📅 2021-yil 16-iyun · Vazirlik va idoralar hujjatlari · Davlat statistika qoʻmitasi
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 16 июнь · Вазирлик ва идоралар ҳужжатлари · Давлат статистика қўмитаси
Расмий матн. Расмий ҳужжат. Таҳририй изоҳлар киритилмаган.
📅 16 июня 2021 г. · Документы министерств и ведомств · Государственного комитета по статистике
Официальный текст. Официальный документ. Редакционные примечания не включены.
📅 16 June 2021 · Ministry and agency documents · Davlat statistika qoʻmitasi
Official text. Official document. Editorial notes are not included.
Ўзбекистон Республикаси Давлат статистика қўмитасининг
Қарори
НИЗОМ
Статистика ҳисоботини электрон шаклда тақдим этиш тартиби тўғрисидаги низомни тасдиқлаш ҳақида
Ўзбекистон Республикаси «Расмий статистика тўғрисида»ги Қонуни ва Вазирлар Маҳкамасининг 2017 йил 2 сентябрдаги 690-сон «Ўзбекистон Республикаси Давлат статистика қўмитаси тўғрисидаги низомни тасдиқлаш ҳақида»ги қарорига мувофиқ Ўзбекистон Республикаси Давлат статистика қўмитаси қарор қилади:
1. Статистика ҳисоботини электрон шаклда тақдим этиш тартиби тўғрисидаги низом иловага мувофиқ тасдиқлансин.
2. Қуйидагилар ўз кучини йўқотган деб топилсин:
Ўзбекистон Республикаси Давлат статистика қўмитасининг 2013 йил 24 июндаги 3-мб-сон «Электрон рақамли имзодан фойдаланган ҳолда электрон шаклда давлат статистика ҳисоботини тақдим этиш тартиби тўғрисидаги низомни тасдиқлаш ҳақида»ги қарори (рўйхат рақами 2479, 2013 йил 17 июль) (Ўзбекистон Республикаси қонун ҳужжатлари тўплами, 2013 й., 29-сон, 380-модда);
Ўзбекистон Республикаси Давлат статистика қўмитасининг 2018 йил 26 сентябрдаги 5-мб-сон «Электрон рақамли имзодан фойдаланган ҳолда электрон шаклда давлат статистика ҳисоботини тақдим этиш тартиби тўғрисида низомнинг 1-бандига ўзгартириш киритиш ҳақида»ги қарори (рўйхат рақами 2479-1, 2018 йил 8 октябрь) (Қонун ҳужжатлари маълумотлари миллий базаси, 09.10.2018 й., 10/18/2479-1/2008-сон).
3. Мазкур қарор расмий эълон қилинган кундан эътиборан кучга киради.
Келишилди:
Ўзбекистон Республикаси Давлат статистика қўмитасининг 2021 йил 16 июндаги 9-мб-сон қарорига ИЛОВА
Статистика ҳисоботини электрон шаклда тақдим этиш тартиби тўғрисидаги
Ушбу Низом Ўзбекистон Республикасининг « Расмий статистика тўғрисида »ги, « Электрон рақамли имзо тўғрисида »ги ва « Электрон ҳужжат айланиши тўғрисида »ги қонунларига мувофиқ Интернет тармоғи орқали электрон рақамли имзодан фойдаланган ҳолда электрон шаклда статистика ҳисоботини (бундан буён матнда статистика ҳисоботи деб юритилади) тақдим этиш тартибини белгилайди.
1-боб. Умумий қоидалар
1. Мазкур Низомда қуйидаги асосий тушунчалардан фойдаланилади:
статистика ҳисоботи — Ўзбекистон Республикаси Миллий статистика қўмитаси (бундан буён матнда Миллий статистика қўмитаси деб юритилади) томонидан тасдиқланадиган шакл, тартиб ва муддатларда респондентлар томонидан бирламчи маълумотлар асосида шакллантириладиган ва бепул тақдим этиладиган статистик маълумотлар;
респондент — расмий статистикани тайёрловчиларга индивидуал ва бошқа маълумотларни статистика мақсадларида тақдим этувчи жисмоний ёки юридик шахс;
статистика ҳисоботини электрон шаклда йиғиш ахборот тизими (бундан буён матнда ахборот тизими деб юритилади) — статистика ҳисоботини Интернет тармоғи орқали электрон рақамли имзодан фойдаланган ҳолда электрон шаклда тақдим этиш ва қайта ишлашни таъминловчи ахборот тизими;
электрон намуна — кўрсаткичлар тавсифини, бирламчи статистик маълумотларни текшириш қисмларини, зарур меъёрий-ахборот маълумотларини ўз ичига олган ахборот тизимининг бир қисми бўлган статистика ҳисоботининг электрон шакли;
электрон рақамли имзо — электрон ҳужжатдаги мазкур электрон ҳужжат ахборотини электрон рақамли имзонинг ёпиқ калитидан фойдаланган ҳолда махсус ўзгартириш натижасида ҳосил қилинган ҳамда электрон рақамли имзонинг очиқ калити ёрдамида электрон ҳужжатдаги ахборотда хатолик йўқлигини аниқлаш ва электрон рақамли имзо ёпиқ калитининг эгасини идентификация қилиш имкониятини берадиган имзо;
электрон ҳужжат — электрон шаклда қайд этилган, электрон рақамли имзо билан тасдиқланган ҳамда электрон ҳужжатнинг уни идентификация қилиш имконини берадиган бошқа реквизитларига эга бўлган ахборот;
статистика ҳисоботи келиб тушганлиги ҳақида хабарнома (бундан буён матнда Хабарнома деб юритилади) — статистика ҳисоботининг ахборот тизимига келиб тушган санаси ва статистика органи томонидан уни кўриб чиқиш натижасини респондентга маълум қилиш муддати тўғрисидаги маълумотларни ўз ичига олган, ахборот тизими томонидан автоматик тарзда шакллантирилувчи хабар;
статистика ҳисоботини тақдим этиш тартиби бузилганлиги ҳақида кўрсатма (бундан буён матнда Кўрсатма деб юритилади) — ҳисобот ва бошқа маълумотларни тақдим этмасликда ифодаланган статистика ҳисоботини тақдим этиш тартибини бузиш, ҳисобот маълумотларини бузиб кўрсатиш ёки ҳисоботни тақдим этиш муддатини бузиш ҳолатлари аниқланганда мазкур камчиликларни бартараф этиш муддати ҳақида маълумотларни ўз ичига олган, ахборот тизими томонидан автоматик тарзда шакллантирилувчи хабар;
статистика ҳисоботи қабул қилинганлиги ҳақида маълумотнома (бундан буён матнда Маълумотнома деб юритилади) — статистика органи томонидан статистика ҳисоботининг қабул қилинганлигини тасдиқловчи, санаси ва қабул қилган ходимнинг фамилияси кўрсатилган, унинг электрон рақамли имзоси билан имзоланган ва респондентга юбориладиган электрон хабар;
қайта ишлаш даври — тақдим этилган статистика ҳисоботини таҳлил қилиш ва умумлаштириш учун Миллий статистика қўмитаси томонидан белгиланган вақт оралиғи. Қайта ишлаш даври тегишли йиғма статистика маълумотларини Ўзбекистон Республикаси Вазирлар Маҳкамаси томонидан тасдиқланадиган бир йиллик статистика дастурида белгиланган тарқатиш муддатидан ошмаслиги керак.
2. Статистика ҳисоботи қуйидаги респондентлар томонидан тақдим этилади:
фаолият юритаётган респондентлар (фаолият кўрсатмаётган ва ҳаракатсиз ҳолатга ўтказилганлардан ташқари);
янги ташкил этилган респондентлар биринчи маротаба, белгиланган статистика ҳисоботининг навбатдаги давридан бошлаб;
фаолияти тугатилган респондентлар фаолият юритган ҳисобот даври учун, ўз фаолиятини тугатиш вақтида.
3. Статистика органлари томонидан статистика ҳисоботини тақдим этишнинг белгиланган даврийлигидан кўпроқ даврийликда талаб қилинишига йўл қўйилмайди.
4. Электрон шаклдаги статистика ҳисоботи қоғоз ҳужжатга тенглаштирилади ва у билан бир хил юридик кучга эга ҳамда белгиланган тартибда электрон архивда сақланиши лозим.
Электрон шаклдаги статистика ҳисоботининг сақланиш муддати, қоғоз шаклидаги статистика ҳисоботлари учун белгиланган муддатдан кам бўлмаслиги керак.
5. Заруриятга кўра, статистика органи томонидан электрон статистика ҳисоботининг қоғоз шаклдаги нусхаси тайёрланиши мумкин, нусхада тегишли реквизитлар, тайёрланган вақти ва санаси кўрсатилади. Электрон статистика ҳисоботининг қоғоз шаклидаги нусхаси уни тайёрлаган статистика органи раҳбари томонидан имзоланади.
6. Респондентлар ахборот тизимидан Миллий статистика қўмитасининг электрон интерактив хизматлар порталида (my.stat.uz) автоматик тарзда яратилган шахсий кабинети орқали бепул фойдаланади.
7. Статистика ҳисоботи шаклига белгиланган тартибда ўзгартиришлар киритилган тақдирда, Миллий статистика қўмитаси тегишли электрон намунага зарур ўзгартиришларни киритиб, ўзининг расмий сайти орқали респондентни ўзгартиришлар тўғрисида хабардор қилади.
2-боб. Статистика ҳисоботини электрон шаклда тақдим этиш
8. Статистика ҳисоботини электрон шаклда тақдим этиш учун респондент:
Миллий статистика қўмитасининг электрон интерактив хизматлар портали (my.stat.uz) орқали электрон рақамли имзодан фойдаланган ҳолда ахборот тизимидаги шахсий кабинетига киради;
тегишли статистика ҳисоботи шаклини тақдим этиш даврийлиги ва белгиланган муддатидан кечиктирмай электрон статистика ҳисоботини шакллантиради ва Миллий статистика қўмитасига ахборот тизими орқали жўнатади.
Статистика ҳисоботини тақдим этиш муддатининг сўнгги куни дам олиш ёки байрам (ишланмайдиган) кунига тўғри келса, ундан кейин келадиган биринчи иш куни муддат тугайдиган кун деб ҳисобланади.
9. Электрон шаклда тақдим этилган статистика ҳисоботи, ишончли маълумотлар асосида тўлиқ тўлдирилган ва ҳисобот маълумотларининг мантиқий текшириш натижасида аниқланган камчиликлар тўлиқ бартараф этилган бўлиши керак.
Электрон намунанинг ҳар бир катакчасидаги кўрсаткич статистика ҳисоботи намунасида ёки унга илова қилинган рўйхатда (номенклатура, таснифлагич) келтирилган ўлчов бирликларига мувофиқ кўрсатилади.
Тегишли катакчада:
кўрсаткич йўқ бўлган ҳолда бўш қолдирилади;
кўрсаткич қиймати белгиланган ўлчов бирлигидан кам бўлган ҳолда вергулдан кейинги қиймат тўлиқ аниқликда ёзиб қўйилади.
10. Статистика ҳисоботида қуйидаги мажбурий реквизитлар кўрсатилган бўлиши шарт:
респондентнинг номи ва идентификацион кодлари (солиқ тўловчининг идентификация рақами — СТИР (юридик шахслар учун), корхона, ташкилотнинг асосий коди — КТУТ, жисмоний шахснинг шахсий идентификация рақами — ЖШШИР (жисмоний шахслар учун);
респондентнинг электрон ва почта манзили;
респондент билан алоқа қилиш учун шаҳар телефон ва мобиль телефон рақами;
ҳужжат яратилган сана;
уни тузишга масъул бўлган мансабдор шахслар тўғрисида маълумотлар;
респондентнинг электрон рақамли имзоси.
Мазкур реквизитларда ўзгаришлар бўлганда, респондент томонидан улар янгиланиши зарур.
11. Респондентнинг электрон рақамли имзоси билан имзоланган ва ўзида мажбурий реквизитларни тўлиқ акс эттирган электрон шаклдаги статистика ҳисоботи респондентдан чиқувчи ҳужжат деб ҳисобланади.
3-боб. Статистика ҳисоботини тақдим этишда электрон ҳужжат айланиши иштирокчиларининг ўзаро ҳамкорлиги
12. Респондентдан электрон статистика ҳисоботини қабул қилишда, ахборот тизими унинг электрон манзилини автоматик равишда рўйхатдан ўтказади. Ахборот тизими томонидан электрон манзилнинг рўйхатдан ўтказилиши, респондент учун статистика ҳисоботини фақат электрон шаклда тақдим этиш мажбуриятини бермайди.
13. Статистика ҳисоботини юборгандан сўнг респондент унинг ахборот тизимига келиб тушганлиги ва уни кўриб чиқиш муддати тўғрисида ахборот тизими орқали автоматик тарзда шакллантирилган электрон Хабарномани олади, ушбу Хабарнома ҳисоботнинг статистика органи томонидан қабул қилинганлигини тасдиқламайди.
Хабарномадаги статистика ҳисоботини кўриб чиқиш муддати, уни қайта ишлаш даврини ҳисобга олган ҳолда белгиланади.
14. Хабарномада кўрсатилган вақтдан кечиктирмай, респондент ахборот тизимидаги ўзининг шахсий кабинети орқали қуйидаги электрон ҳужжатлардан бирини олади:
Маълумотномани — агар қайта ишлаш учун келиб тушган статистика ҳисоботида маълумотларни тақдим этмасликда ифодаланган статистика ҳисоботини тақдим этиш тартибини бузиш, ҳисобот маълумотларини бузиб кўрсатиш ёки ҳисоботни тақдим этиш муддатини бузиш ҳолатлари аниқланмаганда;
Кўрсатмани — агар статистика ҳисоботини тақдим этиш тартибини бузиш, ҳисобот маълумотларини бузиб кўрсатиш ёки ҳисоботни тақдим этиш муддатини бузиш ҳолатлари аниқланганда. Бунда кўрсатма барча хато ва номувофиқликлар рўйхатини, уларни бартараф этиш бўйича тавсияларни, шунингдек тўғриланган маълумотларни тақдим этиш муддати, аниқланган қоидабузилишларнинг ўз вақтида бартараф этилмаслиги респондентга нисбатан маъмурий чоралар кўрилишига сабаб бўлиши мумкинлиги тўғрисида огоҳлантиришни ва қайта ишлашни ўтказган ходимнинг электрон рақамли имзосини ўз ичига олиши лозим.
Ахборот тизими томонидан юбориладиган хабарлар респондентнинг шахсий кабинети билан бир қаторда, унинг электрон почта манзили, мобиль телефон рақамига SMS-хабар орқали ёки алоқанинг бошқа воситалари ёрдамида юборилиши мумкин.
15. Агар респондент, жорий ҳисобот даври учун статистика ҳисоботини юборгандан сўнг, ундаги хатолар ва номувофиқликларни мустақил аниқласа, у статистика органларига тўғриланган ҳисоботни тушунтиришлар билан юборади.
Қайта ишлаш даври ўтгунига қадар респондент томонидан тўғриланган ҳисоботнинг қайта юборилиши статистика ҳисоботини тақдим этиш тартибини бузиш ҳисобланмайди, ҳисобот мазкур Низомда белгиланган тартибда статистика органлари томонидан қабул қилинади ва қайта ишланади.
16. Респондент томонидан мустақил тўғриланган ҳисоботнинг Миллий статистика қўмитаси томонидан белгиланган қайта ишлаш давридан кечикиб қайта юборилиши статистика ҳисоботини тақдим этиш тартибини бузиш ҳисобланади ва қонунчилик ҳужжатларига мувофиқ мансабдор шахсларга нисбатан маъмурий жазо чоралари қўлланилишига сабаб бўлади.
17. Статистика органи ходими, жорий ҳисобот даври учун респондентдан электрон шаклдаги статистика ҳисоботини қабул қилганда:
Хабарномада белгиланган муддатдан кечиктирмай уни кўриб чиқишни таъминлаши;
статистика ҳисоботини кўриб чиқиш тугаганидан сўнг бир соатдан кечиктирмай, респондентга электрон рақамли имзо билан имзоланган Маълумотнома ёки Кўрсатмани юбориши.
18. Кўрсатмадаги маълумотларни тўғрилаб тақдим этиш муддати, амалдаги қонунчилик ва қайта ишлаш даврини ҳисобга олган ҳолда белгиланади.
19. Респондент топширилган ҳисоботни кўриб чиқиш натижалари ҳақида Маълумотни ахборот тизимидаги шахсий кабинети орқали олиши ва маълумотни ўқиганлиги ҳақида муносабат билдириши мумкин.
20. Респондент Кўрсатмани олгандан сўнг, Кўрсатмада белгиланган муддатда статистика ҳисоботини тўғрилаб, уни статистика органига қайтадан юборади. Бунда Кўрсатмада белгиланадиган муддат респондент томонидан статистика ҳисоботини тўғрилаб, уни статистика органига қайтадан юбориш учун мутаносиб равишда белгиланиши лозим.
Агар жорий ҳисобот даври учун тўғриланган статистика ҳисоботи Кўрсатмада белгиланган муддатда тақдим этилган бўлса, ҳисоботларни тақдим этиш муддатларини бузганлик учун белгиланган маъмурий жазо чоралари қўлланилмайди.
21. Агар жорий ҳисобот тўғри бўлиб, жорий статистика ҳисоботидаги номувофиқликлар илгари йўл қўйилган хатолар ва бузиб кўрсатишлар (ўтган ҳисобот даврларида) билан боғлиқ бўлганлиги учун респондент томонидан уни тўғрилаш мумкин бўлмаса, бу ҳолда респондент Кўрсатмада белгиланган муддатдан кечиктирмай:
номувофиқликлар сабабларига изоҳ берган ҳолда, жорий ҳисоботни статистика органига қайта юборади;
ўтган ҳисобот даврлари учун тўғриланган статистика ҳисоботини статистика органига тақдим этади (электрон ёки қоғоз шаклида).
22. Номувофиқликлар сабабларига изоҳ берилган ҳолда юборилган жорий ҳисоботни респондентдан олганда, статистика органи:
жорий статистика ҳисоботини қабул қилади ва респондентга Маълумотнома юборади;
респондентдан бузиб кўрсатишлар йўл қўйилган барча ўтган даврлар учун тўғриланган статистика ҳисоботини қабул қилади ва уларга нисбатан тегишли қонунчилик ҳужжатларида белгиланган тартибда маъмурий жавобгарлик чораларини кўриш масаласини ҳал этади;
қонунчилик ҳужжатларида белгиланган тартибда йиғма давлат статистика маълумотларига ўзгартиришлар киритиш бўйича зарур ҳаракатларни амалга оширади.
23. Респондентда Маълумотнома мавжуд бўлган тақдирда, статистика ҳисоботи қабул қилинган деб ҳисобланади. Маълумотномада кўрсатилган вақт ва сана статистика ҳисоботи қабул қилинган муддат бўлиб ҳисобланади.
24. Техник сабабларга кўра, мазкур Низомда белгиланган муддатларда Хабарнома ёки Маълумотномани олмаган респондент, ушбу ҳолат бўйича ўзи рўйхатдан ўтган жойдаги статистика органига хабар (электрон почта орқали, телефонда ёки шахсан) беради.
25. Статистика органи хабарни олгандан сўнг, респондент билан биргаликда, бир иш кунидан ошмаган муддатда мазкур ҳолатнинг келиб чиқиш сабабларини аниқлаш ва уни бартараф этиш бўйича зарур ҳаракатларни амалга ошириши зарур.
4-боб. Якуний қоидалар
26. Электрон шаклдаги статистика ҳисоботини қабул қилувчи статистика органлари ходимлари уларнинг ўз вақтида қайта ишланиши ва олинган маълумотлар махфийлигини таъминлаган ҳолда улардан келгусида фақат статистика мақсадларида фойдаланилиши учун шахсан жавобгардирлар.
27. Статистика органлари ходимлари статистика ҳисоботининг респондентнинг электрон рақамли имзоси билан ноқонуний имзоланиши учун жавобгар бўлмайдилар.
28. Мазкур Низом талабларининг бузилишида айбдор бўлган шахслар қонунчилик ҳужжатларига мувофиқ жавобгарликка тортилади.
29. Ушбу Низом Ўзбекистон Республикаси Ахборот технологиялари ва коммуникацияларини ривожлантириш вазирлиги билан келишилган.
Раис Б. БЕГАЛОВ
Ахборот технологиялари ва коммуникацияларини ривожлантириш вазири Ш. САДИКОВ
Тошкент ш.,
2021 йил 16 июнь,
Тошкент ш.,
2021 йил 12 июнь
9-мб-сон
Oʻzbekiston Respublikasi Davlat statistika qoʻmitasining
Qarori
NIZOM
Statistika hisobotini elektron shaklda taqdim etish tartibi toʻgʻrisidagi nizomni tasdiqlash haqida
Oʻzbekiston Respublikasi “Rasmiy statistika toʻgʻrisida”gi Qonuni va Vazirlar Mahkamasining 2017-yil 2-sentabrdagi 690-son “Oʻzbekiston Respublikasi Davlat statistika qoʻmitasi toʻgʻrisidagi nizomni tasdiqlash haqida”gi qaroriga muvofiq Oʻzbekiston Respublikasi Davlat statistika qoʻmitasi qaror qiladi:
1. Statistika hisobotini elektron shaklda taqdim etish tartibi toʻgʻrisidagi nizom ilovaga muvofiq tasdiqlansin.
2. Quyidagilar oʻz kuchini yoʻqotgan deb topilsin:
Oʻzbekiston Respublikasi Davlat statistika qoʻmitasining 2013-yil 24-iyundagi 3-mb-son “Elektron raqamli imzodan foydalangan holda elektron shaklda davlat statistika hisobotini taqdim etish tartibi toʻgʻrisidagi nizomni tasdiqlash haqida”gi qarori (roʻyxat raqami 2479, 2013-yil 17-iyul) (Oʻzbekiston Respublikasi qonun hujjatlari toʻplami, 2013-y., 29-son, 380-modda);
Oʻzbekiston Respublikasi Davlat statistika qoʻmitasining 2018-yil 26-sentabrdagi 5-mb-son “Elektron raqamli imzodan foydalangan holda elektron shaklda davlat statistika hisobotini taqdim etish tartibi toʻgʻrisida nizomning 1-bandiga oʻzgartirish kiritish haqida”gi qarori (roʻyxat raqami 2479-1, 2018-yil 8-oktabr) (Qonun hujjatlari maʼlumotlari milliy bazasi, 09.10.2018-y., 10/18/2479-1/2008-son).
3. Mazkur qaror rasmiy eʼlon qilingan kundan eʼtiboran kuchga kiradi.
Kelishildi:
Oʻzbekiston Respublikasi Davlat statistika qoʻmitasining 2021-yil 16-iyundagi 9-mb-son qaroriga ILOVA
Statistika hisobotini elektron shaklda taqdim etish tartibi toʻgʻrisidagi
Ushbu Nizom Oʻzbekiston Respublikasining “ Rasmiy statistika toʻgʻrisida ”gi, “ Elektron raqamli imzo toʻgʻrisida ”gi va “ Elektron hujjat aylanishi toʻgʻrisida ”gi qonunlariga muvofiq Internet tarmogʻi orqali elektron raqamli imzodan foydalangan holda elektron shaklda statistika hisobotini (bundan buyon matnda statistika hisoboti deb yuritiladi) taqdim etish tartibini belgilaydi.
1-bob. Umumiy qoidalar
1. Mazkur Nizomda quyidagi asosiy tushunchalardan foydalaniladi:
statistika hisoboti — Oʻzbekiston Respublikasi Milliy statistika qoʻmitasi (bundan buyon matnda Milliy statistika qoʻmitasi deb yuritiladi) tomonidan tasdiqlanadigan shakl, tartib va muddatlarda respondentlar tomonidan birlamchi maʼlumotlar asosida shakllantiriladigan va bepul taqdim etiladigan statistik maʼlumotlar;
respondent — rasmiy statistikani tayyorlovchilarga individual va boshqa maʼlumotlarni statistika maqsadlarida taqdim etuvchi jismoniy yoki yuridik shaxs;
statistika hisobotini elektron shaklda yigʻish axborot tizimi (bundan buyon matnda axborot tizimi deb yuritiladi) — statistika hisobotini Internet tarmogʻi orqali elektron raqamli imzodan foydalangan holda elektron shaklda taqdim etish va qayta ishlashni taʼminlovchi axborot tizimi;
elektron namuna — koʻrsatkichlar tavsifini, birlamchi statistik maʼlumotlarni tekshirish qismlarini, zarur meʼyoriy-axborot maʼlumotlarini oʻz ichiga olgan axborot tizimining bir qismi boʻlgan statistika hisobotining elektron shakli;
elektron raqamli imzo — elektron hujjatdagi mazkur elektron hujjat axborotini elektron raqamli imzoning yopiq kalitidan foydalangan holda maxsus oʻzgartirish natijasida hosil qilingan hamda elektron raqamli imzoning ochiq kaliti yordamida elektron hujjatdagi axborotda xatolik yoʻqligini aniqlash va elektron raqamli imzo yopiq kalitining egasini identifikatsiya qilish imkoniyatini beradigan imzo;
elektron hujjat — elektron shaklda qayd etilgan, elektron raqamli imzo bilan tasdiqlangan hamda elektron hujjatning uni identifikatsiya qilish imkonini beradigan boshqa rekvizitlariga ega boʻlgan axborot;
statistika hisoboti kelib tushganligi haqida xabarnoma (bundan buyon matnda Xabarnoma deb yuritiladi) — statistika hisobotining axborot tizimiga kelib tushgan sanasi va statistika organi tomonidan uni koʻrib chiqish natijasini respondentga maʼlum qilish muddati toʻgʻrisidagi maʼlumotlarni oʻz ichiga olgan, axborot tizimi tomonidan avtomatik tarzda shakllantiriluvchi xabar;
statistika hisobotini taqdim etish tartibi buzilganligi haqida koʻrsatma (bundan buyon matnda Koʻrsatma deb yuritiladi) — hisobot va boshqa maʼlumotlarni taqdim etmaslikda ifodalangan statistika hisobotini taqdim etish tartibini buzish, hisobot maʼlumotlarini buzib koʻrsatish yoki hisobotni taqdim etish muddatini buzish holatlari aniqlanganda mazkur kamchiliklarni bartaraf etish muddati haqida maʼlumotlarni oʻz ichiga olgan, axborot tizimi tomonidan avtomatik tarzda shakllantiriluvchi xabar;
statistika hisoboti qabul qilinganligi haqida maʼlumotnoma (bundan buyon matnda Maʼlumotnoma deb yuritiladi) — statistika organi tomonidan statistika hisobotining qabul qilinganligini tasdiqlovchi, sanasi va qabul qilgan xodimning familiyasi koʻrsatilgan, uning elektron raqamli imzosi bilan imzolangan va respondentga yuboriladigan elektron xabar;
qayta ishlash davri — taqdim etilgan statistika hisobotini tahlil qilish va umumlashtirish uchun Milliy statistika qoʻmitasi tomonidan belgilangan vaqt oraligʻi. Qayta ishlash davri tegishli yigʻma statistika maʼlumotlarini Oʻzbekiston Respublikasi Vazirlar Mahkamasi tomonidan tasdiqlanadigan bir yillik statistika dasturida belgilangan tarqatish muddatidan oshmasligi kerak.
2. Statistika hisoboti quyidagi respondentlar tomonidan taqdim etiladi:
faoliyat yuritayotgan respondentlar (faoliyat koʻrsatmayotgan va harakatsiz holatga oʻtkazilganlardan tashqari);
yangi tashkil etilgan respondentlar birinchi marotaba, belgilangan statistika hisobotining navbatdagi davridan boshlab;
faoliyati tugatilgan respondentlar faoliyat yuritgan hisobot davri uchun, oʻz faoliyatini tugatish vaqtida.
3. Statistika organlari tomonidan statistika hisobotini taqdim etishning belgilangan davriyligidan koʻproq davriylikda talab qilinishiga yoʻl qoʻyilmaydi.
4. Elektron shakldagi statistika hisoboti qogʻoz hujjatga tenglashtiriladi va u bilan bir xil yuridik kuchga ega hamda belgilangan tartibda elektron arxivda saqlanishi lozim.
Elektron shakldagi statistika hisobotining saqlanish muddati, qogʻoz shaklidagi statistika hisobotlari uchun belgilangan muddatdan kam boʻlmasligi kerak.
5. Zaruriyatga koʻra, statistika organi tomonidan elektron statistika hisobotining qogʻoz shakldagi nusxasi tayyorlanishi mumkin, nusxada tegishli rekvizitlar, tayyorlangan vaqti va sanasi koʻrsatiladi. Elektron statistika hisobotining qogʻoz shaklidagi nusxasi uni tayyorlagan statistika organi rahbari tomonidan imzolanadi.
6. Respondentlar axborot tizimidan Milliy statistika qoʻmitasining elektron interaktiv xizmatlar portalida (my.stat.uz) avtomatik tarzda yaratilgan shaxsiy kabineti orqali bepul foydalanadi.
7. Statistika hisoboti shakliga belgilangan tartibda oʻzgartirishlar kiritilgan taqdirda, Milliy statistika qoʻmitasi tegishli elektron namunaga zarur oʻzgartirishlarni kiritib, oʻzining rasmiy sayti orqali respondentni oʻzgartirishlar toʻgʻrisida xabardor qiladi.
2-bob. Statistika hisobotini elektron shaklda taqdim etish
8. Statistika hisobotini elektron shaklda taqdim etish uchun respondent:
Milliy statistika qoʻmitasining elektron interaktiv xizmatlar portali (my.stat.uz) orqali elektron raqamli imzodan foydalangan holda axborot tizimidagi shaxsiy kabinetiga kiradi;
tegishli statistika hisoboti shaklini taqdim etish davriyligi va belgilangan muddatidan kechiktirmay elektron statistika hisobotini shakllantiradi va Milliy statistika qoʻmitasiga axborot tizimi orqali joʻnatadi.
Statistika hisobotini taqdim etish muddatining soʻnggi kuni dam olish yoki bayram (ishlanmaydigan) kuniga toʻgʻri kelsa, undan keyin keladigan birinchi ish kuni muddat tugaydigan kun deb hisoblanadi.
9. Elektron shaklda taqdim etilgan statistika hisoboti, ishonchli maʼlumotlar asosida toʻliq toʻldirilgan va hisobot maʼlumotlarining mantiqiy tekshirish natijasida aniqlangan kamchiliklar toʻliq bartaraf etilgan boʻlishi kerak.
Elektron namunaning har bir katakchasidagi koʻrsatkich statistika hisoboti namunasida yoki unga ilova qilingan roʻyxatda (nomenklatura, tasniflagich) keltirilgan oʻlchov birliklariga muvofiq koʻrsatiladi.
Tegishli katakchada:
koʻrsatkich yoʻq boʻlgan holda boʻsh qoldiriladi;
koʻrsatkich qiymati belgilangan oʻlchov birligidan kam boʻlgan holda verguldan keyingi qiymat toʻliq aniqlikda yozib qoʻyiladi.
10. Statistika hisobotida quyidagi majburiy rekvizitlar koʻrsatilgan boʻlishi shart:
respondentning nomi va identifikatsion kodlari (soliq toʻlovchining identifikatsiya raqami — STIR (yuridik shaxslar uchun), korxona, tashkilotning asosiy kodi — KTUT, jismoniy shaxsning shaxsiy identifikatsiya raqami — JSHSHIR (jismoniy shaxslar uchun);
respondentning elektron va pochta manzili;
respondent bilan aloqa qilish uchun shahar telefon va mobil telefon raqami;
hujjat yaratilgan sana;
uni tuzishga masʼul boʻlgan mansabdor shaxslar toʻgʻrisida maʼlumotlar;
respondentning elektron raqamli imzosi.
Mazkur rekvizitlarda oʻzgarishlar boʻlganda, respondent tomonidan ular yangilanishi zarur.
11. Respondentning elektron raqamli imzosi bilan imzolangan va oʻzida majburiy rekvizitlarni toʻliq aks ettirgan elektron shakldagi statistika hisoboti respondentdan chiquvchi hujjat deb hisoblanadi.
3-bob. Statistika hisobotini taqdim etishda elektron hujjat aylanishi ishtirokchilarining oʻzaro hamkorligi
12. Respondentdan elektron statistika hisobotini qabul qilishda, axborot tizimi uning elektron manzilini avtomatik ravishda roʻyxatdan oʻtkazadi. Axborot tizimi tomonidan elektron manzilning roʻyxatdan oʻtkazilishi, respondent uchun statistika hisobotini faqat elektron shaklda taqdim etish majburiyatini bermaydi.
13. Statistika hisobotini yuborgandan soʻng respondent uning axborot tizimiga kelib tushganligi va uni koʻrib chiqish muddati toʻgʻrisida axborot tizimi orqali avtomatik tarzda shakllantirilgan elektron Xabarnomani oladi, ushbu Xabarnoma hisobotning statistika organi tomonidan qabul qilinganligini tasdiqlamaydi.
Xabarnomadagi statistika hisobotini koʻrib chiqish muddati, uni qayta ishlash davrini hisobga olgan holda belgilanadi.
14. Xabarnomada koʻrsatilgan vaqtdan kechiktirmay, respondent axborot tizimidagi oʻzining shaxsiy kabineti orqali quyidagi elektron hujjatlardan birini oladi:
Maʼlumotnomani — agar qayta ishlash uchun kelib tushgan statistika hisobotida maʼlumotlarni taqdim etmaslikda ifodalangan statistika hisobotini taqdim etish tartibini buzish, hisobot maʼlumotlarini buzib koʻrsatish yoki hisobotni taqdim etish muddatini buzish holatlari aniqlanmaganda;
Koʻrsatmani — agar statistika hisobotini taqdim etish tartibini buzish, hisobot maʼlumotlarini buzib koʻrsatish yoki hisobotni taqdim etish muddatini buzish holatlari aniqlanganda. Bunda koʻrsatma barcha xato va nomuvofiqliklar roʻyxatini, ularni bartaraf etish boʻyicha tavsiyalarni, shuningdek toʻgʻrilangan maʼlumotlarni taqdim etish muddati, aniqlangan qoidabuzilishlarning oʻz vaqtida bartaraf etilmasligi respondentga nisbatan maʼmuriy choralar koʻrilishiga sabab boʻlishi mumkinligi toʻgʻrisida ogohlantirishni va qayta ishlashni oʻtkazgan xodimning elektron raqamli imzosini oʻz ichiga olishi lozim.
Axborot tizimi tomonidan yuboriladigan xabarlar respondentning shaxsiy kabineti bilan bir qatorda, uning elektron pochta manzili, mobil telefon raqamiga SMS-xabar orqali yoki aloqaning boshqa vositalari yordamida yuborilishi mumkin.
15. Agar respondent, joriy hisobot davri uchun statistika hisobotini yuborgandan soʻng, undagi xatolar va nomuvofiqliklarni mustaqil aniqlasa, u statistika organlariga toʻgʻrilangan hisobotni tushuntirishlar bilan yuboradi.
Qayta ishlash davri oʻtguniga qadar respondent tomonidan toʻgʻrilangan hisobotning qayta yuborilishi statistika hisobotini taqdim etish tartibini buzish hisoblanmaydi, hisobot mazkur Nizomda belgilangan tartibda statistika organlari tomonidan qabul qilinadi va qayta ishlanadi.
16. Respondent tomonidan mustaqil toʻgʻrilangan hisobotning Milliy statistika qoʻmitasi tomonidan belgilangan qayta ishlash davridan kechikib qayta yuborilishi statistika hisobotini taqdim etish tartibini buzish hisoblanadi va qonunchilik hujjatlariga muvofiq mansabdor shaxslarga nisbatan maʼmuriy jazo choralari qoʻllanilishiga sabab boʻladi.
17. Statistika organi xodimi, joriy hisobot davri uchun respondentdan elektron shakldagi statistika hisobotini qabul qilganda:
Xabarnomada belgilangan muddatdan kechiktirmay uni koʻrib chiqishni taʼminlashi;
statistika hisobotini koʻrib chiqish tugaganidan soʻng bir soatdan kechiktirmay, respondentga elektron raqamli imzo bilan imzolangan Maʼlumotnoma yoki Koʻrsatmani yuborishi.
18. Koʻrsatmadagi maʼlumotlarni toʻgʻrilab taqdim etish muddati, amaldagi qonunchilik va qayta ishlash davrini hisobga olgan holda belgilanadi.
19. Respondent topshirilgan hisobotni koʻrib chiqish natijalari haqida Maʼlumotni axborot tizimidagi shaxsiy kabineti orqali olishi va maʼlumotni oʻqiganligi haqida munosabat bildirishi mumkin.
20. Respondent Koʻrsatmani olgandan soʻng, Koʻrsatmada belgilangan muddatda statistika hisobotini toʻgʻrilab, uni statistika organiga qaytadan yuboradi. Bunda Koʻrsatmada belgilanadigan muddat respondent tomonidan statistika hisobotini toʻgʻrilab, uni statistika organiga qaytadan yuborish uchun mutanosib ravishda belgilanishi lozim.
Agar joriy hisobot davri uchun toʻgʻrilangan statistika hisoboti Koʻrsatmada belgilangan muddatda taqdim etilgan boʻlsa, hisobotlarni taqdim etish muddatlarini buzganlik uchun belgilangan maʼmuriy jazo choralari qoʻllanilmaydi.
21. Agar joriy hisobot toʻgʻri boʻlib, joriy statistika hisobotidagi nomuvofiqliklar ilgari yoʻl qoʻyilgan xatolar va buzib koʻrsatishlar (oʻtgan hisobot davrlarida) bilan bogʻliq boʻlganligi uchun respondent tomonidan uni toʻgʻrilash mumkin boʻlmasa, bu holda respondent Koʻrsatmada belgilangan muddatdan kechiktirmay:
nomuvofiqliklar sabablariga izoh bergan holda, joriy hisobotni statistika organiga qayta yuboradi;
oʻtgan hisobot davrlari uchun toʻgʻrilangan statistika hisobotini statistika organiga taqdim etadi (elektron yoki qogʻoz shaklida).
22. Nomuvofiqliklar sabablariga izoh berilgan holda yuborilgan joriy hisobotni respondentdan olganda, statistika organi:
joriy statistika hisobotini qabul qiladi va respondentga Maʼlumotnoma yuboradi;
respondentdan buzib koʻrsatishlar yoʻl qoʻyilgan barcha oʻtgan davrlar uchun toʻgʻrilangan statistika hisobotini qabul qiladi va ularga nisbatan tegishli qonunchilik hujjatlarida belgilangan tartibda maʼmuriy javobgarlik choralarini koʻrish masalasini hal etadi;
qonunchilik hujjatlarida belgilangan tartibda yigʻma davlat statistika maʼlumotlariga oʻzgartirishlar kiritish boʻyicha zarur harakatlarni amalga oshiradi.
23. Respondentda Maʼlumotnoma mavjud boʻlgan taqdirda, statistika hisoboti qabul qilingan deb hisoblanadi. Maʼlumotnomada koʻrsatilgan vaqt va sana statistika hisoboti qabul qilingan muddat boʻlib hisoblanadi.
24. Texnik sabablarga koʻra, mazkur Nizomda belgilangan muddatlarda Xabarnoma yoki Maʼlumotnomani olmagan respondent, ushbu holat boʻyicha oʻzi roʻyxatdan oʻtgan joydagi statistika organiga xabar (elektron pochta orqali, telefonda yoki shaxsan) beradi.
25. Statistika organi xabarni olgandan soʻng, respondent bilan birgalikda, bir ish kunidan oshmagan muddatda mazkur holatning kelib chiqish sabablarini aniqlash va uni bartaraf etish boʻyicha zarur harakatlarni amalga oshirishi zarur.
4-bob. Yakuniy qoidalar
26. Elektron shakldagi statistika hisobotini qabul qiluvchi statistika organlari xodimlari ularning oʻz vaqtida qayta ishlanishi va olingan maʼlumotlar maxfiyligini taʼminlagan holda ulardan kelgusida faqat statistika maqsadlarida foydalanilishi uchun shaxsan javobgardirlar.
27. Statistika organlari xodimlari statistika hisobotining respondentning elektron raqamli imzosi bilan noqonuniy imzolanishi uchun javobgar boʻlmaydilar.
28. Mazkur Nizom talablarining buzilishida aybdor boʻlgan shaxslar qonunchilik hujjatlariga muvofiq javobgarlikka tortiladi.
29. Ushbu Nizom Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi bilan kelishilgan.
Rais B. BEGALOV
Axborot texnologiyalari va kommunikatsiyalarini rivojlantirish vaziri Sh. SADIKOV
Toshkent sh.,
2021-yil 16-iyun,
Toshkent sh.,
2021-yil 12-iyun
9-mb-son