📅 2021-yil 27-aprel · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 27 апрель · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 27 апреля 2021 г. · Постановления Кабинета Министров
Официальный текст. Официальный документ. Редакционные примечания не включены.
📅 27 April 2021 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Ўзбекистон Республикаси Вазирлар Маҳкамаси ҳузуридаги Миллий антидопинг агентлиги тўғрисидаги низомга ўзгартириш ва қўшимчалар киритиш ҳақида
Ўзбекистон Республикаси Президентининг «Ўзбекистон Республикаси Вазирлар Маҳкамаси ҳузуридаги Миллий антидопинг агентлиги фаолиятини янада такомиллаштириш чора-тадбирлари тўғрисида» 2021 йил 6 апрелдаги ПҚ-5057-сон қарорига мувофиқ, шунингдек, Ўзбекистон Республикаси Вазирлар Маҳкамаси ҳузуридаги Миллий антидопинг агентлигининг фаолиятини янада такомиллаштириш мақсадида Вазирлар Маҳкамаси қарор қилади:
1. Вазирлар Маҳкамасининг 2018 йил 23 февралдаги 141-сон қарори билан тасдиқланган Ўзбекистон Республикаси Вазирлар Маҳкамаси ҳузуридаги Миллий антидопинг агентлиги тўғрисидаги низомга (Ўзбекистон Республикаси ҚТ, 2018 й., 2-сон, 48-модда) иловага мувофиқ ўзгартириш ва қўшимчалар киритилсин.
2. Ўзбекистон Республикаси Вазирлар Маҳкамаси ҳузуридаги Миллий антидопинг агентлиги Туризм ва спорт вазирлигининг Тошкент шаҳри, А. Қодирий кўчаси, 2-уйда жойлашган биноси бир қисмига (бинонинг 12-қавати) текин фойдаланиш ҳуқуқи асосида жойлаштирилсин.
3. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — туризм ва спорт вазири А.А. Абдухакимов ва Ўзбекистон Республикаси Вазирлар Маҳкамаси ҳузуридаги Миллий антидопинг агентлиги бош директори Н.Б. Турсунов зиммасига юклансин.
Вазирлар Маҳкамасининг 2021 йил 27 апрелдаги 238-сон қарорига ИЛОВА
Вазирлар Маҳкамасининг 2018 йил 23 февралдаги 141-сон қарори билан тасдиқланган Ўзбекистон Республикаси Вазирлар Маҳкамаси ҳузуридаги Миллий антидопинг агентлиги тўғрисидаги низомга киритилаётган ўзгартириш ва қўшимчалар
1. 9-банд қуйидаги таҳрирда баён этилсин:
«9. Агентликнинг расмий номи:
а) давлат тилида:
тўлиқ — Oʻzbekiston Respublikasi Vazirlar Mahkamasi huzuridagi Milliy antidoping agentligi, қисқартирилган — Oʼzbekiston Milliy antidoping agentligi (OʻzMADA);
б) инглиз тилида:
тўлиқ — The National Anti-Doping Agency under the Cabinet of Ministers of the Republic of Uzbekistan, қисқартирилган — Uzbekistan National Anti-Doping Agency (UzNADA);
в) рус тилида:
тўлиқ — Национальное антидопинговое агентство при Кабинете Министров Республики Узбекистан, қисқартирилган — Национальное антидопинговое агентство Узбекистана (УзНАДА)».
2. 14-бандда :
а) ўн бешинчи хатбоши қуйидаги таҳрирда баён этилсин:
«Терапевтик истисно, Ахлоқ ва Апелляция бўйича комиссиялар фаолиятини мувофиқлаштириш»;
б) ўн саккизинчи хатбоши қуйидаги таҳрирда баён этилсин:
«Агентлик ходимлари ва Агентлик ҳузуридаги комиссиялар аъзоларини тайёрлаш ва уларнинг малакасини оширишни тизимли ташкил этиш»;
в) йигирма учинчи хатбошидаги «Агентлик раҳбарлари ва ходимларининг» сўзлари «Агентлик раҳбарлари, ходимлари ва Агентлик ҳузуридаги комиссиялар аъзоларининг» сўзлари билан алмаштирилсин.
3. 15-банднинг ўн иккинчи хатбошиси қуйидаги таҳрирда баён этилсин:
«Терапевтик истисно, Ахлоқ ва Апелляция бўйича комиссиялар фаолиятини мувофиқлаштириш;».
4. Қуйидаги мазмундаги 18 1 -банд қўшилсин:
«18 1 . Агентлик бош директори мақоми, меҳнатга ҳақ тўлаш, моддий рағбатлантириш ва тиббий хизмат кўрсатиш шартларига кўра вазирнинг биринчи ўринбосарига тенглаштирилади».
5. 23-бандда :
а) иккинчи ва учинчи хатбошилар қуйидаги таҳрирда баён этилсин:
«тақиқланган моддалардан фойдаланиш борасида спортчиларнинг ариза ва ҳужжатларини ўрганиб, хулоса чиқариш билан шуғулланадиган Терапевтик истисно бўйича комиссия;
антидопинг қоидалари бузилиши ҳолатларини ўрганиб, қарор чиқариш билан шуғулланадиган Ахлоқ бўйича комиссия»;
б) қуйидаги мазмундаги тўртинчи хатбоши қўшилсин:
«Терапевтик истисно бўйича комиссия хулосаси ва Ахлоқ бўйича комиссия қароридан норози томоннинг аризасини ўрганиб, қарор чиқариш билан шуғулланадиган Апелляция бўйича комиссия».
6. 24-банд қуйидаги таҳрирда баён этилсин:
«24. Комиссиялар аъзолари зарурат бўлганда ишга жалб этилади».
7. Қуйидаги мазмундаги 33 1 -банд қўшилсин:
«33 1 . Допинг-тест ўтказиш учун махсус тўпламларнинг яроқлилик муддати қисқалиги ва уларнинг ягона ишлаб чиқарувчиси томонидан энг кам харид қилишнинг чекланган ҳажми белгиланиши сабабли Ўзбекистон Республикаси Давлат бюджети маблағлари ҳисобидан харид қилинган махсус тўпламларнинг режали допинг-тест ўтказишдан ташқари яроқли қолдиқ қисми шартнома асосида допинг-тест ўтказиш пуллик хизматини кўрсатиш учун ишлатилади.
Бунда допинг-тест ўтказиш пуллик хизмати кўрсатишдан тушган маблағлар қуйидаги мақсадлар учун фойдаланилади:
Агентлик ҳузуридаги комиссия аъзоларининг иш ҳақини тўлаш;
допинг-тест ўтказиш учун махсус тўпламларни харид қилиш;
мавжуд кредиторлик қарзларни тўлаш;
Агентлик моддий-техника базасини мустаҳкамлаш ва ходимларни моддий рағбатлантириш тадбирлари;
қонунчилик ҳужжатлари билан тақиқланмаган бошқа мақсадлар учун».
Ўзбекистон Республикасининг Бош вазири А. АРИПОВ
Тошкент ш.,
2021 йил 27 апрель,
238-сон
Oʻzbekiston Respublikasi Vazirlar Mahkamasining
qarori
Oʻzbekiston Respublikasi Vazirlar Mahkamasi huzuridagi Milliy antidoping agentligi toʻgʻrisidagi nizomga oʻzgartirish va qoʻshimchalar kiritish haqida
Oʻzbekiston Respublikasi Prezidentining “Oʻzbekiston Respublikasi Vazirlar Mahkamasi huzuridagi Milliy antidoping agentligi faoliyatini yanada takomillashtirish chora-tadbirlari toʻgʻrisida” 2021-yil 6-apreldagi PQ-5057-son qaroriga muvofiq, shuningdek, Oʻzbekiston Respublikasi Vazirlar Mahkamasi huzuridagi Milliy antidoping agentligining faoliyatini yanada takomillashtirish maqsadida Vazirlar Mahkamasi qaror qiladi:
1. Vazirlar Mahkamasining 2018-yil 23-fevraldagi 141-son qarori bilan tasdiqlangan Oʻzbekiston Respublikasi Vazirlar Mahkamasi huzuridagi Milliy antidoping agentligi toʻgʻrisidagi nizomga (Oʻzbekiston Respublikasi QT, 2018-y., 2-son, 48-modda) ilovaga muvofiq oʻzgartirish va qoʻshimchalar kiritilsin.
2. Oʻzbekiston Respublikasi Vazirlar Mahkamasi huzuridagi Milliy antidoping agentligi Turizm va sport vazirligining Toshkent shahri, A. Qodiriy koʻchasi, 2-uyda joylashgan binosi bir qismiga (binoning 12-qavati) tekin foydalanish huquqi asosida joylashtirilsin.
3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — turizm va sport vaziri A.A. Abduxakimov va Oʻzbekiston Respublikasi Vazirlar Mahkamasi huzuridagi Milliy antidoping agentligi bosh direktori N.B. Tursunov zimmasiga yuklansin.
Vazirlar Mahkamasining 2021-yil 27-apreldagi 238-son qaroriga ILOVA
Vazirlar Mahkamasining 2018-yil 23-fevraldagi 141-son qarori bilan tasdiqlangan Oʻzbekiston Respublikasi Vazirlar Mahkamasi huzuridagi Milliy antidoping agentligi toʻgʻrisidagi nizomga kiritilayotgan oʻzgartirish va qoʻshimchalar
1. 9-band quyidagi tahrirda bayon etilsin:
“9. Agentlikning rasmiy nomi:
a) davlat tilida:
toʻliq — Oʻzbekiston Respublikasi Vazirlar Mahkamasi huzuridagi Milliy antidoping agentligi, qisqartirilgan — Oʼzbekiston Milliy antidoping agentligi (OʻzMADA);
b) ingliz tilida:
toʻliq — The National Anti-Doping Agency under the Cabinet of Ministers of the Republic of Uzbekistan, qisqartirilgan — Uzbekistan National Anti-Doping Agency (UzNADA);
v) rus tilida:
toʻliq — Natsionalnoye antidopingovoye agentstvo pri Kabinete Ministrov Respubliki Uzbekistan, qisqartirilgan — Natsionalnoye antidopingovoye agentstvo Uzbekistana (UzNADA)”.
2. 14-bandda :
a) oʻn beshinchi xatboshi quyidagi tahrirda bayon etilsin:
“Terapevtik istisno, Axloq va Apellatsiya boʻyicha komissiyalar faoliyatini muvofiqlashtirish”;
b) oʻn sakkizinchi xatboshi quyidagi tahrirda bayon etilsin:
“Agentlik xodimlari va Agentlik huzuridagi komissiyalar aʼzolarini tayyorlash va ularning malakasini oshirishni tizimli tashkil etish”;
v) yigirma uchinchi xatboshidagi “Agentlik rahbarlari va xodimlarining” soʻzlari “Agentlik rahbarlari, xodimlari va Agentlik huzuridagi komissiyalar aʼzolarining” soʻzlari bilan almashtirilsin.
3. 15-bandning oʻn ikkinchi xatboshisi quyidagi tahrirda bayon etilsin:
“Terapevtik istisno, Axloq va Apellatsiya boʻyicha komissiyalar faoliyatini muvofiqlashtirish;”.
4. Quyidagi mazmundagi 18 1 -band qoʻshilsin:
“18 1 . Agentlik bosh direktori maqomi, mehnatga haq toʻlash, moddiy ragʻbatlantirish va tibbiy xizmat koʻrsatish shartlariga koʻra vazirning birinchi oʻrinbosariga tenglashtiriladi”.
5. 23-bandda :
a) ikkinchi va uchinchi xatboshilar quyidagi tahrirda bayon etilsin:
“taqiqlangan moddalardan foydalanish borasida sportchilarning ariza va hujjatlarini oʻrganib, xulosa chiqarish bilan shugʻullanadigan Terapevtik istisno boʻyicha komissiya;
antidoping qoidalari buzilishi holatlarini oʻrganib, qaror chiqarish bilan shugʻullanadigan Axloq boʻyicha komissiya”;
b) quyidagi mazmundagi toʻrtinchi xatboshi qoʻshilsin:
“Terapevtik istisno boʻyicha komissiya xulosasi va Axloq boʻyicha komissiya qaroridan norozi tomonning arizasini oʻrganib, qaror chiqarish bilan shugʻullanadigan Apellatsiya boʻyicha komissiya”.
6. 24-band quyidagi tahrirda bayon etilsin:
“24. Komissiyalar aʼzolari zarurat boʻlganda ishga jalb etiladi”.
7. Quyidagi mazmundagi 33 1 -band qoʻshilsin:
“33 1 . Doping-test oʻtkazish uchun maxsus toʻplamlarning yaroqlilik muddati qisqaligi va ularning yagona ishlab chiqaruvchisi tomonidan eng kam xarid qilishning cheklangan hajmi belgilanishi sababli Oʻzbekiston Respublikasi Davlat budjeti mablagʻlari hisobidan xarid qilingan maxsus toʻplamlarning rejali doping-test oʻtkazishdan tashqari yaroqli qoldiq qismi shartnoma asosida doping-test oʻtkazish pullik xizmatini koʻrsatish uchun ishlatiladi.
Bunda doping-test oʻtkazish pullik xizmati koʻrsatishdan tushgan mablagʻlar quyidagi maqsadlar uchun foydalaniladi:
Agentlik huzuridagi komissiya aʼzolarining ish haqini toʻlash;
doping-test oʻtkazish uchun maxsus toʻplamlarni xarid qilish;
mavjud kreditorlik qarzlarni toʻlash;
Agentlik moddiy-texnika bazasini mustahkamlash va xodimlarni moddiy ragʻbatlantirish tadbirlari;
qonunchilik hujjatlari bilan taqiqlanmagan boshqa maqsadlar uchun”.
Oʻzbekiston Respublikasining Bosh vaziri A. ARIPOV
Toshkent sh.,
2021-yil 27-aprel,
238-son