📅 2021-yil 3-noyabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 3 ноябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 3 ноября 2021 г. · Постановления Кабинета Министров
Официальный текст. Официальный документ. Редакционные примечания не включены.
📅 3 November 2021 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Нефть ва газ тармоғи трансформациясини амалга оширишда ташқи молиялаштириш манбаларини диверсификация қилишнинг қўшимча чора-тадбирлари тўғрисида
Сўнгги йилларда нефть ва газ тармоғи корхоналарини молиявий соғломлаштириш ва тармоқда рақобатни ривожлантириш учун қулай шарт-шароитларни яратиш бўйича муайян ишлар олиб борилмоқда.
Ўзбекистон Республикаси Президентининг «2017 — 2021 йилларда Ўзбекистон Республикасини ривожлантиришнинг бешта устувор йўналиши бўйича ҳаракатлар стратегиясини «Ёшларни қўллаб-қувватлаш ва аҳоли саломатлигини мустаҳкамлаш йили»да амалга оширишга оид Давлат дастури тўғрисида» 2021 йил 3 февралдаги ПФ-6155-сон Фармони ижросини таъминлаш ҳамда Давлат кафолати иштирокисиз хорижий инвестицияларни жалб қилиш, «Ўзбекнефтгаз» АЖни молиявий соғломлаштириш мақсадида Вазирлар Маҳкамаси қарор қилади:
1. Қуйидагилар:
a) «Fitch Ratings» ва «S&P Global Ratings» халқаро рейтинг агентликлари томонидан «Ўзбекнефтгаз» АЖга Ўзбекистон Республикасининг суверен рейтинги «ВВ-» (барқарор) даражасидаги кредит рейтинглари берилганлиги;
«DeGolyer & MacNaughton» (АҚШ) компанияси томонидан углеводород захираларини баҳолаш бўйича халқаро стандартларга (PRMS) мувофиқ «Ўзбекнефтгаз» АЖ конларининг 2017 — 2020 йиллар учун углеводород захиралари аудити ўтказилганлиги;
«Ernst & Young» (Буюк Британия) халқаро аудиторлик компанияси томонидан «Узбекнефтгаз» АЖнинг 2017 — 2020 йиллар учун молиявий ҳисоботнинг халқаро стандартларига (МҲХС) мувофиқ консолидациялашган молиявий ҳисоботи аудити ўтказилганлиги;
б) «Ўзбекнефтгаз» АЖнинг халқаро облигацияларини чиқариш ва жойлаштириш доирасида корпоратив ва халқаро облигациялар рейтингларини олиш учун «S&P Global Ratings», «Fitch Ratings», «Moodyʼs Investorʼs Service» рейтинг агентликлари ҳамда юридик хизматлар кўрсатиш учун «White & Case LLP» юридик фирмаси билан тегишли битимлар имзоланганлиги;
в) «Ўзбекнефтгаз» АЖ томонидан энг яхши таклифларни танлаб олиш натижалари асосида:
халқаро облигацияларни чиқариш ва жойлаштиришни ташкиллаштириш учун «Bank GPB Intemational S.A.», «Citigroup Global Markets Limited», «J.P. Morgan Securities plc.» ва «MUFG Securities EMEA plc.» компаниялари (кейинги ўринларда — ташкилотчи компаниялар) танланганлиги;
халқаро облигацияларни чиқариш ва жойлаштириш доирасида ишончли вакил — «BNY Mellon Corporate Trustee Services Limited», тўлов агенти — «The Bank of New York Mellon (London Branch)», листинг ва рўйхатга олувчи агент — «The Bank of New York Mellon SA/NV (Dublin Branch)» компаниялари танлаб олинганлиги;
г) халқаро тажриба ҳамда республикада амалга оширилган тегишли эмиссияларнинг натижаларидан келиб чиққан ҳолда, «Узбекнефтгаз» АЖ томонидан халқаро облигацияларни Лондон фонд биржасида (The London Stock Exchange) жойлаштириш режалаштирилганлиги маълумот учун қабул қилинсин.
2. Қуйидагилар:
Энергетика вазирлиги ва «Ўзбекнефтгаз» АЖнинг — 2021 йил ноябрь ойида 700 миллион АҚШ доллари миқдоригача халқаро облигацияларни чиқариш ва жойлаштиришни ташкиллаштириш тўғрисидаги;
Молия вазирлиги ва «Узбекнефтгаз» АЖнинг — халқаро облигацияларни чиқариш ва жойлаштиришдан тушган маблағларни Молия вазирлиги Ғазначилигида «Узбекнефтгаз» АЖнинг ғазначилик ҳисобрақамига ўтказиш ҳамда жамият эҳтиёжларига ишлатиш йўналишларини Молия вазирлиги билан келишган ҳолда белгилаш тўғрисидаги таклифлари маъқуллансин.
Бунда, «Ўзбекнефтгаз» АЖ томонидан:
мавжуд қарз битимларида (шартномаларида), шунингдек ушбу қарорда кўзда тутилган халқаро облигацияларни чиқариш учун эмиссия рисоласида қабул қилинган молиявий шарт ва талаблар (ковенантлар) бузилмаслиги ва тегишли давр мобайнида бажарилиши;
халқаро облигацияларни чиқариш ва жойлаштиришда зарур ҳисобланадиган расмий ҳужжатларда (шу жумладан, эмиссия рисоласида) жамиятнинг барча фаолият йўналишлари ҳамда берилган кафолатлари билан боғлиқ бўлган маълумотларнинг ёритиб берилиши таъминлансин.
3. «Узбекнефтгаз» АЖга, истисно тариқасида, халқаро облигацияларни чиқариш ва жойлаштириш доирасида тўғридан-тўғри музокаралар асосида ҳамда Иқтисодий тараққиёт ва камбағалликни қисқартириш вазирлиги ҳузуридаги «Лойиҳалар ва импорт контрактларни комплекс экспертиза қилиш маркази» ДУКдан экспертизадан ва рўйхатдан ўтказмасдан:
а) қуйидаги ташкилотлар билан шартномаларни ва уларга қўшимча келишувларни имзолашга:
«Ernst & Young» халқаро аудиторлик ташкилоти билан «Ўзбекнефтгаз» АЖнинг 2021 йил молиявий ҳисоботларини ташқи аудитдан ўтказиш ва аудиторлик ташкнлотнинг комфорт хатини (comfort letter) бериш хизматларини бажариш бўйича;
ташкилотчи компаниялар ёки уларнинг аффилланган шахслари билан хизматлар кўрсатиш бўйича;
халқаро облигацияларни чиқариш ва жойлаштириш доирасида ишончли вакил — BNY Mellon Corporate Trustee Services Limited, тўлов агенти — The Bank of New York Mellon (London Branch), листинг ва рўйхатга олувчи агент — The Bank of New York Mellon SA/NV (Dublin Branch) компаниялари билан тегишли процессуал хизматлар кўрсатиш бўйича;
Лондон фонд биржаси (The London Stock Exchange) билан халқаро облигацияларни жойлаштириш бўйича;
б) ташкилотчи компаниялар томонидан жалб қилинган юридик консультантлар, виртуал маълумотлар хоналари провайдерлари, таржимонлар хизматлари ва ушбу жараёнлар учун зарур бўлган бошқа хизматлар бўйича молиявий харажатларни ташкилотчи компаниялар тақдим этган ҳужжатларга мувофиқ тўлаб беришга рухсат берилсин.
4. Молия вазирлиги, Энергетика вазирлиги, Давлат активларини бошқариш агентлиги ва «Узбекнефтгаз» АЖ қонунчиликда белгиланган тартибда «Ўзбекнефтгаз» АЖнинг халқаро облигацияларини чиқариш ва жойлаштириш юзасидан корпоратив бошқарув органларида тегишли ҳужжатларнинг расмийлаштирилишини таъминласин.
5. Мазкур қарорнинг бажарилишини назорат қилиш Ўзбекистон Республикаси Бош вазирининг молия-иқтисодиёт ва камбағалликни қисқартириш масалалари бўйича ўринбосари — иқтисодий тараққиёт ва камбағалликни қисқартириш вазири Ж.А. Қўчқоров, энергетика вазири А.С. Султанов ва «Узбекнефтгаз» АЖ бошқаруви раиси М.Р. Абдуллаев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2021 йил 3 ноябрь,
668-сон
Oʻzbekiston Respublikasi Vazirlar Mahkamasining
qarori
Neft va gaz tarmogʻi transformatsiyasini amalga oshirishda tashqi moliyalashtirish manbalarini diversifikatsiya qilishning qoʻshimcha chora-tadbirlari toʻgʻrisida
Soʻnggi yillarda neft va gaz tarmogʻi korxonalarini moliyaviy sogʻlomlashtirish va tarmoqda raqobatni rivojlantirish uchun qulay shart-sharoitlarni yaratish boʻyicha muayyan ishlar olib borilmoqda.
Oʻzbekiston Respublikasi Prezidentining “2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha harakatlar strategiyasini “Yoshlarni qoʻllab-quvvatlash va aholi salomatligini mustahkamlash yili”da amalga oshirishga oid Davlat dasturi toʻgʻrisida” 2021-yil 3-fevraldagi PF-6155-son Farmoni ijrosini taʼminlash hamda Davlat kafolati ishtirokisiz xorijiy investitsiyalarni jalb qilish, “Oʻzbekneftgaz” AJni moliyaviy sogʻlomlashtirish maqsadida Vazirlar Mahkamasi qaror qiladi:
1. Quyidagilar:
a) “Fitch Ratings” va “S&P Global Ratings” xalqaro reyting agentliklari tomonidan “Oʻzbekneftgaz” AJga Oʻzbekiston Respublikasining suveren reytingi “VV-” (barqaror) darajasidagi kredit reytinglari berilganligi;
“DeGolyer & MacNaughton” (AQSh) kompaniyasi tomonidan uglevodorod zaxiralarini baholash boʻyicha xalqaro standartlarga (PRMS) muvofiq “Oʻzbekneftgaz” AJ konlarining 2017 — 2020-yillar uchun uglevodorod zaxiralari auditi oʻtkazilganligi;
“Ernst & Young” (Buyuk Britaniya) xalqaro auditorlik kompaniyasi tomonidan “Uzbekneftgaz” AJning 2017 — 2020-yillar uchun moliyaviy hisobotning xalqaro standartlariga (MHXS) muvofiq konsolidatsiyalashgan moliyaviy hisoboti auditi oʻtkazilganligi;
b) “Oʻzbekneftgaz” AJning xalqaro obligatsiyalarini chiqarish va joylashtirish doirasida korporativ va xalqaro obligatsiyalar reytinglarini olish uchun “S&P Global Ratings”, “Fitch Ratings”, “Moodyʼs Investorʼs Service” reyting agentliklari hamda yuridik xizmatlar koʻrsatish uchun “White & Case LLP” yuridik firmasi bilan tegishli bitimlar imzolanganligi;
v) “Oʻzbekneftgaz” AJ tomonidan eng yaxshi takliflarni tanlab olish natijalari asosida:
xalqaro obligatsiyalarni chiqarish va joylashtirishni tashkillashtirish uchun “Bank GPB Intemational S.A.”, “Citigroup Global Markets Limited”, “J.P. Morgan Securities plc.” va “MUFG Securities EMEA plc.” kompaniyalari (keyingi oʻrinlarda — tashkilotchi kompaniyalar) tanlanganligi;
xalqaro obligatsiyalarni chiqarish va joylashtirish doirasida ishonchli vakil — “BNY Mellon Corporate Trustee Services Limited”, toʻlov agenti — “The Bank of New York Mellon (London Branch)”, listing va roʻyxatga oluvchi agent — “The Bank of New York Mellon SA/NV (Dublin Branch)” kompaniyalari tanlab olinganligi;
g) xalqaro tajriba hamda respublikada amalga oshirilgan tegishli emissiyalarning natijalaridan kelib chiqqan holda, “Uzbekneftgaz” AJ tomonidan xalqaro obligatsiyalarni London fond birjasida (The London Stock Exchange) joylashtirish rejalashtirilganligi maʼlumot uchun qabul qilinsin.
2. Quyidagilar:
Energetika vazirligi va “Oʻzbekneftgaz” AJning — 2021-yil noyabr oyida 700 million AQSh dollari miqdorigacha xalqaro obligatsiyalarni chiqarish va joylashtirishni tashkillashtirish toʻgʻrisidagi;
Moliya vazirligi va “Uzbekneftgaz” AJning — xalqaro obligatsiyalarni chiqarish va joylashtirishdan tushgan mablagʻlarni Moliya vazirligi Gʻaznachiligida “Uzbekneftgaz” AJning gʻaznachilik hisobraqamiga oʻtkazish hamda jamiyat ehtiyojlariga ishlatish yoʻnalishlarini Moliya vazirligi bilan kelishgan holda belgilash toʻgʻrisidagi takliflari maʼqullansin.
Bunda, “Oʻzbekneftgaz” AJ tomonidan:
mavjud qarz bitimlarida (shartnomalarida), shuningdek ushbu qarorda koʻzda tutilgan xalqaro obligatsiyalarni chiqarish uchun emissiya risolasida qabul qilingan moliyaviy shart va talablar (kovenantlar) buzilmasligi va tegishli davr mobaynida bajarilishi;
xalqaro obligatsiyalarni chiqarish va joylashtirishda zarur hisoblanadigan rasmiy hujjatlarda (shu jumladan, emissiya risolasida) jamiyatning barcha faoliyat yoʻnalishlari hamda berilgan kafolatlari bilan bogʻliq boʻlgan maʼlumotlarning yoritib berilishi taʼminlansin.
3. “Uzbekneftgaz” AJga, istisno tariqasida, xalqaro obligatsiyalarni chiqarish va joylashtirish doirasida toʻgʻridan toʻgʻri muzokaralar asosida hamda Iqtisodiy taraqqiyot va kambagʻallikni qisqartirish vazirligi huzuridagi “Loyihalar va import kontraktlarni kompleks ekspertiza qilish markazi” DUKdan ekspertizadan va roʻyxatdan oʻtkazmasdan:
a) quyidagi tashkilotlar bilan shartnomalarni va ularga qoʻshimcha kelishuvlarni imzolashga:
“Ernst & Young” xalqaro auditorlik tashkiloti bilan “Oʻzbekneftgaz” AJning 2021-yil moliyaviy hisobotlarini tashqi auditdan oʻtkazish va auditorlik tashknlotning komfort xatini (comfort letter) berish xizmatlarini bajarish boʻyicha;
tashkilotchi kompaniyalar yoki ularning affillangan shaxslari bilan xizmatlar koʻrsatish boʻyicha;
xalqaro obligatsiyalarni chiqarish va joylashtirish doirasida ishonchli vakil — BNY Mellon Corporate Trustee Services Limited, toʻlov agenti — The Bank of New York Mellon (London Branch), listing va roʻyxatga oluvchi agent — The Bank of New York Mellon SA/NV (Dublin Branch) kompaniyalari bilan tegishli protsessual xizmatlar koʻrsatish boʻyicha;
London fond birjasi (The London Stock Exchange) bilan xalqaro obligatsiyalarni joylashtirish boʻyicha;
b) tashkilotchi kompaniyalar tomonidan jalb qilingan yuridik konsultantlar, virtual maʼlumotlar xonalari provayderlari, tarjimonlar xizmatlari va ushbu jarayonlar uchun zarur boʻlgan boshqa xizmatlar boʻyicha moliyaviy xarajatlarni tashkilotchi kompaniyalar taqdim etgan hujjatlarga muvofiq toʻlab berishga ruxsat berilsin.
4. Moliya vazirligi, Energetika vazirligi, Davlat aktivlarini boshqarish agentligi va “Uzbekneftgaz” AJ qonunchilikda belgilangan tartibda “Oʻzbekneftgaz” AJning xalqaro obligatsiyalarini chiqarish va joylashtirish yuzasidan korporativ boshqaruv organlarida tegishli hujjatlarning rasmiylashtirilishini taʼminlasin.
5. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — iqtisodiy taraqqiyot va kambagʻallikni qisqartirish vaziri J.A. Qoʻchqorov, energetika vaziri A.S. Sultanov va “Uzbekneftgaz” AJ boshqaruvi raisi M.R. Abdullayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2021-yil 3-noyabr,
668-son