UzbekAI

Ўзбекистон Республикаси Давлат божхона қўмитасининг

Қарори

НИЗОМ

Дастлабки, даврий ва тўлиқ бўлмаган божхона юк декларацияларини расмийлаштириш тартиби тўғрисидаги низомни тасдиқлаш ҳақида

Ўзбекистон Республикасининг Божхона кодекси ва Ўзбекистон Республикаси Президентининг 2020 йил 6 июндаги ПФ-6005-сон «Божхона маъмуриятчилигини ислоҳ этиш ва Ўзбекистон Республикаси давлат божхона хизмати органлари фаолиятини такомиллаштириш тўғрисида»ги Фармонига мувофиқ Ўзбекистон Республикаси Давлат божхона қўмитаси қарор қилади:

1. Дастлабки, даврий ва тўлиқ бўлмаган божхона юк декларацияларини расмийлаштириш тартиби тўғрисидаги низом иловага мувофиқ тасдиқлансин.

2. Мазкур қарор расмий эълон қилинган кундан кейин уч ой ўтгач кучга киради.

Келишилди:

Ўзбекистон Республикаси Давлат божхона қўмитасининг 2021 йил 31 матрдаги 01-02/13-20-сон қарорига ИЛОВА

Дастлабки, даврий ва тўлиқ бўлмаган божхона юк декларацияларини расмийлаштириш тартиби тўғрисида

Мазкур Низом Ўзбекистон Республикасининг Божхона кодексига мувофиқ товарларни дастлабки, даврий ва тўлиқ бўлмаган божхона юк декларациялари (бундан буён матнда БЮД деб юритилади) орқали декларациялаш тартибини белгилайди.

1-боб. Умумий қоидалар

1. Мазкур Низомда қуйидаги асосий тушунчалар қўлланилади:

айни бир хил товарлар — ишлаб чиқарилган мамлакати, физик хусусиятлари, сифати, ишлаб чиқарувчиси ва Ўзбекистон Республикаси Ташқи иқтисодий фаолиятининг товар номенклатураси (бундан буён матнда ТИФ ТН деб юритилади) бўйича товар кодининг ўнта белгили даражаси бир хил бўлган товарлар;

айни бир шахс томонидан доимий олиб ўтиш — бир хил товарларнинг олтмиш календарь кун ичида бир маротабадан кўп маротаба битта юк жўнатувчи манзилидан бошқа юк қабул қилувчи манзилига бир шартнома (келишув, битим) асосида бир хил шароитда божхона чегарасидан олиб ўтилиши;

дастлабки божхона декларацияси (бундан буён матнда ДБД деб юритилади) — чет эл товарлари Ўзбекистон Республикасининг божхона ҳудудига етиб келгунига қадар «эркин муомалага чиқариш» божхона режимига мувофиқ божхона органига тақдим этиладиган ва улар ҳақидаги тўғри маълумотлар кўрсатилган ҳужжат;

даврий божхона юк декларацияси (бундан буён матнда ДБЮД деб юритилади) –айни бир хил товарлар божхона чегараси орқали айни бир шахс томонидан мунтазам равишда олиб ўтилган пайтда божхона органига тақдим этиладиган ва улар ҳақидаги тўғри маълумотлар кўрсатилган ҳужжат;

декларацияловчи шахс — божхона органларига БЮДни ўз номидан тақдим этаётган декларант ёки декларантнинг ёхуд декларант билан шартнома тузган божхона брокерининг штат бирлигида бўлган БЮДни тўлдириш, имзолаш ва божхона органларига декларант номидан тақдим этишга ваколатли божхона расмийлаштируви бўйича мутахассис;

ҳисобот варағи — ДБЮД доирасида импорт қилинадиган ҳар бир товар туркумининг божхона назорати ва ҳисобини юритиш, шунингдек ушбу туркумлар бўйича ҳисобланган божхона божи ва солиқларни ундириш мақсадида божхона органлари томонидан юритиладиган ҳужжат;

ташқи иқтисодий фаолият қатнашчиси шахсий кабинети (бундан буён матнда ТИФ қатнашчиси кабинети деб юритилади) — ташқи иқтисодий фаолият қатнашчисининг божхона органлари билан персоналлаштирилган ўзаро алоқа ва ахборот алмашинуви асосида рўйхатдан ўтган ҳолда божхона органларининг интерактив хизматларидан фойдаланиш учун мўлжалланган давлат божхона хизматининг электрон платформаси;

товарларни божхона мақсадлари учун идентификациялаш — бу ТИФ ТНдаги эквивалент товар позицияларидан ажратиб олишга имкон берадиган ва товарларнинг маълум бир ҳил гуруҳига мансублигини кўрсатиб берадиган товарнинг индивидуал хусусиятларини аниқлаш ва белгилаш;

тўлиқ бўлмаган божхона юк декларацияси (бундан буён матнда ТББЮД деб юритилади) — божхона расмийлаштирувини амалга ошириш учун барча зарур ахборотга эга бўлмаган ҳолларда Ўзбекистон Республикаси Божхона кодексининг 269-моддасига асосан божхона органига тақдим этиладиган ҳужжат;

товарларни даврий декларациялаш — Ўзбекистон Республикаси божхона чегараси орқали олиб ўтиладиган бир ташқи савдо шартномаси доирасида айнан бир хил товарларнинг (жисмоний хусусияти, сифати, ишлаб чиқарувчиси, ТИФ ТН коди бўйича) божхона расмийлаштирувини ДБЮД тақдим қилиш йўли билан амалга ошириш;

товарларни дастлабки декларациялаш — чет эл товарлари Ўзбекистон Республикаси божхона ҳудудига етиб келгунига қадар уларга нисбатан ДБДни ва товарлар етиб келганидан сўнг ДБД рақами қайд этилган транзит декларациясини божхона органига тақдим этиш орқали эркин муомалага чиқариш;

товар туркуми — битта олувчининг манзилига битта транспорт ҳужжати бўйича келаётган ёки битта почта юк хати билан жўнатилаётган ёхуд божхона чегараси орқали ўтаётган битта жисмоний шахснинг қўл юкида ва багажида олиб ўтилаётган товар ёки унинг бир қисми.

2. ДБД, ДБЮД ва ТББЮДларнинг божхона расмийлаштируви қуйидаги икки босқичда амалга оширилади:

а) биринчи босқичда — декларацияловчи шахс товарлар бўйича ДБД, ДБЮД ва ТББЮДларни божхона органларига электрон ёки қоғоз шаклда тақдим этади. Тақдим этилган ДБД, ДБЮД ва ТББЮДлар божхона органларида рўйхатга олинади.

ДБД, ДБЮД ва ТББЮДларда кўрсатилган товарларга тегишли божхона режимига мувофиқ ундирилиши лозим бўлган божхона тўловлари ушбу божхона декларациялари қабул қилингунига қадар ёки қабул қилиниши билан бир вақтда ёхуд божхона тўловларини кечиктириб ёки бўлиб-бўлиб тўлаш имконияти берилган тақдирда божхона тўловларини кечиктириб ва бўлиб-бўлиб тўлашга имконият берилган охирги тўлов кунига қадар тўланади.

Бунда, товарларни ДБЮД асосида декларациялашда божхона божи ва солиқлар ушбу товарлар божхона ҳудудига кириб келганда Ўзбекистон Республикаси Президентининг 2025 йил 17 декабрдаги ПФ-250-сон «Божхона маъмуриятчилиги ва ташқи савдо тартиботларини янада соддалаштириш ва самарадорлигини ошириш чора-тадбирлари тўғрисида»ги Фармонига мувофиқ декларацияловчи шахснинг мурожаатига асосан ҳар бир товар туркуми учун алоҳида тўланиши мумкин;

б) иккинчи босқичда — Ўзбекистон Республикаси божхона чегараси орқали олиб ўтилаётган товарлар бўйича декларацияловчи шахс томонидан божхона органига тўлиқ БЮД тақдим этилади ва божхона органларида расмийлаштирилади, бундан товарларни тўлиқ БЮД тақдим этмаган ҳолда дастлабки декларациялаш учун илгари ДБД тақдим этилган ҳоллар мустасно.

Товарларни тўлиқ БЮД тақдим этмаган ҳолда дастлабки декларациялаш учун илгари ДБД тақдим этилган ҳолларда декларацияловчи шахс томонидан ДБДнинг рўйхат рақами транзит декларациясида кўрсатилади ва ҳужжатлар божхона органи томонидан расмийлаштирилади.

Товарларнинг ДБЮД ва ТББЮДлари расмийлаштируви учун ҳисобланган ва ундирилган йиғим кейинги босқичда тўлиқ БЮД тақдим этилганида такроран ундирилмайди.

2-боб. Дастлабки божхона юк декларациясини расмийлаштириш

1-§. Товарларни тўлиқ БЮД тақдим этмаган ҳолда дастлабки декларациялаш шартлари

3. Товарларни тўлиқ БЮД тақдим этмаган ҳолда дастлабки декларациялаш қуйидаги ҳолларда қўлланилмайди:

товар Ўзбекистон Республикаси божхона ҳудудига амалда етиб келганда;

Ўзбекистон Республикаси ҳудудига импорт қилиниши тақиқланган товар бўлганда;

товарларни эркин муомалага чиқаришда қонунчилик ҳужжатларида белгиланган ваколатли органлар томонидан бериладиган ҳужжатлар (рухсат этиш хусусиятига эга ҳужжатлар, мувофиқлик сертификати, экологик сертификат ва бошқалар) талаб этиладиган ҳолларда, бундан мазкур ҳужжатлар мавжуд бўлган ҳоллар мустасно;

ДБДдаги товар бир транспорт ҳужжати бўйича бир транспорт воситасида битта жўнатувчининг манзилидан битта қабул қилувчининг манзилига юборилаётган бўлмаса;

лицензиялар бўйича импорт қилинадиган товар бўлса.

товар учун транзит декларацияси тақдим этилмайдиган бўлса.

Товарлар божхона ҳудудига келгунига қадар маълумотларни таққослаш тугалланганидан ва тегишли божхона тўловлари тўланганидан ёки Ўзбекистон Республикасининг Божхона кодексининг 47-бобига мувофиқ божхона тўловларини тўлаш таъминоти тақдим этилганидан кейин ДБДдан товарларга божхона операциялари қўлланилиши учун зарур ягона ҳужжат сифатида фойдаланилади ҳамда товарлар тўлиқ БЮД тақдим этилмаган ҳолда эркин муомалага чиқарилади, бундан мазкур бобнинг 5 — 7-параграфларида назарда тутилган ҳоллар мустасно.

2-§. Товарларни тўлиқ БЮД тақдим этмаган ҳолда дастлабки декларациялашнинг биринчи босқичи

4. Декларацияловчи шахс мазкур Низомнинг 6-7-бандларига мувофиқ тўлдирилган ва ўзининг электрон рақамли имзоси (қоғоз шаклда унинг шахсий имзоси) билан тасдиқлаган ҳолда товарлар бўйича ДБДни божхона органига тақдим этади.

5. ДБД билан бирга ёки божхона расмийлаштируви жараёнида декларацияловчи шахс тижорат ва транспорт ҳужжатларини «Товарларни электрон декларациялаш» автоматлаштирилган ахборот тизими (бундан буён матнда ТЭД ААТ деб юритилади) орқали тақдим этади.

6. ДБД Божхона юк декларациясини тўлдириш тартиби тўғрисидаги йўриқноманинг (рўйхат рақами 2773, 2016 йил 6 апрель) (бундан буён матнда Йўриқнома деб юритилади) 5-бобига мувофиқ тартибда тўлдирилади.

ДБДнинг 1-графаси биринчи бўлмасида «ИМ» белгиси, учинчи бўлмасида «ПР» белгиси кўрсатилади ҳамда 18, 26, 30-графалари ва «С» графасининг 2 рақами остидаги сатри тўлдирилмайди.

7. ДБД божхона органи томонидан рўйхатга олинади ҳамда ДБД ва унга илова қилинган ҳужжатлар текширувдан ўтказилади.

Агар текширув давомида ДБД ва унга илова қилинган ҳужжатларда хато ва (ёки) камчиликлар аниқланса, ДБДга Божхона юк декларациясини ўзгартириш, унга қўшимча киритиш, уни қайта расмийлаштириш, қайтариб олиш ва бекор қилиш тартиби тўғрисидаги низом (рўйхат рақами 3220, 2020 йил 10 февраль) талабларига мувофиқ ўзгартириш ва (ёки) қўшимчалар киритилади.

Хато ва (ёки) камчиликлар аниқланмаган ҳолларда ДБДнинг текшируви Ўзбекистон Республикаси Божхона кодексининг 248-моддасида белгиланган муддат доирасида амалга оширилади.

Божхона органи томонидан ДБД ва унга илова қилинган ҳужжатлар текшируви якунланганлиги декларант ёки декларацияловчи шахсга Ўзбекистон Республикаси Иқтисодиёт ва молия вазирлиги ҳузуридаги Божхона қўмитасининг ягона автоматлаштирилган ахборот тизими (бундан буён матнда Божхона қўмитаси ЯАТ деб юритилади) орқали маълум қилинади.

8. ДБДда кўрсатилган товарлар божхона органига ДБД қабул қилинган кундан (ДБДнинг 7-графасида кўрсатилган санадан) эътиборан ўттиз календар кун ичида тақдим этилмаган тақдирда ДБД берилмаган деб ҳисобланади.

Бунда, ушбу ДБД Божхона юк декларациясини ўзгартириш, унга қўшимча киритиш, уни қайта расмийлаштириш, қайтариб олиш ва бекор қилиш тартиби тўғрисидаги низом (рўйхат рақами 3220, 2020 йил 10 февраль) талабларига мувофиқ божхона органи томонидан бекор қилинади ҳамда бу ҳақида Божхона қўмитаси ЯАТ орқали декларант ёки декларацияловчи шахс хабардор қилинади.

Товарнинг тақдим этилганлигини тасдиқлаш божхона органи томонидан ДБД рақами қайд этилган транзит декларацияни расмийлаштириш орқали амалга оширилади.

3-§. Товарларни тўлиқ БЮД тақдим этмаган ҳолда дастлабки декларациялашнинг иккинчи босқичи

9. Ташувчи ёки бошқа манфаатдор шахс ДБДда кўрсатилган товарлар божхона ҳудудига амалда етиб келгунига қадар улар тўғрисида божхона органига транзит декларациясини ёки дастлабки ахборотни тақдим этишда ДБД рақамини кўрсатиши шарт.

Бунда, декларацияловчи шахс томонидан ДБД рақами Транзит декларациясини тўлдириш, расмийлаштириш, унга ўзгартириш ва қўшимча киритиш, уни қайтариб олиш ҳамда бекор қилиш тартиби тўғрисидаги низомда (рўйхат рақами 3382, 2022 йил 31 август) белгиланган тартибда «Э-Транзит» автоматлаштирилган ахборот тизимида «Юк тўғрисида маълумот» бўлимининг «Юк кузатув ҳужжатлари» қисмидаги 10 майдонда БЮДни тўлдиришда фойдаланиладиган ҳужжатлар ва маълумотлар турлари таснифлагичидан танлаш орқали 805 тартиб рақами остида кўрсатилади.

10. ДБДда кўрсатилган товарлар транзит декларациясини рўйхатдан ўтказган чегара божхона постига етиб келгандан сўнг, ташувчи томонидан ушбу товарлар ва унга тегишли кузатув ҳужжатлари ҳамда транзит декларациясининг рўйхат рақами божхона органига тақдим этилади.

11. Божхона органи товарлар чегара божхона пости ҳудудига етиб келгандан сўнг, ДБД билан бирга тақдим этилган товарнинг кузатув ҳужжатларида кўрсатилган маълумотларни ташувчи томонидан тақдим этилган асл ҳамда электрон ҳужжатлардаги маълумотлар билан солиштиради.

Бунда, божхона органи томонидан ДБДга илова қилинган товарнинг кузатув ҳужжатлари рақами, санаси, шакли, ундаги маълумотлар, шу жумладан жўнатувчи ва қабул қилувчининг реквизитлари, товарнинг номи, миқдори (сони, вазни, бошқа қўшимча ўлчов бирлигидаги миқдори), қиймати, ТИФ ТН коди, етказиб бериш шартларида ўзаро тафовут аниқланса, ДБД тақдим этилмаган деб ҳисобланади, бундан товарларни қайта юклаш жараёнида транспорт ҳужжатлари ўзгарганлиги натижасида юзага келган тафовутлар бўйича товар қайта юкланганлигини тасдиқловчи ҳужжатлар тақдим этилган ҳолатлар мустасно.

Бундай ҳолатларда ДБД божхона органи томонидан бекор қилинади ҳамда товарларни декларациялаш БЮД расмийлаштируви учун белгиланган тартибда амалга оширилади.

12. Чегара божхона пости томонидан товарлар бўйича божхона назорати амалга оширилганидан сўнг, ДБД расмийлаштирилади ва товарлар эркин муомалага чиқарилади, бундан мазкур Низомнинг 20-бандида назарда тутилган ҳоллар мустасно.

Божхона органи томонидан ДБДнинг 18, 26, 29 ва «С» графаларига транзит декларацияси асосида ўзгартириш ва (ёки) қўшимчалар киритилади.

13. Божхона ҳудудига кириб келишда ДБД тақдим этилган товарларга нисбатан қуйидаги ҳолларда чегара божхона пости томонидан чет эл товари божхона назорати остида ташилаётганда божхона тўғрисидаги қонунчилик ҳужжатларига риоя этилишини таъминлаш чора-тадбирлари қўлланилади:

хавфни бошқариш тизими томонидан хавф даражаси юқори кўрсаткич («қизил» йўлак) билан таснифланган бўлса;

ДБД расмийлаштирилган товарларга божхона тўловлари тўлиқ тўланмаган ёки тўланиши таъминланмаган бўлса;

товарнинг тижорат ва транспорт ҳужжатларидаги маълумотларда ўзаро номувофиқликлар аниқланганда;

божхона назоратининг техник воситаларини қўллаш бўйича маълумотлар товарларга илова қилинган ҳужжатлардаги маълумотлар билан тўғри келмаса;

транспорт воситасининг юк бўлмасига бевосита (эркин) кириш имконияти мавжуд бўлганда;

ҳуқуқни муҳофаза қилиш ёки бошқа давлат назорат органларидан тушган материаллар, шунингдек хорижий давлатларнинг божхона ва бошқа давлат органларидан олинган товарларни божхона назоратидан ўтказилиши лозимлиги тўғрисидаги маълумотлар бўлганда.

4-§. Товарларни манзил (ташқи иқтисодий фаолият) божхона постларида эркин муомалага чиқариш шартлари

20. Қуйидаги ҳолларда товарлар ДБДда кўрсатилган ТИФ божхона постига транзит декларацияси асосида йўналтирилади:

чегара божхона пости ҳудудида товарларни божхона кўригидан ўтказишнинг имкони бўлмаганда;

ДБДда хато ва камчиликлар аниқланиб, унга ўзгартириш ва (ёки) қўшимчалар киритиш зарурати юзага келганда, бундан мазкур Низомнинг 11-банди иккинчи хатбошисида назарда тутилган ҳоллар мустасно;

товарлар чегара божхона пости орқали автотранспортда олиб кирилмаган ҳолларда;

ДБДни бекор қилиш ёки қайтариб олиш зарурати юзага келганда;

ваколатли шахснинг аризасига кўра.

21. Товарлар ДБДда кўрсатилган ТИФ божхона постига етиб келгандан сўнг, ташувчи ёхуд бошқа манфаатдор шахс томонидан ушбу товарлар ва уларга тегишли кузатув ҳужжатлари божхона органига тақдим этилади.

Товарлар етиб келганлиги бу тўғрисида божхона органи томонидан товар кузатув ҳужжатларига ва Божхона қўмитаси ЯАТда тегишли белгиларни қўйиш орқали тасдиқланади.

22. Божхона органи товарларни божхона расмийлаштирувидан ўтказишда ДБДдаги товарларнинг кузатув ҳужжатларида кўрсатилган маълумотларни кейин тақдим этилган асл ҳамда электрон ҳужжатлардаги маълумотлар билан солиштиради.

Агарда тақдим қилинган ҳужжатлар (шу жумладан, электрон кўринишдаги) билан асл ҳужжатлардаги маълумотларда номувофиқликлар мавжуд бўлса ёки ДБДда керакли маълумотлар етишмаса, божхона органи томонидан декларацияловчи шахснинг ушбу масаладаги мурожаатини кўриб чиқиш натижалари ёки божхона органининг талаблари асосида ДБДга тегишли ўзгартиришлар ва (ёки) қўшимчалар киритилади.

22 1 . ДБДни ўзгартириш, унга қўшимча киритиш, уни қайтариб олиш ва бекор қилиш Божхона юк декларациясини ўзгартириш, унга қўшимча киритиш, уни қайта расмийлаштириш, қайтариб олиш ва бекор қилиш тартиби тўғрисидаги низом (рўйхат рақами 3220, 2020 йил 10 февраль) талабларига мувофиқ амалга оширилади.

22 2 . Божхона органи томонидан товарлар бўйича божхона назоратининг белгиланган тартиб-таомиллари амалга оширилганидан сўнг, ДБД расмийлаштирилиб, товарлар эркин муомалага чиқарилади, бундан мазкур Низомнинг 22-банди учинчи хатбошисида назарда тутилган ҳоллар мустасно.

5-§. Товарларни кейинчалик тўлиқ БЮД тақдим этиш орқали дастлабки декларациялаш

22 3 . Товарларни кейинчалик тўлиқ БЮД тақдим этиш орқали дастлабки декларациялаш қуйидаги ҳолларда қўлланилмайди:

товар Ўзбекистон Республикаси божхона ҳудудига амалда етиб келганда;

Ўзбекистон Республикаси ҳудудига импорт қилиниши тақиқланган товар бўлганда;

товарларни эркин муомалага чиқаришда қонунчилик ҳужжатларида белгиланган ваколатли органлар томонидан бериладиган рухсат этиш хусусиятига эга ҳужжатлар мавжуд бўлмаган ҳолларда, бундан мувофиқлик сертификати, экологик сертификат, ветеринария сертификати, санитария-эпидемиологик хулоса, карантин рухсатномаси ҳамда радиоэлектрон воситалар ва юқори частотали қурилмаларни олиб кириш учун рухсатнома мустасно;

лицензиялар бўйича импорт қилинадиган товар бўлса.

ДБДда барча зарур маълумотлар кўрсатилмаган ва (ёки) божхона расмийлаштируви учун зарур ҳужжатлар тўлиқ ҳажмда тақдим этилмаган, жумладан мувофиқлик сертификати, экологик сертификат, ветеринария сертификати, санитария-эпидемиологик хулоса, карантин рухсатномаси ҳамда радиоэлектрон воситалар ва юқори частотали қурилмаларни олиб кириш учун рухсатномалар тўғрисидаги маълумотлар мавжуд бўлмаганда, товарларни дастлабки декларациялаш кейинчалик тўлиқ БЮД тақдим этиш шарти билан амалга оширилиши лозим.

6-§. Товарларни кейинчалик тўлиқ БЮД тақдим этиш орқали дастлабки декларациялашнинг биринчи босқичи

22 4 . Декларацияловчи шахс мазкур Низомнинг 22 5 ва 22 6 -бандларига мувофиқ тўлдирилган ва ўзининг электрон рақамли имзоси (қоғоз шаклда унинг шахсий имзоси) билан тасдиқлаган ҳолда товарлар бўйича ДБДни божхона органига тақдим этади.

22 5 . ДБД билан бирга ёки божхона расмийлаштируви жараёнида декларацияловчи шахс тижорат ва транспорт ҳужжатларини ТЕД ААТ орқали тақдим этади.

22 6 . ДБД Йўриқноманинг 5-бобига мувофиқ тартибда тўлдирилади.

Бунда, ДБДнинг 1-графаси биринчи бўлмасида «ПР» белгиси кўрсатилади ҳамда 18, 26, 30-графалари ва «С» графасининг 2 рақами остидаги сатри тўлдирилмайди.

22 7 . ДБД божхона органи томонидан рўйхатга олинади ва расмийлаштирилади.

Бунда, ДБДнинг «Д» графасида божхона органи томонидан ушбу ДБДда баён этилган товарлар қабул қилинганлиги ҳақида божхона органи белгилари (ёзувлари) кўрсатилади. Божхона органи белгилари (ёзувлари) божхона органи ходимининг электрон рақамли имзоси (қоғоз шаклдаги ДБДда шахсий рақамли муҳри) билан тасдиқланади.

22 8 . ДБДда кўрсатилган товарлар божхона органига ДБД қабул қилинган кундан (ДБДнинг 7-графасида кўрсатилган санадан) эътиборан ўттиз календар кун ичида тақдим этилмаган тақдирда ДБД берилмаган деб ҳисобланади.

7-§. Товарларни кейинчалик тўлиқ БЮД тақдим этиш орқали дастлабки декларациялашнинг иккинчи босқичи

22 9 . Товарлар ДБДни рўйхатдан ўтказган божхона постига етиб келгандан сўнг тўлиқ БЮД тақдим этилади.

Бунда, ДБДдаги товар бўйича тўлиқ БЮДни тақдим этиш муддати Ўзбекистон Республикаси Божхона кодексининг 261-моддасида кўзда тутилган муддатдан ошмаслиги лозим.

22 10 . Тўлиқ БЮД декларант томонидан қуйидаги хусусиятларни инобатга олган ҳолда Йўриқноманинг 5-бобига мувофиқ тартибда тўлдирилади ва божхона органларига ТЕД ААТ орқали тақдим этилади:

тўлиқ БЮДнинг 1-графаси биринчи бўлмасида «ИМ» ҳарфли белгиси кўрсатилади;

тўлиқ БЮДнинг 1-графаси учинчи бўлмасида «ППР» ҳарфли белгиси кўрсатилади;

тўлиқ БЮДга айнан ДБДга берилган тартиб рақам қўйилади.

22 11 . Декларацияловчи шахс ТИФ қатнашчиси кабинети орқали божхона расмийлаштируви учун тақдим этиладиган ҳужжатларни электрон рақамли имзоси билан тасдиқлайди ва божхона органларига юборади.

22 12 . Тўлиқ БЮД божхона органи томонидан рўйхатга олинади ва расмийлаштирилади.

Божхона органлари товарларни эркин муомалага чиқаришда қонунчилик ҳужжатларида белгиланган ваколатли органлар томонидан бериладиган ҳужжатларнинг (рухсат этиш хусусиятига эга ҳужжатлар, мувофиқлик сертификати, экологик сертификат ва бошқалар) «Ягона дарча» божхона ахборот тизимида мавжудлигини текширади ҳамда тегишли ҳужжатлар ушбу тизимда мавжуд бўлмаган тақдирда божхона расмийлаштирувини рад этади.

Божхона органлари товарларни божхона расмийлаштирувидан ўтказишда товарларнинг кузатув ҳужжатлари нусхаларида кўрсатилган маълумотларни асл ҳамда электрон ҳужжатлардаги маълумотлар билан солиштиради.

Бундай ҳолатларда ДБД ва у бўйича тақдим этилган тўлиқ БЮД божхона органи томонидан бекор қилинади ҳамда товарларни декларациялаш БЮД расмийлаштируви учун белгиланган тартибда амалга оширилади.

22 13 . ДБД ва у бўйича тақдим этилган тўлиқ БЮДда хато ва камчиликлар аниқланиб, унга ўзгартириш ва (ёки) қўшимчалар киритиш зарурати юзага келганда ушбу ўзгартириш ва (ёки) қўшимчалар божхона органи рухсати билан амалга оширилади, бундан мазкур Низомнинг 22 12 -банди бешинчи хатбошисида назарда тутилган ҳолатлар мустасно.

22 14 . ДБД ва у бўйича тақдим этилган тўлиқ БЮДга ўзгартириш ва (ёки) қўшимчалар киритиш, уларни қайтариб олиш ва бекор қилиш Божхона юк декларациясини ўзгартириш, унга қўшимча киритиш, уни қайта расмийлаштириш, қайтариб олиш ва бекор қилиш тартиби тўғрисидаги низом (рўйхат рақами 3220, 2020 йил 10 февраль) талабларига мувофиқ амалга оширилади.

ДБД ва у бўйича тақдим этилган тўлиқ БЮД бекор қилинган тақдирда, янги БЮД ўн беш календар кундан кечиктирмай тақдим этилиши шарт.

22 15 . Божхона органи томонидан товарлар бўйича божхона назоратининг белгиланган тартиб-таомиллари амалга оширилганидан сўнг БЮД расмийлаштирилиб, товарлар эркин муомалага чиқарилади.

3-боб. ДБЮДни расмийлаштириш тартиби

1-§. Товарларни даврий декларациялаш шартлари

23. ДБЮД айнан бир хил турдаги товарларни бир ташқи савдо шартномаси (келишув, битим) доирасида айни бир шахс томонидан божхона чегараси орқали олиб ўтишда расмийлаштирилади. Бундай ҳолларда муайян вақт ичида божхона чегараси орқали олиб ўтиладиган барча товарлар учун битта БЮД берилади.

ДБЮДни расмийлаштириш товарларни вақтинча сақлашнинг энг кўп муддати ёки божхона тўловларини тўлаш муддатлари бузилишига олиб келиши мумкин эмас.

23 1 . Товарларни даврий декларациялаш қуйидаги ҳолларда қўлланилмайди:

Ўзбекистон Республикаси ҳудудига импорт қилиниши тақиқланган товар бўлганда;

ДБЮДда битта битимга мувофиқ битта жўнатувчининг манзилидан битта олувчининг манзилига битта чегара божхона пости орқали олиб кириладиган ва битта божхона постига тақдим этиладиган бир хил божхона режимига жойлаштирилаётган бир ном, тур, маркадаги, ТИФ ТН бўйича товар кодининг ўн белгили даражаси бир хил бўлган товарлар кўрсатилмаган бўлса.

24. Айнан бир хил турдаги товарларга бир ташқи савдо шартномаси (келишув, битим) доирасида карантин рухсатномалар, ўсимлик ва ҳайвонот дунёси объектларини, озон емирувчи моддалар ва улардан ташкил топган маҳсулотларни божхона чегараси орқали олиб ўтиш учун рухсатномалар, мувофиқлик сертификати, ветеринар, гигиеник ва экологик сертификатлар, бир календарь йилидан ошмаган муддатга бир маротаба тақдим этилиши мумкин.

2-§. Товарларни даврий декларациялашнинг биринчи босқичи

25. ДБЮД шартнома (келишув, битим) доирасида товарларнинг маълум бир туркуми учун амалда божхона органига тақдим этилганда расмийлаштирилади.

Декларацияловчи шахс ДБЮД билан бирга унда кўрсатилган товарларнинг тўлиқ миқдорини тегишли божхона режимига жойлаштиришда зарур бўладиган ҳужжатларни божхона органига тақдим этади.

26. ДБЮДда кўрсатилган товарларнинг тўлиқ миқдори учун божхона режими шартларига мувофиқ амалда бўлган божхона тўловлари ставкалари бўйича божхона тўловлари ҳисобланади.

27. ДБЮДда олиб келинган ҳар бир товар туркуми учун божхона божи ва солиқлар алоҳида тўланиши кўрсатилган ҳолларда Ўзбекистон Республикаси Президентининг 2025 йил 17 декабрдаги ПФ–250-сон «Божхона маъмуриятчилиги ва ташқи савдо тартиботларини янада соддалаштириш ва самарадорлигини ошириш чора-тадбирлари тўғрисида»ги Фармонига мувофиқ декларацияловчи шахснинг қуйидаги маълумотлар кўрсатилган мурожаатига асосан божхона божи ва солиқлар тўланади.

ДБЮД рўйхат рақами ҳамда транзит декларациясини тақдим этиш талаб этиладиган товарлар учун транзит декларациясининг рўйхат рақами;

ишонч билдирган шахснинг маълумотлари (ЖШШИР, Ф.И.О.);

товар ва божхона тўловлари тўғрисида маълумотлар (туркумнинг тартиб рақами, транзит декларациясини тақдим этиш талаб этиладиган товарнинг транзит декларациядаги тартиб рақами, ТИФ ТН код, фактура қиймати, нетто ва брутто вазни, қўшимча ўлчов бирлиги коди ва миқдори, импорт божхона божи, акциз солиғи, ҚҚС).

Декларацияловчи шахснинг мурожаати ушбу шахснинг электрон рақамли имзоси (қоғоз шаклда унинг шахсий имзоси) билан тасдиқланади.

ДБЮД доирасида товар ва транспорт воситаси кузатув ҳужжатлари декларацияловчи шахс томонидан ҳар бир товар туркуми учун божхона назорати бошланишидан олдин декларацияловчи шахснинг мурожаати билан бирга тақдим этилади.

Декларацияловчи шахснинг мурожаатида олиб келинган ҳар бир товар туркуми учун божхона божи ва солиқларни алоҳида тўлаш имконини бермайдиган хато ва (ёки) камчиликлар аниқланган ҳолларда божхона органи уларни бартараф этиш тўғрисида декларацияловчи шахсни бир иш куни ичида Божхона қўмитаси ЯАТ орқали хабардор қилади ҳамда ҳисобот варағи расмийлаштирилмайди.

Декларацияловчи шахснинг мурожаатида хато ва (ёки) камчиликлар аниқланмаган ёки бартараф этилган ҳолда қайта тақдим этилган тақдирда товарларнинг божхона назоратини амалга оширувчи божхона органининг мансабдор шахси томонидан мазкур Низомнинг иловасига мувофиқ ҳисобот варағи расмийлаштирилади ҳамда юритиб борилади.

28. ДБЮДда олиб келинган ҳар бир товар туркуми учун божхона божи ва солиқлар алоҳида тўланиши кўрсатилмаган ҳолларда декларацияловчи шахс томонидан ҳар бир товар туркуми учун божхона назорати бошланишидан олдин товар ва транспорт воситасининг кузатув ҳужжатлари электрон ёки қоғоз шаклда тақдим этилади.

Бунда, транзит декларациясини тақдим этиш талаб этиладиган ҳолларда товар ва транспорт воситасининг кузатув ҳужжатларида транзит декларацияси ва товарнинг транзит декларациясидаги тартиб рақами маълум қилинади.

Божхона назоратини амалга оширувчи божхона органининг мансабдор шахси томонидан мазкур Низомнинг иловасига мувофиқ ҳисобот варағи расмийлаштирилади. Бунда, ҳисобот варағининг 5-графаси 9 — 13-устунлари тўлдирилмайди.

29. Ҳисобот варағи божхона органи ходими томонидан ўзининг электрон рақамли имзоси билан тасдиқланган ҳолда расмийлаштирилади.

Ҳисобот варағини расмийлаштириш жараёнида божхона назорати шакллари қўлланилиши хавфни бошқариш тизими натижаларига кўра амалга оширилади.

Ҳисобот варағи расмийлаштирилган вақтдан бошлаб унда кўрсатилган товарлар шартли чиқариб юборилган деб ҳисобланади.

30. Божхона органи томонидан ҳисобот варағининг тўлдирилиши:

1) 1-графа. «ДБЮДнинг рўйхат рақами».

Графада товар учун расмийлаштирилган ДБЮДнинг 7-графасидаги рўйхат рақами кўрсатилади;

2) 2-графа. «Ҳисобот варағининг рўйхат рақами».

Графада ҳисобот варағининг рўйхат рақами кўрсатилади. Ҳисобот варағининг рўйхат рақами жорий йилда ўсиш тартибида рақамланади ҳамда йил якунлангач рақамлаш янгидан бошланади;

3) 3-графа. «Транзит декларацияси».

Графада товар учун расмийлаштирилган транзит декларациясининг рўйхат рақами кўрсатилади;

4) 4-графа. «Ишонч билдирган шахс».

Графада ҳисобот варағини тўлдиришга асос бўлиб хизмат қилувчи тақдим этилган ҳужжатлар ва маълумотларга жавобгар ҳисобланган жисмоний шахснинг маълумотлари қуйидаги тартибда кўрсатилади:

графанинг чап бўлмасида жисмоний шахснинг шахсий идентификация рақами кўрсатилади;

графанинг ўнг бўлмасида жисмоний шахснинг фамилияси, исми, отасининг исми қайд этилади.

5) 5-графа. «Товар ва божхона тўловлари тўғрисида маълумот».

Графа қуйидаги тартибда тўлдирилади:

«Туркумнинг тартиб рақами» устунида товар туркумининг тартиб рақами кўрсатилади. Бунда тартиб рақам ҳисобот варағи тақдим этилаётган товарнинг амалда етиб келган туркуми учун ўсиш тартибида кўрсатилади.

«Товарнинг транзит декларациядаги тартиб рақами» устунида ДБЮД доирасида расмийлаштирилаётган товарнинг транзит декларациядаги тартиб рақами кўрсатилади.

«ТИФ ТН код» устунида товарнинг ДБЮДдаги ТИФ ТН коди кўрсатилади;

«Фактура қиймати» устунида ДБЮДдаги товарнинг амалда олиб келинган туркумининг фактура қиймати кўрсатилади. Бунда фактура қиймати ДБЮДнинг 22-графасида қайд этилган валютада кўрсатилади;

«Нетто вазни» устунида ДБЮДдаги товарнинг амалда етиб келган туркумидаги нетто вазни килограммда кўрсатилади;

«Брутто вазни» устунида ДБЮДдаги товарнинг амалда етиб келган туркумидаги брутто вазни килограммда кўрсатилади;

«Қўшимча ўлчов бирлиги коди» устунида ТИФ ТНда келтирилган «Ўлчов бирликлари жадвали»га мувофиқ товарнинг қўшимча ўлчов бирлиги коди кўрсатилади. Бунда товар учун ТИФ ТНга мувофиқ фақат асосий ўлчов бирлиги (кг) қўлланилса, графа тўлдирилмайди;

«Қўшимча ўлчов бирлигидаги миқдор» устунида товарнинг амалда етиб келган туркумидаги қўшимча ўлчов бирлиги бўйича миқдори кўрсатилади. Бунда товар учун ТИФ ТНга мувофиқ фақат асосий ўлчов бирлиги (кг) қўлланилса, графа тўлдирилмайди;

«Импорт божхона божи» устунида товарнинг амалда етиб келган туркумига ҳисобланган импорт божхона божининг Ўзбекистон Республикаси миллий валютасида ҳисобланган суммаси кўрсатилади;

«Акциз солиғи» устунида товарнинг амалда етиб келган туркумига ҳисобланган акциз солиғининг Ўзбекистон Республикаси миллий валютасида ҳисобланган суммаси кўрсатилади;

«ҚҚС» устунида товарнинг амалда етиб келган туркумига ҳисобланган қўшилган қиймат солиғининг Ўзбекистон Республикаси миллий валютасида ҳисобланган суммаси кўрсатилади;

«Жами тўловлар» устунида товарнинг амалда етиб келган туркумига ҳисобланган ҳисобот варағида қайд этилган божхона тўловларининг Ўзбекистон Республикаси миллий валютасида ҳисобланган умумий суммаси кўрсатилади.

6) 6-графа. «Декларацияловчи шахс».

Графада ҳисобот варағини тўлдирган ва уни божхона органларига ўзининг электрон рақамли имзоси билан тақдим этган декларацияловчи шахснинг фамилияси, исми, отасининг исми кўрсатилади.

7) 7-графа. «Божхона органи».

Графада божхона органи томонидан ушбу ҳисобот варағида баён этилган товарларга нисбатан қабул қилинган қарор ҳақидаги божхонанинг органи белгилари (ёзувлари) кўрсатилади.

Божхона органининг белгилари (ёзувлари) божхона органи ходимининг электрон рақамли имзоси билан тасдиқланади.

Ҳисобот варағининг 1, 3-4 ва 5-графалари декларацияловчи шахснинг мурожаатида келтирилган маълумотлар асосида тўлдирилади.

31. ДБЮД Йўриқнома талабларига мувофиқ қуйидаги хусусиятларни инобатга олган ҳолда тўлдирилади:

1) 1-графа. «Декларация тури».

Графанинг биринчи бўлмасида «ПЕ» белгиси кўрсатилади.

Графанинг иккинчи бўлмасида Божхона режимлари таснифлагичига мувофиқ божхона режимининг икки рақамдан иборат коди кўрсатилади.

Графанинг учинчи бўлмаси тўлдирилмайди;

2) 47-графа «Божхона тўловларининг ҳисоби».

Графа Йўриқноманинг 25-бандига мувофиқ ҳолда тўлдирилади. Агар божхона божи ва солиқлар божхона ҳудудига кириб келган товарларнинг ҳар бир туркуми учун алоҳида тўланадиган бўлса, тўлов усулининг икки белгили ҳарфли коди кўрсатиладиган «ТУ» устунида «ПП» белгиси кўрсатилади.

3) 50-графа. «Ишонч билдирган шахс».

Графа Йўриқноманинг 25-бандида белгиланган 50-графани тўлдириш тартибига мувофиқ тўлдирилади.

Графада қўшимча равишда «Тўлиқ БЮДни ХХ.ХХ.ХХХХгача божхона органига тақдим этиш мажбуриятини оламан» жумлалари қайд этилади. Бунда ХХ.ХХ.ХХХХ тегишлича кун, ой ва йилни англатади.

32. ДБЮД асосида олиб келинган товарларнинг товарга нисбатан ваколатга эга бўлган шахснинг ихтиёрига берилиши, уларни божхона назоратидан ўтказилгандан ҳамда мазкур Низомнинг 27 — 31-бандларига мувофиқ ҳаракатлар якунлангандан сўнг амалга оширилади.

3-§. Товарларни даврий декларациялашнинг иккинчи босқичи

33. ДБЮД учун белгиланган муддат тугагунига қадар товарлар божхона чегарасидан тўлиқ олиб ўтилган тақдирда декларацияловчи шахс томонидан тўлиқ БЮД тақдим этилади.

34. ДБЮД расмийлаштирилган санадан олтмиш календар кундан ошмаган муддатда тўлиқ БЮД тақдим этилиши лозим. Агар тўлиқ БЮДни тақдим этиш муддатининг тугаши божхона органининг ишдан ташқари вақтига ёки иш куни бўлмаган кунга тўғри келса, божхона органининг кейинги иш куни мазкур муддат тугайдиган кун деб ҳисобланади.

ДБЮД учун белгиланган муддат тугагунига қадар товарлар божхона чегараси орқали тўлиқ олиб ўтилмаган ҳолларда декларацияловчи шахс томонидан ушбу муддатга қадар божхона чегараси орқали ҳақиқатда олиб ўтилган товарларга нисбатан тўлиқ БЮД тақдим этилади.

Бунда тўлиқ БЮД тақдим этилишидан аввал ДБЮДдаги маълумотларни ҳақиқатда олиб ўтилган товарларга мослаштириш учун ДБЮДга ўзгартириш ва (ёки) қўшимчалар киритилади.

35. Иккинчи босқичда расмийлаштириладиган БЮДда божхона тўловлари суммасини ҳисоблашда ДБЮД қабул қилинган кунда амалда бўлган божхона тўловлари ставкалари ва хорижий валюталар курслари қўлланилади.

Агарда тақдим этилган ҳужжатлардаги маълумотларга аниқлик киритиш натижасида ҳисобланган божхона тўловлари суммаси ДБЮДда кўрсатилган тўловлар суммасидан ортадиган бўлса, улар қўшимча тўланади, камайиш ҳолатларида эса божхона органи ўртадаги фарқни тўловчига Ўзбекистон Республикасининг Божхона кодексида белгиланган тартибда қайтаради ёки тўловчининг хоҳишига кўра уни кейинги тўловлар ҳисобига ўтказади.

Бунда, ДБЮДда божхона божи ва солиқларнинг ҳар бир товар туркумига алоҳида тўланиши кўрсатилган тақдирда декларацияловчи шахснинг мурожаатига асосан божхона органи томонидан ҳисобот варағига тегишли ўзгартириш ва (ёки) қўшимчалар киритилади.

36. Божхона чегараси орқали олиб ўтилган товарларнинг умумий миқдори ДБЮДда кўрсатилган миқдорга мос бўлиши лозим.

Товарлар белгиланган муддатларда ДБЮДда кўрсатилган миқдордан ортиқ импорт қилинганда ёки экспортга олиб чиқилиши назарда тутилганда, товарларнинг ушбу ортиқча қисмига нисбатан янги БЮД тақдим этилган куни амалда бўлган қонунчилик ҳужжатларига мувофиқ божхона расмийлаштируви амалга оширилади.

37. ДБЮДни ўзгартириш, унга қўшимча киритиш, уни қайта расмийлаштириш, қайтариб олиш ва бекор қилиш Божхона юк декларациясини ўзгартириш, унга қўшимча киритиш, уни қайта расмийлаштириш, қайтариб олиш ва бекор қилиш тартиби тўғрисидаги низом (рўйхат рақами 3220, 2020 йил 10 февраль) талабларига мувофиқ амалга оширилади.

38. Тўлиқ БЮД ДБЮДда кўрсатилмаган товарлар бўйича ҳуқуқбузарлик ҳолатлари аниқланганда бу бўйича иш кўриб чиқилиб, суд ёки ҳуқуқни муҳофаза қилувчи орган қарори чиққунга қадар тақдим этилмайди.

39. Тўлиқ БЮД Йўриқноманинг 25-банди талабларига мувофиқ тартибда қуйидаги хусусиятларни инобатга олган ҳолда тўлдирилади:

1) 1-графа. «Декларация тури».

Графанинг биринчи бўлмасида товарларни олиб ўтиш йўналиши кўрсатилади — «ИМ» ёки «ЭК» белгиси.

Графанинг учинчи бўлмасида «ППЕ» белгиси кўрсатилади.

2) 7-графа. «БЮДнинг рўйхат рақами».

Графада тўлиқ БЮДда кўрсатилган товар учун расмийлаштирилган ДБЮДнинг рўйхат рақами кўрсатилади.

3) 47-графа «Божхона тўловларининг ҳисоби».

Графа Йўриқноманинг 25-бандига мувофиқ ҳолда тўлдирилади. Агар божхона божи ва солиқлар божхона ҳудудига кириб келган товарларнинг ҳар бир туркуми учун алоҳида тўланган бўлса, тўлов усулининг икки белгили ҳарфли коди кўрсатиладиган «ТУ» устунида «ПП» белгиси кўрсатилади.

1) 1-графа. «Декларация тури».

Графанинг биринчи бўлмасида товарларни олиб ўтиш йўналиши кўрсатилади — «ИМ» ёки «ЭК».

Графанинг учинчи бўлмасида «ППЕ» белгиси кўрсатилади.

2) БЮДга айнан ДБЮДга берилган тартиб рақам қўйилади.

4-боб. ТББЮДни расмийлаштириш тартиби

1-§. Товарларга ТББЮД тақдим этиш шартлари

40. Декларант ёки божхона брокери ўзига боғлиқ бўлмаган сабабларга кўра декларацияни тўлдириш учун барча зарур ахборотга эга бўлмаса, ТББЮД товарни идентификациялаш имконияти бўлиши шарти билан берилиши мумкин.

ТББЮД қуйидаги товарларни шартли чиқариб юбориш учун берилиши мумкин:

божхона тўловлари шартли божхона қийматини аниқлаш асосида тўланган товарлар;

зарур ҳужжатлар (бундан рухсат этиш хусусиятига эга ҳужжатлар мустасно) ва маълумотлар тақдим этилмаган товарлар;

божхона тўловларини кечиктириб ёки бўлиб-бўлиб тўлашга рухсат берилган ҳолда эркин муомалага чиқариш (импорт) божхона режимига мувофиқ расмийлаштирилган товарлар;

ТИФ ТН кодига аниқлик киритиш бўйича экспертиза тайинланган товарлар.

40 1 . ТББЮД қуйидаги ҳолларда тақдим этилмайди:

товар Ўзбекистон Республикаси ҳудудига импорт қилиниши тақиқланган бўлса;

товар учун илгари ДБД, ДБЮД, ТББЮД ва муваққат божхона юк декларацияси расмийлаштирилган бўлса;

ТББЮД эркин муомалага чиқариш божхона режимидан бошқа божхона режими учун тақдим этилаётган бўлса.

41. ТББЮДга декларант ёки божхона брокери, агар божхона тўғрисидаги қонунчилик ҳужжатларида алоҳида маълумотларни тақдим этиш учун бошқа муддат назарда тутилмаган бўлса, ТББЮД божхона органи томонидан қабул қилиб олинган кундан эътиборан олтмиш календарь кундан ортиқ бўлмаган муддатда етишмаган маълумотларни ва лозим даражада тўлдирилган тўлиқ БЮДни тақдим этиш ҳақидаги ёзма мажбуриятни илова қилади.

Агар ушбу Низомнинг 40-банди тўртинчи хатбошисида кўрсатиб ўтилган шартли чиқариб юборилган товарлар учун тақдим этилмаган мувофиқлик сертификатини ёки санитария-эпидемиология хулосасини олиш талаб этилса, ушбу товарлардан фойдаланиш, уларни учинчи шахсларга бериш, шу жумладан уларни сотиш ёки ўзга усулда бошқа шахсга ўтказиш орқали бериш тақиқланади, мазкур товарларни олиб киришга доир чекловлар ушбу товарларнинг сифати ва хавфсизлиги текширилиши муносабати билан белгиланган ҳолларда эса ҳар қандай шаклда фойдаланиш (ишлатиш) тақиқланади.

ТББЮД қўлланилган ҳолда декларациялашда лозим даражада тўлдирилган тўлиқ БЮД аввал бошда берилганидаги каби божхона органларининг зиммасига қонунчилик ҳужжатларининг қайси талаблари ва шартлари бажарилиши устидан назорат қилиш вазифаси юклатилган бўлса, ўша талаблар ва шартлар, шу жумладан божхона тўловларини ҳисоблаб чиқариш ва тўлаш тартиби қўлланилади.

2-§. ТББЮДни расмийлаштиришнинг биринчи босқичи

42. ТББЮД ва БЮДларни ҳамда божхона расмийлаштируви учун зарур бўлган ҳужжатлар электрон рақамли имзо билан тасдиқланган ҳолда электрон ёки қоғоз шаклларда тақдим этилиши мумкин. Бунда ТББЮДда божхона мақсадлари учун зарур бўлган маълумотлар акс эттирилган бўлиши керак.

ТББЮДда кўрсатилган товарларнинг тўлиқ миқдори учун божхона режими шартларига мувофиқ амалда бўлган божхона тўловлари ставкалари бўйича божхона тўловлари ҳисобланади.

42 1 . ТИФ ТН кодига аниқлик киритиш бўйича экспертиза тайинланган товарларга нисбатан тақиқ ва чекловлар белгиланган бўлса, ТББЮД расмийлаштиришга йўл қўйилмайди.

43. Товарларни ТББЮД билан расмийлаштиришда қуйидагилар тақдим этилади:

транспорт (транспорт туридан келиб чиқиб, коносамент ёки юк хати) ва тижорат (инвойс) ҳужжатлари;

тўлиқ тўлдирилган божхона юк декларациясини ва етишмаган маълумотларни тақдим этиш ҳақидаги ёзма мажбурият.

44. Ушбу Низомнинг 43-бандида кўрсатилган ҳужжатлар ва маълумотлар мавжуд бўлмаганида, ёхуд нотўғри ҳужжат ва маълумотлар тақдим этилганлиги аниқланганда ТББЮД расмийлаштирилишига йўл қўйилмайди.

3-§. ТББЮДни расмийлаштиришнинг иккинчи босқичи

45. ТББЮД ва тўлиқ БЮД Йўриқноманинг 19 1 -бобига мувофиқ тартибда тўлдирилади.

46. Божхона пости тўлиқ БЮДни тақдим этиш муддатлари ва ТББЮДга мувофиқ расмийлаштирилган товарларга нисбатан тақиқ ва чеклов бўйича шартлар бажарилишини назорат қилади ва уларнинг электрон ҳисобини юритади.

46 1 . Божхона органи томонидан тайинланган экспертиза натижаси юзасидан қабул қилинган ТИФ ТН коди декларант ёки божхона брокерига ТЭД ААТ орқали тақдим этилади ҳамда тўлиқ БЮД экспертиза хулосасида белгиланган ТИФ ТН код асосида қонунчилик ҳужжатлари талаблари бўйича расмийлаштирилади.

47. ТББЮД билан расмийлаштирилган товарлар бўйича олтмиш календарь кун ичида тўлиқ БЮД расмийлаштирилмаган тақдирда, ваколатли шахс ихтиёрига кўра ушбу товарлар Ўзбекистон Республикасининг Божхона кодексида белгиланган тартибда Ўзбекистон Республикаси божхона ҳудудидан ташқарига қайтариб чиқариб юборилиши мумкин.

Бунда, товарлар ТББЮД расмийлаштирилган куни қандай ҳолатда бўлса, амалда шундай ҳолатда божхона ҳудудидан олиб чиқилиши лозим, бундан товар ҳолатининг табиий эскириши ёки ташиш ва (ёки) сақлаш нормал шароитларида камайиши оқибатида рўй берган ўзгаришлар мустасно.

ТББЮДни ўзгартириш, унга қўшимча киритиш, уни қайтариб олиш ва бекор қилиш Божхона юк декларациясини ўзгартириш, унга қўшимча киритиш, уни қайта расмийлаштириш, қайтариб олиш ва бекор қилиш тартиби тўғрисидаги низом (рўйхат рақами 3220, 2020 йил 10 февраль) талабларига мувофиқ амалга оширилади.

48. Товарларни «экспорт» божхона режимида расмийлаштиришда ТББЮДни расмийлаштириш мазкур боб талаблари асосан амалга оширилиши мумкин.

5-боб. Якуний қоидалар

49. Ушбу Низом қоидаларининг бузилишида айбдор бўлган шахслар қонунчилик ҳужжатларига мувофиқ жавобгар бўладилар.

50. Мазкур Низом Ўзбекистон Республикаси Савдо-саноат палатаси билан келишилган.

Дастлабки, даврий ва тўлиқ бўлмаган божхона юк декларацияларини расмийлаштириш тартиби тўғрисида низомга ИЛОВА

ҲИСОБОТ ВАРАҒИ 1. ДБЮДнинг рўйхат рақами __________________________ 2. Ҳисобот варағининг рўйхат рақами ________________________________ 3. Транзит декларацияси 4. Ишонч билдирган шахс 5. Товар ва божхона тўловлари тўғрисида маълумот Турку мнинг тартиб рақами Товарнинг транзит декларациядаги тартиб рақами ТИФ ТН код Фактура қиймати Нетто вазни Брутто вазни Қўшимча ўлчов бирлиги коди Қўшимча ўлчов бирлигидаги миқдор Импорт божхона божи Акциз солиғи ҚҚС Жами тўловлар 6. Декларацияловчи шахс 7. Б ожхона органи ________________________

Раис М. АЗИМОВ

Савдо-саноат палатаси раиси А. ИКРАМОВ

Тошкент ш.,

2021 йил 31 март,

2021 йил 31 март

01-02/13-20-сон

(Қонун ҳужжатлари маълумотлари миллий базаси, 04.05.2021 й., 10/21/3296/0410-сон; Қонунчилик маълумотлари миллий базаси, 10.02.2022 й., 10/22/3296-1/0122-сон, 17.03.2022 й., 10/22/3296-2/0221-сон; 17.07.2023 й., 10/23/3447/0484-сон; 28.08.2024 й., 10/24/3296-3/0659-сон; 04.11.2025 й., № 10/25/3296-4/1006; 26.05.2026 й., 10/26/3296-5/0531-сон)

lex.uz

Oʻzbekiston Respublikasi Davlat bojxona qoʻmitasining

Qarori

NIZOM

Dastlabki, davriy va toʻliq boʻlmagan bojxona yuk deklaratsiyalarini rasmiylashtirish tartibi toʻgʻrisidagi nizomni tasdiqlash haqida

Oʻzbekiston Respublikasining Bojxona kodeksi va Oʻzbekiston Respublikasi Prezidentining 2020-yil 6-iyundagi PF-6005-son “Bojxona maʼmuriyatchiligini isloh etish va Oʻzbekiston Respublikasi davlat bojxona xizmati organlari faoliyatini takomillashtirish toʻgʻrisida”gi Farmoniga muvofiq Oʻzbekiston Respublikasi Davlat bojxona qoʻmitasi qaror qiladi:

1. Dastlabki, davriy va toʻliq boʻlmagan bojxona yuk deklaratsiyalarini rasmiylashtirish tartibi toʻgʻrisidagi nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan keyin uch oy oʻtgach kuchga kiradi.

Kelishildi:

Oʻzbekiston Respublikasi Davlat bojxona qoʻmitasining 2021-yil 31 matrdagi 01-02/13-20-son qaroriga ILOVA

Dastlabki, davriy va toʻliq boʻlmagan bojxona yuk deklaratsiyalarini rasmiylashtirish tartibi toʻgʻrisida

Mazkur Nizom Oʻzbekiston Respublikasining Bojxona kodeksiga muvofiq tovarlarni dastlabki, davriy va toʻliq boʻlmagan bojxona yuk deklaratsiyalari (bundan buyon matnda BYD deb yuritiladi) orqali deklaratsiyalash tartibini belgilaydi.

1-bob. Umumiy qoidalar

1. Mazkur Nizomda quyidagi asosiy tushunchalar qoʻllaniladi:

ayni bir xil tovarlar — ishlab chiqarilgan mamlakati, fizik xususiyatlari, sifati, ishlab chiqaruvchisi va Oʻzbekiston Respublikasi Tashqi iqtisodiy faoliyatining tovar nomenklaturasi (bundan buyon matnda TIF TN deb yuritiladi) boʻyicha tovar kodining oʻnta belgili darajasi bir xil boʻlgan tovarlar;

ayni bir shaxs tomonidan doimiy olib oʻtish — bir xil tovarlarning oltmish kalendar kun ichida bir marotabadan koʻp marotaba bitta yuk joʻnatuvchi manzilidan boshqa yuk qabul qiluvchi manziliga bir shartnoma (kelishuv, bitim) asosida bir xil sharoitda bojxona chegarasidan olib oʻtilishi;

dastlabki bojxona deklaratsiyasi (bundan buyon matnda DBD deb yuritiladi) — chet el tovarlari Oʻzbekiston Respublikasining bojxona hududiga yetib kelguniga qadar “erkin muomalaga chiqarish” bojxona rejimiga muvofiq bojxona organiga taqdim etiladigan va ular haqidagi toʻgʻri maʼlumotlar koʻrsatilgan hujjat;

davriy bojxona yuk deklaratsiyasi (bundan buyon matnda DBYUD deb yuritiladi) –ayni bir xil tovarlar bojxona chegarasi orqali ayni bir shaxs tomonidan muntazam ravishda olib oʻtilgan paytda bojxona organiga taqdim etiladigan va ular haqidagi toʻgʻri maʼlumotlar koʻrsatilgan hujjat;

deklaratsiyalovchi shaxs — bojxona organlariga BYDni oʻz nomidan taqdim etayotgan deklarant yoki deklarantning yoxud deklarant bilan shartnoma tuzgan bojxona brokerining shtat birligida boʻlgan BYDni toʻldirish, imzolash va bojxona organlariga deklarant nomidan taqdim etishga vakolatli bojxona rasmiylashtiruvi boʻyicha mutaxassis;

hisobot varagʻi — DBYUD doirasida import qilinadigan har bir tovar turkumining bojxona nazorati va hisobini yuritish, shuningdek ushbu turkumlar boʻyicha hisoblangan bojxona boji va soliqlarni undirish maqsadida bojxona organlari tomonidan yuritiladigan hujjat;

tashqi iqtisodiy faoliyat qatnashchisi shaxsiy kabineti (bundan buyon matnda TIF qatnashchisi kabineti deb yuritiladi) — tashqi iqtisodiy faoliyat qatnashchisining bojxona organlari bilan personallashtirilgan oʻzaro aloqa va axborot almashinuvi asosida roʻyxatdan oʻtgan holda bojxona organlarining interaktiv xizmatlaridan foydalanish uchun moʻljallangan davlat bojxona xizmatining elektron platformasi;

tovarlarni bojxona maqsadlari uchun identifikatsiyalash — bu TIF TNdagi ekvivalent tovar pozitsiyalaridan ajratib olishga imkon beradigan va tovarlarning maʼlum bir hil guruhiga mansubligini koʻrsatib beradigan tovarning individual xususiyatlarini aniqlash va belgilash;

toʻliq boʻlmagan bojxona yuk deklaratsiyasi (bundan buyon matnda TBBYUD deb yuritiladi) — bojxona rasmiylashtiruvini amalga oshirish uchun barcha zarur axborotga ega boʻlmagan hollarda Oʻzbekiston Respublikasi Bojxona kodeksining 269-moddasiga asosan bojxona organiga taqdim etiladigan hujjat;

tovarlarni davriy deklaratsiyalash — Oʻzbekiston Respublikasi bojxona chegarasi orqali olib oʻtiladigan bir tashqi savdo shartnomasi doirasida aynan bir xil tovarlarning (jismoniy xususiyati, sifati, ishlab chiqaruvchisi, TIF TN kodi boʻyicha) bojxona rasmiylashtiruvini DBYUD taqdim qilish yoʻli bilan amalga oshirish;

tovarlarni dastlabki deklaratsiyalash — chet el tovarlari Oʻzbekiston Respublikasi bojxona hududiga yetib kelguniga qadar ularga nisbatan DBDni va tovarlar yetib kelganidan soʻng DBD raqami qayd etilgan tranzit deklaratsiyasini bojxona organiga taqdim etish orqali erkin muomalaga chiqarish;

tovar turkumi — bitta oluvchining manziliga bitta transport hujjati boʻyicha kelayotgan yoki bitta pochta yuk xati bilan joʻnatilayotgan yoxud bojxona chegarasi orqali oʻtayotgan bitta jismoniy shaxsning qoʻl yukida va bagajida olib oʻtilayotgan tovar yoki uning bir qismi.

2. DBD, DBYUD va TBBYUDlarning bojxona rasmiylashtiruvi quyidagi ikki bosqichda amalga oshiriladi:

a) birinchi bosqichda — deklaratsiyalovchi shaxs tovarlar boʻyicha DBD, DBYUD va TBBYUDlarni bojxona organlariga elektron yoki qogʻoz shaklda taqdim etadi. Taqdim etilgan DBD, DBYUD va TBBYUDlar bojxona organlarida roʻyxatga olinadi.

DBD, DBYUD va TBBYUDlarda koʻrsatilgan tovarlarga tegishli bojxona rejimiga muvofiq undirilishi lozim boʻlgan bojxona toʻlovlari ushbu bojxona deklaratsiyalari qabul qilinguniga qadar yoki qabul qilinishi bilan bir vaqtda yoxud bojxona toʻlovlarini kechiktirib yoki boʻlib-boʻlib toʻlash imkoniyati berilgan taqdirda bojxona toʻlovlarini kechiktirib va boʻlib-boʻlib toʻlashga imkoniyat berilgan oxirgi toʻlov kuniga qadar toʻlanadi.

Bunda, tovarlarni DBYUD asosida deklaratsiyalashda bojxona boji va soliqlar ushbu tovarlar bojxona hududiga kirib kelganda Oʻzbekiston Respublikasi Prezidentining 2025-yil 17-dekabrdagi PF-250-son “Bojxona maʼmuriyatchiligi va tashqi savdo tartibotlarini yanada soddalashtirish va samaradorligini oshirish chora-tadbirlari toʻgʻrisida”gi Farmoniga muvofiq deklaratsiyalovchi shaxsning murojaatiga asosan har bir tovar turkumi uchun alohida toʻlanishi mumkin;

b) ikkinchi bosqichda — Oʻzbekiston Respublikasi bojxona chegarasi orqali olib oʻtilayotgan tovarlar boʻyicha deklaratsiyalovchi shaxs tomonidan bojxona organiga toʻliq BYD taqdim etiladi va bojxona organlarida rasmiylashtiriladi, bundan tovarlarni toʻliq BYD taqdim etmagan holda dastlabki deklaratsiyalash uchun ilgari DBD taqdim etilgan hollar mustasno.

Tovarlarni toʻliq BYD taqdim etmagan holda dastlabki deklaratsiyalash uchun ilgari DBD taqdim etilgan hollarda deklaratsiyalovchi shaxs tomonidan DBDning roʻyxat raqami tranzit deklaratsiyasida koʻrsatiladi va hujjatlar bojxona organi tomonidan rasmiylashtiriladi.

Tovarlarning DBYUD va TBBYUDlari rasmiylashtiruvi uchun hisoblangan va undirilgan yigʻim keyingi bosqichda toʻliq BYD taqdim etilganida takroran undirilmaydi.

2-bob. Dastlabki bojxona yuk deklaratsiyasini rasmiylashtirish

1-§. Tovarlarni toʻliq BYD taqdim etmagan holda dastlabki deklaratsiyalash shartlari

3. Tovarlarni toʻliq BYD taqdim etmagan holda dastlabki deklaratsiyalash quyidagi hollarda qoʻllanilmaydi:

tovar Oʻzbekiston Respublikasi bojxona hududiga amalda yetib kelganda;

Oʻzbekiston Respublikasi hududiga import qilinishi taqiqlangan tovar boʻlganda;

tovarlarni erkin muomalaga chiqarishda qonunchilik hujjatlarida belgilangan vakolatli organlar tomonidan beriladigan hujjatlar (ruxsat etish xususiyatiga ega hujjatlar, muvofiqlik sertifikati, ekologik sertifikat va boshqalar) talab etiladigan hollarda, bundan mazkur hujjatlar mavjud boʻlgan hollar mustasno;

DBDdagi tovar bir transport hujjati boʻyicha bir transport vositasida bitta joʻnatuvchining manzilidan bitta qabul qiluvchining manziliga yuborilayotgan boʻlmasa;

litsenziyalar boʻyicha import qilinadigan tovar boʻlsa.

tovar uchun tranzit deklaratsiyasi taqdim etilmaydigan boʻlsa.

Tovarlar bojxona hududiga kelguniga qadar maʼlumotlarni taqqoslash tugallanganidan va tegishli bojxona toʻlovlari toʻlanganidan yoki Oʻzbekiston Respublikasining Bojxona kodeksining 47-bobiga muvofiq bojxona toʻlovlarini toʻlash taʼminoti taqdim etilganidan keyin DBDdan tovarlarga bojxona operatsiyalari qoʻllanilishi uchun zarur yagona hujjat sifatida foydalaniladi hamda tovarlar toʻliq BYD taqdim etilmagan holda erkin muomalaga chiqariladi, bundan mazkur bobning 5 — 7-paragraflarida nazarda tutilgan hollar mustasno.

2-§. Tovarlarni toʻliq BYD taqdim etmagan holda dastlabki deklaratsiyalashning birinchi bosqichi

4. Deklaratsiyalovchi shaxs mazkur Nizomning 6-7-bandlariga muvofiq toʻldirilgan va oʻzining elektron raqamli imzosi (qogʻoz shaklda uning shaxsiy imzosi) bilan tasdiqlagan holda tovarlar boʻyicha DBDni bojxona organiga taqdim etadi.

5. DBD bilan birga yoki bojxona rasmiylashtiruvi jarayonida deklaratsiyalovchi shaxs tijorat va transport hujjatlarini “Tovarlarni elektron deklaratsiyalash” avtomatlashtirilgan axborot tizimi (bundan buyon matnda TED AAT deb yuritiladi) orqali taqdim etadi.

6. DBD Bojxona yuk deklaratsiyasini toʻldirish tartibi toʻgʻrisidagi yoʻriqnomaning (roʻyxat raqami 2773, 2016-yil 6-aprel) (bundan buyon matnda Yoʻriqnoma deb yuritiladi) 5-bobiga muvofiq tartibda toʻldiriladi.

DBDning 1-grafasi birinchi boʻlmasida “IM” belgisi, uchinchi boʻlmasida “PR” belgisi koʻrsatiladi hamda 18, 26, 30-grafalari va “S” grafasining 2 raqami ostidagi satri toʻldirilmaydi.

7. DBD bojxona organi tomonidan roʻyxatga olinadi hamda DBD va unga ilova qilingan hujjatlar tekshiruvdan oʻtkaziladi.

Agar tekshiruv davomida DBD va unga ilova qilingan hujjatlarda xato va (yoki) kamchiliklar aniqlansa, DBDga Bojxona yuk deklaratsiyasini oʻzgartirish, unga qoʻshimcha kiritish, uni qayta rasmiylashtirish, qaytarib olish va bekor qilish tartibi toʻgʻrisidagi nizom (roʻyxat raqami 3220, 2020-yil 10-fevral) talablariga muvofiq oʻzgartirish va (yoki) qoʻshimchalar kiritiladi.

Xato va (yoki) kamchiliklar aniqlanmagan hollarda DBDning tekshiruvi Oʻzbekiston Respublikasi Bojxona kodeksining 248-moddasida belgilangan muddat doirasida amalga oshiriladi.

Bojxona organi tomonidan DBD va unga ilova qilingan hujjatlar tekshiruvi yakunlanganligi deklarant yoki deklaratsiyalovchi shaxsga Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining yagona avtomatlashtirilgan axborot tizimi (bundan buyon matnda Bojxona qoʻmitasi YAAT deb yuritiladi) orqali maʼlum qilinadi.

8. DBDda koʻrsatilgan tovarlar bojxona organiga DBD qabul qilingan kundan (DBDning 7-grafasida koʻrsatilgan sanadan) eʼtiboran oʻttiz kalendar kun ichida taqdim etilmagan taqdirda DBD berilmagan deb hisoblanadi.

Bunda, ushbu DBD Bojxona yuk deklaratsiyasini oʻzgartirish, unga qoʻshimcha kiritish, uni qayta rasmiylashtirish, qaytarib olish va bekor qilish tartibi toʻgʻrisidagi nizom (roʻyxat raqami 3220, 2020-yil 10-fevral) talablariga muvofiq bojxona organi tomonidan bekor qilinadi hamda bu haqida Bojxona qoʻmitasi YAAT orqali deklarant yoki deklaratsiyalovchi shaxs xabardor qilinadi.

Tovarning taqdim etilganligini tasdiqlash bojxona organi tomonidan DBD raqami qayd etilgan tranzit deklaratsiyani rasmiylashtirish orqali amalga oshiriladi.

3-§. Tovarlarni toʻliq BYD taqdim etmagan holda dastlabki deklaratsiyalashning ikkinchi bosqichi

9. Tashuvchi yoki boshqa manfaatdor shaxs DBDda koʻrsatilgan tovarlar bojxona hududiga amalda yetib kelguniga qadar ular toʻgʻrisida bojxona organiga tranzit deklaratsiyasini yoki dastlabki axborotni taqdim etishda DBD raqamini koʻrsatishi shart.

Bunda, deklaratsiyalovchi shaxs tomonidan DBD raqami Tranzit deklaratsiyasini toʻldirish, rasmiylashtirish, unga oʻzgartirish va qoʻshimcha kiritish, uni qaytarib olish hamda bekor qilish tartibi toʻgʻrisidagi nizomda (roʻyxat raqami 3382, 2022-yil 31-avgust) belgilangan tartibda “E-Tranzit” avtomatlashtirilgan axborot tizimida “Yuk toʻgʻrisida maʼlumot” boʻlimining “Yuk kuzatuv hujjatlari” qismidagi 10-maydonda BYDni toʻldirishda foydalaniladigan hujjatlar va maʼlumotlar turlari tasniflagichidan tanlash orqali 805 tartib raqami ostida koʻrsatiladi.

10. DBDda koʻrsatilgan tovarlar tranzit deklaratsiyasini roʻyxatdan oʻtkazgan chegara bojxona postiga yetib kelgandan soʻng, tashuvchi tomonidan ushbu tovarlar va unga tegishli kuzatuv hujjatlari hamda tranzit deklaratsiyasining roʻyxat raqami bojxona organiga taqdim etiladi.

11. Bojxona organi tovarlar chegara bojxona posti hududiga yetib kelgandan soʻng, DBD bilan birga taqdim etilgan tovarning kuzatuv hujjatlarida koʻrsatilgan maʼlumotlarni tashuvchi tomonidan taqdim etilgan asl hamda elektron hujjatlardagi maʼlumotlar bilan solishtiradi.

Bunda, bojxona organi tomonidan DBDga ilova qilingan tovarning kuzatuv hujjatlari raqami, sanasi, shakli, undagi maʼlumotlar, shu jumladan joʻnatuvchi va qabul qiluvchining rekvizitlari, tovarning nomi, miqdori (soni, vazni, boshqa qoʻshimcha oʻlchov birligidagi miqdori), qiymati, TIF TN kodi, yetkazib berish shartlarida oʻzaro tafovut aniqlansa, DBD taqdim etilmagan deb hisoblanadi, bundan tovarlarni qayta yuklash jarayonida transport hujjatlari oʻzgarganligi natijasida yuzaga kelgan tafovutlar boʻyicha tovar qayta yuklanganligini tasdiqlovchi hujjatlar taqdim etilgan holatlar mustasno.

Bunday holatlarda DBD bojxona organi tomonidan bekor qilinadi hamda tovarlarni deklaratsiyalash BYD rasmiylashtiruvi uchun belgilangan tartibda amalga oshiriladi.

12. Chegara bojxona posti tomonidan tovarlar boʻyicha bojxona nazorati amalga oshirilganidan soʻng, DBD rasmiylashtiriladi va tovarlar erkin muomalaga chiqariladi, bundan mazkur Nizomning 20-bandida nazarda tutilgan hollar mustasno.

Bojxona organi tomonidan DBDning 18, 26, 29 va “S” grafalariga tranzit deklaratsiyasi asosida oʻzgartirish va (yoki) qoʻshimchalar kiritiladi.

13. Bojxona hududiga kirib kelishda DBD taqdim etilgan tovarlarga nisbatan quyidagi hollarda chegara bojxona posti tomonidan chet el tovari bojxona nazorati ostida tashilayotganda bojxona toʻgʻrisidagi qonunchilik hujjatlariga rioya etilishini taʼminlash chora-tadbirlari qoʻllaniladi:

xavfni boshqarish tizimi tomonidan xavf darajasi yuqori koʻrsatkich (“qizil” yoʻlak) bilan tasniflangan boʻlsa;

DBD rasmiylashtirilgan tovarlarga bojxona toʻlovlari toʻliq toʻlanmagan yoki toʻlanishi taʼminlanmagan boʻlsa;

tovarning tijorat va transport hujjatlaridagi maʼlumotlarda oʻzaro nomuvofiqliklar aniqlanganda;

bojxona nazoratining texnik vositalarini qoʻllash boʻyicha maʼlumotlar tovarlarga ilova qilingan hujjatlardagi maʼlumotlar bilan toʻgʻri kelmasa;

transport vositasining yuk boʻlmasiga bevosita (erkin) kirish imkoniyati mavjud boʻlganda;

huquqni muhofaza qilish yoki boshqa davlat nazorat organlaridan tushgan materiallar, shuningdek xorijiy davlatlarning bojxona va boshqa davlat organlaridan olingan tovarlarni bojxona nazoratidan oʻtkazilishi lozimligi toʻgʻrisidagi maʼlumotlar boʻlganda.

4-§. Tovarlarni manzil (tashqi iqtisodiy faoliyat) bojxona postlarida erkin muomalaga chiqarish shartlari

20. Quyidagi hollarda tovarlar DBDda koʻrsatilgan TIF bojxona postiga tranzit deklaratsiyasi asosida yoʻnaltiriladi:

chegara bojxona posti hududida tovarlarni bojxona koʻrigidan oʻtkazishning imkoni boʻlmaganda;

DBDda xato va kamchiliklar aniqlanib, unga oʻzgartirish va (yoki) qoʻshimchalar kiritish zarurati yuzaga kelganda, bundan mazkur Nizomning 11-bandi ikkinchi xatboshisida nazarda tutilgan hollar mustasno;

tovarlar chegara bojxona posti orqali avtotransportda olib kirilmagan hollarda;

DBDni bekor qilish yoki qaytarib olish zarurati yuzaga kelganda;

vakolatli shaxsning arizasiga koʻra.

21. Tovarlar DBDda koʻrsatilgan TIF bojxona postiga yetib kelgandan soʻng, tashuvchi yoxud boshqa manfaatdor shaxs tomonidan ushbu tovarlar va ularga tegishli kuzatuv hujjatlari bojxona organiga taqdim etiladi.

Tovarlar yetib kelganligi bu toʻgʻrisida bojxona organi tomonidan tovar kuzatuv hujjatlariga va Bojxona qoʻmitasi YAATda tegishli belgilarni qoʻyish orqali tasdiqlanadi.

22. Bojxona organi tovarlarni bojxona rasmiylashtiruvidan oʻtkazishda DBDdagi tovarlarning kuzatuv hujjatlarida koʻrsatilgan maʼlumotlarni keyin taqdim etilgan asl hamda elektron hujjatlardagi maʼlumotlar bilan solishtiradi.

Agarda taqdim qilingan hujjatlar (shu jumladan, elektron koʻrinishdagi) bilan asl hujjatlardagi maʼlumotlarda nomuvofiqliklar mavjud boʻlsa yoki DBDda kerakli maʼlumotlar yetishmasa, bojxona organi tomonidan deklaratsiyalovchi shaxsning ushbu masaladagi murojaatini koʻrib chiqish natijalari yoki bojxona organining talablari asosida DBDga tegishli oʻzgartirishlar va (yoki) qoʻshimchalar kiritiladi.

Bunday holatlarda DBD bojxona organi tomonidan bekor qilinadi hamda tovarlarni deklaratsiyalash BYD rasmiylashtiruvi uchun belgilangan tartibda amalga oshiriladi.

22 1 . DBDni oʻzgartirish, unga qoʻshimcha kiritish, uni qaytarib olish va bekor qilish Bojxona yuk deklaratsiyasini oʻzgartirish, unga qoʻshimcha kiritish, uni qayta rasmiylashtirish, qaytarib olish va bekor qilish tartibi toʻgʻrisidagi nizom (roʻyxat raqami 3220, 2020-yil 10-fevral) talablariga muvofiq amalga oshiriladi.

22 2 . Bojxona organi tomonidan tovarlar boʻyicha bojxona nazoratining belgilangan tartib-taomillari amalga oshirilganidan soʻng, DBD rasmiylashtirilib, tovarlar erkin muomalaga chiqariladi, bundan mazkur Nizomning 22-bandi uchinchi xatboshisida nazarda tutilgan hollar mustasno.

5-§. Tovarlarni keyinchalik toʻliq BYD taqdim etish orqali dastlabki deklaratsiyalash

22 3 . Tovarlarni keyinchalik toʻliq BYD taqdim etish orqali dastlabki deklaratsiyalash quyidagi hollarda qoʻllanilmaydi:

tovar Oʻzbekiston Respublikasi bojxona hududiga amalda yetib kelganda;

Oʻzbekiston Respublikasi hududiga import qilinishi taqiqlangan tovar boʻlganda;

tovarlarni erkin muomalaga chiqarishda qonunchilik hujjatlarida belgilangan vakolatli organlar tomonidan beriladigan ruxsat etish xususiyatiga ega hujjatlar mavjud boʻlmagan hollarda, bundan muvofiqlik sertifikati, ekologik sertifikat, veterinariya sertifikati, sanitariya-epidemiologik xulosa, karantin ruxsatnomasi hamda radioelektron vositalar va yuqori chastotali qurilmalarni olib kirish uchun ruxsatnoma mustasno;

litsenziyalar boʻyicha import qilinadigan tovar boʻlsa.

DBDda barcha zarur maʼlumotlar koʻrsatilmagan va (yoki) bojxona rasmiylashtiruvi uchun zarur hujjatlar toʻliq hajmda taqdim etilmagan, jumladan muvofiqlik sertifikati, ekologik sertifikat, veterinariya sertifikati, sanitariya-epidemiologik xulosa, karantin ruxsatnomasi hamda radioelektron vositalar va yuqori chastotali qurilmalarni olib kirish uchun ruxsatnomalar toʻgʻrisidagi maʼlumotlar mavjud boʻlmaganda, tovarlarni dastlabki deklaratsiyalash keyinchalik toʻliq BYD taqdim etish sharti bilan amalga oshirilishi lozim.

6-§. Tovarlarni keyinchalik toʻliq BYD taqdim etish orqali dastlabki deklaratsiyalashning birinchi bosqichi

22 4 . Deklaratsiyalovchi shaxs mazkur Nizomning 22 5 va 22 6 -bandlariga muvofiq toʻldirilgan va oʻzining elektron raqamli imzosi (qogʻoz shaklda uning shaxsiy imzosi) bilan tasdiqlagan holda tovarlar boʻyicha DBDni bojxona organiga taqdim etadi.

22 5 . DBD bilan birga yoki bojxona rasmiylashtiruvi jarayonida deklaratsiyalovchi shaxs tijorat va transport hujjatlarini TED AAT orqali taqdim etadi.

22 6 . DBD Yoʻriqnomaning 5-bobiga muvofiq tartibda toʻldiriladi.

Bunda, DBDning 1-grafasi birinchi boʻlmasida “PR” belgisi koʻrsatiladi hamda 18, 26, 30-grafalari va “S” grafasining 2 raqami ostidagi satri toʻldirilmaydi.

22 7 . DBD bojxona organi tomonidan roʻyxatga olinadi va rasmiylashtiriladi.

Bunda, DBDning “D” grafasida bojxona organi tomonidan ushbu DBDda bayon etilgan tovarlar qabul qilinganligi haqida bojxona organi belgilari (yozuvlari) koʻrsatiladi. Bojxona organi belgilari (yozuvlari) bojxona organi xodimining elektron raqamli imzosi (qogʻoz shakldagi DBDda shaxsiy raqamli muhri) bilan tasdiqlanadi.

22 8 . DBDda koʻrsatilgan tovarlar bojxona organiga DBD qabul qilingan kundan (DBDning 7-grafasida koʻrsatilgan sanadan) eʼtiboran oʻttiz kalendar kun ichida taqdim etilmagan taqdirda DBD berilmagan deb hisoblanadi.

7-§. Tovarlarni keyinchalik toʻliq BYD taqdim etish orqali dastlabki deklaratsiyalashning ikkinchi bosqichi

22 9 . Tovarlar DBDni roʻyxatdan oʻtkazgan bojxona postiga yetib kelgandan soʻng toʻliq BYD taqdim etiladi.

Bunda, DBDdagi tovar boʻyicha toʻliq BYDni taqdim etish muddati Oʻzbekiston Respublikasi Bojxona kodeksining 261-moddasida koʻzda tutilgan muddatdan oshmasligi lozim.

22 10 . Toʻliq BYD deklarant tomonidan quyidagi xususiyatlarni inobatga olgan holda Yoʻriqnomaning 5-bobiga muvofiq tartibda toʻldiriladi va bojxona organlariga TED AAT orqali taqdim etiladi:

toʻliq BYDning 1-grafasi birinchi boʻlmasida “IM” harfli belgisi koʻrsatiladi;

toʻliq BYDning 1-grafasi uchinchi boʻlmasida “PPR” harfli belgisi koʻrsatiladi;

toʻliq BYDga aynan DBDga berilgan tartib raqam qoʻyiladi.

22 11 . Deklaratsiyalovchi shaxs TIF qatnashchisi kabineti orqali bojxona rasmiylashtiruvi uchun taqdim etiladigan hujjatlarni elektron raqamli imzosi bilan tasdiqlaydi va bojxona organlariga yuboradi.

22 12 . Toʻliq BYD bojxona organi tomonidan roʻyxatga olinadi va rasmiylashtiriladi.

Bojxona organlari tovarlarni erkin muomalaga chiqarishda qonunchilik hujjatlarida belgilangan vakolatli organlar tomonidan beriladigan hujjatlarning (ruxsat etish xususiyatiga ega hujjatlar, muvofiqlik sertifikati, ekologik sertifikat va boshqalar) “Yagona darcha” bojxona axborot tizimida mavjudligini tekshiradi hamda tegishli hujjatlar ushbu tizimda mavjud boʻlmagan taqdirda bojxona rasmiylashtiruvini rad etadi.

Bojxona organlari tovarlarni bojxona rasmiylashtiruvidan oʻtkazishda tovarlarning kuzatuv hujjatlari nusxalarida koʻrsatilgan maʼlumotlarni asl hamda elektron hujjatlardagi maʼlumotlar bilan solishtiradi.

Bunday holatlarda DBD va u boʻyicha taqdim etilgan toʻliq BYD bojxona organi tomonidan bekor qilinadi hamda tovarlarni deklaratsiyalash BYD rasmiylashtiruvi uchun belgilangan tartibda amalga oshiriladi.

22 13 . DBD va u boʻyicha taqdim etilgan toʻliq BYDda xato va kamchiliklar aniqlanib, unga oʻzgartirish va (yoki) qoʻshimchalar kiritish zarurati yuzaga kelganda ushbu oʻzgartirish va (yoki) qoʻshimchalar bojxona organi ruxsati bilan amalga oshiriladi, bundan mazkur Nizomning 22 12 -bandi beshinchi xatboshisida nazarda tutilgan holatlar mustasno.

22 14 . DBD va u boʻyicha taqdim etilgan toʻliq BYDga oʻzgartirish va (yoki) qoʻshimchalar kiritish, ularni qaytarib olish va bekor qilish Bojxona yuk deklaratsiyasini oʻzgartirish, unga qoʻshimcha kiritish, uni qayta rasmiylashtirish, qaytarib olish va bekor qilish tartibi toʻgʻrisidagi nizom (roʻyxat raqami 3220, 2020-yil 10-fevral) talablariga muvofiq amalga oshiriladi.

DBD va u boʻyicha taqdim etilgan toʻliq BYD bekor qilingan taqdirda, yangi BYD oʻn besh kalendar kundan kechiktirmay taqdim etilishi shart.

22 15 . Bojxona organi tomonidan tovarlar boʻyicha bojxona nazoratining belgilangan tartib-taomillari amalga oshirilganidan soʻng BYD rasmiylashtirilib, tovarlar erkin muomalaga chiqariladi.

3-bob. DBYUDni rasmiylashtirish tartibi

1-§. Tovarlarni davriy deklaratsiyalash shartlari

23. DBYUD aynan bir xil turdagi tovarlarni bir tashqi savdo shartnomasi (kelishuv, bitim) doirasida ayni bir shaxs tomonidan bojxona chegarasi orqali olib oʻtishda rasmiylashtiriladi. Bunday hollarda muayyan vaqt ichida bojxona chegarasi orqali olib oʻtiladigan barcha tovarlar uchun bitta BYD beriladi.

DBYUDni rasmiylashtirish tovarlarni vaqtincha saqlashning eng koʻp muddati yoki bojxona toʻlovlarini toʻlash muddatlari buzilishiga olib kelishi mumkin emas.

23 1 . Tovarlarni davriy deklaratsiyalash quyidagi hollarda qoʻllanilmaydi:

Oʻzbekiston Respublikasi hududiga import qilinishi taqiqlangan tovar boʻlganda;

DBYUDda bitta bitimga muvofiq bitta joʻnatuvchining manzilidan bitta oluvchining manziliga bitta chegara bojxona posti orqali olib kiriladigan va bitta bojxona postiga taqdim etiladigan bir xil bojxona rejimiga joylashtirilayotgan bir nom, tur, markadagi, TIF TN boʻyicha tovar kodining oʻn belgili darajasi bir xil boʻlgan tovarlar koʻrsatilmagan boʻlsa.

24. Aynan bir xil turdagi tovarlarga bir tashqi savdo shartnomasi (kelishuv, bitim) doirasida karantin ruxsatnomalar, oʻsimlik va hayvonot dunyosi obyektlarini, ozon yemiruvchi moddalar va ulardan tashkil topgan mahsulotlarni bojxona chegarasi orqali olib oʻtish uchun ruxsatnomalar, muvofiqlik sertifikati, veterinar, gigiyenik va ekologik sertifikatlar, bir kalendar yilidan oshmagan muddatga bir marotaba taqdim etilishi mumkin.

2-§. Tovarlarni davriy deklaratsiyalashning birinchi bosqichi

25. DBYUD shartnoma (kelishuv, bitim) doirasida tovarlarning maʼlum bir turkumi uchun amalda bojxona organiga taqdim etilganda rasmiylashtiriladi.

Deklaratsiyalovchi shaxs DBYUD bilan birga unda koʻrsatilgan tovarlarning toʻliq miqdorini tegishli bojxona rejimiga joylashtirishda zarur boʻladigan hujjatlarni bojxona organiga taqdim etadi.

26. DBYUDda koʻrsatilgan tovarlarning toʻliq miqdori uchun bojxona rejimi shartlariga muvofiq amalda boʻlgan bojxona toʻlovlari stavkalari boʻyicha bojxona toʻlovlari hisoblanadi.

27. DBYUDda olib kelingan har bir tovar turkumi uchun bojxona boji va soliqlar alohida toʻlanishi koʻrsatilgan hollarda Oʻzbekiston Respublikasi Prezidentining 2025-yil 17-dekabrdagi PF–250-son “Bojxona maʼmuriyatchiligi va tashqi savdo tartibotlarini yanada soddalashtirish va samaradorligini oshirish chora-tadbirlari toʻgʻrisida”gi Farmoniga muvofiq deklaratsiyalovchi shaxsning quyidagi maʼlumotlar koʻrsatilgan murojaatiga asosan bojxona boji va soliqlar toʻlanadi.

DBYUD roʻyxat raqami hamda tranzit deklaratsiyasini taqdim etish talab etiladigan tovarlar uchun tranzit deklaratsiyasining roʻyxat raqami;

ishonch bildirgan shaxsning maʼlumotlari (JSHSHIR, F.I.O.);

tovar va bojxona toʻlovlari toʻgʻrisida maʼlumotlar (turkumning tartib raqami, tranzit deklaratsiyasini taqdim etish talab etiladigan tovarning tranzit deklaratsiyadagi tartib raqami, TIF TN kod, faktura qiymati, netto va brutto vazni, qoʻshimcha oʻlchov birligi kodi va miqdori, import bojxona boji, aksiz soligʻi, QQS).

Deklaratsiyalovchi shaxsning murojaati ushbu shaxsning elektron raqamli imzosi (qogʻoz shaklda uning shaxsiy imzosi) bilan tasdiqlanadi.

DBYUD doirasida tovar va transport vositasi kuzatuv hujjatlari deklaratsiyalovchi shaxs tomonidan har bir tovar turkumi uchun bojxona nazorati boshlanishidan oldin deklaratsiyalovchi shaxsning murojaati bilan birga taqdim etiladi.

Deklaratsiyalovchi shaxsning murojaatida olib kelingan har bir tovar turkumi uchun bojxona boji va soliqlarni alohida toʻlash imkonini bermaydigan xato va (yoki) kamchiliklar aniqlangan hollarda bojxona organi ularni bartaraf etish toʻgʻrisida deklaratsiyalovchi shaxsni bir ish kuni ichida Bojxona qoʻmitasi YAAT orqali xabardor qiladi hamda hisobot varagʻi rasmiylashtirilmaydi.

Deklaratsiyalovchi shaxsning murojaatida xato va (yoki) kamchiliklar aniqlanmagan yoki bartaraf etilgan holda qayta taqdim etilgan taqdirda tovarlarning bojxona nazoratini amalga oshiruvchi bojxona organining mansabdor shaxsi tomonidan mazkur Nizomning ilovasiga muvofiq hisobot varagʻi rasmiylashtiriladi hamda yuritib boriladi.

28. DBYUDda olib kelingan har bir tovar turkumi uchun bojxona boji va soliqlar alohida toʻlanishi koʻrsatilmagan hollarda deklaratsiyalovchi shaxs tomonidan har bir tovar turkumi uchun bojxona nazorati boshlanishidan oldin tovar va transport vositasining kuzatuv hujjatlari elektron yoki qogʻoz shaklda taqdim etiladi.

Bunda, tranzit deklaratsiyasini taqdim etish talab etiladigan hollarda tovar va transport vositasining kuzatuv hujjatlarida tranzit deklaratsiyasi va tovarning tranzit deklaratsiyasidagi tartib raqami maʼlum qilinadi.

Bojxona nazoratini amalga oshiruvchi bojxona organining mansabdor shaxsi tomonidan mazkur Nizomning ilovasiga muvofiq hisobot varagʻi rasmiylashtiriladi. Bunda, hisobot varagʻining 5-grafasi 9 — 13-ustunlari toʻldirilmaydi.

29. Hisobot varagʻi bojxona organi xodimi tomonidan oʻzining elektron raqamli imzosi bilan tasdiqlangan holda rasmiylashtiriladi.

Hisobot varagʻini rasmiylashtirish jarayonida bojxona nazorati shakllari qoʻllanilishi xavfni boshqarish tizimi natijalariga koʻra amalga oshiriladi.

Hisobot varagʻi rasmiylashtirilgan vaqtdan boshlab unda koʻrsatilgan tovarlar shartli chiqarib yuborilgan deb hisoblanadi.

30. Bojxona organi tomonidan hisobot varagʻining toʻldirilishi:

1) 1-grafa. “DBYUDning roʻyxat raqami”.

Grafada tovar uchun rasmiylashtirilgan DBYUDning 7-grafasidagi roʻyxat raqami koʻrsatiladi;

2) 2-grafa. “Hisobot varagʻining roʻyxat raqami”.

Grafada hisobot varagʻining roʻyxat raqami koʻrsatiladi. Hisobot varagʻining roʻyxat raqami joriy yilda oʻsish tartibida raqamlanadi hamda yil yakunlangach raqamlash yangidan boshlanadi;

3) 3-grafa. “Tranzit deklaratsiyasi”.

Grafada tovar uchun rasmiylashtirilgan tranzit deklaratsiyasining roʻyxat raqami koʻrsatiladi;

4) 4-grafa. “Ishonch bildirgan shaxs”.

Grafada hisobot varagʻini toʻldirishga asos boʻlib xizmat qiluvchi taqdim etilgan hujjatlar va maʼlumotlarga javobgar hisoblangan jismoniy shaxsning maʼlumotlari quyidagi tartibda koʻrsatiladi:

grafaning chap boʻlmasida jismoniy shaxsning shaxsiy identifikatsiya raqami koʻrsatiladi;

grafaning oʻng boʻlmasida jismoniy shaxsning familiyasi, ismi, otasining ismi qayd etiladi.

5) 5-grafa. “Tovar va bojxona toʻlovlari toʻgʻrisida maʼlumot”.

Grafa quyidagi tartibda toʻldiriladi:

“Turkumning tartib raqami” ustunida tovar turkumining tartib raqami koʻrsatiladi. Bunda tartib raqam hisobot varagʻi taqdim etilayotgan tovarning amalda yetib kelgan turkumi uchun oʻsish tartibida koʻrsatiladi.

“Tovarning tranzit deklaratsiyadagi tartib raqami” ustunida DBYUD doirasida rasmiylashtirilayotgan tovarning tranzit deklaratsiyadagi tartib raqami koʻrsatiladi.

“TIF TN kod” ustunida tovarning DBYUDdagi TIF TN kodi koʻrsatiladi;

“Faktura qiymati” ustunida DBYUDdagi tovarning amalda olib kelingan turkumining faktura qiymati koʻrsatiladi. Bunda faktura qiymati DBYUDning 22-grafasida qayd etilgan valyutada koʻrsatiladi;

“Netto vazni” ustunida DBYUDdagi tovarning amalda yetib kelgan turkumidagi netto vazni kilogrammda koʻrsatiladi;

“Brutto vazni” ustunida DBYUDdagi tovarning amalda yetib kelgan turkumidagi brutto vazni kilogrammda koʻrsatiladi;

“Qoʻshimcha oʻlchov birligi kodi” ustunida TIF TNda keltirilgan “Oʻlchov birliklari jadvali”ga muvofiq tovarning qoʻshimcha oʻlchov birligi kodi koʻrsatiladi. Bunda tovar uchun TIF TNga muvofiq faqat asosiy oʻlchov birligi (kg) qoʻllanilsa, grafa toʻldirilmaydi;

“Qoʻshimcha oʻlchov birligidagi miqdor” ustunida tovarning amalda yetib kelgan turkumidagi qoʻshimcha oʻlchov birligi boʻyicha miqdori koʻrsatiladi. Bunda tovar uchun TIF TNga muvofiq faqat asosiy oʻlchov birligi (kg) qoʻllanilsa, grafa toʻldirilmaydi;

“Import bojxona boji” ustunida tovarning amalda yetib kelgan turkumiga hisoblangan import bojxona bojining Oʻzbekiston Respublikasi milliy valyutasida hisoblangan summasi koʻrsatiladi;

“Aksiz soligʻi” ustunida tovarning amalda yetib kelgan turkumiga hisoblangan aksiz soligʻining Oʻzbekiston Respublikasi milliy valyutasida hisoblangan summasi koʻrsatiladi;

“QQS” ustunida tovarning amalda yetib kelgan turkumiga hisoblangan qoʻshilgan qiymat soligʻining Oʻzbekiston Respublikasi milliy valyutasida hisoblangan summasi koʻrsatiladi;

“Jami toʻlovlar” ustunida tovarning amalda yetib kelgan turkumiga hisoblangan hisobot varagʻida qayd etilgan bojxona toʻlovlarining Oʻzbekiston Respublikasi milliy valyutasida hisoblangan umumiy summasi koʻrsatiladi.

6) 6-grafa. “Deklaratsiyalovchi shaxs”.

Grafada hisobot varagʻini toʻldirgan va uni bojxona organlariga oʻzining elektron raqamli imzosi bilan taqdim etgan deklaratsiyalovchi shaxsning familiyasi, ismi, otasining ismi koʻrsatiladi.

7) 7-grafa. “Bojxona organi”.

Grafada bojxona organi tomonidan ushbu hisobot varagʻida bayon etilgan tovarlarga nisbatan qabul qilingan qaror haqidagi bojxonaning organi belgilari (yozuvlari) koʻrsatiladi.

Bojxona organining belgilari (yozuvlari) bojxona organi xodimining elektron raqamli imzosi bilan tasdiqlanadi.

Hisobot varagʻining 1, 3-4 va 5-grafalari deklaratsiyalovchi shaxsning murojaatida keltirilgan maʼlumotlar asosida toʻldiriladi.

31. DBYUD Yoʻriqnoma talablariga muvofiq quyidagi xususiyatlarni inobatga olgan holda toʻldiriladi:

1) 1-grafa. “Deklaratsiya turi”.

Grafaning birinchi boʻlmasida “PE” belgisi koʻrsatiladi.

Grafaning ikkinchi boʻlmasida Bojxona rejimlari tasniflagichiga muvofiq bojxona rejimining ikki raqamdan iborat kodi koʻrsatiladi.

Grafaning uchinchi boʻlmasi toʻldirilmaydi;

2) 47-grafa “Bojxona toʻlovlarining hisobi”.

Grafa Yoʻriqnomaning 25-bandiga muvofiq holda toʻldiriladi. Agar bojxona boji va soliqlar bojxona hududiga kirib kelgan tovarlarning har bir turkumi uchun alohida toʻlanadigan boʻlsa, toʻlov usulining ikki belgili harfli kodi koʻrsatiladigan “TU” ustunida “PP” belgisi koʻrsatiladi.

3) 50-grafa. “Ishonch bildirgan shaxs”.

Grafa Yoʻriqnomaning 25-bandida belgilangan 50-grafani toʻldirish tartibiga muvofiq toʻldiriladi.

Grafada qoʻshimcha ravishda “Toʻliq BYDni XX.XX.XXXXgacha bojxona organiga taqdim etish majburiyatini olaman” jumlalari qayd etiladi. Bunda XX.XX.XXXX tegishlicha kun, oy va yilni anglatadi.

32. DBYUD asosida olib kelingan tovarlarning tovarga nisbatan vakolatga ega boʻlgan shaxsning ixtiyoriga berilishi, ularni bojxona nazoratidan oʻtkazilgandan hamda mazkur Nizomning 27 — 31-bandlariga muvofiq harakatlar yakunlangandan soʻng amalga oshiriladi.

3-§. Tovarlarni davriy deklaratsiyalashning ikkinchi bosqichi

33. DBYUD uchun belgilangan muddat tugaguniga qadar tovarlar bojxona chegarasidan toʻliq olib oʻtilgan taqdirda deklaratsiyalovchi shaxs tomonidan toʻliq BYD taqdim etiladi.

34. DBYUD rasmiylashtirilgan sanadan oltmish kalendar kundan oshmagan muddatda toʻliq BYD taqdim etilishi lozim. Agar toʻliq BYDni taqdim etish muddatining tugashi bojxona organining ishdan tashqari vaqtiga yoki ish kuni boʻlmagan kunga toʻgʻri kelsa, bojxona organining keyingi ish kuni mazkur muddat tugaydigan kun deb hisoblanadi.

DBYUD uchun belgilangan muddat tugaguniga qadar tovarlar bojxona chegarasi orqali toʻliq olib oʻtilmagan hollarda deklaratsiyalovchi shaxs tomonidan ushbu muddatga qadar bojxona chegarasi orqali haqiqatda olib oʻtilgan tovarlarga nisbatan toʻliq BYD taqdim etiladi.

Bunda toʻliq BYD taqdim etilishidan avval DBYUDdagi maʼlumotlarni haqiqatda olib oʻtilgan tovarlarga moslashtirish uchun DBYUDga oʻzgartirish va (yoki) qoʻshimchalar kiritiladi.

35. Ikkinchi bosqichda rasmiylashtiriladigan BYDda bojxona toʻlovlari summasini hisoblashda DBYUD qabul qilingan kunda amalda boʻlgan bojxona toʻlovlari stavkalari va xorijiy valyutalar kurslari qoʻllaniladi.

Agarda taqdim etilgan hujjatlardagi maʼlumotlarga aniqlik kiritish natijasida hisoblangan bojxona toʻlovlari summasi DBYUDda koʻrsatilgan toʻlovlar summasidan ortadigan boʻlsa, ular qoʻshimcha toʻlanadi, kamayish holatlarida esa bojxona organi oʻrtadagi farqni toʻlovchiga Oʻzbekiston Respublikasining Bojxona kodeksida belgilangan tartibda qaytaradi yoki toʻlovchining xohishiga koʻra uni keyingi toʻlovlar hisobiga oʻtkazadi.

Bunda, DBYUDda bojxona boji va soliqlarning har bir tovar turkumiga alohida toʻlanishi koʻrsatilgan taqdirda deklaratsiyalovchi shaxsning murojaatiga asosan bojxona organi tomonidan hisobot varagʻiga tegishli oʻzgartirish va (yoki) qoʻshimchalar kiritiladi.

36. Bojxona chegarasi orqali olib oʻtilgan tovarlarning umumiy miqdori DBYUDda koʻrsatilgan miqdorga mos boʻlishi lozim.

Tovarlar belgilangan muddatlarda DBYUDda koʻrsatilgan miqdordan ortiq import qilinganda yoki eksportga olib chiqilishi nazarda tutilganda, tovarlarning ushbu ortiqcha qismiga nisbatan yangi BYD taqdim etilgan kuni amalda boʻlgan qonunchilik hujjatlariga muvofiq bojxona rasmiylashtiruvi amalga oshiriladi.

37. DBYUDni oʻzgartirish, unga qoʻshimcha kiritish, uni qayta rasmiylashtirish, qaytarib olish va bekor qilish Bojxona yuk deklaratsiyasini oʻzgartirish, unga qoʻshimcha kiritish, uni qayta rasmiylashtirish, qaytarib olish va bekor qilish tartibi toʻgʻrisidagi nizom (roʻyxat raqami 3220, 2020-yil 10-fevral) talablariga muvofiq amalga oshiriladi.

38. Toʻliq BYD DBYUDda koʻrsatilmagan tovarlar boʻyicha huquqbuzarlik holatlari aniqlanganda bu boʻyicha ish koʻrib chiqilib, sud yoki huquqni muhofaza qiluvchi organ qarori chiqqunga qadar taqdim etilmaydi.

39. Toʻliq BYD Yoʻriqnomaning 25-bandi talablariga muvofiq tartibda quyidagi xususiyatlarni inobatga olgan holda toʻldiriladi:

1) 1-grafa. “Deklaratsiya turi”.

Grafaning birinchi boʻlmasida tovarlarni olib oʻtish yoʻnalishi koʻrsatiladi — “IM” yoki “EK” belgisi.

Grafaning ikkinchi boʻlmasida Bojxona rejimlari tasniflagichiga muvofiq bojxona rejimining ikki raqamdan iborat kodi koʻrsatiladi.

Grafaning uchinchi boʻlmasida “PPE” belgisi koʻrsatiladi.

2) 7-grafa. “BYDning roʻyxat raqami”.

Grafada toʻliq BYDda koʻrsatilgan tovar uchun rasmiylashtirilgan DBYUDning roʻyxat raqami koʻrsatiladi.

3) 47-grafa “Bojxona toʻlovlarining hisobi”.

Grafa Yoʻriqnomaning 25-bandiga muvofiq holda toʻldiriladi. Agar bojxona boji va soliqlar bojxona hududiga kirib kelgan tovarlarning har bir turkumi uchun alohida toʻlangan boʻlsa, toʻlov usulining ikki belgili harfli kodi koʻrsatiladigan “TU” ustunida “PP” belgisi koʻrsatiladi.

1) 1-grafa. “Deklaratsiya turi”.

Grafaning birinchi boʻlmasida tovarlarni olib oʻtish yoʻnalishi koʻrsatiladi — “IM” yoki “EK”.

Grafaning ikkinchi boʻlmasida Bojxona rejimlari tasniflagichiga muvofiq bojxona rejimining ikki raqamdan iborat kodi koʻrsatiladi.

Grafaning uchinchi boʻlmasida “PPE” belgisi koʻrsatiladi.

2) BYDga aynan DBYUDga berilgan tartib raqam qoʻyiladi.

4-bob. TBBYUDni rasmiylashtirish tartibi

1-§. Tovarlarga TBBYUD taqdim etish shartlari

40. Deklarant yoki bojxona brokeri oʻziga bogʻliq boʻlmagan sabablarga koʻra deklaratsiyani toʻldirish uchun barcha zarur axborotga ega boʻlmasa, TBBYUD tovarni identifikatsiyalash imkoniyati boʻlishi sharti bilan berilishi mumkin.

TBBYUD quyidagi tovarlarni shartli chiqarib yuborish uchun berilishi mumkin:

bojxona toʻlovlari shartli bojxona qiymatini aniqlash asosida toʻlangan tovarlar;

zarur hujjatlar (bundan ruxsat etish xususiyatiga ega hujjatlar mustasno) va maʼlumotlar taqdim etilmagan tovarlar;

bojxona toʻlovlarini kechiktirib yoki boʻlib-boʻlib toʻlashga ruxsat berilgan holda erkin muomalaga chiqarish (import) bojxona rejimiga muvofiq rasmiylashtirilgan tovarlar;

TIF TN kodiga aniqlik kiritish boʻyicha ekspertiza tayinlangan tovarlar.

40 1 . TBBYUD quyidagi hollarda taqdim etilmaydi:

tovar Oʻzbekiston Respublikasi hududiga import qilinishi taqiqlangan boʻlsa;

tovar uchun ilgari DBD, DBYUD, TBBYUD va muvaqqat bojxona yuk deklaratsiyasi rasmiylashtirilgan boʻlsa;

TBBYUD erkin muomalaga chiqarish bojxona rejimidan boshqa bojxona rejimi uchun taqdim etilayotgan boʻlsa.

41. TBBYUDga deklarant yoki bojxona brokeri, agar bojxona toʻgʻrisidagi qonunchilik hujjatlarida alohida maʼlumotlarni taqdim etish uchun boshqa muddat nazarda tutilmagan boʻlsa, TBBYUD bojxona organi tomonidan qabul qilib olingan kundan eʼtiboran oltmish kalendar kundan ortiq boʻlmagan muddatda yetishmagan maʼlumotlarni va lozim darajada toʻldirilgan toʻliq BYDni taqdim etish haqidagi yozma majburiyatni ilova qiladi.

Agar ushbu Nizomning 40-bandi toʻrtinchi xatboshisida koʻrsatib oʻtilgan shartli chiqarib yuborilgan tovarlar uchun taqdim etilmagan muvofiqlik sertifikatini yoki sanitariya-epidemiologiya xulosasini olish talab etilsa, ushbu tovarlardan foydalanish, ularni uchinchi shaxslarga berish, shu jumladan ularni sotish yoki oʻzga usulda boshqa shaxsga oʻtkazish orqali berish taqiqlanadi, mazkur tovarlarni olib kirishga doir cheklovlar ushbu tovarlarning sifati va xavfsizligi tekshirilishi munosabati bilan belgilangan hollarda esa har qanday shaklda foydalanish (ishlatish) taqiqlanadi.

TBBYUD qoʻllanilgan holda deklaratsiyalashda lozim darajada toʻldirilgan toʻliq BYD avval boshda berilganidagi kabi bojxona organlarining zimmasiga qonunchilik hujjatlarining qaysi talablari va shartlari bajarilishi ustidan nazorat qilish vazifasi yuklatilgan boʻlsa, oʻsha talablar va shartlar, shu jumladan bojxona toʻlovlarini hisoblab chiqarish va toʻlash tartibi qoʻllaniladi.

2-§. TBBYUDni rasmiylashtirishning birinchi bosqichi

42. TBBYUD va BYDlarni hamda bojxona rasmiylashtiruvi uchun zarur boʻlgan hujjatlar elektron raqamli imzo bilan tasdiqlangan holda elektron yoki qogʻoz shakllarda taqdim etilishi mumkin. Bunda TBBYUDda bojxona maqsadlari uchun zarur boʻlgan maʼlumotlar aks ettirilgan boʻlishi kerak.

TBBYUDda koʻrsatilgan tovarlarning toʻliq miqdori uchun bojxona rejimi shartlariga muvofiq amalda boʻlgan bojxona toʻlovlari stavkalari boʻyicha bojxona toʻlovlari hisoblanadi.

42 1 . TIF TN kodiga aniqlik kiritish boʻyicha ekspertiza tayinlangan tovarlarga nisbatan taqiq va cheklovlar belgilangan boʻlsa, TBBYUD rasmiylashtirishga yoʻl qoʻyilmaydi.

43. Tovarlarni TBBYUD bilan rasmiylashtirishda quyidagilar taqdim etiladi:

transport (transport turidan kelib chiqib, konosament yoki yuk xati) va tijorat (invoys) hujjatlari;

toʻliq toʻldirilgan bojxona yuk deklaratsiyasini va yetishmagan maʼlumotlarni taqdim etish haqidagi yozma majburiyat.

44. Ushbu Nizomning 43-bandida koʻrsatilgan hujjatlar va maʼlumotlar mavjud boʻlmaganida, yoxud notoʻgʻri hujjat va maʼlumotlar taqdim etilganligi aniqlanganda TBBYUD rasmiylashtirilishiga yoʻl qoʻyilmaydi.

3-§. TBBYUDni rasmiylashtirishning ikkinchi bosqichi

45. TBBYUD va toʻliq BYD Yoʻriqnomaning 19 1 -bobiga muvofiq tartibda toʻldiriladi.

46. Bojxona posti toʻliq BYDni taqdim etish muddatlari va TBBYUDga muvofiq rasmiylashtirilgan tovarlarga nisbatan taqiq va cheklov boʻyicha shartlar bajarilishini nazorat qiladi va ularning elektron hisobini yuritadi.

46 1 . Bojxona organi tomonidan tayinlangan ekspertiza natijasi yuzasidan qabul qilingan TIF TN kodi deklarant yoki bojxona brokeriga TED AAT orqali taqdim etiladi hamda toʻliq BYD ekspertiza xulosasida belgilangan TIF TN kod asosida qonunchilik hujjatlari talablari boʻyicha rasmiylashtiriladi.

47. TBBYUD bilan rasmiylashtirilgan tovarlar boʻyicha oltmish kalendar kun ichida toʻliq BYD rasmiylashtirilmagan taqdirda, vakolatli shaxs ixtiyoriga koʻra ushbu tovarlar Oʻzbekiston Respublikasining Bojxona kodeksida belgilangan tartibda Oʻzbekiston Respublikasi bojxona hududidan tashqariga qaytarib chiqarib yuborilishi mumkin.

Bunda, tovarlar TBBYUD rasmiylashtirilgan kuni qanday holatda boʻlsa, amalda shunday holatda bojxona hududidan olib chiqilishi lozim, bundan tovar holatining tabiiy eskirishi yoki tashish va (yoki) saqlash normal sharoitlarida kamayishi oqibatida roʻy bergan oʻzgarishlar mustasno.

TBBYUDni oʻzgartirish, unga qoʻshimcha kiritish, uni qaytarib olish va bekor qilish Bojxona yuk deklaratsiyasini oʻzgartirish, unga qoʻshimcha kiritish, uni qayta rasmiylashtirish, qaytarib olish va bekor qilish tartibi toʻgʻrisidagi nizom (roʻyxat raqami 3220, 2020-yil 10-fevral) talablariga muvofiq amalga oshiriladi.

48. Tovarlarni “eksport” bojxona rejimida rasmiylashtirishda TBBYUDni rasmiylashtirish mazkur bob talablari asosan amalga oshirilishi mumkin.

5-bob. Yakuniy qoidalar

49. Ushbu Nizom qoidalarining buzilishida aybdor boʻlgan shaxslar qonunchilik hujjatlariga muvofiq javobgar boʻladilar.

50. Mazkur Nizom Oʻzbekiston Respublikasi Savdo-sanoat palatasi bilan kelishilgan.

Dastlabki, davriy va toʻliq boʻlmagan bojxona yuk deklaratsiyalarini rasmiylashtirish tartibi toʻgʻrisida nizomga ILOVA

HISOBOT VARAGʻI 1. DBYUDning roʻyxat raqami __________________________ 2. Hisobot varagʻining roʻyxat raqami ________________________________ 3. Tranzit deklaratsiyasi 4. Ishonch bildirgan shaxs 5. Tovar va bojxona toʻlovlari toʻgʻrisida maʼlumot Turku mning tartib raqami Tovarning tranzit deklaratsiyadagi tartib raqami TIF TN kod Faktura qiymati Netto vazni Brutto vazni Qoʻshimcha oʻlchov birligi kodi Qoʻshimcha oʻlchov birligidagi miqdor Import bojxona boji Aksiz soligʻi QQS Jami toʻlovlar 6. Deklaratsiyalovchi shaxs 7. B ojxona organi ________________________

Rais M. AZIMOV

Savdo-sanoat palatasi raisi A. IKRAMOV

Toshkent sh.,

2021-yil 31-mart,

2021-yil 31-mart

01-02/13-20-son

(Qonun hujjatlari maʼlumotlari milliy bazasi, 04.05.2021-y., 10/21/3296/0410-son; Qonunchilik maʼlumotlari milliy bazasi, 10.02.2022-y., 10/22/3296-1/0122-son, 17.03.2022-y., 10/22/3296-2/0221-son; 17.07.2023-y., 10/23/3447/0484-son; 28.08.2024-y., 10/24/3296-3/0659-son; 04.11.2025-y., № 10/25/3296-4/1006; 26.05.2026-y., 10/26/3296-5/0531-son)

lex.uz