📅 2021-yil 24-iyul · Prezident qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 24 июль · Президент қарорлари
Расмий матн. Расмий ҳужжат. Таҳририй изоҳлар киритилмаган.
📅 24 июля 2021 г. · Постановления Президента
Официальный текст. Официальный документ. Редакционные примечания не включены.
📅 24 July 2021 · Presidential resolutions
Official text. Official document. Editorial notes are not included.
Ўзбекистон Республикаси Президентининг
Қарори
Электрон онлайн-аукционни ўтказиш тартибини соддалаштириш, унинг шаффофлигини ошириш ҳамда иштирокчилар ҳуқуқларининг ишончли ҳимоясини кафолатлаш чора-тадбирлари тўғрисида
«E-auksion» электрон савдо платформасида электрон онлайн-аукционни ташкил этиш ва ўтказиш тартибини соддалаштириш ҳамда унификация қилиш, жараёнларнинг очиқлиги ва шаффофлигини ошириш, иштирокчилар ҳуқуқларини ишончли ҳимоя қилиш, шунингдек, аҳолининг аукционда қатнашиши учун қулайликлар яратиш мақсадида:
1. 2021 йил 1 сентябрдан бошлаб «E-auksion» электрон савдо платформасидаги (кейинги ўринларда — электрон савдо платформаси) электрон онлайн-аукционлар тартиб-таомилларининг ягона тартиби жорий этилсин ва унга мувофиқ:
иштирокчиларга, шу жумладан чет эл фуқароларига аукционда қатнашиш учун электрон рақамли имзо калити сертификати масофадан туриб, Давлат активларини бошқариш агентлигининг «Электрон онлайн-аукционларни ташкил этиш» акциядорлик жамияти (кейинги ўринларда — Марказ) томонидан бепул тақдим қилинади;
жисмоний ва юридик шахслар томонидан объектларни аукционга чиқариш учун тўланадиган йиғим бекор қилинади;
аукцион ўтказиш тўғрисидаги хабар у ўтказиладиган кундан 30 кун олдин эълон қилинади, бундан қонунчилик ҳужжатларида белгиланган ҳоллар мустасно;
аукцион ўтказилиши тўғрисидаги хабар эълон қилинган пайтдан бошлаб аукцион жараёни якунига қадар иштирокчиларга объектни сотиб олиш бўйича аукцион қадамига боғланмаган ўз нарх таклифини киритиш ҳуқуқи берилади;
сотилган объектнинг қиймати базавий ҳисоблаш миқдорининг беш минг бараваригача бўлганда, тўловларни 10 иш куни, беш минг бараварига тенг ёки ундан ортиқ бўлганда тўловларни 15 иш куни мобайнида тўлаш имконияти яратилади, қонунчилик ҳужжатларида белгиланган ҳоллар бундан мустасно;
аукцион ғолиби тўловларни тўлашдан бош тортган тақдирда, ғолиб ҳамда у томонидан ташкил этилган якка тартибдаги тадбиркор ноҳалол иштирокчи сифатида электрон савдо платформасидаги аукционлардан четлатилади. Бунда тўловларни тўламаслик ҳолати биринчи марта содир этилганда уч ой муддатга, иккинчи ва ундан кейинги ҳолатларда бир йил муддатга аукционлардан четлатилади;
аукционга чиқарилган объектларни сотишга ва олди-сотди шартномасини расмийлаштиришга фақат аукционда камида иккита иштирокчи қатнашганда рухсат берилади.
Белгилансинки, мазкур тартиб қонунчилик ҳужжатлари билан электрон савдо платформаси орқали реализация қилиниши ёки ижарага берилиши белгиланган барча турдаги активларга нисбатан татбиқ этилади.
2. Электрон онлайн-аукцион иштирокчилари ҳуқуқларининг ишончли ҳимоясини кафолатлаш мақсадида, белгилансинки:
2021 йил 1 октябрдан бошлаб аукцион натижалари бўйича пул маблағлари Марказнинг махсус ҳисоб рақамида йиғилади ва аукцион ғолиби томонидан объект қабул қилинганлиги тасдиқлангандан сўнг, улар буюртмачи ҳисоб рақамига ўтказилади;
Марказ 24/7 режимида тўлов хизматларини етказиб бериш фаолиятини ўзининг ахборот тизимидан, шу жумладан, мобил иловасидан фойдаланган ҳолда амалга оширади;
ижро ҳужжатлари бўйича мол-мулкни реализация қилиш учун ўтказилган электрон онлайн-аукцион натижалари ҳақидаги баённома уни тақиқдан ечиш, шунингдек, аукцион ғолиби номига мулкни, мулк ҳуқуқини ва бошқа мулкий ҳуқуқларни рўйхатдан ўтказиш (ҳисобга қўйиш) учун асос ҳисобланади. Бунда мажбурий тартибда ундириш учун юборилмаган маъмурий жарималарни тўлаш мажбурияти мол-мулкнинг собиқ эгаси зиммасида қолади;
электрон онлайн-аукционни ташкил этиш ва ўтказиш тартибидан ташқари бўлган тартиб-таомилларга риоя қилинмаганлиги учун аукцион натижалари тўғрисидаги баённомани бекор қилиш ёки ўзгартиришга йўл қўйилмайди.
3. Давлат активларини бошқариш агентлиги, Иқтисодий тараққиёт ва камбағалликни қисқартириш вазирлиги ҳамда Молия вазирлигининг қуйидагиларни электрон савдо платформасидаги электрон онлайн-аукцион йўли билан амалга ошириш ҳақидаги таклифлари маъқуллансин:
устав фондида давлат улуши 50 фоиз ва ундан ортиқ бўлган юридик шахслар, шунингдек, устав фондининг 50 фоизи ва ундан ортиғи 50 фоиз ва ундан ортиқ миқдорда давлат улушига эга юридик шахсга тегишли бўлган юридик шахсларнинг (кейинги ўринларда — давлат иштирокидаги корхоналар) улушлари, кўчмас мулклари, автомототранспорт воситалари ҳамда бошқа асосий воситаларини реализация қилиш, бундан аукционда сотилмасдан қарздорликларни сўндириш эвазига банк балансига олинган мол-мулкларни бозор қийматида тўғридан-тўғри сотиш, шу жумладан, кредит, бўлиб-бўлиб тўлаш, лизинг шартномалари ёки қонунчилик ҳужжатларида тақиқланмаган бошқа битимлар орқали реализация қилиш мустасно;
давлат иштирокидаги корхоналар кўчмас мулклари, автомототранспорт воситалари ҳамда бошқа асосий воситаларини (халқаро юк ташишларда темир йўл ҳаракат таркиби бундан мустасно) ижарага бериш.
Белгилансинки, давлат иштирокидаги корхоналар томонидан:
кўчмас мулкларини ижарага беришда, уларнинг давлат кўчмас мулкидан фойдаланганлик учун ижара тўловининг энг кам ставкалари, автомототранспорт воситаларини ижарага беришда жисмоний шахслар учун белгиланган ижара тўловининг энг кам ставкалари миқдорида, бошқа асосий воситаларини ижарага беришда эса Ўзбекистон Республикаси Солиқ кодексида белгиланган амортизациянинг камида йиллик энг юқори нормаси суммаси миқдорида бошланғич нархи белгиланади;
кўчмас мулклари, автомототранспорт воситалари ҳамда бошқа асосий воситаларини ижарага бериш ёки уларни ва улушни реализация қилиш ҳамда электрон онлайн-аукцион натижалари тўғрисидаги маълумотлар ўзларининг расмий веб-сайтларига жойлаштирилади.
4. Давлат активларини бошқариш агентлиги Молия вазирлиги ҳамда давлат номидан акциядор (таъсисчи, мулкдор) вазифаларини амалга оширувчи бошқа вазирлик, идора ва хўжалик бошқаруви органлари билан биргаликда:
бир ой муддатда давлат иштирокидаги корхоналар бошқарув органлари йиғилишларида уларга тегишли бўлган улушлар, кўчмас мулклар, автомототранспорт воситалари ҳамда бошқа асосий воситалардан самарали фойдаланиш, шу жумладан уларни реализация қилиш ёки ижарага бериш бўйича «йўл хариталари»ни тасдиқлаш ташаббуси билан чиқсин;
икки ой муддатда давлат иштирокидаги корхоналарнинг улушлари кўчмас мулклари, автомототранспорт воситалари ҳамда бошқа асосий воситалари уларни реализация қилиш ёки ижарага бериш бўйича электрон савдо платформасидаги электрон онлайн-аукционга чиқарилишини бошласин.
5. 2022 йил 1 январдан бошлаб жисмоний ва юридик шахслар томонидан автомототранспорт воситаларини электрон савдо платформасидаги электрон онлайн-аукцион йўли билан ижарага беришда шартномаларни нотариал тасдиқлаш талаби бекор қилинсин.
Бунда, электрон онлайн-аукцион натижасига кўра расмийлаштирилган баённома ижара шартномаси кучига эга бўлади.
Адлия вазирлиги икки ой муддатда қонунчилик ҳужжатларига автомототранспорт воситалари электрон савдо платформаси орқали ижарага берилганда, шартномани нотариал тартибда тасдиқлаш талабини бекор қилиш бўйича тегишли ўзгартиришларни киритсин.
6. Ўзбекистон Республикаси Президентининг 2019 йил 26 августдаги «Қишлоқ хўжалигига мўлжалланмаган бўш турган ер участкаларини бериш ҳамда архитектура-қурилиш ишларини амалга ошириш тартиб-таомилларини янада такомиллаштириш чора-тадбирлари тўғрисида»ги ПҚ-4427-сон қарори билан Давлат хизматлари марказларида жисмоний шахсларга электрон онлайн-аукционда иштирок этиш имкониятини яратиш белгиланганлиги маълумот учун қабул қилинсин.
Иқтисодий тараққиёт ва камбағалликни қисқартириш вазирлиги, Молия вазирлиги ва Давлат активларини бошқариш агентлигининг:
Тошкент ва Нукус шаҳарлари ҳамда вилоят марказларида Марказнинг ҳудудлардаги 3 нафардан вакиллари фаолиятини йўлга қўйиш ва уларнинг зиммасига аукционга чиқарилаётган объектлар бўйича реклама ишларини ташкил этиш, аҳоли орасида аукционни оммалаштириш ҳамда унга чиқарилаётган объектлар юзасидан маълумотларни сифатли тайёрлашга кўмаклашиш вазифасини юклаш;
Марказ ва унинг ҳудудлардаги вакиллари объектларни реклама қилиш учун Давлат солиқ қўмитаси ҳузуридаги Кадастр агентлигига тегишли учувчисиз учиш аппаратларидан белгиланган тартибда фойдаланиш;
«E-ijro auksion» ягона электрон савдо майдончасини «E-auksion» электрон савдо платформаси деб қайта номлаш ҳақидаги таклифлари маъқуллансин.
Давлат активларини бошқариш агентлиги Адлия вазирлиги билан биргаликда икки ой муддатда Марказнинг ҳудудлардаги вакиллари фаолиятини Давлат хизматлари марказларида йўлга қўйиш ва уларни зарурий воситалар билан таъминлаш чораларини кўрсин.
7. Давлат активларини бошқариш агентлиги Марказнинг ташкилий тузилмасида Ички аудит ва комплаенс-назорат хизмати ташкил этилишини ҳамда унинг зиммасига аукционларни ташкил этиш ва ўтказишда коррупция аломатларини аниқлаш ҳамда уларни бартараф этиш, шунингдек, Марказ ходимлари орасида коррупция ҳолатларига йўл қўймаслик бўйича профилактик тадбирларни амалга ошириш вазифасининг юкланишини таъминласин.
8. Ер участкаларини электрон савдо платформасидаги электрон онлайн-аукцион йўли билан реализация қилиш ёки ижарага бериш тартибини такомиллаштириш мақсадида шундай тартиб ўрнатилсинки, унга мувофиқ:
ер участкаларини аукционга инвестиция киритиш шарти билан чиқариш тартиби бекор қилинади;
Давлат солиқ қўмитаси ҳузуридаги Кадастр агентлиги ер участкалари бўйича аукцион ўтказилиши тўғрисидаги хабар эълон қилинган пайтдан бошлаб барча иштирокчиларга мазкур ер участкаларини олдиндан кўриш (кўздан кечириш) имкониятини таъминлайди;
ер участкаси бўйича тегишли маълумотлар, шу жумладан фотосуратлар, унинг геолокация ва координаталари тўлиқ кўрсатилмаган ҳолда аукционга чиқариш учун буюртма тақдим этилганда, у камчиликларни бартараф этиш учун қайтарилади.
9. Давлат активларини бошқариш агентлиги:
а) Ахборот технологиялари ва коммуникацияларини ривожлантириш вазирлиги, Савдо-саноат палатаси ҳамда Миллий телерадиокомпания билан биргаликда икки ҳафта муддатда қуйидагиларни назарда тутувчи амалий чора-тадбирлар режасини тасдиқласин:
республика бўйлаб барча туман ва шаҳарларда аукционни тарғиб қилиш бўйича семинар ва давра суҳбатларини ташкил этиш;
теле- ва радиоканалларда ҳар куни аукционда иштирок этиш бўйича видео- ва аудиолавҳаларни бериб бориш, шунингдек, ушбу йўналишда туркум кўрсатувлар тайёрлаш чораларини кўриш;
2021 йил 1 августга қадар электрон савдо платформасида аукционда иштирок этувчилар сони, шунингдек, аукцион жараёнини онлайн режимда кузатиб боришни жорий этиш;
2021 йил 1 октябрга қадар электрон савдо платформасининг демо версиясини ишлаб чиқиш, уни мактаб ва олий таълим муассасалари ўртасида оммалаштириш;
б) Марказ билан биргаликда икки ой муддатда ахборот технологиялари соҳасида етарли тажрибага эга бўлган ташкилотларни жалб этган ҳолда, электрон савдо платформасининг янгиланган дастурий таъминотини яратиш учун техник иқтисодий асосларни ишлаб чиқиб, тендер савдоларини эълон қилсин.
Бунда, аукцион натижалари бўйича иштирокчиларнинг ўзаро ҳисоб-китоблар механизмини (клиринг) юритувчи ахборот тизимини жорий қилиш назарда тутилсин;
в) Марказ билан биргаликда объектлар, шу жумладан ер участкаларини электрон онлайн-аукционда сотиб олиб, қисқа муддат давомида ундан фойдаланмаган ҳолда уларнинг олди-сотдиси билан шуғулланаётган юридик ва жисмоний шахсларни таҳлиллар асосида аниқлаб, савдолардан белгиланган тартибда четлатиш чораларини кўриб борсин.
10. Вазирлар Маҳкамаси бир ой муддатда мазкур қарор талабларидан келиб чиқиб, электрон савдо платформасида ташкил этиладиган электрон онлайн-аукционлар тартиб-таомилларининг ягона тартибини, шу жумладан аукцион натижалари бўйича расмийлаштириладиган баённоманинг намунавий шаклини тасдиқласин.
Мазкур ягона тартибда ижро ҳужжатлари бўйича объектларни электрон онлайн-аукционга чиқариш ва реализация қилишнинг ўзига хос хусусиятлари инобатга олинсин.
11. Давлат активларини бошқариш агентлиги манфаатдор вазирлик ва идоралар билан биргаликда икки ой муддатда қонунчилик ҳужжатларига мазкур қарордан келиб чиқадиган ўзгартириш ва қўшимчалар тўғрисида Вазирлар Маҳкамасига таклифлар киритсин.
12. Мазкур қарорнинг ижросини самарали ташкил этишга масъул ва жавобгар этиб Бош вазирнинг ўринбосари Ж.А. Қўчқоров ва Давлат активларини бошқариш агентлиги директори А.Ж. Ортиқов белгилансин.
Қарор ижросини ҳар чоракда муҳокама қилиб бориш, ижро учун масъул идоралар фаолиятини мувофиқлаштириш ва назорат қилиш Ўзбекистон Республикаси Бош вазири А.Н. Арипов зиммасига юклансин.
Ўзбекистон Республикаси Президенти Ш. МИРЗИЁЕВ
Тошкент ш.,
2021 йил 24 июль,
ПҚ-5197-сон
Oʻzbekiston Respublikasi Prezidentining
Qarori
Elektron onlayn-auksionni oʻtkazish tartibini soddalashtirish, uning shaffofligini oshirish hamda ishtirokchilar huquqlarining ishonchli himoyasini kafolatlash chora-tadbirlari toʻgʻrisida
“E-auksion” elektron savdo platformasida elektron onlayn-auksionni tashkil etish va oʻtkazish tartibini soddalashtirish hamda unifikatsiya qilish, jarayonlarning ochiqligi va shaffofligini oshirish, ishtirokchilar huquqlarini ishonchli himoya qilish, shuningdek, aholining auksionda qatnashishi uchun qulayliklar yaratish maqsadida:
1. 2021-yil 1-sentabrdan boshlab “E-auksion” elektron savdo platformasidagi (keyingi oʻrinlarda — elektron savdo platformasi) elektron onlayn-auksionlar tartib-taomillarining yagona tartibi joriy etilsin va unga muvofiq:
ishtirokchilarga, shu jumladan chet el fuqarolariga auksionda qatnashish uchun elektron raqamli imzo kaliti sertifikati masofadan turib, Davlat aktivlarini boshqarish agentligining “Elektron onlayn-auksionlarni tashkil etish” aksiyadorlik jamiyati (keyingi oʻrinlarda — Markaz) tomonidan bepul taqdim qilinadi;
jismoniy va yuridik shaxslar tomonidan obyektlarni auksionga chiqarish uchun toʻlanadigan yigʻim bekor qilinadi;
auksion oʻtkazish toʻgʻrisidagi xabar u oʻtkaziladigan kundan 30 kun oldin eʼlon qilinadi, bundan qonunchilik hujjatlarida belgilangan hollar mustasno;
auksion oʻtkazilishi toʻgʻrisidagi xabar eʼlon qilingan paytdan boshlab auksion jarayoni yakuniga qadar ishtirokchilarga obyektni sotib olish boʻyicha auksion qadamiga bogʻlanmagan oʻz narx taklifini kiritish huquqi beriladi;
sotilgan obyektning qiymati bazaviy hisoblash miqdorining besh ming baravarigacha boʻlganda, toʻlovlarni 10 ish kuni, besh ming baravariga teng yoki undan ortiq boʻlganda toʻlovlarni 15 ish kuni mobaynida toʻlash imkoniyati yaratiladi, qonunchilik hujjatlarida belgilangan hollar bundan mustasno;
auksion gʻolibi toʻlovlarni toʻlashdan bosh tortgan taqdirda, gʻolib hamda u tomonidan tashkil etilgan yakka tartibdagi tadbirkor nohalol ishtirokchi sifatida elektron savdo platformasidagi auksionlardan chetlatiladi. Bunda toʻlovlarni toʻlamaslik holati birinchi marta sodir etilganda uch oy muddatga, ikkinchi va undan keyingi holatlarda bir yil muddatga auksionlardan chetlatiladi;
auksionga chiqarilgan obyektlarni sotishga va oldi-sotdi shartnomasini rasmiylashtirishga faqat auksionda kamida ikkita ishtirokchi qatnashganda ruxsat beriladi.
Belgilansinki, mazkur tartib qonunchilik hujjatlari bilan elektron savdo platformasi orqali realizatsiya qilinishi yoki ijaraga berilishi belgilangan barcha turdagi aktivlarga nisbatan tatbiq etiladi.
2. Elektron onlayn-auksion ishtirokchilari huquqlarining ishonchli himoyasini kafolatlash maqsadida, belgilansinki:
2021-yil 1-oktabrdan boshlab auksion natijalari boʻyicha pul mablagʻlari Markazning maxsus hisob raqamida yigʻiladi va auksion gʻolibi tomonidan obyekt qabul qilinganligi tasdiqlangandan soʻng, ular buyurtmachi hisob raqamiga oʻtkaziladi;
Markaz 24/7 rejimida toʻlov xizmatlarini yetkazib berish faoliyatini oʻzining axborot tizimidan, shu jumladan, mobil ilovasidan foydalangan holda amalga oshiradi;
ijro hujjatlari boʻyicha mol-mulkni realizatsiya qilish uchun oʻtkazilgan elektron onlayn-auksion natijalari haqidagi bayonnoma uni taqiqdan yechish, shuningdek, auksion gʻolibi nomiga mulkni, mulk huquqini va boshqa mulkiy huquqlarni roʻyxatdan oʻtkazish (hisobga qoʻyish) uchun asos hisoblanadi. Bunda majburiy tartibda undirish uchun yuborilmagan maʼmuriy jarimalarni toʻlash majburiyati mol-mulkning sobiq egasi zimmasida qoladi;
elektron onlayn-auksionni tashkil etish va oʻtkazish tartibidan tashqari boʻlgan tartib-taomillarga rioya qilinmaganligi uchun auksion natijalari toʻgʻrisidagi bayonnomani bekor qilish yoki oʻzgartirishga yoʻl qoʻyilmaydi.
3. Davlat aktivlarini boshqarish agentligi, Iqtisodiy taraqqiyot va kambagʻallikni qisqartirish vazirligi hamda Moliya vazirligining quyidagilarni elektron savdo platformasidagi elektron onlayn-auksion yoʻli bilan amalga oshirish haqidagi takliflari maʼqullansin:
ustav fondida davlat ulushi 50 foiz va undan ortiq boʻlgan yuridik shaxslar, shuningdek, ustav fondining 50 foizi va undan ortigʻi 50 foiz va undan ortiq miqdorda davlat ulushiga ega yuridik shaxsga tegishli boʻlgan yuridik shaxslarning (keyingi oʻrinlarda — davlat ishtirokidagi korxonalar) ulushlari, koʻchmas mulklari, avtomototransport vositalari hamda boshqa asosiy vositalarini realizatsiya qilish, bundan auksionda sotilmasdan qarzdorliklarni soʻndirish evaziga bank balansiga olingan mol-mulklarni bozor qiymatida toʻgʻridan-toʻgʻri sotish, shu jumladan, kredit, boʻlib-boʻlib toʻlash, lizing shartnomalari yoki qonunchilik hujjatlarida taqiqlanmagan boshqa bitimlar orqali realizatsiya qilish mustasno;
davlat ishtirokidagi korxonalar koʻchmas mulklari, avtomototransport vositalari hamda boshqa asosiy vositalarini (xalqaro yuk tashishlarda temir yoʻl harakat tarkibi bundan mustasno) ijaraga berish.
Belgilansinki, davlat ishtirokidagi korxonalar tomonidan:
koʻchmas mulklarini ijaraga berishda, ularning davlat koʻchmas mulkidan foydalanganlik uchun ijara toʻlovining eng kam stavkalari, avtomototransport vositalarini ijaraga berishda jismoniy shaxslar uchun belgilangan ijara toʻlovining eng kam stavkalari miqdorida, boshqa asosiy vositalarini ijaraga berishda esa Oʻzbekiston Respublikasi Soliq kodeksida belgilangan amortizatsiyaning kamida yillik eng yuqori normasi summasi miqdorida boshlangʻich narxi belgilanadi;
koʻchmas mulklari, avtomototransport vositalari hamda boshqa asosiy vositalarini ijaraga berish yoki ularni va ulushni realizatsiya qilish hamda elektron onlayn-auksion natijalari toʻgʻrisidagi maʼlumotlar oʻzlarining rasmiy veb-saytlariga joylashtiriladi.
4. Davlat aktivlarini boshqarish agentligi Moliya vazirligi hamda davlat nomidan aksiyador (taʼsischi, mulkdor) vazifalarini amalga oshiruvchi boshqa vazirlik, idora va xoʻjalik boshqaruvi organlari bilan birgalikda:
bir oy muddatda davlat ishtirokidagi korxonalar boshqaruv organlari yigʻilishlarida ularga tegishli boʻlgan ulushlar, koʻchmas mulklar, avtomototransport vositalari hamda boshqa asosiy vositalardan samarali foydalanish, shu jumladan ularni realizatsiya qilish yoki ijaraga berish boʻyicha “yoʻl xaritalari”ni tasdiqlash tashabbusi bilan chiqsin;
ikki oy muddatda davlat ishtirokidagi korxonalarning ulushlari koʻchmas mulklari, avtomototransport vositalari hamda boshqa asosiy vositalari ularni realizatsiya qilish yoki ijaraga berish boʻyicha elektron savdo platformasidagi elektron onlayn-auksionga chiqarilishini boshlasin.
5. 2022-yil 1-yanvardan boshlab jismoniy va yuridik shaxslar tomonidan avtomototransport vositalarini elektron savdo platformasidagi elektron onlayn-auksion yoʻli bilan ijaraga berishda shartnomalarni notarial tasdiqlash talabi bekor qilinsin.
Bunda, elektron onlayn-auksion natijasiga koʻra rasmiylashtirilgan bayonnoma ijara shartnomasi kuchiga ega boʻladi.
Adliya vazirligi ikki oy muddatda qonunchilik hujjatlariga avtomototransport vositalari elektron savdo platformasi orqali ijaraga berilganda, shartnomani notarial tartibda tasdiqlash talabini bekor qilish boʻyicha tegishli oʻzgartirishlarni kiritsin.
6. Oʻzbekiston Respublikasi Prezidentining 2019-yil 26-avgustdagi “Qishloq xoʻjaligiga moʻljallanmagan boʻsh turgan yer uchastkalarini berish hamda arxitektura-qurilish ishlarini amalga oshirish tartib-taomillarini yanada takomillashtirish chora-tadbirlari toʻgʻrisida”gi PQ-4427-son qarori bilan Davlat xizmatlari markazlarida jismoniy shaxslarga elektron onlayn-auksionda ishtirok etish imkoniyatini yaratish belgilanganligi maʼlumot uchun qabul qilinsin.
Iqtisodiy taraqqiyot va kambagʻallikni qisqartirish vazirligi, Moliya vazirligi va Davlat aktivlarini boshqarish agentligining:
Toshkent va Nukus shaharlari hamda viloyat markazlarida Markazning hududlardagi 3 nafardan vakillari faoliyatini yoʻlga qoʻyish va ularning zimmasiga auksionga chiqarilayotgan obyektlar boʻyicha reklama ishlarini tashkil etish, aholi orasida auksionni ommalashtirish hamda unga chiqarilayotgan obyektlar yuzasidan maʼlumotlarni sifatli tayyorlashga koʻmaklashish vazifasini yuklash;
Markaz va uning hududlardagi vakillari obyektlarni reklama qilish uchun Davlat soliq qoʻmitasi huzuridagi Kadastr agentligiga tegishli uchuvchisiz uchish apparatlaridan belgilangan tartibda foydalanish;
“E-ijro auksion” yagona elektron savdo maydonchasini “E-auksion” elektron savdo platformasi deb qayta nomlash haqidagi takliflari maʼqullansin.
Davlat aktivlarini boshqarish agentligi Adliya vazirligi bilan birgalikda ikki oy muddatda Markazning hududlardagi vakillari faoliyatini Davlat xizmatlari markazlarida yoʻlga qoʻyish va ularni zaruriy vositalar bilan taʼminlash choralarini koʻrsin.
7. Davlat aktivlarini boshqarish agentligi Markazning tashkiliy tuzilmasida Ichki audit va komplayens-nazorat xizmati tashkil etilishini hamda uning zimmasiga auksionlarni tashkil etish va oʻtkazishda korrupsiya alomatlarini aniqlash hamda ularni bartaraf etish, shuningdek, Markaz xodimlari orasida korrupsiya holatlariga yoʻl qoʻymaslik boʻyicha profilaktik tadbirlarni amalga oshirish vazifasining yuklanishini taʼminlasin.
8. Yer uchastkalarini elektron savdo platformasidagi elektron onlayn-auksion yoʻli bilan realizatsiya qilish yoki ijaraga berish tartibini takomillashtirish maqsadida shunday tartib oʻrnatilsinki, unga muvofiq:
yer uchastkalarini auksionga investitsiya kiritish sharti bilan chiqarish tartibi bekor qilinadi;
Davlat soliq qoʻmitasi huzuridagi Kadastr agentligi yer uchastkalari boʻyicha auksion oʻtkazilishi toʻgʻrisidagi xabar eʼlon qilingan paytdan boshlab barcha ishtirokchilarga mazkur yer uchastkalarini oldindan koʻrish (koʻzdan kechirish) imkoniyatini taʼminlaydi;
yer uchastkasi boʻyicha tegishli maʼlumotlar, shu jumladan fotosuratlar, uning geolokatsiya va koordinatalari toʻliq koʻrsatilmagan holda auksionga chiqarish uchun buyurtma taqdim etilganda, u kamchiliklarni bartaraf etish uchun qaytariladi.
9. Davlat aktivlarini boshqarish agentligi:
a) Axborot texnologiyalari va kommunikatsiyalarini rivojlantirish vazirligi, Savdo-sanoat palatasi hamda Milliy teleradiokompaniya bilan birgalikda ikki hafta muddatda quyidagilarni nazarda tutuvchi amaliy chora-tadbirlar rejasini tasdiqlasin:
respublika boʻylab barcha tuman va shaharlarda auksionni targʻib qilish boʻyicha seminar va davra suhbatlarini tashkil etish;
tele- va radiokanallarda har kuni auksionda ishtirok etish boʻyicha video- va audiolavhalarni berib borish, shuningdek, ushbu yoʻnalishda turkum koʻrsatuvlar tayyorlash choralarini koʻrish;
2021-yil 1-avgustga qadar elektron savdo platformasida auksionda ishtirok etuvchilar soni, shuningdek, auksion jarayonini onlayn rejimda kuzatib borishni joriy etish;
2021-yil 1-oktabrga qadar elektron savdo platformasining demo versiyasini ishlab chiqish, uni maktab va oliy taʼlim muassasalari oʻrtasida ommalashtirish;
b) Markaz bilan birgalikda ikki oy muddatda axborot texnologiyalari sohasida yetarli tajribaga ega boʻlgan tashkilotlarni jalb etgan holda, elektron savdo platformasining yangilangan dasturiy taʼminotini yaratish uchun texnik iqtisodiy asoslarni ishlab chiqib, tender savdolarini eʼlon qilsin.
Bunda, auksion natijalari boʻyicha ishtirokchilarning oʻzaro hisob-kitoblar mexanizmini (kliring) yurituvchi axborot tizimini joriy qilish nazarda tutilsin;
v) Markaz bilan birgalikda obyektlar, shu jumladan yer uchastkalarini elektron onlayn-auksionda sotib olib, qisqa muddat davomida undan foydalanmagan holda ularning oldi-sotdisi bilan shugʻullanayotgan yuridik va jismoniy shaxslarni tahlillar asosida aniqlab, savdolardan belgilangan tartibda chetlatish choralarini koʻrib borsin.
10. Vazirlar Mahkamasi bir oy muddatda mazkur qaror talablaridan kelib chiqib, elektron savdo platformasida tashkil etiladigan elektron onlayn-auksionlar tartib-taomillarining yagona tartibini, shu jumladan auksion natijalari boʻyicha rasmiylashtiriladigan bayonnomaning namunaviy shaklini tasdiqlasin.
Mazkur yagona tartibda ijro hujjatlari boʻyicha obyektlarni elektron onlayn-auksionga chiqarish va realizatsiya qilishning oʻziga xos xususiyatlari inobatga olinsin.
11. Davlat aktivlarini boshqarish agentligi manfaatdor vazirlik va idoralar bilan birgalikda ikki oy muddatda qonunchilik hujjatlariga mazkur qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.
12. Mazkur qarorning ijrosini samarali tashkil etishga masʼul va javobgar etib Bosh vazirning oʻrinbosari J.A. Qoʻchqorov va Davlat aktivlarini boshqarish agentligi direktori A.J. Ortiqov belgilansin.
Qaror ijrosini har chorakda muhokama qilib borish, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2021-yil 24-iyul,
PQ-5197-son
Президента Республики Узбекистан
Постановление
О мерах по упрощению порядка проведения электронных онлайн-аукционов, повышению прозрачности и гарантированию надежной защиты прав их участников
В целях упрощения и унификации порядка организации и проведения электронных онлайн-аукционов на электронной торговой платформе «E-auksion», повышения открытости и прозрачности процессов, надежной защиты прав участников, а также создания удобств для участия населения в аукционах:
1. Внедрить с 1 сентября 2021 года единый порядок процедур электронных онлайн-аукционов на электронной торговой платформе «E-auksion» (далее — электронная торговая платформа), в соответствии с которым:
акционерное общество «Организация электронных онлайн-аукционов» при Агентстве по управлению государственными активами (далее — Центр) дистанционно на безвозмездной основе предоставляет участникам, включая иностранных граждан, сертификат ключа электронной цифровой подписи для участия в аукционе;
отменяется сбор, уплачиваемый физическими и юридическими лицами за выставление объектов на аукцион;
извещение о проведении аукциона публикуется за 30 дней до дня его проведения, за исключением случаев, установленных актами законодательства;
участникам предоставляется право внесения своего ценового предложения о приобретении объекта, не связанного с шагом аукциона, с момента опубликования извещения о проведении аукциона до окончания его процесса;
предоставляется возможность оплаты платежей в течении 10 рабочих дней, в случае если сумма реализованного объекта составляет менее пятитысячекратного размера базовой расчетной величины и 15 рабочих дней, в случае если стоимость реализованного объекта равна или превышает пятитысячекратный размер базовой расчетной величины, за исключением случаев, определенных актами законодательства;
в случае, если победитель аукциона откажется от уплаты сборов, победитель, а также организованный им индивидуальный предприниматель будут исключены из аукционов на электронной торговой площадке как ненадлежащий участник. В этом случае статус неплатежа исключается из аукционов на срок в три месяца при первом его совершении и на срок в один год во втором и последующих случаях;
реализация объектов, выставленных на аукцион, а также оформление договоров купли-продажи разрешаются только при участии в аукционе не менее двух участников.
Установить, что настоящий порядок распространяется на все виды активов, реализация или передача в аренду которых в соответствии с актами законодательства осуществляются посредством электронной торговой платформы.
2. В целях гарантирования надежной защиты прав участников электронных онлайн-аукционов определить, что:
с 1 октября 2021 года денежные средства по результатам аукциона аккумулируются на специальном расчетном счете Центра и перечисляются на расчетный счет заказчика после подтверждения приема объекта победителем аукциона;
Центр предоставляет платежные услуги в режиме 24/7 с использованием собственной информационной системы, включая мобильное приложение;
протокол о результатах электронного онлайн-аукциона по реализации имущества, проведенного в соответствии с исполнительными документами, является основанием для снятия его с запрета, а также регистрации (постановки на учет) имущества, права на имущество и других имущественных прав на имя победителя аукциона. При этом обязанность по оплате административных штрафов, не отправленных для взыскания в принудительном порядке, остается за бывшим владельцем имущества;
не допускается аннулирование или изменение протокола о результатах аукциона по причине несоблюдения процедур, кроме нарушений порядка организации и проведения электронного онлайн-аукциона.
3. Одобрить предложения Агентства по управлению государственными активами, Министерства экономического развития и сокращения бедности и Министерства финансов, предусматривающие посредством электронных онлайн-аукционов на электронной торговой платформе:
реализацию долей, недвижимого имущества, автомототранспортных и иных основных средств юридических лиц, в уставном фонде которых государственная доля составляет 50 процентов и более, а также юридических лиц, в уставном фонде которых 50 процентов и более принадлежит юридическим лицам, в уставном фонде которых государственная доля составляет 50 процентов и более (далее — предприятия с государственным участием), за исключением прямой продажи по рыночной стоимости имущества, не реализованного на аукционе и принятого на баланс банка в счет погашения задолженностей, в том числе реализацию такого имущества путем договоров кредита, оплаты в рассрочку, лизинга или других сделок, не запрещенных актами законодательства;
передачу в аренду недвижимого имущества, автомототранспортных и иных основных средств (за исключением железнодорожного подвижного состава при международных грузоперевозках) предприятий с государственным участием.
Определить, что:
при передаче предприятиями с государственным участием недвижимого имущества в аренду стартовая цена устанавливается в размере минимальной ставки арендной платы за пользование государственным недвижимым имуществом, автомототранспортных средств — минимальной ставки арендной платы, установленной для физических лиц, иных основных средств — не менее суммы максимальной нормы годового размера амортизации, определенной Налоговым кодексом Республики Узбекистан;
сведения о передаче в аренду или реализации недвижимого имущества, автотранспортных и иных основных средств, реализации долей, а также о результатах электронных онлайн-аукционов размещаются предприятиями с государственным участием на официальных веб-сайтах указанных предприятий.
4. Агентству по управлению государственными активами совместно с Министерством финансов, а также другими министерствами, ведомствами и органами хозяйственного управления, выполняющими от имени государства задачи акционеров (учредителей, собственников):
в месячный срок инициировать на собраниях органов управления предприятий с государственным участием утверждение «дорожных карт» по эффективному использованию, включая реализацию или передачу в аренду, долей, недвижимого имущества, автомототранспортных и иных основных средств, принадлежащих указанным предприятиям;
в двухмесячный срок начать выставление на электронный онлайн-аукцион на электронной торговой платформе долей, недвижимого имущества, автомототранспортных и иных основных средств предприятий с государственным участием в целях их реализации или передачи в аренду.
5. Отменить с 1 января 2022 года требование нотариального заверения договоров по передаче в аренду физическими и юридическими лицами автомототранспортных средств посредством электронного онлайн-аукциона на электронной торговой платформе.
При этом протокол, оформленный по результатам электронного онлайн-аукциона, имеет силу договора аренды.
Министерству юстиции в двухмесячный срок внести в акты законодательства соответствующие изменения, предусматривающие отмену требования нотариального заверения договоров по передаче в аренду автомототранспортных средств посредством электронной торговой платформы.
6. Принять к сведению, что постановлением Президента Республики Узбекистан от 26 августа 2019 года № ПП-4427 «О мерах по дальнейшему совершенствованию процедур предоставления свободных земельных участков несельскохозяйственного назначения и осуществления архитектурно-строительных работ» определено создание в центрах государственных услуг возможности для участия физических лиц в электронных онлайн-аукционах.
Одобрить предложения Министерства экономического развития и сокращения бедности, Министерства финансов и Агентства по управлению государственными активами по:
введению региональных представителей Центра в городах Ташкенте и Нукусе, а также областных центрах в количестве по три единицы с возложением на них задач организации рекламной работы по объектам, выставляемым на аукцион, популяризации аукциона среди населения, оказания содействия в качественной подготовке информации по объектам, выставляемым на аукцион;
использованию Центром и его региональными представителями беспилотных летательных аппаратов, принадлежащих Агентству по кадастру при Государственном налоговом комитете, для рекламы объектов в установленном порядке;
переименованию единой электронной торговой площадки «E-ijro auksion» в электронную торговую платформу «E-auksion».
Агентству по управлению государственными активами совместно с Министерством юстиции в двухмесячный срок принять меры по организации деятельности региональных представителей Центра в центрах государственных услуг и обеспечению их необходимыми средствами.
7. Агентству по управлению государственными активами обеспечить создание в организационной структуре Центра Службы внутреннего аудита и комплаенс-контроля с возложением на нее задач выявления и пресечения коррупционных проявлений при организации и проведении аукционов, осуществления профилактических мероприятий по недопущению случаев коррупции среди работников Центра.
8. В целях совершенствования порядка реализации или передачи в аренду земельных участков посредством электронных онлайн-аукционов на электронной торговой платформе установить порядок, в соответствии с которым:
отменяется порядок выставления земельных участков на аукцион с условием внесения инвестиций;
Агентство по кадастру при Государственном налоговом комитете обеспечивает возможность предварительного ознакомления (осмотра) всех участников с указанными земельными участками с момента опубликования извещения о проведении аукциона по земельным участкам;
при представлении заявки для выставления земельного участка на аукцион с неполным указанием соответствующих данных о земельном участке, включая фотографии, геолокацию и координаты, она возвращается для устранения недостатков.
9. Агентству по управлению государственными активами:
а) совместно с Министерством по развитию информационных технологий и коммуникаций, Торгово-промышленной палатой и Национальной телерадиокомпанией в двухнедельный срок утвердить план практических мер, предусматривающий:
организацию семинаров и «круглых столов» по пропаганде аукционов во всех районах и городах республики;
принятие мер для ежедневной трансляции на теле- и радиоканалах видео- и аудио сюжетов об участии на аукционах, а также подготовки цикла передач в данном направлении;
внедрение до 1 августа 2021 года на электронной торговой платформе процесса наблюдения в режиме онлайн за ходом аукциона, а также информации о количестве участвующих на аукционе;
разработку до 1 октября 2021 года демоверсии электронной торговой платформы, ее популяризацию в школах и высших образовательных учреждениях;
б) совместно с Центром в двухмесячный срок с привлечением организаций, имеющих достаточный опыт в области информационных технологий, разработать технико-экономическое обоснование обновленного программного обеспечения электронной торговой платформы и опубликовать объявление о тендерных торгах.
При этом предусмотреть внедрение информационной системы, обеспечивающей ведение механизма взаиморасчетов (клиринга) участников по результатам аукциона;
в) совместно с Центром выявлять и принимать в установленном порядке на основе анализов меры по отстранению от торгов юридических и физических лиц, приобретающих объекты, включая земельные участки, на электронных онлайн-аукционах и занимающихся их перепродажей без использования в короткие сроки.
10. Кабинету Министров в месячный срок, исходя из требований настоящего постановления, утвердить единый порядок проведения электронных онлайн-аукционов, проводимых на электронной торговой платформе, включая типовую форму протокола, оформляемого по результатам аукциона.
При этом принять во внимание особенности выставления и реализации объектов на электронном онлайн-аукционе по реализации по исполнительным документам.
11. Агентству по управлению государственными активами совместно с заинтересованными министерствами и ведомствами в двухмесячный срок внести в Кабинет Министров предложения об изменениях и дополнениях в акты законодательства, вытекающих из настоящего постановления.
12. Возложить на заместителя Премьер-министра Д.А. Кучкарова и директора Агентства по управлению государственными активами А.Ж. Ортикова персональную ответственность за эффективную организацию исполнения настоящего постановления.
Ежеквартальное обсуждение хода исполнения настоящего постановления, осуществление координации и контроля за деятельностью ведомств, ответственных за его исполнение, возложить на Премьер-министра Республики Узбекистан А.Н. Арипова.
Президент Республики Узбекистан Ш. МИРЗИЁЕВ
г. Ташкент,
24 июля 2021 г.,
№ ПП-5197