📅 2021-yil 3-iyun · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 3 июнь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 3 июня 2021 г. · Постановления Кабинета Министров
Официальный текст. Официальный документ. Редакционные примечания не включены.
📅 3 June 2021 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
РЎЙХАТИ
Ўзбекистон Республикаси олий таълим муассасалари талабаларига академик таътил бериш тўғрисидаги низомни тасдиқлаш ҳақида
Ўзбекистон Республикаси Президентининг «2017 — 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини «Ёшларни қўллаб-қувватлаш ва аҳоли саломатлигини мустаҳкамлаш йили»да амалга оширишга оид давлат дастури тўғрисида» 2021 йил 3 февралдаги ПФ-6155-сон Фармонида белгиланган вазифалар ижросини таъминлаш ҳамда республика олий таълим муассасаларининг ижтимоий муҳофазага муҳтож талабаларини ҳимоя қилиш, уларга узлуксиз мустақил таълим олиш учун имконият яратиш мақсадида Вазирлар Маҳкамаси қарор қилади:
1. Ўзбекистон Республикаси Президентининг «2017 — 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини «Ёшларни қўллаб-қувватлаш ва аҳоли саломатлигини мустаҳкамлаш йили»да амалга оширишга оид давлат дастури тўғрисида» 2021 йил 3 февралдаги ПФ-6155-сон Фармонига мувофиқ, академик таътил беришнинг қуйидагиларни назарда тутувчи янгича тартиби ўрнатилганлиги маълумот учун қабул қилинсин:
академик таътил олишни истаган талабалар ўз ихтиёрига кўра академик таътил муддатига таълимнинг сиртқи ва масофавий шаклига ўтказилиб (агар олий таълим муассасасида бундай таълимнинг шакллари мавжуд бўлса), уларга узлуксиз мустақил таълим олиш имконияти яратилади;
оиласининг бетоб аъзосини парвариш қилиш сабабли анъанавий шаклдаги таълимни давом эттириш имконияти бўлмаган талабаларга ҳам академик таътилни олиш ҳуқуқи берилади;
талабаларга ўқиш давомида академик таътил берилиши бўйича миқдорий чекловлар бекор қилинади;
академик таътилдан қайтган талабаларни илгари ўзлаштирилган фанлар бўйича қайтадан ўқитиш амалиёти бекор қилинади.
2. Олий таълим муассасалари талабаларига академик таътил бериш, академик таътил муддатлари ҳамда академик таътилдан сўнг ўқишни давом эттириш тартибини назарда тутувчи Ўзбекистон Республикаси олий таълим муассасалари талабаларига академик таътил бериш тўғрисидаги низом 1-иловага мувофиқ тасдиқлансин.
3. Белгилансинки:
академик таътил бериш талабани олий таълим муассасасидан четлаштириш ҳисобланмайди;
талабанинг академик таътил олиш ҳақидаги мурожаати бир ҳафталик муддатда кўриб чиқилади ҳамда олий таълим муассасаси ректори (директори)нинг буйруғи билан расмийлаштирилади;
академик таътил бериладиган талабалар аризасига (ихтиёрига) кўра олий таълим муассасаси ректори (директори)нинг буйруғига мувофиқ, унинг ўқиши академик таътил муддатига таълимнинг сиртқи ёки масофавий ёки экстернат таълим шаклига ўтказилиши мумкин;
талаба академик таътилдан белгиланган муддат тамом бўлгандан сўнг ўқишга қайтиш бўйича олий таълим муассасасининг ректори (директори) номига ариза билан мурожаат қилган тақдирда унинг аризасини асоссиз равишда рад этишга йўл қўйилмайди.
5. Ўзбекистон Республикаси Олий ва ўрта махсус таълим вазирлиги, Соғлиқни сақлаш вазирлиги манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
6. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари Б.А. Мусаев, Ўзбекистон Республикаси олий ва ўрта махсус таълим вазири А.Х. Тошкулов ҳамда Ўзбекистон Республикаси соғлиқни сақлаш вазири А.М. Хаджибаев зиммасига юклансин.
Вазирлар Маҳкамасининг 2021 йил 3 июндаги 344-сон қарорига 1-ИЛОВА
Ўзбекистон Республикаси олий таълим муассасалари талабаларига академик таътил бериш тўғрисида
1-боб. Умумий қоидалар
1. Мазкур Низом Ўзбекистон Республикаси олий таълим муассасалари талабаларига академик таътил бериш ва академик таътилдан сўнг уларнинг ўқишини давом эттириш тартибини белгилайди.
2. Ўзбекистон Республикаси олий таълим муассасалари талабаларига академик таътил қуйидаги ҳолларда берилиши мумкин:
ҳарбий хизматни ўташ учун;
саломатлигини тиклаш учун;
ҳомиладорлик ва туғиш учун;
болаларни парвариш қилиш учун;
оиласининг бетоб аъзосини (отаси, онаси ёки уларнинг ўрнини босувчи шахслар, турмуш ўртоғи, фарзанди) парвариш қилиш учун.
3. Академик таътил ўқув йилининг ҳар қандай қисмида, қуйидаги муддатларга берилади:
ҳарбий хизматни ўташ учун — қонунчилик ҳужжатларида белгиланган ҳарбий хизматни ўташ муддатига;
ҳомиладорлик ва туғиш, шунингдек, болаларни парвариш қилиш учун — қонунчилик ҳужжатларида белгиланган ҳомиладорлик ва туғиш, шунингдек, болаларни парвариш қилиш таътиллари муддатига;
саломатлигини тиклаш ҳамда оиласининг бетоб аъзосини парвариш қилиш учун — кейинги йилнинг талаба томонидан тўлиқ ўзлаштирилмаган семестри бошлангунига қадар бўлган муддатга (агар мазкур Низомнинг 11-бандига мувофиқ талаба академик таътил муддатига таълимнинг сиртқи ёки масофавий ёки экстернат таълим шаклига ўтказилса, навбатдаги семестрнинг бошлангунига қадар бўлган муддатга). Бунда, қайд этилган муддатлардан бири талабанинг аризасига мувофиқ олий таълим муассасаси ректори (директори) томонидан белгиланади.
4. Талабага академик таътил берилиши уни олий таълим муассасасидан четлаштириш деб ҳисобланмайди.
5. Талабаларга академик таътил даврида стипендиялар тўланмайди.
2-боб. Академик таътил бериш
6. Академик таътил олиш учун талаба (соғлиғи ҳолатига кўра талаба шахсан мурожаат этиш имкониятига эга бўлмаса, унинг ота-онаси ёки уларнинг ўрнини босувчи шахслар ёки турмуш ўртоғи) томонидан олий таълим муассасаси ректори (директори) номига ариза билан мурожаат қилинади.
7. Академик таътил олишни сўраб мурожаат қилган талабанинг аризасига қуйидаги ҳужжатлар илова қилинади:
ҳарбий хизматни ўташ учун — тегишли туман (шаҳар) мудофаа ишлари органларининг талабани ҳарбий хизматга чақириш ҳақидаги чақирув қоғози;
саломатлигини тиклаш, ҳомиладорлик ва туғиш, шунингдек, болаларни парвариш қилиш учун — талаба доимий тиббий назоратда турган тиббиёт муассасаси хулосаси;
оиласининг бетоб аъзосини парвариш қилиш учун — оиласининг бетоб аъзоси доимий тиббий назоратда турган тиббиёт муассасаси хулосаси.
8. Талаба сурункали касаллиги сабабли бир ойдан ортиқ вақт давомида дарсларда қатнаша олмаса, талаба ёки унинг ота-онаси ёки уларнинг ўрнини босувчи шахслар ёки турмуш ўртоғининг аризасига асосан талабага академик таътил берилиши мумкин. Бунда, академик таътил муддати ўтишининг бошланиши талаба дарсларда қатнаша олмаётган кундан бошлаб ҳисобланади.
9. Талабага саломатлигини тиклаш ҳамда оиласининг бетоб аъзосини парвариш қилиш учун академик таътилнинг берилиши мазкур Низомнинг иловасида келтирилган Олий таълим муассасалари талабаларига тиббий кўрсатмалар бўйича академик таътил беришга оид касалликлар рўйхатига мувофиқ амалга оширилади.
10. Талабанинг академик таътил олиш ҳақидаги мурожаати бир ҳафталик муддатда кўриб чиқилади.
Талабага академик таътил бериш олий таълим муассасаси ректори (директори)нинг буйруғи билан расмийлаштирилади. Ушбу буйруқда академик таътилнинг бошланиш ва тугаш санаси кўрсатилиши шарт.
11. Академик таътил бериладиган талабалар аризасига (ихтиёрига) кўра олий таълим муассасаси ректори (директори)нинг буйруғига мувофиқ, унинг ўқиши академик таътил муддатига таълимнинг сиртқи ёки масофавий ёки экстернат таълим шаклига ўтказилиши мумкин.
Бунда олий таълим муассасасида муайян бакалавриат таълим йўналиши (магистратура мутахассислиги) бўйича сиртқи ёки масофавий таълим шакли мавжуд бўлган тақдирда талабанинг ўқиши аризасига кўра белгиланган муддатга ушбу таълим шаклига ўтказилади.
Талабанинг ўқишини академик таътил муддатига таълимнинг экстернат таълим шаклига ўтказиш қуйидаги тартибда амалга оширилади:
талабалар ўқишининг академик таътил муддатига экстернат таълим шаклига ўтказилиши бакалавриат таълим йўналишларининг (магистратура мутахассисликларининг) хусусиятларини инобатга олган ҳолда амалга оширилади;
академик таътил муддатига ўқишни экстернат таълим шаклига ўтказиш бўйича аризалар 15 кун муддатда олий таълим муассасаси кенгашида кўриб чиқилади ва бакалавриат таълим йўналишининг (магистратура мутахассислигининг) хусусиятларидан келиб чиқиб, талабанинг белгиланган муддатга экстернат таълим шаклида ўқиши мақсадга мувофиқ ёки мақсадга мувофиқ эмаслиги бўйича қарор қабул қилинади;
олий таълим муассасаси кенгашининг қарори беш кун муддатда ариза муаллифига (талабага) маълум қилинади;
олий таълим муассасаси кенгашининг қарорига асосан олий таълим муассасаси ректори (директори)нинг буйруғи билан академик таътил муддатига экстернат таълим шаклида ўқишга рухсат этилган талаба томонидан академик таътилдан қайтгандан сўнг муайян ўқув семестрида (семестрларида) ўқитилган фанлар бўйича бир марталик имтиҳонлар топширилади;
имтиҳонлар олий таълим муассасаси ректори (директори)нинг буйруғига асосан фанлар бўйича ташкил этилган комиссия томонидан ўтказилади;
имтиҳонлар натижаларига кўра барча фанлардан талаба кўрсаткичи белгиланган ўтиш балидан юқори бўлган тақдирда талабага навбатдаги ўқув семестридан (курсдан) ўқишини давом эттиришига рухсат этилади;
имтиҳонлар натижаларига кўра бир ёки ундан кўп фанлардан талаба кўрсаткичи белгиланган ўтиш балидан паст бўлган тақдирда талабанинг ўзлаштирилмаган ўқув семестрининг бошидан ўқишини давом эттириши белгиланади.
Мазкур бандда назарда тутилган тартиб ҳарбий хизматни ўташ учун академик таътил бериш ҳолатига нисбатан татбиқ этилмайди.
12. Саломатлигини тиклаш ёки оиласининг бетоб аъзосини парвариш қилиш учун академик таътилда бўлган талабаларда ҳомиладорлик ва туғиш ҳолатлари юзага келган тақдирда, академик таътилнинг муддати ҳомиладорлик ва туғиш учун мазкур Низомда белгиланган академик таътилнинг муддатига узайтирилади.
Талабанинг саломатлиги ёки оиласининг бетоб аъзоси саломатлиги тикланмаганда талабанинг аризасига кўра олий таълим муассасаси ректори (директори)нинг буйруғи асосида академик таътил муддати ушбу тоифадаги ҳолатлар учун белгиланган муддатларга узайтирилади.
13. Ўқув семестри якунланишига бир ой муддат қолгандан бошлаб мазкур семестр учун турмуш ўртоғи ёки ота-онаси Ҳукумат қарорлари ва топшириқларига мувофиқ хорижий давлатга узоқ муддатли хизмат сафарига юборилганлиги сабабли талабага унинг аризасига асосан алоҳида график асосида дарсларни ўзлаштириш имконияти яратилади.
Навбатдаги семестрда ушбу талаба дарс машғулотларида бевосита иштирок этиши ёки академик таътил олиши ёки ўз аризасига кўра талабалар сафидан четлаштирилиши мумкин.
3-боб. Академик таътилдан қайтиш
14. Талаба академик таътилга чиққан кундан бошлаб бир ой ўтмаган бўлса, академик таътилни бекор қилиш ва ўқишга қайтишни сўраб олий таълим муассасасига ариза билан мурожаат этишга ҳақли.
15. Талаба академик таътилнинг муддати тамом бўлгандан сўнг ўқишга қайтиш бўйича олий таълим муассасасининг ректори (директори) номига ариза билан мурожаат қилиши шарт.
Талаба академик таътилдан белгиланган муддат тамом бўлгандан сўнг ўқишга қайтиш бўйича олий таълим муассасасининг ректори (директори) номига ариза билан мурожаат қилган тақдирда унинг аризасини асоссиз равишда рад этишга йўл қўйилмайди. Ушбу ҳолат бўйича масъулият шахсан олий таълим муассасаси ректори (директори) зиммасига юкланади.
16. Агар академик таътил даврида талаба таҳсил олган бакалавриат таълим йўналиши (магистратура мутахассислиги) тугатилган бўлса, талабанинг ўқишини мазкур олий таълим муассасасининг турдош бакалавриат таълим йўналиши (магистратура мутахассислиги) бўйича, агар бундай бакалавриат таълим йўналиши (магистратура мутахассислиги) мавжуд бўлмаса, турдош бўлмаган бакалавриат таълим йўналишига (магистратура мутахассислигига) кўчириб тиклаш масаласи ариза билан бирга кўриб чиқилади ва Олий таълим муассасалари талабалари ўқишини кўчириш, қайта тиклаш ва ўқишдан четлаштириш тартиби тўғрисидаги низомда белгиланган тартибда ҳал этилади.
17. Ҳомиладорлик ва туғиш, шунингдек, болаларни парвариш қилиш учун академик таътилда бўлган талабалар камида кейинги ўқув йилининг талаба томонидан тўлиқ ўзлаштирилмаган семестри бошланиши муддатига ўқишга қайтиши мумкин.
18. Академик таътилдан қайтиш бўйича талабанинг мурожаати бир ҳафталик муддатда кўриб чиқилади ва унинг олий таълим муассасасига ўқишга қайтиши тўғрисида олий таълим муассасаси ректори (директори)нинг буйруғи расмийлаштирилади.
Ушбу буйруқда талаба академик таътилдан қайтгандан сўнг ўқийдиган бакалавриат таълим йўналиши (магистратура мутахассислиги), ўқув курси ва гуруҳи кўрсатилади.
19. Академик таътилдан белгиланган муддатда қайтган талабаларга илгари ўзлаштирилган фанларни қайта ўзлаштириш мажбурияти юклатилмайди.
20. Академик таътил муддати тугагандан сўнг ўқишга қайтмаган ва натижада бир семестр давомида дарсларни узрли сабабларсиз 74 соатдан ортиқ қолдирган талаба олий таълим муассасасидан четлаштирилади.
Ушбу банд талаблари ўқув жараёни кредит-модуль тизимига ўтган олий таълим муассасаларига нисбатан татбиқ этилмайди.
4-боб. Якунловчи қоидалар
21. Ушбу Низомни қўллашда юзага келадиган низолар қонунчилик ҳужжатларида белгиланган тартибда ҳал этилади.
22. Мазкур Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавоб берадилар.
Ўзбекистон Республикаси олий таълим муассасалари талабаларига академик таътил бериш тўғрисидаги низомга ИЛОВА
Олий таълим муассасалари талабаларига тиббий кўрсатмалар бўйича академик таътил беришга оид касалликлар
1. Сил касаллигининг фаол ва асоратланган шакллари.
2. Сурункали кечувчи ўпканинг носпецифик касалликлари билан боғлиқ юрак-ўпка фаолиятлари етишмовчилиги (III даража).
3. II ва III даражали сурункали қон айланиши бузилиши (Нью-Йорк классификатори бўйича III ва IV даража) билан кечувчи юрак клапанлари ва мушакларининг органик ўзгаришлари.
4. II ва III даражали қон босимининг ошиши, тез ривожланувчи қон босим ошиши (хавфли гипертония).
5. Ҳаёт учун хавфли юрак ритми ва ўтказувчанликнинг бузилиши билан кечувчи ҳолатлар (МАС синдроми, АВ қамал II-III даражаси, синус тугуни заифлиги синдроми, юрак қисқариш сони кундузи бир минутда 50 ва ундан паст бўлса, номуқим гемодинамика билан кечувчи пароксизмал тахикардиялар (САБ 90 мм симоб устунидан паст ҳолат).
6. Барча босқичдаги хавфли ўсма касалликлари (2 йил олдин радикал даволанганлар бундан мустасно).
7. Турғун буйрак етишмовчилиги билан кечувчи буйрак ва бошқа аъзолар касалликлари.
8. Стационар шароитида даволаниш талаб этиладиган ошқозон-ичак тизими яра ва яллиғланиш касалликларининг ўткир даври.
9. Оғир ва қўшма травматик шикастланишлар.
10. Стационар шароитида бир ой муддатдан ортиқ даволаниш ва реабилитация қилиш зарур бўлган турли этиологиялик жигар касалликлари ва сурункали панкреатит (сурункали гепатитлар, жигар циррози).
11. Эндокрин касалликларининг оғир шакли (акромегалия, диффуз токсик буқоқ, буйрак ости безининг етишмовчилиги, гипотериоз, қандли диабет касаллигининг биринчи тури, Иценко-Кушинг касаллиги).
12. Қон тизими касалликлари:
а) ўткир ва сурункали лейкозлар;
б) Идиопатик тромбоцитопеник пурпура;
в) апластик анемия.
13. Асаб системаси сурункали органик касалликларининг асоратлари натижасида ақл заковатнинг чуқур ва турғун бузилиши ҳамда психопатик бузилишлар.
14. Шизофрения барча турларининг хуруж даври.
15. Тез-тез такрорланувчи тутқаноқли, тутқаноқсиз ва психомотор хуружлари билан, шунингдек, ҳушнинг хиралашуви ва оғир дисфория билан кечувчи эпилепсия, шу жумладан:
а) кам такрорланувчи хуружлар билан шахснинг чуқур ўзгариши ва ақл-заковат бузилиши билан кечувчи эпилепсия;
б) эпилептик психозлар.
16. Тез-тез хуружланувчи циклотимия, маниакал депрессив психоз ва тез-тез такрорланувчи маниакал депрессив ҳолатлар.
17. Психопатиянинг тез-тез декомпенсацияланиши билан кечувчи турлари.
18. Оғир, сурункали кечувчи тери касалликлари:
а) асоратланган псориаз;
б) пурсилдоқ яра;
в) Лайелл синдроми;
г) Стивенс-Жонсон синдроми.
19. Захмнинг юқумли босқичи.
20. Трахоманинг I, II ва III даражалари.
21. Гиёҳвандлик, токсикоманиянинг барча турлари (тамакига тобелик бундан мустасно).
22. Орттирилган иммунитет танқислиги синдроми (ОИТС/ОИВ).
Ўзбекистон Республикасининг Бош вазири А. АРИПОВ
Тошкент ш.,
2021 йил 3 июнь,
344-сон
Oʻzbekiston Respublikasi Vazirlar Mahkamasining
qarori
NIZOM
ROʻYXATI
Oʻzbekiston Respublikasi oliy taʼlim muassasalari talabalariga akademik taʼtil berish toʻgʻrisidagi nizomni tasdiqlash haqida
Oʻzbekiston Respublikasi Prezidentining “2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Yoshlarni qoʻllab-quvvatlash va aholi salomatligini mustahkamlash yili”da amalga oshirishga oid davlat dasturi toʻgʻrisida” 2021-yil 3-fevraldagi PF-6155-son Farmonida belgilangan vazifalar ijrosini taʼminlash hamda respublika oliy taʼlim muassasalarining ijtimoiy muhofazaga muhtoj talabalarini himoya qilish, ularga uzluksiz mustaqil taʼlim olish uchun imkoniyat yaratish maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining “2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Yoshlarni qoʻllab-quvvatlash va aholi salomatligini mustahkamlash yili”da amalga oshirishga oid davlat dasturi toʻgʻrisida” 2021-yil 3-fevraldagi PF-6155-son Farmoniga muvofiq, akademik taʼtil berishning quyidagilarni nazarda tutuvchi yangicha tartibi oʻrnatilganligi maʼlumot uchun qabul qilinsin:
akademik taʼtil olishni istagan talabalar oʻz ixtiyoriga koʻra akademik taʼtil muddatiga taʼlimning sirtqi va masofaviy shakliga oʻtkazilib (agar oliy taʼlim muassasasida bunday taʼlimning shakllari mavjud boʻlsa), ularga uzluksiz mustaqil taʼlim olish imkoniyati yaratiladi;
oilasining betob aʼzosini parvarish qilish sababli anʼanaviy shakldagi taʼlimni davom ettirish imkoniyati boʻlmagan talabalarga ham akademik taʼtilni olish huquqi beriladi;
talabalarga oʻqish davomida akademik taʼtil berilishi boʻyicha miqdoriy cheklovlar bekor qilinadi;
akademik taʼtildan qaytgan talabalarni ilgari oʻzlashtirilgan fanlar boʻyicha qaytadan oʻqitish amaliyoti bekor qilinadi.
2. Oliy taʼlim muassasalari talabalariga akademik taʼtil berish, akademik taʼtil muddatlari hamda akademik taʼtildan soʻng oʻqishni davom ettirish tartibini nazarda tutuvchi Oʻzbekiston Respublikasi oliy taʼlim muassasalari talabalariga akademik taʼtil berish toʻgʻrisidagi nizom 1-ilovaga muvofiq tasdiqlansin.
3. Belgilansinki:
akademik taʼtil berish talabani oliy taʼlim muassasasidan chetlashtirish hisoblanmaydi;
talabaning akademik taʼtil olish haqidagi murojaati bir haftalik muddatda koʻrib chiqiladi hamda oliy taʼlim muassasasi rektori (direktori)ning buyrugʻi bilan rasmiylashtiriladi;
akademik taʼtil beriladigan talabalar arizasiga (ixtiyoriga) koʻra oliy taʼlim muassasasi rektori (direktori)ning buyrugʻiga muvofiq, uning oʻqishi akademik taʼtil muddatiga taʼlimning sirtqi yoki masofaviy yoki eksternat taʼlim shakliga oʻtkazilishi mumkin;
talaba akademik taʼtildan belgilangan muddat tamom boʻlgandan soʻng oʻqishga qaytish boʻyicha oliy taʼlim muassasasining rektori (direktori) nomiga ariza bilan murojaat qilgan taqdirda uning arizasini asossiz ravishda rad etishga yoʻl qoʻyilmaydi.
5. Oʻzbekiston Respublikasi Oliy va oʻrta maxsus taʼlim vazirligi, Sogʻliqni saqlash vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
6. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A. Musayev, Oʻzbekiston Respublikasi oliy va oʻrta maxsus taʼlim vaziri A.X. Toshkulov hamda Oʻzbekiston Respublikasi sogʻliqni saqlash vaziri A.M. Xadjibayev zimmasiga yuklansin.
Vazirlar Mahkamasining 2021-yil 3-iyundagi 344-son qaroriga 1-ILOVA
Oʻzbekiston Respublikasi oliy taʼlim muassasalari talabalariga akademik taʼtil berish toʻgʻrisida
1-bob. Umumiy qoidalar
1. Mazkur Nizom Oʻzbekiston Respublikasi oliy taʼlim muassasalari talabalariga akademik taʼtil berish va akademik taʼtildan soʻng ularning oʻqishini davom ettirish tartibini belgilaydi.
2. Oʻzbekiston Respublikasi oliy taʼlim muassasalari talabalariga akademik taʼtil quyidagi hollarda berilishi mumkin:
harbiy xizmatni oʻtash uchun;
salomatligini tiklash uchun;
homiladorlik va tugʻish uchun;
bolalarni parvarish qilish uchun;
oilasining betob aʼzosini (otasi, onasi yoki ularning oʻrnini bosuvchi shaxslar, turmush oʻrtogʻi, farzandi) parvarish qilish uchun.
3. Akademik taʼtil oʻquv yilining har qanday qismida, quyidagi muddatlarga beriladi:
harbiy xizmatni oʻtash uchun — qonunchilik hujjatlarida belgilangan harbiy xizmatni oʻtash muddatiga;
homiladorlik va tugʻish, shuningdek, bolalarni parvarish qilish uchun — qonunchilik hujjatlarida belgilangan homiladorlik va tugʻish, shuningdek, bolalarni parvarish qilish taʼtillari muddatiga;
salomatligini tiklash hamda oilasining betob aʼzosini parvarish qilish uchun — keyingi yilning talaba tomonidan toʻliq oʻzlashtirilmagan semestri boshlanguniga qadar boʻlgan muddatga (agar mazkur Nizomning 11-bandiga muvofiq talaba akademik taʼtil muddatiga taʼlimning sirtqi yoki masofaviy yoki eksternat taʼlim shakliga oʻtkazilsa, navbatdagi semestrning boshlanguniga qadar boʻlgan muddatga). Bunda, qayd etilgan muddatlardan biri talabaning arizasiga muvofiq oliy taʼlim muassasasi rektori (direktori) tomonidan belgilanadi.
4. Talabaga akademik taʼtil berilishi uni oliy taʼlim muassasasidan chetlashtirish deb hisoblanmaydi.
5. Talabalarga akademik taʼtil davrida stipendiyalar toʻlanmaydi.
2-bob. Akademik taʼtil berish
6. Akademik taʼtil olish uchun talaba (sogʻligʻi holatiga koʻra talaba shaxsan murojaat etish imkoniyatiga ega boʻlmasa, uning ota-onasi yoki ularning oʻrnini bosuvchi shaxslar yoki turmush oʻrtogʻi) tomonidan oliy taʼlim muassasasi rektori (direktori) nomiga ariza bilan murojaat qilinadi.
7. Akademik taʼtil olishni soʻrab murojaat qilgan talabaning arizasiga quyidagi hujjatlar ilova qilinadi:
harbiy xizmatni oʻtash uchun — tegishli tuman (shahar) mudofaa ishlari organlarining talabani harbiy xizmatga chaqirish haqidagi chaqiruv qogʻozi;
salomatligini tiklash, homiladorlik va tugʻish, shuningdek, bolalarni parvarish qilish uchun — talaba doimiy tibbiy nazoratda turgan tibbiyot muassasasi xulosasi;
oilasining betob aʼzosini parvarish qilish uchun — oilasining betob aʼzosi doimiy tibbiy nazoratda turgan tibbiyot muassasasi xulosasi.
8. Talaba surunkali kasalligi sababli bir oydan ortiq vaqt davomida darslarda qatnasha olmasa, talaba yoki uning ota-onasi yoki ularning oʻrnini bosuvchi shaxslar yoki turmush oʻrtogʻining arizasiga asosan talabaga akademik taʼtil berilishi mumkin. Bunda, akademik taʼtil muddati oʻtishining boshlanishi talaba darslarda qatnasha olmayotgan kundan boshlab hisoblanadi.
9. Talabaga salomatligini tiklash hamda oilasining betob aʼzosini parvarish qilish uchun akademik taʼtilning berilishi mazkur Nizomning ilovasida keltirilgan Oliy taʼlim muassasalari talabalariga tibbiy koʻrsatmalar boʻyicha akademik taʼtil berishga oid kasalliklar roʻyxatiga muvofiq amalga oshiriladi.
10. Talabaning akademik taʼtil olish haqidagi murojaati bir haftalik muddatda koʻrib chiqiladi.
Talabaga akademik taʼtil berish oliy taʼlim muassasasi rektori (direktori)ning buyrugʻi bilan rasmiylashtiriladi. Ushbu buyruqda akademik taʼtilning boshlanish va tugash sanasi koʻrsatilishi shart.
11. Akademik taʼtil beriladigan talabalar arizasiga (ixtiyoriga) koʻra oliy taʼlim muassasasi rektori (direktori)ning buyrugʻiga muvofiq, uning oʻqishi akademik taʼtil muddatiga taʼlimning sirtqi yoki masofaviy yoki eksternat taʼlim shakliga oʻtkazilishi mumkin.
Bunda oliy taʼlim muassasasida muayyan bakalavriat taʼlim yoʻnalishi (magistratura mutaxassisligi) boʻyicha sirtqi yoki masofaviy taʼlim shakli mavjud boʻlgan taqdirda talabaning oʻqishi arizasiga koʻra belgilangan muddatga ushbu taʼlim shakliga oʻtkaziladi.
Talabaning oʻqishini akademik taʼtil muddatiga taʼlimning eksternat taʼlim shakliga oʻtkazish quyidagi tartibda amalga oshiriladi:
talabalar oʻqishining akademik taʼtil muddatiga eksternat taʼlim shakliga oʻtkazilishi bakalavriat taʼlim yoʻnalishlarining (magistratura mutaxassisliklarining) xususiyatlarini inobatga olgan holda amalga oshiriladi;
akademik taʼtil muddatiga oʻqishni eksternat taʼlim shakliga oʻtkazish boʻyicha arizalar 15 kun muddatda oliy taʼlim muassasasi kengashida koʻrib chiqiladi va bakalavriat taʼlim yoʻnalishining (magistratura mutaxassisligining) xususiyatlaridan kelib chiqib, talabaning belgilangan muddatga eksternat taʼlim shaklida oʻqishi maqsadga muvofiq yoki maqsadga muvofiq emasligi boʻyicha qaror qabul qilinadi;
oliy taʼlim muassasasi kengashining qarori besh kun muddatda ariza muallifiga (talabaga) maʼlum qilinadi;
oliy taʼlim muassasasi kengashining qaroriga asosan oliy taʼlim muassasasi rektori (direktori)ning buyrugʻi bilan akademik taʼtil muddatiga eksternat taʼlim shaklida oʻqishga ruxsat etilgan talaba tomonidan akademik taʼtildan qaytgandan soʻng muayyan oʻquv semestrida (semestrlarida) oʻqitilgan fanlar boʻyicha bir martalik imtihonlar topshiriladi;
imtihonlar oliy taʼlim muassasasi rektori (direktori)ning buyrugʻiga asosan fanlar boʻyicha tashkil etilgan komissiya tomonidan oʻtkaziladi;
imtihonlar natijalariga koʻra barcha fanlardan talaba koʻrsatkichi belgilangan oʻtish balidan yuqori boʻlgan taqdirda talabaga navbatdagi oʻquv semestridan (kursdan) oʻqishini davom ettirishiga ruxsat etiladi;
imtihonlar natijalariga koʻra bir yoki undan koʻp fanlardan talaba koʻrsatkichi belgilangan oʻtish balidan past boʻlgan taqdirda talabaning oʻzlashtirilmagan oʻquv semestrining boshidan oʻqishini davom ettirishi belgilanadi.
Mazkur bandda nazarda tutilgan tartib harbiy xizmatni oʻtash uchun akademik taʼtil berish holatiga nisbatan tatbiq etilmaydi.
12. Salomatligini tiklash yoki oilasining betob aʼzosini parvarish qilish uchun akademik taʼtilda boʻlgan talabalarda homiladorlik va tugʻish holatlari yuzaga kelgan taqdirda, akademik taʼtilning muddati homiladorlik va tugʻish uchun mazkur Nizomda belgilangan akademik taʼtilning muddatiga uzaytiriladi.
Talabaning salomatligi yoki oilasining betob aʼzosi salomatligi tiklanmaganda talabaning arizasiga koʻra oliy taʼlim muassasasi rektori (direktori)ning buyrugʻi asosida akademik taʼtil muddati ushbu toifadagi holatlar uchun belgilangan muddatlarga uzaytiriladi.
13. Oʻquv semestri yakunlanishiga bir oy muddat qolgandan boshlab mazkur semestr uchun turmush oʻrtogʻi yoki ota-onasi Hukumat qarorlari va topshiriqlariga muvofiq xorijiy davlatga uzoq muddatli xizmat safariga yuborilganligi sababli talabaga uning arizasiga asosan alohida grafik asosida darslarni oʻzlashtirish imkoniyati yaratiladi.
Navbatdagi semestrda ushbu talaba dars mashgʻulotlarida bevosita ishtirok etishi yoki akademik taʼtil olishi yoki oʻz arizasiga koʻra talabalar safidan chetlashtirilishi mumkin.
3-bob. Akademik taʼtildan qaytish
14. Talaba akademik taʼtilga chiqqan kundan boshlab bir oy oʻtmagan boʻlsa, akademik taʼtilni bekor qilish va oʻqishga qaytishni soʻrab oliy taʼlim muassasasiga ariza bilan murojaat etishga haqli.
15. Talaba akademik taʼtilning muddati tamom boʻlgandan soʻng oʻqishga qaytish boʻyicha oliy taʼlim muassasasining rektori (direktori) nomiga ariza bilan murojaat qilishi shart.
Talaba akademik taʼtildan belgilangan muddat tamom boʻlgandan soʻng oʻqishga qaytish boʻyicha oliy taʼlim muassasasining rektori (direktori) nomiga ariza bilan murojaat qilgan taqdirda uning arizasini asossiz ravishda rad etishga yoʻl qoʻyilmaydi. Ushbu holat boʻyicha masʼuliyat shaxsan oliy taʼlim muassasasi rektori (direktori) zimmasiga yuklanadi.
16. Agar akademik taʼtil davrida talaba tahsil olgan bakalavriat taʼlim yoʻnalishi (magistratura mutaxassisligi) tugatilgan boʻlsa, talabaning oʻqishini mazkur oliy taʼlim muassasasining turdosh bakalavriat taʼlim yoʻnalishi (magistratura mutaxassisligi) boʻyicha, agar bunday bakalavriat taʼlim yoʻnalishi (magistratura mutaxassisligi) mavjud boʻlmasa, turdosh boʻlmagan bakalavriat taʼlim yoʻnalishiga (magistratura mutaxassisligiga) koʻchirib tiklash masalasi ariza bilan birga koʻrib chiqiladi va Oliy taʼlim muassasalari talabalari oʻqishini koʻchirish, qayta tiklash va oʻqishdan chetlashtirish tartibi toʻgʻrisidagi nizomda belgilangan tartibda hal etiladi.
17. Homiladorlik va tugʻish, shuningdek, bolalarni parvarish qilish uchun akademik taʼtilda boʻlgan talabalar kamida keyingi oʻquv yilining talaba tomonidan toʻliq oʻzlashtirilmagan semestri boshlanishi muddatiga oʻqishga qaytishi mumkin.
18. Akademik taʼtildan qaytish boʻyicha talabaning murojaati bir haftalik muddatda koʻrib chiqiladi va uning oliy taʼlim muassasasiga oʻqishga qaytishi toʻgʻrisida oliy taʼlim muassasasi rektori (direktori)ning buyrugʻi rasmiylashtiriladi.
Ushbu buyruqda talaba akademik taʼtildan qaytgandan soʻng oʻqiydigan bakalavriat taʼlim yoʻnalishi (magistratura mutaxassisligi), oʻquv kursi va guruhi koʻrsatiladi.
19. Akademik taʼtildan belgilangan muddatda qaytgan talabalarga ilgari oʻzlashtirilgan fanlarni qayta oʻzlashtirish majburiyati yuklatilmaydi.
20. Akademik taʼtil muddati tugagandan soʻng oʻqishga qaytmagan va natijada bir semestr davomida darslarni uzrli sabablarsiz 74 soatdan ortiq qoldirgan talaba oliy taʼlim muassasasidan chetlashtiriladi.
Ushbu band talablari oʻquv jarayoni kredit-modul tizimiga oʻtgan oliy taʼlim muassasalariga nisbatan tatbiq etilmaydi.
4-bob. Yakunlovchi qoidalar
21. Ushbu Nizomni qoʻllashda yuzaga keladigan nizolar qonunchilik hujjatlarida belgilangan tartibda hal etiladi.
22. Mazkur Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar.
Oʻzbekiston Respublikasi oliy taʼlim muassasalari talabalariga akademik taʼtil berish toʻgʻrisidagi nizomga ILOVA
Oliy taʼlim muassasalari talabalariga tibbiy koʻrsatmalar boʻyicha akademik taʼtil berishga oid kasalliklar
1. Sil kasalligining faol va asoratlangan shakllari.
2. Surunkali kechuvchi oʻpkaning nospetsifik kasalliklari bilan bogʻliq yurak-oʻpka faoliyatlari yetishmovchiligi (III daraja).
3. II va III darajali surunkali qon aylanishi buzilishi (Nyu-York klassifikatori boʻyicha III va IV daraja) bilan kechuvchi yurak klapanlari va mushaklarining organik oʻzgarishlari.
4. II va III darajali qon bosimining oshishi, tez rivojlanuvchi qon bosim oshishi (xavfli gipertoniya).
5. Hayot uchun xavfli yurak ritmi va oʻtkazuvchanlikning buzilishi bilan kechuvchi holatlar (MAS sindromi, AV qamal II-III darajasi, sinus tuguni zaifligi sindromi, yurak qisqarish soni kunduzi bir minutda 50 va undan past boʻlsa, nomuqim gemodinamika bilan kechuvchi paroksizmal taxikardiyalar (SAB 90 mm simob ustunidan past holat).
6. Barcha bosqichdagi xavfli oʻsma kasalliklari (2 yil oldin radikal davolanganlar bundan mustasno).
7. Turgʻun buyrak yetishmovchiligi bilan kechuvchi buyrak va boshqa aʼzolar kasalliklari.
8. Statsionar sharoitida davolanish talab etiladigan oshqozon-ichak tizimi yara va yalligʻlanish kasalliklarining oʻtkir davri.
9. Ogʻir va qoʻshma travmatik shikastlanishlar.
10. Statsionar sharoitida bir oy muddatdan ortiq davolanish va reabilitatsiya qilish zarur boʻlgan turli etiologiyalik jigar kasalliklari va surunkali pankreatit (surunkali gepatitlar, jigar sirrozi).
11. Endokrin kasalliklarining ogʻir shakli (akromegaliya, diffuz toksik buqoq, buyrak osti bezining yetishmovchiligi, gipoterioz, qandli diabet kasalligining birinchi turi, Itsenko-Kushing kasalligi).
12. Qon tizimi kasalliklari:
a) oʻtkir va surunkali leykozlar;
b) Idiopatik trombotsitopenik purpura;
v) aplastik anemiya.
13. Asab sistemasi surunkali organik kasalliklarining asoratlari natijasida aql zakovatning chuqur va turgʻun buzilishi hamda psixopatik buzilishlar.
14. Shizofreniya barcha turlarining xuruj davri.
15. Tez-tez takrorlanuvchi tutqanoqli, tutqanoqsiz va psixomotor xurujlari bilan, shuningdek, hushning xiralashuvi va ogʻir disforiya bilan kechuvchi epilepsiya, shu jumladan:
a) kam takrorlanuvchi xurujlar bilan shaxsning chuqur oʻzgarishi va aql-zakovat buzilishi bilan kechuvchi epilepsiya;
b) epileptik psixozlar.
16. Tez-tez xurujlanuvchi siklotimiya, maniakal depressiv psixoz va tez-tez takrorlanuvchi maniakal depressiv holatlar.
17. Psixopatiyaning tez-tez dekompensatsiyalanishi bilan kechuvchi turlari.
18. Ogʻir, surunkali kechuvchi teri kasalliklari:
a) asoratlangan psoriaz;
b) pursildoq yara;
v) Layell sindromi;
g) Stivens-Jonson sindromi.
19. Zaxmning yuqumli bosqichi.
20. Traxomaning I, II va III darajalari.
21. Giyohvandlik, toksikomaniyaning barcha turlari (tamakiga tobelik bundan mustasno).
22. Orttirilgan immunitet tanqisligi sindromi (OITS/OIV).
Oʻzbekiston Respublikasining Bosh vaziri A. ARIPOV
Toshkent sh.,
2021-yil 3-iyun,
344-son