📅 2021-yil 13-sentabr · Vazirlik va idoralar hujjatlari · Davlat aktivlarini boshqarish agentligi Moliya vazirligi
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 13 сентябрь · Вазирлик ва идоралар ҳужжатлари · Давлат активларини бошқариш агентлиги Молия вазирлиги
Расмий матн. Расмий ҳужжат. Таҳририй изоҳлар киритилмаган.
📅 13 сентября 2021 г. · Документы министерств и ведомств · Агентствa по управлению государственными активами Министерства финансов
Официальный текст. Официальный документ. Редакционные примечания не включены.
📅 13 September 2021 · Ministry and agency documents · Davlat aktivlarini boshqarish agentligi Moliya vazirligi
Official text. Official document. Editorial notes are not included.
Ўзбекистон Республикаси Давлат активларини бошқариш агентлиги Ўзбекистон Республикаси Молия вазирлигининг
Қарори
НАМУНАВИЙ НИЗОМ
Корпоратив буюртмачиларнинг харид комиссиялари томонидан дастлабки малака танловини ўтказиш тартиби тўғрисидаги намунавий низомни тасдиқлаш ҳақида
Ўзбекистон Республикасининг «Давлат харидлари тўғрисида»ги Қонуни , Ўзбекистон Республикаси Президентининг 2021 йил 2 июлдаги ПҚ-5171-сон « Давлат харидлари шаффофлигини таъминлаш ва самарадорлигини оширишга доир қўшимча чора-тадбирлар тўғрисида »ги ҳамда 2021 йил 6 июлдаги ПҚ-5177-сон « Коррупцияга қарши курашиш фаолиятини самарали ташкил этишга доир қўшимча чора-тадбирлар тўғрисида »ги қарорларига мувофиқ Ўзбекистон Республикаси Давлат активларини бошқариш агентлиги ва Молия вазирлиги қарор қилади:
1. Корпоратив буюртмачиларнинг харид комиссиялари томонидан дастлабки малака танловини ўтказиш тартиби тўғрисидаги намунавий низом иловага мувофиқ тасдиқлансин.
2. Мазкур қарор расмий эълон қилинган кундан эътиборан кучга киради.
Ўзбекистон Республикаси Давлат активларини бошқариш агентлиги ва Молия вазирлигининг 2021 йил 13 сентябрдаги 01/11-07/13 ва 53-сон қарорига ИЛОВА
Корпоратив буюртмачиларнинг харид комиссиялари томонидан дастлабки малака танловини ўтказиш тартиби тўғрисидаги
Ушбу Намунавий низом корпоратив буюртмачиларнинг харид комиссиялари томонидан харид қилиш тартиб-таомилларида иштирок этиш учун салоҳиятли (потенциал) иштирокчиларнинг дастлабки малака танловини ташкил этиш, ўтказиш тартиби ҳамда уларнинг ишончлилигини баҳолаш мезонларини белгилайди.
1-боб. Умумий қоидалар
1. Мазкур Намунавий низомда қуйидаги асосий тушунчалар қўлланилади:
корпоратив буюртмачи (бундан буён матнда буюртмачи деб юритилади) — Ўзбекистон Республикаси Президентининг 2021 йил 2 июлдаги ПҚ-5171-сон қарори билан тасдиқланган Давлат харидларини амалга ошириш жараёнлари алоҳида тартибда назорат қилинадиган айрим корпоратив ва бюджет буюртмачилари рўйхатида кўрсатилган корпоратив буюртмачилар;
харид комиссиясининг масъул котиби (бундан буён матнда котиб деб юритилади) — харид комиссиясининг тезкор фаолиятини ташкил этувчи овоз бериш ҳуқуқига эга бўлмаган ходим;
харид қилиш тартиб-таомиллари иштирокчиси (бундан буён матнда иштирокчи деб юритилади) — харид қилиш тартиб-таомилида қатнашишдан манфаатдор бўлган, дастлабки малака танлови учун талабнома тақдим этган Ўзбекистон Республикасининг резиденти ёки норезиденти бўлган жисмоний ёки юридик шахс;
талабнома — иштирокчининг юридик мақоми, молиявий, тижорат, техник имкониятлари тўғрисидаги маълумотларни ўз ичига олган ҳужжатлар тўплами.
2. Дастлабки малака танлови харид қилиш тартиб-таомилининг бир қисми бўлиб, унинг натижаси давлат харидлари тўғрисидаги шартномани тузиш учун асос ҳисобланмайди.
3. Харид қилиш ҳужжатлари шартларида назарда тутилган ҳолларда харид комиссияси томонидан иштирокчиларни танлаб олиш учун дастлабки малака танлови ўтказилиши мумкин.
4. Дастлабки малака танлови энг яхши таклифларни танлаш (бундан буён матнда танлаш деб юритилади) ва тендер орқали амалга ошириладиган харидларга нисбатан қўлланилади.
5. Дастлабки малака танловидан муваффақиятли ўтган салоҳиятли иштирокчилар бир йилдан ортиқ бўлмаган муддат давомида корпоратив буюртмачиларнинг танлаш ва тендерларида иштирокчи сифатида қатнашиши мумкин.
6. Дастлабки малака танловини ўтказиш тартиби ва баҳолаш мезонлари барча учун бир хил ҳисобланади ҳамда давлат харидларининг асосий принципларига зид бўлмаслиги лозим.
7. Дастлабки малака танлови тартиб-таомили тўғрисидаги маълумотлар барча манфаатдор томонлар учун очиқ ва шаффоф бўлиши ҳамда ахборот алмашуви ихтиёрий амалга оширилиши лозим.
2-боб. Дастлабки малака танловининг асосий мақсад ва вазифалари
8. Дастлабки малака танловини ўтказишнинг асосий мақсади қуйидагилардан иборат:
иштирокчиларнинг молиявий, тижорат, ишлаб чиқариш ва техник имкониятларини ўрганиш;
Ўзбекистон Республикаси қонунчилигига мувофиқ иштирокчиларнинг ишончлилигини текшириш;
манфаатлар тўқнашуви ва коррупцион омиллар келиб чиқишининг олдини олиш.
9. Дастлабки малака танловини ўтказишнинг вазифалари қуйидагилар ҳисобланади:
давлат харидлари ижрочилари томонидан шартномалар бўйича мажбуриятларни бажармаслик хатарларини пасайтириш;
буюртмачилар фаолиятининг узлуксиз ва самарали ишлашини таъминлаш мақсадида харидларни ўз вақтида амалга ошириш;
буюртмачиларнинг маблағларидан самарали фойдаланиш;
буюртмачилар томонидан амалга ошириладиган харидларда барча иштирокчиларга тенг ҳуқуқли ва адолатли шарт-шароитлар яратиш;
иштирокчиларни танлашда манфаатлар тўқнашуви ва коррупцияга йўл қўймаслик.
3-боб. Иштирокчиларнинг талабнома бериш тартиби
10. Дастлабки малака танловини ўтказишда иштирокчилар томонидан тақдим этиладиган ҳужжатлар ҳамда уларни тақдим этиш муддати харид қилиш ҳужжатларида кўрсатилиши лозим. Бунда, иштирокчилар томонидан қуйидаги ҳужжатларни тақдим этиш назарда тутилади:
таъсис ҳужжатлари ва давлат рўйхатидан ўтказилганлиги тўғрисидаги гувоҳнома;
молиявий ҳисоботлар (ташқи аудитор ташкилотлар томонидан тасдиқланган ёки солиқ органлари томонидан қабул қилинганлиги тасдиқланган ҳолда);
экологик, гигиеник сертификатлаш, калибрлаш тўғрисидаги тегишли гувоҳномалар ёки синов баённомалари, сифат сертификатлари, мувофиқлик сертификатлари, шу жумладан хавфсизлик талабларига мувофиқлик сертификатлари, товар (иш, хизмат)лар паспортлари (товар (иш, хизмат)ларнинг хусусиятларидан келиб чиқиб мазкур ҳужжатларнинг бўлиши мажбурийлиги талаб этиладиган ҳолларда);
иштирокчиларнинг ишбилармонлик обрўсини (ишчи-ходимлари малакаси, иш тажрибаси, шу жумладан махсус фаолият бўйича тажрибаси) тасдиқловчи ҳужжатлар.
Иштирокчилар ўз хоҳишига кўра фаолиятига доир қўшимча маълумотлар ва ҳужжатларни тақдим этиши мумкин.
11. Талабнома иштирокчилар томонидан танлаш (тендер) ўтказиш тўғрисидаги эълонда ва харид қилиш ҳужжатларида белгиланган талаблар асосида таклифлар билан бирга юборилади.
4-боб. Иштирокчиларни ўрганиш (текшириш) тартиби
12. Иштирокчиларни ўрганиш улар томонидан тақдим қилинган талабномалар, тасдиқловчи ҳужжатларни, шунингдек, иштирокчилар тўғрисидаги бошқа маълумотларни таҳлил қилиш асосида амалга оширилади.
Зарурият бўлганда, иштирокчиларнинг ишлаб чиқариш жараёни ва маҳсулотларини қўшимча равишда ўрганиш учун харид комиссия томонидан техник аудит ўтказиш тўғрисида тегишли қарор қабул қилиниши мумкин.
13. Котиб томонидан уч иш кунидан ортиқ бўлмаган муддатда иштирокчилар тақдим қилган ҳужжатларнинг тўлиқлилиги ҳамда иштирокчилар ҳақидаги қуйидаги маълумотлар ўрганилади:
Ягона интерактив давлат хизматлари порталидаги маълумотлар (ёки бошқа мамлакатларнинг ўхшаш манбалари);
иштирокчи фаолиятнинг лицензияланадиган тури билан шуғулланганда, унинг «Лицензия» ахборот тизими ёки лицензияловчи органларнинг расмий сайтларидаги лицензиялар реестрида мавжудлиги;
иштирокчиларнинг махсус ахборот порталида инсофсиз ижрочилар реестрида, шунингдек тўланиши лозим бўлган қўшилган қиймат солиғи миқдорини камайтириш ҳуқуқини суиистеъмол қилган корхоналар рўйхатида мавжуд ёки мавжуд эмаслиги;
иштирокчининг ишбилармонлик обрўси тўғрисидаги, шу жумладан иштирокчиларнинг расмий веб-сайти, оммавий-ахборот воситалари, у аъзо бўлган тармоқ уюшмалари ва бирлашмалари ҳамда бошқа Интернет жаҳон ахборот тармоғидаги веб-сайт ва тегишли ахборот тизимлари орқали олинган маълумотлар.
Котиб томонидан ўтказилган ўрганиш натижалари харид комиссиясига тақдим этилади ва харид комиссиясининг йиғилишида кўриб чиқилади.
14. Харид комиссияси котиб томонидан тақдим этилган ўрганиш натижаларини кўриб чиқади ва қуйидагиларни аниқлайди:
иштирокчиларнинг ўз вақтида сифатли маҳсулот ишлаб чиқариш салоҳияти, уларнинг ишлаб чиқариш қуввати ва иш тажрибаси;
иштирокчиларнинг молиявий ҳисоботлари, шунингдек солиқлар ва йиғимларни тўлаш бўйича муддати ўтган қарздорлиги мавжуд эмаслиги;
имтиёзли солиқ режимидаги молиявий операцияларни амалга оширишда маълумотларни ошкор қилиш ва тақдим этишни назарда тутмайдиган давлатлар ёки ҳудудларда (оффшор ҳудудлар) иштирокчилар ва уларнинг банк ҳисобрақамлари рўйхатдан ўтказилганлиги ёки ўтказилмаганлиги;
таъсис ҳужжатлари ва фаолиятининг қонунийлиги;
манфаатлар тўқнашуви ва аффилланганлик ҳолатлари мавжуд эмаслиги;
иштирокчиларнинг жорий буюртмачи билан илгари тузилган шартномалар бўйича ўз зиммасига олган мажбуриятларнинг ижро этилмаганлиги ёки лозим даражада ижро этилмаганлиги бўйича судда иши кўрилганлиги;
иштирокчиларга нисбатан тўловга қобилиятсизлик тартиб-таомилларининг мавжуд эмаслиги.
15. Харид комиссияси зарур ҳолларда иштирокчиларнинг розилиги билан ва уларни фаолиятига аралашмасдан жойига чиққан ҳолда техник аудит ўтказиши мумкин. Бунда, корхонанинг ишлаб чиқариш қуввати ва маҳсулотларнинг сифати ўрганилади.
5-боб. Дастлабки малака танлови натижаларини расмийлаштириш тартиби
16. Қуйидаги иштирокчилар дастлабки малака танловидан ўтмаган ҳисобланади:
малака танлови учун зарур ҳужжатлар тўпламини тўлиқ тақдим этмаган;
ўзига нисбатан тўловга қобилиятсизлик тартиб-таомиллари жорий этилган;
Инсофсиз ижрочиларнинг ягона реестрида қайд этилган;
имтиёзли солиқ режимидаги молиявий операцияларни амалга оширишда маълумотларни ошкор қилиш ва тақдим этишни назарда тутмайдиган давлатлар ёки ҳудудларда (оффшор ҳудудлар) рўйхатдан ўтказилган ёки мазкур ҳудудларда банк ҳисобрақамлари очган иштирокчилар;
солиқлар ва йиғимларни тўлаш бўйича муддати ўтган қарздорлиги мавжуд бўлган;
танлаш ва тендер ўтказиш тўғрисидаги эълон берилган санада давлат рўйхатидан ўтганига олти ой тўлмаган;
манфаатлар тўқнашуви ва аффилланганлик ҳолатлари мавжуд бўлган;
харид комиссияси томонидан ишчи-ходимлар малакаси, иш тажрибаси, шу жумладан махсус фаолият бўйича тажрибаси, иштирокчиларнинг ўз вақтида сифатли маҳсулот ишлаб чиқариш ёки етказиб етказиб салоҳияти ва/ёки қуввати етарли эмас деб топилган.
17. Дастлабки малака танлови натижалари харид комиссиясининг баённомаси билан расмийлаштирилади.
18. Харид комиссияси баённома расмийлаштирилган кундан бошлаб уч иш кунидан кечиктирмасдан дастлабки малака танловидан ўтмаган иштирокчиларнинг таклифларини рад этиш сабабларини кўрсатган ҳолда уларни хабардор қилади.
19. Малака танловидан ўтган иштирокчилар рўйхати буюртмачилар томонидан юритилади.
6-боб. Якуний қоидалар
20. Бюджет ва бошқа корпоратив буюртмачилар дастлабки малака танловини ўтказишда мазкур Намунавий низом қоидаларидан фойдаланиши мумкин.
21. Дастлабки малака танлови натижаларидан норози бўлган иштирокчилар суд тартибида шикоят қилишга ҳақли.
22. Мазкур Намунавий низом талабларининг бузилишида айбдор бўлган шахслар қонунчиликда белгиланган тартибда жавоб берадилар.
Давлат акивларини бошқариш агентлиги директори А. ОРТИКОВ
Молия вазири Т. ИШМЕТОВ
Тошкент ш.,
2021 йил 13 сентябрь,
Тошкент ш.,
2021 йил 13 сентябрь,
01/11-07/13-сон
53-сон
Oʻzbekiston Respublikasi Davlat aktivlarini boshqarish agentligi Oʻzbekiston Respublikasi Moliya vazirligining
Qarori
NAMUNAVIY NIZOM
Korporativ buyurtmachilarning xarid komissiyalari tomonidan dastlabki malaka tanlovini oʻtkazish tartibi toʻgʻrisidagi namunaviy nizomni tasdiqlash haqida
Oʻzbekiston Respublikasining “Davlat xaridlari toʻgʻrisida”gi Qonuni , Oʻzbekiston Respublikasi Prezidentining 2021-yil 2-iyuldagi PQ-5171-son “ Davlat xaridlari shaffofligini taʼminlash va samaradorligini oshirishga doir qoʻshimcha chora-tadbirlar toʻgʻrisida ”gi hamda 2021-yil 6-iyuldagi PQ-5177-son “ Korrupsiyaga qarshi kurashish faoliyatini samarali tashkil etishga doir qoʻshimcha chora-tadbirlar toʻgʻrisida ”gi qarorlariga muvofiq Oʻzbekiston Respublikasi Davlat aktivlarini boshqarish agentligi va Moliya vazirligi qaror qiladi:
1. Korporativ buyurtmachilarning xarid komissiyalari tomonidan dastlabki malaka tanlovini oʻtkazish tartibi toʻgʻrisidagi namunaviy nizom ilovaga muvofiq tasdiqlansin.
2. Mazkur qaror rasmiy eʼlon qilingan kundan eʼtiboran kuchga kiradi.
Oʻzbekiston Respublikasi Davlat aktivlarini boshqarish agentligi va Moliya vazirligining 2021-yil 13-sentabrdagi 01/11-07/13 va 53-son qaroriga ILOVA
Korporativ buyurtmachilarning xarid komissiyalari tomonidan dastlabki malaka tanlovini oʻtkazish tartibi toʻgʻrisidagi
Ushbu Namunaviy nizom korporativ buyurtmachilarning xarid komissiyalari tomonidan xarid qilish tartib-taomillarida ishtirok etish uchun salohiyatli (potensial) ishtirokchilarning dastlabki malaka tanlovini tashkil etish, oʻtkazish tartibi hamda ularning ishonchliligini baholash mezonlarini belgilaydi.
1-bob. Umumiy qoidalar
1. Mazkur Namunaviy nizomda quyidagi asosiy tushunchalar qoʻllaniladi:
korporativ buyurtmachi (bundan buyon matnda buyurtmachi deb yuritiladi) — Oʻzbekiston Respublikasi Prezidentining 2021-yil 2-iyuldagi PQ-5171-son qarori bilan tasdiqlangan Davlat xaridlarini amalga oshirish jarayonlari alohida tartibda nazorat qilinadigan ayrim korporativ va budjet buyurtmachilari roʻyxatida koʻrsatilgan korporativ buyurtmachilar;
xarid komissiyasining masʼul kotibi (bundan buyon matnda kotib deb yuritiladi) — xarid komissiyasining tezkor faoliyatini tashkil etuvchi ovoz berish huquqiga ega boʻlmagan xodim;
xarid qilish tartib-taomillari ishtirokchisi (bundan buyon matnda ishtirokchi deb yuritiladi) — xarid qilish tartib-taomilida qatnashishdan manfaatdor boʻlgan, dastlabki malaka tanlovi uchun talabnoma taqdim etgan Oʻzbekiston Respublikasining rezidenti yoki norezidenti boʻlgan jismoniy yoki yuridik shaxs;
talabnoma — ishtirokchining yuridik maqomi, moliyaviy, tijorat, texnik imkoniyatlari toʻgʻrisidagi maʼlumotlarni oʻz ichiga olgan hujjatlar toʻplami.
2. Dastlabki malaka tanlovi xarid qilish tartib-taomilining bir qismi boʻlib, uning natijasi davlat xaridlari toʻgʻrisidagi shartnomani tuzish uchun asos hisoblanmaydi.
3. Xarid qilish hujjatlari shartlarida nazarda tutilgan hollarda xarid komissiyasi tomonidan ishtirokchilarni tanlab olish uchun dastlabki malaka tanlovi oʻtkazilishi mumkin.
4. Dastlabki malaka tanlovi eng yaxshi takliflarni tanlash (bundan buyon matnda tanlash deb yuritiladi) va tender orqali amalga oshiriladigan xaridlarga nisbatan qoʻllaniladi.
5. Dastlabki malaka tanlovidan muvaffaqiyatli oʻtgan salohiyatli ishtirokchilar bir yildan ortiq boʻlmagan muddat davomida korporativ buyurtmachilarning tanlash va tenderlarida ishtirokchi sifatida qatnashishi mumkin.
6. Dastlabki malaka tanlovini oʻtkazish tartibi va baholash mezonlari barcha uchun bir xil hisoblanadi hamda davlat xaridlarining asosiy prinsiplariga zid boʻlmasligi lozim.
7. Dastlabki malaka tanlovi tartib-taomili toʻgʻrisidagi maʼlumotlar barcha manfaatdor tomonlar uchun ochiq va shaffof boʻlishi hamda axborot almashuvi ixtiyoriy amalga oshirilishi lozim.
2-bob. Dastlabki malaka tanlovining asosiy maqsad va vazifalari
8. Dastlabki malaka tanlovini oʻtkazishning asosiy maqsadi quyidagilardan iborat:
ishtirokchilarning moliyaviy, tijorat, ishlab chiqarish va texnik imkoniyatlarini oʻrganish;
Oʻzbekiston Respublikasi qonunchiligiga muvofiq ishtirokchilarning ishonchliligini tekshirish;
manfaatlar toʻqnashuvi va korrupsion omillar kelib chiqishining oldini olish.
9. Dastlabki malaka tanlovini oʻtkazishning vazifalari quyidagilar hisoblanadi:
davlat xaridlari ijrochilari tomonidan shartnomalar boʻyicha majburiyatlarni bajarmaslik xatarlarini pasaytirish;
buyurtmachilar faoliyatining uzluksiz va samarali ishlashini taʼminlash maqsadida xaridlarni oʻz vaqtida amalga oshirish;
buyurtmachilarning mablagʻlaridan samarali foydalanish;
buyurtmachilar tomonidan amalga oshiriladigan xaridlarda barcha ishtirokchilarga teng huquqli va adolatli shart-sharoitlar yaratish;
ishtirokchilarni tanlashda manfaatlar toʻqnashuvi va korrupsiyaga yoʻl qoʻymaslik.
3-bob. Ishtirokchilarning talabnoma berish tartibi
10. Dastlabki malaka tanlovini oʻtkazishda ishtirokchilar tomonidan taqdim etiladigan hujjatlar hamda ularni taqdim etish muddati xarid qilish hujjatlarida koʻrsatilishi lozim. Bunda, ishtirokchilar tomonidan quyidagi hujjatlarni taqdim etish nazarda tutiladi:
taʼsis hujjatlari va davlat roʻyxatidan oʻtkazilganligi toʻgʻrisidagi guvohnoma;
moliyaviy hisobotlar (tashqi auditor tashkilotlar tomonidan tasdiqlangan yoki soliq organlari tomonidan qabul qilinganligi tasdiqlangan holda);
ekologik, gigiyenik sertifikatlash, kalibrlash toʻgʻrisidagi tegishli guvohnomalar yoki sinov bayonnomalari, sifat sertifikatlari, muvofiqlik sertifikatlari, shu jumladan xavfsizlik talablariga muvofiqlik sertifikatlari, tovar (ish, xizmat)lar pasportlari (tovar (ish, xizmat)larning xususiyatlaridan kelib chiqib mazkur hujjatlarning boʻlishi majburiyligi talab etiladigan hollarda);
ishtirokchilarning ishbilarmonlik obroʻsini (ishchi-xodimlari malakasi, ish tajribasi, shu jumladan maxsus faoliyat boʻyicha tajribasi) tasdiqlovchi hujjatlar.
Ishtirokchilar oʻz xohishiga koʻra faoliyatiga doir qoʻshimcha maʼlumotlar va hujjatlarni taqdim etishi mumkin.
11. Talabnoma ishtirokchilar tomonidan tanlash (tender) oʻtkazish toʻgʻrisidagi eʼlonda va xarid qilish hujjatlarida belgilangan talablar asosida takliflar bilan birga yuboriladi.
4-bob. Ishtirokchilarni oʻrganish (tekshirish) tartibi
12. Ishtirokchilarni oʻrganish ular tomonidan taqdim qilingan talabnomalar, tasdiqlovchi hujjatlarni, shuningdek, ishtirokchilar toʻgʻrisidagi boshqa maʼlumotlarni tahlil qilish asosida amalga oshiriladi.
Zaruriyat boʻlganda, ishtirokchilarning ishlab chiqarish jarayoni va mahsulotlarini qoʻshimcha ravishda oʻrganish uchun xarid komissiya tomonidan texnik audit oʻtkazish toʻgʻrisida tegishli qaror qabul qilinishi mumkin.
13. Kotib tomonidan uch ish kunidan ortiq boʻlmagan muddatda ishtirokchilar taqdim qilgan hujjatlarning toʻliqliligi hamda ishtirokchilar haqidagi quyidagi maʼlumotlar oʻrganiladi:
Yagona interaktiv davlat xizmatlari portalidagi maʼlumotlar (yoki boshqa mamlakatlarning oʻxshash manbalari);
ishtirokchi faoliyatning litsenziyalanadigan turi bilan shugʻullanganda, uning “Litsenziya” axborot tizimi yoki litsenziyalovchi organlarning rasmiy saytlaridagi litsenziyalar reyestrida mavjudligi;
ishtirokchilarning maxsus axborot portalida insofsiz ijrochilar reyestrida, shuningdek toʻlanishi lozim boʻlgan qoʻshilgan qiymat soligʻi miqdorini kamaytirish huquqini suiisteʼmol qilgan korxonalar roʻyxatida mavjud yoki mavjud emasligi;
ishtirokchining ishbilarmonlik obroʻsi toʻgʻrisidagi, shu jumladan ishtirokchilarning rasmiy veb-sayti, ommaviy-axborot vositalari, u aʼzo boʻlgan tarmoq uyushmalari va birlashmalari hamda boshqa Internet jahon axborot tarmogʻidagi veb-sayt va tegishli axborot tizimlari orqali olingan maʼlumotlar.
Kotib tomonidan oʻtkazilgan oʻrganish natijalari xarid komissiyasiga taqdim etiladi va xarid komissiyasining yigʻilishida koʻrib chiqiladi.
14. Xarid komissiyasi kotib tomonidan taqdim etilgan oʻrganish natijalarini koʻrib chiqadi va quyidagilarni aniqlaydi:
ishtirokchilarning oʻz vaqtida sifatli mahsulot ishlab chiqarish salohiyati, ularning ishlab chiqarish quvvati va ish tajribasi;
ishtirokchilarning moliyaviy hisobotlari, shuningdek soliqlar va yigʻimlarni toʻlash boʻyicha muddati oʻtgan qarzdorligi mavjud emasligi;
imtiyozli soliq rejimidagi moliyaviy operatsiyalarni amalga oshirishda maʼlumotlarni oshkor qilish va taqdim etishni nazarda tutmaydigan davlatlar yoki hududlarda (offshor hududlar) ishtirokchilar va ularning bank hisobraqamlari roʻyxatdan oʻtkazilganligi yoki oʻtkazilmaganligi;
taʼsis hujjatlari va faoliyatining qonuniyligi;
manfaatlar toʻqnashuvi va affillanganlik holatlari mavjud emasligi;
ishtirokchilarning joriy buyurtmachi bilan ilgari tuzilgan shartnomalar boʻyicha oʻz zimmasiga olgan majburiyatlarning ijro etilmaganligi yoki lozim darajada ijro etilmaganligi boʻyicha sudda ishi koʻrilganligi;
ishtirokchilarga nisbatan toʻlovga qobiliyatsizlik tartib-taomillarining mavjud emasligi.
15. Xarid komissiyasi zarur hollarda ishtirokchilarning roziligi bilan va ularni faoliyatiga aralashmasdan joyiga chiqqan holda texnik audit oʻtkazishi mumkin. Bunda, korxonaning ishlab chiqarish quvvati va mahsulotlarning sifati oʻrganiladi.
5-bob. Dastlabki malaka tanlovi natijalarini rasmiylashtirish tartibi
16. Quyidagi ishtirokchilar dastlabki malaka tanlovidan oʻtmagan hisoblanadi:
malaka tanlovi uchun zarur hujjatlar toʻplamini toʻliq taqdim etmagan;
oʻziga nisbatan toʻlovga qobiliyatsizlik tartib-taomillari joriy etilgan;
Insofsiz ijrochilarning yagona reyestrida qayd etilgan;
imtiyozli soliq rejimidagi moliyaviy operatsiyalarni amalga oshirishda maʼlumotlarni oshkor qilish va taqdim etishni nazarda tutmaydigan davlatlar yoki hududlarda (offshor hududlar) roʻyxatdan oʻtkazilgan yoki mazkur hududlarda bank hisobraqamlari ochgan ishtirokchilar;
soliqlar va yigʻimlarni toʻlash boʻyicha muddati oʻtgan qarzdorligi mavjud boʻlgan;
tanlash va tender oʻtkazish toʻgʻrisidagi eʼlon berilgan sanada davlat roʻyxatidan oʻtganiga olti oy toʻlmagan;
manfaatlar toʻqnashuvi va affillanganlik holatlari mavjud boʻlgan;
xarid komissiyasi tomonidan ishchi-xodimlar malakasi, ish tajribasi, shu jumladan maxsus faoliyat boʻyicha tajribasi, ishtirokchilarning oʻz vaqtida sifatli mahsulot ishlab chiqarish yoki yetkazib yetkazib salohiyati va/yoki quvvati yetarli emas deb topilgan.
17. Dastlabki malaka tanlovi natijalari xarid komissiyasining bayonnomasi bilan rasmiylashtiriladi.
18. Xarid komissiyasi bayonnoma rasmiylashtirilgan kundan boshlab uch ish kunidan kechiktirmasdan dastlabki malaka tanlovidan oʻtmagan ishtirokchilarning takliflarini rad etish sabablarini koʻrsatgan holda ularni xabardor qiladi.
19. Malaka tanlovidan oʻtgan ishtirokchilar roʻyxati buyurtmachilar tomonidan yuritiladi.
6-bob. Yakuniy qoidalar
20. Budjet va boshqa korporativ buyurtmachilar dastlabki malaka tanlovini oʻtkazishda mazkur Namunaviy nizom qoidalaridan foydalanishi mumkin.
21. Dastlabki malaka tanlovi natijalaridan norozi boʻlgan ishtirokchilar sud tartibida shikoyat qilishga haqli.
22. Mazkur Namunaviy nizom talablarining buzilishida aybdor boʻlgan shaxslar qonunchilikda belgilangan tartibda javob beradilar.
Davlat akivlarini boshqarish agentligi direktori A. ORTIKOV
Moliya vaziri T. ISHMETOV
Toshkent sh.,
2021-yil 13-sentabr,
Toshkent sh.,
2021-yil 13-sentabr,
01/11-07/13-son
53-son