📅 2021-yil 8-may · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 8 май · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 8 мая 2021 г. · Постановления Кабинета Министров
Официальный текст. Официальный документ. Редакционные примечания не включены.
📅 8 May 2021 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Навоий вилояти прокуратураси фаолиятини янада ривожлантириш учун инфратузилма объектларини қуриш лойиҳасини амалга ошириш чора-тадбирлари тўғрисида
Ўзбекистон Республикаси Президентининг «2021 — 2023 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида» 2020 йил 28 декабрдаги ПҚ-4936-сон қарори ижросини таъминлаш мақсадида «Давлат-хусусий шериклик тўғрисида»ги Қонунга асосан Вазирлар Маҳкамаси қарор қилади:
1. Ўзбекистон Республикаси Бош прокуратураси ва Навоий вилояти ҳокимлигининг Навоий вилояти прокуратураси маъмурий биносини (кейинги ўринларда — маъмурий бино) давлат-хусусий шериклик шартлари асосида қуриш ва жиҳозлаш тўғрисидаги таклифига розилик берилсин.
2. Маъмурий бинони давлат-хусусий шериклик асосида қуриш ва жиҳозлаш учун хусусий шерикни танлаш бўйича Бош прокуратура, Молия вазирлиги ҳузуридаги Давлат-хусусий шерикликни ривожлантириш агентлиги, Навоий вилояти ҳокимлиги ва Навоий вилояти прокуратураси вакилларидан иборат ишчи гуруҳ (кейинги ўринларда — ишчи гуруҳ) ташкил этилсин.
3. Бош прокуратурага ишчи гуруҳ хулосаси асосида маъмурий бинони қуриш ва жиҳозлаш учун тендер ўтказмасдан, тўғридан-тўғри музокаралар ўтказиш орқали хусусий шерик билан давлат-хусусий шериклик тўғрисидаги битимни тузишга рухсат берилсин.
4. Давлат-хусусий шериклик лойиҳасини амалга ошириш доирасида Навоий вилояти прокуратурасига тегишли Навоий вилояти, Навоий шаҳри, «Ёшлик» МФЙ ҳудудидаги 3,5 гектар ер участкасининг:
1 гектарида хусусий шерик томонидан маъмурий бино қурилади (жиҳозланади) ва давлат шериги — Бош прокуратурага давлат мулки сифатида бепул топширилади;
2,5 гектари маъмурий бино қурилиб (жиҳозланиб), белгиланган тартибда топширилгандан сўнг хусусий шерикка доимий фойдаланиш ҳуқуқи билан бепул ажратиб берилади.
5. Ўзбекистон Республикаси Бош прокуратураси Навоий вилояти ҳокимлиги ва Молия вазирлиги ҳузуридаги Давлат-хусусий шерикликни ривожлантириш агентлиги билан биргаликда давлат-хусусий шериклик тамойиллари асосида лойиҳа концепцияси ва давлат-хусусий шериклик тўғрисидаги битим лойиҳасини бир ой муддатда ишлаб чиқсин.
6. Ўзбекистон Республикаси Қурилиш вазирлиги маъмурий бинонинг лойиҳа-смета ҳужжатлари белгиланган тартибда давлат экспертизасидан ўтказилиши ва қурилиш-монтаж ишларининг сифатли бажарилиши юзасидан давлат назоратини ўрнатсин.
7. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари А.Ж. Раматов ҳамда Навоий вилояти ҳокими Қ.Б. Турсунов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2021 йил 8 май,
292-сон
Oʻzbekiston Respublikasi Vazirlar Mahkamasining
qarori
Navoiy viloyati prokuraturasi faoliyatini yanada rivojlantirish uchun infratuzilma obyektlarini qurish loyihasini amalga oshirish chora-tadbirlari toʻgʻrisida
Oʻzbekiston Respublikasi Prezidentining “2021 — 2023-yillarda Oʻzbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari toʻgʻrisida” 2020-yil 28-dekabrdagi PQ-4936-son qarori ijrosini taʼminlash maqsadida “Davlat-xususiy sheriklik toʻgʻrisida”gi Qonunga asosan Vazirlar Mahkamasi qaror qiladi:
1. Oʻzbekiston Respublikasi Bosh prokuraturasi va Navoiy viloyati hokimligining Navoiy viloyati prokuraturasi maʼmuriy binosini (keyingi oʻrinlarda — maʼmuriy bino) davlat-xususiy sheriklik shartlari asosida qurish va jihozlash toʻgʻrisidagi taklifiga rozilik berilsin.
2. Maʼmuriy binoni davlat-xususiy sheriklik asosida qurish va jihozlash uchun xususiy sherikni tanlash boʻyicha Bosh prokuratura, Moliya vazirligi huzuridagi Davlat-xususiy sheriklikni rivojlantirish agentligi, Navoiy viloyati hokimligi va Navoiy viloyati prokuraturasi vakillaridan iborat ishchi guruh (keyingi oʻrinlarda — ishchi guruh) tashkil etilsin.
3. Bosh prokuraturaga ishchi guruh xulosasi asosida maʼmuriy binoni qurish va jihozlash uchun tender oʻtkazmasdan, toʻgʻridan toʻgʻri muzokaralar oʻtkazish orqali xususiy sherik bilan davlat-xususiy sheriklik toʻgʻrisidagi bitimni tuzishga ruxsat berilsin.
4. Davlat-xususiy sheriklik loyihasini amalga oshirish doirasida Navoiy viloyati prokuraturasiga tegishli Navoiy viloyati, Navoiy shahri, “Yoshlik” MFY hududidagi 3,5 gektar yer uchastkasining:
1 gektarida xususiy sherik tomonidan maʼmuriy bino quriladi (jihozlanadi) va davlat sherigi — Bosh prokuraturaga davlat mulki sifatida bepul topshiriladi;
2,5 gektari maʼmuriy bino qurilib (jihozlanib), belgilangan tartibda topshirilgandan soʻng xususiy sherikka doimiy foydalanish huquqi bilan bepul ajratib beriladi.
5. Oʻzbekiston Respublikasi Bosh prokuraturasi Navoiy viloyati hokimligi va Moliya vazirligi huzuridagi Davlat-xususiy sheriklikni rivojlantirish agentligi bilan birgalikda davlat-xususiy sheriklik tamoyillari asosida loyiha konsepsiyasi va davlat-xususiy sheriklik toʻgʻrisidagi bitim loyihasini bir oy muddatda ishlab chiqsin.
6. Oʻzbekiston Respublikasi Qurilish vazirligi maʼmuriy binoning loyiha-smeta hujjatlari belgilangan tartibda davlat ekspertizasidan oʻtkazilishi va qurilish-montaj ishlarining sifatli bajarilishi yuzasidan davlat nazoratini oʻrnatsin.
7. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari A.J. Ramatov hamda Navoiy viloyati hokimi Q.B. Tursunov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2021-yil 8-may,
292-son