UzbekAI

Ўзбекистон Республикаси Транспорт вазирининг

буйруғи

НИЗОМ

МЕЗОНЛАРИ

Йўловчи автовокзаллари ва йўловчи автостанциялари тўғрисидаги низомни тасдиқлаш ҳақида

Ўзбекистон Республикасининг «Автомобиль транспорти тўғрисида»ги Қонуни ва Ўзбекистон Республикаси Вазирлар Маҳкамасининг 2003 йил 4 ноябрдаги 482-сон «Ўзбекистон Республикасида автомобиль транспортида йўловчилар ва багаж ташиш қоидаларини ҳамда автобусларда йўловчилар ташиш хавфсизлигини таъминлашга доир талабларни тасдиқлаш ҳақида»ги қарорига мувофиқ буюраман:

1. Йўловчи автовокзаллари ва йўловчи автостанциялари тўғрисидаги низом иловага мувофиқ тасдиқлансин.

2. Мазкур буйруқ расмий эълон қилинган кундан эътиборан кучга киради.

Келишилди:

Ўзбекистон Республикаси транспорт вазирининг 2021 йил 25 сентябрь 14-сон буйруғига ИЛОВА

Йўловчи автовокзаллари ва йўловчи автостанциялари тўғрисидаги

Мазкур Низом Ўзбекистон Республикасининг «Автомобиль транспорти тўғрисида»ги Қонуни ва Ўзбекистон Республикаси Вазирлар Маҳкамасининг 2003 йил 4 ноябрдаги 482-сон «Ўзбекистон Республикасида автомобиль транспортида йўловчилар ва багаж ташиш қоидаларини ҳамда автобусларда йўловчилар ташиш хавфсизлигини таъминлашга доир талабларни тасдиқлаш ҳақида»ги қарорига мувофиқ ташкилий-ҳуқуқий шаклидан қатъи назар, йўловчи автовокзаллари ва йўловчи автостанцияларининг фаолият юритиш тартибини белгилайди.

1-боб. Умумий қоидалар

1. Мазкур Низомда қуйидаги тушунчалардан фойдаланилади:

автовокзал (автостанция) — транспорт-экспедиция, ташиш фаолиятини амалга оширувчи ва йўловчиларга бошқа хизматлар кўрсатувчи ташкилот;

чипта кассаси — йўл чипталарини сотиш ва йўловчиларга йўналишлар тўғрисида маълумот беришга мўлжалланган пункт;

перрон — автовокзал (автостанция)ларда ёки бекатларда йўловчиларнинг автотранспорт воситаларига қулай ва хавфсиз ўтиши, чиқиши ва тушиши учун мўлжалланган майдонча;

перрон (чипта) назоратчиси — автотранспорт воситаларининг санитария-гигиена ҳолатини, йўл ҳужжатлари ва чипталарнинг мавжудлиги ва ҳолатини, автотранспорт воситаларининг ҳаракатланиш жадвалига мувофиқ жўнатилишини назорат қилувчи шахс;

йўловчиларнинг айнан бир вақтдаги сиғими — автовокзалларда (автостанцияларда) жўнатилаётган ва кириб келаётган ҳамда бир вақтнинг ўзида йўловчилар кутиш залларида ва йўловчилар хоналарида сиғиши мумкин бўлган йўловчиларнинг умумий сони;

автовокзал (автостанция) ишларининг технологик жараёни — автовокзал (автостанция) хизматларини ташкил этиш жараёни, автотранспорт воситаларини қабул қилиш ва жўнатиш ҳамда йўловчиларга хизмат кўрсатиш бўйича доимий равишда бажариладиган операцияларнинг ўзаро боғлиқлиги ва мунтазамлилиги.

станция ҳудуди — автовокзалнинг (автостанциянинг) автотранспорт воситалари жўнатилиши ва кириб келиши ҳамда уларга техник хизмат кўрсатилиши учун мўлжалланган ҳудуди.

2. Автовокзалнинг (автостанциянинг) ўтказиш имконияти бир сутка ичида автовокзалдан (автостанциядан) йўналишга жўнатилиши мумкин бўлган автотранспорт воситаларининг жами сонидан келиб чиқиб аниқланади.

2-боб. Автовокзалларга (автостанцияларга) қўйиладиган умумий талаблар

3. Автовокзаллар (автостанциялар) аҳоли яшаш жойларида ҳамда автомобиль йўллари трассаларида йўловчиларга хизмат кўрсатиш ва халқаро, шаҳарлараро ҳамда шаҳар атрофида қатновчи автотранспорт воситалари йўналишларида уларнинг ҳаракатини тезкор бошқариш, фойдаланиш учун хизмат хоналари ва ҳайдовчиларнинг дам олиш хоналарини жойлаштириш учун ташкил этилади.

4. Мазкур Низомнинг иловасида келтирилган мезонларга мувофиқ автовокзалнинг тоифаси ва автостанциянинг класси ҳисобга олинган ҳолда уларнинг ҳудудида қуйидагилар жойлаштирилиши лозим:

йўловчилар кутиши учун мўлжалланган бинолар ва хоналар;

чипта кассалари;

ёш болали йўловчиларга мўлжалланган хоналар;

ҳайдовчилар ва йўловчиларнинг узоқ вақт дам олишига мўлжалланган меҳмонхоналар;

маъмурият хонаси;

умумий овқатланиш шаҳобчалари;

тиббий пунктлар;

қўл юкини (багажни) сақлаш хоналари;

йўловчилар хавфсизлигини таъминлаш учун монитор орқали кузатиш қурилмалари ўрнатилган хоналар;

маданий-маиший ва санитария-гигиена хоналари;

йўловчиларни чиқариш ва тушириш перронлари;

рейслар оралиғида автотранспорт воситалари тўхтаб турадиган майдончалар;

техник кўрикдан ўтказиш ва автотранспорт воситалари салонларини тозалаш постлари;

шаҳар йўловчилар транспорти (метрополитендан ташқари) кириб келиши ва туриши учун мўлжалланган автовокзал олди майдони;

автовокзал (автостанция) ҳудуди бўйлаб ҳамда чиқариш ва тушириш перронларида ногиронлиги бўлган шахсларнинг ўриндиқли аравачалари учун мўлжалланган йўллар;

ногиронлиги бўлган шахсларни ўриндиқли аравачалар билан чиқариш ва тушириш учун мўлжалланган жойлар.

5. Йўловчиларнинг хавфсизлигини таъминлаш мақсадида автовокзал (автостанция) ҳудуди бўйича тўсиқлар ҳамда йўловчиларнинг кутиш залларида, чипта кассаларида ва йўловчилар кўп тўпланадиган бошқа жойларда видеокузатиш камералари ўрнатилади.

6. Автовокзалларга кириш ва чиқиш жойларида йўловчилар ҳамда уларнинг қўл юкини (багажини) текшириш учун турғун металл детекторлар билан жиҳозланган текшириш постлари ташкил этилади.

7. Автовокзалларнинг тоифалари ва автостанцияларнинг классларини аниқлаш мазкур Низомнинг иловасида келтирилган мезонларга мувофиқ амалга оширилади.

3-боб. Автовокзалларнинг (автостанцияларнинг) асосий вазифалари

8. Қуйидагилар автовокзалларнинг (автостанцияларнинг) асосий вазифалари ҳисобланади:

диспетчерлик хизматини йўлга қўйиш орқали йўловчи ташиш хавфсизлиги қоидалари талабларини инобатга олган ҳолда автовокзал (автостанция) бўйича автотранспорт воситаларининг ҳаракатланиш жадвалига риоя қилинишини ташкил этиш, автотранспорт воситалари ҳаракатини тартибга солиш, йўл варақалари ва диспетчерлик ҳужжатларини расмийлаштириш, йўловчиларда чипталар мавжудлигини назорат қилиш;

автовокзалларда (автостанцияларда) йўловчиларга йўналишда ҳаракатланиш билан боғлиқ масалалар юзасидан, хусусан янги очилаётган йўналишлар, автотранспорт воситаларининг ҳаракатланиш жадвалидаги ўзгаришлар, йўналишга жўнатилаётган автотранспорт воситаларидаги мавжуд бўш ўринлар тўғрисида ўз вақтида хабардор қилиш;

йўловчиларга автовокзалларда (автостанцияларда) маиший хизмат кўрсатиш, маданий-маиший ва санитария-гигиена хизмати кўрсатилишини таъминлаш ҳамда ҳайдовчилар учун маиший шароитлар яратиш ва уларнинг дам олишини ташкил этиш, уларга дам олиш учун мебеллар билан жиҳозланган хоналар тақдим этиш;

автотранспорт воситаларини қўриқлаш, уларни рейслар оралиғида техник кўрикдан ўтказиш пунктларини ташкил этиш, автотранспорт воситалари салонларини тозалаш, йўналишга чиқишдан олдин ҳайдовчиларнинг тиббий кўрикдан ўтказилишини ташкил этиш;

ташувлар ҳисобини юритиш, йўловчилар оқимини ўрганиш;

ёнғинга қарши кураш бўйича чора-тадбирларни амалга ошириш, автовокзал (автостанция) ҳудуди санитария-гигиеник жиҳатдан тоза сақланишини таъминлаш.

4-боб. Автовокзалларнинг (автостанцияларнинг) ишлаш режими ва технологик жараёни

9. Автовокзал (автостанция) иш кунининг бошланиш ва тугаш вақти автотранспорт воситаларининг ҳаракатланиш жадвалидан келиб чиққан холда автовокзал (автостанция) раҳбари томонидан тасдиқланади.

10. Узлуксиз тартибда (туну кун) фаолият юритмайдиган автовокзаллар (автостанциялар) биноси йўловчилар кириши учун биринчи автотранспорт воситаси жўнаб кетишидан (кириб келишидан) камида 30 дақиқа олдин очиқ бўлиши ва ҳаракатланишнинг суткалик жадвали бўйича охирги автотранспорт воситаси кириб келгандан (ёки жўнаб кетгандан) кейин камида 30 дақиқадан сўнг ёпилиши керак.

11. Автовокзалда (автостанцияда) узоқ вақт дам олиш учун мўлжалланган хоналар мавжуд бўлган тақдирда автовокзал (автостанция), ишлаш режимидан қатъи назар, унга йўловчиларнинг туну кун кириши ва чиқишини таъминланиши керак.

12. Тушлик пайтидаги танаффус ёки хоналарни тозалаш вақтида автовокзални (автостанцияни) ёпиб қўйишга йўл қўйилмайди. Кутиш зали ҳамда ёш болали йўловчилар учун мўлжалланган хона автовокзалнинг (автостанциянинг) бутун иш куни мобайнида фойдаланиш учун очиқ бўлиши керак.

13. Чипта кассаларининг иш вақти автовокзалнинг (автостанциянинг) ишлаш режимига мувофиқ ёки йўловчилар учун қулай бўлиши керак.

14. Автовокзалнинг (автостанциянинг) ҳаракат йўналиши бўйича автотранспорт воситаларининг станция ҳудудига кириши, унда ҳаракатланиши ва ундан чиқиши белгиланади.

Ҳаракат йўналишини ишлаб чиқишда қуйидагилар инобатга олиниши лозим:

чиқиш ва киришда ўнг томонга бурилиш;

ҳаракатнинг ҳар бир йўналиши учун автотранспорт воситаларининг атрофдаги кўчалардан қайрилиб келиш манзиллари;

йўловчиларни чиқариш ва тушириш платформаларига автотранспорт воситаларини ҳаракат йўналиши бўйича ўнг томонда қўйиш;

автотранспорт воситалари ҳаракатланиш йўллари йўловчилар ҳаракатланиш йўллари билан кесишмаслиги.

15. Йўловчилар ҳаракат йўналиши бўйича автовокзал (автостанция) ҳудудида қуйидагилар жойлаштирилиши лозим:

хизмат бинолари, йўловчиларга хизмат кўрсатадиган бинолар ва ёрдамчи бинолар, уларнинг номи ва тартиб рақами;

йўловчиларга маълумот берувчи воситалар (автотранспорт воситаларининг жўнаб кетиш ва кириб келиш вақти кўрсатилган жадваллар, чипталарнинг нарх жадвали, қатнов йўналишларининг схемаси).

16. Станция ҳудуди чизмасида мавжуд иншоотлар ва бинолардан ташқари қуйидагилар кўрсатилади:

автотранспорт воситаларининг кириш ва чиқиш йўналишлари ҳамда йўловчиларнинг автовокзал (автостанция) ҳудудидан чиқиш йўналишлари кўрсаткичлари жойлаштирилган пунктлар;

автотранспорт воситаларининг рейслар оралиғида тўхтаб туриши учун белгиланган жойлар (постлар);

автотранспорт воситаларини техник кўрикдан ўтказиш учун мўлжалланган пунктлар;

йўналишсиз таксилар ва бошқа автомобиллар тўхтаб туриши учун мўлжалланган жойларнинг кўрсаткичлари.

Автовокзалнинг (автостанциянинг) асосий кириш жойига туташиб кетган станция ҳудудининг бир қисми, қоида тариқасида, автотранспорт воситалари тўхташи учун мўлжалланмайди.

17. Фавқулодда вазиятлар (ёнғин, зилзила, сув тошқини ва бошқалар) вақтида йўловчилар ва автовокзал (автостанция) ходимларини эвакуация қилиш режасида одамлар ва моддий бойликларни автовокзаллар (автостанциялар) биноларидан эвакуация қилиш йўллари белгиланади.

5-боб. Автотранспорт воситалари ҳаракатини ташкил этиш ва йўловчиларга маданий-маиший хизмат кўрсатиш

18. Автовокзаллар (автостанциялар) ҳудудида йўловчилар ва бошқа шахсларнинг ҳаракатига фақат бунинг учун махсус ташкил этилган ва жиҳозланган, тегишли белгилар, техник воситалар орқали ёки автовокзал (автостанция) ходимлари томонидан бериладиган овозли сигналлар билан белгиланадиган жойларда рухсат этилади.

19. Йўловчиларнинг автовокзал (автостанция) ҳудуди бўйлаб ҳаракат қилиш йўлининг узунлиги имкон қадар қисқа бўлиши, йўловчилар оқими кесишмаслиги ҳамда ҳар бир йўналиш учун алоҳида бўлиши зарур.

20. Кутиш зали автотранспорт воситалари кириб келиши ва жўнаб кетишини кутаётган йўловчилар учун мўлжалланади.

21. Ёш болали йўловчилар учун мўлжалланган хонадан кичик ёшдаги ёки ногиронлиги бўлган боласи бўлган йўловчилар ва ҳомиладор аёллар бепул фойдаланади. Ёш болали йўловчилар учун мўлжалланган хонани жиҳозлашда санитария-гигиена талабларига риоя қилиниши керак.

Кичик ёшдаги ёки ногиронлиги бўлган болалари бўлган йўловчилар ёш болали йўловчилар учун мўлжалланган хона навбатчиси орқали навбатдан ташқари чипта билан таъминланади.

22. Ҳайдовчилар узоқ вақт дам олиши учун мўлжалланган хоналар йўл ҳужжатлари ва паспорт ёки идентификация ID-картаси кўрсатилган тақдирда келишилган ҳолда йўловчиларга ҳам тақдим этилиши мумкин.

6-боб. Автовокзалларнинг (автостанцияларнинг) ахборот хизматини ташкил этиш

23. Ахборот хизмати йўловчиларга автотранспорт воситаларининг ҳаракатланиши, юриш ва қўл юкини (багажни) ташиш шартлари ҳамда автовокзал (автостанция) томонидан кўрсатиладиган хизматлар ҳақида ишончли маълумотни тезкор тақдим этиш мақсадида ташкил этилади.

24. Йўловчиларга маълумот бериш қуйидагилар орқали таъминланади:

визуал хабардор қилиш;

товушли хабардор қилиш;

маълумотнома бюроси;

«Call center» ахборот хизмати;

автоматик маълумотлар бериш қурилмалари.

Йўловчиларга барча маълумотлар бепул тақдим этилади.

25. Йўловчиларни маълумотлар билан визуал хабардор қилиш схемалар, жадваллар ҳамда ахборот таблолари кўринишида амалга оширилади ва қуйидагиларни ўз ичига олади:

платформалар ва постлар кўрсатилган ҳолда автотранспорт воситаларининг жўнаб кетиш ва кириб келиш жадвали;

автовокзал (автостанция) томонидан хизмат кўрсатиладиган йўналишлар, ушбу йўналишларда йўл ҳақи ва багаж ташиш нархлари;

автовокзал (автостанция) жойлашган аҳоли пунктида мавжуд бўлган йўналишлар схемалари;

бепул ва имтиёзли юриш ҳамда чипталарни навбатсиз харид қилиш ҳуқуқига эга бўлган фуқаролар тоифалари рўйхати;

йўловчиларни суғурталаш тартиби ва турлари ҳақидаги маълумотлар;

йўловчиларга автовокзал (автостанция) ҳудудида хизмат кўрсатаётган тадбиркорлик субъектлари ва автовокзал (автостанция) чипта кассалари ҳамда бошқа хизматларнинг жойлашган жойи тўғрисидаги маълумотлар;

яқин вақт ичида амалга оширилиши кутилаётган қатновларнинг вақти ва жойи, шунингдек қатнов вақтини кечиктириш ёки кўчириш ҳақидаги маълумотлар;

турли йўналишлар бўйича кутиш майдончалари, шунингдек маданий-маиший ва санитария-гигиена хоналарининг кўрсатгичлари.

26. Йўловчиларни маълумотлар билан визуал хабардор қилиш воситаларини автовокзалда (автостанцияда) йўловчиларнинг ҳаракатланиш йўналишларини ҳисобга олган ҳолда жойлаштириш зарур.

27. Йўловчиларни маълумотлар билан товуш орқали хабардор қилиш автовокзал (автостанция) ҳудудида радиоретрансляция тармоғи орқали амалга оширилади.

28. Йўловчиларга хизмат кўрсатиш сифатини ошириш мақсадида автовокзалда (автостанцияда) «Call center» ахборот хизмати ташкил этилиши мумкин.

29. Автовокзалда (автостанцияда) йўловчилар қуйидаги маълумотларни олиши мумкин бўлган автоматик қурилмалар ўрнатилиши тавсия этилади:

йўловчиларни қизиқтираётган рейслар учун чипталарнинг мавжудлиги;

автотранспорт воситаси келишигача қолган вақт;

кассаларнинг жойлашган жойи ва ишлаш тартиби;

йўловчиларга автовокзал (автостанция) ҳудудида кўрсатилаётган хизматлар рўйхати ва нархлари;

хизмат кўрсатиш жараёнидан йўловчилар норози бўлган ҳолларда улар мурожаат қилиши мумкин бўлган автовокзалнинг (автостанциянинг) мансабдор шахслари телефон рақамлари.

7-боб. Чипта кассалари ишини ташкил этиш

30. Чипталар сотуви чипта кассалари ёки ахборот тизимлари (махсус веб-сайтлар, мобил иловалар, ижтимоий тармоқлар ва бошқалар) орқали ташкил этилади.

31. Чипта кассаларининг қуйидаги 3 тоифаси ташкил этилади:

чипталарни олдиндан сотиш;

чипталарни жорий (кундалик) рейслар бўйича сотиш;

чипта олишда имтиёзли ҳуқуққа эга бўлган йўловчиларга чипталар сотиш (бериш).

8-боб. Багаж ва қўл юкини вақтинча сақлаш хоналари ишини ташкил этиш

32. Халқаро ва шаҳарлараро (вилоятлараро) йўловчиларга хизмат кўрсатувчи автовокзалларда (автостанцияларда) қўл юки ва багажни вақтинча сақлаш учун сақлаш хоналари ташкил этилади.

Сақлаш хоналари ёнғин хавфсизлиги қоидаларига риоя қилган ҳолда жиҳозланади.

33. Қўл юки ўзи билан бирга йўл чипталари мавжуд бўлган фуқаролардангина қабул қилинади.

Сақлаш учун қабул қилинаётган буюмларнинг ўлчамлари автотранспорт воситаларида ташиш учун йўл қўйиладиган меъёрлардан ортиқ бўлмаслиги керак. Сақлаш учун буюмлар ҳар қандай ўрамда қабул қилинади.

Бошқа йўловчиларнинг буюмларини ифлос қилиши ёки уларга шикаст етказиши мумкин бўлган буюмлар ҳамда тез ёнадиган, портловчи, заҳарловчи, ўткир ва бадбўй ҳидли моддалар сақлаш учун қабул қилинмайди.

34. Сақлаш хонасининг иши сақлаш учун қабул қилинган буюмнинг ўрнига махсус жетон ёки квитанция берган ҳолда ташкил этилиши мумкин.

9-боб. Шаҳар, шаҳар атрофи, шаҳарлараро ва халқаро йўналишларда банд бўлган автотранспорт воситалари ишини диспетчер хизмати орқали бошқариш

35. Қуйидагилар автовокзал (автостанция) диспетчерлик хизматининг асосий вазифалари ҳисобланади:

автотранспорт воситалари томонидан ҳаракатланиш жадвалига риоя этилиши устидан назоратни амалга ошириш;

автовокзал (автостанция) ҳудудига тегишли йўллар доирасидаги йўналишларда автотранспорт воситалари ҳаракатини назорат қилиш;

бир-бирига боғлиқ ва яқин автовокзаллар (автостанциялар) ва ҳайдовчиларни ҳаракат, метеорологик ва йўл шароитлари тўғрисида хабардор қилиш;

автотранспорт воситалари ҳаракатланиш жадвалида кўрсатилган вақтдан четга чиққан ҳолларда уларнинг режага кўра ҳаракатланиши мунтазамлилигини таъминлашга доир тезкор чора-тадбирлар кўриш.

36. Автотранспорт воситаси ҳайдовчиси автовокзалга (автостанцияга) келганидан кейин ўзининг келганлиги ҳақида диспетчерга ахборот беради.

Диспетчер диспетчерлик журналида ва ҳайдовчининг йўл ҳужжатида автотранспорт воситасининг келганлигини штамп-соатлар ёрдамида қайд этади.

37. Автотранспорт воситасини йўловчилар чиқариладиган майдонга ўтказиш пайтида навбатчи диспетчер автовокзал (автостанция) бўйича автотранспорт воситасига йўловчиларни чиқаришни бошлаш вақтини, платформанинг тартиб рақамини ва автотранспорт воситасининг жўнаш вақтини эълон қилади.

38. Автотранспорт воситасига йўловчиларни чиқаришдан олдин автовокзал (автостанция) навбатчи диспетчери ёки перрон (чипта) назоратчиси автотранспорт воситасининг жиҳозланганлиги ва санитария ҳолати, ҳайдовчида йўл ҳужжатларининг мавжудлиги (рейс жадвали, йўналиш схемаси ҳамда чипталарни ҳисобга олиш варақасининг мавжудлиги, чипталарнинг охирги тартиб рақами ёзилишининг тўғрилиги) ва уларнинг ҳолати текширилади.

Навбатчи диспетчер ёки перрон (чипта) назоратчиси томонидан автотранспорт воситасининг жиҳозланиши ва санитария-гигиеник ҳолатига оид барча камчиликлар ва нуқсонлар (агар мавжуд бўлса) тўғрисида ҳайдовчининг йўл варақасига ҳамда автотранспорт воситасининг ҳолати ва жиҳозланишини ҳисобга олиш дафтарига қайдлар киритилади.

Автотранспорт воситасини жиҳозлаш қоидалари бузилган, санитария-гигиена талабларига жавоб бермайдиган автотранспорт воситаси йўналишга чиқишига йўл қўйилмайди ва бу ҳақда ташувчига хабар берилади. Бунда, ташувчи ҳаракат жадвалининг бажарилишини таъминлаш мақсадида автотранспорт воситасини соз ҳолатдаги бошқа автотранспорт воситаси билан алмаштириш чораларини кўриши керак.

39. Автотранспорт воситаси йўловчиларни ташиш учун бириктирилган платформага тўлиқ тайёр ҳолда ва белгиланган вақтдан кечиктирмай қўйилади. Бунда, шаҳарлараро йўналишда қатнайдиган автотранспорт воситаси йўналишга чиқишдан 15 дақиқа олдин, шаҳар атрофида қатнайдиган автотранспорт воситаси йўналишга чиқишдан 10 дақиқа олдин тегишли платформага қўйилади.

40. Йўловчилар автотранспорт воситасига ушбу рейс учун чипталар бўлган тақдирдагина чиқарилади.

41. Автотранспорт воситаси рейсга ҳаракатланиш жадвалига мувофиқ автовокзал (автостанция) бўйича навбатчи диспетчер ёки перрон (чипта) назоратчиси томонидан жўнатилади. Бунда, навбатчи диспетчер ёки перрон (чипта) назоратчиси қуйидагиларни бажаради:

йўналишга чиқишдан беш дақиқа (транзит автотранспорт воситасида 3 дақиқа) олдин йўловчилар сонининг чипталарни ҳисобга олиш варақасига мувофиқлиги, уларда йўл чипталарининг мавжудлиги ва автотранспорт воситасида бўш ўринлар бор ёки йўқлигини текширади;

чипталарни ҳисобга олиш варақасига йўловчилар сонини ёзиб қўяди ва уни ҳайдовчига беради;

текшириш ўтказилганлигини тасдиқлаган ҳолда чипталарни ҳисобга олиш варақасига ўз имзосини (штамп) қўяди.

42. Чипталарни ҳисобга олиш варақасида кўрсатилган йўловчилар сони автотранспорт воситаси ўриндиқларининг сонига мувофиқ бўлиши лозим.

Йўловчи автотранспорт воситасига чиқиш учун келмаган тақдирда перрон хизмати ходими чипталарни ҳисобга олиш варақасига бу ҳақда белги қўяди ва бўш ўринлар сони ҳамда уларнинг тартиб рақамлари ҳақидаги маълумотларни диспетчерга беради.

10-боб. Якуний қоидалар

43. Мазкур Низом талабларининг бузилишида айбдор бўлган шахслар қонунчилик ҳужжатларига мувофиқ жавобгар бўлади.

44. Мазкур Низом Ўзбекистон Республикаси Ички ишлар вазирлиги, Монополияга қарши курашиш қўмитаси ва Савдо-саноат палатаси билан келишилган.

Йўловчи автовокзаллари ва йўловчи автостанциялари тўғрисидаги низомга ИЛОВА

Автовокзалларнинг тоифалари ва автостанцияларнинг классларини аниқлаш

Т/р Кўрсаткичлар номи Автовокзаллар Автостанциялар йирик катта ўрта кичик I класс II класс III класс IV класс V класс 1. Йўловчиларнинг айнан бир вақтдаги сиғими 500 дан ортиқ 300 дан 500 гача 200 дан 300 гача 100 дан 200 гача 75 дан 100 гача 50 дан 75 гача 25 дан 50 гача 25 25 2. Бир сутка ичида йўланишга жўнатилиши мумкин бўлган автотранспорт воситаларининг жами сони - - - - 150 дан ортиқ 121 дан 150 гача 71 дан 120 гача 31 дан 70 г ача 30 ва ундан кам 3. Маъмурият хонаси + + + + - - - - - 4. йўловчилар кутиши учун мўлжалланган бинолар ва хона + + + + + + касса зали билан қўшилган Йўловчилар учун хона Йўловчилар учун усти ёпиқ айвон 5. Маданий-маиший ва санитария- гигиена хона + + + + + + + + + 6. Чипта кассаси + + + + + + Йўловчилар кутиш зали билан қўшилган Битта чипта сотиш кассаси Битта чипта сотиш кассаси 7. Ҳайдовчилар ва йўловчиларнинг узоқ вақт дам олишига мўлжалланган меҳмонхона, ёш болали йўловчиларга мўлжалланган хона, қўл юкини (багажни) сақлаш хонаси ва тиббий пункт + + + + + - - - - 8. Йўловчилар хавфсизлигини таъминлаш учун монитор орқали кузатиш қурилмалари ўрнатилган хона + + - - - - - - - 9. Йўловчиларни чиқариш ва тушириш перронлари, рейслар оралиғида автотранспорт воситалари тўхтаб турадиган майдончалар, техник кўрикдан ўтказиш ва автотранспорт воситалари салонларини тозалаш пости + + + + + + техник кўрик постидан ташқари + техник кўрик постидан ташқари фақат йўловчиларни чиқариш ва тушириш майдончалари фақат йўловчиларни чиқариш ва тушириш майдончалари 10. Шаҳар йўловчилар транспорти (метрополитендан ташқари) кириб келиши ва туриши учун мўлжалланган автовокзал олди майдони + + + + - - - - -

Вазир И. МАХКАМОВ

Раис Ш. ШАРАХМЕТОВ

Ўзбекистон Савдо-саноат палатаси Раиси А. ИКРАМОВ

Ички ишлар вазири П. БОБОЖОНОВ

Тошкент ш.,

2021 йил 25 сентябрь,

2021 йил 6 сентябрь

2021 йил 26 август

2021 йил 7 сентябрь

14-сон

(Қонунчилик маълумотлари миллий базаси, 06.10.2021 й., 10/21/3323/0936-сон; 23.06.2023 й., 10/23/3323-1/0423-сон)

lex.uz

Oʻzbekiston Respublikasi Transport vazirining

buyrugʻi

NIZOM

MEZONLARI

Yoʻlovchi avtovokzallari va yoʻlovchi avtostansiyalari toʻgʻrisidagi nizomni tasdiqlash haqida

Oʻzbekiston Respublikasining “Avtomobil transporti toʻgʻrisida”gi Qonuni va Oʻzbekiston Respublikasi Vazirlar Mahkamasining 2003-yil 4-noyabrdagi 482-son “Oʻzbekiston Respublikasida avtomobil transportida yoʻlovchilar va bagaj tashish qoidalarini hamda avtobuslarda yoʻlovchilar tashish xavfsizligini taʼminlashga doir talablarni tasdiqlash haqida”gi qaroriga muvofiq buyuraman:

1. Yoʻlovchi avtovokzallari va yoʻlovchi avtostansiyalari toʻgʻrisidagi nizom ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Kelishildi:

Oʻzbekiston Respublikasi transport vazirining 2021-yil 25-sentabr 14-son buyrugʻiga ILOVA

Yoʻlovchi avtovokzallari va yoʻlovchi avtostansiyalari toʻgʻrisidagi

Mazkur Nizom Oʻzbekiston Respublikasining “Avtomobil transporti toʻgʻrisida”gi Qonuni va Oʻzbekiston Respublikasi Vazirlar Mahkamasining 2003-yil 4-noyabrdagi 482-son “Oʻzbekiston Respublikasida avtomobil transportida yoʻlovchilar va bagaj tashish qoidalarini hamda avtobuslarda yoʻlovchilar tashish xavfsizligini taʼminlashga doir talablarni tasdiqlash haqida”gi qaroriga muvofiq tashkiliy-huquqiy shaklidan qatʼi nazar, yoʻlovchi avtovokzallari va yoʻlovchi avtostansiyalarining faoliyat yuritish tartibini belgilaydi.

1-bob. Umumiy qoidalar

1. Mazkur Nizomda quyidagi tushunchalardan foydalaniladi:

avtovokzal (avtostansiya) — transport-ekspeditsiya, tashish faoliyatini amalga oshiruvchi va yoʻlovchilarga boshqa xizmatlar koʻrsatuvchi tashkilot;

chipta kassasi — yoʻl chiptalarini sotish va yoʻlovchilarga yoʻnalishlar toʻgʻrisida maʼlumot berishga moʻljallangan punkt;

perron — avtovokzal (avtostansiya)larda yoki bekatlarda yoʻlovchilarning avtotransport vositalariga qulay va xavfsiz oʻtishi, chiqishi va tushishi uchun moʻljallangan maydoncha;

perron (chipta) nazoratchisi — avtotransport vositalarining sanitariya-gigiyena holatini, yoʻl hujjatlari va chiptalarning mavjudligi va holatini, avtotransport vositalarining harakatlanish jadvaliga muvofiq joʻnatilishini nazorat qiluvchi shaxs;

yoʻlovchilarning aynan bir vaqtdagi sigʻimi — avtovokzallarda (avtostansiyalarda) joʻnatilayotgan va kirib kelayotgan hamda bir vaqtning oʻzida yoʻlovchilar kutish zallarida va yoʻlovchilar xonalarida sigʻishi mumkin boʻlgan yoʻlovchilarning umumiy soni;

avtovokzal (avtostansiya) ishlarining texnologik jarayoni — avtovokzal (avtostansiya) xizmatlarini tashkil etish jarayoni, avtotransport vositalarini qabul qilish va joʻnatish hamda yoʻlovchilarga xizmat koʻrsatish boʻyicha doimiy ravishda bajariladigan operatsiyalarning oʻzaro bogʻliqligi va muntazamliligi.

stansiya hududi — avtovokzalning (avtostansiyaning) avtotransport vositalari joʻnatilishi va kirib kelishi hamda ularga texnik xizmat koʻrsatilishi uchun moʻljallangan hududi.

2. Avtovokzalning (avtostansiyaning) oʻtkazish imkoniyati bir sutka ichida avtovokzaldan (avtostansiyadan) yoʻnalishga joʻnatilishi mumkin boʻlgan avtotransport vositalarining jami sonidan kelib chiqib aniqlanadi.

2-bob. Avtovokzallarga (avtostansiyalarga) qoʻyiladigan umumiy talablar

3. Avtovokzallar (avtostansiyalar) aholi yashash joylarida hamda avtomobil yoʻllari trassalarida yoʻlovchilarga xizmat koʻrsatish va xalqaro, shaharlararo hamda shahar atrofida qatnovchi avtotransport vositalari yoʻnalishlarida ularning harakatini tezkor boshqarish, foydalanish uchun xizmat xonalari va haydovchilarning dam olish xonalarini joylashtirish uchun tashkil etiladi.

4. Mazkur Nizomning ilovasida keltirilgan mezonlarga muvofiq avtovokzalning toifasi va avtostansiyaning klassi hisobga olingan holda ularning hududida quyidagilar joylashtirilishi lozim:

yoʻlovchilar kutishi uchun moʻljallangan binolar va xonalar;

chipta kassalari;

yosh bolali yoʻlovchilarga moʻljallangan xonalar;

haydovchilar va yoʻlovchilarning uzoq vaqt dam olishiga moʻljallangan mehmonxonalar;

maʼmuriyat xonasi;

umumiy ovqatlanish shahobchalari;

tibbiy punktlar;

qoʻl yukini (bagajni) saqlash xonalari;

yoʻlovchilar xavfsizligini taʼminlash uchun monitor orqali kuzatish qurilmalari oʻrnatilgan xonalar;

madaniy-maishiy va sanitariya-gigiyena xonalari;

yoʻlovchilarni chiqarish va tushirish perronlari;

reyslar oraligʻida avtotransport vositalari toʻxtab turadigan maydonchalar;

texnik koʻrikdan oʻtkazish va avtotransport vositalari salonlarini tozalash postlari;

shahar yoʻlovchilar transporti (metropolitendan tashqari) kirib kelishi va turishi uchun moʻljallangan avtovokzal oldi maydoni;

avtovokzal (avtostansiya) hududi boʻylab hamda chiqarish va tushirish perronlarida nogironligi boʻlgan shaxslarning oʻrindiqli aravachalari uchun moʻljallangan yoʻllar;

nogironligi boʻlgan shaxslarni oʻrindiqli aravachalar bilan chiqarish va tushirish uchun moʻljallangan joylar.

5. Yoʻlovchilarning xavfsizligini taʼminlash maqsadida avtovokzal (avtostansiya) hududi boʻyicha toʻsiqlar hamda yoʻlovchilarning kutish zallarida, chipta kassalarida va yoʻlovchilar koʻp toʻplanadigan boshqa joylarda videokuzatish kameralari oʻrnatiladi.

6. Avtovokzallarga kirish va chiqish joylarida yoʻlovchilar hamda ularning qoʻl yukini (bagajini) tekshirish uchun turgʻun metall detektorlar bilan jihozlangan tekshirish postlari tashkil etiladi.

7. Avtovokzallarning toifalari va avtostansiyalarning klasslarini aniqlash mazkur Nizomning ilovasida keltirilgan mezonlarga muvofiq amalga oshiriladi.

3-bob. Avtovokzallarning (avtostansiyalarning) asosiy vazifalari

8. Quyidagilar avtovokzallarning (avtostansiyalarning) asosiy vazifalari hisoblanadi:

dispetcherlik xizmatini yoʻlga qoʻyish orqali yoʻlovchi tashish xavfsizligi qoidalari talablarini inobatga olgan holda avtovokzal (avtostansiya) boʻyicha avtotransport vositalarining harakatlanish jadvaliga rioya qilinishini tashkil etish, avtotransport vositalari harakatini tartibga solish, yoʻl varaqalari va dispetcherlik hujjatlarini rasmiylashtirish, yoʻlovchilarda chiptalar mavjudligini nazorat qilish;

avtovokzallarda (avtostansiyalarda) yoʻlovchilarga yoʻnalishda harakatlanish bilan bogʻliq masalalar yuzasidan, xususan yangi ochilayotgan yoʻnalishlar, avtotransport vositalarining harakatlanish jadvalidagi oʻzgarishlar, yoʻnalishga joʻnatilayotgan avtotransport vositalaridagi mavjud boʻsh oʻrinlar toʻgʻrisida oʻz vaqtida xabardor qilish;

yoʻlovchilarga avtovokzallarda (avtostansiyalarda) maishiy xizmat koʻrsatish, madaniy-maishiy va sanitariya-gigiyena xizmati koʻrsatilishini taʼminlash hamda haydovchilar uchun maishiy sharoitlar yaratish va ularning dam olishini tashkil etish, ularga dam olish uchun mebellar bilan jihozlangan xonalar taqdim etish;

avtotransport vositalarini qoʻriqlash, ularni reyslar oraligʻida texnik koʻrikdan oʻtkazish punktlarini tashkil etish, avtotransport vositalari salonlarini tozalash, yoʻnalishga chiqishdan oldin haydovchilarning tibbiy koʻrikdan oʻtkazilishini tashkil etish;

tashuvlar hisobini yuritish, yoʻlovchilar oqimini oʻrganish;

yongʻinga qarshi kurash boʻyicha chora-tadbirlarni amalga oshirish, avtovokzal (avtostansiya) hududi sanitariya-gigiyenik jihatdan toza saqlanishini taʼminlash.

4-bob. Avtovokzallarning (avtostansiyalarning) ishlash rejimi va texnologik jarayoni

9. Avtovokzal (avtostansiya) ish kunining boshlanish va tugash vaqti avtotransport vositalarining harakatlanish jadvalidan kelib chiqqan xolda avtovokzal (avtostansiya) rahbari tomonidan tasdiqlanadi.

10. Uzluksiz tartibda (tunu kun) faoliyat yuritmaydigan avtovokzallar (avtostansiyalar) binosi yoʻlovchilar kirishi uchun birinchi avtotransport vositasi joʻnab ketishidan (kirib kelishidan) kamida 30 daqiqa oldin ochiq boʻlishi va harakatlanishning sutkalik jadvali boʻyicha oxirgi avtotransport vositasi kirib kelgandan (yoki joʻnab ketgandan) keyin kamida 30 daqiqadan soʻng yopilishi kerak.

11. Avtovokzalda (avtostansiyada) uzoq vaqt dam olish uchun moʻljallangan xonalar mavjud boʻlgan taqdirda avtovokzal (avtostansiya), ishlash rejimidan qatʼi nazar, unga yoʻlovchilarning tunu kun kirishi va chiqishini taʼminlanishi kerak.

12. Tushlik paytidagi tanaffus yoki xonalarni tozalash vaqtida avtovokzalni (avtostansiyani) yopib qoʻyishga yoʻl qoʻyilmaydi. Kutish zali hamda yosh bolali yoʻlovchilar uchun moʻljallangan xona avtovokzalning (avtostansiyaning) butun ish kuni mobaynida foydalanish uchun ochiq boʻlishi kerak.

13. Chipta kassalarining ish vaqti avtovokzalning (avtostansiyaning) ishlash rejimiga muvofiq yoki yoʻlovchilar uchun qulay boʻlishi kerak.

14. Avtovokzalning (avtostansiyaning) harakat yoʻnalishi boʻyicha avtotransport vositalarining stansiya hududiga kirishi, unda harakatlanishi va undan chiqishi belgilanadi.

Harakat yoʻnalishini ishlab chiqishda quyidagilar inobatga olinishi lozim:

chiqish va kirishda oʻng tomonga burilish;

harakatning har bir yoʻnalishi uchun avtotransport vositalarining atrofdagi koʻchalardan qayrilib kelish manzillari;

yoʻlovchilarni chiqarish va tushirish platformalariga avtotransport vositalarini harakat yoʻnalishi boʻyicha oʻng tomonda qoʻyish;

avtotransport vositalari harakatlanish yoʻllari yoʻlovchilar harakatlanish yoʻllari bilan kesishmasligi.

15. Yoʻlovchilar harakat yoʻnalishi boʻyicha avtovokzal (avtostansiya) hududida quyidagilar joylashtirilishi lozim:

xizmat binolari, yoʻlovchilarga xizmat koʻrsatadigan binolar va yordamchi binolar, ularning nomi va tartib raqami;

yoʻlovchilarga maʼlumot beruvchi vositalar (avtotransport vositalarining joʻnab ketish va kirib kelish vaqti koʻrsatilgan jadvallar, chiptalarning narx jadvali, qatnov yoʻnalishlarining sxemasi).

16. Stansiya hududi chizmasida mavjud inshootlar va binolardan tashqari quyidagilar koʻrsatiladi:

avtotransport vositalarining kirish va chiqish yoʻnalishlari hamda yoʻlovchilarning avtovokzal (avtostansiya) hududidan chiqish yoʻnalishlari koʻrsatkichlari joylashtirilgan punktlar;

avtotransport vositalarining reyslar oraligʻida toʻxtab turishi uchun belgilangan joylar (postlar);

avtotransport vositalarini texnik koʻrikdan oʻtkazish uchun moʻljallangan punktlar;

yoʻnalishsiz taksilar va boshqa avtomobillar toʻxtab turishi uchun moʻljallangan joylarning koʻrsatkichlari.

Avtovokzalning (avtostansiyaning) asosiy kirish joyiga tutashib ketgan stansiya hududining bir qismi, qoida tariqasida, avtotransport vositalari toʻxtashi uchun moʻljallanmaydi.

17. Favqulodda vaziyatlar (yongʻin, zilzila, suv toshqini va boshqalar) vaqtida yoʻlovchilar va avtovokzal (avtostansiya) xodimlarini evakuatsiya qilish rejasida odamlar va moddiy boyliklarni avtovokzallar (avtostansiyalar) binolaridan evakuatsiya qilish yoʻllari belgilanadi.

5-bob. Avtotransport vositalari harakatini tashkil etish va yoʻlovchilarga madaniy-maishiy xizmat koʻrsatish

18. Avtovokzallar (avtostansiyalar) hududida yoʻlovchilar va boshqa shaxslarning harakatiga faqat buning uchun maxsus tashkil etilgan va jihozlangan, tegishli belgilar, texnik vositalar orqali yoki avtovokzal (avtostansiya) xodimlari tomonidan beriladigan ovozli signallar bilan belgilanadigan joylarda ruxsat etiladi.

19. Yoʻlovchilarning avtovokzal (avtostansiya) hududi boʻylab harakat qilish yoʻlining uzunligi imkon qadar qisqa boʻlishi, yoʻlovchilar oqimi kesishmasligi hamda har bir yoʻnalish uchun alohida boʻlishi zarur.

20. Kutish zali avtotransport vositalari kirib kelishi va joʻnab ketishini kutayotgan yoʻlovchilar uchun moʻljallanadi.

21. Yosh bolali yoʻlovchilar uchun moʻljallangan xonadan kichik yoshdagi yoki nogironligi boʻlgan bolasi boʻlgan yoʻlovchilar va homilador ayollar bepul foydalanadi. Yosh bolali yoʻlovchilar uchun moʻljallangan xonani jihozlashda sanitariya-gigiyena talablariga rioya qilinishi kerak.

Kichik yoshdagi yoki nogironligi boʻlgan bolalari boʻlgan yoʻlovchilar yosh bolali yoʻlovchilar uchun moʻljallangan xona navbatchisi orqali navbatdan tashqari chipta bilan taʼminlanadi.

22. Haydovchilar uzoq vaqt dam olishi uchun moʻljallangan xonalar yoʻl hujjatlari va pasport yoki identifikatsiya ID-kartasi koʻrsatilgan taqdirda kelishilgan holda yoʻlovchilarga ham taqdim etilishi mumkin.

6-bob. Avtovokzallarning (avtostansiyalarning) axborot xizmatini tashkil etish

23. Axborot xizmati yoʻlovchilarga avtotransport vositalarining harakatlanishi, yurish va qoʻl yukini (bagajni) tashish shartlari hamda avtovokzal (avtostansiya) tomonidan koʻrsatiladigan xizmatlar haqida ishonchli maʼlumotni tezkor taqdim etish maqsadida tashkil etiladi.

24. Yoʻlovchilarga maʼlumot berish quyidagilar orqali taʼminlanadi:

vizual xabardor qilish;

tovushli xabardor qilish;

maʼlumotnoma byurosi;

“Call center” axborot xizmati;

avtomatik maʼlumotlar berish qurilmalari.

Yoʻlovchilarga barcha maʼlumotlar bepul taqdim etiladi.

25. Yoʻlovchilarni maʼlumotlar bilan vizual xabardor qilish sxemalar, jadvallar hamda axborot tablolari koʻrinishida amalga oshiriladi va quyidagilarni oʻz ichiga oladi:

platformalar va postlar koʻrsatilgan holda avtotransport vositalarining joʻnab ketish va kirib kelish jadvali;

avtovokzal (avtostansiya) tomonidan xizmat koʻrsatiladigan yoʻnalishlar, ushbu yoʻnalishlarda yoʻl haqi va bagaj tashish narxlari;

avtovokzal (avtostansiya) joylashgan aholi punktida mavjud boʻlgan yoʻnalishlar sxemalari;

bepul va imtiyozli yurish hamda chiptalarni navbatsiz xarid qilish huquqiga ega boʻlgan fuqarolar toifalari roʻyxati;

yoʻlovchilarni sugʻurtalash tartibi va turlari haqidagi maʼlumotlar;

yoʻlovchilarga avtovokzal (avtostansiya) hududida xizmat koʻrsatayotgan tadbirkorlik subyektlari va avtovokzal (avtostansiya) chipta kassalari hamda boshqa xizmatlarning joylashgan joyi toʻgʻrisidagi maʼlumotlar;

yaqin vaqt ichida amalga oshirilishi kutilayotgan qatnovlarning vaqti va joyi, shuningdek qatnov vaqtini kechiktirish yoki koʻchirish haqidagi maʼlumotlar;

turli yoʻnalishlar boʻyicha kutish maydonchalari, shuningdek madaniy-maishiy va sanitariya-gigiyena xonalarining koʻrsatgichlari.

26. Yoʻlovchilarni maʼlumotlar bilan vizual xabardor qilish vositalarini avtovokzalda (avtostansiyada) yoʻlovchilarning harakatlanish yoʻnalishlarini hisobga olgan holda joylashtirish zarur.

27. Yoʻlovchilarni maʼlumotlar bilan tovush orqali xabardor qilish avtovokzal (avtostansiya) hududida radioretranslyatsiya tarmogʻi orqali amalga oshiriladi.

28. Yoʻlovchilarga xizmat koʻrsatish sifatini oshirish maqsadida avtovokzalda (avtostansiyada) “Call center” axborot xizmati tashkil etilishi mumkin.

29. Avtovokzalda (avtostansiyada) yoʻlovchilar quyidagi maʼlumotlarni olishi mumkin boʻlgan avtomatik qurilmalar oʻrnatilishi tavsiya etiladi:

yoʻlovchilarni qiziqtirayotgan reyslar uchun chiptalarning mavjudligi;

avtotransport vositasi kelishigacha qolgan vaqt;

kassalarning joylashgan joyi va ishlash tartibi;

yoʻlovchilarga avtovokzal (avtostansiya) hududida koʻrsatilayotgan xizmatlar roʻyxati va narxlari;

xizmat koʻrsatish jarayonidan yoʻlovchilar norozi boʻlgan hollarda ular murojaat qilishi mumkin boʻlgan avtovokzalning (avtostansiyaning) mansabdor shaxslari telefon raqamlari.

7-bob. Chipta kassalari ishini tashkil etish

30. Chiptalar sotuvi chipta kassalari yoki axborot tizimlari (maxsus veb-saytlar, mobil ilovalar, ijtimoiy tarmoqlar va boshqalar) orqali tashkil etiladi.

31. Chipta kassalarining quyidagi 3 toifasi tashkil etiladi:

chiptalarni oldindan sotish;

chiptalarni joriy (kundalik) reyslar boʻyicha sotish;

chipta olishda imtiyozli huquqqa ega boʻlgan yoʻlovchilarga chiptalar sotish (berish).

8-bob. Bagaj va qoʻl yukini vaqtincha saqlash xonalari ishini tashkil etish

32. Xalqaro va shaharlararo (viloyatlararo) yoʻlovchilarga xizmat koʻrsatuvchi avtovokzallarda (avtostansiyalarda) qoʻl yuki va bagajni vaqtincha saqlash uchun saqlash xonalari tashkil etiladi.

Saqlash xonalari yongʻin xavfsizligi qoidalariga rioya qilgan holda jihozlanadi.

33. Qoʻl yuki oʻzi bilan birga yoʻl chiptalari mavjud boʻlgan fuqarolardangina qabul qilinadi.

Saqlash uchun qabul qilinayotgan buyumlarning oʻlchamlari avtotransport vositalarida tashish uchun yoʻl qoʻyiladigan meʼyorlardan ortiq boʻlmasligi kerak. Saqlash uchun buyumlar har qanday oʻramda qabul qilinadi.

Boshqa yoʻlovchilarning buyumlarini iflos qilishi yoki ularga shikast yetkazishi mumkin boʻlgan buyumlar hamda tez yonadigan, portlovchi, zaharlovchi, oʻtkir va badboʻy hidli moddalar saqlash uchun qabul qilinmaydi.

34. Saqlash xonasining ishi saqlash uchun qabul qilingan buyumning oʻrniga maxsus jeton yoki kvitansiya bergan holda tashkil etilishi mumkin.

9-bob. Shahar, shahar atrofi, shaharlararo va xalqaro yoʻnalishlarda band boʻlgan avtotransport vositalari ishini dispetcher xizmati orqali boshqarish

35. Quyidagilar avtovokzal (avtostansiya) dispetcherlik xizmatining asosiy vazifalari hisoblanadi:

avtotransport vositalari tomonidan harakatlanish jadvaliga rioya etilishi ustidan nazoratni amalga oshirish;

avtovokzal (avtostansiya) hududiga tegishli yoʻllar doirasidagi yoʻnalishlarda avtotransport vositalari harakatini nazorat qilish;

bir-biriga bogʻliq va yaqin avtovokzallar (avtostansiyalar) va haydovchilarni harakat, meteorologik va yoʻl sharoitlari toʻgʻrisida xabardor qilish;

avtotransport vositalari harakatlanish jadvalida koʻrsatilgan vaqtdan chetga chiqqan hollarda ularning rejaga koʻra harakatlanishi muntazamliligini taʼminlashga doir tezkor chora-tadbirlar koʻrish.

36. Avtotransport vositasi haydovchisi avtovokzalga (avtostansiyaga) kelganidan keyin oʻzining kelganligi haqida dispetcherga axborot beradi.

Dispetcher dispetcherlik jurnalida va haydovchining yoʻl hujjatida avtotransport vositasining kelganligini shtamp-soatlar yordamida qayd etadi.

37. Avtotransport vositasini yoʻlovchilar chiqariladigan maydonga oʻtkazish paytida navbatchi dispetcher avtovokzal (avtostansiya) boʻyicha avtotransport vositasiga yoʻlovchilarni chiqarishni boshlash vaqtini, platformaning tartib raqamini va avtotransport vositasining joʻnash vaqtini eʼlon qiladi.

38. Avtotransport vositasiga yoʻlovchilarni chiqarishdan oldin avtovokzal (avtostansiya) navbatchi dispetcheri yoki perron (chipta) nazoratchisi avtotransport vositasining jihozlanganligi va sanitariya holati, haydovchida yoʻl hujjatlarining mavjudligi (reys jadvali, yoʻnalish sxemasi hamda chiptalarni hisobga olish varaqasining mavjudligi, chiptalarning oxirgi tartib raqami yozilishining toʻgʻriligi) va ularning holati tekshiriladi.

Navbatchi dispetcher yoki perron (chipta) nazoratchisi tomonidan avtotransport vositasining jihozlanishi va sanitariya-gigiyenik holatiga oid barcha kamchiliklar va nuqsonlar (agar mavjud boʻlsa) toʻgʻrisida haydovchining yoʻl varaqasiga hamda avtotransport vositasining holati va jihozlanishini hisobga olish daftariga qaydlar kiritiladi.

Avtotransport vositasini jihozlash qoidalari buzilgan, sanitariya-gigiyena talablariga javob bermaydigan avtotransport vositasi yoʻnalishga chiqishiga yoʻl qoʻyilmaydi va bu haqda tashuvchiga xabar beriladi. Bunda, tashuvchi harakat jadvalining bajarilishini taʼminlash maqsadida avtotransport vositasini soz holatdagi boshqa avtotransport vositasi bilan almashtirish choralarini koʻrishi kerak.

39. Avtotransport vositasi yoʻlovchilarni tashish uchun biriktirilgan platformaga toʻliq tayyor holda va belgilangan vaqtdan kechiktirmay qoʻyiladi. Bunda, shaharlararo yoʻnalishda qatnaydigan avtotransport vositasi yoʻnalishga chiqishdan 15 daqiqa oldin, shahar atrofida qatnaydigan avtotransport vositasi yoʻnalishga chiqishdan 10 daqiqa oldin tegishli platformaga qoʻyiladi.

40. Yoʻlovchilar avtotransport vositasiga ushbu reys uchun chiptalar boʻlgan taqdirdagina chiqariladi.

41. Avtotransport vositasi reysga harakatlanish jadvaliga muvofiq avtovokzal (avtostansiya) boʻyicha navbatchi dispetcher yoki perron (chipta) nazoratchisi tomonidan joʻnatiladi. Bunda, navbatchi dispetcher yoki perron (chipta) nazoratchisi quyidagilarni bajaradi:

yoʻnalishga chiqishdan besh daqiqa (tranzit avtotransport vositasida 3 daqiqa) oldin yoʻlovchilar sonining chiptalarni hisobga olish varaqasiga muvofiqligi, ularda yoʻl chiptalarining mavjudligi va avtotransport vositasida boʻsh oʻrinlar bor yoki yoʻqligini tekshiradi;

chiptalarni hisobga olish varaqasiga yoʻlovchilar sonini yozib qoʻyadi va uni haydovchiga beradi;

tekshirish oʻtkazilganligini tasdiqlagan holda chiptalarni hisobga olish varaqasiga oʻz imzosini (shtamp) qoʻyadi.

42. Chiptalarni hisobga olish varaqasida koʻrsatilgan yoʻlovchilar soni avtotransport vositasi oʻrindiqlarining soniga muvofiq boʻlishi lozim.

Yoʻlovchi avtotransport vositasiga chiqish uchun kelmagan taqdirda perron xizmati xodimi chiptalarni hisobga olish varaqasiga bu haqda belgi qoʻyadi va boʻsh oʻrinlar soni hamda ularning tartib raqamlari haqidagi maʼlumotlarni dispetcherga beradi.

10-bob. Yakuniy qoidalar

43. Mazkur Nizom talablarining buzilishida aybdor boʻlgan shaxslar qonunchilik hujjatlariga muvofiq javobgar boʻladi.

44. Mazkur Nizom Oʻzbekiston Respublikasi Ichki ishlar vazirligi, Monopoliyaga qarshi kurashish qoʻmitasi va Savdo-sanoat palatasi bilan kelishilgan.

Yoʻlovchi avtovokzallari va yoʻlovchi avtostansiyalari toʻgʻrisidagi nizomga ILOVA

Avtovokzallarning toifalari va avtostansiyalarning klasslarini aniqlash

T/r Koʻrsatkichlar nomi Avtovokzallar Avtostansiyalar yirik katta oʻrta kichik I klass II klass III klass IV klass V klass 1. Yoʻlovchilarning aynan bir vaqtdagi sigʻimi 500 dan ortiq 300 dan 500 gacha 200 dan 300 gacha 100 dan 200 gacha 75 dan 100 gacha 50 dan 75 gacha 25 dan 50 gacha 25 25 2. Bir sutka ichida yoʻlanishga joʻnatilishi mumkin boʻlgan avtotransport vositalarining jami soni - - - - 150 dan ortiq 121 dan 150 gacha 71 dan 120 gacha 31 dan 70 g acha 30 va undan kam 3. Maʼmuriyat xonasi + + + + - - - - - 4. yoʻlovchilar kutishi uchun moʻljallangan binolar va xona + + + + + + kassa zali bilan qoʻshilgan Yoʻlovchilar uchun xona Yoʻlovchilar uchun usti yopiq ayvon 5. Madaniy-maishiy va sanitariya- gigiyena xona + + + + + + + + + 6. Chipta kassasi + + + + + + Yoʻlovchilar kutish zali bilan qoʻshilgan Bitta chipta sotish kassasi Bitta chipta sotish kassasi 7. Haydovchilar va yoʻlovchilarning uzoq vaqt dam olishiga moʻljallangan mehmonxona, yosh bolali yoʻlovchilarga moʻljallangan xona, qoʻl yukini (bagajni) saqlash xonasi va tibbiy punkt + + + + + - - - - 8. Yoʻlovchilar xavfsizligini taʼminlash uchun monitor orqali kuzatish qurilmalari oʻrnatilgan xona + + - - - - - - - 9. Yoʻlovchilarni chiqarish va tushirish perronlari, reyslar oraligʻida avtotransport vositalari toʻxtab turadigan maydonchalar, texnik koʻrikdan oʻtkazish va avtotransport vositalari salonlarini tozalash posti + + + + + + texnik koʻrik postidan tashqari + texnik koʻrik postidan tashqari faqat yoʻlovchilarni chiqarish va tushirish maydonchalari faqat yoʻlovchilarni chiqarish va tushirish maydonchalari 10. Shahar yoʻlovchilar transporti (metropolitendan tashqari) kirib kelishi va turishi uchun moʻljallangan avtovokzal oldi maydoni + + + + - - - - -

Vazir I. MAXKAMOV

Rais Sh. SHARAXMETOV

Oʻzbekiston Savdo-sanoat palatasi Raisi A. IKRAMOV

Ichki ishlar vaziri P. BOBOJONOV

Toshkent sh.,

2021-yil 25-sentabr,

2021-yil 6-sentabr

2021-yil 26-avgust

2021-yil 7-sentabr

14-son

(Qonunchilik maʼlumotlari milliy bazasi, 06.10.2021-y., 10/21/3323/0936-son; 23.06.2023-y., 10/23/3323-1/0423-son)

lex.uz