📅 2021-yil 29-iyul · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 29 июль · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 29 июля 2021 г. · Постановления Кабинета Министров
Официальный текст. Официальный документ. Редакционные примечания не включены.
📅 29 July 2021 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Чирчиқ давлат педагогика институти ҳузуридаги Тошкент тумани хизмат кўрсатиш ва сервис техникумининг Чирчиқ филиалини ташкил этиш чора-тадбирлари тўғрисида
Ўзбекистон Республикаси Президентининг «Профессионал таълим тизимини янада такомиллаштиришга доир қўшимча чора-тадбирлар тўғрисида» 2019 йил 6 сентябрдаги ПФ-5812-сон Фармони ижросини таъминлаш, келгусида ҳудудни ижтимоий-иқтисодий ривожлантириш дастурлари доирасида яратиладиган янги иш ўринларига бўлган меҳнат бозори эҳтиёжларини ҳисобга олиб, ўрта махсус профессионал таълим босқичидаги кадрларга бўлган талабни қондириш мақсадида Вазирлар Маҳкамаси қарор қилади:
1. Ўзбекистон Республикаси Олий ва ўрта махсус таълим вазирлиги, Тошкент вилояти ҳокимлигининг Чирчиқ давлат педагогика институти ҳузуридаги Тошкент тумани хизмат кўрсатиш ва сервис техникумининг (кейинги ўринларда — Техникум) Чирчиқ филиалини (кейинги ўринларда — Филиал) ташкил этиш тўғрисидаги таклифига розилик берилсин.
Белгилансинки, Филиал Ўзбекистон Республикаси Давлат герби тасвири туширилган ва ўз номи давлат тилида ёзилган муҳрга ва бланкаларга, мустақил балансга ҳамда Ўзбекистон Республикаси Молия вазирлигининг Ғазначилигида шахсий ғазна ҳисобварағига эга бўлади.
2. Қуйидагилар Филиалнинг асосий вазифалари этиб белгилансин:
ҳудудни ижтимоий-иқтисодий ривожлантириш дастурлари доирасида ва келгусида яратиладиган янги иш ўринларига бўлган меҳнат бозори эҳтиёжларини ҳамда Филиалнинг имкониятларини ҳисобга олиб, белгиланган тартибда қабул параметрларини шакллантириш;
ўқувчиларни танланган мутахассислик бўйича замонавий талабларга жавоб берадиган, пухта билим, амалий кўникма ва малакага эга бўладиган, касбий тайёргарликни таъминлайдиган давлат таълим стандартлари асосида ўқитиш;
битирувчилар амалиётларини, уларни ишга жойлаштиришни Германиянинг «Siemens» компанияси ҳамда Халқаро ҳамкорлик бўйича Германия жамияти (GIZ) ва бошқа хорижий ташкилотлар билан йўлга қўйиш;
таълим жараёни учун зарур моддий-техник, ўқув-методик базани яратиш ва ўқув жараёнига юқори малакали ва иш тажрибасига эга бўлган амалиётчи мутахассисларни жалб этиш.
3. Белгилаб қўйилсинки:
Филиал фаолияти 2021/2022 ўқув йилидан бошланади;
Филиал Тошкент вилояти, Чирчиқ шаҳри, Бобур кўчаси, 22-уйда жойлашган Чирчиқ давлат педагогика институтига тегишли собиқ Чирчиқ саноат касб-ҳунар коллежининг икки қаватли устахона биносига текин фойдаланиш ҳуқуқи билан жойлаштирилади.
4. Ўзбекистон Республикаси Олий ва ўрта махсус таълим вазирлиги:
бир ой муддатда — Техникумнинг филиали ташкил этилганлигини ҳисобга олиб, белгиланган тартибда унинг устави янги таҳрирда тасдиқланишини ҳамда давлат рўйхатидан қайта ўтказилишини, шунингдек, Филиалнинг устави тасдиқланишини ва давлат рўйхатидан ўтказилишини таъминласин;
икки ой муддатда — Филиалнинг штатлар жадвали ва харажатлар сметасини ишлаб чиқсин ва белгиланган тартибда тасдиқлаш чораларини кўрсин;
Чирчиқ давлат педагогика институти билан биргаликда Филиалда ўқув жараёнини ташкил этиш мақсадида юқори малакали педагог ходимларни жалб этиш чораларини кўрсин;
Инвестициялар ва ташқи савдо вазирлиги, «Ўзэлтехсаноат» уюшмаси, Бандлик ва меҳнат муносабатлари вазирлиги билан биргаликда Филиал битирувчилари амалиётларини ташкил этсин.
5. Филиал фаолиятини молиялаштириш 2021 йилда Ўзбекистон Республикасининг республика бюджетидан биринчи даражали бюджет маблағларини тақсимловчи сифатида Ўзбекистон Республикаси Олий ва ўрта махсус таълим вазирлигига ажратилган маблағлар доирасида амалга оширилади, 2022 йилдан бошлаб эса — Ўзбекистон Республикаси Давлат бюджети параметрларида назарда тутилади.
6. Мазкур қарорнинг бажарилишини назорат қилиш Ўзбекистон Республикаси Бош вазирининг ижтимоий ривожлантириш масалалари бўйича ўринбосари Б.А. Мусаев ҳамда Ўзбекистон Республикаси олий ва ўрта махсус таълим вазири А.Х. Тошкулов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2021 йил 29 июль,
472-сон
Oʻzbekiston Respublikasi Vazirlar Mahkamasining
qarori
Chirchiq davlat pedagogika instituti huzuridagi Toshkent tumani xizmat koʻrsatish va servis texnikumining Chirchiq filialini tashkil etish chora-tadbirlari toʻgʻrisida
Oʻzbekiston Respublikasi Prezidentining “Professional taʼlim tizimini yanada takomillashtirishga doir qoʻshimcha chora-tadbirlar toʻgʻrisida” 2019-yil 6-sentabrdagi PF-5812-son Farmoni ijrosini taʼminlash, kelgusida hududni ijtimoiy-iqtisodiy rivojlantirish dasturlari doirasida yaratiladigan yangi ish oʻrinlariga boʻlgan mehnat bozori ehtiyojlarini hisobga olib, oʻrta maxsus professional taʼlim bosqichidagi kadrlarga boʻlgan talabni qondirish maqsadida Vazirlar Mahkamasi qaror qiladi:
1. Oʻzbekiston Respublikasi Oliy va oʻrta maxsus taʼlim vazirligi, Toshkent viloyati hokimligining Chirchiq davlat pedagogika instituti huzuridagi Toshkent tumani xizmat koʻrsatish va servis texnikumining (keyingi oʻrinlarda — Texnikum) Chirchiq filialini (keyingi oʻrinlarda — Filial) tashkil etish toʻgʻrisidagi taklifiga rozilik berilsin.
Belgilansinki, Filial Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga va blankalarga, mustaqil balansga hamda Oʻzbekiston Respublikasi Moliya vazirligining Gʻaznachiligida shaxsiy gʻazna hisobvaragʻiga ega boʻladi.
2. Quyidagilar Filialning asosiy vazifalari etib belgilansin:
hududni ijtimoiy-iqtisodiy rivojlantirish dasturlari doirasida va kelgusida yaratiladigan yangi ish oʻrinlariga boʻlgan mehnat bozori ehtiyojlarini hamda Filialning imkoniyatlarini hisobga olib, belgilangan tartibda qabul parametrlarini shakllantirish;
oʻquvchilarni tanlangan mutaxassislik boʻyicha zamonaviy talablarga javob beradigan, puxta bilim, amaliy koʻnikma va malakaga ega boʻladigan, kasbiy tayyorgarlikni taʼminlaydigan davlat taʼlim standartlari asosida oʻqitish;
bitiruvchilar amaliyotlarini, ularni ishga joylashtirishni Germaniyaning “Siemens” kompaniyasi hamda Xalqaro hamkorlik boʻyicha Germaniya jamiyati (GIZ) va boshqa xorijiy tashkilotlar bilan yoʻlga qoʻyish;
taʼlim jarayoni uchun zarur moddiy-texnik, oʻquv-metodik bazani yaratish va oʻquv jarayoniga yuqori malakali va ish tajribasiga ega boʻlgan amaliyotchi mutaxassislarni jalb etish.
3. Belgilab qoʻyilsinki:
Filial faoliyati 2021/2022 oʻquv yilidan boshlanadi;
Filial Toshkent viloyati, Chirchiq shahri, Bobur koʻchasi, 22-uyda joylashgan Chirchiq davlat pedagogika institutiga tegishli sobiq Chirchiq sanoat kasb-hunar kollejining ikki qavatli ustaxona binosiga tekin foydalanish huquqi bilan joylashtiriladi.
4. Oʻzbekiston Respublikasi Oliy va oʻrta maxsus taʼlim vazirligi:
bir oy muddatda — Texnikumning filiali tashkil etilganligini hisobga olib, belgilangan tartibda uning ustavi yangi tahrirda tasdiqlanishini hamda davlat roʻyxatidan qayta oʻtkazilishini, shuningdek, Filialning ustavi tasdiqlanishini va davlat roʻyxatidan oʻtkazilishini taʼminlasin;
ikki oy muddatda — Filialning shtatlar jadvali va xarajatlar smetasini ishlab chiqsin va belgilangan tartibda tasdiqlash choralarini koʻrsin;
Chirchiq davlat pedagogika instituti bilan birgalikda Filialda oʻquv jarayonini tashkil etish maqsadida yuqori malakali pedagog xodimlarni jalb etish choralarini koʻrsin;
Investitsiyalar va tashqi savdo vazirligi, “Oʻzeltexsanoat” uyushmasi, Bandlik va mehnat munosabatlari vazirligi bilan birgalikda Filial bitiruvchilari amaliyotlarini tashkil etsin.
5. Filial faoliyatini moliyalashtirish 2021-yilda Oʻzbekiston Respublikasining respublika budjetidan birinchi darajali budjet mablagʻlarini taqsimlovchi sifatida Oʻzbekiston Respublikasi Oliy va oʻrta maxsus taʼlim vazirligiga ajratilgan mablagʻlar doirasida amalga oshiriladi, 2022-yildan boshlab esa — Oʻzbekiston Respublikasi Davlat budjeti parametrlarida nazarda tutiladi.
6. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari B.A. Musayev hamda Oʻzbekiston Respublikasi oliy va oʻrta maxsus taʼlim vaziri A.X. Toshkulov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2021-yil 29-iyul,
472-son