📅 2021-yil 21-oktabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 21 октябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 21 октября 2021 г. · Постановления Кабинета Министров
Официальный текст. Официальный документ. Редакционные примечания не включены.
📅 21 October 2021 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
«Uzbekistan Airways Technics» МЧЖ эркин божхона зонаси ҳудудига товарларни олиб кириш, олиб чиқиш, ҳаво кемаларини таъмирлашда фойдаланиш, уларни тегишли режимларга расмийлаштириш, шунингдек, ушбу товарлар ва хизматлар учун валюта операцияларини амалга ошириш тартиби тўғрисидаги низомни тасдиқлаш ҳақида
Ўзбекистон Республикаси Президентининг «Фуқаро авиацияси корхоналарини трансформация қилиш ва қўллаб-қувватлаш чора-тадбирлари тўғрисида» 2021 йил 30 апрелдаги ПҚ-5100-сон қарорига мувофиқ, шунингдек, «Uzbekistan Airways Technics» МЧЖ томонидан кўрсатилаётган хизматлар экспорти ҳажмини янада ошириш ҳамда ташқи савдо инфратузилмасини ривожлантириш мақсадида Вазирлар Маҳкамаси қарор қилади:
1. Ўзбекистон Республикаси Президентининг «Фуқаро авиацияси корхоналарини трансформация қилиш ва қўллаб-қувватлаш чора-тадбирлари тўғрисида» 2021 йил 30 апрелдаги ПҚ-5100-сон қарорининг 9-бандида Тошкент шаҳар, Сергели тумани, Учувчилар шаҳарчасида жойлашган «Uzbekistan Airways Technics» МЧЖ ҳудудида (майдони 39 га) эркин божхона зонасини ташкил этиш белгиланганлиги маълумот учун қабул қилинсин.
2. Қуйидагиларни назарда тутувчи «Uzbekistan Airways Technics» МЧЖ эркин божхона зонаси ҳудудига товарларни олиб кириш, олиб чиқиш, ҳаво кемаларини таъмирлашда фойдаланиш, уларни тегишли режимларга расмийлаштириш, шунингдек, ушбу товарлар ва хизматлар учун валюта операцияларини амалга ошириш тартиби тўғрисидаги низом иловага мувофиқ тасдиқлансин:
«Uzbekistan Airways Technics» МЧЖ эркин божхона зонаси (кейинги ўринларда — эркин божхона зонаси) ҳудудида божхона назоратини таъминлаш талаблари ва шартлари;
эркин божхона зонаси ҳудудида фаолият юритувчи тадбиркорлик субъектларининг ҳуқуқ ва мажбуриятлари;
эркин божхона зонаси ҳудудига товарларни олиб кириш ва олиб чиқиш, тегишли божхона режимларига расмийлаштириш ва ҳаво кемаларини таъмирлашда фойдаланиш тартиби;
эркин божхона зонаси ҳудудига олиб кирилган ва олиб чиқилган товарлар ва хизматлар учун валюта операцияларини амалга ошириш тартиби.
3. Ўзбекистон Республикаси Транспорт вазирлиги ва Давлат божхона қўмитаси эркин божхона зонаси фаолиятини доимий мониторинг қилиб борсин.
4. Ушбу қарор ижросини назорат қилиш Ўзбекистон Республикаси транспорт вазири И. Махкамов ва Ўзбекистон Республикаси Давлат божхона қўмитаси раиси М. Азимов зиммасига юклансин.
Вазирлар Маҳкамасининг 2021 йил 21 октябрдаги 652-сон қарорига ИЛОВА
«Uzbekistan Airways Technics» МЧЖ эркин божхона зонаси ҳудудига товарларни олиб кириш, олиб чиқиш, ҳаво кемаларини таъмирлашда фойдаланиш, уларни тегишли режимларга расмийлаштириш, шунингдек, ушбу товарлар ва хизматлар учун валюта операцияларини амалга ошириш тартиби тўғрисида
1-боб. Умумий қоидалар
1. Мазкур Низом «Uzbekistan Airways Technics» МЧЖ ҳудудида ташкил этилган эркин божхона зонасига (кейинги ўринларда — эркин божхона зонаси) товарларни олиб кириш, олиб чиқиш, ҳаво кемаларини таъмирлашда фойдаланиш, уларни тегишли божхона режимларига расмийлаштириш, шунингдек, ушбу товарлар ва хизматлар учун валюта операцияларини амалга ошириш тартибини белгилайди.
2. Ушбу Низом мақсадлари учун божхона тўғрисидаги қонунчиликда фойдаланиладиган тушунчалар қўлланилади.
3. Эркин божхона зонасининг фаолиятини ташкил этиш ва бошқариш «Uzbekistan Airways Technics» МЧЖ томонидан амалга оширилади.
Эркин божхона зонаси ҳудудидан ва бино-иншоотларидан фойдаланишга ҳамда ҳаво кемаларини таъмирлаш ва уларга хизмат кўрсатиш билан боғлиқ ишларга «Uzbekistan Airways Technics» МЧЖ билан тузилган шартнома асосида рухсат этилади.
4. «Uzbekistan Airways Technics» МЧЖнинг эркин божхона зонаси бўлган махсус (ажратувчи) белгилар қўйилган ҳудудлари ва бинолари божхона назорати зонаси ҳисобланади. Бунда, эркин божхона зонаси ҳудуди божхона ҳудудида жойлашган деб қаралади.
5. Эркин божхона зонаси чегараси орқали божхона юк декларациялари асосида олиб ўтиладиган товарлар божхона органлари томонидан божхона назорати ва расмийлаштирувидан ўтказилади ҳамда ҳисобга олинади.
6. Эркин божхона зонаси фаолият кўрсатишини таъминлаш учун фойдаланиладиган маҳаллий товарлар божхона режими остида жойлаштирилмайди.
2-боб. Эркин божхона зонаси ҳудудида божхона назоратини таъминлаш талаблари ва шартлари
7. Эркин божхона зонасининг божхона назорати зонаси ҳисобланган ҳудуд, бино ва иншоотлари:
Ўзбекистон Республикаси қонунчилик ҳужжатларида белгиланган техник, санитария ва ёнғинга қарши талабларга жавоб бериши;
қўриқлаш ва ёнғин назорати сигнализациялари, содир бўлаётган воқеалар бўйича ҳар томондан олинган видео маълумотларни уч ой давомида кўрсатиш имконига эга бўлган, техник ҳужжат асосида давлат назорати органлари томонидан белгиланган жойларда ўрнатилган, вақт бўйича узлуксиз ишлайдиган видеокузатув воситалари билан жиҳозланган бўлиши;
ёнғин хавфсизлиги талабларига мос бўлган ёнғинни ўчириш тизими ва воситаларига эга бўлиши;
авиация хавфсизлиги нуқтаи назаридан қўриқланиши;
иншоотларда эркин божхона зонасига оид махсус (ажратувчи) белгилар қўйилган бўлиши лозим.
8. Эркин божхона зонасининг нормал фаолият кўрсатиши учун доимий равишда қуйидагилар бўлиши зарур:
ортиш-тушириш ускуналари ва транспорт воситалари;
божхона назорати зонаси сифатида ишлатиш учун мўлжалланган, бино ва иншоотларни, очиқ майдончаларни, божхона назорати зонасига бевосита туташиб кетган бутун ҳудудни тўлиқ назорат қилиш ҳамда божхона органларига видео маълумотларни узатиш, шунингдек, ушбу маълумотларни уч ой давомида сақлаш имконига эга бўлган вақт бўйича узлуксиз ишлайдиган видеокузатув тизими;
алоқа воситалари (шу жумладан телефон, маълумот узатиш тармоғи, Интернет жаҳон ахборот тармоғи).
9. Эркин божхона зонаси фаолият кўрсатадиган бино ва иншоотлардан божхона органлари ходимлари нормал хизмат олиб боришлари учун зарур жиҳозлар билан таъминланган хизмат хоналари ажратилади.
3-боб. Эркин божхона зонасида фаолият юритувчи тадбиркорлик субъектларининг ҳуқуқ ва мажбуриятлари
10. Эркин божхона зонасида фаолият юритувчи тадбиркорлик субъектлари қуйидаги ҳуқуқларга эга:
бино ва иншоотларнинг Ўзбекистон Республикаси қонунчилик ҳужжатларида белгиланган техник, санитария ва ёнғинга қарши талабларга жавоб беришини талаб қилиш;
ўзига тегишли бўлган мулкдан фойдаланишдан олинган соф фойдани эркин тасарруф этиш;
шартнома доирасида ажратилган бино ва иншоотлардан фойдаланиш;
ташқи муҳандислик-техник коммуникацияларнинг барқарор ишлашини таъминлашни талаб этиш;
алоқа воситаларидан (шу жумладан телефон, маълумот узатиш тармоғи, Интернет жаҳон ахборот тармоғи) фойдаланиш.
11. Эркин божхона зонасида фаолият юритувчи тадбиркорлик субъектлари қуйидагиларга мажбур:
божхона органининг талабига мувофиқ эркин божхона зонасидаги товарларни божхона органининг мансабдор шахси иштирокида хатловдан ўтказиш;
санитария, товарларнинг ёнма-ён қўйилиши қоидаларига ва сақлаш режимига, давлат стандартларининг мажбурий талабларига риоя қилиш;
эркин божхона зонасига кириш учун рухсат берилган ходимларнинг (Ф.И.О., лавозими кўрсатилган ҳолда) рўйхати мавжудлигини таъминлаш;
эркин божхона зонасида сақланаётган товарлар турган жойга кириши тўғрисида божхона органлари мансабдор шахсларининг талабларини бажариш;
божхона назорати ва божхона расмийлаштирувини амалга ошириш учун эркин божхона зонасидаги жиҳозланган бинолар ва алоқа воситаларини божхона органлари ходимларига бепул тақдим этиш.
4-боб. Товарларни эркин божхона зонасига олиб кириш, ундан олиб чиқиш, уларни тегишли божхона режимларига расмийлаштириш ва ҳаво кемаларини таъмирлашда фойдаланиш ҳамда ушбу товарлар ва хизматлар учун валюта операцияларини амалга ошириш
12. Эркин божхона зонасига ҳаво кемаларини (шу жумладан, уларнинг қисм ва агрегатларини) таъмирлаш ёки уларга хизмат кўрсатиш мақсадида четдан келтириладиган авиатехника эҳтиёт қисмлари ва бошқа товарлар «эркин божхона зонаси» божхона режимига расмийлаштириш орқали жойлаштирилади ҳамда сертификатлар ва рухсат этиш хусусиятига эга ҳужжатлар, истисно тариқасида, талаб этилмайди.
Бунда, таъмирлаш мақсадида эркин божхона зонасига олиб кириладиган ҳаво кемаларининг (шу жумладан, уларнинг қисм ва агрегатлари) кириб-чиқишида божхона назорати уларни тегишли божхона режимларига расмийлаштирмаган ҳолда амалга оширилади.
13. Четдан келтириладиган авиатехника эҳтиёт қисмлари ва бошқа товарларни «эркин божхона зонаси» божхона режимига жойлаштириш учун декларант божхона органига уч иш кунидан ошмаган муддатда божхона юк декларациясини ҳамда товарнинг тижорат ва транспорт ҳужжатларини тақдим этади.
14. Эркин божхона зонасида четдан келтирилиб «эркин божхона зонаси» божхона режимида турган товарлар Ўзбекистон Республикаси ҳудудидан олиб чиқилганда, тегишлича «реэкспорт» божхона режимига расмийлаштирилади.
15. Эркин божхона зонаси ҳудудига ҳаво кемаларини (шу жумладан, уларнинг қисм ва агрегатларини) таъмирлаш ёки уларга хизмат кўрсатиш мақсадида маҳаллий товарлар божхона режимига расмийлаштирмаган ҳолда олиб кирилиши мумкин.
Бунда, маҳаллий товарлар:
«эркин божхона зонаси» божхона режимига жойлаштирилмаган ҳолда алоҳида бино(лар)да сақланади;
Ўзбекистон Республикасидан хорижий давлат ҳудудига, шунингдек хорижий ҳаво кемаларига (шу жумладан, уларнинг қисм ва агрегатларига) ўрнатилган ҳолда олиб чиқилганда «экспорт» божхона режимига расмийлаштирилади.
16. Эркин божхона зонаси ҳудудида маҳаллий авиакомпанияларнинг ҳаво кемаларини ҳамда уларнинг қисм ва агрегатларини таъмирлаш учун зарур бўлган четдан келтирилган авиатехника эҳтиёт қисмлари эркин божхона зонаси чегарасидан чиқмаган ҳолда харид қилиниб, «эркин муомалага чиқариш» божхона режимига расмийлаштирилган ҳолда фойдаланилади.
17. Эркин божхона зонасида товарлар ва хизматлар учун валюта операциялари қонунчилик ҳужжатларида белгиланган тартибда олиб борилади.
5-боб. Якунловчи қоидалар
18. Эркин божхона зонасига таъмирлаш мақсадида олиб кириладиган ҳаво кемаларининг (шу жумладан, уларнинг қисм ва агрегатлари) ҳамда «эркин божхона зонаси» божхона режимига расмийлаштирилган товарларнинг ҳисоби «Uzbekistan Airways Technics» МЧЖ томонидан юритилади ҳамда бу борада божхона органлари олдида масъул ҳисобланади.
Ушбу товарлар йўқолганда ёки божхона органларининг рухсатисиз бошқа шахсларга бериб юборилган тақдирда, божхона тўловлари тўлиқ тўланади.
19. Эркин божхона зонасининг фаолияти тугатилган тақдирда, «эркин божхона зонаси» божхона режимида турган товарлар эркин божхона зонаси тугатилган кундан эътиборан ўн беш календарь кун мобайнида товарларга ваколати бўлган шахс томонидан бошқа божхона режимига жойлаштирилади.
Ушбу муддат ўтиб бўлгач, божхона органлари қонунчилик ҳужжатларига мувофиқ тегишли қонуний чораларни кўради.
20. Мазкур Низомнинг 19-бандида назарда тутилган муддат мобайнида кўрсатиб ўтилган товарлар божхона мақсадлари учун «вақтинча сақлаш» божхона режимида турган товарлар ҳисобланади.
21. Мазкур Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб берадилар.
Ўзбекистон Республикасининг Бош вазири А. АРИПОВ
Тошкент ш.,
2021 йил 21 октябрь,
652-сон
Oʻzbekiston Respublikasi Vazirlar Mahkamasining
qarori
NIZOM
“Uzbekistan Airways Technics” MCHJ erkin bojxona zonasi hududiga tovarlarni olib kirish, olib chiqish, havo kemalarini taʼmirlashda foydalanish, ularni tegishli rejimlarga rasmiylashtirish, shuningdek, ushbu tovarlar va xizmatlar uchun valyuta operatsiyalarini amalga oshirish tartibi toʻgʻrisidagi nizomni tasdiqlash haqida
Oʻzbekiston Respublikasi Prezidentining “Fuqaro aviatsiyasi korxonalarini transformatsiya qilish va qoʻllab-quvvatlash chora-tadbirlari toʻgʻrisida” 2021-yil 30-apreldagi PQ-5100-son qaroriga muvofiq, shuningdek, “Uzbekistan Airways Technics” MCHJ tomonidan koʻrsatilayotgan xizmatlar eksporti hajmini yanada oshirish hamda tashqi savdo infratuzilmasini rivojlantirish maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining “Fuqaro aviatsiyasi korxonalarini transformatsiya qilish va qoʻllab-quvvatlash chora-tadbirlari toʻgʻrisida” 2021-yil 30-apreldagi PQ-5100-son qarorining 9-bandida Toshkent shahar, Sergeli tumani, Uchuvchilar shaharchasida joylashgan “Uzbekistan Airways Technics” MCHJ hududida (maydoni 39 ga) erkin bojxona zonasini tashkil etish belgilanganligi maʼlumot uchun qabul qilinsin.
2. Quyidagilarni nazarda tutuvchi “Uzbekistan Airways Technics” MCHJ erkin bojxona zonasi hududiga tovarlarni olib kirish, olib chiqish, havo kemalarini taʼmirlashda foydalanish, ularni tegishli rejimlarga rasmiylashtirish, shuningdek, ushbu tovarlar va xizmatlar uchun valyuta operatsiyalarini amalga oshirish tartibi toʻgʻrisidagi nizom ilovaga muvofiq tasdiqlansin:
“Uzbekistan Airways Technics” MCHJ erkin bojxona zonasi (keyingi oʻrinlarda — erkin bojxona zonasi) hududida bojxona nazoratini taʼminlash talablari va shartlari;
erkin bojxona zonasi hududida faoliyat yurituvchi tadbirkorlik subyektlarining huquq va majburiyatlari;
erkin bojxona zonasi hududiga tovarlarni olib kirish va olib chiqish, tegishli bojxona rejimlariga rasmiylashtirish va havo kemalarini taʼmirlashda foydalanish tartibi;
erkin bojxona zonasi hududiga olib kirilgan va olib chiqilgan tovarlar va xizmatlar uchun valyuta operatsiyalarini amalga oshirish tartibi.
3. Oʻzbekiston Respublikasi Transport vazirligi va Davlat bojxona qoʻmitasi erkin bojxona zonasi faoliyatini doimiy monitoring qilib borsin.
4. Ushbu qaror ijrosini nazorat qilish Oʻzbekiston Respublikasi transport vaziri I. Maxkamov va Oʻzbekiston Respublikasi Davlat bojxona qoʻmitasi raisi M. Azimov zimmasiga yuklansin.
Vazirlar Mahkamasining 2021-yil 21-oktabrdagi 652-son qaroriga ILOVA
“Uzbekistan Airways Technics” MCHJ erkin bojxona zonasi hududiga tovarlarni olib kirish, olib chiqish, havo kemalarini taʼmirlashda foydalanish, ularni tegishli rejimlarga rasmiylashtirish, shuningdek, ushbu tovarlar va xizmatlar uchun valyuta operatsiyalarini amalga oshirish tartibi toʻgʻrisida
1-bob. Umumiy qoidalar
1. Mazkur Nizom “Uzbekistan Airways Technics” MCHJ hududida tashkil etilgan erkin bojxona zonasiga (keyingi oʻrinlarda — erkin bojxona zonasi) tovarlarni olib kirish, olib chiqish, havo kemalarini taʼmirlashda foydalanish, ularni tegishli bojxona rejimlariga rasmiylashtirish, shuningdek, ushbu tovarlar va xizmatlar uchun valyuta operatsiyalarini amalga oshirish tartibini belgilaydi.
2. Ushbu Nizom maqsadlari uchun bojxona toʻgʻrisidagi qonunchilikda foydalaniladigan tushunchalar qoʻllaniladi.
3. Erkin bojxona zonasining faoliyatini tashkil etish va boshqarish “Uzbekistan Airways Technics” MCHJ tomonidan amalga oshiriladi.
Erkin bojxona zonasi hududidan va bino-inshootlaridan foydalanishga hamda havo kemalarini taʼmirlash va ularga xizmat koʻrsatish bilan bogʻliq ishlarga “Uzbekistan Airways Technics” MCHJ bilan tuzilgan shartnoma asosida ruxsat etiladi.
4. “Uzbekistan Airways Technics” MCHJning erkin bojxona zonasi boʻlgan maxsus (ajratuvchi) belgilar qoʻyilgan hududlari va binolari bojxona nazorati zonasi hisoblanadi. Bunda, erkin bojxona zonasi hududi bojxona hududida joylashgan deb qaraladi.
5. Erkin bojxona zonasi chegarasi orqali bojxona yuk deklaratsiyalari asosida olib oʻtiladigan tovarlar bojxona organlari tomonidan bojxona nazorati va rasmiylashtiruvidan oʻtkaziladi hamda hisobga olinadi.
6. Erkin bojxona zonasi faoliyat koʻrsatishini taʼminlash uchun foydalaniladigan mahalliy tovarlar bojxona rejimi ostida joylashtirilmaydi.
2-bob. Erkin bojxona zonasi hududida bojxona nazoratini taʼminlash talablari va shartlari
7. Erkin bojxona zonasining bojxona nazorati zonasi hisoblangan hudud, bino va inshootlari:
Oʻzbekiston Respublikasi qonunchilik hujjatlarida belgilangan texnik, sanitariya va yongʻinga qarshi talablarga javob berishi;
qoʻriqlash va yongʻin nazorati signalizatsiyalari, sodir boʻlayotgan voqealar boʻyicha har tomondan olingan video maʼlumotlarni uch oy davomida koʻrsatish imkoniga ega boʻlgan, texnik hujjat asosida davlat nazorati organlari tomonidan belgilangan joylarda oʻrnatilgan, vaqt boʻyicha uzluksiz ishlaydigan videokuzatuv vositalari bilan jihozlangan boʻlishi;
yongʻin xavfsizligi talablariga mos boʻlgan yongʻinni oʻchirish tizimi va vositalariga ega boʻlishi;
aviatsiya xavfsizligi nuqtai nazaridan qoʻriqlanishi;
inshootlarda erkin bojxona zonasiga oid maxsus (ajratuvchi) belgilar qoʻyilgan boʻlishi lozim.
8. Erkin bojxona zonasining normal faoliyat koʻrsatishi uchun doimiy ravishda quyidagilar boʻlishi zarur:
ortish-tushirish uskunalari va transport vositalari;
bojxona nazorati zonasi sifatida ishlatish uchun moʻljallangan, bino va inshootlarni, ochiq maydonchalarni, bojxona nazorati zonasiga bevosita tutashib ketgan butun hududni toʻliq nazorat qilish hamda bojxona organlariga video maʼlumotlarni uzatish, shuningdek, ushbu maʼlumotlarni uch oy davomida saqlash imkoniga ega boʻlgan vaqt boʻyicha uzluksiz ishlaydigan videokuzatuv tizimi;
aloqa vositalari (shu jumladan telefon, maʼlumot uzatish tarmogʻi, Internet jahon axborot tarmogʻi).
9. Erkin bojxona zonasi faoliyat koʻrsatadigan bino va inshootlardan bojxona organlari xodimlari normal xizmat olib borishlari uchun zarur jihozlar bilan taʼminlangan xizmat xonalari ajratiladi.
3-bob. Erkin bojxona zonasida faoliyat yurituvchi tadbirkorlik subyektlarining huquq va majburiyatlari
10. Erkin bojxona zonasida faoliyat yurituvchi tadbirkorlik subyektlari quyidagi huquqlarga ega:
bino va inshootlarning Oʻzbekiston Respublikasi qonunchilik hujjatlarida belgilangan texnik, sanitariya va yongʻinga qarshi talablarga javob berishini talab qilish;
oʻziga tegishli boʻlgan mulkdan foydalanishdan olingan sof foydani erkin tasarruf etish;
shartnoma doirasida ajratilgan bino va inshootlardan foydalanish;
tashqi muhandislik-texnik kommunikatsiyalarning barqaror ishlashini taʼminlashni talab etish;
aloqa vositalaridan (shu jumladan telefon, maʼlumot uzatish tarmogʻi, Internet jahon axborot tarmogʻi) foydalanish.
11. Erkin bojxona zonasida faoliyat yurituvchi tadbirkorlik subyektlari quyidagilarga majbur:
bojxona organining talabiga muvofiq erkin bojxona zonasidagi tovarlarni bojxona organining mansabdor shaxsi ishtirokida xatlovdan oʻtkazish;
sanitariya, tovarlarning yonma-yon qoʻyilishi qoidalariga va saqlash rejimiga, davlat standartlarining majburiy talablariga rioya qilish;
erkin bojxona zonasiga kirish uchun ruxsat berilgan xodimlarning (F.I.O., lavozimi koʻrsatilgan holda) roʻyxati mavjudligini taʼminlash;
erkin bojxona zonasida saqlanayotgan tovarlar turgan joyga kirishi toʻgʻrisida bojxona organlari mansabdor shaxslarining talablarini bajarish;
bojxona nazorati va bojxona rasmiylashtiruvini amalga oshirish uchun erkin bojxona zonasidagi jihozlangan binolar va aloqa vositalarini bojxona organlari xodimlariga bepul taqdim etish.
4-bob. Tovarlarni erkin bojxona zonasiga olib kirish, undan olib chiqish, ularni tegishli bojxona rejimlariga rasmiylashtirish va havo kemalarini taʼmirlashda foydalanish hamda ushbu tovarlar va xizmatlar uchun valyuta operatsiyalarini amalga oshirish
12. Erkin bojxona zonasiga havo kemalarini (shu jumladan, ularning qism va agregatlarini) taʼmirlash yoki ularga xizmat koʻrsatish maqsadida chetdan keltiriladigan aviatexnika ehtiyot qismlari va boshqa tovarlar “erkin bojxona zonasi” bojxona rejimiga rasmiylashtirish orqali joylashtiriladi hamda sertifikatlar va ruxsat etish xususiyatiga ega hujjatlar, istisno tariqasida, talab etilmaydi.
Bunda, taʼmirlash maqsadida erkin bojxona zonasiga olib kiriladigan havo kemalarining (shu jumladan, ularning qism va agregatlari) kirib-chiqishida bojxona nazorati ularni tegishli bojxona rejimlariga rasmiylashtirmagan holda amalga oshiriladi.
13. Chetdan keltiriladigan aviatexnika ehtiyot qismlari va boshqa tovarlarni “erkin bojxona zonasi” bojxona rejimiga joylashtirish uchun deklarant bojxona organiga uch ish kunidan oshmagan muddatda bojxona yuk deklaratsiyasini hamda tovarning tijorat va transport hujjatlarini taqdim etadi.
14. Erkin bojxona zonasida chetdan keltirilib “erkin bojxona zonasi” bojxona rejimida turgan tovarlar Oʻzbekiston Respublikasi hududidan olib chiqilganda, tegishlicha “reeksport” bojxona rejimiga rasmiylashtiriladi.
15. Erkin bojxona zonasi hududiga havo kemalarini (shu jumladan, ularning qism va agregatlarini) taʼmirlash yoki ularga xizmat koʻrsatish maqsadida mahalliy tovarlar bojxona rejimiga rasmiylashtirmagan holda olib kirilishi mumkin.
Bunda, mahalliy tovarlar:
“erkin bojxona zonasi” bojxona rejimiga joylashtirilmagan holda alohida bino(lar)da saqlanadi;
Oʻzbekiston Respublikasidan xorijiy davlat hududiga, shuningdek xorijiy havo kemalariga (shu jumladan, ularning qism va agregatlariga) oʻrnatilgan holda olib chiqilganda “eksport” bojxona rejimiga rasmiylashtiriladi.
16. Erkin bojxona zonasi hududida mahalliy aviakompaniyalarning havo kemalarini hamda ularning qism va agregatlarini taʼmirlash uchun zarur boʻlgan chetdan keltirilgan aviatexnika ehtiyot qismlari erkin bojxona zonasi chegarasidan chiqmagan holda xarid qilinib, “erkin muomalaga chiqarish” bojxona rejimiga rasmiylashtirilgan holda foydalaniladi.
17. Erkin bojxona zonasida tovarlar va xizmatlar uchun valyuta operatsiyalari qonunchilik hujjatlarida belgilangan tartibda olib boriladi.
5-bob. Yakunlovchi qoidalar
18. Erkin bojxona zonasiga taʼmirlash maqsadida olib kiriladigan havo kemalarining (shu jumladan, ularning qism va agregatlari) hamda “erkin bojxona zonasi” bojxona rejimiga rasmiylashtirilgan tovarlarning hisobi “Uzbekistan Airways Technics” MCHJ tomonidan yuritiladi hamda bu borada bojxona organlari oldida masʼul hisoblanadi.
Ushbu tovarlar yoʻqolganda yoki bojxona organlarining ruxsatisiz boshqa shaxslarga berib yuborilgan taqdirda, bojxona toʻlovlari toʻliq toʻlanadi.
19. Erkin bojxona zonasining faoliyati tugatilgan taqdirda, “erkin bojxona zonasi” bojxona rejimida turgan tovarlar erkin bojxona zonasi tugatilgan kundan eʼtiboran oʻn besh kalendar kun mobaynida tovarlarga vakolati boʻlgan shaxs tomonidan boshqa bojxona rejimiga joylashtiriladi.
Ushbu muddat oʻtib boʻlgach, bojxona organlari qonunchilik hujjatlariga muvofiq tegishli qonuniy choralarni koʻradi.
20. Mazkur Nizomning 19-bandida nazarda tutilgan muddat mobaynida koʻrsatib oʻtilgan tovarlar bojxona maqsadlari uchun “vaqtincha saqlash” bojxona rejimida turgan tovarlar hisoblanadi.
21. Mazkur Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.
Oʻzbekiston Respublikasining Bosh vaziri A. ARIPOV
Toshkent sh.,
2021-yil 21-oktabr,
652-son