UzbekAI

Ўзбекистон Республикаси Вазирлар Маҳкамасининг

қарори

ТУЗИЛМАСИ

Бухоро маданият саройи фаолиятини ташкил этиш ҳамда ҳудудда театр санъатини янада ривожлантириш чора-тадбирлари тўғрисида

Бухоро вилоятида маданият ва санъат муассасалари фаолиятини замон талаблари асосида ташкил этиш, миллий қадрият ва анъаналарни кенг тарғиб этишга қаратилган маданий-маърифий тадбирлар самарадорлигини ошириш, аҳолига маданий хизмат кўрсатиш сифатини яхшилаш мақсадида Вазирлар Маҳкамаси қарор қилади:

1. Ўзбекистон Республикаси Маданият вазирлиги, Туризм ва спорт вазирлиги ҳамда Бухоро вилояти ҳокимлигининг:

Ўзбекистон Республикаси Маданият вазирлиги таркибида давлат муассасаси шаклида юридик шахс мақомидаги Бухоро маданият саройини ташкил этиш;

Бухоро вилояти мусиқали драма театрининг Бухоро вилояти, Бухоро шаҳри, Абдуҳолиқ Ғиждувоний кўчаси, 3-уй манзилида жойлашган бино ва иншоотларини Бухоро маданият саройига оператив бошқарув ҳуқуқи асосида бепул бериш;

Ўзбекистон Республикаси Маданият вазирлиги Бухоро вилояти маданият бошқармасининг Бухоро вилояти, Бухоро шаҳри, Мухтор Ашрафий кўчаси, 3-уй манзилида жойлашган ва ҳозирги кунда бўш турган бино ва иншоотларини (кейинги ўринларда — объект) Бухоро вилояти мусиқали драма театрига оператив бошқарув ҳуқуқи асосида бепул бериш тўғрисидаги таклифлари маъқуллансин.

2. Қуйидагилар Бухоро маданият саройининг асосий вазифалари этиб белгилансин:

ўзбек ва жаҳон мумтоз санъати анъаналарини, мусиқа, рақс ва миллий эстрада санъатини ривожлантириш ва тарғиб қилиш, ўзбек халқининг бой маънавий меросини тараннум этувчи, миллий ва умумбашарий қадриятларни улуғловчи ёрқин саҳна асарларини намойиш этиш орқали аҳолининг кенг қатламларини санъат усталари ва истеъдодли ёш ижрочилар ижодидан баҳраманд этиш;

халқимиз, айниқса, ёшлар қалбида миллий ғурур ва ифтихор туйғуларини мустаҳкамлаш, уларни она Ватанга муҳаббат ва садоқат руҳида тарбиялашга хизмат қилувчи ранг-баранг ижодий дастурлар орқали ёшларнинг маънавий дунёқарашини юксалтириш;

халқаро фестиваль, кўрик-танлов, конференция, ижтимоий-маданий анжуман ва бошқа маданий-маърифий тадбирлар ўтказиш.

3. Бухоро маданият саройининг тузилмаси 1-иловага мувофиқ тасдиқлансин.

Ўзбекистон Республикаси маданият вазирига, зарурат бўлганда, Бухоро маданият саройи тузилмасига ходимларнинг умумий чекланган сони ва меҳнатга ҳақ тўлаш фонди доирасида ўзгартиришлар киритиш ҳуқуқи берилсин.

4. Қуйидагилар Бухоро маданият саройи фаолиятини молиялаштириш манбалари этиб белгилансин:

Давлат бюджети маблағлари (ўз даромадлари билан қопланмаган қисми бўйича);

шартнома (пуллик) асосида кўрсатиладиган хизматлардан тушадиган маблағлар;

халқаро ва хорижий ташкилотлар грантлари;

юридик ва жисмоний шахслар, шу жумладан, норезидентларнинг ҳомийлик хайриялари;

қонунчилик ҳужжатлари билан тақиқланмаган бошқа манбалар.

5. Ўзбекистон Республикаси Туризм ва спорт вазирлиги ҳузуридаги Маданий мерос агентлиги Бухоро вилояти ҳокимлиги, Маданият вазирлиги билан биргаликда икки ой муддатда:

объектда асрашга доир ишларни амалга ошириш ҳамда ушбу манзилдаги бўш турган ҳудудга қўшимча бино қуриш ва ободонлаштириш ишлари бўйича лойиҳа-смета ҳужжатларини ишлаб чиқсин;

лойиҳа-смета ҳужжатларини зарур маблағлар ажратиш учун Вазирлар Маҳкамаси ҳузуридаги Алоҳида муҳим ижтимоий, маданий ва тарихий аҳамиятга эга бўлган объектларни қуриш, реконструкция қилиш ва мукаммал таъмирлаш дирекциясига (кейинги ўринларда — Дирекция) белгиланган тартибда тақдим этсин.

6. Объект бўйича:

Ўзбекистон Республикаси Туризм ва спорт вазирлиги ҳузуридаги Маданий мерос агентлиги — буюртмачи этиб;

бош лойиҳа ташкилоти ва бош пудрат ташкилоти қонунчилик ҳужжатларига мувофиқ белгиланади.

Объект моддий маданий мерос объекти сифатида давлат муҳофазасига олинганини инобатга олиб, объект ва унинг қўриқланадиган теграсидаги қурилиш-монтаж ишларини амалга оширишда маданий мерос объектларини муҳофаза қилиш ва улардан фойдаланиш тўғрисидаги қонунчилик ҳужжатлари билан белгиланган талабларга қатъий риоя қилинсин.

7. Дирекция объектда асрашга доир ишларни амалга ошириш ҳамда ушбу манзилдаги бўш турган ҳудудга белгиланган тартибда қўшимча бино қуриш ва ободонлаштириш ишлари 2021 йилда ўз маблағлари ҳисобидан молиялаштирилишини таъминласин.

8. Ўзбекистон Республикаси Маданият вазирлиги:

бир ой муддатда Бухоро маданият саройининг устави ишлаб чиқилиши, тасдиқланиши ва белгиланган тартибда давлат рўйхатидан ўтказилишини;

давлат-хусусий шериклик шартлари асосида ўз тизимидаги санъат саройлари ва маданият саройлари реконструкция қилиниши, таъмирланиши ва ободонлаштирилишини;

санъат саройлари ва маданият саройларида йил давомида ўтказиладиган маданий-маърифий, концерт ва бошқа оммавий тадбирлар сони кўпайтирилиши ҳамда мазмунан бойитилишини;

санъат саройлари ва маданият саройлари ҳудудида умумий овқатланиш жойлари (кафе, ресторан), кўнгилочар жойлар (кинотеатр) ташкил этилишини таъминласин.

9. Бухоро вилояти ҳокимлиги 2021 йилда Бухоро маданият саройининг моддий-техник базасини мустаҳкамлаш, уни зарур махсус асбоб-ускуналар ва хавфсизликни таъминловчи техник воситалар билан жиҳозлаш чораларини кўрсин.

10. Ўзбекистон Республикаси Ҳукуматининг 2-иловага мувофиқ айрим қарорларига ўзгартириш ва қўшимча киритилсин.

11. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — туризм ва спорт вазири А.А. Абдухакимов, маданият вазири О.А. Назарбеков ҳамда Бухоро вилояти ҳокими Б.К. Зарипов зиммасига юклансин.

Вазирлар Маҳкамасининг 2021 йил 27 майдаги 329-сон қарорига 1-ИЛОВА

Бухоро маданият саройининг

Директор Директорнинг хўжалик ишлари бўйича ўринбосари Ижодий ходимлар 4 Ахборот- коммуникация технологияларини ривожлантириш бўйича мутахассис 1 Техник ходимлар * Матбуот хизмати 1 Бош юрисконсульт 1 Ёрдамчи ходимлар * Бухгалтерия 2 Кадрлар бўйича бош мутахассис 1

Вазирлар Маҳкамасининг 2021 йил 27 майдаги 329-сон қарорига 2-ИЛОВА

Ўзбекистон Республикаси Ҳукуматининг айрим қарорларига киритилаётган ўзгартириш ва қўшимча

1. Вазирлар Маҳкамасининг «Ўзбекистонда театр ва мусиқа санъатини янада ривожлантиришни қўллаб-қувватлаш ва рағбатлантириш чора-тадбирлари тўғрисида»ги Фармонни амалга ошириш масалалари ҳақида» 1995 йил 28 октябрдаги 415-сон қарорига 1-илованинг «Бухоро вилояти» бўлимига «Бухоро маданият саройи» давлат муассасаси» сўзлари қўшилсин.

2. Вазирлар Маҳкамасининг 2019 йил 4 октябрдаги 846-сон қарори билан тасдиқланган Моддий маданий мероснинг кўчмас мулк объектлари миллий рўйхатининг «Бухоро вилояти» бўлимида 142-позициянинг «Кўчмас мулкка бўлган ҳуқуқ» устунидаги «маданият бошқармаси» сўзлари «мусиқали драма театри» сўзлари билан алмаштирилсин.

Ўзбекистон Республикасининг Бош вазири А. АРИПОВ

Тошкент ш.,

2021 йил 27 май,

329-сон

(Қонунчилик маълумотлари миллий базаси, 28.05.2021 й., 09/21/329/0499-сон)

lex.uz

Oʻzbekiston Respublikasi Vazirlar Mahkamasining

qarori

TUZILMASI

Buxoro madaniyat saroyi faoliyatini tashkil etish hamda hududda teatr sanʼatini yanada rivojlantirish chora-tadbirlari toʻgʻrisida

Buxoro viloyatida madaniyat va sanʼat muassasalari faoliyatini zamon talablari asosida tashkil etish, milliy qadriyat va anʼanalarni keng targʻib etishga qaratilgan madaniy-maʼrifiy tadbirlar samaradorligini oshirish, aholiga madaniy xizmat koʻrsatish sifatini yaxshilash maqsadida Vazirlar Mahkamasi qaror qiladi:

1. Oʻzbekiston Respublikasi Madaniyat vazirligi, Turizm va sport vazirligi hamda Buxoro viloyati hokimligining:

Oʻzbekiston Respublikasi Madaniyat vazirligi tarkibida davlat muassasasi shaklida yuridik shaxs maqomidagi Buxoro madaniyat saroyini tashkil etish;

Buxoro viloyati musiqali drama teatrining Buxoro viloyati, Buxoro shahri, Abduholiq Gʻijduvoniy koʻchasi, 3-uy manzilida joylashgan bino va inshootlarini Buxoro madaniyat saroyiga operativ boshqaruv huquqi asosida bepul berish;

Oʻzbekiston Respublikasi Madaniyat vazirligi Buxoro viloyati madaniyat boshqarmasining Buxoro viloyati, Buxoro shahri, Muxtor Ashrafiy koʻchasi, 3-uy manzilida joylashgan va hozirgi kunda boʻsh turgan bino va inshootlarini (keyingi oʻrinlarda — obyekt) Buxoro viloyati musiqali drama teatriga operativ boshqaruv huquqi asosida bepul berish toʻgʻrisidagi takliflari maʼqullansin.

2. Quyidagilar Buxoro madaniyat saroyining asosiy vazifalari etib belgilansin:

oʻzbek va jahon mumtoz sanʼati anʼanalarini, musiqa, raqs va milliy estrada sanʼatini rivojlantirish va targʻib qilish, oʻzbek xalqining boy maʼnaviy merosini tarannum etuvchi, milliy va umumbashariy qadriyatlarni ulugʻlovchi yorqin sahna asarlarini namoyish etish orqali aholining keng qatlamlarini sanʼat ustalari va isteʼdodli yosh ijrochilar ijodidan bahramand etish;

xalqimiz, ayniqsa, yoshlar qalbida milliy gʻurur va iftixor tuygʻularini mustahkamlash, ularni ona Vatanga muhabbat va sadoqat ruhida tarbiyalashga xizmat qiluvchi rang-barang ijodiy dasturlar orqali yoshlarning maʼnaviy dunyoqarashini yuksaltirish;

xalqaro festival, koʻrik-tanlov, konferensiya, ijtimoiy-madaniy anjuman va boshqa madaniy-maʼrifiy tadbirlar oʻtkazish.

3. Buxoro madaniyat saroyining tuzilmasi 1-ilovaga muvofiq tasdiqlansin.

Oʻzbekiston Respublikasi madaniyat vaziriga, zarurat boʻlganda, Buxoro madaniyat saroyi tuzilmasiga xodimlarning umumiy cheklangan soni va mehnatga haq toʻlash fondi doirasida oʻzgartirishlar kiritish huquqi berilsin.

4. Quyidagilar Buxoro madaniyat saroyi faoliyatini moliyalashtirish manbalari etib belgilansin:

Davlat budjeti mablagʻlari (oʻz daromadlari bilan qoplanmagan qismi boʻyicha);

shartnoma (pullik) asosida koʻrsatiladigan xizmatlardan tushadigan mablagʻlar;

xalqaro va xorijiy tashkilotlar grantlari;

yuridik va jismoniy shaxslar, shu jumladan, norezidentlarning homiylik xayriyalari;

qonunchilik hujjatlari bilan taqiqlanmagan boshqa manbalar.

5. Oʻzbekiston Respublikasi Turizm va sport vazirligi huzuridagi Madaniy meros agentligi Buxoro viloyati hokimligi, Madaniyat vazirligi bilan birgalikda ikki oy muddatda:

obyektda asrashga doir ishlarni amalga oshirish hamda ushbu manzildagi boʻsh turgan hududga qoʻshimcha bino qurish va obodonlashtirish ishlari boʻyicha loyiha-smeta hujjatlarini ishlab chiqsin;

loyiha-smeta hujjatlarini zarur mablagʻlar ajratish uchun Vazirlar Mahkamasi huzuridagi Alohida muhim ijtimoiy, madaniy va tarixiy ahamiyatga ega boʻlgan obyektlarni qurish, rekonstruksiya qilish va mukammal taʼmirlash direksiyasiga (keyingi oʻrinlarda — Direksiya) belgilangan tartibda taqdim etsin.

6. Obyekt boʻyicha:

Oʻzbekiston Respublikasi Turizm va sport vazirligi huzuridagi Madaniy meros agentligi — buyurtmachi etib;

bosh loyiha tashkiloti va bosh pudrat tashkiloti qonunchilik hujjatlariga muvofiq belgilanadi.

Obyekt moddiy madaniy meros obyekti sifatida davlat muhofazasiga olinganini inobatga olib, obyekt va uning qoʻriqlanadigan tegrasidagi qurilish-montaj ishlarini amalga oshirishda madaniy meros obyektlarini muhofaza qilish va ulardan foydalanish toʻgʻrisidagi qonunchilik hujjatlari bilan belgilangan talablarga qatʼiy rioya qilinsin.

7. Direksiya obyektda asrashga doir ishlarni amalga oshirish hamda ushbu manzildagi boʻsh turgan hududga belgilangan tartibda qoʻshimcha bino qurish va obodonlashtirish ishlari 2021-yilda oʻz mablagʻlari hisobidan moliyalashtirilishini taʼminlasin.

8. Oʻzbekiston Respublikasi Madaniyat vazirligi:

bir oy muddatda Buxoro madaniyat saroyining ustavi ishlab chiqilishi, tasdiqlanishi va belgilangan tartibda davlat roʻyxatidan oʻtkazilishini;

davlat-xususiy sheriklik shartlari asosida oʻz tizimidagi sanʼat saroylari va madaniyat saroylari rekonstruksiya qilinishi, taʼmirlanishi va obodonlashtirilishini;

sanʼat saroylari va madaniyat saroylarida yil davomida oʻtkaziladigan madaniy-maʼrifiy, konsert va boshqa ommaviy tadbirlar soni koʻpaytirilishi hamda mazmunan boyitilishini;

sanʼat saroylari va madaniyat saroylari hududida umumiy ovqatlanish joylari (kafe, restoran), koʻngilochar joylar (kinoteatr) tashkil etilishini taʼminlasin.

9. Buxoro viloyati hokimligi 2021-yilda Buxoro madaniyat saroyining moddiy-texnik bazasini mustahkamlash, uni zarur maxsus asbob-uskunalar va xavfsizlikni taʼminlovchi texnik vositalar bilan jihozlash choralarini koʻrsin.

10. Oʻzbekiston Respublikasi Hukumatining 2-ilovaga muvofiq ayrim qarorlariga oʻzgartirish va qoʻshimcha kiritilsin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — turizm va sport vaziri A.A. Abduxakimov, madaniyat vaziri O.A. Nazarbekov hamda Buxoro viloyati hokimi B.K. Zaripov zimmasiga yuklansin.

Vazirlar Mahkamasining 2021-yil 27-maydagi 329-son qaroriga 1-ILOVA

Buxoro madaniyat saroyining

Direktor Direktorning xoʻjalik ishlari boʻyicha oʻrinbosari Ijodiy xodimlar 4 Axborot- kommunikatsiya texnologiyalarini rivojlantirish boʻyicha mutaxassis 1 Texnik xodimlar * Matbuot xizmati 1 Bosh yuriskonsult 1 Yordamchi xodimlar * Buxgalteriya 2 Kadrlar boʻyicha bosh mutaxassis 1

Vazirlar Mahkamasining 2021-yil 27-maydagi 329-son qaroriga 2-ILOVA

Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimcha

1. Vazirlar Mahkamasining “Oʻzbekistonda teatr va musiqa sanʼatini yanada rivojlantirishni qoʻllab-quvvatlash va ragʻbatlantirish chora-tadbirlari toʻgʻrisida”gi Farmonni amalga oshirish masalalari haqida” 1995-yil 28-oktabrdagi 415-son qaroriga 1-ilovaning “Buxoro viloyati” boʻlimiga “Buxoro madaniyat saroyi” davlat muassasasi” soʻzlari qoʻshilsin.

2. Vazirlar Mahkamasining 2019-yil 4-oktabrdagi 846-son qarori bilan tasdiqlangan Moddiy madaniy merosning koʻchmas mulk obyektlari milliy roʻyxatining “Buxoro viloyati” boʻlimida 142-pozitsiyaning “Koʻchmas mulkka boʻlgan huquq” ustunidagi “madaniyat boshqarmasi” soʻzlari “musiqali drama teatri” soʻzlari bilan almashtirilsin.

Oʻzbekiston Respublikasining Bosh vaziri A. ARIPOV

Toshkent sh.,

2021-yil 27-may,

329-son

(Qonunchilik maʼlumotlari milliy bazasi, 28.05.2021-y., 09/21/329/0499-son)

lex.uz