📅 2021-yil 3-iyun · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 3 июнь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 3 июня 2021 г. · Постановления Кабинета Министров
Официальный текст. Официальный документ. Редакционные примечания не включены.
📅 3 June 2021 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Самарқанд вилояти ҳокимлиги бошқаруви тузилмасига ўзгартириш киритиш тўғрисида
Самарқанд вилоятининг ишлаб чиқариш ва ресурс салоҳиятини комплекс ривожлантириш, минерал хом ашё ва қишлоқ хўжалиги ресурсларини чуқур қайта ишлаш орқали инновацион тадбиркорлик ва юқори технологияларга асосланган саноатни ривожлантиришга тўғридан-тўғри инвестицияларни жалб қилиш учун қулай шарт-шароитлар яратиш, шунингдек, «Ургут» эркин иқтисодий зонасида саноат маҳсулотларини ишлаб чиқаришни кенгайтириш мақсадида Вазирлар Маҳкамаси қарор қилади:
1. Самарқанд вилояти ҳокимлиги, Инвестициялар ва ташқи савдо вазирлиги ҳамда Иқтисодий тараққиёт ва камбағалликни қисқартириш вазирлигининг Самарқанд вилояти ҳокимлиги бошқарув аппарати тузилмасида Самарқанд вилояти ҳокимининг саноатни ривожлантириш масалалари бўйича ўринбосари — «Ургут» эркин иқтисодий зонаси дирекцияси раҳбари лавозимини жорий этиш тўғрисидаги таклифи маъқуллансин.
2. Самарқанд вилояти ҳокимлиги бошқарув аппарати тузилмасида:
а) вилоят ҳокимининг саноатни ривожлантириш масалалари бўйича ўринбосари — «Ургут» эркин иқтисодий зонаси дирекцияси раҳбари лавозими;
бошқарув ходимларининг белгиланган умумий сони ва меҳнатга ҳақ тўлаш фонди доирасида вилоят ҳокимининг саноатни ривожлантириш масалалари бўйича ўринбосари — «Ургут» эркин иқтисодий зонаси дирекцияси раҳбарининг котибият мудири лавозими жорий этилсин;
б) вилоят ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари лавозими вилоят ҳокимининг капитал қурилиш, коммуникациялар ва коммунал хўжалик масалалари бўйича ўринбосари лавозими этиб қайта номлансин.
3. Қуйидагилар, Самарқанд вилояти ҳокимининг саноатни ривожлантириш масалалари бўйича ўринбосари — «Ургут» эркин иқтисодий зонаси дирекцияси раҳбарининг асосий вазифалари этиб белгилансин:
маҳаллий хом ашёни чуқур қайта ишлаш асосида юқори қўшилган қийматли тайёр маҳсулотлар ишлаб чиқаришни кенгайтириш орқали ҳудудларнинг саноат салоҳиятини жадал ривожлантириш;
ҳудудни ижтимоий-иқтисодий ривожлантириш бўйича тасдиқланган дастурларда назарда тутилган саноатни таркибий қайта ўзгартиришни чуқурлаштириш ва иқтисодиётни янада диверсификациялаш билан боғлиқ чора-тадбирларни амалга ошириш ишларини ташкил қилиш;
саноат маҳсулотлари ишлаб чиқаришни янада кенгайтириш, саноат маҳсулотларини ташқи бозорларга олиб чиқиш мақсадида тақдимотлар ўтказиш, хорижий давлатларнинг кўргазма-ярмарка тадбирларида иштирок этиш;
электротехника саноатини янада ривожлантириш, ички бозорни юқори сифатли миллий электротехника маҳсулотлари билан тўлдириш ва унинг экспорт географиясини, жумладан, турли ахборот ресурслари ва кўргазма тадбирларида миллий брендларни илгари суриш ва электротехника саноати корхоналарининг салоҳиятини намоён этиш орқали кенгайтириш бўйича комплекс чора-тадбирлар амалга оширилишини ташкил этиш;
тўғридан-тўғри хорижий инвестициялар ва замонавий технологияларни жалб этиш, маҳаллий хом ашё ресурсларини чуқур қайта ишлаш, импорт ўрнини босувчи, экспорт бозорларида рақобатбардош ва юқори қўшилган қийматли замонавий электротехника ва электрмаиший маҳсулотлар ишлаб чиқаришни кенгайтириш;
машинасозлик корхоналарида фойдаланиладиган бутловчи буюмлар ҳамда барча техника турлари учун эҳтиёт қисмларни ишлаб чиқариш бўйича таклифлар ишлаб чиқиш ва уларни амалга оширишни ташкил этиш;
тикув-трикотаж маҳсулотлари ишлаб чиқаришга мўлжалланган мажмуаларни яратиш ва кенг турдаги сифатли тўқимачилик ва тикув-трикотаж маҳсулотлари ишлаб чиқарилишини ташкил этиш ҳамда хотин-қизлар учун янги иш ўринларини яратиш ишларини мувофиқлаштириш;
энергия самарадорлиги юқори бўлган ва энергия тежайдиган замонавий технологиялар негизида мавжуд саноат корхоналарини модернизация қилиш ва янгиларини барпо этиш, уларда маҳаллий хом ашёни чуқур қайта ишлаш асосида маҳсулот ишлаб чиқариш ҳамда ички бозорни тўлдириш ва ташқи бозорларда талаб юқори бўлган маҳсулот турлари экспортини кенгайтириш мақсадида юқори қўшилган қийматли тайёр маҳсулотлар ишлаб чиқариш бўйича тегишли чора-тадбирларни ишлаб чиқиш ва амалга оширилишини таъминлаш;
саноат корхоналари маҳсулотларининг рақобатбардошлиги ва сифатини ошириш, уларнинг халқаро стандартларга мувофиқлигини таъминлаш борасида ҳудуддаги синов ва сертификатлаш марказлари ва тадбиркорлик субъектлари фаолиятини мувофиқлаштириш;
махсус иқтисодий ва кичик саноат зоналарида тадбиркорларнинг тўлиқ ва узлуксиз фаолият олиб боришини таъминлаш, улар учун зарур муҳандислик-коммуникация инфратузилмасини яратиш, хорижий ва маҳаллий инвесторларнинг фаолиятини қўллаб-қувватлаш, вилоятда янги кичик ва йирик саноат зоналари сонини кўпайтириш ва уларнинг фаолиятини мувофиқлаштириш.
4. Самарқанд вилояти ҳокимлиги мазкур қарордан келиб чиқиб бир ҳафта муддатда:
вилоят ҳокимининг ўринбосарларининг янгиланган функционал вазифалари тақсимоти ҳамда уларнинг котибиятлари тўғрисидаги низомларни тасдиқласин;
Самарқанд вилояти ҳокимлиги бошқарув аппаратининг янгиланган тузилмаси тасдиқлаш учун белгиланган тартибда халқ депутатлари Самарқанд вилояти Кенгашига киритилишини таъминласин.
5. Ўзбекистон Республикаси Бош вазирининг инвестициялар ва ташқи иқтисодий алоқалар масалалари бўйича ўринбосари — инвестициялар ва ташқи савдо вазири С.У. Умурзаков Самарқанд вилояти ҳокимлиги билан биргаликда:
икки ой муддатда Самарқанд вилоятининг ишлаб чиқариш ва ресурс салоҳиятини комплекс ривожлантириш, минерал хом ашё ва қишлоқ хўжалиги ресурсларини чуқур қайта ишлаш орқали инновацион тадбиркорлик ва юқори технологияларга асосланган саноатни ривожлантириш дастурини ишлаб чиқсин ва тасдиқласин;
Самарқанд вилояти ҳокимининг саноатни ривожлантириш масалалари бўйича ўринбосари — «Ургут» эркин иқтисодий зонаси дирекцияси раҳбари фаолиятини самарали ташкил этилишини мувофиқлаштириб борсин ҳамда унинг зиммасига юклатилган вазифаларни самарали бошқариши учун зарур шарт-шароитлар яратсин.
6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — инвестициялар ва ташқи савдо вазири С.У. Умурзаков ва Самарқанд вилояти ҳокими Э.О. Турдимов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2021 йил 3 июнь,
342-сон
Oʻzbekiston Respublikasi Vazirlar Mahkamasining
qarori
Samarqand viloyati hokimligi boshqaruvi tuzilmasiga oʻzgartirish kiritish toʻgʻrisida
Samarqand viloyatining ishlab chiqarish va resurs salohiyatini kompleks rivojlantirish, mineral xomashyo va qishloq xoʻjaligi resurslarini chuqur qayta ishlash orqali innovatsion tadbirkorlik va yuqori texnologiyalarga asoslangan sanoatni rivojlantirishga toʻgʻridan toʻgʻri investitsiyalarni jalb qilish uchun qulay shart-sharoitlar yaratish, shuningdek, “Urgut” erkin iqtisodiy zonasida sanoat mahsulotlarini ishlab chiqarishni kengaytirish maqsadida Vazirlar Mahkamasi qaror qiladi:
1. Samarqand viloyati hokimligi, Investitsiyalar va tashqi savdo vazirligi hamda Iqtisodiy taraqqiyot va kambagʻallikni qisqartirish vazirligining Samarqand viloyati hokimligi boshqaruv apparati tuzilmasida Samarqand viloyati hokimining sanoatni rivojlantirish masalalari boʻyicha oʻrinbosari — “Urgut” erkin iqtisodiy zonasi direksiyasi rahbari lavozimini joriy etish toʻgʻrisidagi taklifi maʼqullansin.
2. Samarqand viloyati hokimligi boshqaruv apparati tuzilmasida:
a) viloyat hokimining sanoatni rivojlantirish masalalari boʻyicha oʻrinbosari — “Urgut” erkin iqtisodiy zonasi direksiyasi rahbari lavozimi;
boshqaruv xodimlarining belgilangan umumiy soni va mehnatga haq toʻlash fondi doirasida viloyat hokimining sanoatni rivojlantirish masalalari boʻyicha oʻrinbosari — “Urgut” erkin iqtisodiy zonasi direksiyasi rahbarining kotibiyat mudiri lavozimi joriy etilsin;
b) viloyat hokimining sanoatni rivojlantirish, kapital qurilish, kommunikatsiyalar va kommunal xoʻjalik masalalari boʻyicha oʻrinbosari lavozimi viloyat hokimining kapital qurilish, kommunikatsiyalar va kommunal xoʻjalik masalalari boʻyicha oʻrinbosari lavozimi etib qayta nomlansin.
3. Quyidagilar, Samarqand viloyati hokimining sanoatni rivojlantirish masalalari boʻyicha oʻrinbosari — “Urgut” erkin iqtisodiy zonasi direksiyasi rahbarining asosiy vazifalari etib belgilansin:
mahalliy xomashyoni chuqur qayta ishlash asosida yuqori qoʻshilgan qiymatli tayyor mahsulotlar ishlab chiqarishni kengaytirish orqali hududlarning sanoat salohiyatini jadal rivojlantirish;
hududni ijtimoiy-iqtisodiy rivojlantirish boʻyicha tasdiqlangan dasturlarda nazarda tutilgan sanoatni tarkibiy qayta oʻzgartirishni chuqurlashtirish va iqtisodiyotni yanada diversifikatsiyalash bilan bogʻliq chora-tadbirlarni amalga oshirish ishlarini tashkil qilish;
sanoat mahsulotlari ishlab chiqarishni yanada kengaytirish, sanoat mahsulotlarini tashqi bozorlarga olib chiqish maqsadida taqdimotlar oʻtkazish, xorijiy davlatlarning koʻrgazma-yarmarka tadbirlarida ishtirok etish;
elektrotexnika sanoatini yanada rivojlantirish, ichki bozorni yuqori sifatli milliy elektrotexnika mahsulotlari bilan toʻldirish va uning eksport geografiyasini, jumladan, turli axborot resurslari va koʻrgazma tadbirlarida milliy brendlarni ilgari surish va elektrotexnika sanoati korxonalarining salohiyatini namoyon etish orqali kengaytirish boʻyicha kompleks chora-tadbirlar amalga oshirilishini tashkil etish;
toʻgʻridan toʻgʻri xorijiy investitsiyalar va zamonaviy texnologiyalarni jalb etish, mahalliy xomashyo resurslarini chuqur qayta ishlash, import oʻrnini bosuvchi, eksport bozorlarida raqobatbardosh va yuqori qoʻshilgan qiymatli zamonaviy elektrotexnika va elektrmaishiy mahsulotlar ishlab chiqarishni kengaytirish;
mashinasozlik korxonalarida foydalaniladigan butlovchi buyumlar hamda barcha texnika turlari uchun ehtiyot qismlarni ishlab chiqarish boʻyicha takliflar ishlab chiqish va ularni amalga oshirishni tashkil etish;
tikuv-trikotaj mahsulotlari ishlab chiqarishga moʻljallangan majmualarni yaratish va keng turdagi sifatli toʻqimachilik va tikuv-trikotaj mahsulotlari ishlab chiqarilishini tashkil etish hamda xotin-qizlar uchun yangi ish oʻrinlarini yaratish ishlarini muvofiqlashtirish;
energiya samaradorligi yuqori boʻlgan va energiya tejaydigan zamonaviy texnologiyalar negizida mavjud sanoat korxonalarini modernizatsiya qilish va yangilarini barpo etish, ularda mahalliy xomashyoni chuqur qayta ishlash asosida mahsulot ishlab chiqarish hamda ichki bozorni toʻldirish va tashqi bozorlarda talab yuqori boʻlgan mahsulot turlari eksportini kengaytirish maqsadida yuqori qoʻshilgan qiymatli tayyor mahsulotlar ishlab chiqarish boʻyicha tegishli chora-tadbirlarni ishlab chiqish va amalga oshirilishini taʼminlash;
sanoat korxonalari mahsulotlarining raqobatbardoshligi va sifatini oshirish, ularning xalqaro standartlarga muvofiqligini taʼminlash borasida hududdagi sinov va sertifikatlash markazlari va tadbirkorlik subyektlari faoliyatini muvofiqlashtirish;
maxsus iqtisodiy va kichik sanoat zonalarida tadbirkorlarning toʻliq va uzluksiz faoliyat olib borishini taʼminlash, ular uchun zarur muhandislik-kommunikatsiya infratuzilmasini yaratish, xorijiy va mahalliy investorlarning faoliyatini qoʻllab-quvvatlash, viloyatda yangi kichik va yirik sanoat zonalari sonini koʻpaytirish va ularning faoliyatini muvofiqlashtirish.
4. Samarqand viloyati hokimligi mazkur qarordan kelib chiqib bir hafta muddatda:
viloyat hokimining oʻrinbosarlarining yangilangan funksional vazifalari taqsimoti hamda ularning kotibiyatlari toʻgʻrisidagi nizomlarni tasdiqlasin;
Samarqand viloyati hokimligi boshqaruv apparatining yangilangan tuzilmasi tasdiqlash uchun belgilangan tartibda xalq deputatlari Samarqand viloyati Kengashiga kiritilishini taʼminlasin.
5. Oʻzbekiston Respublikasi Bosh vazirining investitsiyalar va tashqi iqtisodiy aloqalar masalalari boʻyicha oʻrinbosari — investitsiyalar va tashqi savdo vaziri S.U. Umurzakov Samarqand viloyati hokimligi bilan birgalikda:
ikki oy muddatda Samarqand viloyatining ishlab chiqarish va resurs salohiyatini kompleks rivojlantirish, mineral xomashyo va qishloq xoʻjaligi resurslarini chuqur qayta ishlash orqali innovatsion tadbirkorlik va yuqori texnologiyalarga asoslangan sanoatni rivojlantirish dasturini ishlab chiqsin va tasdiqlasin;
Samarqand viloyati hokimining sanoatni rivojlantirish masalalari boʻyicha oʻrinbosari — “Urgut” erkin iqtisodiy zonasi direksiyasi rahbari faoliyatini samarali tashkil etilishini muvofiqlashtirib borsin hamda uning zimmasiga yuklatilgan vazifalarni samarali boshqarishi uchun zarur shart-sharoitlar yaratsin.
6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — investitsiyalar va tashqi savdo vaziri S.U. Umurzakov va Samarqand viloyati hokimi E.O. Turdimov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2021-yil 3-iyun,
342-son