UzbekAI

Ўзбекистон Республикаси Вазирлар Маҳкамасининг

қарори

ТАРКИБИ

НИЗОМ

РЎЙХАТИ

Ўзбекистон Республикаси Давлат солиқ қўмитаси ҳузуридаги Фискал институт ва солиқ техникумлари фаолиятини ташкил этишга доир қўшимча чора-тадбирлар тўғрисида

Ўзбекистон Республикаси Давлат солиқ қўмитаси тизимидаги таълим муассасалари фаолиятини самарали ташкил этиш ҳамда давлат солиқ хизмати органлари тизими учун юқори малакали кадрлар тайёрлашни таъминлаш мақсадида Вазирлар Маҳкамаси қарор қилади:

1. Ўзбекистон Республикаси Президентининг «Ўзбекистон Республикаси Давлат солиқ қўмитаси ҳузурида Фискал институтни ташкил этиш тўғрисида» 2020 йил 4 ноябрдаги ПҚ-4879-сон қарорига мувофиқ:

Ўзбекистон Республикаси Давлат солиқ қўмитаси (кейинги ўринларда — Давлат солиқ қўмитаси) ҳузуридаги Малака ошириш маркази негизида Ўзбекистон Республикаси Давлат солиқ қўмитаси ҳузуридаги Фискал институт (кейинги ўринларда — Институт) ташкил этилганлиги;

Фарғона, Тошкент ва Бухоро солиқ коллежлари 2020/2021 ўқув йилидан бошлаб Институт ҳузуридаги Фарғона, Тошкент ва Бухоро солиқ техникумлари (кейинги ўринларда — солиқ техникумлари) этиб қайта ташкил этилганлиги маълумот учун қабул қилинсин.

2. 2021/2022 ўқув йилидан бошлаб қуйидаги тартиб жорий этилиши инобатга олинсин:

Институтнинг бакалавриат таълим йўналиши кундузги таълим шакли бўйича ўқиш давомийлиги тўрт йил, сиртқи таълим шакли бўйича беш йил этиб белгиланади;

Институтнинг магистратура мутахассисликлари кундузги таълим шакли бўйича ўқиш давомийлиги бир йил ҳамда масофавий, сиртқи ва кечки таълим шакли ўқиш давомийлиги икки йил этиб белгиланади;

Институтнинг бакалавриат ва магистратура мутахассисликларига ўқишга қабул қилишда тест синовларини очиқ ва ошкора ўтказиш, ўқишга қабул қилиш, талабалар ўқишини кўчириш, қайта тиклаш ва ўқишдан четлаштириш Вазирлар Маҳкамасининг «Олий таълим муассасаларига ўқишга қабул қилиш, талабалар ўқишини кўчириш, қайта тиклаш ва ўқишдан четлаштириш тартиби тўғрисидаги низомларни тасдиқлаш ҳақида» 2017 йил 20 июлдаги 393-сон ва « Олий таълим муассасаларига ўқишга қабул қилиш тартибини янада такомиллаштириш тўғрисида » 2018 йил 3 апрелдаги 261-сон қарорларида белгиланган тартибда амалга оширилади;

давлат органларининг марказий аппаратида солиқлар ва солиққа тортиш, молиявий назорат ва аудит ҳамда солиқ, молия ва тижорат ҳуқуқи, шунингдек иқтисодиётда ахборот технологиялари соҳаларида камида беш йил иш стажига эга бўлган раҳбар ходимларни Институт магистратурасига ишлаб чиқаришдан ажралмаган ҳолда масофавий, сиртқи ва кечки таълим ўқитиш дастурлари бўйича ўқиши учун қабул қилиш тегишли давлат органининг биринчи раҳбари тавсиясига кўра кириш тест синовларисиз, тўлов-шартнома асосида қабул параметрларидан ташқари амалга оширилади;

Институтда бакалавриатни имтиёзли тугатган битирувчилар, истисно тариқасида, Институт магистратурасига тест синовларисиз, тўлов-шартнома асосида, ўқиш қийматининг 50 фоизини тўлаб, қабул параметрларидан ташқари, ўқишни тугатгандан сўнг давлат солиқ хизмати органларида камида уч йил узлуксиз ишлаш мажбуриятини юклаган ҳолда қабул қилинади;

Давлат солиқ қўмитасига Қорақалпоғистон Республикаси, вилоятлар ва Тошкент шаҳар давлат солиқ бошқармалари тавсиясига мувофиқ «темир дафтар»га киритилган оилаларнинг фарзандлари бўлган ҳамда Институтга талабаликка тавсия этилган ёшлар учун халқаро молия ташкилотларининг грантлари, ҳомийлик хайриялари ва қонунчилик ҳужжатларида тақиқланмаган бошқа манбалар ҳисобидан тўлов-шартномаси ёки субсидия ажратиш орқали молиялаштириладиган алоҳида қабул параметрларини белгилашга рухсат берилади.

3. Давлат солиқ қўмитасининг Институт фаолияти ва илмий ўқув жараёнини ташкил этиш юзасидан қуйидагиларни назарда тутувчи таклифлари маъқуллансин:

таълим дастурларига, халқаро профессионал ассоциациялар ва бирлашмаларнинг малака сертификатлари бўйича касбий кўникмалар ва махсус билимларни ўзлаштиришга доир фанларни жорий этиш;

Давлат солиқ қўмитаси буюртмаси асосида давлат солиқ хизмати органлари ходимларининг малакасини ошириш ва уларни қайта тайёрлаш;

давлат органлари ва хўжалик юритувчи субъектларнинг буюртмалари бўйича шартнома асосида раҳбар ва ходимларни қайта тайёрлаш ҳамда малакасини ошириш курсларини ташкил этиш;

Давлат солиқ қўмитасининг буюртмасига асосан солиққа тортиш ҳамда молиявий назорат соҳаларида фундаментал, амалий ва инновацион илмий-тадқиқотлар олиб боришни жорий этиш.

4. Институт ректорига бюджетдан ташқари маблағлар ҳисобидан қуйидаги тадбирларни амалга ошириш ҳуқуқи берилсин:

Институт истиқболли кундузги таълим битирувчилари ва ходимларининг хорижий таълим ва илмий ташкилотлари магистратура ва докторантурасида ўқиш қиймати ва у билан боғлиқ харажатлар учун тўловларни улар ўқиш тугатгандан сўнг Институтда камида беш йил узлуксиз ишлаш шарти билан амалга ошириш;

Институт ва солиқ техникумларининг иқтидорли талаба ҳамда ўқувчиларига стипендия ажратиш;

хорижий ва маҳаллий малакали мутахассисларни Институтда таълим жараёнларига консультант, маърузачи ва ўқитувчи сифатида жалб этиш;

Институт ходимларини етакчи хорижий таълим муассасаларига ва бошқа ташкилотларга стажировка ўташ учун юбориш.

5. Белгилаб қўйилсинки:

а) солиқ техникумлари битирувчилари, шунингдек Давлат солиқ қўмитаси тизимидаги Фарғона, Тошкент ва Бухоро солиқ коллежларининг давлат солиқ хизмати органларида камида икки йиллик иш стажига эга бўлган битирувчилари Институтнинг бакалавриат таълим йўналишларига ўқишнинг иккинчи йилидан бошлаб ўқишга қабул қилинади;

б) қуйидагилар солиқ техникумлари фаолиятини молиялаштириш манбалари ҳисобланади:

Ўзбекистон Республикасининг Давлат бюджети маблағлари;

тўлов-шартнома асосида ўқитишдан тушадиган маблағлар;

хўжалик фаолияти ва шартнома асосида хизматлар кўрсатишдан тушадиган маблағлар;

жисмоний ва юридик шахсларнинг ҳомийлик хайриялари;

халқаро молия ташкилотларининг грантлари;

қонунчилик ҳужжатларида тақиқланмаган бошқа манбалар.

в) Бунда Институтнинг бакалавриат таълим йўналишларига ўқишнинг иккинчи йилидан бошлаб ўқишга қабул қилиш Давлат солиқ қўмитаси томонидан тасдиқланадиган тартибда амалга оширилади.

6. Ўзбекистон Республикаси Иқтисодий тараққиёт ва камбағалликни қисқартириш вазирлиги, Молия вазирлиги, Олий ва ўрта махсус таълим вазирлиги, Давлат солиқ қўмитаси Институт ва солиқ техникумларига ўз идораларидаги статистик, архив ва бошқа маълумотлардан (ахборотдан фойдаланиш қонун билан чекланган ҳолатлар бундан мустасно) фойдаланиш имкониятини яратсин.

7. Қуйидагилар:

Ўзбекистон Республикаси Давлат солиқ қўмитаси ҳузуридаги Фискал институтнинг Васийлик кенгаши таркиби 1-иловага мувофиқ;

Васийлик кенгашининг вазифалари ва ваколатларини белгилаш, фаолиятини ташкил этиш ва тугатиш ҳамда қарорлар қабул қилиш ва уларнинг бажарилишини ташкил этишни назарда тутувчи Ўзбекистон Республикаси Давлат солиқ қўмитаси ҳузуридаги Фискал институтнинг Васийлик кенгаши тўғрисидаги низом 2-иловага мувофиқ тасдиқлансин.

8. Ўзбекистон Республикаси Ҳукуматининг 3-иловага мувофиқ айрим қарорлари ўз кучини йўқотган деб ҳисоблансин.

9. Давлат солиқ қўмитаси манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.

10. Мазкур қарорнинг бажарилишини назорат қилиш Ўзбекистон Республикаси Бош вазирининг молия-иқтисодиёт ва камбағалликни қисқартириш масалалари бўйича ўринбосари — иқтисодий тараққиёт ва камбағалликни қисқартириш вазири Ж.А. Қўчқоров ҳамда Ўзбекистон Республикаси Давлат солиқ қўмитаси раиси Ш.Д. Кудбиев зиммасига юклансин.

Вазирлар Маҳкамасининг 2021 йил 17 июндаги 377-сон қарорига 1-ИЛОВА

Ўзбекистон Республикаси Давлат солиқ қўмитаси ҳузуридаги Фискал институтнинг Васийлик кенгаши

1. Ш.Д. Кудбиев — Ўзбекистон Республикаси Давлат соли қ қ ўмитаси раиси , Васийлик кенгаши раиси 2. М.М. Махкамов — Ўзбекистон Республикаси Давлат солиқ қўмитаси раиси ўринбосари, Васийлик кенгаши раиси ўринбосари 3. И.И. Норқулов — Ўзбекистон Республикаси Иқтисодий тараққиёт ва камбағалликни қисқартириш вазирининг биринчи ўринбосари 4. Д.Ш. Султанов — Ўзбекистон Республикаси молия вазири ўринбосари 5. О.А. Пекос — Ўзбекистон Республикаси ахборот технологиялари ва коммуникацияларини ривожлантириш вазирининг биринчи ўринбосари вазифасини бажарувчи 6. Лавозимига кўра — Ўзбекистон Республикаси олий ва ўрта махсус таълим вазирининг биринчи ўринбосари 7. И.М. Мухторов — Ўзбекистон Республикаси Давлат божхона қўмитаси раисининг биринчи ўринбосари 8. Н.Ф. Каримов — Ўзбекистон аудиторлар палатаси кенгаши раиси 9. М.М. Тулаходжаева — Ўзбекистон бухгалтерлар ва аудиторлар миллий ассоциацияси кенгаши раиси 10. Б.С. Набижонов — Ўзбекистон солиқ маслаҳатчилари палатаси бошқаруви раиси 11. Ш.С. Қаюмов — Ўзбекистон Республикаси Давлат солиқ қўмитаси ҳузуридаги «Янги технологиялар илмий-ахборот маркази» ДУК директори 12. А.С. Линников — Россия Федерацияси Ҳукумати ҳузуридаги Молия университети халқаро масалалар бўйича проректори (келишув асосида) 13. М. Каселяускас — Халқаро валюта жамғармаси эксперти (келишув асосида) 14. Лавозимига кўра — Ўзбекистон Республикаси Давлат солиқ қўмитаси ҳузуридаги Фискал институт ректори, Васийлик кенгаши котиби

Вазирлар Маҳкамасининг 2021 йил 17 июндаги 377-сон қарорига 2-ИЛОВА

Ўзбекистон Республикаси Давлат солиқ қўмитаси ҳузуридаги Фискал институтнинг Васийлик кенгаши тўғрисида

1-боб. Умумий қоидалар

1. Ушбу Низом Ўзбекистон Республикаси Давлат солиқ қўмитаси ҳузуридаги Фискал институтнинг (кейинги ўринларда — Институт) Васийлик кенгаши (кейинги ўринларда — Кенгаш) фаолиятини тартибга солади.

2. Кенгаш Институтнинг жамоатчилик органи бўлиб, юридик шахс ҳисобланмайди.

3. Кенгаш ўз фаолиятини жамоатчилик асосида Ўзбекистон Республикаси Конституциясига ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Вазирлар Маҳкамасининг қарорлари ва фармойишларига, ушбу Низомга ҳамда бошқа қонунчилик ҳужжатларига мувофиқ амалга оширади.

4. Таълим жараёнида ижтимоий шериклик тамойилларини самарали амалга ошириш, таълим сифатини яхшилаш, Институтнинг моддий-техник базасини мустаҳкамлаш ва таълим жараёнини такомиллаштириш Кенгашнинг асосий мақсадлари ҳисобланади.

5. Кенгаш таркибига давлат органларининг, нодавлат нотижорат ташкилотларининг вакиллари, ҳомийлар, шунингдек, Институт фаолиятини такомиллаштириш ва ривожлантиришдан манфаатдор бўлган бошқа шахслар кириши мумкин.

2-боб. Кенгаш вазифалари ва ваколатлари

6. Қуйидагилар Кенгашнинг асосий вазифалари ҳисобланади:

таълим жараёнини ҳамда талабаларнинг ишлаб чиқариш амалиётини самарали ташкил этиш ва такомиллаштириш, шунингдек, Институт битирувчиларини келгусида ишлаб чиқариш, фан ва таълимни интеграциялашни ривожлантириш орқали ишга жойлаштиришга кўмаклашиш;

бакалаврлар ва магистрлар тайёрлаш сифатини ҳамда илмий-тадқиқотлар самарадорлигини оширишни ташкил этиш;

келгусида меҳнат бозори ривожланишини ҳисобга олган ҳолда мутахассислар ва илмий-техник кадрларни тайёрлашнинг истиқболли йўналишларини аниқлашда Институтга кўмаклашиш;

мутахассислар тайёрлаш сифатига кўмаклашадиган истиқболли дастурларни молиялаштириш ва амалга ошириш;

Институтда илмий-тадқиқот ва инновация фаолиятини ривожлантириш, фундаментал (амалий) илмий-техник ишланмаларни амалга ошириш, ўқув ва илмий жараёнларни оқилона интеграциялаш;

талабаларнинг бевосита ишлаб чиқаришдаги амалий машғулотларини ташкил этиш;

ишлаб чиқариш ва хизматлар кўрсатиш соҳасидаги малакали ва тажрибали мутахассисларни таълим жараёнига жалб этиш;

Институт педагог кадрларининг меҳнат шароитларини яхшилаш ҳамда уларнинг малака ошириш ва қайта тайёрлашдан ўтишларини ташкил этиш;

Институт фаолиятининг изчил ривожлантирилишини таъминлаш учун ҳомийлик хайрияларини, грантлар ва қонунчилик ҳужжатларида тақиқланмаган бошқа маблағларни жалб этиш;

эҳтиёжманд талабаларни ижтимоий ҳимоялашни таъминлаш, иқтидорли талабаларга стипендиялар ажратиш, ижарада турувчи талабалар учун яшаш ва ҳордиқ чиқариш шароитларини яхшилаш, шунингдек, таътиллар даврида талабаларнинг дам олишини ташкил этишга кўмаклашиш;

Институтни замонавий ўқув-лаборатория анжомлари ва ўқув-методик адабиётлар билан таъминлаш, илмий-тадқиқот ва инновация фаолиятини қўллаб-қувватлаш ва рағбатлантириш, Институтнинг замонавий илмий лабораторияларини шакллантириш ва ривожлантириш;

Институтда соғлом интеллектуал ва маънавий-психологик, педагоглар ва талабалар ўртасида ўзаро ҳамфикрлик муҳитини шакллантиришга, уларда касбий, маънавий, интеллектуал ва жисмоний такомиллашувга доимий интилишни тарбиялашга йўналтирилган тадбирларни амалга ошириш;

муаллифлик ўқув дастурлари, методик қўлланмалар, тавсияномалар, дидактик материаллар ҳамда бошқа ўқув-методик ҳужжатларни ишлаб чиқиш ва нашр этишга ҳомийлик қилиш;

иқтидорли талабаларни етакчи хорижий таълим муассасаларига тажриба орттиришга юбориш бўйича таклифларни шакллантириш, улар учун махсус стипендиялар таъсис этиш;

Институтнинг профессор-ўқитувчилар таркиби, катта илмий ходимлари — изланувчилари ва талабалари учун халқаро тажриба алмашишни ташкил этишга кўмаклашиш.

7. Кенгаш ўзига юкланган вазифаларни бажариш мақсадида:

Институтдан зарур маълумотлар ва ахборотларни белгиланган тартибда олади;

Кенгаш тўғрисидаги низомга ўзгартиш ва қўшимчалар киритиш бўйича таклифларни ишлаб чиқади ва белгиланган тартибда киритади;

Институтнинг иш режаларини, тадбирлар режаларини, дастурларини ва бошқа ҳужжатларини муҳокама этишда қатнашади, уларни такомиллаштиришга доир таклифлар киритади;

Институтда кадрлар тайёрлаш сифатини яхшилаш бўйича таклифлар киритади, шунингдек, Институт ректорига Институт ходимлари ва талабаларини моддий ва маънавий рағбатлантириш тўғрисида тавсияномалар тақдим этади;

Кенгашнинг маблағ тушумлари ва маблағларининг сарфланиши бўйича молиявий режани тасдиқлайди;

Кенгаш маблағлари бўйича молиявий режанинг ижроси тўғрисидаги ҳисоботларни кўриб чиқади;

Кенгаш маблағларидан мақсадли ва самарали фойдаланилишини текшириш учун назорат-тафтиш комиссиясини тайинлайди.

Кенгаш қонунчилик ҳужжатларига ва Институт уставига мувофиқ бошқа ваколатларга ҳам эга бўлиши мумкин.

3-боб. Кенгаш фаолиятини ташкил этиш

8. Кенгаш иштирок этишнинг ихтиёрийлиги ва Кенгаш ваколатига тегишли масалаларни ҳал этишда унинг барча аъзоларининг тенг ҳуқуқлилиги тамойиллари асосида шакллантирилади.

Кенгаш, қоидага кўра, Кенгаш раиси, раиснинг ўринбосари, котиб ва аъзолардан иборат таркибда шакллантирилади.

Кенгашнинг таркиби Вазирлар Маҳкамаси томонидан тасдиқланади.

Институт ректори лавозимига кўра Кенгаш котиби ҳисобланади.

9. Ўзбекистон Республикаси Давлат солиқ қўмитаси раиси Кенгашга раислик қилади.

Кенгаш ўз ваколатларини Институт ректорига бериш ҳуқуқига эга эмас.

10. Кенгаш раиси:

Кенгаш мажлиси кун тартибини белгилайди ва уни чақиради;

Кенгаш қарорларини тасдиқлайди ва уларнинг бажарилиши назорат қилинишини ташкил этади;

Кенгашнинг йиллик иш режаси бажарилиши тўғрисидаги ҳисоботни Кенгашга тақдим этади;

Кенгаш аъзоларига юкланган вазифалар бажарилиши юзасидан уларнинг ишини мувофиқлаштиради;

давлат органлари ва бошқа ташкилотларда Кенгаш номидан вакиллик қилади;

Кенгашнинг самарали ишлашини таъминлаш учун бошқа ваколатларни амалга оширади.

11. Кенгаш раиси ўринбосарининг ваколатлари Кенгашнинг қарори билан белгиланади.

12. Кенгаш аъзолари қуйидаги ҳуқуқларга эга:

Кенгаш мажлисларида кўриб чиқиладиган масалаларни муҳокама қилиш ва ҳал этишда қатнашиш;

Институтда таълим жараёнини ривожлантиришнинг долзарб масалалари бўйича Кенгашга таклифлар киритиш;

Кенгаш томонидан кўриб чиқиладиган масалалар бўйича хулоса тақдим этиш.

Кенгаш аъзолари Кенгаш таркибида ўз фаолиятини жамоатчилик асосида амалга оширадилар.

Кенгаш аъзолари мажлисда шахсан қатнашиши керак. Бундай қатнашишнинг имкони бўлмаган тақдирда, Кенгаш аъзоси мажлиснинг кун тартиби бўйича ўз фикрини Кенгашга ёзма равишда тақдим этишга ҳақлидир.

13. Кенгаш ўз мажлисларини заруриятга кўра, бироқ йил чорагида камида бир марта ўтказади. Кенгаш раиси томонидан унинг аъзоларининг ёзма илтимосномалари асосида навбатдан ташқари мажлислар чақирилиши мумкин. Илтимосномаларда навбатдан ташқари мажлисни чақиришнинг сабаблари ва асослари баён қилиниши керак.

14. Кенгаш мажлисини Кенгаш раиси, у бўлмаган тақдирда эса — Кенгаш раисининг ўринбосари бошқаради.

Кенгаш мажлиси унда Кенгаш аъзоларининг камида учдан икки қисми қатнашганда ваколатли ҳисобланади.

Мажлисни ўтказиш учун кворум ёки раис ва унинг ўринбосари бўлмаганда, Кенгаш мажлисини ўтказишнинг янги санаси эълон қилинади.

15. Кенгаш мажлисига кўриб чиқиладиган масалаларнинг хусусиятига кўра давлат органлари ва бошқа ташкилотларнинг раҳбарлари ва мутахассислари, олий таълим муассасасининг ходимлари, айрим жисмоний шахслар таклиф этилиши мумкин.

16. Кенгаш котиби:

Кенгаш мажлисларига барча зарур ҳужжатларнинг ўз вақтида тайёрланишини таъминлайди;

мажлисларни ўтказиш муддатлари ва жойини Кенгаш раиси билан келишади;

кун тартиби масалалари бўйича Кенгаш мажлислари ўтказилишини ташкил этади;

Кенгаш аъзолари ва таклиф этилган шахсларни мажлиснинг санаси, кун тартиби лойиҳаси, мажлисни ўтказиш вақти ва жойидан хабардор қилади;

Кенгаш қарорлари бажарилиши мониторингини юритади;

Кенгаш баённомаларини расмийлаштиради ва тасдиқланган баённомаларни Кенгаш аъзоларига ва бошқа манфаатдор ташкилотларга юборади.

Кенгаш котиби Кенгаш аъзоси ҳисобланади.

17. Кенгаш ўз фаолиятини Институт ректори билан ўзаро ҳамкорликда амалга оширади.

4-боб. Кенгаш томонидан қарорлар қабул қилиш ва уларнинг бажарилишини ташкил этиш

18. Кенгаш қарори Кенгашнинг мажлисда қатнашган аъзоларининг кўпчилик овози билан қабул қилинади. Овозлар тенг бўлган тақдирда, Кенгаш раисининг овози ҳал қилувчи ҳисобланади.

Кенгаш аъзолари томонидан Институтга тақдим этилган маблағлар бўйича тушумлар ва сарфларнинг йиллик молиявий режасини, шунингдек, васийлик маблағларидан фойдаланилишини тасдиқлаш масалалари бўйича қарор Кенгашнинг мажлисда қатнашган аъзоларининг кўпчилик овози билан қабул қилинади.

19. Кенгаш қарорлари Кенгаш мажлисининг баённомаси билан расмийлаштирилади. Кенгаш мажлисининг баённомаси Кенгаш раиси томонидан тасдиқланади ва бир ҳафта муддатда Кенгаш аъзоларига ва манфаатдор ташкилотларга юборилади.

20. Кенгаш баённомасининг асл нусхаси ва унинг материаллари Институтда сақланади.

Институт ректори Кенгаш ҳужжатларининг сақланишини таъминлаш учун шарт-шароитлар яратади.

21. Кенгаш котиби Кенгаш аъзоларининг ёрдамида Кенгаш қарорларининг бажарилишини мунтазам равишда ўрганади ва кўриб чиқади, зарурият бўлганда, Кенгаш раисига тегишли таклифлар киритади.

Кенгаш қабул қилинган қарорларнинг ижро этилиши ҳолатини ўз мажлисларида мунтазам равишда кўриб чиқади.

22. Кенгашнинг иш тартиби Кенгаш тасдиқлайдиган регламентда белгиланади.

5-боб. Васийлик маблағлари

23. Васийлик маблағлари вакиллари Кенгаш аъзолари ҳисобланадиган ташкилотларнинг, шунингдек, Кенгаш аъзоларининг хайриялари, ихтиёрий бадаллари шаклида Кенгаш томонидан Институтга жалб этиладиган қонунчилик ҳужжатларида тақиқланмаган маблағлар ҳисобига шакллантирилади.

Васийлик маблағлари мол-мулк, пул маблағлари, бошқа моддий ва номоддий активлар шаклида киритилади.

24. Васийлик маблағларидан Кенгашнинг мақсадлари, вазифалари ва ваколатларини амалга ошириш ва уларга эришиш учун фойдаланилиши мумкин.

25. Васийлик маблағлари Институтнинг алоҳида ҳисобварағида жамланади ва улардан белгиланган тартибда фойдаланилади.

26. Васийлик маблағлари сарфланишининг йўналиши, мақсади ва ҳажми Кенгаш мажлисида тасдиқланади.

Васийлик маблағлари сарфининг молиявий режасига Институтдаги Кенгаш фаолияти билан боғлиқ жорий харажатлар киритилади.

27. Васийлик маблағлари бўйича даромадлар ва харажатлар сметаси Кенгашнинг қарори асосида Институт ректори томонидан тасдиқланади.

Заруратга кўра васийлик маблағлари харажатлар сметасига қонунчилик ҳужжатларида белгиланган тартибда ўзгартиришлар киритилиши мумкин.

28. Васийлик маблағларининг бухгалтерия ҳисоби тўғри юритилиши, маблағлар зарур тарзда расмийлаштирилиши ва улардан мақсадли фойдаланилишини назорат қилиш учун Институтнинг ректори ва бош бухгалтери жавоб беради.

Васийлик маблағларининг жорий йилда фойдаланилмаган қолдиғи олиб қўйилмайди ва кейинги йилга ўтади.

29. Кенгаш васийлик маблағларидан тўғри, мақсадли ва самарали фойдаланилиши устидан молиявий назоратни амалга оширади.

Назоратни амалга ошириш учун Кенгашнинг назорат-тафтиш комиссияси тайинланади.

Кенгаш назорат-тафтиш комиссиясининг раиси ва аъзоларини тайинлаш тартиби, уларнинг ваколатлари муддатлари ва тафтишларни ўтказиш даврийлиги Кенгаш қарори билан белгиланади.

30. Кенгашнинг назорат-тафтиш комиссияси бир йилда бир марта васийлик маблағлари ҳисобига амалга оширилган сарф-харажатларни тафтиш қилади ҳамда васийлик маблағларидан мақсадли ва самарали фойдаланилганлиги юзасидан Кенгаш олдида ҳисобот беради.

31. Молия-хўжалик фаолияти билан боғлиқ келишмовчиликлар қонунчилик ҳужжатларида назарда тутилган тартибда ҳал этилади.

6-боб. Кенгаш фаолиятини тугатиш

32. Кенгаш қонунчилик ҳужжатларида белгиланган тартибда тарқатиб юборилади.

33. Кенгаш тарқатиб юборилган тақдирда, унинг васийлик маблағларини бошқариш бўйича ваколати вақтинча Институтнинг Кенгашига берилади.

Вазирлар Маҳкамасининг 2021 йил 17 июндаги 377-сон қарорига 3-ИЛОВА

Ўзбекистон Республикаси Ҳукуматининг ўз кучини йўқотган деб ҳисобланаётган айрим қарорлари

1. Вазирлар Маҳкамасининг «Ўзбекистон Республикаси Давлат солиқ қўмитасининг Солиқ коллежини ташкил этиш тўғрисида» 1998 йил 14 июлдаги 298-сон қарори .

2. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш, шунингдек баъзиларини ўз кучини йўқотган деб ҳисоблаш тўғрисида» 2016 йил 26 апрелдаги 122-сон қарорига 1-илованинг 20-банди .

Ўзбекистон Республикасининг Бош вазири А. АРИПОВ

Тошкент ш.,

2021 йил 17 июнь,

377-сон

(Қонунчилик маълумотлари миллий базаси, 17.06.2021 й., 09/21/377/0565-сон; Қонунчилик маълумотлари миллий базаси, 22.09.2021 й., 09/21/595/0900-сон )

lex.uz

Oʻzbekiston Respublikasi Vazirlar Mahkamasining

qarori

TARKIBI

NIZOM

ROʻYXATI

Oʻzbekiston Respublikasi Davlat soliq qoʻmitasi huzuridagi Fiskal institut va soliq texnikumlari faoliyatini tashkil etishga doir qoʻshimcha chora-tadbirlar toʻgʻrisida

Oʻzbekiston Respublikasi Davlat soliq qoʻmitasi tizimidagi taʼlim muassasalari faoliyatini samarali tashkil etish hamda davlat soliq xizmati organlari tizimi uchun yuqori malakali kadrlar tayyorlashni taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Oʻzbekiston Respublikasi Davlat soliq qoʻmitasi huzurida Fiskal institutni tashkil etish toʻgʻrisida” 2020-yil 4-noyabrdagi PQ-4879-son qaroriga muvofiq:

Oʻzbekiston Respublikasi Davlat soliq qoʻmitasi (keyingi oʻrinlarda — Davlat soliq qoʻmitasi) huzuridagi Malaka oshirish markazi negizida Oʻzbekiston Respublikasi Davlat soliq qoʻmitasi huzuridagi Fiskal institut (keyingi oʻrinlarda — Institut) tashkil etilganligi;

Fargʻona, Toshkent va Buxoro soliq kollejlari 2020/2021 oʻquv yilidan boshlab Institut huzuridagi Fargʻona, Toshkent va Buxoro soliq texnikumlari (keyingi oʻrinlarda — soliq texnikumlari) etib qayta tashkil etilganligi maʼlumot uchun qabul qilinsin.

2. 2021/2022 oʻquv yilidan boshlab quyidagi tartib joriy etilishi inobatga olinsin:

Institutning bakalavriat taʼlim yoʻnalishi kunduzgi taʼlim shakli boʻyicha oʻqish davomiyligi toʻrt yil, sirtqi taʼlim shakli boʻyicha besh yil etib belgilanadi;

Institutning magistratura mutaxassisliklari kunduzgi taʼlim shakli boʻyicha oʻqish davomiyligi bir yil hamda masofaviy, sirtqi va kechki taʼlim shakli oʻqish davomiyligi ikki yil etib belgilanadi;

Institutning bakalavriat va magistratura mutaxassisliklariga oʻqishga qabul qilishda test sinovlarini ochiq va oshkora oʻtkazish, oʻqishga qabul qilish, talabalar oʻqishini koʻchirish, qayta tiklash va oʻqishdan chetlashtirish Vazirlar Mahkamasining “Oliy taʼlim muassasalariga oʻqishga qabul qilish, talabalar oʻqishini koʻchirish, qayta tiklash va oʻqishdan chetlashtirish tartibi toʻgʻrisidagi nizomlarni tasdiqlash haqida” 2017-yil 20-iyuldagi 393-son va “ Oliy taʼlim muassasalariga oʻqishga qabul qilish tartibini yanada takomillashtirish toʻgʻrisida ” 2018-yil 3-apreldagi 261-son qarorlarida belgilangan tartibda amalga oshiriladi;

davlat organlarining markaziy apparatida soliqlar va soliqqa tortish, moliyaviy nazorat va audit hamda soliq, moliya va tijorat huquqi, shuningdek iqtisodiyotda axborot texnologiyalari sohalarida kamida besh yil ish stajiga ega boʻlgan rahbar xodimlarni Institut magistraturasiga ishlab chiqarishdan ajralmagan holda masofaviy, sirtqi va kechki taʼlim oʻqitish dasturlari boʻyicha oʻqishi uchun qabul qilish tegishli davlat organining birinchi rahbari tavsiyasiga koʻra kirish test sinovlarisiz, toʻlov-shartnoma asosida qabul parametrlaridan tashqari amalga oshiriladi;

Institutda bakalavriatni imtiyozli tugatgan bitiruvchilar, istisno tariqasida, Institut magistraturasiga test sinovlarisiz, toʻlov-shartnoma asosida, oʻqish qiymatining 50 foizini toʻlab, qabul parametrlaridan tashqari, oʻqishni tugatgandan soʻng davlat soliq xizmati organlarida kamida uch yil uzluksiz ishlash majburiyatini yuklagan holda qabul qilinadi;

Davlat soliq qoʻmitasiga Qoraqalpogʻiston Respublikasi, viloyatlar va Toshkent shahar davlat soliq boshqarmalari tavsiyasiga muvofiq “temir daftar”ga kiritilgan oilalarning farzandlari boʻlgan hamda Institutga talabalikka tavsiya etilgan yoshlar uchun xalqaro moliya tashkilotlarining grantlari, homiylik xayriyalari va qonunchilik hujjatlarida taqiqlanmagan boshqa manbalar hisobidan toʻlov-shartnomasi yoki subsidiya ajratish orqali moliyalashtiriladigan alohida qabul parametrlarini belgilashga ruxsat beriladi.

3. Davlat soliq qoʻmitasining Institut faoliyati va ilmiy oʻquv jarayonini tashkil etish yuzasidan quyidagilarni nazarda tutuvchi takliflari maʼqullansin:

taʼlim dasturlariga, xalqaro professional assotsiatsiyalar va birlashmalarning malaka sertifikatlari boʻyicha kasbiy koʻnikmalar va maxsus bilimlarni oʻzlashtirishga doir fanlarni joriy etish;

Davlat soliq qoʻmitasi buyurtmasi asosida davlat soliq xizmati organlari xodimlarining malakasini oshirish va ularni qayta tayyorlash;

davlat organlari va xoʻjalik yurituvchi subyektlarning buyurtmalari boʻyicha shartnoma asosida rahbar va xodimlarni qayta tayyorlash hamda malakasini oshirish kurslarini tashkil etish;

Davlat soliq qoʻmitasining buyurtmasiga asosan soliqqa tortish hamda moliyaviy nazorat sohalarida fundamental, amaliy va innovatsion ilmiy-tadqiqotlar olib borishni joriy etish.

4. Institut rektoriga budjetdan tashqari mablagʻlar hisobidan quyidagi tadbirlarni amalga oshirish huquqi berilsin:

Institut istiqbolli kunduzgi taʼlim bitiruvchilari va xodimlarining xorijiy taʼlim va ilmiy tashkilotlari magistratura va doktoranturasida oʻqish qiymati va u bilan bogʻliq xarajatlar uchun toʻlovlarni ular oʻqish tugatgandan soʻng Institutda kamida besh yil uzluksiz ishlash sharti bilan amalga oshirish;

Institut va soliq texnikumlarining iqtidorli talaba hamda oʻquvchilariga stipendiya ajratish;

xorijiy va mahalliy malakali mutaxassislarni Institutda taʼlim jarayonlariga konsultant, maʼruzachi va oʻqituvchi sifatida jalb etish;

Institut xodimlarini yetakchi xorijiy taʼlim muassasalariga va boshqa tashkilotlarga stajirovka oʻtash uchun yuborish.

5. Belgilab qoʻyilsinki:

a) soliq texnikumlari bitiruvchilari, shuningdek Davlat soliq qoʻmitasi tizimidagi Fargʻona, Toshkent va Buxoro soliq kollejlarining davlat soliq xizmati organlarida kamida ikki yillik ish stajiga ega boʻlgan bitiruvchilari Institutning bakalavriat taʼlim yoʻnalishlariga oʻqishning ikkinchi yilidan boshlab oʻqishga qabul qilinadi;

b) quyidagilar soliq texnikumlari faoliyatini moliyalashtirish manbalari hisoblanadi:

Oʻzbekiston Respublikasining Davlat budjeti mablagʻlari;

toʻlov-shartnoma asosida oʻqitishdan tushadigan mablagʻlar;

xoʻjalik faoliyati va shartnoma asosida xizmatlar koʻrsatishdan tushadigan mablagʻlar;

jismoniy va yuridik shaxslarning homiylik xayriyalari;

xalqaro moliya tashkilotlarining grantlari;

qonunchilik hujjatlarida taqiqlanmagan boshqa manbalar.

v) Bunda Institutning bakalavriat taʼlim yoʻnalishlariga oʻqishning ikkinchi yilidan boshlab oʻqishga qabul qilish Davlat soliq qoʻmitasi tomonidan tasdiqlanadigan tartibda amalga oshiriladi.

6. Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi, Moliya vazirligi, Oliy va oʻrta maxsus taʼlim vazirligi, Davlat soliq qoʻmitasi Institut va soliq texnikumlariga oʻz idoralaridagi statistik, arxiv va boshqa maʼlumotlardan (axborotdan foydalanish qonun bilan cheklangan holatlar bundan mustasno) foydalanish imkoniyatini yaratsin.

7. Quyidagilar:

Oʻzbekiston Respublikasi Davlat soliq qoʻmitasi huzuridagi Fiskal institutning Vasiylik kengashi tarkibi 1-ilovaga muvofiq;

Vasiylik kengashining vazifalari va vakolatlarini belgilash, faoliyatini tashkil etish va tugatish hamda qarorlar qabul qilish va ularning bajarilishini tashkil etishni nazarda tutuvchi Oʻzbekiston Respublikasi Davlat soliq qoʻmitasi huzuridagi Fiskal institutning Vasiylik kengashi toʻgʻrisidagi nizom 2-ilovaga muvofiq tasdiqlasin.

8. Oʻzbekiston Respublikasi Hukumatining 3-ilovaga muvofiq ayrim qarorlari oʻz kuchini yoʻqotgan deb hisoblansin.

9. Davlat soliq qoʻmitasi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — iqtisodiy taraqqiyot va kambagʻallikni qisqartirish vaziri J.A. Qoʻchqorov hamda Oʻzbekiston Respublikasi Davlat soliq qoʻmitasi raisi Sh.D. Kudbiyev zimmasiga yuklansin.

Vazirlar Mahkamasining 2021-yil 17-iyundagi 377-son qaroriga 1-ILOVA

Oʻzbekiston Respublikasi Davlat soliq qoʻmitasi huzuridagi Fiskal institutning Vasiylik kengashi

1. Sh.D. Kudbiyev — Oʻzbekiston Respublikasi Davlat soli q q oʻmitasi raisi , Vasiylik kengashi raisi 2. M.M. Maxkamov — Oʻzbekiston Respublikasi Davlat soliq qoʻmitasi raisi oʻrinbosari, Vasiylik kengashi raisi oʻrinbosari 3. I.I. Norqulov — Oʻzbekiston Respublikasi Iqtisodiy taraqqiyot va kambagʻallikni qisqartirish vazirining birinchi oʻrinbosari 4. D.Sh. Sultanov — Oʻzbekiston Respublikasi moliya vaziri oʻrinbosari 5. O.A. Pekos — Oʻzbekiston Respublikasi axborot texnologiyalari va kommunikatsiyalarini rivojlantirish vazirining birinchi oʻrinbosari vazifasini bajaruvchi 6. Lavozimiga koʻra — Oʻzbekiston Respublikasi oliy va oʻrta maxsus taʼlim vazirining birinchi oʻrinbosari 7. I.M. Muxtorov — Oʻzbekiston Respublikasi Davlat bojxona qoʻmitasi raisining birinchi oʻrinbosari 8. N.F. Karimov — Oʻzbekiston auditorlar palatasi kengashi raisi 9. M.M. Tulaxodjayeva — Oʻzbekiston buxgaltyerlar va auditorlar milliy assotsiatsiyasi kengashi raisi 10. B.S. Nabijonov — Oʻzbekiston soliq maslahatchilari palatasi boshqaruvi raisi 11. Sh.S. Qayumov — Oʻzbekiston Respublikasi Davlat soliq qoʻmitasi huzuridagi “Yangi texnologiyalar ilmiy-axborot markazi” DUK direktori 12. A.S. Linnikov — Rossiya Federatsiyasi Hukumati huzuridagi Moliya universiteti xalqaro masalalar boʻyicha prorektori (kelishuv asosida) 13. M. Kaselyauskas — Xalqaro valyuta jamgʻarmasi eksperti (kelishuv asosida) 14. Lavozimiga koʻra — Oʻzbekiston Respublikasi Davlat soliq qoʻmitasi huzuridagi Fiskal institut rektori, Vasiylik kengashi kotibi

Vazirlar Mahkamasining 2021-yil 17-iyundagi 377-son qaroriga 2-ILOVA

Oʻzbekiston Respublikasi Davlat soliq qoʻmitasi huzuridagi Fiskal institutning Vasiylik kengashi toʻgʻrisida

1-bob. Umumiy qoidalar

1. Ushbu Nizom Oʻzbekiston Respublikasi Davlat soliq qoʻmitasi huzuridagi Fiskal institutning (keyingi oʻrinlarda — Institut) Vasiylik kengashi (keyingi oʻrinlarda — Kengash) faoliyatini tartibga soladi.

2. Kengash Institutning jamoatchilik organi boʻlib, yuridik shaxs hisoblanmaydi.

3. Kengash oʻz faoliyatini jamoatchilik asosida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, ushbu Nizomga hamda boshqa qonunchilik hujjatlariga muvofiq amalga oshiradi.

4. Taʼlim jarayonida ijtimoiy sheriklik tamoyillarini samarali amalga oshirish, taʼlim sifatini yaxshilash, Institutning moddiy-texnik bazasini mustahkamlash va taʼlim jarayonini takomillashtirish Kengashning asosiy maqsadlari hisoblanadi.

5. Kengash tarkibiga davlat organlarining, nodavlat notijorat tashkilotlarining vakillari, homiylar, shuningdek, Institut faoliyatini takomillashtirish va rivojlantirishdan manfaatdor boʻlgan boshqa shaxslar kirishi mumkin.

2-bob. Kengash vazifalari va vakolatlari

6. Quyidagilar Kengashning asosiy vazifalari hisoblanadi:

taʼlim jarayonini hamda talabalarning ishlab chiqarish amaliyotini samarali tashkil etish va takomillashtirish, shuningdek, Institut bitiruvchilarini kelgusida ishlab chiqarish, fan va taʼlimni integratsiyalashni rivojlantirish orqali ishga joylashtirishga koʻmaklashish;

bakalavrlar va magistrlar tayyorlash sifatini hamda ilmiy-tadqiqotlar samaradorligini oshirishni tashkil etish;

kelgusida mehnat bozori rivojlanishini hisobga olgan holda mutaxassislar va ilmiy-texnik kadrlarni tayyorlashning istiqbolli yoʻnalishlarini aniqlashda Institutga koʻmaklashish;

mutaxassislar tayyorlash sifatiga koʻmaklashadigan istiqbolli dasturlarni moliyalashtirish va amalga oshirish;

Institutda ilmiy-tadqiqot va innovatsiya faoliyatini rivojlantirish, fundamental (amaliy) ilmiy-texnik ishlanmalarni amalga oshirish, oʻquv va ilmiy jarayonlarni oqilona integratsiyalash;

talabalarning bevosita ishlab chiqarishdagi amaliy mashgʻulotlarini tashkil etish;

ishlab chiqarish va xizmatlar koʻrsatish sohasidagi malakali va tajribali mutaxassislarni taʼlim jarayoniga jalb etish;

Institut pedagog kadrlarining mehnat sharoitlarini yaxshilash hamda ularning malaka oshirish va qayta tayyorlashdan oʻtishlarini tashkil etish;

Institut faoliyatining izchil rivojlantirilishini taʼminlash uchun homiylik xayriyalarini, grantlar va qonunchilik hujjatlarida taqiqlanmagan boshqa mablagʻlarni jalb etish;

ehtiyojmand talabalarni ijtimoiy himoyalashni taʼminlash, iqtidorli talabalarga stipendiyalar ajratish, ijarada turuvchi talabalar uchun yashash va hordiq chiqarish sharoitlarini yaxshilash, shuningdek, taʼtillar davrida talabalarning dam olishini tashkil etishga koʻmaklashish;

Institutni zamonaviy oʻquv-laboratoriya anjomlari va oʻquv-metodik adabiyotlar bilan taʼminlash, ilmiy-tadqiqot va innovatsiya faoliyatini qoʻllab-quvvatlash va ragʻbatlantirish, Institutning zamonaviy ilmiy laboratoriyalarini shakllantirish va rivojlantirish;

Institutda sogʻlom intellektual va maʼnaviy-psixologik, pedagoglar va talabalar oʻrtasida oʻzaro hamfikrlik muhitini shakllantirishga, ularda kasbiy, maʼnaviy, intellektual va jismoniy takomillashuvga doimiy intilishni tarbiyalashga yoʻnaltirilgan tadbirlarni amalga oshirish;

mualliflik oʻquv dasturlari, metodik qoʻllanmalar, tavsiyanomalar, didaktik materiallar hamda boshqa oʻquv-metodik hujjatlarni ishlab chiqish va nashr etishga homiylik qilish;

iqtidorli talabalarni yetakchi xorijiy taʼlim muassasalariga tajriba orttirishga yuborish boʻyicha takliflarni shakllantirish, ular uchun maxsus stipendiyalar taʼsis etish;

Institutning professor-oʻqituvchilar tarkibi, katta ilmiy xodimlari — izlanuvchilari va talabalari uchun xalqaro tajriba almashishni tashkil etishga koʻmaklashish.

7. Kengash oʻziga yuklangan vazifalarni bajarish maqsadida:

Institutdan zarur maʼlumotlar va axborotlarni belgilangan tartibda oladi;

Kengash toʻgʻrisidagi nizomga oʻzgartish va qoʻshimchalar kiritish boʻyicha takliflarni ishlab chiqadi va belgilangan tartibda kiritadi;

Institutning ish rejalarini, tadbirlar rejalarini, dasturlarini va boshqa hujjatlarini muhokama etishda qatnashadi, ularni takomillashtirishga doir takliflar kiritadi;

Institutda kadrlar tayyorlash sifatini yaxshilash boʻyicha takliflar kiritadi, shuningdek, Institut rektoriga Institut xodimlari va talabalarini moddiy va maʼnaviy ragʻbatlantirish toʻgʻrisida tavsiyanomalar taqdim etadi;

Kengashning mablagʻ tushumlari va mablagʻlarining sarflanishi boʻyicha moliyaviy rejani tasdiqlaydi;

Kengash mablagʻlari boʻyicha moliyaviy rejaning ijrosi toʻgʻrisidagi hisobotlarni koʻrib chiqadi;

Kengash mablagʻlaridan maqsadli va samarali foydalanilishini tekshirish uchun nazorat-taftish komissiyasini tayinlaydi.

Kengash qonunchilik hujjatlariga va Institut ustaviga muvofiq boshqa vakolatlarga ham ega boʻlishi mumkin.

3-bob. Kengash faoliyatini tashkil etish

8. Kengash ishtirok etishning ixtiyoriyligi va Kengash vakolatiga tegishli masalalarni hal etishda uning barcha aʼzolarining teng huquqliligi tamoyillari asosida shakllantiriladi.

Kengash, qoidaga koʻra, Kengash raisi, raisning oʻrinbosari, kotib va aʼzolardan iborat tarkibda shakllantiriladi.

Kengashning tarkibi Vazirlar Mahkamasi tomonidan tasdiqlanadi.

Institut rektori lavozimiga koʻra Kengash kotibi hisoblanadi.

9. Oʻzbekiston Respublikasi Davlat soliq qoʻmitasi raisi Kengashga raislik qiladi.

Kengash oʻz vakolatlarini Institut rektoriga berish huquqiga ega emas.

10. Kengash raisi:

Kengash majlisi kun tartibini belgilaydi va uni chaqiradi;

Kengash qarorlarini tasdiqlaydi va ularning bajarilishi nazorat qilinishini tashkil etadi;

Kengashning yillik ish rejasi bajarilishi toʻgʻrisidagi hisobotni Kengashga taqdim etadi;

Kengash aʼzolariga yuklangan vazifalar bajarilishi yuzasidan ularning ishini muvofiqlashtiradi;

davlat organlari va boshqa tashkilotlarda Kengash nomidan vakillik qiladi;

Kengashning samarali ishlashini taʼminlash uchun boshqa vakolatlarni amalga oshiradi.

11. Kengash raisi oʻrinbosarining vakolatlari Kengashning qarori bilan belgilanadi.

12. Kengash aʼzolari quyidagi huquqlarga ega:

Kengash majlislarida koʻrib chiqiladigan masalalarni muhokama qilish va hal etishda qatnashish;

Institutda taʼlim jarayonini rivojlantirishning dolzarb masalalari boʻyicha Kengashga takliflar kiritish;

Kengash tomonidan koʻrib chiqiladigan masalalar boʻyicha xulosa taqdim etish.

Kengash aʼzolari Kengash tarkibida oʻz faoliyatini jamoatchilik asosida amalga oshiradilar.

Kengash aʼzolari majlisda shaxsan qatnashishi kerak. Bunday qatnashishning imkoni boʻlmagan taqdirda, Kengash aʼzosi majlisning kun tartibi boʻyicha oʻz fikrini Kengashga yozma ravishda taqdim etishga haqlidir.

13. Kengash oʻz majlislarini zaruriyatga koʻra, biroq yil choragida kamida bir marta oʻtkazadi. Kengash raisi tomonidan uning aʼzolarining yozma iltimosnomalari asosida navbatdan tashqari majlislar chaqirilishi mumkin. Iltimosnomalarda navbatdan tashqari majlisni chaqirishning sabablari va asoslari bayon qilinishi kerak.

14. Kengash majlisini Kengash raisi, u boʻlmagan taqdirda esa — Kengash raisining oʻrinbosari boshqaradi.

Kengash majlisi unda Kengash aʼzolarining kamida uchdan ikki qismi qatnashganda vakolatli hisoblanadi.

Majlisni oʻtkazish uchun kvorum yoki rais va uning oʻrinbosari boʻlmaganda, Kengash majlisini oʻtkazishning yangi sanasi eʼlon qilinadi.

15. Kengash majlisiga koʻrib chiqiladigan masalalarning xususiyatiga koʻra davlat organlari va boshqa tashkilotlarning rahbarlari va mutaxassislari, oliy taʼlim muassasasining xodimlari, ayrim jismoniy shaxslar taklif etilishi mumkin.

16. Kengash kotibi:

Kengash majlislarga barcha zarur hujjatlarning oʻz vaqtida tayyorlanishini taʼminlaydi;

majlislarni oʻtkazish muddatlari va joyini Kengash raisi bilan kelishadi;

kun tartibi masalalari boʻyicha Kengash majlislari oʻtkazilishini tashkil etadi;

Kengash aʼzolari va taklif etilgan shaxslarni majlisning sanasi, kun tartibi loyihasi, majlisni oʻtkazish vaqti va joyidan xabardor qiladi;

Kengash qarorlari bajarilishi monitoringini yuritadi;

Kengash bayonnomalarini rasmiylashtiradi va tasdiqlangan bayonnomalarni Kengash aʼzolariga va boshqa manfaatdor tashkilotlarga yuboradi.

Kengash kotibi Kengash aʼzosi hisoblanadi.

17. Kengash oʻz faoliyatini Institut rektori bilan oʻzaro hamkorlikda amalga oshiradi.

4-bob. Kengash tomonidan qarorlar qabul qilish va ularning bajarilishini tashkil etish

18. Kengash qarori Kengashning majlisda qatnashgan aʼzolarining koʻpchilik ovozi bilan qabul qilinadi. Ovozlar teng boʻlgan taqdirda, Kengash raisining ovozi hal qiluvchi hisoblanadi.

Kengashi aʼzolari tomonidan Institutga taqdim etilgan mablagʻlar boʻyicha tushumlar va sarflarning yillik moliyaviy rejasini, shuningdek, vasiylik mablagʻlaridan foydalanilishini tasdiqlash masalalari boʻyicha qaror Kengashning majlisda qatnashgan aʼzolarining koʻpchilik ovozi bilan qabul qilinadi.

19. Kengash qarorlari Kengash majlisining bayonnomasi bilan rasmiylashtiriladi. Kengash majlisining bayonnomasi Kengash raisi tomonidan tasdiqlanadi va bir hafta muddatda Kengash aʼzolariga va manfaatdor tashkilotlarga yuboriladi.

20. Kengash bayonnomasining asl nusxasi va uning materiallari Institutda saqlanadi.

Institut rektori Kengash hujjatlarining saqlanishini taʼminlash uchun shart-sharoitlar yaratadi.

21. Kengash kotibi Kengash aʼzolarining yordamida Kengash qarorlarining bajarilishini muntazam ravishda oʻrganadi va koʻrib chiqadi, zaruriyat boʻlganda, Kengash raisiga tegishli takliflar kiritadi.

Kengash qabul qilingan qarorlarning ijro etilishi holatini oʻz majlislarida muntazam ravishda koʻrib chiqadi.

22. Kengashning ish tartibi Kengash tasdiqlaydigan reglamentda belgilanadi.

5-bob. Vasiylik mablagʻlari

23. Vasiylik mablagʻlari vakillari Kengash aʼzolari hisoblanadigan tashkilotlarning, shuningdek, Kengash aʼzolarining xayriyalari, ixtiyoriy badallari shaklida Kengash tomonidan Institutga jalb etiladigan qonunchilik hujjatlarida taqiqlanmagan mablagʻlar hisobiga shakllantiriladi.

Vasiylik mablagʻlari mol-mulk, pul mablagʻlari, boshqa moddiy va nomoddiy aktivlar shaklida kiritiladi.

24. Vasiylik mablagʻlaridan Kengashning maqsadlari, vazifalari va vakolatlarini amalga oshirish va ularga erishish uchun foydalanilishi mumkin.

25. Vasiylik mablagʻlari Institutning alohida hisobvaragʻida jamlanadi va ulardan belgilangan tartibda foydalaniladi.

26. Vasiylik mablagʻlari sarflanishining yoʻnalishi, maqsadi va hajmi Kengash majlisida tasdiqlanadi.

Vasiylik mablagʻlari sarfining moliyaviy rejasiga Institutdagi Kengash faoliyati bilan bogʻliq joriy xarajatlar kiritiladi.

27. Vasiylik mablagʻlari boʻyicha daromadlar va xarajatlar smetasi Kengashning qarori asosida Institut rektori tomonidan tasdiqlanadi.

Zaruratga koʻra vasiylik mablagʻlari xarajatlar smetasiga qonunchilik hujjatlarida belgilangan tartibda oʻzgartirishlar kiritilishi mumkin.

28. Vasiylik mablagʻlarining buxgalteriya hisobi toʻgʻri yuritilishi, mablagʻlar zarur tarzda rasmiylashtirilishi va ulardan maqsadli foydalanilishini nazorat qilish uchun Institutning rektori va bosh buxgalteri javob beradi.

Vasiylik mablagʻlarining joriy yilda foydalanilmagan qoldigʻi olib qoʻyilmaydi va keyingi yilga oʻtadi.

29. Kengash vasiylik mablagʻlaridan toʻgʻri, maqsadli va samarali foydalanilishi ustidan moliyaviy nazoratni amalga oshiradi.

Nazoratni amalga oshirish uchun Kengashning nazorat-taftish komissiyasi tayinlanadi.

Kengash nazorat-taftish komissiyasining raisi va aʼzolarini tayinlash tartibi, ularning vakolatlari muddatlari va taftishlarni oʻtkazish davriyligi Kengash qarori bilan belgilanadi.

30. Kengashning nazorat-taftish komissiyasi bir yilda bir marta vasiylik mablagʻlari hisobiga amalga oshirilgan sarf-xarajatlarni taftish qiladi hamda vasiylik mablagʻlaridan maqsadli va samarali foydalanilganligi yuzasidan Kengash oldida hisobot beradi.

31. Moliya-xoʻjalik faoliyati bilan bogʻliq kelishmovchiliklar qonunchilik hujjatlarida nazarda tutilgan tartibda hal etiladi.

6-bob. Kengash faoliyatini tugatish

32. Kengash qonunchilik hujjatlarida belgilangan tarqatib yuboriladi.

33. Kengash tarqatib yuborilgan taqdirda, uning vasiylik mablagʻlarini boshqarish boʻyicha vakolati vaqtincha Institutning Kengashiga beriladi.

Vazirlar Mahkamasining 2021-yil 17-iyundagi 377-son qaroriga 3-ILOVA

Oʻzbekiston Respublikasi Hukumatining oʻz kuchini yoʻqotgan deb hisoblanayotgan ayrim qarorlari

1. Vazirlar Mahkamasining “Oʻzbekiston Respublikasi Davlat soliq qoʻmitasining Soliq kollejini tashkil etish toʻgʻrisida” 1998-yil 14-iyuldagi 298-son qarori .

2. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida” 2016-yil 26-apreldagi 122-son qaroriga 1-ilovaning 20-bandi .

Oʻzbekiston Respublikasining Bosh vaziri A. ARIPOV

Toshkent sh.,

2021-yil 17-iyun,

377-son

(Qonunchilik maʼlumotlari milliy bazasi, 17.06.2021-y., 09/21/377/0565-son; Qonunchilik maʼlumotlari milliy bazasi, 22.09.2021-y., 09/21/595/0900-son )

lex.uz