📅 2021-yil 6-iyul · Prezident qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 6 июль · Президент қарорлари
Расмий матн. Расмий ҳужжат. Таҳририй изоҳлар киритилмаган.
📅 6 июля 2021 г. · Постановления Президента
Официальный текст. Официальный документ. Редакционные примечания не включены.
📅 6 July 2021 · Presidential resolutions
Official text. Official document. Editorial notes are not included.
Ўзбекистон Республикаси Президентининг
Қарори
Коррупцияга қарши курашиш фаолиятини самарали ташкил этишга доир қўшимча чора-тадбирлар тўғрисида
Ўзбекистон Республикаси Президентининг 2021 йил 6 июлдаги «Коррупцияга қарши муросасиз муносабатда бўлиш муҳитини яратиш, давлат ва жамият бошқарувида коррупциявий омилларни кескин камайтириш ва бунда жамоатчилик иштирокини кенгайтириш чора-тадбирлари тўғрисида»ги ПФ-6257-сон Фармонига мувофиқ ҳамда коррупцияга қарши курашиш бўйича чора-тадбирларнинг амалга оширилишини самарали ташкил этиш мақсадида:
1. Давлат ҳокимияти ва бошқаруви органлари, давлат муассасалари, давлат улуши 50 фоиз ва ундан ортиқ бўлган ташкилотларда (кейинги ўринларда — давлат органлари ва ташкилотлари) ишга қабул қилишни очиқ танлов асосида амалга ошириш ҳамда танлов доирасида ўтказиладиган синов тадбирларини Интернет тармоғи орқали реал вақт режимида кузатишни назарда тутувчи тартиб жорий этилсин.
2. Адлия вазирлиги Бош прокуратура ва бошқа манфаатдор идоралар билан биргаликда 2021 йил 1 октябрга қадар коррупцияга, шу жумладан манфаатлар тўқнашувига йўл қўйилган ҳолда тузилган шартномаларни ҳақиқий эмас деб топиш, давлат хизматчилари томонидан тадбиркорлик фаолиятида иштирок этганлигининг ҳуқуқий оқибатларини белгилашни назарда тутувчи қонун лойиҳасини Вазирлар Маҳкамасига киритсин.
3. Барча давлат органлари ва ташкилотлари, шу жумладан, Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликларида ҳамда устав фондида (устав капиталида) давлат улуши 50 фоиз ва ундан ортиқ бўлган хўжалик жамиятларида мавжуд штат бирликлари доирасида коррупцияга қарши ички назорат бўлинмалари фаолияти йўлга қўйилади.
4. Белгилансинки, коррупцияга қарши ички назорат тузилмалари раҳбарлари давлат органлари ва ташкилотлари томонидан Коррупцияга қарши курашиш агентлиги (кейинги ўринларда — Агентлик) билан биргаликда ўтказиладиган очиқ танлов асосида ишга қабул қилинади, уларни лавозимидан озод этиш масаласи Агентлик билан келишилади.
Агентлик Адлия вазирлиги билан биргаликда икки ой муддатда Коррупцияга қарши ички назорат тузилмалари фаолияти тўғрисидаги намунавий низомни тасдиқласин.
5. 2021 йил 1 августдан бошлаб давлат харидлари соҳасида шаффофлик ва қонунийликни таъминлаш, коррупциявий ҳолатларнинг олдини олиш мақсадида давлат харидлари соҳасида ўтказилаётган тендер (танлаш) натижаларини мажбурий тарзда очиқ эълон қилиш амалиёти жорий этилсин.
Молия вазирлиги Агентлик ва Адлия вазирлиги билан биргаликда икки ой муддатда давлат харидлари доирасида тузиладиган шартномаларда акс эттирилиши лозим бўлган коррупцияга қарши шартларни ишлаб чиқсин ва тендер (танлаш) шаклида ўтказиладиган давлат харидларида ҳамкорлар (контрагентлар)ни текшириш тартибини белгиласин.
6. Агентлик 2021 йил 1 декабрдан бошлаб ҳар йил якуни бўйича барча давлат органлари ва ташкилотлари, шу жумладан маҳаллий давлат ҳокимияти органларида коррупцияга қарши курашиш ишларининг самарадорлигини баҳоловчи рейтингни эълон қилиш амалиётини жорий этсин.
7. Агентлик Ахборот технологиялари ва коммуникацияларини ривожлантириш вазирлиги билан биргаликда:
2021 йил 1 декабрга қадар даромад ва мол-мулк декларациялари бўйича маълумотлар базасини шакллантириш, уларни қайта ишлаш ва текширишнинг электрон ахборот тизимини яратиш, шунингдек, 2022 йил давомида уни солиқ, божхона, давлат кадастри ва бошқа тегишли органлар маълумотлар базалари билан интеграция қилиш чораларини кўрсин;
2022 йил 1 январга қадар мутасадди вазирлик ва идораларнинг ахборот тизимлари ва маълумотлар базаси билан Электрон ҳукуматнинг идоралараро маълумотлар узатиш тармоғи орқали интеграциялашган Коррупциявий хавфларни баҳолаш электрон тизимини ишга туширсин.
8. Монополияга қарши курашиш қўмитаси Адлия вазирлиги, Давлат солиқ қўмитаси, Ҳисоб палатаси, Давлат активларини бошқариш агентлиги ва Марказий банк билан биргаликда 2021 йил 1 ноябрга қадар бенефициарлар реестрини юритиш амалиётини йўлга қўйиш бўйича таклифларни Вазирлар Маҳкамасига киритсин.
9. Қурилиш соҳасида шаффофлик ва қонунийликни таъминлаш, коррупциявий ҳолатларнинг олдини олиш мақсадида:
а) Қурилиш вазирлиги 2021 йил 1 октябрга қадар:
бюджет ва унга тенглаштирилган маблағлар ҳамда давлат органлари ва ташкилотлари маблағлари ҳисобидан қурилиш-пудрат шартномаси учун ўтказиладиган тендер (танлаш)ни «Шаффоф қурилиш» миллий ахборот тизимининг маълумот алмашинувини таъминлаган ҳолда давлат харидлари бўйича махсус ахборот порталида электрон тарзда ўтказиш амалиётини йўлга қўйсин;
қурилиш ва лойиҳа ташкилотлари рейтинги ҳамда тендер савдоларидаги баҳолаш мезонлари ва методикасини қайта кўриб чиқиб, уларнинг очиқлигини таъминласин ҳамда қурилиш ташкилотлари тоифалари ва нарх бўйича таклифни баҳолаш механизмини жорий қилсин;
электрон тендер тизимида маълумотларнинг ҳаққонийлигини автоматик равишда текшириш ва баҳолаш механизмини ишга туширсин;
б) 2021 йил 1 декабрдан бошлаб харид комиссиясининг маълумотлар ҳаққонийлигини текшириш ва иштирокчини харид қилиш тартиб-таомилларида иштирок этишдан четлатиш ваколатлари бекор қилинсин.
10. Транспорт вазирлиги манфаатдор вазирлик ва идоралар билан биргаликда йўл қурилиши ва эксплуатацияси соҳасига шаффофлик стандартларини жорий қилиш мақсадида 2022 йил 1 январга қадар автомобиль йўллари соҳасига тегишли маълумотларни ўз ичига оладиган «SНAFFOF YOʻL» онлайн ахборот платформасини ишга туширсин.
Ушбу платформа доирасида автомобиль йўлларини қуриш, реконструкция қилиш ва капитал таъмирлаш объектларининг интерактив онлайн-харитаси ишлаб чиқилсин ҳамда унда кейинги йилда қуриладиган ва таъмирланадиган йўл участкаларини аниқлаш ва уларни харитага жойлаш ҳамда буни жамоатчиликка тақдим этиш амалиёти йўлга қўйилсин.
Адлия вазирлиги Транспорт вазирлиги, Молия вазирлиги ҳамда Ахборот технологиялари ва коммуникацияларини ривожлантириш вазирлиги билан биргаликда бир ой муддатда мазкур банднинг ижроси бўйича қарор лойиҳасини Вазирлар Маҳкамасига киритсин.
11. Агентлик, Адлия вазирлиги, Давлат бошқаруви академияси ва Ҳуқуқни муҳофаза қилиш академияси 2022 йил 1 январдан бошлаб «ҳалоллик вакцинаси» тамойили асосида давлат хизматчиларини мунтазам равишда коррупцияга қарши курашиш, манфаатлар тўқнашуви ва одоб-ахлоқ қоидалари бўйича махсус ўқув курсларда ўқитиш тизимини жорий этсин.
Ушбу тизим доирасида:
давлат хизматчиларини ўқитиш туман даражасида ҳудудий адлия бўлимларида, вилоят даражасида ҳудудий олий таълим муассасаларида, республика даражасида Давлат бошқаруви академияси ва унинг филиалларида амалга оширилсин;
махсус электрон ўқув платформаси ишга туширилиб, у орқали давлат хизматчиларини масофадан туриб ўқитиш ҳамда хусусий сектор вакиллари ва аҳолининг коррупцияга қарши курашиш борасидаги билимларини ошириш йўлга қўйилсин.
12. Агентлик бир ой муддатда қонунчилик ҳужжатларига ушбу қарордан келиб чиқадиган ўзгартириш ва қўшимчалар тўғрисида Вазирлар Маҳкамасига таклифлар киритсин.
13. Мазкур қарор ижросини самарали ташкил этишга масъул этиб Бош прокурор Н.Т. Йўлдошев, Агентлик директори А.Э. Бурханов ва Давлат хавфсизлик хизмати раиси А.А. Азизов белгилансин.
Қарор ижросини муҳокама қилиб бориш, ижро учун масъул идоралар фаолиятини мувофиқлаштириш ва назорат қилиш Ўзбекистон Республикасининг Коррупцияга қарши курашиш миллий кенгаши раиси Т.К. Нарбаева, Ўзбекистон Республикасининг Бош вазири А.Н. Арипов ва Ўзбекистон Республикаси Президенти Администрацияси раҳбари З.Ш. Низомиддинов зиммасига юклансин.
Амалга оширилаётган чора-тадбирлар натижадорлиги юзасидан Ўзбекистон Республикаси Президентига ҳар чорак якуни бўйича ахборот бериб борилсин.
Ўзбекистон Республикаси Президенти Ш. МИРЗИЁЕВ
Тошкент ш.,
2021 йил 6 июль,
ПҚ-5177-сон
Oʻzbekiston Respublikasi Prezidentining
Qarori
Korrupsiyaga qarshi kurashish faoliyatini samarali tashkil etishga doir qoʻshimcha chora-tadbirlar toʻgʻrisida
Oʻzbekiston Respublikasi Prezidentining 2021-yil 6-iyuldagi “Korrupsiyaga qarshi murosasiz munosabatda boʻlish muhitini yaratish, davlat va jamiyat boshqaruvida korrupsiyaviy omillarni keskin kamaytirish va bunda jamoatchilik ishtirokini kengaytirish chora-tadbirlari toʻgʻrisida”gi PF-6257-son Farmoniga muvofiq hamda korrupsiyaga qarshi kurashish boʻyicha chora-tadbirlarning amalga oshirilishini samarali tashkil etish maqsadida:
1. Davlat hokimiyati va boshqaruvi organlari, davlat muassasalari, davlat ulushi 50 foiz va undan ortiq boʻlgan tashkilotlarda (keyingi oʻrinlarda — davlat organlari va tashkilotlari) ishga qabul qilishni ochiq tanlov asosida amalga oshirish hamda tanlov doirasida oʻtkaziladigan sinov tadbirlarini Internet tarmogʻi orqali real vaqt rejimida kuzatishni nazarda tutuvchi tartib joriy etilsin.
2. Adliya vazirligi Bosh prokuratura va boshqa manfaatdor idoralar bilan birgalikda 2021-yil 1-oktabrga qadar korrupsiyaga, shu jumladan manfaatlar toʻqnashuviga yoʻl qoʻyilgan holda tuzilgan shartnomalarni haqiqiy emas deb topish, davlat xizmatchilari tomonidan tadbirkorlik faoliyatida ishtirok etganligining huquqiy oqibatlarini belgilashni nazarda tutuvchi qonun loyihasini Vazirlar Mahkamasiga kiritsin.
3. Barcha davlat organlari va tashkilotlari, shu jumladan, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklarida hamda ustav fondida (ustav kapitalida) davlat ulushi 50 foiz va undan ortiq boʻlgan xoʻjalik jamiyatlarida mavjud shtat birliklari doirasida korrupsiyaga qarshi ichki nazorat boʻlinmalari faoliyati yoʻlga qoʻyiladi.
4. Belgilansinki, korrupsiyaga qarshi ichki nazorat tuzilmalari rahbarlari davlat organlari va tashkilotlari tomonidan Korrupsiyaga qarshi kurashish agentligi (keyingi oʻrinlarda — Agentlik) bilan birgalikda oʻtkaziladigan ochiq tanlov asosida ishga qabul qilinadi, ularni lavozimidan ozod etish masalasi Agentlik bilan kelishiladi.
Agentlik Adliya vazirligi bilan birgalikda ikki oy muddatda Korrupsiyaga qarshi ichki nazorat tuzilmalari faoliyati toʻgʻrisidagi namunaviy nizomni tasdiqlasin.
5. 2021-yil 1-avgustdan boshlab davlat xaridlari sohasida shaffoflik va qonuniylikni taʼminlash, korrupsiyaviy holatlarning oldini olish maqsadida davlat xaridlari sohasida oʻtkazilayotgan tender (tanlash) natijalarini majburiy tarzda ochiq eʼlon qilish amaliyoti joriy etilsin.
Moliya vazirligi Agentlik va Adliya vazirligi bilan birgalikda ikki oy muddatda davlat xaridlari doirasida tuziladigan shartnomalarda aks ettirilishi lozim boʻlgan korrupsiyaga qarshi shartlarni ishlab chiqsin va tender (tanlash) shaklida oʻtkaziladigan davlat xaridlarida hamkorlar (kontragentlar)ni tekshirish tartibini belgilasin.
6. Agentlik 2021-yil 1-dekabrdan boshlab har yil yakuni boʻyicha barcha davlat organlari va tashkilotlari, shu jumladan mahalliy davlat hokimiyati organlarida korrupsiyaga qarshi kurashish ishlarining samaradorligini baholovchi reytingni eʼlon qilish amaliyotini joriy etsin.
7. Agentlik Axborot texnologiyalari va kommunikatsiyalarini rivojlantirish vazirligi bilan birgalikda:
2021-yil 1-dekabrga qadar daromad va mol-mulk deklaratsiyalari boʻyicha maʼlumotlar bazasini shakllantirish, ularni qayta ishlash va tekshirishning elektron axborot tizimini yaratish, shuningdek, 2022-yil davomida uni soliq, bojxona, davlat kadastri va boshqa tegishli organlar maʼlumotlar bazalari bilan integratsiya qilish choralarini koʻrsin;
2022-yil 1-yanvarga qadar mutasaddi vazirlik va idoralarning axborot tizimlari va maʼlumotlar bazasi bilan Elektron hukumatning idoralararo maʼlumotlar uzatish tarmogʻi orqali integratsiyalashgan Korrupsiyaviy xavflarni baholash elektron tizimini ishga tushirsin.
8. Monopoliyaga qarshi kurashish qoʻmitasi Adliya vazirligi, Davlat soliq qoʻmitasi, Hisob palatasi, Davlat aktivlarini boshqarish agentligi va Markaziy bank bilan birgalikda 2021-yil 1-noyabrga qadar benefitsiarlar reyestrini yuritish amaliyotini yoʻlga qoʻyish boʻyicha takliflarni Vazirlar Mahkamasiga kiritsin.
9. Qurilish sohasida shaffoflik va qonuniylikni taʼminlash, korrupsiyaviy holatlarning oldini olish maqsadida:
a) Qurilish vazirligi 2021-yil 1-oktabrga qadar:
budjet va unga tenglashtirilgan mablagʻlar hamda davlat organlari va tashkilotlari mablagʻlari hisobidan qurilish-pudrat shartnomasi uchun oʻtkaziladigan tender (tanlash)ni “Shaffof qurilish” milliy axborot tizimining maʼlumot almashinuvini taʼminlagan holda davlat xaridlari boʻyicha maxsus axborot portalida elektron tarzda oʻtkazish amaliyotini yoʻlga qoʻysin;
qurilish va loyiha tashkilotlari reytingi hamda tender savdolaridagi baholash mezonlari va metodikasini qayta koʻrib chiqib, ularning ochiqligini taʼminlasin hamda qurilish tashkilotlari toifalari va narx boʻyicha taklifni baholash mexanizmini joriy qilsin;
elektron tender tizimida maʼlumotlarning haqqoniyligini avtomatik ravishda tekshirish va baholash mexanizmini ishga tushirsin;
b) 2021-yil 1-dekabrdan boshlab xarid komissiyasining maʼlumotlar haqqoniyligini tekshirish va ishtirokchini xarid qilish tartib-taomillarida ishtirok etishdan chetlatish vakolatlari bekor qilinsin.
10. Transport vazirligi manfaatdor vazirlik va idoralar bilan birgalikda yoʻl qurilishi va ekspluatatsiyasi sohasiga shaffoflik standartlarini joriy qilish maqsadida 2022-yil 1-yanvarga qadar avtomobil yoʻllari sohasiga tegishli maʼlumotlarni oʻz ichiga oladigan “SNAFFOF YOʻL” onlayn axborot platformasini ishga tushirsin.
Ushbu platforma doirasida avtomobil yoʻllarini qurish, rekonstruksiya qilish va kapital taʼmirlash obyektlarining interaktiv onlayn-xaritasi ishlab chiqilsin hamda unda keyingi yilda quriladigan va taʼmirlanadigan yoʻl uchastkalarini aniqlash va ularni xaritaga joylash hamda buni jamoatchilikka taqdim etish amaliyoti yoʻlga qoʻyilsin.
Adliya vazirligi Transport vazirligi, Moliya vazirligi hamda Axborot texnologiyalari va kommunikatsiyalarini rivojlantirish vazirligi bilan birgalikda bir oy muddatda mazkur bandning ijrosi boʻyicha qaror loyihasini Vazirlar Mahkamasiga kiritsin.
11. Agentlik, Adliya vazirligi, Davlat boshqaruvi akademiyasi va Huquqni muhofaza qilish akademiyasi 2022-yil 1-yanvardan boshlab “halollik vaksinasi” tamoyili asosida davlat xizmatchilarini muntazam ravishda korrupsiyaga qarshi kurashish, manfaatlar toʻqnashuvi va odob-axloq qoidalari boʻyicha maxsus oʻquv kurslarda oʻqitish tizimini joriy etsin.
Ushbu tizim doirasida:
davlat xizmatchilarini oʻqitish tuman darajasida hududiy adliya boʻlimlarida, viloyat darajasida hududiy oliy taʼlim muassasalarida, respublika darajasida Davlat boshqaruvi akademiyasi va uning filiallarida amalga oshirilsin;
maxsus elektron oʻquv platformasi ishga tushirilib, u orqali davlat xizmatchilarini masofadan turib oʻqitish hamda xususiy sektor vakillari va aholining korrupsiyaga qarshi kurashish borasidagi bilimlarini oshirish yoʻlga qoʻyilsin.
12. Agentlik bir oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.
13. Mazkur qaror ijrosini samarali tashkil etishga masʼul etib Bosh prokuror N.T. Yoʻldoshev, Agentlik direktori A.E. Burxanov va Davlat xavfsizlik xizmati raisi A.A. Azizov belgilansin.
Qaror ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasining Korrupsiyaga qarshi kurashish milliy kengashi raisi T.K. Narbayeva, Oʻzbekiston Respublikasining Bosh vaziri A.N. Aripov va Oʻzbekiston Respublikasi Prezidenti Administratsiyasi rahbari Z.Sh. Nizomiddinov zimmasiga yuklansin.
Amalga oshirilayotgan chora-tadbirlar natijadorligi yuzasidan Oʻzbekiston Respublikasi Prezidentiga har chorak yakuni boʻyicha axborot berib borilsin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2021-yil 6-iyul,
PQ-5177-son
Президента Республики Узбекистан
Постановление
О дополнительных мерах по эффективной организации деятельности по противодействию коррупции
В соответствии с Указом Президента Республики Узбекистан от 6 июля 2021 года № УП-6257 «О мерах по созданию среды нетерпимого отношения к коррупции, кардинальному сокращению коррупционных факторов в государственном и общественном управлении, а также широкому вовлечению общественности в этот процесс», а также в целях эффективной организации реализации мер по противодействию коррупции:
1. Внедрить порядок, предусматривающий прием на работу в органы государственной власти и управления, государственные учреждения, а также организации с государственной долей 50 процентов и более (далее — государственные органы и организации) путем открытого конкурса, а также обеспечение наблюдения за проводимыми конкурсными испытаниями в сети Интернет в режиме реального времени.
2. Министерству юстиции совместно с Генеральной прокуратурой и другими заинтересованными ведомствами в срок до 1 октября 2021 года внести в Кабинет Министров проект закона, предусматривающего признание недействительными договоров, заключенных с допущением коррупции, в том числе конфликта интересов, а также определение правовых последствий участия государственных служащих в предпринимательской деятельности.
3. Организовать в пределах имеющихся штатных единиц во всех государственных органах и организациях, в том числе в Совете Министров Республики Каракалпакстан, хокимиятах областей и города Ташкента и хозяйственных обществах, в уставном фонде (уставном капитале) которых государственная доля составляет 50 процентов и более, деятельность подразделений внутреннего антикоррупционного контроля.
4. Определить, что руководители подразделений внутреннего антикоррупционного контроля принимаются на работу путем открытого конкурса, проводимого государственными органами и организациями совместно с Агентством по противодействию коррупции (далее — Агентство), освобождаются от должности — по согласованию с Агентством.
Агентству совместно с Министерством юстиции в двухмесячный срок утвердить Типовое положение о деятельности подразделений внутреннего антикоррупционного контроля.
5. Внедрить с 1 августа 2021 года практику обязательного открытого опубликования результатов тендеров (отбора), проводимых в сфере государственных закупок, в целях обеспечения прозрачности и законности, а также пресечения фактов коррупции в сфере государственных закупок.
Министерству финансов совместно с Агентством и Министерством юстиции в двухмесячный срок разработать условия по противодействию коррупции, подлежащие включению в договора, заключаемые в рамках государственных закупок, а также установить порядок проверки партнеров (контрагентов) по государственным закупкам, осуществляемым в форме тендера (отбора).
6. Агентству с 1 декабря 2021 года внедрить практику опубликования по итогам каждого года рейтинга по оценке эффективности деятельности по противодействию коррупции во всех государственных органах и организациях, включая органы государственной власти на местах.
7. Агентству совместно с Министерством по развитию информационных технологий и коммуникаций:
в срок до 1 декабря 2021 года принять меры по формированию базы данных по декларациям о доходах и имуществе, созданию электронной информационной системы их обработки и проверки, в 2022 году — интеграции указанной базы с базами данных налоговых и таможенных органов, а также государственного кадастра и другими соответствующими органами;
в срок до 1 января 2022 года запустить Электронную систему оценки коррупционных рисков, интегрированную с информационными системами и базами данных соответствующих министерств и ведомств посредством межведомственной сети передачи данных Электронного правительства.
8. Антимонопольному комитету совместно с Министерством юстиции, Государственным налоговым комитетом, Счетной палатой, Агентством по управлению государственными активами и Центральным банком в срок до 1 ноября 2021 года внести в Кабинет Министров предложения о налаживании практики ведения реестра бенефициаров.
9. В целях обеспечения прозрачности и законности, а также пресечения фактов коррупции в сфере строительства:
а) Министерству строительства в срок до 1 октября 2021 года:
внедрить практику проведения в электронной форме тендеров (отбора) по строительно-подрядным договорам за счет бюджетных и приравненных к ним средств, а также средств государственных органов и организаций на специальном информационном портале по государственным закупкам с обеспечением обмена данными Национальной информационной системы «Прозрачное строительство»;
пересмотреть рейтинговые показатели строительных и проектных организаций, критерии и методику оценки в тендерных торгах, обеспечить их открытость, а также внедрить механизм оценки предложений о категориях строительных организаций и ценах;
внедрить механизм автоматической проверки достоверности и оценки данных в системе электронных тендеров;
б) отменить с 1 декабря 2021 года полномочия закупочной комиссии по проверке достоверности данных и отстранению участников от участия в закупочных процедурах.
10. Министерству транспорта совместно с заинтересованными министерствами и ведомствами запустить в срок до 1 января 2022 года информационную онлайн-платформу «SНAFFOF YOʻL», включающую соответствующую информацию по автомобильным дорогам, в целях внедрения стандартов прозрачности в сферу строительства и эксплуатации дорог.
В рамках данной платформы разработать интерактивную онлайн-карту объектов строительства, реконструкции и капитального ремонта автомобильных дорог, внедрить практику определения и размещения на карте, а также представления общественности участков дорог, подлежащих строительству и ремонту в следующем году.
Министерству юстиции совместно с Министерством транспорта, Министерством финансов и Министерством по развитию информационных технологий и коммуникаций в месячный срок внести в Кабинет Министров проект решения по реализации настоящего пункта.
11. Агентству, Министерству юстиции, Академии государственного управления и Правоохранительной академии внедрить с 1 января 2022 года систему регулярного обучения государственных служащих противодействию коррупции и конфликту интересов, а также правилам этики на специальных учебных курсах на основе принципа «вакцины добропорядочности».
В рамках данной системы:
проводить обучение государственных служащих на районном уровне в территориальных отделах юстиции, на областном уровне — в высших образовательных учреждениях регионов, на республиканском уровне — в Академии государственного управления и ее филиалах;
запустить специальную электронную учебную платформу, наладить посредством нее дистанционное обучение государственных служащих, а также повышение знаний представителей частного сектора и населения по противодействию коррупции.
12. Агентству в месячный срок внести в Кабинет Министров предложения об изменениях и дополнениях в акты законодательства, вытекающих из настоящего постановления.
13. Возложить на Генерального прокурора Н.Т. Йулдошева, директора Агентства А.Э. Бурханова и председателя Службы государственной безопасности А.А. Азизова персональную ответственность за эффективную организацию исполнения настоящего постановления.
Обсуждение хода исполнения настоящего постановления, осуществление координации и контроля за деятельностью ведомств, ответственных за его исполнение, возложить на председателя Национального совета Республики Узбекистан по противодействию коррупции Т.К. Нарбаеву, Премьер-министра Республики Узбекистан А.Н. Арипова и руководителя Администрации Президента Республики Узбекистан З.Ш. Низомиддинова.
О результативности осуществляемых мер информировать Президента Республики Узбекистан по итогам каждого квартала.
Президент Республики Узбекистан Ш. МИРЗИЁЕВ
г. Ташкент,
6 июля 2021 г.,
№ ПП-5177