📅 2021-yil 30-iyun · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 30 июнь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 30 июня 2021 г. · Постановления Кабинета Министров
Официальный текст. Официальный документ. Редакционные примечания не включены.
📅 30 June 2021 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Илк ва мактабгача ёшдаги болаларни ривожлантириш учун инновацион тадқиқот лабораториясини ташкил этиш чора-тадбирлари тўғрисида
Ўзбекистон Республикаси Президентининг «Таълим-тарбия тизимини янада такомиллаштиришга оид қўшимча чора-тадбирлар тўғрисида» 2020 йил 6 ноябрдаги ПҚ-4884-сон қарорига мувофиқ илк ва мактабгача ёшдаги болаларни жисмоний, ақлий, когнитив ва шахсий жиҳатдан ривожлантириш учун самарали илмий тадқиқотлар ва инновацион лойиҳалар амалга оширилишини йўлга қўйиш ҳамда уларнинг натижаларини амалиётга жорий этиш мақсадида Вазирлар Маҳкамаси қарор қилади:
1. Ўзбекистон Республикаси Президентининг «Таълим-тарбия тизимини янада такомиллаштиришга оид қўшимча чора-тадбирлар тўғрисида» 2020 йил 6 ноябрдаги ПҚ-4884-сон қарорида илк ёшдаги болаларни ривожлантириш учун инновацион тадқиқот лабораториясини ташкил этиш белгиланганлиги маълумот учун қабул қилинсин.
2. Ўзбекистон Республикаси Мактабгача таълим вазирлигининг Мактабгача таълим ташкилотлари директорлари ва мутахассисларини қайта тайёрлаш ва малакасини ошириш институти (кейинги ўринларда — Институт) тузилмасида юридик шахс мақомига эга бўлмаган Илк ва мактабгача ёшдаги болаларни ривожлантириш учун инновацион тадқиқот лабораторияси (кейинги ўринларда — Лаборатория) ташкил этилсин.
Белгилансинки, Лаборатория тузилмаси Институтнинг мавжуд штатлари доирасида шакллантирилади.
3. Қуйидагилар Лабораториянинг асосий вазифалари этиб белгилансин:
илк ва мактабгача ёшдаги болаларни жисмоний ривожлантириш жараёнига илғор хорижий тажриба ва инновацион таълим методларини қўллашга оид экспериментлар ўтказиш ва улардан самарали фойдаланиш бўйича илмий-инновацион тавсияларни ишлаб чиқиш;
илк ва мактабгача ёшдаги болаларнинг ривожланиш даражасини ўрганиш, таҳлил қилиш, уларнинг ривожланишидаги муаммоларни аниқлаш ва уларнинг ечими юзасидан илмий тадқиқотлар ўтказиш, шунингдек, маслаҳат хизматларини кўрсатиш;
педагог ва ота-оналар учун болаларни эрта ривожлантириш ҳамда уларнинг ривожланишидаги бузилишларни коррекция қилиш ва олдини олиш бўйича илмий тадқиқотларга асосланган амалий тавсияларни ишлаб чиқиш.
4. Белгилаб қўйилсинки:
а) Лаборатория ходимлари (илмий ходимлардан ташқари) меҳнатига ҳақ тўлаш харажатлари бўйича Институтга ажратиладиган бюджет маблағлари доирасида амалга оширилади;
б) Лаборатория илмий ходимларининг лавозим маошлари бюджет маблағлари ҳисобига фундаментал, амалий тадқиқотлар ва инновацион ишлар илмий-техник дастурларини амалга оширишда иштирок этувчи илмий ташкилотларнинг илмий ходимлари базавий лавозим маошлари миқдорига тенглаштирилади;
в) Лаборатория фаолиятини амалга ошириш учун Институтнинг бюджет ва бюджетдан ташқари маблағлари бўйича алоҳида шахсий ғазна ҳисобварақлари очилади, белгиланган тартибда алоҳида харажатлар сметаси (бюджет маблағлари бўйича), шунингдек, даромадлар ва харажатлар сметаси (бюджетдан ташқари маблағлар бўйича) тасдиқланади;
г) Лабораторияни бюджет маблағлари ҳисобидан сақлаш харажатлари 2021 йилда Ўзбекистон Республикасининг республика бюджетидан биринчи даражали бюджет маблағларини тақсимловчи сифатида Ўзбекистон Республикаси Мактабгача таълим вазирлигига ажратилган маблағлар доирасида, 2022 йилдан бошлаб Ўзбекистон Республикасининг Давлат бюджети параметрларида назарда тутилади.
5. Лаборатория Тошкент шаҳри, Яккасарой тумани, Юсуф Хос Хожиб кўчаси, 64-уй манзилидаги Институт биносига жойлаштирилсин.
6. Ўзбекистон Республикаси Мактабгача таълим вазирлиги бир ой муддатда:
Лабораториянинг тузилмаси ва низомини;
илк ва мактабгача ёшдаги болалар ривожланишини баҳолаш мезонлари ва кўрсаткичларини;
болаларнинг жисмоний, ақлий, когнитив ва шахсий ривожланиши учун зарур бўлган муҳитни яхшилашга қаратилган чора-тадбирлар дастурини тасдиқласин.
7. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари Б.А. Мусаев ва Ўзбекистон Республикаси мактабгача таълим вазири А.В. Шин зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2021 йил 30 июнь,
406-сон
Oʻzbekiston Respublikasi Vazirlar Mahkamasining
qarori
Ilk va maktabgacha yoshdagi bolalarni rivojlantirish uchun innovatsion tadqiqot laboratoriyasini tashkil etish chora-tadbirlari toʻgʻrisida
Oʻzbekiston Respublikasi Prezidentining “Taʼlim-tarbiya tizimini yanada takomillashtirishga oid qoʻshimcha chora-tadbirlar toʻgʻrisida” 2020-yil 6-noyabrdagi PQ-4884-son qaroriga muvofiq ilk va maktabgacha yoshdagi bolalarni jismoniy, aqliy, kognitiv va shaxsiy jihatdan rivojlantirish uchun samarali ilmiy tadqiqotlar va innovatsion loyihalar amalga oshirilishini yoʻlga qoʻyish hamda ularning natijalarini amaliyotga joriy etish maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining “Taʼlim-tarbiya tizimini yanada takomillashtirishga oid qoʻshimcha chora-tadbirlar toʻgʻrisida” 2020-yil 6-noyabrdagi PQ-4884-son qarorida ilk yoshdagi bolalarni rivojlantirish uchun innovatsion tadqiqot laboratoriyasini tashkil etish belgilanganligi maʼlumot uchun qabul qilinsin.
2. Oʻzbekiston Respublikasi Maktabgacha taʼlim vazirligining Maktabgacha taʼlim tashkilotlari direktorlari va mutaxassislarini qayta tayyorlash va malakasini oshirish instituti (keyingi oʻrinlarda — Institut) tuzilmasida yuridik shaxs maqomiga ega boʻlmagan Ilk va maktabgacha yoshdagi bolalarni rivojlantirish uchun innovatsion tadqiqot laboratoriyasi (keyingi oʻrinlarda — Laboratoriya) tashkil etilsin.
Belgilansinki, Laboratoriya tuzilmasi Institutning mavjud shtatlari doirasida shakllantiriladi.
3. Quyidagilar Laboratoriyaning asosiy vazifalari etib belgilansin:
ilk va maktabgacha yoshdagi bolalarni jismoniy rivojlantirish jarayoniga ilgʻor xorijiy tajriba va innovatsion taʼlim metodlarini qoʻllashga oid eksperimentlar oʻtkazish va ulardan samarali foydalanish boʻyicha ilmiy-innovatsion tavsiyalarni ishlab chiqish;
ilk va maktabgacha yoshdagi bolalarning rivojlanish darajasini oʻrganish, tahlil qilish, ularning rivojlanishidagi muammolarni aniqlash va ularning yechimi yuzasidan ilmiy tadqiqotlar oʻtkazish, shuningdek, maslahat xizmatlarini koʻrsatish;
pedagog va ota-onalar uchun bolalarni erta rivojlantirish hamda ularning rivojlanishidagi buzilishlarni korreksiya qilish va oldini olish boʻyicha ilmiy tadqiqotlarga asoslangan amaliy tavsiyalarni ishlab chiqish.
4. Belgilab qoʻyilsinki:
a) Laboratoriya xodimlari (ilmiy xodimlardan tashqari) mehnatiga haq toʻlash xarajatlari boʻyicha Institutga ajratiladigan budjet mablagʻlari doirasida amalga oshiriladi;
b) Laboratoriya ilmiy xodimlarining lavozim maoshlari budjet mablagʻlari hisobiga fundamental, amaliy tadqiqotlar va innovatsion ishlar ilmiy-texnik dasturlarini amalga oshirishda ishtirok etuvchi ilmiy tashkilotlarning ilmiy xodimlari bazaviy lavozim maoshlari miqdoriga tenglashtiriladi;
v) Laboratoriya faoliyatini amalga oshirish uchun Institutning budjet va budjetdan tashqari mablagʻlari boʻyicha alohida shaxsiy gʻazna hisobvaraqlari ochiladi, belgilangan tartibda alohida xarajatlar smetasi (budjet mablagʻlari boʻyicha), shuningdek, daromadlar va xarajatlar smetasi (budjetdan tashqari mablagʻlar boʻyicha) tasdiqlanadi;
g) Laboratoriyani budjet mablagʻlari hisobidan saqlash xarajatlari 2021-yilda Oʻzbekiston Respublikasining respublika budjetidan birinchi darajali budjet mablagʻlarini taqsimlovchi sifatida Oʻzbekiston Respublikasi Maktabgacha taʼlim vazirligiga ajratilgan mablagʻlar doirasida, 2022-yildan boshlab Oʻzbekiston Respublikasining Davlat budjeti parametrlarida nazarda tutiladi.
5. Laboratoriya Toshkent shahri, Yakkasaroy tumani, Yusuf Xos Xojib koʻchasi, 64-uy manzilidagi Institut binosiga joylashtirilsin.
6. Oʻzbekiston Respublikasi Maktabgacha taʼlim vazirligi bir oy muddatda:
Laboratoriyaning tuzilmasi va nizomini;
ilk va maktabgacha yoshdagi bolalar rivojlanishini baholash mezonlari va koʻrsatkichlarini;
bolalarning jismoniy, aqliy, kognitiv va shaxsiy rivojlanishi uchun zarur boʻlgan muhitni yaxshilashga qaratilgan chora-tadbirlar dasturini tasdiqlasin.
7. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A. Musayev va Oʻzbekiston Respublikasi maktabgacha taʼlim vaziri A.V. Shin zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2021-yil 30-iyun,
406-son