📅 2021-yil 1-iyun · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 1 июнь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 1 июня 2021 г. · Постановления Кабинета Министров
Официальный текст. Официальный документ. Редакционные примечания не включены.
📅 1 June 2021 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
СХЕМАСИ
ТАВСИФИ
ТАВСИФИ
«Халқлар дўстлиги» кўкрак нишонини таъсис этиш тўғрисида
Ўзбекистон Республикаси Президентининг 2020 йил 2 мартдаги ПФ-5953-сон Фармони билан тасдиқланган «2017 — 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини «Илм, маърифат ва рақамли иқтисодиётни ривожлантириш йили»да амалга оширишга оид давлат дастури»да белгиланган вазифалар ижросини таъминлаш мақсадида Вазирлар Маҳкамаси қарор қилади:
1. «Халқлар дўстлиги» кўкрак нишони таъсис этилсин.
2. Қуйидагилар:
«Халқлар дўстлиги» кўкрак нишони тўғрисидаги низом 1-иловага мувофиқ;
«Халқлар дўстлиги» кўкрак нишони ва унинг гувоҳномаси тавсифлари 2 ва 3-иловаларга мувофиқ тасдиқлансин.
3. Ўзбекистон Республикаси Марказий банкининг «Давлат белгиси» давлат унитар корхонаси Ўзбекистон Республикаси Миллатлараро муносабатлар ва хориждаги ватандошлар масалалари бўйича қўмитасининг буюртмасига асосан «Халқлар дўстлиги» кўкрак нишони ва унинг гувоҳномаси тайёрланишини белгиланган тартибда таъминласин.
4. «Халқлар дўстлиги» кўкрак нишони ва унинг гувоҳномасини тайёрлаш ҳамда мукофотланганларни тақдирлаш билан боғлиқ харажатлар Ўзбекистон Республикасининг Давлат бюджети маблағлари ҳисобидан қопланиши инобатга олинсин.
5. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари Б.А. Мусаев ва Вазирлар Маҳкамаси ҳузуридаги Миллатлараро муносабатлар ва хорижий мамлакатлар билан дўстлик алоқалари қўмитаси раиси Р.Д. Қурбанов зиммасига юклансин.
Вазирлар Маҳкамасининг 2021 йил 1 июндаги 335-сон қарорига 1-ИЛОВА
«Халқлар дўстлиги» кўкрак нишони тўғрисида
1-боб. Умумий қоидалар
1. Мазкур Низом «Халқлар дўстлиги» кўкрак нишони (кейинги ўринларда — кўкрак нишони) билан тақдирлаш тартибини белгилайди.
2. Кўкрак нишони билан юртимизда яшаётган барча миллат ва элатларнинг вакиллари ўртасида миллатлараро дўстлик ва тотувлик муҳитининг мустаҳкамланишига муносиб ҳисса қўшган, миллий маданий марказлар ва дўстлик жамиятлари фаолияти самарадорлигини ошириш борасида фидокорона меҳнат қилган, шунингдек, хорижий мамлакатлар халқлари билан дўстлик ва ҳар тарафлама ҳамкорликни ривожлантиришда самарали натижаларга эришган маҳаллий ва хорижий давлат органлари ходимлари, нодавлат нотижорат ташкилотлари, тадбиркорлик субъектлари, ижтимоий соҳа ва оммавий ахборот воситалари вакиллари ҳамда чет элдаги ватандошлар тақдирланадилар.
Кўкрак нишони билан Ўзбекистон Республикаси фуқаролари, чет эл фуқаролари ва фуқаролиги бўлмаган шахслар, шунингдек, маҳаллий ва хорижий ташкилотлари, нодавлат нотижорат ташкилотлари, ижодий жамоалар ҳамда бошқа юридик шахслар ҳам тақдирланиши мумкин.
Чет эл фуқаролари ва чет эл юридик шахсларини тақдирлашга доир тақдимнома ташаббускор ташкилот томонидан Ўзбекистон Республикаси Ташқи ишлар вазирлиги билан келишилган ҳолда комиссияга киритилади.
3. Кўкрак нишони билан тақдирлаш тартиби ушбу Низомга илова қилинган схемага мувофиқ амалга оширилади.
2-боб. Кўкрак нишони билан тақдирлаш учун ҳужжатларни тақдим этиш ва кўриб чиқиш
4. Ҳудудий миллатлараро муносабатлар соҳасидаги давлат ва нодавлат ташкилотлари, шунингдек, миллий маданий марказлар ва дўстлик жамиятлари ҳар йили 1 майга қадар кўкрак нишони билан тақдирлаш бўйича таклифларни Қорақалпоғистон Республикаси Жўқорғи Кенгеси, тегишли маҳаллий ҳокимликлар билан келишилган ҳолда юқори турувчи республика органига тақдим этади.
5. Республика даражасидаги давлат ва нодавлат ташкилотлари, миллий маданий марказлар ва дўстлик жамиятлари таклифларни белгиланган тартибда ўрганиб чиқади ҳамда ҳар йили 1 июнга қадар кўкрак нишони билан тақдирлаш бўйича тақдимномаларни Ўзбекистон Республикаси Миллатлараро муносабатлар ва хориждаги ватандошлар масалалари бўйича қўмитасига (кейинги ўринларда — қўмита) тақдим этади.
Кўкрак нишони билан тақдирлаш бўйича тақдимномаларга номзод ҳақида қуйидаги ҳужжатлар босма ва электрон шаклда илова қилинади:
маълумотнома-объективка;
тавсифнома (аннотация);
паспорт нусхаси (16 ёшга тўлмаган шахслар учун туғилганлик тўғрисидаги гувоҳноманинг нусхаси);
фотосурат (3х4 см ўлчамли) — 2 дона;
шахслар ва ташкилотларнинг сўнгги уч йил давомида миллатлараро дўстлик ва тотувлик муҳитини мустаҳкамлаш, миллий маданий марказлар ва дўстлик жамиятлари фаолияти самарадорлигини ошириш, шунингдек, хорижий мамлакатлар халқлари билан дўстлик ва ҳар тарафлама ҳамкорликни ривожлантириш борасида амалга оширган ишлари бўйича маълумот.
6. Қўмита раиси томонидан қўмита, Ўзбекистон нодавлат нотижорат ташкилотлари миллий ассоциацияси, республика ҳудудида жойлашган миллий маданий марказлар ва дўстлик жамиятлари каби ташкилотларнинг вакилларидан иборат Ўзбекистон Республикаси Миллатлараро муносабатлар ва хориждаги ватандошлар масалалари бўйича қўмитасининг кўкрак нишони билан тақдирлашга оид тақдимномаларни кўриб чиқиш бўйича комиссияси (кейинги ўринларда — комиссия) ташкил этилади.
Комиссия йиғилишида номзодлар бўйича ҳужжатлар ўрганилиб, ҳар йили 1 июлга қадар энг муносиб номзодлар бўйича якуний хулоса қабул қилинади.
7. Комиссиянинг асосий вазифаси мукофотга номзодларни танлашда юзаки ёндашувларга йўл қўймасдан, адолат ва холислик мезонларига кўра комиссия йиғилишларининг ҳақиқий муҳокамалар асосида ўтказилишини таъминлаган ҳолда мукофотга номзодлар бўйича ҳужжатларни Низомда белгиланган муддатларда сифатли ва тўлиқ тайёрлаб, тақдим этишдан иборат.
Комиссия томонидан номзодларни кўриб чиқишда қуйидагилар инобатга олинади:
номзодларнинг мамлакатимизда миллатлараро тотувлик, бағрикенглик ва ҳамжиҳатликни таъминлаш, шунингдек аҳоли ўртасида миллатлараро дўстлик ва тотувлик муҳитини мустаҳкамлаш мақсадида амалга оширган фаолияти;
миллий маданий марказлар ва дўстлик жамиятлари фаолияти самарадорлигини оширишдаги иштироки;
хорижий мамлакатлар халқлари билан дўстлик ва ҳар тарафлама ҳамкорликни ривожлантириш борасидаги фаолияти;
жамиятда миллатлараро тотувлик, бағрикенглик ва ҳамжиҳатлик муҳитини шакллантиришни тарғиб қилиш бўйича турли инновацион самарали усулларнинг ишлаб чиқилганлиги.
8. Қўмита раиси ўз ташаббусига асосан Ўзбекистон Республикаси Ташқи ишлар вазирлиги билан келишилган ҳолда қўмитанинг хорижлик ҳамкорлари, чет элдаги турдош ташкилотлар, хорижий мамлакатларнинг Ўзбекистондаги элчихоналари ва халқаро ташкилотлар ваколатхоналари вакилларини миллатлараро дўстлик ва тотувлик муҳитини мустаҳкамлашга қўшган муносиб ҳиссаси учун кўкрак нишони билан тақдирлаши мумкин.
9. Қўмита раисининг кўкрак нишони билан тақдирлаш тўғрисидаги буйруғи ҳар йили 20 июлга қадар чиқарилади.
3-боб. Кўкрак нишони билан тақдирлаш
10. Кўкрак нишони ҳар йили 30 июль — Халқлар дўстлиги куни арафасида қўмита раиси (ёки унинг топшириғига мувофиқ бошқа масъул шахслар) томонидан тантанали вазиятда топширилади.
11. Кўкрак нишони билан тақдирланганларга базавий ҳисоблаш миқдорининг тўрт баравари миқдорида бир йўла тўланадиган пул мукофоти берилади.
Бир йўла тўланадиган пул мукофоти қўмитага ажратиладиган Ўзбекистон Республикасининг Давлат бюджети маблағлари ҳисобидан тўланади.
12. Кўкрак нишони билан тақдирланганлар рўйхати қўмитанинг Интернет жаҳон ахборот тармоғидаги расмий веб-сайтида ва бошқа оммавий ахборот воситаларида эълон қилинади.
13. Бир шахс кўкрак нишони билан бир марта мукофотланади.
14. Кўкрак нишони давлат мукофотларидан кейин кўкракнинг чап томонига тақилади.
4-боб. Якунловчи қоидалар
15. Қўмита ушбу Низомга мувофиқ кўкрак нишонига тавсия этилган номзодлар ҳужжатларининг холис кўриб чиқилиши учун бевосита масъулдир.
16. Ушбу Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб берадилар.
«Халқлар дўстлиги» кўкрак нишони тўғрисидаги низомга ИЛОВА
«Халқлар дўстлиги» кўкрак нишонига номзодларни тақдим этиш ва уларни ўрганиш
Босқичлар Субъектлар Тадбирлар Бажариш муддатлари 1-босқич Ҳудудий миллатлараро муносабатлар соҳасидаги давлат ва нодавлат ташкилотлари, миллий маданий марказлар ва дўстлик жамиятлари. Кўкрак нишони билан тақдирлаш бўйича таклифларни Қорақалпоғистон Республикаси Жўқорғи Кенгеси, тегишли маҳаллий ҳокимликлар билан келишади. Келишилган номзодларни юқори турувчи республика органига тақдим этади. Ҳар йили 1 майга қадар 2-босқич Республика даражасидаги давлат ва нодавлат ташкилотлари, миллий маданий марказлар ва дўстлик жамиятлари Таклифларни белгиланган тартибда ўрганиб чиқади ҳамда кўкрак нишони билан тақдирлаш бўйича тақдимномаларни Ўзбекистон Республикаси Миллатлараро муносабатлар ва хориждаги ватандошлар масалалари бўйича қўмитасига тақдим этади. Ҳар йили 1 июнга қадар 3-босқич Ўзбекистон Республикаси Миллатлараро муносабатлар ва хориждаги ватандошлар масалалари бўйича қўмитаси Ўзбекистон нодавлат нотижорат ташкилотлари миллий ассоциацияси, республика ҳудудида жойлашган миллий маданий марказлар ва дўстлик жамиятлари каби ташкилотларнинг вакилларидан иборат кўкрак нишони билан тақдирлашга оид тақдимномаларни кўриб чиқиш бўйича комиссияни ташкил этади. Комиссия йиғилишида номзодлар бўйича ҳужжатлар ўрганиб, энг муносиб номзодлар бўйича якуний хулоса қабул қилади. Ҳар йили 1 июлга қадар 4-босқич Ўзбекистон Республикаси Миллатлараро муносабатлар ва хориждаги ватандошлар масалалари бўйича қўмитаси Кўкрак нишони билан тақдирлаш тўғрисида буйруқ чиқаради Ҳар йили 20 июлга қадар 5-босқич Ўзбекистон Республикаси Миллатлараро муносабатлар ва хориждаги ватандошлар масалалари бўйича қўмитаси раиси (ёки унинг топшириғига мувофиқ бошқа масъул шахслар) «Халқлар дўстлиги» кўкрак нишони билан тақдирлайди. Ҳар йили 30 июль — Халқлар дўстлиги куни арафасида
Вазирлар Маҳкамасининг 2021 йил 1 июндаги 335-сон қарорига 2-ИЛОВА
«Халқлар дўстлиги» кўкрак нишонининг
«Халқлар дўстлиги» кўкрак нишони (кейинги ўринларда — кўкрак нишони) диаметри 34 миллиметрли доира шаклида бўлиб, мис қотишмасидан тайёрланади.
Кўкрак нишонининг олд томони пастки қисми марказида кўтарилаётган қуёш нурлари ҳамда ҳилпираб турган Ўзбекистон Республикасининг рангли байроғи фонида зарҳалланган Ўзбекистон Республикаси харитаси ҳамда меридианлари ва параллелларини акс эттирган кўк рангдаги Ер шари тасвири жойлашган. Унинг юқори қисмида дўстлик ва эрксеварлик рамзи бўлган Ҳумо қуши тилла рангда тасвирланган.
Кўкрак нишони айланаси бўйлаб зарҳал ҳошияли оқ эмаль фонидаги доира билан ўралган. Айлананинг юқори қисмида ҳарфларининг баландлиги 3 миллиметр бўлган «XALQLAR DOʻSTLIGI» сўзлари ёзилган. Унинг пастки четлари бўйлаб фахр-ифтихор ва шараф маъноларини ифода этувчи иккита дафна япроғи жойлаштирилган.
Кўкрак нишонининг орқа томонида Ўзбекистон Республикасининг Давлат герби тасвирланган.
Кўкрак нишонининг қалинлиги — 2,5 миллиметр. Тасвирлар ва ёзувлар қабариқдир.
Кўкрак нишони олд ва орқа томонларининг четлари қавариқ доира билан ўралган.
Кўкрак нишони ҳалқа ва илмоқчалар ёрдамида пастки қисмида дафна барглари тасвирланган тўғри тўртбурчак шаклидаги қадағичга уланган. Қадағичнинг эни — 26 миллиметр, бўйи — 24 миллиметрдан иборат.
Қадағич эни 22 миллиметрли шойи лента билан қопланган бўлиб, ҳар бирининг эни 4,4 миллиметрли 5 хил рангдаги йўллардан иборат. Лентанинг марказида оқ ранг, унинг ўнг томонида яшил ва сариқ ранглар, чап томонида эса мовий ва тўқ яшил ранглардаги йўллар ифодаланган.
Қадағичнинг орқа томонига кўкрак нишонини кийимга тақиб қўйиш учун тўғноғич кўринишидаги мослама ўрнатилган.
«Халқлар дўстлиги» кўкрак нишони
Вазирлар Маҳкамасининг 2021 йил 1 июндаги 335-сон қарорига 3-ИЛОВА
«Халқлар дўстлиги» кўкрак нишони гувоҳномасининг
«Халқлар дўстлиги» кўкрак нишони гувоҳномаси (кейинги ўринларда — гувоҳнома) 160 х 110 миллиметр ўлчамдаги китобча шаклида бўлиб, 240 г/кв.м. қалинликдаги офсет қоғоздан тайёрланади.
Гувоҳноманинг ташқи томони (биринчи ва тўртинчи бетлари) кўк рангда бўлиб, плёнка билан қопланган.
Гувоҳноманинг биринчи бети эни 7,5 миллиметрли, ички бурчаклари айлана шаклида бўлган тўқ кўк рангли ҳошия билан ўралган.
Гувоҳноманинг юқори чеккасидан (биринчи бети) 35 миллиметр пастда, марказда оралиғи 3,5 миллиметрли икки сатрдан иборат матн жойлашган. Биринчи сатрда «XALQLAR», иккинчи сатрда «DOʻSTLIGI» (катта ҳарфларда, «Times new Roman Bolt» шрифти, 14 кегль), учинчи сатрда «koʻkrak nishoni» («Times new Roman Bolt» шрифти, 14 кегль) сўзлари ёзилган. Ундан 6 миллиметр пастда «GUVOНNOMASI» (катта ҳарфларда, «Times new Roman Bolt» шрифти, 17 кегль) сўзи ёзилган.
Ёзувлар тўқ кўк рангда акс эттирилган.
Гувоҳноманинг ички томони (иккинчи ва учинчи бетлари) «Тангир» тасвири туширилган оч ҳаво рангда бўлиб, офсет усулида чоп этилган.
Ички томонининг чап қисмида (иккинчи бети), марказда кўкрак нишонининг аслига тенг ўлчамдаги рангли тасвири акс эттирилган.
Гувоҳноманинг ички ўнг томони (учинчи бети) юқори чеккасидан 8 миллиметр пастда, марказда «GUVOНNOMA» (катта ҳарфларда, «Times new Roman Bolt» шрифти, 10 кегль) сўзи ҳамда гувоҳноманинг тартиб рақами учун «№» белгиси ва 15 миллиметрли чизиқ жойлашган.
«GUVOНNOMA» сўзидан 11 миллиметр пастда мукофотланган шахснинг фамилияси, исми ва отасининг исмини қайд этиш учун оралиғи 8 миллиметрли учта чизиқ тортилган.
Пастки чизиқдан 4 миллиметр қуйида, марказда оралиғи 2 миллиметрли икки сатрдан иборат матн жойлашган. Биринчи сатрда «Oʻzbekiston Respublikasi Millatlararo munosabatlar va», иккинчи сатрда «xorijdagi vatandoshlar masalalari boʻyicha qoʻmitasi raisining» («Times new Roman Bolt» шрифти, 10 кегл) сўзлари ёзилган;
Ундан 5 миллиметр пастда оралиғи 4 миллиметр бўлган икки сатрдан иборат матн жойлашган. Биринчи сатрда «20__ y. «___» ___________dagi», иккинчи сатрда «____-sonli buyrugʻiga asosan» («Times new Roman Bolt» шрифти, 10 кегль) сўзлари ёзилган.
Ундан 5 миллиметр пастда, марказда оралиғи 5 миллиметрли уч сатрдан иборат матн жойлашган. Биринчи сатрда «XALQLAR», иккинчи сатрда «DOʻSTLIGI» (катта ҳарфларда, «Times new Roman Bolt» шрифти, 12 кегль), учинчи сатрда «koʻkrak nishoni bilan mukofotlandi» («Times new Roman Bolt» шрифти, 10 кегль) сўзлари ёзилган.
Сўнгги сўзлардан 9 миллиметр пастда, чап томонда «Qoʻmita raisi» («Times new Roman Bolt» шрифти, 10 кегль) сўзлари ёзилган.
«Халқлар дўстлиги» кўкрак нишони
ГУВОҲНОМАСИ
Ўзбекистон Республикасининг Бош вазири А. АРИПОВ
Тошкент ш.,
2021 йил 1 июнь,
335-сон
Oʻzbekiston Respublikasi Vazirlar Mahkamasining
qarori
NIZOM
SXEMASI
TAVSIFI
TAVSIFI
“Xalqlar doʻstligi” koʻkrak nishonini taʼsis etish toʻgʻrisida
Oʻzbekiston Respublikasi Prezidentining 2020-yil 2-martdagi PF-5953-son Farmoni bilan tasdiqlangan “2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Ilm, maʼrifat va raqamli iqtisodiyotni rivojlantirish yili”da amalga oshirishga oid davlat dasturi”da belgilangan vazifalar ijrosini taʼminlash maqsadida Vazirlar Mahkamasi qaror qiladi:
1. “Xalqlar doʻstligi” koʻkrak nishoni taʼsis etilsin.
2. Quyidagilar:
“Xalqlar doʻstligi” koʻkrak nishoni toʻgʻrisidagi nizom 1-ilovaga muvofiq;
“Xalqlar doʻstligi” koʻkrak nishoni va uning guvohnomasi tavsiflari 2 va 3-ilovalarga muvofiq tasdiqlansin.
3. Oʻzbekiston Respublikasi Markaziy bankining “Davlat belgisi” davlat unitar korxonasi Oʻzbekiston Respublikasi Millatlararo munosabatlar va xorijdagi vatandoshlar masalalari boʻyicha qoʻmitasining buyurtmasiga asosan “Xalqlar doʻstligi” koʻkrak nishoni va uning guvohnomasi tayyorlanishini belgilangan tartibda taʼminlasin.
4. “Xalqlar doʻstligi” koʻkrak nishoni va uning guvohnomasini tayyorlash hamda mukofotlanganlarni taqdirlash bilan bogʻliq xarajatlar Oʻzbekiston Respublikasining Davlat budjeti mablagʻlari hisobidan qoplanishi inobatga olinsin.
5. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A. Musayev va Vazirlar Mahkamasi huzuridagi Millatlararo munosabatlar va xorijiy mamlakatlar bilan doʻstlik aloqalari qoʻmitasi raisi R.D. Qurbanov zimmasiga yuklansin.
Vazirlar Mahkamasining 2021-yil 1-iyundagi 335-son qaroriga 1-ILOVA
“Xalqlar doʻstligi” koʻkrak nishoni toʻgʻrisida
1-bob. Umumiy qoidalar
1. Mazkur Nizom “Xalqlar doʻstligi” koʻkrak nishoni (keyingi oʻrinlarda — koʻkrak nishoni) bilan taqdirlash tartibini belgilaydi.
2. Koʻkrak nishoni bilan yurtimizda yashayotgan barcha millat va elatlarning vakillari oʻrtasida millatlararo doʻstlik va totuvlik muhitining mustahkamlanishiga munosib hissa qoʻshgan, milliy madaniy markazlar va doʻstlik jamiyatlari faoliyati samaradorligini oshirish borasida fidokorona mehnat qilgan, shuningdek, xorijiy mamlakatlar xalqlari bilan doʻstlik va har taraflama hamkorlikni rivojlantirishda samarali natijalarga erishgan mahalliy va xorijiy davlat organlari xodimlari, nodavlat notijorat tashkilotlari, tadbirkorlik subyektlari, ijtimoiy soha va ommaviy axborot vositalari vakillari hamda chet eldagi vatandoshlar taqdirlanadilar.
Koʻkrak nishoni bilan Oʻzbekiston Respublikasi fuqarolari, chet el fuqarolari va fuqaroligi boʻlmagan shaxslar, shuningdek, mahalliy va xorijiy tashkilotlari, nodavlat notijorat tashkilotlari, ijodiy jamoalar hamda boshqa yuridik shaxslar ham taqdirlanishi mumkin.
Chet el fuqarolari va chet el yuridik shaxslarini taqdirlashga doir taqdimnoma tashabbuskor tashkilot tomonidan Oʻzbekiston Respublikasi Tashqi ishlar vazirligi bilan kelishilgan holda komissiyaga kiritiladi.
3. Koʻkrak nishoni bilan taqdirlash tartibi ushbu Nizomga ilova qilingan sxemaga muvofiq amalga oshiriladi.
2-bob. Koʻkrak nishoni bilan taqdirlash uchun hujjatlarni taqdim etish va koʻrib chiqish
4. Hududiy millatlararo munosabatlar sohasidagi davlat va nodavlat tashkilotlari, shuningdek, milliy madaniy markazlar va doʻstlik jamiyatlari har yili 1-mayga qadar koʻkrak nishoni bilan taqdirlash boʻyicha takliflarni Qoraqalpogʻiston Respublikasi Joʻqorgʻi Kengesi, tegishli mahalliy hokimliklar bilan kelishilgan holda yuqori turuvchi respublika organiga taqdim etadi.
5. Respublika darajasidagi davlat va nodavlat tashkilotlari, milliy madaniy markazlar va doʻstlik jamiyatlari takliflarni belgilangan tartibda oʻrganib chiqadi hamda har yili 1-iyunga qadar koʻkrak nishoni bilan taqdirlash boʻyicha taqdimnomalarni Oʻzbekiston Respublikasi Millatlararo munosabatlar va xorijdagi vatandoshlar masalalari boʻyicha qoʻmitasiga (keyingi oʻrinlarda — qoʻmita) taqdim etadi.
Koʻkrak nishoni bilan taqdirlash boʻyicha taqdimnomalarga nomzod haqida quyidagi hujjatlar bosma va elektron shaklda ilova qilinadi:
maʼlumotnoma-obyektivka;
tavsifnoma (annotatsiya);
pasport nusxasi (16 yoshga toʻlmagan shaxslar uchun tugʻilganlik toʻgʻrisidagi guvohnomaning nusxasi);
fotosurat (3x4 sm oʻlchamli) — 2 dona;
shaxslar va tashkilotlarning soʻnggi uch yil davomida millatlararo doʻstlik va totuvlik muhitini mustahkamlash, milliy madaniy markazlar va doʻstlik jamiyatlari faoliyati samaradorligini oshirish, shuningdek, xorijiy mamlakatlar xalqlari bilan doʻstlik va har taraflama hamkorlikni rivojlantirish borasida amalga oshirgan ishlari boʻyicha maʼlumot.
6. Qoʻmita raisi tomonidan qoʻmita, Oʻzbekiston nodavlat notijorat tashkilotlari milliy assotsiatsiyasi, respublika hududida joylashgan milliy madaniy markazlar va doʻstlik jamiyatlari kabi tashkilotlarning vakillaridan iborat Oʻzbekiston Respublikasi Millatlararo munosabatlar va xorijdagi vatandoshlar masalalari boʻyicha qoʻmitasining koʻkrak nishoni bilan taqdirlashga oid taqdimnomalarni koʻrib chiqish boʻyicha komissiyasi (keyingi oʻrinlarda — komissiya) tashkil etiladi.
Komissiya yigʻilishida nomzodlar boʻyicha hujjatlar oʻrganilib, har yili 1-iyulga qadar eng munosib nomzodlar boʻyicha yakuniy xulosa qabul qilinadi.
7. Komissiyaning asosiy vazifasi mukofotga nomzodlarni tanlashda yuzaki yondashuvlarga yoʻl qoʻymasdan, adolat va xolislik mezonlariga koʻra komissiya yigʻilishlarining haqiqiy muhokamalar asosida oʻtkazilishini taʼminlagan holda mukofotga nomzodlar boʻyicha hujjatlarni Nizomda belgilangan muddatlarda sifatli va toʻliq tayyorlab, taqdim etishdan iborat.
Komissiya tomonidan nomzodlarni koʻrib chiqishda quyidagilar inobatga olinadi:
nomzodlarning mamlakatimizda millatlararo totuvlik, bagʻrikenglik va hamjihatlikni taʼminlash, shuningdek aholi oʻrtasida millatlararo doʻstlik va totuvlik muhitini mustahkamlash maqsadida amalga oshirgan faoliyati;
milliy madaniy markazlar va doʻstlik jamiyatlari faoliyati samaradorligini oshirishdagi ishtiroki;
xorijiy mamlakatlar xalqlari bilan doʻstlik va har taraflama hamkorlikni rivojlantirish borasidagi faoliyati;
jamiyatda millatlararo totuvlik, bagʻrikenglik va hamjihatlik muhitini shakllantirishni targʻib qilish boʻyicha turli innovatsion samarali usullarning ishlab chiqilganligi.
8. Qoʻmita raisi oʻz tashabbusiga asosan Oʻzbekiston Respublikasi Tashqi ishlar vazirligi bilan kelishilgan holda qoʻmitaning xorijlik hamkorlari, chet eldagi turdosh tashkilotlar, xorijiy mamlakatlarning Oʻzbekistondagi elchixonalari va xalqaro tashkilotlar vakolatxonalari vakillarini millatlararo doʻstlik va totuvlik muhitini mustahkamlashga qoʻshgan munosib hissasi uchun koʻkrak nishoni bilan taqdirlashi mumkin.
9. Qoʻmita raisining koʻkrak nishoni bilan taqdirlash toʻgʻrisidagi buyrugʻi har yili 20-iyulga qadar chiqariladi.
3-bob. Koʻkrak nishoni bilan taqdirlash
10. Koʻkrak nishoni har yili 30-iyul — Xalqlar doʻstligi kuni arafasida qoʻmita raisi (yoki uning topshirigʻiga muvofiq boshqa masʼul shaxslar) tomonidan tantanali vaziyatda topshiriladi.
11. Koʻkrak nishoni bilan taqdirlanganlarga bazaviy hisoblash miqdorining toʻrt baravari miqdorida bir yoʻla toʻlanadigan pul mukofoti beriladi.
Bir yoʻla toʻlanadigan pul mukofoti qoʻmitaga ajratiladigan Oʻzbekiston Respublikasining Davlat budjeti mablagʻlari hisobidan toʻlanadi.
12. Koʻkrak nishoni bilan taqdirlanganlar roʻyxati qoʻmitaning Internet jahon axborot tarmogʻidagi rasmiy veb-saytida va boshqa ommaviy axborot vositalarida eʼlon qilinadi.
13. Bir shaxs koʻkrak nishoni bilan bir marta mukofotlanadi.
14. Koʻkrak nishoni davlat mukofotlaridan keyin koʻkrakning chap tomoniga taqiladi.
4-bob. Yakunlovchi qoidalar
15. Qoʻmita ushbu Nizomga muvofiq koʻkrak nishoniga tavsiya etilgan nomzodlar hujjatlarining xolis koʻrib chiqilishi uchun bevosita masʼuldir.
16. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.
“Xalqlar doʻstligi” koʻkrak nishoni toʻgʻrisidagi nizomga ILOVA
“Xalqlar doʻstligi” koʻkrak nishoniga nomzodlarni taqdim etish va ularni oʻrganish
Bosqichlar Subyektlar Tadbirlar Bajarish muddatlari 1-bosqich Hududiy millatlararo munosabatlar sohasidagi davlat va nodavlat tashkilotlari, milliy madaniy markazlar va doʻstlik jamiyatlari. Koʻkrak nishoni bilan taqdirlash boʻyicha takliflarni Qoraqalpogʻiston Respublikasi Joʻqorgʻi Kengesi, tegishli mahalliy hokimliklar bilan kelishadi. Kelishilgan nomzodlarni yuqori turuvchi respublika organiga taqdim etadi. Har yili 1-mayga qadar 2-bosqich Respublika darajasidagi davlat va nodavlat tashkilotlari, milliy madaniy markazlar va doʻstlik jamiyatlari Takliflarni belgilangan tartibda oʻrganib chiqadi hamda koʻkrak nishoni bilan taqdirlash boʻyicha taqdimnomalarni Oʻzbekiston Respublikasi Millatlararo munosabatlar va xorijdagi vatandoshlar masalalari boʻyicha qoʻmitasiga taqdim etadi. Har yili 1-iyunga qadar 3-bosqich Oʻzbekiston Respublikasi Millatlararo munosabatlar va xorijdagi vatandoshlar masalalari boʻyicha qoʻmitasi Oʻzbekiston nodavlat notijorat tashkilotlari milliy assotsiatsiyasi, respublika hududida joylashgan milliy madaniy markazlar va doʻstlik jamiyatlari kabi tashkilotlarning vakillaridan iborat koʻkrak nishoni bilan taqdirlashga oid taqdimnomalarni koʻrib chiqish boʻyicha komissiyani tashkil etadi. Komissiya yigʻilishida nomzodlar boʻyicha hujjatlar oʻrganib, eng munosib nomzodlar boʻyicha yakuniy xulosa qabul qiladi. Har yili 1-iyulga qadar 4-bosqich Oʻzbekiston Respublikasi Millatlararo munosabatlar va xorijdagi vatandoshlar masalalari boʻyicha qoʻmitasi Koʻkrak nishoni bilan taqdirlash toʻgʻrisida buyruq chiqaradi Har yili 20-iyulga qadar 5-bosqich Oʻzbekiston Respublikasi Millatlararo munosabatlar va xorijdagi vatandoshlar masalalari boʻyicha qoʻmitasi raisi (yoki uning topshirigʻiga muvofiq boshqa masʼul shaxslar) “Xalqlar doʻstligi” koʻkrak nishoni bilan taqdirlaydi. Har yili 30-iyul — Xalqlar doʻstligi kuni arafasida
Vazirlar Mahkamasining 2021-yil 1-iyundagi 335-son qaroriga 2-ILOVA
“Xalqlar doʻstligi” koʻkrak nishonining
“Xalqlar doʻstligi” koʻkrak nishoni (keyingi oʻrinlarda — koʻkrak nishoni) diametri 34 millimetrli doira shaklida boʻlib, mis qotishmasidan tayyorlanadi.
Koʻkrak nishonining old tomoni pastki qismi markazida koʻtarilayotgan quyosh nurlari hamda hilpirab turgan Oʻzbekiston Respublikasining rangli bayrogʻi fonida zarhallangan Oʻzbekiston Respublikasi xaritasi hamda meridianlari va parallellarini aks ettirgan koʻk rangdagi Yer shari tasviri joylashgan. Uning yuqori qismida doʻstlik va erksevarlik ramzi boʻlgan Humo qushi tilla rangda tasvirlangan.
Koʻkrak nishoni aylanasi boʻylab zarhal hoshiyali oq emal fonidagi doira bilan oʻralgan. Aylananing yuqori qismida harflarining balandligi 3 millimetr boʻlgan “XALQLAR DOʻSTLIGI” soʻzlari yozilgan. Uning pastki chetlari boʻylab faxr-iftixor va sharaf maʼnolarini ifoda etuvchi ikkita dafna yaprogʻi joylashtirilgan.
Koʻkrak nishonining orqa tomonida Oʻzbekiston Respublikasining Davlat gerbi tasvirlangan.
Koʻkrak nishonining qalinligi — 2,5 millimetr. Tasvirlar va yozuvlar qabariqdir.
Koʻkrak nishoni old va orqa tomonlarining chetlari qavariq doira bilan oʻralgan.
Koʻkrak nishoni halqa va ilmoqchalar yordamida pastki qismida dafna barglari tasvirlangan toʻgʻri toʻrtburchak shaklidagi qadagʻichga ulangan. Qadagʻichning eni — 26 millimetr, boʻyi — 24 millimetrdan iborat.
Qadagʻich eni 22 millimetrli shoyi lenta bilan qoplangan boʻlib, har birining eni 4,4 millimetrli 5 xil rangdagi yoʻllardan iborat. Lentaning markazida oq rang, uning oʻng tomonida yashil va sariq ranglar, chap tomonida esa moviy va toʻq yashil ranglardagi yoʻllar ifodalangan.
Qadagʻichning orqa tomoniga koʻkrak nishonini kiyimga taqib qoʻyish uchun toʻgʻnogʻich koʻrinishidagi moslama oʻrnatilgan.
“Xalqlar doʻstligi” koʻkrak nishoni
Vazirlar Mahkamasining 2021-yil 1-iyundagi 335-son qaroriga 3-ILOVA
“Xalqlar doʻstligi” koʻkrak nishoni guvohnomasining
“Xalqlar doʻstligi” koʻkrak nishoni guvohnomasi (keyingi oʻrinlarda — guvohnoma) 160 x 110 millimetr oʻlchamdagi kitobcha shaklida boʻlib, 240 g/kv.m. qalinlikdagi ofset qogʻozdan tayyorlanadi.
Guvohnomaning tashqi tomoni (birinchi va toʻrtinchi betlari) koʻk rangda boʻlib, plyonka bilan qoplangan.
Guvohnomaning birinchi beti eni 7,5 millimetrli, ichki burchaklari aylana shaklida boʻlgan toʻq koʻk rangli hoshiya bilan oʻralgan.
Guvohnomaning yuqori chekkasidan (birinchi beti) 35 millimetr pastda, markazda oraligʻi 3,5 millimetrli ikki satrdan iborat matn joylashgan. Birinchi satrda “XALQLAR”, ikkinchi satrda “DOʻSTLIGI” (katta harflarda, “Times new Roman Bolt” shrifti, 14 kegl), uchinchi satrda “koʻkrak nishoni” (“Times new Roman Bolt” shrifti, 14 kegl) soʻzlari yozilgan. Undan 6 millimetr pastda “GUVONNOMASI” (katta harflarda, “Times new Roman Bolt” shrifti, 17 kegl) soʻzi yozilgan.
Yozuvlar toʻq koʻk rangda aks ettirilgan.
Guvohnomaning ichki tomoni (ikkinchi va uchinchi betlari) “Tangir” tasviri tushirilgan och havo rangda boʻlib, ofset usulida chop etilgan.
Ichki tomonining chap qismida (ikkinchi beti), markazda koʻkrak nishonining asliga teng oʻlchamdagi rangli tasviri aks ettirilgan.
Guvohnomaning ichki oʻng tomoni (uchinchi beti) yuqori chekkasidan 8 millimetr pastda, markazda “GUVONNOMA” (katta harflarda, “Times new Roman Bolt” shrifti, 10 kegl) soʻzi hamda guvohnomaning tartib raqami uchun “№” belgisi va 15 millimetrli chiziq joylashgan.
“GUVONNOMA” soʻzidan 11 millimetr pastda mukofotlangan shaxsning familiyasi, ismi va otasining ismini qayd etish uchun oraligʻi 8 millimetrli uchta chiziq tortilgan.
Pastki chiziqdan 4 millimetr quyida, markazda oraligʻi 2 millimetrli ikki satrdan iborat matn joylashgan. Birinchi satrda “Oʻzbekiston Respublikasi Millatlararo munosabatlar va”, ikkinchi satrda “xorijdagi vatandoshlar masalalari boʻyicha qoʻmitasi raisining” (“Times new Roman Bolt” shrifti, 10 kegl) soʻzlari yozilgan;
Undan 5 millimetr pastda oraligʻi 4 millimetr boʻlgan ikki satrdan iborat matn joylashgan. Birinchi satrda “20__ y. “___” ___________dagi”, ikkinchi satrda “____-sonli buyrugʻiga asosan” (“Times new Roman Bolt” shrifti, 10 kegl) soʻzlari yozilgan.
Undan 5 millimetr pastda, markazda oraligʻi 5 millimetrli uch satrdan iborat matn joylashgan. Birinchi satrda “XALQLAR”, ikkinchi satrda “DOʻSTLIGI” (katta harflarda, “Times new Roman Bolt” shrifti, 12 kegl), uchinchi satrda “koʻkrak nishoni bilan mukofotlandi” (“Times new Roman Bolt” shrifti, 10 kegl) soʻzlari yozilgan.
Soʻnggi soʻzlardan 9 millimetr pastda, chap tomonda “Qoʻmita raisi” (“Times new Roman Bolt” shrifti, 10 kegl) soʻzlari yozilgan.
“Xalqlar doʻstligi” koʻkrak nishoni
GUVOHNOMASI
Oʻzbekiston Respublikasining Bosh vaziri A. ARIPOV
Toshkent sh.,
2021-yil 1-iyun,
335-son