UzbekAI

Ўзбекистон Республикаси Вазирлар Маҳкамасининг

қарори

ТУЗИЛМАСИ

Республика Маънавият ва маърифат маркази ҳузуридаги Ижтимоий-маънавий тадқиқотлар институти фаолиятини ташкил этиш тўғрисида

Ўзбекистон Республикаси Президентининг «Маънавий-маърифий ишлар тизимини тубдан такомиллаштириш чора-тадбирлари тўғрисида» 2021 йил 26 мартдаги ПҚ-5040-сон қарори ижросини таъминлаш мақсадида Вазирлар Маҳкамаси қарор қилади:

1. Республика Маънавият ва маърифат маркази (кейинги ўринларда — Марказ) ҳузурида Ижтимоий-маънавий тадқиқотлар институти ташкил этилганлиги маълумот учун қабул қилинсин.

Белгилансинки, Ижтимоий-маънавий тадқиқотлар институти (кейинги ўринларда — Институт) «Миллий тикланишдан — миллий юксалиш сари» деган ғоя асосида мамлакатимизда маънавий-маърифий ишларни янги босқичга кўтариш, аҳоли, айниқса, ёшларни Ватанга муҳаббат, маънавий меросимиз, миллий адабиётимизга ҳурмат руҳида тарбиялаш ғоясини ҳаётга татбиқ этиш ишларини илмий-методик ва ахборот-таҳлилий жиҳатдан таъминлаш фаолиятини амалга оширувчи ихтисослаштирилган илмий-тадқиқот муассасаси ҳисобланади.

2. Қуйидагилар Институтнинг асосий вазифалари этиб белгилансин:

маънавий-маърифий ишлар ҳолати, миллий ғоянинг мамлакат тараққиётидаги ўрни, жамият барқарорлигига салбий таъсир этувчи таҳдидлар ва уларни бартараф этиш юзасидан илмий-амалий изланишлар олиб бориш;

мамлакатдаги ижтимоий-маънавий муҳит ҳолатини тадқиқ қилиш, баҳолаш ва яхшилаш бўйича илмий-амалий таклифлар тайёрлаш;

маънавий-маърифий тарғибот ишларини амалга оширишнинг самарали ва таъсирчан замонавий тарғибот технология ҳамда усулларини ишлаб чиқиш;

аҳолининг ғоявий ва ахборот хуружларига қарши мафкуравий иммунитетини кучайтириш бўйича тадқиқотлар ўтказиш, Интернет тармоғидан фойдаланиш маданиятини ошириш;

эл-юрт тақдирига лоқайдлик, маҳаллийчилик, уруғ-аймоқчилик, коррупция, оилавий қадриятларга беписандлик ва ёшлар тарбиясига масъулиятсизлик каби иллатларга барҳам беришга қаратилган комплекс чора-тадбирларни ишлаб чиқиш;

Узлуксиз маънавий тарбия концепцияси асосида тарбиявий ишлар самарадорлигини баҳолашнинг илмий асосланган индикаторлари ва кўрсаткичларини жорий қилиш;

вазирликлар ва идораларда, жумладан, таълим тизими, маҳалла ва ҳудудлар бўйича маънавий-маърифий ҳамда тарбиявий ишлар самарадорлигини оширишга қаратилган илмий асосланган таклиф ва тавсиялар ишлаб чиқиш;

соҳани илмий асосда ривожлантиришга қаратилган фундаментал, амалий ва инновацион тадқиқотларни амалга ошириш, уларнинг натижаларини амалиётга татбиқ қилиш, илмий экспертизани йўлга қўйиш;

дунёнинг мафкуравий манзарасини ўрганиш, таҳлил қилиш, маънавий-маърифий ва тарбиявий ишларни ташкил этишда миллий ва умуминсоний қадриятларга мос хорижий тажрибани амалиётга жорий этиш;

маънавий-маърифий соҳага масъул ходимларнинг малакасини ошириш.

3. Белгилансинки:

Институт директори Марказ раҳбари томонидан лавозимга тайинланади ва лавозимидан озод қилинади;

Институт ходимларига Фанлар академияси илмий-тадқиқот муассасаларининг тегишли лавозимлари учун белгиланган меҳнатга ҳақ тўлаш ва моддий рағбатлантириш шартлари қўлланилади;

Институт «Маънавият тарғиботчиси» таълим муассасасининг барча ҳуқуқ ва мажбуриятлари, шунингдек, тузилган шартномалари бўйича ҳуқуқий вориси ҳисобланади.

4. Республика Маънавият ва маърифат маркази ҳузуридаги Ижтимоий-маънавий тадқиқотлар институтининг тузилмаси иловага мувофиқ тасдиқлансин.

Марказ раҳбарига, зарур ҳолларда, Институт тузилмасига бошқарув ходимларининг умумий чекланган сони ва меҳнатга ҳақ тўлаш фонди доирасида ўзгартиришлар киритиш ҳуқуқи берилсин.

5. Қуйидагилар Институт фаолиятини молиялаштириш манбалари этиб белгилансин:

Давлат бюджетидан ажратиладиган тегишли маблағлар;

Инновацион ривожланиш вазирлиги томонидан илмий фаолиятга оид давлат дастурлари доирасида ўтказиладиган танловлар натижаларига кўра ажратиладиган Давлат бюджети маблағлари;

жисмоний ва юридик шахсларнинг ҳомийлик хайриялари;

халқаро молия институтлари ва бошқа хорижий ташкилотларнинг грантлари;

қонунчилик ҳужжатлари билан тақиқланмаган бошқа манбалар.

6. Белгилаб қўйилсинки, Институтни бюджет маблағлари ҳисобидан сақлаш харажатлари 2021 йилда Марказнинг Маънавият ва ижодни қўллаб-қувватлаш мақсадли жамғармасидан Марказнинг ҳудудий бўлимларига жойларда маънавий-маърифий соҳаларни ривожлантириш учун ажратилган маблағлари ҳисобидан қопланади, 2022 йилдан бошлаб эса республика бюджети параметрларида назарда тутилади.

7. Марказ ва «Маънавият тарғиботчиси» таълим муассасасининг ушбу таълим муассасасига тегишли бўлган мол-мулкни, шу жумладан, транспорт воситасини белгиланган тартибда Институтга беғараз бериш тўғрисидаги таклифига розилик берилсин.

8. Марказ:

а) икки ой муддатда:

Институт уставини ишлаб чиқсин, тасдиқласин ва белгиланган тартибда давлат рўйхатидан ўтказилишини таъминласин;

Институтни юқори илмий салоҳиятли, малакали мутахассислар билан тўлдириш чораларини кўрсин;

давлат органлари ва ташкилотларининг маънавий-маърифий ишлар бўйича масъул ходимларининг тўлов шартномаси асосида Институтда малакасини ошириш тартибини жорий этиш юзасидан Вазирлар Маҳкамасига таклиф киритсин;

б) уч ой муддатда Вазирлар Маҳкамаси ҳузуридаги Олий аттестация комиссияси билан биргаликда қонунчилик ҳужжатларида белгиланган тартибда Институтда тегишли йўналиш бўйича ихтисослаштирилган илмий кенгаш фаолиятини ташкил этсин.

9. Ахборот технологиялари ва коммуникацияларини ривожлантириш вазирлиги белгиланган тартибда Институтни зарур телекоммуникация хизматлари билан, жумладан, ҳукумат алоқаси ҳамда Интернет тармоғига уланишини таъминласин.

10. Республика Маънавият ва маърифат маркази, Халқ таълими вазирлиги ҳамда Тошкент шаҳар ҳокимлигининг Тошкент шаҳри, Яккасарой тумани, Бобур кўчаси, 9-уй манзилидаги Халқ таълими вазирлигига тегишли бўлган бинонинг 3-қаватига Марказ ҳузуридаги Институт, «Маърифат» тарғиботчилар жамияти, «Маънавий ҳаёт» ва «Тафаккур» журналлари таҳририятларини текин фойдаланиш ҳуқуқи асосида жойлаштириш тўғрисидаги таклифи маъқуллансин.

Халқ таълими вазирлиги, Тошкент шаҳар ҳокимлиги объектни бир ой муддатда белгиланган тартибда топширсин, Марказ қабул қилиб олсин ҳамда объектни Маънавият ва ижодни қўллаб-қувватлаш мақсадли жамғармаси маблағлари ҳисобидан мукаммал таъмирлаш, сақлаш ва ундан мақсадли фойдаланиш бўйича зарур чора-тадбирларни кўрсин.

11. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари Б.А. Мусаев зиммасига юклансин.

Вазирлар Маҳкамасининг 2021 йил 3 июндаги 340-сон қарорига ИЛОВА

Республика Маънавият ва маърифат маркази ҳузуридаги Ижтимоий-маънавий тадқиқотлар институтининг

Директор Директор ўринбосари Илмий котиб Илмий тадқиқотларни ташкил этиш ва амалга ошириш бўлими 5 Ижтимоий-маънавий муҳитни таҳлил қилиш, баҳолаш ва замонавий тарғибот технологияларини ишлаб чиқиш бўлими 2 Кадрлар бўйича инспектор 1 Бухгалтер 1 Миллий ғоя ва маънавий-маърифий тарғибот ишларини методик таъминлаш бўлими 3 Малака ошириш бўлими 2 Юрисконсульт 1 Илмий экспертиза бўлими 2

Ўзбекистон Республикасининг Бош вазири А. АРИПОВ

Тошкент ш.,

2021 йил 3 июнь,

340-сон

(Қонунчилик маълумотлари миллий базаси, 04.06.2021 й., 09/21/340/0517-сон)

lex.uz

Oʻzbekiston Respublikasi Vazirlar Mahkamasining

qarori

TUZILMASI

Respublika Maʼnaviyat va maʼrifat markazi huzuridagi Ijtimoiy-maʼnaviy tadqiqotlar instituti faoliyatini tashkil etish toʻgʻrisida

Oʻzbekiston Respublikasi Prezidentining “Maʼnaviy-maʼrifiy ishlar tizimini tubdan takomillashtirish chora-tadbirlari toʻgʻrisida” 2021-yil 26-martdagi PQ-5040-son qarori ijrosini taʼminlash maqsadida Vazirlar Mahkamasi qaror qiladi:

1. Respublika Maʼnaviyat va maʼrifat markazi (keyingi oʻrinlarda — Markaz) huzurida Ijtimoiy-maʼnaviy tadqiqotlar instituti tashkil etilganligi maʼlumot uchun qabul qilinsin.

Belgilansinki, Ijtimoiy-maʼnaviy tadqiqotlar instituti (keyingi oʻrinlarda — Institut) “Milliy tiklanishdan — milliy yuksalish sari” degan gʻoya asosida mamlakatimizda maʼnaviy-maʼrifiy ishlarni yangi bosqichga koʻtarish, aholi, ayniqsa, yoshlarni Vatanga muhabbat, maʼnaviy merosimiz, milliy adabiyotimizga hurmat ruhida tarbiyalash gʻoyasini hayotga tatbiq etish ishlarini ilmiy-metodik va axborot-tahliliy jihatdan taʼminlash faoliyatini amalga oshiruvchi ixtisoslashtirilgan ilmiy-tadqiqot muassasasi hisoblanadi.

2. Quyidagilar Institutning asosiy vazifalari etib belgilansin:

maʼnaviy-maʼrifiy ishlar holati, milliy gʻoyaning mamlakat taraqqiyotidagi oʻrni, jamiyat barqarorligiga salbiy taʼsir etuvchi tahdidlar va ularni bartaraf etish yuzasidan ilmiy-amaliy izlanishlar olib borish;

mamlakatdagi ijtimoiy-maʼnaviy muhit holatini tadqiq qilish, baholash va yaxshilash boʻyicha ilmiy-amaliy takliflar tayyorlash;

maʼnaviy-maʼrifiy targʻibot ishlarini amalga oshirishning samarali va taʼsirchan zamonaviy targʻibot texnologiya hamda usullarini ishlab chiqish;

aholining gʻoyaviy va axborot xurujlariga qarshi mafkuraviy immunitetini kuchaytirish boʻyicha tadqiqotlar oʻtkazish, Internet tarmogʻidan foydalanish madaniyatini oshirish;

el-yurt taqdiriga loqaydlik, mahalliychilik, urugʻ-aymoqchilik, korrupsiya, oilaviy qadriyatlarga bepisandlik va yoshlar tarbiyasiga masʼuliyatsizlik kabi illatlarga barham berishga qaratilgan kompleks chora-tadbirlarni ishlab chiqish;

Uzluksiz maʼnaviy tarbiya konsepsiyasi asosida tarbiyaviy ishlar samaradorligini baholashning ilmiy asoslangan indikatorlari va koʻrsatkichlarini joriy qilish;

vazirliklar va idoralarda, jumladan, taʼlim tizimi, mahalla va hududlar boʻyicha maʼnaviy-maʼrifiy hamda tarbiyaviy ishlar samaradorligini oshirishga qaratilgan ilmiy asoslangan taklif va tavsiyalar ishlab chiqish;

sohani ilmiy asosda rivojlantirishga qaratilgan fundamental, amaliy va innovatsion tadqiqotlarni amalga oshirish, ularning natijalarini amaliyotga tatbiq qilish, ilmiy ekspertizani yoʻlga qoʻyish;

dunyoning mafkuraviy manzarasini oʻrganish, tahlil qilish, maʼnaviy-maʼrifiy va tarbiyaviy ishlarni tashkil etishda milliy va umuminsoniy qadriyatlarga mos xorijiy tajribani amaliyotga joriy etish;

maʼnaviy-maʼrifiy sohaga masʼul xodimlarning malakasini oshirish.

3. Belgilansinki:

Institut direktori Markaz rahbari tomonidan lavozimga tayinlanadi va lavozimidan ozod qilinadi;

Institut xodimlariga Fanlar akademiyasi ilmiy-tadqiqot muassasalarining tegishli lavozimlari uchun belgilangan mehnatga haq toʻlash va moddiy ragʻbatlantirish shartlari qoʻllaniladi;

Institut “Maʼnaviyat targʻibotchisi” taʼlim muassasasining barcha huquq va majburiyatlari, shuningdek, tuzilgan shartnomalari boʻyicha huquqiy vorisi hisoblanadi.

4. Respublika Maʼnaviyat va maʼrifat markazi huzuridagi Ijtimoiy-maʼnaviy tadqiqotlar institutining tuzilmasi ilovaga muvofiq tasdiqlansin.

Markaz rahbariga, zarur hollarda, Institut tuzilmasiga boshqaruv xodimlarining umumiy cheklangan soni va mehnatga haq toʻlash fondi doirasida oʻzgartirishlar kiritish huquqi berilsin.

5. Quyidagilar Institut faoliyatini moliyalashtirish manbalari etib belgilansin:

Davlat budjetidan ajratiladigan tegishli mablagʻlar;

Innovatsion rivojlanish vazirligi tomonidan ilmiy faoliyatga oid davlat dasturlari doirasida oʻtkaziladigan tanlovlar natijalariga koʻra ajratiladigan Davlat budjeti mablagʻlari;

jismoniy va yuridik shaxslarning homiylik xayriyalari;

xalqaro moliya institutlari va boshqa xorijiy tashkilotlarning grantlari;

qonunchilik hujjatlari bilan taqiqlanmagan boshqa manbalar.

6. Belgilab qoʻyilsinki, Institutni budjet mablagʻlari hisobidan saqlash xarajatlari 2021-yilda Markazning Maʼnaviyat va ijodni qoʻllab-quvvatlash maqsadli jamgʻarmasidan Markazning hududiy boʻlimlariga joylarda maʼnaviy-maʼrifiy sohalarni rivojlantirish uchun ajratilgan mablagʻlari hisobidan qoplanadi, 2022-yildan boshlab esa respublika budjeti parametrlarida nazarda tutiladi.

7. Markaz va “Maʼnaviyat targʻibotchisi” taʼlim muassasasining ushbu taʼlim muassasasiga tegishli boʻlgan mol-mulkni, shu jumladan, transport vositasini belgilangan tartibda Institutga begʻaraz berish toʻgʻrisidagi taklifiga rozilik berilsin.

8. Markaz:

a) ikki oy muddatda:

Institut ustavini ishlab chiqsin, tasdiqlasin va belgilangan tartibda davlat roʻyxatidan oʻtkazilishini taʼminlasin;

Institutni yuqori ilmiy salohiyatli, malakali mutaxassislar bilan toʻldirish choralarini koʻrsin;

davlat organlari va tashkilotlarining maʼnaviy-maʼrifiy ishlar boʻyicha masʼul xodimlarining toʻlov shartnomasi asosida Institutda malakasini oshirish tartibini joriy etish yuzasidan Vazirlar Mahkamasiga taklif kiritsin;

b) uch oy muddatda Vazirlar Mahkamasi huzuridagi Oliy attestatsiya komissiyasi bilan birgalikda qonunchilik hujjatlarida belgilangan tartibda Institutda tegishli yoʻnalish boʻyicha ixtisoslashtirilgan ilmiy kengash faoliyatini tashkil etsin.

9. Axborot texnologiyalari va kommunikatsiyalarini rivojlantirish vazirligi belgilangan tartibda Institutni zarur telekommunikatsiya xizmatlari bilan, jumladan, hukumat aloqasi hamda Internet tarmogʻiga ulanishini taʼminlasin.

10. Respublika Maʼnaviyat va maʼrifat markazi, Xalq taʼlimi vazirligi hamda Toshkent shahar hokimligining Toshkent shahri, Yakkasaroy tumani, Bobur koʻchasi, 9-uy manzilidagi Xalq taʼlimi vazirligiga tegishli boʻlgan binoning 3-qavatiga Markaz huzuridagi Institut, “Maʼrifat” targʻibotchilar jamiyati, “Maʼnaviy hayot” va “Tafakkur” jurnallari tahririyatlarini tekin foydalanish huquqi asosida joylashtirish toʻgʻrisidagi taklifi maʼqullansin.

Xalq taʼlimi vazirligi, Toshkent shahar hokimligi obyektni bir oy muddatda belgilangan tartibda topshirsin, Markaz qabul qilib olsin hamda obyektni Maʼnaviyat va ijodni qoʻllab-quvvatlash maqsadli jamgʻarmasi mablagʻlari hisobidan mukammal taʼmirlash, saqlash va undan maqsadli foydalanish boʻyicha zarur chora-tadbirlarni koʻrsin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A. Musayev zimmasiga yuklansin.

Vazirlar Mahkamasining 2021-yil 3-iyundagi 340-son qaroriga ILOVA

Respublika Maʼnaviyat va maʼrifat markazi huzuridagi Ijtimoiy-maʼnaviy tadqiqotlar institutining

Direktor Direktor oʻrinbosari Ilmiy kotib Ilmiy tadqiqotlarni tashkil etish va amalga oshirish boʻlimi 5 Ijtimoiy-maʼnaviy muhitni tahlil qilish, baholash va zamonaviy targʻibot texnologiyalarini ishlab chiqish boʻlimi 2 Kadrlar boʻyicha inspektor 1 Buxgalter 1 Milliy gʻoya va maʼnaviy-maʼrifiy targʻibot ishlarini metodik taʼminlash boʻlimi 3 Malaka oshirish boʻlimi 2 Yuriskonsult 1 Ilmiy ekspertiza boʻlimi 2

Oʻzbekiston Respublikasining Bosh vaziri A. ARIPOV

Toshkent sh.,

2021-yil 3-iyun,

340-son

(Qonunchilik maʼlumotlari milliy bazasi, 04.06.2021-y., 09/21/340/0517-son)

lex.uz