdagi PQ-4936-son qaroriga asosan 2021-yil uchun viloyat yuqumli kasalliklar shifoxonasini rekonstruksiya qilish ishlariga 5,0 mlrd soʻm ajratilganligi maʼlumot uchun qabul qilinsin.
2. Oʻzbekiston Respublikasi Sogʻliqni saqlash vazirligi Mudofaa vazirligi, Surxondaryo viloyati hokimligining Termiz shahar, Binafsha koʻchasi, 92-uy, manzilida joylashgan viloyat yuqumli kasalliklar shifoxonasini Termiz tumani, “Qoraxon” mahalla fuqarolar yigʻini hududida yangidan barpo etilgan 180 oʻrinli maxsus shifoxona binosiga joylashtirish toʻgʻrisidagi taklifiga rozilik berilsin.
3. Belgilansinki:
Termiz shahar, Binafsha koʻchasi, 92-uy, manzilida joylashgan viloyat yuqumli kasalliklar shifoxonasi hududida tibbiy oʻquv-simulatsiya markazi tashkil etiladi hamda shifoxonaning 2019-yilda taʼmirlangan havo-tomchi infeksiyasi boʻlimi binosiga viloyat OITSga qarshi kurashish markazi operativ boshqaruv huquqi asosida joylashtiriladi;
“2021 — 2023-yillarda Oʻzbekiston Respublikasining ijtimoiy va ishlab chiqarish infratuzilmasini rivojlantirish” dasturi doirasida Surxondaryo viloyati yuqumli kasalliklar shifoxonasi rekonstruksiyasi qilish ishlariga ajratilgan 5,0 mlrd soʻm mablagʻ Bandixon tumani tibbiyot birlashmasini rekonstruksiya qilish ishlariga qayta taqsimlanadi.
4. Oʻzbekiston Respublikasi Sogʻliqni saqlash vazirligi, Mudofaa vazirligi va Surxondaryo viloyati hokimligining Termiz tumani, “Qoraxon” mahalla fuqarolar yigʻini hududida joylashgan 1000 oʻrinli karantinda saqlash markazini belgilangan tartibda operativ boshqaruv huquqi asosida Surxondaryo viloyati hokimligi tasarrufiga berish toʻgʻrisidagi taklifi maʼqullansin.
Surxondaryo viloyati hokimligi manfaatdor vazirlik va idoralar bilan birgalikda mazkur obyektni qabul qilish-topshirish ishlarini, shuningdek, undan kelgusida samarali foydalanilishini taʼminlasin.
5. Vazirlar Mahkamasining “Respublika hududlarida koronavirus pandemiyasi tarqalishining oldini olishga doir qoʻshimcha chora-tadbirlar toʻgʻrisida” 2020-yil 20-maydagi 306-son qarorining 3-bandi toʻrtinchi xatboshi quyidagi tahrirda bayon etilsin:
“karantin tadbirlari yakunlanib, Qoraqalpogʻiston Respublikasi, Namangan va Samarqand viloyatlaridagi obyektlar Mudofaa vazirligi tomonidan qabul qilib olinganidan keyin obyektlarni saqlash xarajatlari respublika budjetidan Mudofaa vazirligi uchun har yili ajratiladigan mablagʻlar hisobiga amalga oshiriladi”.
6. Mazkur qarorning ijrosini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A. Musayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2021-yil 21-aprel,
231-son